العزوبية و العنوسة و محاورات المصريين

[عادل أبوزيد]

عنوان الموضوع غريب لماذا لا يكون مثلا "الزواج و محاورات المصريين" و لكني أقصده بالكامل كل يوم يتأكد هاجس فى نفسي عن حجم مشكلة العزوبية و العنوسة فى مصر

ما سبق كان إستهلالا لابد منه

من وقت طويل رفضنا - و ربما كنا على حق وقتها - فكرة مجرد فكرة أن نقوم بأى دور فى مسألة إختيار شريك أو شريكة الحياة و كانت هناك طلبات كثيرة من المغتربين أو المقبلين على الهجرة هل ترانا كنا على حق ؟

إذا ما الذي حدث و أصبح ما كنت أرفضه من سنوات أفتح موضوعا خصيصا له.

نظرت حولي فى الأسرة و من نعرفهم

وجدت ربما دستة بنات خريجات الجامعة و يشغلون وظائف جيدة و جميلات و بنات أصول و من الجانب الآخر أعرف و أسمع عن العشرات من الشبان الذين يبحثون عن شريكة الحياة و من الناحية الرياضية البحتة حط دول على دول و نبقى خالصين و لكن هذا مجرد كلام نظرى

أنظروا إلى الخبر التالي فى جريدة المصري اليوم فى عدد أمس.

[عادل أبوزيد]

هذا الموضوع لا يعني أننا لى قناعة بفعل شيئ ما فيما يتعلق بصعوبة الوصول إلى شريك أو شريكة العمل و لكننا فقط نفتح باب الحوار و إذا وصلنا لرؤية معقولة كان بها.

[ذهبية]

ااؤيد مثل تلك المشاريع لكن بشرط الجدية و الا تكون لطريق اخررررر

لان مثل تلك المكاتب بيكون فية شبهات كثيرة جداااا

الفكرة ليست بالجديدة بل قديمة جداااا

فى محافظتنا العديد من تلك المشاريع و المكاتب و نجح على ايدهم فعلا العديد من الزوجات الناجحة

خاصة انى اكتشفت ان تعليم المراءة ادى الى زيادة طموحها فى شريك حياتها بالتبعية

واصبح الاختيار الان ليس بالقلب بل اصبح العقل هو المتحكم

و اصبحت حسابات العقل من حيث المستوى الثقافى وة الاجتماعى و المادى هو الاقرب للمفاضلة و الاختيار

لذلك انتشرت تلك المكاتب

بل انتشر الزواج عن النت بطريقة تكون اكثر بكثيررررر من المكاتب خاصة انها بدون اتعاب و ببلاش و بيكون اسهل

انا شخصيا احبذ تلك الطرق طالما ادت الى حلال ربنا

لكن بشروط ان يكون فيها حضور الاهل من اول لحظة و لا تكون دى فرصة لتعارف غير محمود

ان يكون من وسيط موثوق فى اخلاقة و تدينة

ان يراعى الفتى و الفتاة ربنا وتكون البيانات صحيحة و ليست فيها خداع او تزوير

لان استخدمت تلك الوسيلة من بعض الاشخاص فى الضحك على بنات الناس و سرقتها

زى ما كل حاجة ليها عيوب و مميزات بردة الطريقة دى ليها عيوب و مميزات و لازم الكل يكون عارفاها

[لماضة مصرية جدا]

السلام عليكم و رحمة الله و بركاته

العزوبية

العنوسة

محاورات المصريين

يعني انا متفقة مع حضرتك ان العنوان طبعا غريب

لاني ببساطة قولت في سري...ايون هي بقي محاورات المصريين هي السبب وراء ازمة العزوبية و العنوسة في مصر...طبعا مش بنقعد عليها اكتر مع بنقعد مع اهالينا يعني

و لما حاولت افهم الطرح اللي حضرتك بتقدمه اللي فهمته و حضرتك تصححلي ان محاورات المصريين ممكن تكون شكل لحل مشكلة ان كل واحد مش لاقي نص التفاحة التاني صح؟؟؟

طب هل اللي حضرتك بتطرحه مختلف عن اللي كنا اتكلمنا فيه من قبل عن الزواج عن طريق الانترنت و كانت فيه وجهات نظر كتير ما بين مؤيد و معارض و كلها وجهات نظر شخصية

وجهة نظري الشخصية في فكرة الزواج عن طريق الانترنت كنت طرحتها قبل كده من فترة حوالي سنة تقريبا

و خلال السنة دي ابتديت استكشف اراء ناس حواليا كتير من باب ان الواحد يفهم قناعات الناس التانية...(يعني اللي هما مش شبهك اوي يعني)

و لقيت ان دلوقتي بقي فيه تقبل اكبرلافكار يمكن كنا مختلفين عليها او مششككين في مدي جديتها من قبل

يعني من الاراء اللي سمعتها من صديقة ليا مخطوبة حاليا و اتعرفت علي خطيبها عن طريق الفيس بوك ع فكرة

قالتلي

يعني هو اصلا كان حد مصدق ان الثورة هتقوم من خلال الفيس بوك اساسا و اهي الدعوة انتشرت هنا و نزلت علي ارض الواقع

نفس الفكرة هي طبقتها

اتعرفت علي خطيبها في الفيس لكنها نزلت بالتجربة لارض الواقع

و طبعا دي تجربة شخصية جدا مقدرشي اعممها لكني بعتبرها تجربة تستحق التوقف و خصوصا ان كان ليا راي مغاير في الموضوع من فترة ما

و لو اتكلمنا عن المحاورات هنا بشكل اكثر تحديدا معتقدشي ان حد و هو بيكتب بيبقي حاطط في باله انه بيدور علي عروسة اونلانيةاو عريس عنده سبعميت مشاركة من بيت عيلة محاورات المصريين

لكن المشاركة و التفاعل اللي المفرض و بيحصل من غير تصنع و لفترة طويلة متهيالي بيخلينا نقدر نشوف جزء "حقيقي" من الناس اللي بنتواصل معاهم

انا اتواصلت مع عضوات هنا في المنتدي في الحقيقة و اذهلني جدا اني حبيتكم في الحقيقة اوي اكتر من المنتدي الصراحة....يعني هما حلوين ع المنتدي بس في الحقيقة و في التواصل الانساني القريب حسيت ليهم حلا انساني اكبر من حدود الكلمات و ده اللي اكدلي ان اختياري اني اقابل ناس معرفهاش في ارض الواقع كان اختيار محسوب و صح جدا بفضل الله

ده انطباعي عن التواصل عن طريق المنتدي و تجربتي من ارض الواقع

معرفشي هل دي تكفي في حالة ارتباط..مقدرشي اقرر...لان الارتباط اكيد هيبقي ليه تواصل تاني

بس قد تكون المحاورات بداية

و زمان كان استاذي في الجامعة يقولي بدل ما تسالي احنا بنعمل ده ليه دايما قولي لنفسك ليه لا

و برضه دي وجهة نظر شخصية مقدرشي اعممها

بس خلاص