مرة أخرى ولن نسكت ... نُحذر من ثورة الجياع في مصر

[se_ Elsyed]

زي ما كان في إرهاصات ومؤشرات بتدل على قرب حدوث ثورة في مصر ... والحمد لله إنها ثورة قادها مثقفون وناس ليسوا بمخربين بل بالعكس كان فيها ناس مستوياتهم المادية عالية جداً ومش محتاجين حاجه .. والثورة أبهرت العالم كله لسمليتها وتحضرها ورُقيها

لكن مع كل أسف إننا وبمنتهى السذاجة سلمنا الثورة لناس ليسوا امناء عليها وعملوا ضد الثورة وقتلوا فينا روحها ببطء

وها نحن الان وكل الدلائل بتقول أننا إذا لم نتحرك بسرعة ونحتوي هذه الأرهاصات ... فسوف يحدث ما لا يحمد عقباه ... وثورة جياع ستأكل الأخضر واليابس وإحنا اول ناس هانتاكل

خدوا عندكم :

- من أسبوع قام مجموعة من الناس بأقتحام مشروع بيت العيلة في منطقة 6 اكتوبر واحتلوا أكتر من 800 شقة ووحده سكنية ... وناس جايه من بعيد يعني حتى مش ساكنين أو عايشين قريب من مدينة 6 اكتوبر . واقمت قوات الجيش والشرطة بسحلهم وطردهم من تلك الوحدات واعتقلت منهم الكثيرين .....

تابع موضوع المعالجات الامنية للمشاكل المستعصية

الناس دي غلطانين بكل تأكيد .. فليس هكذا تؤخذ الحقوق او يُطالب بها

لكن حد فكر يقعد معاهم ويسمع لهم ويدرس حالتهم ؟

حد فينا سمع مقتطفات مما قالوه يا جماعة ؟

على فكرة سمعت اقوال بعض منهم في التليفزيون ... بامانة لا يفرق كثير عما نقوله هنا ونحن مرتاحين وتحت التكييف ... ثروات في البلد لا يعرفون أين تذهب .... مستويات مادية لناس كتيرة ي مصر تستفزهم هم .... مستويات أخرى لا تجد قوت يومها .... ملايين عايشين في عشوائيات كالاموات ... ثورة قامت عشان تحقق العدالة الإجتماعية والكرامة وتوفر لهم العيش ... مرت 10 شهور الأن وازدادوا فقراً على فقرهم

2- برنامج أول أمس لمجدي الجلاد إسمه " لازم نفهم " طبعاً مالوش دعوة بموضوع 6 اكتوبر ده ... لإت تم إعداده من فترة وأقنعوا ناس من العمال الفواعلية اللي بنشوفهم في ميادين كتيرة بيشيلوا طوب ورمل وحاجات من دي وسجل معاهم مجدي الجلاد .. بجد شيء في منتهى البشاعة .. وبالنص كده قالها مجدي الجلاد وكثير من الحضور إن هناك نواقيس خطر لابد أن تدق الان .. لإن عدد الناس دي مش قليل ... فلما تسمع كلام من واحد منهم عنده 55 سنة أقسم بالله انا قولت عنده 70 من البؤس والشقاء .. وتعرف إن عينه ضاعت لإن ما معهوش 150 جنية يشتري عدسة زجاجية كانوا محتاجينها في المستشىف الحكومي اللي واحد دكتور محترم هناك سعى في الموضوع واصدر له أمر علاج على نفقة الدولة بكام ألف لكن الامر كان مش بيوفر الحاجات دي ... فما عملش العملية وعينه راحت .. والتانية حنت لها وقربت تروح ... وإنه شخص بيعيش اليوم بيومه ... إسمعوا بقى قال إيه :

- روحت في مرة اشيل رمل في أحدى الفلل .. لقيتهم مربيين كلب ومسكنينه في بيت من الرخام .. وتكييف ... ومياه سخنه وباردة .. ولقيته بياكل لحمه وأكل تاني غريب ... اتمنيت اكون زيه لأن انا واولادي مش بنشوف اللحمه الا من العيد للعيد .. وأنا كل يوم أقوم الصبح الساعة 6 قبل ولادي ما يقوموا يروحوا المدرسة ويقولوا يا بابا عاوزين مصروف .

- أقسم بالله أنا لا أعرف إسم واحد من أسامي الناس اللي موجودين في الحكومة .. لكن بأسمع عن فلوس متلتلة بره مصر وجواها .. وبسامع عن دخل قنال السويس .. ودخل السياحة ... طب فين ده كله وأنا كل اللي محتاجه 4 حيطان بس أعيش فيهم أنا وعيالي وأي مشروع صغير ولو شوية حرنكش أفرش بهم قدامم مدرسة

عجبكم الكلام ؟

طب ... خدوا كمان

الشاب اللي مات أول امبارح في سجن طره وقالوا تعذيب وقالوا جرعة مخدرة و و و .. مش هاتكلم وأتسرع قبل ما نسمع تقرير محترم يبين الحالة ... أنا هاتكلم على اللي شوفته النهاردة لما سجلوا مع اهله في منزلة بالبساتين ...

أقسم بالله العظيم شيء ولا في الخيال ... وحاجه غير ادمية بالمرة ... ولا تعرف إذا كان ده بيت ولا حمام ولا عشة فراخ ولا ولا ولا

وبرضوا بنشوف ونطنش وشوفنا نفس البيت بتاع قاتل بنت ليلى غفران وصديقتها وسكتنا

[ابو محمود]

ماتخفش يا عم الحاج مصر لن تخرب عارف لية علشان فيها ناس زيك طيبة بس ربنا يبعد عنا الشياطين ونخلص بقى والعجلة تلف بدل ماهى مربعة ياعم الحاج محدش بينام من غير عشى

اصبر يمكن يطلع الواد يستاهل وياريت ما تحكمش بالمشاعر فى ناس كتير ربنا عمل فيهم كدة علشان دة يستحقوة صدقنى لا بد ان نحترم التحقيق وعند خروج القارير لو لة حق مش هيتساب

[احمد رضوان]

ياعم الحاج محدش بينام من غير عشى

اصبر يمكن يطلع الواد يستاهل

الكلام ده كان ممكن يتقبل قبل الثورة ، لكن بعد الثورة بعد الناس ما صرخت باللى بتعانيه اتضح ان كان فيه ملايين بتبات من غير عشا ومين غدا كمان ، وكمان الثورةلما قامت كان شعارها عيش - حرية - كرامة يبقى لما نشوف اللى بيحصل ده للإنسان المصري اللى ملوش ضهر يبقى فين هي الكرامة اللى ماتن علشانها شباب زي الورد

[wsadani]

هى مش هتبقى ثورة جياع وبس دى ثورة ناس مش لاقية حته تقعد فيها

فى حاجتين فى موضوع مشكلة مشروع بيت العائلة

1- انا سمعت ان الناس الى راحوا دول كانوا من الدويقة

2- المبانى خلاصانه من 2009 محدش سكن فيها ليه ؟؟؟؟؟؟؟؟!

[aimen]

جياع مين وبتاع ايه ؟

حد شاف الحمبولى المرشح الجديد لوزارة الداخلية بدلا العيسوى - اجدع ناس - ؟

والحمبولى يا مؤمنين هو كما اسمع الذراع اليمنى لخط الصعيد

الحمبولى عمل عملية سطو

البوليس راح يدور عليه لم يجده

قبض على ابنه

الحمبولى خطف منظاد وقال للبوليس تبادلنى

قام العيسوى نقل مدير امن الأقصر الى اسوان علشان الانفلات الأمنى

ولا زال الحمبولى حرا طليقا

وابقى سلمى لى على الداخلية والجيش ....

لمزيد من حكايات الحمبولى

مصدر أمني: أسلحة "الحمبولى" بالأقصر تفوق ما تملكه الداخلية مما يُصعّب من القبض عليه

كد مصدر أمني "لبوابة الأهرام" أن ياسر الحمبولى و عصابته يمتلكون المئات من الأسلحة والذخائر المصنعة خارج مصر مضيفا أنه قام باستيرادها من الخارج مؤكدا أن نجل الحمبولى كان على هاتفة صور لذخائر وأسلحة غريبة الشكل .

وأضاف أن الحمبولى يملك من أسلحة ما يفوق ما تملكه الداخلية من ذخائر وأسلحة في الأقصر مما يجعل قضية القبض علية صعبة جدا.

وكانت مباحث الأقصر قد أطلقت ظهر أمس الجمعة سراح نجل الحمبولي بعد قيامه بسرقة منطاد سياحي لإرغام الشرطة على إرجاع نجله.

حيث قامت مباحث الأقصر بالقبض على حشمت ياسر الحمبولى (13 سنة) لإرغام والده على تسليم نفسه مما جعل الحمبولي يسرق منطادا تابعا لإحدى الشركات السياحية بالأقصر، وذلك للتفاوض مع أجهزة الأمن على الإفراج عن ابنه.

وكان عمال شركة "ألاسكا" للبالون الطائر قد فوجئوا بعد انتهاء رحلة المنطاد وهبوطه على الأرض بجوار فندق السوفتيل بالكرنك، بمجموعة مسلحة آليا مكونة من 15 فردا يتزعمهم المدعو ياسر الحمبولى، واختطفوا السيارة رقم 3467 نقل الأقصر التابعة للشركة والتي كانت تحمل المنطاد.

طلب ياسر الحمبولى أحد أكبر المسجلين خطر بالأقصر من أصحاب شركة "ألاسكا" الحصول على 150 الف جنيه مقابل استعادة المنطاد الطائر، جاء ذلك بعد تفاوض أصحاب الشركة مع عضو مجلس الشعب الأسبق رضوان قرين من عائلة القرينات بمركز الزينة شمال الأقصر من أجل إقناع الحمبولي لإعادة المنطاد السياحي.

وفي نفس السياق أكد مصدر أمنى لـ "بوابة الأهرام" أن الحمبولي طلب من أصحاب الشركة السياحية دفع 150 ألف جنيه مقابل استعادة المنطاد والسيارة التي كانت تحمله.

وكانت مباحث الأقصر قد أطلقت ظهر أمس الجمعة سراح نجل الحمبولي بعد قيامه بسرقة منطاد سياحي لإرغام الشرطة على إرجاع نجله.

وكانت مباحث الأقصر قد ألقت القبض في وقت سابق على حشمت ياسر الحمبولى (13 سنة) لإرغام والده على تسليم نفسه مما جعل الحمبولي يسرق منطادا تابعا لإحدى الشركات السياحية بالأقصر، وذلك للتفاوض مع أجهزة الأمن على الإفراج عن ابنه.

وكان عمال شركة "ألاسكا" للبالون الطائر قد فوجئوا بعد انتهاء رحلة المنطاد وهبوطه على الأرض بجوار فندق السوفتيل بالكرنك، بمجموعة مسلحة آليا مكونة من 15 فردا يتزعمهم ياسر الحمبولى، واختطفوا السيارة رقم 3467 نقل الأقصر التابعة للشركة والتي كانت تحمل المنطاد.

يذكر أن ياسر الحمبولى سبق اتهامه في 17 قضية سرقة مواشٍ حكم عليه بـ3 سنوات سجن، وهرب من أحد السجون بمحافظة قنا في ظل الانفلات الأمني الذى شهدته مصر أيام ثورة 25 يناير، وأثارت عودته الرعب في قلوب عدد من أهالي قرية الزينية شمال الأقصر، خصوصا بعد محاولته التعدي على عدة أشخاص، حيث قام من عدة شهور بالهجوم على محطة بنزين في قرية البياضية جنوب الأقصر، وتمكن من سرقة 42 ألف جنيه، وإصابة أحد العاملين بها.

كما قام بالهجوم على محطة أخرى وقتل العامل الذي كان بها، كما اتهم وعصابته من عدة أيام بسرقة سيارة نقل بمنطاد آخر بالإضافة إلى السطو المسلح على عدة صيدليات ومحال تجارية، وسرقة محتوياتها بالكامل، والكثير من عمليات ترويع المواطنين عن طريق الإطلاق المتكرر للنيران، كما كان الذراع اليمنى لخط الصعيد هاشم العزب الذي حكم عليه بالإعدام في قضية مقتل رئيس مباحث القصير، واشترك الحمبولى مع الخط في عمليات كثيرة روعت أمن المواطنين بالأقصر.

الحمبولى اهرا م اليوم

الداخلية بتاعتنا مش فاضية للتفاهات دى واحد سرق منطاد ولا واحد بلطحى فى منطقة يفترض انها اثرية وسياحية من الطراز الأول

الداخلية فاضية لإلغاء لقاء البرادعى امس فى جامعه عين شمس لدواعى امنية

الداخلية من الأخر هى البلطجية ولا عزاء لنا

[احمد رضوان]

أسمحلي بس يا أستاذ أيمن اوضح كام نقطة

الحمبولي بلطجي قاطع طريق وخط الصعيد .... عمل عملية سطو مسلح

الشرطة اللى بتحمينا وبتطبق القانون .................... خطفت إبنه علشان تساومه ..... يعني بلطجي رسمي

الحمبولي عرف إن الموضوع كله بلطجة في بلطجة ............. هوب خطف منطاد سياحي

الشرطة إتورطت ....................... إضطرت تسيب إبن الحمبولي

والنتيجة ........... الحمبولى حر طليق يحلق بالمنطاد الآن ليشاهد آثار الفراعنة بس مش عارف ينزل العجل لأن البدال معلق

----------------------

لمحبي الطهو تقدم لكم هذ الوجبة ... صينية الوكسة بالنيلة

كوباية بلطجة بس تكون دسمة وسلاح يكون بالكوم

أربع معلقة شرطة مبتعرفش

عدد واحد ولد صغير ملوش ذنب

حبة قانون مترمط معانا وياريت نعجنه قبل الإضافة

عملية خطف طفل وعملية خطف منطاد

نقلب المقادير لحد ما تغلي

وبعدين بالهنا والشفا

رجاءً لا تجرب الوصفة بأعلى لأنها ذات مخاطر مرتفعة

تم تعديل 30 أكتوبر 2011 بواسطة Radws

[ابراهيم عبد العزيز]

ما يوجع القلب أن هناك كثير من أبناء الوطن لا يجدون قوت يومهم ولا يجدون أرعة جدران يسترون فيها أنفسهم

مقولة ( محدش بينام من غير عشا ) غير صحيحة فهناك المئات ( ولن أقول الألاف ) ينامون بدون وجبة عشاء

صدقني يا أخي سي السيد , هذه الجملة فى تعليقك ألمتني جدا :

روحت في مرة اشيل رمل في أحدى الفلل .. لقيتهم مربيين كلب ومسكنينه في بيت من الرخام .. وتكييف ... ومياه سخنه وباردة .. ولقيته بياكل لحمه وأكل تاني غريب ... اتمنيت اكون زيه لأن انا واولادي مش بنشوف اللحمه الا من العيد للعيد ..

لا حول ولا قوة إلأ بالله العلي العظيم

وصدقني هذه ليست مبالغة والله يا أخي سي السيد

مصر فيها ظلم كبير جدا في توزيع الدخل بين المواطنين

وهناك بالفعل طبقة من شعب مصر توفر مسكن ومأكل ورعاية طبية للكلاب والقطط أعزكم الله وبمستوى لا يجده ألالاف الأدمين على أرض هذا الوطن !

هل هذا يرضي الله ؟؟؟؟؟؟؟

نرى الأغنياء فى كل دول العالم يتبرعون بمبالغ ضخمة للفقراء فى بلدانهم ويتبنوا من المشاريع الكثير والأمثلة بالطبع كثيرة جدا ولا يمكن حصرها سواء في أوروبا او الخليج أو أمريكا

في مصر الطبقة الغنية قلما تجد من يتبرع من أجل أبناء وطنه ممن لا يجدون مأكل ولا مشرب ولا مسكن ولا رعاية طبية , بل يمكنك أن تعدهم على أصابع اليد الواحدة

[shawshank]

ده الحمبولي ده طلع هاااااااايل (هو يقرب لمروى؟). ده كان ناقص يخطف وزير الداخلية نفسه ويفاوضهم عليه مقابل ابنه.

أهو لو الثوار اتحدوا مع الراجل ده وعملوا ميليشيا لتطهير البلد، بالاشتراك مع بدو سيناء، وقتل كل الفلول، وأولهم مبارك وأولاده والعادلي ... إلخ، هتنجح الثورة ونبدأ بقى على نضافة. بصراحة دول ماينفعش معاهم غير كده. لكن قانون ايه ومحاكمة ايه وطبطبة ايه؟! (إذا كان هو نفسه خد 3 سنيييين في 17 (سبعة عشر) قضية سرقة .... حاجة لطيفة جدا). ووالله أنا قايل الكلام ده من زماااااان، لكن سي السيد كان دايمٌا يقول لي بلاش الدعوة للعنف.

[لولا]

ده الحمبولي ده طلع هاااااااايل (هو يقرب لمروى؟). ده كان ناقص يخطف وزير الداخلية نفسه ويفاوضهم عليه مقابل ابنه.

أهو لو الثوار اتحدوا مع الراجل ده وعملوا ميليشيا لتطهير البلد، بالاشتراك مع بدو سيناء، وقتل كل الفلول، وأولهم مبارك وأولاده والعادلي ... إلخ، هتنجح الثورة ونبدأ بقى على نضافة. بصراحة دول ماينفعش معاهم غير كده. لكن قانون ايه ومحاكمة ايه وطبطبة ايه؟! (إذا كان هو نفسه خد 3 سنيييين في 17 (سبعة عشر) قضية سرقة .... حاجة لطيفة جدا). ووالله أنا قايل الكلام ده من زماااااان، لكن سي السيد كان دايمٌا يقول لي بلاش الدعوة للعنف.

انا نفسيتى تعبانه لوحدها ..مشاء الله دخلت هنا اتدمرت :closedeyes:

مش بقيت اقدر اتابع برامج بتجيب الناس االلى مش قادره تعيش بشويه انسانيه فى بلدها.

المهم

توقيع حضرتك :

كل لحظة إبطاء في نيل المعتدين جزاءهم ... خطوة نحو كفر المجتمع بالعدالة، ودرجة على سلم إيمانه بشريعة الغاب

احنا مستنين العداله .. ساعات احس انى مستنيه نص العداله .. عايزه اشم ريحه العداله :egyflag:

لولا

[shawshank]

احنا مستنين العداله .. ساعات احس انى مستنيه نص العداله .. عايزه اشم ريحه العداله :egyflag:

ماهو حضرتك الشعب هو مصدر السلطات. والشعب خرج في 25 يناير. يبقى هنا الكلمة للشعب مش للقوانين. لأن الشعب نفسه خرج (بصرف النظر عن كام في المية)، يبقى تنفيذ رغبة الشعب أولى من تنفيذ رغبة ممثليه (في البرلمان) ممثلة في القوانين، لأن الشعب هو الأصل. ده لو تجاهلنا إن ممثلي الشعب دول كان معظمهم من الحزب الوطني وجم بتزوير رغبة الشعب، والقوانين اللي وضعوها (واللي بيتحاكم بيها مبارك دلوقتي) بتخدم النظام.

وعشان يبقى الموضوع عادل، ممكن ببساطة يتعمل استفتاء على مشروع قانون بإعدام مبارك وأعوانه (تعلن بيهم قائمة)، ويصوت عليه الشعب. لو الشعب قال آه، يصدر القانون. وساعتها تتوقف تلقائيًا المحاكمة الحالية. المسألة بسيطة. أو ممكن يتأجل لمجلس الشعب الجاي. يتقدم واحد من مجلس الشعب بمشروع القانون ده. وببساطة يصدر القانون لو اتوافق عليه.

بخصوص التوقيع، العدالة في مصر مش عمياء، دي مفتحة ومفنجلة عينيها وعندها خيار وفاقوس. احنا داخلين على 10 شهور، وشوية تأجيل، وشوية رد المحكمة، وشوية شبهات حول القاضي. ايه ده؟ أهو ده اللي ينتج عنه كفر الناس بنظام العدالة ده، وإيمانهم بأن كل واحد بقى ياخد حقه بإيده.

عميق تحياتي لحضرتك

وبعتذر لسي السيد للخروج عن الموضوع.

[أبو معتز]

فعلا مصر داخلة على ثورة جياع

الكلام مظبوط فعلا

احنا بقالنا 9 شهور بنسحب من الاحتياطى النقدى ....

اعتصامات + بلطجة + عدم شعور المواطن بالامن + غلاء اسعار = المواطن الغلبان

المعادلة بسيطة اوى بس المواطن هوا الخسران

انا نفسى ارجع بلدى الى سايبها بقالى 3 سنين بس لما اجى اشوف الاسباب الى ممكن تخلينى ارجع ملاقيش غير ابنى الى نفسى اشوفة

غير كدة مش لاقى ::

يعنى مفيش شغل

الوضع الاقتصادى يرثى لة

عدم الشعور بالامن

غلاء الاسعار مع عدم الرقابة على السلع الغذائية

الغش والرشوة والمحسوبية ( الكـــــــــــــــوسة)

كل واحد بيدور على نفسة فقط ومن بعدة الطوفان

دى حاجات بسيطة من الى بيحسها المواطن المصرى البسيط

طيب هنعمل اية هنفضل طول عمرنا متغربين وسايبين بلدنا

موضوع صعب والمناقشة فية اصعب

[Kareem the Angel]

المشكله ان التاريخ المصري منذ ايام الفراعنه يحتوي على هذه المشكله ...الفرعون هو ابن الاله الذي لا ينطق عن الهوى ...وطبعا معه الطبقه العليا من الوزراء والامراء وكبار التجار والملاك والكهنه طبعا....وطبعا يوجد الشعب الفقير المغلوب على امره الذي لا بد ان يطيع اوامر الفرعون وحاشيته...حتى ان جمال حمدان ذكر ان مصر هي ارض التناقضات وبشهاده كتاب اجانب زاروا مصر وعاشوا فيها ....ارى ان هذا يتكرر "بالكربون" مع بعض الاختلافات طبعا من عصر الى عصر...واخشى انه مع قدوم الرئيس القادم ان نشاهد نفس السيناريو ولكن باسماء وشخصيات اخرى....اعتقد اني "غير متفائل"...

تم تعديل 31 أكتوبر 2011 بواسطة Kareem the Angel

[مهندس ابو يوسف]

أسمحلي بس يا أستاذ أيمن اوضح كام نقطة

الحمبولي بلطجي قاطع طريق وخط الصعيد .... عمل عملية سطو مسلح

الشرطة اللى بتحمينا وبتطبق القانون .................... خطفت إبنه علشان تساومه ..... يعني بلطجي رسمي

الحمبولي عرف إن الموضوع كله بلطجة في بلطجة ............. هوب خطف منطاد سياحي

الشرطة إتورطت ....................... إضطرت تسيب إبن الحمبولي

والنتيجة ........... الحمبولى حر طليق يحلق بالمنطاد الآن ليشاهد آثار الفراعنة بس مش عارف ينزل العجل لأن البدال معلق

----------------------

لمحبي الطهو تقدم لكم هذ الوجبة ... صينية الوكسة بالنيلة

كوباية بلطجة بس تكون دسمة وسلاح يكون بالكوم

أربع معلقة شرطة مبتعرفش

عدد واحد ولد صغير ملوش ذنب

حبة قانون مترمط معانا وياريت نعجنه قبل الإضافة

عملية خطف طفل وعملية خطف منطاد

نقلب المقادير لحد ما تغلي

وبعدين بالهنا والشفا

رجاءً لا تجرب الوصفة بأعلى لأنها ذات مخاطر مرتفعة

اتفق معك اخي الفاضل