لو ادامك 60 ثانيه هتاخد ايه

[مغتربة]

طب انتوا تعرفوا ان الامريكان بعد 11 سبتمبر, بقوا يعملوا خطط هروب سريعة علشان يستعملوها فى البيوت و المستشفيات و المدارس؟

الخطة دى عبارة عن انهم بيبقوا عاملين حسابهم فى قزازة مية بلاستيك لكل فرد.. و بطارية محمول اضافية.. و كشاف ببطارية.. و شوية حاجات كده.. كل ده فى شنطة بلاستيك سهل ان اى حد يشيلها.

علشان لو حصل اى هجوم ارهابى.. هههههههههههههه.. بس الله اعلم اذا كان الناس عاملينها فى البيوت فعلا ولا لا.

على فكره اكتر دوله رائده فى تدريبات حالات الطوارىء

هى اليابان

لكثره الزلازل الى بتحصل فيها

فدورات التعامل مع حالات الطوارىء من زلزال او خلافه

بتكون جزء من المنهج الدراسى للتلاميذ

و دايما بيتعلموا يجزوا دايما معاهم شنطه الطوارىء دى

علشان لو احتاجوها بشكل مفاجىء

لغايه ما بقت فعلا جزء من ثقافه الشعب هناك

و بيطبقوها من غير توجييه

[مغتربة]

هاخد نفسى .

كفايه

[مغتربة]

سؤال مرعب يا مغتربه .. لكن وارد و كلنا فكرنا قبل كده فيه

تعرفي ؟ من فتره قريبه مش بعيده .. إنتشر كلام عن زلزال متوقع كبير و هيحصل بتاريخ معين

و طبعاً الفرق إن كان عندي وقت كافي أفكر و أخطط لأن الموضوع كان شئ متوقع حدوثه قبلها بأسبوع تقريباً

جمعت كل ما جاء على بالي في حقيبة يدي و كيس ورقي قوي و كنت حريصه إنهم يفضلوا طول الوقت على طاوله بجانب باب الشقه

أول حاجه فكرت فيها هي أوراقنا الخاصه ... دي محتفظه بها في شنطه صغيره في الدولاب .. شنطه ممكن تتمسك باليد

فيها الأوراق و جوازات السفر و كده يعني

إخترت أكبر شنطه من شنط اليد بتاعة الخروج الخاصه بي .. و حطيت فيها شنطة الورق دي و حطيت فيها الدهب و شاحن موبايل و الفلاشه بتاعتي و الهارد العائلي اللي عليه صورنا و فيديوهات و حتى ملفات كتابيه كلها حاجات فعلا الواحد ممكن يجرى له حاجه لو ضاعت منه

و بجانب شنطة إيدي كيس قوي جمعت فيه ألبومات الصور كلها و خليته على طاوله بجانب الباب طول الأسبوع ده

كنت حريصه إن لازم قبل ما أنام كل ليله تكون موبايلاتنا مشحونه و متروكه جمبنا تماماً بحيث يسهل شدها و إحنا بنجري (( خيالي واسع أصلي ))

و طبعا بره عالطاوله الشنطه و الكيس و عبايه سهل لبسها و طرحه

و الباب لازم أتأكد قبل ما أنام كل ليله إن مفتاح باب الشقه موجود في الباب مش متعلق جمبه حتى .. لا موجود في الباب

و كل ليله أقول لولادي : لو سمعتوني بنده عليكم تقوموا جري .. و تسبقوني عالباب .. و تنزلوا عالسلالم إنتو التلاته مع بعض ما تتفرقوش و محدش يبص وراه و محدش يفكر في الأسانسير

و توصلوا للشارع تقفوا في المكان الواسع اللي بتقف فيه السيارات في وسطه مش تحت العماره (( الباركنج )) و دي مساحه واسعه كبيره

مهو أصل من ضمن الخيال الواسع كنت بحاول أحميهم من الخطر لو حصل و أي مبنى وقع

و الله فكرتيني بالرعب اللي كنت فيه .. و الله ما بخاف من الخطر نفسه .. لكن أنا ضعيفه جداً جداً أمام أي خطر ممكن أتخيل إنه إحتمال حتى يهدد ولادي

و طبعا كنت بقول كل ده و بعمل كل ده كل ليله وسط سيل غير منقطع و لا ينضب من التريقه من أبو كريم على خوفي و خيالي الواسع

لكن ده طبعا لأن كان عندي وقت للتخطيط

لو لا قدر الله حسب سؤالك الموضوع مفاجئ (( عافانا الله و عافاكي ))

أول حاجه هفكر فيها هي زوجي و ولادي

و تاني حاجه .. زوجي و ولادي

و تالت حاجه .. زوجي و ولادي

و بعدين تيجي مسألة الورق و الهارد و الدهب و الصور و ما إلى ذلك

عافانا الله و عافاكي و جنبنا شر الفواجع و الكوارث

ربنا يبعد الشر يا زهره

و بالتاكيد الناس هم الاولى بكل اهتمام

و مفيش شك انهم اهم من الورق و الدهب و الفلوس و كل دى اشياء ليست ذات قيمه ادامهم اساسا

علشان كدا انا افترضت ان الشخص بمفرده تماما

و الا لو كان معاه حد فبديهى هيكون انقاذهم مساله حياه او موت ليه

ربنا يبعد الشر امين يا رب

بس بجد عجبنى تخطيطك الشديد الى كنت عملاه علشان موضوع الزلزال الى قالوا عليه

ربنا حميلك اولادك يا رب و تفرحى بيهم باذن الله تعالى

[عبير يونس]

تعرفي يا مغتربة

موضوعك ده فكرني بزلزال 1992

وقتها كنت في الكلية

و وقت ما حصل الساعة 3:10 عصرا

كنت نايمة بلبسي قيلولة قصيرة عشان كان عندي كورس الساعة 5

لقيت السرير بيتهز

و كنت فاكرة ماما بتصحيني ههههههههههههه

لما الهز زاد

قلت و انا نايمة

ايه يا ماما بقى

و فتحت عيني ملقتش حد في الاوضة

و سمعت ماما بتناديني من الصالة برة

اصلها كانت عمالة تنادي و انا نايمة

تعالي يا عبير اتغدي

و بعدها تعالى اشربي شاي

و انا كنت عايزة اغفل شوية عشان اقدر اكمل اليوم

المهم

ماما جت الاوضة و خدتني بالراحة اوي

و قعدتني في الصالة

و بابا كان قاعد في ثبات غريب

و لاقيتها واقفة مميلة عليا و انا على الكرسي و بتنطق الشهادة بهدوء

قال كانت عايزة تحميني بجسمها لو البيت وقع

طبعا عينيا دمعت دلوقت و انا بافتكر

الله يرحمها و يحسن إليها

المهم

اللي باحكيه ده مش عارفة كان ايه ؟

كان استسلام؟؟؟

ناس كتير كانوا وقتها بيجروا على السلالم

و ناس نطت من الشبابيك

احنا ليه ما خرجناش ؟؟

باتكلم على والدي و والدتي لأني وقتها كنت نص نايمة و مش مدركة ايه اللي بيحصل

تعرفي تاني يوم لما قالوا في توابع

جا لي تفكير غريب

ان لو البيت وقع يقع عليا و لا اني اسيب اوضتي و كتبي و اشيائي الخاصة

يمكن دي كانت بداية تفكيري

ايه اهمية اي حاجة في الدنيا؟؟؟

و ازاي اتخلص من ارتباطي بالأشياء

و حياتي استمرت بعدها سلسلة دروس قاسية

تقريبا جردتني من كل أشيائي اللي متعلقة بيها

حتي بابا و ماما

و بجد مفيش أهم من الأشخاص اللي بنحبهم

سلامتهم بالدنيا و ما فيها

و كل حاجة و أي حاجة بعد كده تتعوض

ربنا يرحم اموات المسلمين جميعا

موضوع الزلزال موضوع تانى خالص

ساعه الزلزال كنت صاحيه و بتفرج على التلفيزيون

و انا و امى الله يرحمها و اختى قاعدين على كنبه الانتريه جنب بعض

و كنت لابسه و مستعده علشان كان عندى ساعتها درس

فجأه حسينا كان حاجه عماله تزق الكنبه يمين و شمال جامد

اختى اتخضت و قالت ايه دا

قولتلها ببرود غريب زلزال

هههههه

وماما متكلمتش اساسا

و كملنا القعده عادى حتى مقمناش من على الكنبه

و بعد ما خلص ب5 دقايق كدا قمت نزلت علشان اروح الدرس عادى

شوفتى برود اكتر من كدا

و استغربت جدا لما بقيت اسمع قصص الى نزل على السلالم و الى رمى نفسه من البلكونه

و بقول ليه كل دا

طبعا وصلت عند البنت الى بناخد فى بيتها الدرس هى كانت بيتها ارضى يعنى محسوش بحاجه و رغم كدا كانت مرعوبه

و انا و لا فى دماغى

و طبعا الدرس يوميها اتلغى لان المدرس اعتذر و محدش تانى راح غيرى

و روحت و انا مستغربه و مرت الايام عادى حتى لما قالوا هيكون فى توابع و لا كان فى دماغى اساسا

و مارست حياتى بطبيعيه جدا

و كل الزلازل الى حسيت بيها بعد كدا كانت برضه كدا

كان فى واحد\ الساعه 6 الصبح فكراه

برضه كنت نايمه و صحيت عليه

و عرفت ان دا زلزال بس كسلت اقوم من تحت البطانيه لان الجو كان شتا قوى ساعتها

و من كام شهر حسيت بواحد و انا فى الامارات

و عرفت برضه انه زلزال و كنت لوحدى لان زوجى كان مسافر

و لا اتحركت من على الكرسى

انا ممكن اطمن على الناس لانى بعرف ان في ناس بتخاف فى ساعه الزلازل

لكن انا لا

مش عارفه دا اسمه ايه :wub:

غالبا تامر أو هيثم

ههههههههههههههههه

فاكرة انا الزلزال التاني ده

كان الصبح بدري اوي و برضه كنت تحت البطانية

لقيت النجفة بتتهز و السرير بيترج

و سمعت بابا من اوضته بينادي

قلتله ده زلزال؟

قال ايوة

قلت له طيب

و نمت

:closedeyes:

[باهى الطائر الحزين]

السلام عليكم ورحمة الله...

أخد حاجة واحدة بس معايا؟

دى بسيطة خالص..

أخد "بعضى"....وأجرى :)

ههههه

بجد انت كدا جبتى المفيد

تصدقونى لو قلت ..

بقالى يومين ادخل التوبيك واخرج منه

وحابب اقول نفس كلام الفاضله : folana

ومحرج /

ماعنديش حاجه اخاف عليها

كل شئ ممكن يتعوض

وحتى الذكرى محفوره فى الصدور

ما بتنتهيش غير معانا

ابنى مش معايا / فى المدينه الجامعيه

وفى الاجازه بقول له نفس الكلام

لو حصل حريق لا قدر الله / خد بعضك

وقول يافكييييييييييييك

واللى مزعلنى انى متأكد من انه

هايعمل زى اخونا العنيد / architect

شكر للمساحه غاليتى / مغتربه