زمارة ورِق وطبله .. في حفل زفاف عنتر وعبله

[se_ Elsyed]

مشهد 1

الكاميرا تُركز زوووم إن على صورة لكرت دعوة لحفل زفاف

" يتشرف المعلم شداد العبسي واخوه المعلم شديد العبسي بدعوة سيادتكم لحضور حفل زفاف

نجل الاول الشاب عنتر – جندي في القوات المسلحة النجدية – على كريمة الثاني الأنسة عبله الموظفه بهيئة الصرف الصحي بمنطقة ينبع والجبيل وذلك يوم الثلاثاء الموافق السادس من أيلول الساعة العاشرة بقاعة إحتفالات أبو جهل بحي المنفوحة ...

وهنا تصحو عبله على زُغد من أمها وهي تصيح : قومي يا منيلة ورانا النهاردة شغل كتير

عبله : يوووووووووووووووه ياما .. صحتيني من حلم جميل ... خير اللهم اجعله خير حلمت إننا خلاص طبعنا دعاوي فرحي أنا وعنتر وإتخيلتني وانا عند كوافير " الدهماء " وعلى وشك إننا نروح أستديو " الأغبر للمناسبات السعيدة " عشان نتصور صور الفرح وخلاص كانت عقدتي هاتنفك ....

فكيهة : فكوا عضامك يا بعيده .... قومي يا بت أحلبي النوق وأجمعي البلح بلا دلع بنات فاضي .

وتذهب عبله وتنهمك في العمل الشاق طوال اليوم ... وبعد العصر ( تُرسل رسالة زاجل – إس إم إس من بتوع زمان ) لعنتر تطلبه فيها باللقاء لأمر عاجل بعد العشاء في كوفي شوب " الديك المجروح "

وياتي عنتر مهرولاً : قشطة يا عبله .... خير ؟ وكتاب الله قلبي إنطرب لما قريت رسالتك ... مع إن أمي هي اللي إصطادت الحمامة والولية ما صدقت وجابت رقبتها عشان تعملها لنا بالفريك ... لكن انا لمحت إن في رجلها ورقه وقريتها وعرفت إنها منك وجيت على جناح السرعة

عبله : يادي الخسارة يا ربي ... ابويا لو عرف إنكم دبحتوا الحمامة هايسود عيشة اللي جابوكم ... المهم .... عنتر .. إنت لازم تحط حد لعلاقتنا دي .. إحنا بقى لنا 13 سنة مخطوبين .. وأنا خلاص سني كبر وما بقتش صغيرة

عنتر : كبرتي ؟ فشررررررر؟ بقى 43 سنة كبيرة ؟ يا بنتي ده اللي من دورك لسه بيدرسوا في الكتاتيب الجاهلية

عبلة : ما تاكلش بعقلي عصيدة ... إنت لازم تتصرف وتيجي تقابل عمك شديد عشان تحدد ميعاد الفرح

عنتر : وأنا أعمل إيه يا عبله ؟ السوق اليومين دول نايم والناس بطلت تحارب بعضها وكإنهم بقوا ملايكه ... حتى داحس والغبراء خلاص بقوا نسايب وسمنة على عسل ... والبسوس .. البسوس يا ستي بقوا ولا البسبوسة مع بعض .. وإنتي عارفه إن دول الحربين اللي عملت منهم سبوبة حلوه وجبت لك بيهم الشبكة زمان

عبله : ماليش دعوة .. اهو روح حارب في أي حته .. أو دور لك على عقد عمل في الخليج

عنتر : إخص عليكي ... بقى عنتر فارس فرسان بني عبس يروح يشتغل مرتزقة ؟ او أروح أشتغل فرد أمن في الخليج بـ 1500 ريال ؟ عنتر اللي رمضاء مكه أشتكت من شقاوته .... عنتر اللي الرمح والسيف والقراطيس والقلمو ... عنتر اللي الأعداء بيموتوا في جلدهم لما يسمعوا سيرته .... إنتي ما سمعتنيش وأنا بأقول

إن الأفاعي وإن لانت ملامسها عند التقلب في أنيابها الــعطبُ

فَتًى يَخُوضُ غِمَارَ الحرْبِ مُبْتَسِماً وَيَنْثَنِي وَسِنَانُ الـرُّمْحِ مُخْتَضِبُ

إنْ سلَّ صارمهُ سالتَ مضاربهُ وأَشْرَقَ الجَوُّ وانْشَقَّتْ لَهُ الحُجُـبُ

والخَيْلُ تَشْهَدُ لي أَنِّي أُكَفْكِفُهَا والطّعن مثلُ شرارِ النَّار يلتهبُ

إذا التقيتُ الأعادي يومَ معركة تَركْتُ جَمْعَهُمُ المَغْرُور يُنْتَهَبُ

عبله : يا عم بطل فنجرة بوء بقى ... إنت مش فالح الا في الكلام .. شوف كل الشباب اللي من سنك دلوقت بقوا إيه .. اللهم صلي عالنبي اللي معاه ميكروباظ واللي عنده توك توك واللي فاتح سايبر وإنت عمال تضرب في شعر وزجل ولا فيش في جيبك نص جيني

عنتره : عيب يا هبله .. أنا لو كنت قولت يا فلوس كنت زماني من الاعيان دلوقت وما تنسيش إني

يخبرك من شـهد الوقيعة أنني أغشى الوغى وأعف عند المغنم

عبله : اهو ده اللي إنتي فالح فيه .. يعني لو كنت لميت لك شوية مغنمي من دول كنا زماننا متجوزين دلوقت ومخلفين لنا عيلين تلاته .

عنتره : مش انا يا عبله ... مش أنا

ده أنا ولو قطعوا رقبتي عمري ولقد أبيت على الطوى وأظلّه حتى أنال به كريم المأكلِ

والله العظيم يا عبله انا باعمل كل جهدي لكن اديكي شايفه الإيد قصيرة والعين بصيرة ... بس إن شاء الله تُفرج ... انا جالي أوفر من دار نشر عشان ينشروا أول دواويني ... وكمان في واحد مغنواتي إسمه شعبولا إبن الأكوع هايشتري مني قصيدة هايغنيها في ألبومه اللي جاي .. إسمعي كده مطلعها بيقول إيه

هَلْ غَادَرَ الشُّعَرَاءُ منْ مُتَـرَدَّمِ

أم هَلْ عَرَفْتَ الدَّارَ بعدَ تَوَهُّـمِ

يَا دَارَ عَبْلـةَ بِالجَواءِ تَكَلَّمِـي

وَعِمِّي صَبَاحاً دَارَ عبْلةَ واسلَمِي

فَوَقَّفْـتُ فيها نَاقَتي وكَأنَّهَـا

فَـدَنٌ لأَقْضي حَاجَةَ المُتَلَـوِّمِ

وتَحُـلُّ عَبلَةُ بِالجَوَاءِ وأَهْلُنَـا

بالحَـزنِ فَالصَّمَـانِ فَالمُتَثَلَّـمِ

حُيِّيْتَ مِنْ طَلَلٍ تَقادَمَ عَهْـدُهُ

أَقْـوى وأَقْفَـرَ بَعدَ أُمِّ الهَيْثَـمِ

وإيييييييييييييييييييييييييييييه

عبله : إيه القرف ده ؟ يا عم الكلام ده ما ياكلش معايا انا أهم حاجه عندي ليه تيجي تقابل أبويا وتخلص معاه .. وترحمني بقى من زن عمارة الزيادي اللي عاوز يشيل بكره قبل بعده وكل شويه يكلم أبويا

عنتر : يشيل ؟؟؟؟؟؟؟!!!! إيه الألفاظ البيئة دي ؟ إنتي محسسناي إني بأحب شوال بطاطس ... وبعدين هو الواد اللزج ده لسه بيتنطط حواليكي ؟ وكتاب الله لو قرب منك لأشقه نصين

عبله : طب يا عم الفكهاني ... خد أبوينتمينت من عمك وروح خلص معاه وأقطع عرق وسيح دمه ...

وهنا أُسقط في يد عنتر ولم يجد بداً إلا في أن يذهب إلى عمه ذات مساء لتحديد موعد للزفاف

شديد : أهلاً سي زفت ... إنت جيت ؟

عنتر : ليه الوش البلاستيك ده يا كبير العبابسة ؟ يا عم لاقيني ولا تغديني

شديد : إنت ما بتستحيش يالا ؟ 13 سنة وإنت بتتغدا وتتعشى عندنا لحد ما بطرخت وبقيت عامل زي العجل الجاموسي

عنتر : ما أنا جاي لحضرتك عشان كده يا عمي وعاوز أتفق إن شاء الله على ميعاد للفرح وعاوز أسمع طلبات سعادتك قبل

كتب الكتاب وتعلية الجواب والدخلة الهباب

وهنا تدخل مدام فيكهة زوجة عم عنتر حاملة كؤوس النبيذ والمزة لزوم القعدة

شديد : شوف يا عنتر ... أينعم عبله بنت عمك .. لكن مش معنى كده إنك تكلفت الجوازه ... أنا راجل لي مركزي ومكانتي وسط الكفار وفرح بنتي لازم معشر قريش يحكوا ويتحاكوا عليه ويتعمل لها فرح سبع ليالي بلياليهم وكل البشر ياكلوا ويسكروا ويتبسطوا

يُتبع

[عبير يونس]

مكنتش عايزة اقطع التسلسل الدرامي للقصة

بس لازم أقول انها

تووووووووووووووحفة فنية بجد

خصوصا حتة شعبولا بن الأكوع دي

أكمل

[se_ Elsyed]

تووووووووووووووحفة فنية بجد

إيه المجاملة دي ؟

انا بقى مش حاسس إنها جامدة ....

[عبير يونس]

تووووووووووووووحفة فنية بجد

إيه المجاملة دي ؟

انا بقى مش حاسس إنها جامدة ....

سين سين

احنا ع الهوا

احم احم

ازاي بقى ؟

ده كلام تقوله برضه ؟

و بعدين ما هو لازم الكاتب دائما و ابدا ما يعجبوش اللي بيكتبه

لأنه لو حس بكده مش حيبدع أكتر

سيب الجمهور هو اللي يقول

صحيح محدش قال حاجة خالص

هههههههههههههههه

بس حيقولوا

صدقني

همة بس مش عايزين يقطعوا حبل أفكارك

و مستنيين نهاية القصة

يللا انزل بالباقي

اعزائي المشاهدين

فاصل و نواصل

:)

[رضوي]

فين الحلقة التانية من المسلسل الرائع دة ؟؟؟

[الدكتور ياسر]

راااااائعة بجد ..

أحييك يا أستاذ س س على موهبتك ..

ننتظر منك المزيد ..

جامدة اوي الحتة بتاعة شديد وهو بيتكلم عن مكانته وسط الكفار :P ..

تم تعديل 1 نوفمبر 2011 بواسطة الدكتور ياسر

[se_ Elsyed]

الأديب الكبير - في السن .. مانا داخل على الاربعين أهو - يعتذر عن التواصل معكم اليوم ... عشان رقبتي بتوجعني والله وشكلي يا إما أخدت برد يا إما نمت على مخدة مش معدولة ( والله العظيم ما هو قفا مخبرين )

ومش عارف غلبت فولتارين وبتاع كده برشام بتاع تقلص العضلات وبرضوا ما فيش فايدة وأنا عارفه هو دور بياخد له يومين وبعدين يفك ...

[عبير يونس]

الأديب الكبير - في السن .. مانا داخل على الاربعين أهو - يعتذر عن التواصل معكم اليوم ... عشان رقبتي بتوجعني والله وشكلي يا إما أخدت برد يا إما نمت على مخدة مش معدولة ( والله العظيم ما هو قفا مخبرين )

ومش عارف غلبت فولتارين وبتاع كده برشام بتاع تقلص العضلات وبرضوا ما فيش فايدة وأنا عارفه هو دور بياخد له يومين وبعدين يفك ...

ألف سلامة يا معلم

عليك و على الدهان ده

و ادعيلي

[se_ Elsyed]

الأديب الكبير - في السن .. مانا داخل على الاربعين أهو - يعتذر عن التواصل معكم اليوم ... عشان رقبتي بتوجعني والله وشكلي يا إما أخدت برد يا إما نمت على مخدة مش معدولة ( والله العظيم ما هو قفا مخبرين )

ومش عارف غلبت فولتارين وبتاع كده برشام بتاع تقلص العضلات وبرضوا ما فيش فايدة وأنا عارفه هو دور بياخد له يومين وبعدين يفك ...

ألف سلامة يا معلم

عليك و على الدهان ده

و ادعيلي

ميرسي يا عبير

أشتريته النهاردة الصبح

بس مش عارف ليه عمل لي حموضه !!!!!

[عبير يونس]

الأديب الكبير - في السن .. مانا داخل على الاربعين أهو - يعتذر عن التواصل معكم اليوم ... عشان رقبتي بتوجعني والله وشكلي يا إما أخدت برد يا إما نمت على مخدة مش معدولة ( والله العظيم ما هو قفا مخبرين )

ومش عارف غلبت فولتارين وبتاع كده برشام بتاع تقلص العضلات وبرضوا ما فيش فايدة وأنا عارفه هو دور بياخد له يومين وبعدين يفك ...

ألف سلامة يا معلم

عليك و على الدهان ده

و ادعيلي

ميرسي يا عبير

أشتريته النهاردة الصبح

بس مش عارف ليه عمل لي حموضه !!!!!

:o

لازم كلته على الريق

:D