الحب الاول

[Deconvolution]

اكيد في حياة كل واحد او واحدة حب اول

هل ممكن يتنسي

انا شخصيا مش قادر

الايام دى تعدى ذكرى اخر مرة شفتها

كنت فى بيتها قاعد مع ابوها بتقدملها

ورفضنى

وهى سمعت كلام ابوها و سابتني زى اي بنت ما تسمع كلام اهلها

ومن ساعتها ما شفتهش اللهم صدفة مرة فى الشارع

ودلوقت بعد 10 سنين لسه مش قادر انسها مع العلم انى اتجوزت وعندى ولد و بنت

وكل ما انزل مصر لا ارديا القى نفسى واخد العربية والف قادم بيت ابوها زي ايام الجامعة

فى حد زي والا انا مش طبيعى

الظاهر شمس الصحرا اكلت اخر جزء كان شغال فى مخي

[عصام]

الظاهر شمس الصحرا اكلت اخر جزء كان شغال فى مخي

ys): ys): ys):

[bentmasria]

احيانا

تحملنا الذكريات حيث المكان الذى تمنينا ان نكون فيه

نهرب اليه مع ضغوط الحياة والوحدة والوحشة

نعتقد انه ربما هناك

قد تكون الحياة افضل

لانه عالم ....حلم جميل لم يتسنى لنا ان نلمس واقعه

احيانا نحتاج الى لحظة الهروب تلك

ولحظة التمنى هذه

لنستطيع الاستمرار والتواصل مع واقعنا الذى ليس بالضرورة قاسيا ولكنه ليس كما نتمنى

ارجو ان تستطيع يوما تذوق حلاوة الحاضر لكى تتمكن من التغلب على طوفان الذكريات

اذا هاجمتك مرة ذكرى لحظة الرفض

تذكر ابتسامة عروسك ام اولادك لحظة زفافكم

لمسة يد طفلك يوم ان صرت ابا

ايام وربما سنين لكن حتما سيكون للماضى طيف او ذكرى كسحابة صيف عابرة

ويحتل الحاضر واقعك واحلامك وذكرياتك

كلنا كان لنا .............. واصبح فينا

ربى يسعدك ويبارك لك فى اسرتك الجميلة

ام محمد

[Cleo]

عزيزى ديكون...

اسمحلى أعيرك توقيعى

إن أحساسك بالألم يكون دائما بقدر حبك لمن تسبب لك فيه

[linux]

حيث أنك فتحت الموضوع ده، يبقي لابد أن نعطي كل ذي حق حقه:

"يا صلاح يا أبني، كلنا مرينا بوهم أسمه الحب الأول ..."

الراحل عبد الوارث عسر

فيلم المخده الفاضيه أو الوسادة الخالية كما يقول العامة

[MuslimaEgyptian]

الواحد محرج يشارك فى الموضوع ده "وش مكسوف" ولكننى فقط أحب أن أعلق بشكل عام عن مضمونه...وهو ان ...اول شئ فكرت فيه هو الزوجه :) ..ذنبها إيه زهره العلا rs:...لأ بجد،إحساس صعب شعرت به (من جانب المرأه) وهو ان الواحد يتخيل نفسه إن له معزه لدى أحد وهو ليس كذلك بكل صدق وإخلاص.. وكل ما تعنياه هاتين الكلمتين mc: ..او إنها معزه فرضتها الظروف "وش قلب ممزق"....لا أتمنى أن أكون فى مثل هذا الموقف....

ربما علينا ان نفسر معنى الحب اولا وبعدها نقدر ان نقيم الحب الاول...هل هو حب الافلام..أو حب ناضج مكتمل نضوجه بالاسس التى حثنا علينا الاسلام كالظفر بذات الدين...ربما مع الاجابه تكتشف إن زوجتك هى الحب الاول...الحقيقى :)

تم تعديل 28 أكتوبر 2004 بواسطة MuslimaEgyptian

[Deconvolution]

الواحد محرج  يشارك فى الموضوع ده "وش مكسوف" ولكننى فقط أحب أن أعلق بشكل عام عن مضمونه...وهو ان ...اول شئ فكرت فيه هو الزوجه  :) ..ذنبها إيه زهره العلا rs:...لأ بجد،إحساس صعب شعرت به (من جانب المرأه) وهو ان الواحد يتخيل نفسه إن له معزه لدى أحد وهو ليس كذلك بكل صدق وإخلاص.. وكل ما تعنياه هاتين الكلمتين  mc:  ..او إنها معزه فرضتها الظروف "وش قلب ممزق"....لا أتمنى أن أكون فى مثل هذا الموقف....

ربما علينا ان نفسر معنى الحب اولا وبعدها نقدر ان نقيم الحب الاول...هل هو حب الافلام..أو حب ناضج مكتمل نضوجه بالاسس التى حثنا علينا الاسلام كالظفر بذات الدين...ربما مع الاجابه تكتشف إن زوجتك هى الحب الاول...الحقيقى :)

بنت مصرية

ردك بلسم

كليو

معاك حق

مسلمة

انا و الحمد لله مراعى حقوقها كاملة و اعزها و احبها جدا (اه يا جماعة لسه في رجالة بتحب زوجتها مش كتير بس بتحصل)

للعلم مراتي على دراية تامة بالموضوع القديم

ولكن

السؤال هنا

حب العقل ام حب القلب

مع الاعتذار لصلاح و سميحة

[linux]

بنت مصرية

ردك بلسم

كليو

معاك حق

مسلمة

انا و الحمد لله مراعى حقوقها كاملة و اعزها و احبها جدا (اه يا جماعة لسه في رجالة بتحب زوجتها      مش كتير بس بتحصل)

للعلم مراتي على دراية تامة بالموضوع القديم

و أنا اللي وقعت من قعر القفة يعني؟! :)

طيب، مش لاعب mc:

[Deconvolution]

بنت مصرية

ردك بلسم

كليو

معاك حق

مسلمة

انا و الحمد لله مراعى حقوقها كاملة و اعزها و احبها جدا (اه يا جماعة لسه في رجالة بتحب زوجتها      مش كتير بس بتحصل)

للعلم مراتي على دراية تامة بالموضوع القديم

و أنا اللي وقعت من قعر القفة يعني؟! :angry:

طيب، مش لاعب :blink:

linux

حقك على

ده حتى اسمك عزيز على جدا

واخد في كورس مؤخرا

وتصدق بالله حكاية المخدة الفاضية في صلب الموضوع

مع الفرق انى شبه رشدى اباظة مش سي عبد الحليم حافظ

[G.G]

" في حياة كل منا وهم كبير اسمه الحب الأول, لا تصدقه,

فحبك الأول هو حبك الأخير"

الكلام لإحسان عبد القدوس ..رغم اني لا أعترف أوي بكلامه لأني أشعر به تجاري احيانا..و لكن هذه المقولة أصدقها إلى حد كبير

..متهيالي..الحب الأول ده و اثاره التي ربما تستمر لوقت طال أم قصر ما هو إلا حالة نفسية نضع أنفسنا بها واعين أو غير واعين ..كحالة من الهروب من الواقع إشتياقا إلى زمن كنا فيه نعيش لحظات الدهشة و المغامرة وزمن تحملنا فيه أمالنا العريضة لأفاق مجهولة لسنا ببالغيه بعد سن معينة بسبب الخبرة الطبيعية المكتسبة و النظرة الأكثر واقعية..

بيتهيالي ان الموضوع ليس له علاقة بالحبيب في حد ذاته و لا الحب العقلي و لا الحب القلبي.. يعني لو تبدلت الأدوار و كانت الزوجة مكان الحبيبة القديمة و اصبحت الحبيبة هي الزوجة الحالية,,لكانت نفس الحالة بنفس التفاصيل ,,لأنه , مرة أخرى, ليس الحب قط و لكنه الإشتياق و الحنين لهذه المرحلة من العمر..

و متهيالي كمان لا يوجد حب عقلي و حب قلبي..العقل هو الذي يحب دائما و أبدا ..و يفرز هورمون معيا (اعتقد Dopamine) ,و الذي يؤدي لزيادة ضربات القلب الذي بدوره يضخ الدم لباقي اعضاء الجسم..

:angry: و الله أعلم..

[Cleo]

أول حب زى أول عربية زى أول مرتب زى أول أى حاجة فى الدنيا... ليه مذاق خاص لأنه كان أول تجربة...

بعد كدة، مهما ركبت عربيات.. مهما مرتبك كبر... هاتفضل فاكر أول مرة... مش لأنها الأحسن، لكن لأنها ولدت عندك إحساس جديد.. أدخلت تغيير على حياتك...

[Deconvolution]

كان فى عندنا فى الكلية دكتور فى الفيزياء يفسر كل شئ فيزيا

مثلا

الانسان ما هو الا عبارةعن موجات ليها تردد و phaseوampاالخ

عندما يحدث الحب و ده هو اللي بيقول يحدث توافق بين الموجات ذات الphaseالواحد والتردد(الموضوع كبير كبير يا جماعة)

كلام نظرى بس الله اعلم

طبعا GGصح كله في العقل

النقطة هنا فى اختيار الشريك

عاطفيا ام عقلانيا

ولا ايه

[se_ Elsyed]

ودلوقت بعد 10 سنين لسه مش قادر انسها مع العلم انى اتجوزت وعندى ولد و بنت

وكل ما انزل مصر لا ارديا القى نفسى واخد العربية والف قادم بيت ابوها زي ايام الجامعة

فى حد زي والا انا مش طبيعى

لأ إطمئن في كتير زيك .. بس ربنا يهديهم .. لأن هذا ليس هو الحب الأول بل هي وساوس شيطان يحاول ان يُزين للإنسان سوء عمله ويهدم حياته السعيدة ويقع في المحرم وبعدها يسيبه ويدور على زبون تاني .

طب تعالى يا ديكون نفترض شوية حاجات خيالية كده ونعمل سيناريو ...

إفرض مثلاً مثلاً يعني . وإنت راكب عربيتك الميتسوبيشي وعمال تلف حوالين البيت وتغني شعر معتوه ليلى ..

مررت على الديار ديار ليلى ... أقبل ذا الجدار وذا الجدار

وما حب الديار شغفن قلبي ... ولكن حب من سكن الديار

.. وفجأة .. آن آن آن .... لقيت ليلى قصدي الحب الاول خارجة وشايلة القفص ورايحة تجيب عيش من الفرن... وبالصدفة عينها جت في عينك ولقيتها بتبادلك نفس النظرات وسمعت في الخلفية صدى أغنية " أنا لك على طول خليك ليه " ( خلي بالك لا قولنا كلاوي ولا كبده ولكن ليه وإنت عارف الحاجات دي تقيلة على المعدة قد إيه ) .. إزاي الحال دلوقت ؟ كمل إنت بقى وقول على المحرمات اللي هاتحصل والبيوت اللي هاتتهدم تحت وهم الحب الأول .... وفي نقطة آخرى مهمة .. وهي إنكم ممكن تضيعوا وقت في النظرات والكلام وتنسى هي تجيب العيش للعيال والفرنه تقف وتبقى مصيبة :angry:

إفتراض ثاني - وحاشا لله أن اكون أقصدك او أقصد حد معين .. ولكنه كلام عام - ، إفرض إن الزوجة أي المرأة هي من كانت تعيش هذا الوهم .. هل يرضى أحد من الأزواج الرجالة ولدية نخوة وكرامه مجرد أن تُفكر زوجته في أحد غيره ؟ او تاخد البسكلته بتاعتها وتروح تعمل خمسات حوالين بيت الحب الأول ؟

طبعاً الإجابة لأ ..... وده موضوع تطير فيه رقاب والدم يبقى للركب وعلى رأي عبد الفتاح القصري في فيلم إبن حميدو

لا يسلم الشرف الرفيع من الأذى .. حتى يُراق على جوانبه الدم

طب لما هو كده ، يبقى ليه الراجل يدي لنفسه حق ويحرمه على غيره .. وليه مع إنه متجوز ومتهني وعيوشه وعبد الباسط - اولاده - عمالين يتنططوا حواليه وفرحانين يقوم بعد ده كله ينخور على أي حاجة تبوظ حياته والسلام .. وكل ده ليه ؟ عشان يثبت لنفسه بعد سنين الجواز بإنه مازال فتى الشاشة الأول ومحطم قلوب العذارى والواد اللي هوه اللي البنات بيطبوا ساكتين بنظرة من عينيه .

[nashwa]

إفتراض ثاني - وحاشا لله أن اكون أقصدك او أقصد حد معين .. ولكنه كلام عام - ، إفرض إن الزوجة أي المرأة هي من كانت تعيش هذا الوهم  .. هل يرضى أحد من الأزواج الرجالة ولدية نخوة وكرامه مجرد أن تُفكر زوجته في أحد غيره ؟ او تاخد البسكلته بتاعتها وتروح تعمل خمسات حوالين بيت الحب الأول ؟

الفاضل أحمد (سى السيد) ..

الله يكرمك

عايزة أقول الكلمتين دول من أول ماتفتح الموضوع .. وقبل ماأى من الأعضاء يرد عليه .. لكن الدنيا مشاغل .. وكمان حسيت أن يمكن ردى يكون جامد ( وأنا ليه سوابق قبل كده)

المهم

العضو Deconvolution

بصراحه ... السرد الموجز اللى حضرتك عملته لحالتك دى .. من رأيى لايسر عدو ولا حبيب .. ومافهوش منطق .. وخلينى أعيد عليك الصوره الدراميه اللى أخرجها سى السيد مع بعض التحابيش لزوم تصاعد الموقف ...

وحضرتك هايم فى دنيا الخيال تحت المطر ... أمام منزل الحبيبة "السابقة" ... وللصدف ودور الأقدار الذى يمهل ولايهمل .. زوجتك واقفة فى الشارع على الناصية المقابله .. مع رجل يشبه لك أنه حبيبها "السابق" وقابلته بالصدفة .. ويادوب بس سلام وزى الحال والأولاد .. وهى بترد بالصوره النموذجيه اللى حضرتك رسمها هنا لاسرتك .. يعنى ترد وتقول " الراجل كويس ومش مخلينى عايزه حاجه ... بس يعنى لسه بيتوجع ياعينى من الفراق القديم .. وييجى يشتكيلى وجعه .. وأخده على كتفى وهدهده"

ياترى رد فعلك ايه .. ولا أقولك مش مهم دلوقت رد فعلك .. خلينا فى أحساسك .. وبصراحه مش عايزه أخد الموضوع من زاويه أحساس الراجل وأحساس الست .. لان ده غالبا مبنى على أسقاطات المجتمع ,, فى الأباحه للرجل ,, وهضم حق الست .. ويمكن ألقاء نظره على القانون فى الحاله الزنا حين يكتشفه رجل فى زوجته أو العكس !!!!!!!!!! mf( خلينى أسالك كأنسان .. ياترى حتبقى متفهم ومتعاطف ... وتاخودها فى حضنك وتقولها معلش حبيبتى "حاليا" أنا متفهم ياروحى ...

يمكنك الأحتفاظ بالأجابه لنفسك

وحاجه كمان لفتت نظرى فى ردك .. أنك بتحب مرلتك وكمان بتهزر .. لأن لسه فيه رجاله بيحبوا زوجاتهم ...

حب ايه ياعم ... اللى أنت جى تقول عليه .... اللى يخليك تكسر قلب زوجتك "حاليا" بكلامك عن "واحده" خرجت من مسار حياتك .. ووجودها فقط فى تخيلاتك

أه أفتكرت كلمه كان بيرددها دايما عبد الوهاب مطاوع "الله يرحمه" ... أنه من غرائب البشر هو تقييم الظلم بناءا على موضعهم منه ... وكيفيه القدره البشريه الأغرب من الخيال على تبرير الظلم .. من موقع المتلقى أو القائم به

أتقى الله

[solimano]

يذكرنى هذا الموضوع - الحب والرفض والعودة بعد عشر سنوات - برواية زيارة السيدة العجوز لدورينمات على ما أتذكر.

الشخص المرفوض يعود بعد ان تغيرت المعطيات ليس بدافع الحب ولكن بدافع الانتقام. فى الحالة التى نحن بصددها قد يتوهم الراوى أنه يعود لا اراديا لديار ليلى ولكن دعنى أطرح سؤالا: ألا يمكن أن تكون العودة على غرار زيارة السيدة العجوز, بدافع الانتقام, رد الاعتبار, توصيل رسالة للطرف الاخر- شوفى انتى خسرتى أيه- وبعدين يطلع لسانه ويمشى.

[Deconvolution]

بالراحة شوية يا جماعة علي

خلاص انا سئ ولازم اتقي الله

اولا الموضوع ده معروف عند مراتي من قبل الجواز

و بعدين الاخت نشوى تصورت انى ظالم و هاضم للحق و مراتي عايشة في حجيم

مع العكس انا علاقتي معها جيدة جدا و نحسد عليها والحمد الله

وانا عملى و مقتنع بان الله مسبب السباب و على يقين ان لو كان لى نصيب في العلاقة الاولى لتمت

الموضوع خرج من اساسه لدراسة ما كتبته عن نفسي مع العلم ان ليس فينا من يستطيع الحكم على الاخرين

يا ريت نركز احسن في اساس الموضوع او نقفله احسن

[Deconvolution]

وبعدين التخيلات والافتراضات اه علاقتها بالموضوع اصلا

حد فينا يعرف التانى

هجوم بدون داعى

ثانيا ا اخت نشوى السؤال كان للجنسين

انا اعتذر عن فتح هذا الموضوع

واضح اننا لسة مش جاهزين نواجه الحقيقة فى حياتنا

[فــيــروز]

يذكرنى هذا الموضوع - الحب والرفض والعودة بعد عشر سنوات - برواية زيارة السيدة العجوز لدورينمات على ما أتذكر.

الشخص المرفوض يعود بعد ان تغيرت المعطيات ليس بدافع الحب ولكن بدافع الانتقام. فى الحالة التى نحن بصددها قد يتوهم الراوى أنه يعود لا اراديا لديار ليلى ولكن دعنى أطرح سؤالا: ألا يمكن أن تكون العودة على غرار زيارة السيدة العجوز, بدافع الانتقام, رد الاعتبار, توصيل رسالة للطرف الاخر- شوفى انتى خسرتى أيه- وبعدين يطلع لسانه ويمشى.

موضوع رد الاعتبار و الانتقام هذا يذكرنى باحدى صديقاتى

كان فيه مشروع زواج بينها وبين شخص يعيش فى امريكا .. و الموضوع رغم انه كان فى بدايته موفق للغايه الا انه لم ينته بالزواج و كل واحد راح فى حاله .. وانقطعت الصلات بينهما

.. حتى وجدته بعد شهور يرسل اليها رساله ليغيظها و يقول لها انه تزوج ست ستها :P.. وهى طبعااتحرق دمها اما وصلتها الرساله دى بس انا كان لى راى مخالف .. وهو انه بركه انها تخلصت من الارتباط بشخص يفكر بهذه الطريقه وفضل شايل فى قلبه ومعبى كل هذا الوقت mf(

اخى كاتب الموضوع

ارجوك لا تغضب من الآراء المخالفه .. فالمقصود منها فقط ان تريك بعض جوانب الموضوع التى ربما تكون خافيه عليك .. وكل هذا من باب التواد و التعاطف وليس بهدف الانتقاد او النهر

.. تحياتى ..

[Farida]

انا امامى تجربتين و نهايتهم واحده تقريبا فى الأتنين الحبيبين تفرقوا و كل منهم تزوج و أنجب و لكن ظل الحب حتى يلتقوا صدفه بعد وفاة زوج الحبيبه ويقرروا انهم يتزوجوا حتى يعوضوا ما فاتهم فعلا هم بيسعدوا بالزواج ده بس للأسف عائله الزوج بتتدمر الزوجه الأولى و الأ بناء بيكرهوا الأب و زجته التانيه و بتتهدم الأسره و بيخسرهم الأب

[bentmasria]

mf( :P :P

عمو ديكون

انا محمد

ياريت ماتزعلش منهم كلهم طيبين وحتحبهم جدا لما تقرب منهم

ديكون لو سمحت لى اختصر الاسم

ضيف جديد عزيز او ضيف قديم لا اعلم صدقنى موضوعك طيب وتناوله اسعدنى واسعد غيرى فمعك كلنا استعدنا اجمل الذكريات وربما حسدناك على وضوحك امام نفسك وانت تطاوعها احيانا وتغالبها احيانا ولا يستطيع اى منا ان يتهمك باى تقصير فلا تغضب فى فهم الكلمات ارجوك

ارجح ان اغلب الاخوة والاخوات كل منهم كان يطرح وجهة نظره فقط ولو شدد احدهم فى ايلامك او نوه بشىء ليس على علم به ارجو ان تعذره ويتسع صدرك لتبتسم وانت تقرأ فهى طبائعنا كما تكلمت انت بحرية للجميع الحق فى الحديث بحرية على الا تقتص حريته من حريات الآخرين لو تعاملت مع احاديثنا على انها احاديث الاخوة ومن القلب لما عاد هناك اية مشكله بارك الله فيك ويسر لك من امرك رشدا ابتسم لكل من لامك وعاتبك ففى صدر كل منا حب اول نكأت انت جرحه بشكل ما