الحب الاول

[justme]

طيب بصوا بقوا هحكيلكوا حكايتين

طبعا ده من ايام الكلية فممكن يشوبه بعض النسيان للتفاصيل او الخطأ للأمانة بس ما علينا المهم الفكرة

الاول كان ليا زميل دفعتي ايام الكلية كان مواليد 75 وانا 79 طب ازاي

الراجل دخل الكلية قبلي وحب بنت من قسم موسيقى

المهم هو بتاع كمبيوتر وهي موسيقى هو من بلد وهي من بلد تانية ما علينا

صاحبنا ده بقى راح اتعلم يعزف ازاي بس علشان يحاول يقربلها شوية

المهم الواد بقى عمال يلف حوالين نفسه يا عيني علشان يوصلها

المهم دخل مرة عليها وهي بتعزف بيانوا ودلق اللي جواه كله

البت اتصدمت وحلقتله وقالتله انت زي اخويا وانت لسه بتدرس

المهم طلع في دماغه السفر بره وقعد ياخد دورات وبتاع ويحاول يتقدم للبت على ما افتكر والبت رافضاه

الواد اتعقد وسقط

وسقط لغاية اما انا حصلته

المهم الواد ظل متعلق بالبت وقالي دي الحب الاول و الأخير في حياتي

المهم ظل يتابعها لغاية اما اتخطبت ساعتها الواد باع القضية

وانزلق في سكة الضياع لدرجة انه تقريبا ضرب حاجات مخدرة

ول بعد الكلية لسنوات متعلق بأمل انه يتجوزها لغاية اما ابوه توفاه الله فالصدمه تقريبا فوقته شوية وقرر يتجوز والحمد لله ربنا كرمه

هحكيلكم التانية بعد الفاصل

[اغابي]

مفيش حب اول ولا اخير

هو اصلا مفيش حب من اساسه - فيه فقط حب الله والوطن والاب والام والاخ والاخت والابن

لكن حب من اللى اسمه ايه داه - داه اسمه خدع بصرية :happy: - ماااا تسكتو بقي وفوضوها سيره :blush2:

[shiko]

لا لا تكذبى انى رأيتكما معاً

بصوا ...انا كنت متأكدة ...بل ومتوقعة ...ان محدش هايقر ويعترف هنا ...

غير على اصحابه ...يا خونة....

....غريبة كلكم مشاهدين ...محدش شارك بحاجة خالص ....

طب .مفروض كروس بقى تخلى الموضوع مايطلبه المشاهدون

...فى موكب المحبون ...ومين هايبقى لليلى مجنون؟؟

هو احنا ليه بنعتبره ...حاجة عيب او سر لازم يموت ؟؟

طب سؤال تانى ...هو الحب الاول ليه دايما لازم تكون نهايته واحدة ؟؟الفراق ؟؟السيناريو الاوحد مهما تعددت الاسباب

مستنية اشوف الشجيع ...اللى هايقر ويعترف من غير ضرب...

...انزل بأغنية ...لا لا تكذبى انى رأيتكما معاً

تم تعديل 13 مارس 2010 بواسطة shiko

[justme]

علشان اكون واضح

انا لم يكن لي اي تجارب عاطشفية مع اي بنت ماعدا الاطار الرسمي اللي هو خطوبة في سن 26 وكان اخري اسبوع ولا اتنينن علشان موضوع السفر

لكن ايام الجامعة موقفتش مع بنت اكتر من 5 دقائق على قد سؤال واجابة لأني كان وجودي ينتهي بالمحاضرة والسكشن ومرواح لأن الكلية بتاعتنا كانت بره الجامعة ومفيهاش اي اماكن للجلوس غير الأرض وكافيتريا يادوب تاخد فصل ابتدائي

بس خليني اقولك بقى يا اخت شيكو

انتي فين كلامك بقى

على الاقل احنا كتبنا حاجة

بالنسبة بقى لنهاية الحب الأول في الغالب بتبقى التجربة الأولى مبنية على مجرد حب التجربة ومفيش قاعدة او تجارب سابقة يبنى عليها الاختيار كذلك في الغالب بيحصل في وقت مبكر والواحد لسه صغنن معندوش خلفية عن واقعية الحياة

احلام وردية

ومش حاكي القصة التانية مع انها تنفع فيلم عربي

تم تعديل 13 مارس 2010 بواسطة justme

[shiko]

...حضرتك ...موش لازم اسيح لصحابى ...يعنى

....اهوه خلى الطابق مستور برضه ....وانا اخطر حد يقول كل حاجة ومن اول قلم .. .طب اسأل بابا كدة ؟؟

ممكن على فكرة ...وليه ممكن ...كتير بيبقى الحب الاول فى حياة البنات ...

ارتباط رسمى ."..خطوبة ..".يعنى موش لازم يبقى فى كلية او نادى ...

...لكن ...انا ليه بسأل...احنا ليه مابنحاولش نستمتع بيه ...ليه لازم ندفنه جوانا ...نخنقه ...

انزل بقى بالقصة التانية ...مذكرات اصحابى ...ايام العذابى . :yahoo: ..

تم تعديل 13 مارس 2010 بواسطة shiko

[crossfield]

بقى لى يومين من ساعة ما فتحت الموضوع و انا لابدة فى الدرة أدخل أبص و امشىو ارجع بعدها بشوية الاقى مداخلة مداخلتين على استحياء و هكذا أقول طيب أرد و الابلاش ..اتقل على الرز شوية.

كنت عارفة من البداية ان الغالبية هيتراجعوا القهقرى قدام الموضوع ده و كبيرهم يفتحوا يبصوا بلؤم كده ويمشوا علشان الموضوع ممكن يكون برايفت شويتين لكن بما ان الموضوع فى باب الموضوعات الشخصية فكل واحد ينام عالجنب اللى يريحه و ممكن يمنتج اللى عايز يمنتجه أو يمتنع عن المشاركة مع انه نفسه يشارك بس يستنى شوية لما يشوف الباقيين هيعملوا ايه. شعب حوييييييييييط محدش يضحك عليه بالساهل أهو شوف كام واحد دخل الموضوع أهو بس و لا الواحد طلع بأى حاجة wst::

يعنى ايه يعنى

نقول تانى من الأول

من غير تسييح و لا حاجة

اللى يحب يسترجع حاجة معينة يحكى

و اللى المدام بتفتح الكمبيوتر و تقرا مداخلاته يركن على جنب :blush2:

و علشان أفك عقدة السنتكم هابدأ أنا و الأمر لله

انا زمااااااااااااااااان أيام ما كان عندى 19 سنة ارتبطت بواحد من معارف الأسرة و الاعجاب كان متبادل و بصراحة الولد كان ممتاز و محترم و ابن ناس بس مشكلته كانت مامته كانت صعبة جدا و دماغ ألمانى صح (لانهم كانوا مصريين مهاجرين ألمانيا) و بابا رفض الولد أكتر من مرة لنفس السبب وقال أبداً لو مصممة تتجوزيه يييجى هوه يعيش فى مصربعيدعن الست دى المهم بعد 4 سنين أنا يئست و أخينا يئس و كل واحد راح لحاله. شوفتوا الموضع بسيط ازاى ادينى حكيت أهو ايه اللى حصل؟

بس فعلاً حكاية الحب الأول و الأخير دى وهم لأن كل مرة الواحد بيحب فيها بيتهئ له ان الدنيا خلاص هتقف لو ما ارتبطش بالشخص ده و شوية و بخ بينسى و على رأى الشاعر الكبير حشيش(الله يمسيه بالخير)

لا تقرصينى يا نحلة و لا عايز منك عسل :sad:

ايه بقى اللى فكرنى اليومين دول بموضوع الحب الأول؟

أقولكم ...

معرفش ايه اللى حصل لى بصراحة يمكن كل الواحد ما بيكبر نظرته بتتغير تماماً لمواضيع الارتباط دى يعنى أنا دلوقتى مااحبش أشوف أى مشهد رومانسى فى فيلم و بستهيف اى بنت تقول انها بتحب فلان أو علان (و اعكس برضو) . بيقولوا البنات بعد الجواز بيتحولوا لأنثى العنكبوت ...تفتكروا ده السبب؟

[shiko]

طب كده انتى بصراحة عداكى العيب ياكروس ....

الناس بقى تخلى عندها شجاعة ادبية معنوية ...وتفضفض ....

نفسى اسمع بجد حكاوى حب ...حقيقية ...عاشت ...

جوه اصحابها ....وبيفتخروا فيها ....

بيعرفوا يديلوها حقها ....وماتبقاش حاجة تكسف جوانا ؟؟

كروس :اى حد يدخل ارفعى عليه السلاح ...وخليها يعترف بالقوة الجبرية

[ذهبية]

مين قال ان الحب الاول بيتنسى و انة كدبة و انة خيالى و انة عبط و انة مش موجود

انا اعترض

و اى حد بيهرب من السؤال بانة يسخر من مشاعر اول مرة تتكون بانة يلغيها و ينكرها يبقى هو مش صريح مع نفسة

و اى حد ما يمر باى قصة حب اولى معلش بقى

يبقى معقد

ومعلش تانى يبقى مش هينفع فى اى قصة حب تانية

اول حب دة اول تجربة بتتعلمى فيها يعنى اية حد تانى يشارك مشاعرك اصلا بتتعلمى يعنى اية مشاعر

اول مرة تتعملى التضحية وعدم الانانية انك بتفكرى ازاى تسعدى انسان اخر غيرك

لاى سبب كان الانفصال و دى نتيجة طبيعية جداا لعدم نضوج المشاعر و لضغر السن و لان مجتمعنا و اهلينا حاطين معاير معينة اللى يكمل معانا

هو دة اللى يسبب الانفصال

بس مش معنى انة حصل انفصال يقى القصة كلها وحشة و عبط و خيال

صحيح الطرف القادم بينظلم لانة استحالة تحسى نفس المشاعر الاولى بس دى سنة الحياةلكن بيحل محل الحب نوع من المودة

و الرحمة الى انا باعتبرهم اغلى و احسن من الحب

[shiko]

مين قال ان الحب الاول بيتنسى و انة كدبة و انة خيالى و انة عبط و انة مش موجود

انا اعترض

و اى حد بيهرب من السؤال بانة يسخر من مشاعر اول مرة تتكون بانة يلغيها و ينكرها يبقى هو مش صريح مع نفسة

و اى حد ما يمر باى قصة حب اولى معلش بقى

يبقى معقد

ومعلش تانى يبقى مش هينفع فى اى قصة حب تانية

اول حب دة اول تجربة بتتعلمى فيها يعنى اية حد تانى يشارك مشاعرك اصلا بتتعلمى يعنى اية مشاعر

اول مرة تتعملى التضحية وعدم الانانية انك بتفكرى ازاى تسعدى انسان اخر غيرك

لاى سبب كان الانفصال و دى نتيجة طبيعية جداا لعدم نضوج المشاعر و لضغر السن و لان مجتمعنا و اهلينا حاطين معاير معينة اللى يكمل معانا

هو دة اللى يسبب الانفصال

بس مش معنى انة حصل انفصال يقى القصة كلها وحشة و عبط و خيال

صحيح الطرف القادم بينظلم لانة استحالة تحسى نفس المشاعر الاولى بس دى سنة الحياةلكن بيحل محل الحب نوع من المودة

و الرحمة الى انا باعتبرهم اغلى و احسن من الحب

يا سلام عليكى يا جولدن ....حقيقى

كلام موزون من ذهب بجد ...

وبالرغم من انك ...برضه ...ماعترفتيش ...تحت تهديد السلاح ...

الا انك قدمتى تعاريف واضحة ...ونقية جدا ...للحب الاول والمشاعر الاولى ...

وكأنها وليد ...البراءة ...

مشاعر بكر ...فى نقاء وصفاء الماء

وجاءت تعبيرك الاخير ....موافق تماما ...لماتحمله الكلمة ...بداخلى ...

اقبلى تحياتى

[jasmin hamed]

قصه بسيطه خالص

الزمان اول سنه فى الكليه

المكان كورس الايطالى

اكثر ما عجبنى فيه الاعتماد على النفس و حبه لامه و حيائه الشديد .

المقابلات 3 مرات فى الاسبوع قبل الكورس مايبتدى بعشر دقايق

ولما الموضوع تتطور بقى بيجى تحت البلكونه ذى روميو و نتكلم فى الموبيل

اول هديه فانوس رمضان

سبب الفراق : اختلاف الاهداف فى الحياه

[shiko]

قصه بسيطه خالص

الزمان اول سنه فى الكليه

المكان كورس الايطالى

اكثر ما عجبنى فيه الاعتماد على النفس و حبه لامه و حيائه الشديد .

المقابلات 3 مرات فى الاسبوع قبل الكورس مايبتدى بعشر دقايق

ولما الموضوع تتطور بقى بيجى تحت البلكونه ذى روميو و نتكلم فى الموبيل

اول هديه فانوس رمضان

سبب الفراق : اختلاف الاهداف فى الحياه

يعجبنى ...الاجماليات دون الخضوع للتفاصيل ...كل ده لازم يكون معاه رومانسية حالمة ووقوف فى البلكونات ...

سيدى يا سيدى ...على الكلام فى النوبايلات ...انتى كارت ولاخط يا ياسمين ...اصل تفرق مين فيكو كان بيكلم التانى ..؟؟

لا بجد بحيى فيكى كياستك ...وشجاعتك ...انتى يا بنتى من القلة القليلة اللى خطت برجليها فى الحتة دى وادلقت بالحكاية ...

ها محدش يزود ؟؟

يقتلنى الفضول ...لاعرف قصص الحب الاولى ...

لياليكم ...حب اولانى ,...اخرانى ..المهم تكون حب

تم تعديل 14 مارس 2010 بواسطة shiko

[Scorpion]

ايه ده ....

crossfield ....

انتي crossfield بتاعتنا .....

رجعتي امتي ؟؟؟ لأ و الواحد عامل فيها مشرف و مافيش ناموسة بتعدي جنبه اللي و ياخد باله منها ... و انتي بقالك كام يوم بتكتبي و لا أخدت بالي ...

لفت نظر اداري اطبقه علي نفسي .....

الف حمد لله علي السلامة .. نورتي بيتك و عقبال بقية "الفكيهات" اللي عرفت المحاورات بيهم ....

-_-

و ترحيبآ بعودتك .. العبد لله حيحكي حكاية واحد صاحبه انتيم... اللي هو مش أنا ....

صاحبي ده في حياته قصتين حب .. الأول و الثاني .... و بيشكر ربه ليل و نهار ان الأول ما نفعش و الا ما كانش لقي الحب التاني ...

الأول بتاع اول سنين العمر .. لما كل حاجة بتبقي جميلة ... و رقيقة .. و رومانسية ...

حب بنت من كل قلبه و هو في تانية ثانوي ... و فضل يحبها بجد لحد تانية جامعة ...

و مع انه كان بيشوفها كل يوم .. كل يوم .. و بيقضي وقت في بيتها اكتر ما بيقضيه في بيت ابوه .. لكنه عمره ما صارحها لسبب وحيد بسيط

انها كانت أخت أعز اصحابه .. و كان حاسس انه لو صارحها كأنه بيخون الثقة اللي حطوها فيه أهل البنت دي و صاحبه ..

لكن زي ما بيقول المثل اتنين عمرهم ما بيقدروا يستخبوا .. واحد فوق جمل و واحد بيحب ..

صاحبنا اتفقس ... لكن فضل الحب رومانسي و بيزيد مع الوقت ...

صاحبنا اتخرج و ابتدي يشتغل و قرر انه يعلن عن حبه رسمي أخيرآ ....

و بعد موافقة شبه مبدئية ...

واحد من الشلة لهفها منه ... لأنه كان أجمل و اشيك و أغني ....

فيلم مصري عادي من بتوع زمان ...

لكن فضل الحب الأول مستخبي جوا قلب صاحبي ده .. لحد ما قابل الحب التاني اللي القدر كان مرتبه من كل ناحية

كان لازم يقابله يعني كان لازم يقابله

مختلفين في البلد .. في اللغة ... في حاجات كتير

ما كانش فيه اي حد ممكن يراهن بمليم أحمر ان الحب ده ممكن ينجح

لكنه نجح و بجداره ... و بقاله عشرين سنة كل يوم يكسب بنط كل يوم ... و تم تتويجه بإبن يحمل مكونات عالمين مختلفين ....

لكن صاحبي ده ... برضه من وقت للتاني يفتكر حبه الأول .. و يبتسم في شجن .. لأنه عمره ما نساه ..

لكن ده شيء .. و حياته الحقيقية شيء تاني خالص ...

مجرد حلم ...

حمد لله علي سلامتك مرة تانية.

:wub:

[لماضة مصرية جدا]

السلام عليكم و رحمة الله و بركاته

لان النهاردة يوم مميز جدا.......و لان ساعات الفجر الاولي....بتوعدنا بخير كبير.....و لان ايماننا ان النهاردة صباااااااااح غير

يبقي.....خلوني اقعد معاكو هنا شوية.......

في مساحة خاصة جدا.......لاني اقتربت منكم جدا جدا

ممكن....؟؟؟

لا اسميه حبا...او اول....و لكن اسميه مساحة خاصة جدا لاحساس خاص جدا...في وقت قلما يتكرر

ابريل.....

محكمة .....

اسكندرية.....

عربة ترحيلات السجناء.....

مطلوب من فريق العمل اعداد تقرير عن ممارسات حقوق الانسان في تلك المنطقة...و مدي تطبقيها...و رؤيتنا الخاصة كمتطوعين راغبين في العمل بحقوق الانسان...كنا جنسيات مختلفة

انا....اقف في الزاوية.....هالني منظر المساجين ...او لنقل المتهمين...يتدافعون....علي سلم العربية الاشبه بصندوق نقل الموتي....

استنفرت صيحات الاهالي و اعينهم الدامعة كل ما بداخلي من احزان مؤجلة...و انطلقت في بكاء هستيري.

واحد من فريق العمل....فرنسي الجنسية...عربي الملامح جدا.....اقترب مني....و بجملة واحدة اعادني للواقع علي الرغم من لغته الركيكة....

"احنا لازم نشتغل.....و بعدين لما نرجع المكتب نبقي نعيط".

فريق العمل.....في المكتب.....نفترش الارض.....منهكين للغاية.....قطع البيتزا....هي ملاذنا الوحيد...للتنفيس عن الغضب اللي عشناه اليوم ده.....

نفس الشخص....يسالني......"يعني ايه تعدد الزوجات في الاسلام....و انتي ليه محجبة ؟؟؟"

البنت اللمضة اتكلمت.....و اتكلمت......و فيه ضحكة في العينين اترسمت

يوم الجمعة......فريق العمل.....متجمع بالمكتب....

اقتراح من البنت اللمضة......تعالوا نصلي الجمعة في المرسي ابو العباس....زميلنا الفرنسي...."يعني ايه نصلي الجمعة....طب خدوني معاكم"...

انا كمان اول مرة اصلي الجمعة في جماعة.....و في جامع كبير زي المرسي ابو العباس

بعد الصلاة......هو في حالة بكاء شديدة جدا...كلنا اقتربنا منه.....قال انا مسلم....من ساعة ما اتولدت.....بس انا عاهدت ربنا من سنيتن فقط اني اكون مسلم بجد.....و النهاردة انا سعيد جدا ان ربنا خلاني اكون مسلم بجد

اكتمل التقرير......عندنا عرض تقديمي لاحد المؤسسات بالقاهرة عشان فكرة المشروع بتاعنا و هو كان حاجة صغيرة جدا......"خطوات"......ازاي ندرب شباب في سن المراهقة علي حقوق الانسان".....هو اختار الاسم.....والهدف.....حط الرؤية.....و انا مسكتها و فصلت منها برنامج و انشطة......و افكار عمل

القاهرة.......المشروع يحصل ع الموافقة......و هيتم تنفيذه بين 3 بلاد...مصر ....فرنسا.....و مؤسسة مجتمع مدني في اوكرانيا.

فرحة نجاح الفريق......كانت خاصة جدا.......

خلتنا رمينا نفسنا في اول ميكروباص.....اه ركبنا ميكروباص.....مع ان احنا فريق من 7 اتنين مصريين و عارفين يعني ايه ميكروباص....و 5 اجانب.....شافه المنظر...و حسوا المعاناة.....

كنا عايزين نصالح الدنيا......كنا عايزين نلتحم مع الناس اوي......و نقولهم احنا نجحنا.....و عدينا من عنق الزجاجة....و انتوا كما هتهون

ركبنا الميكروباص....و كان التوجه للحسين.......المولد النبوي......فرق صوفية......تسابيح.....ذكر.....حالة روحانية يخلقها جو البخور...و الوان الطوائف المختلفة

هو يذوب في الزحام.......الاقيه في احد خيام الصوفية.......

و يظل يسال......"هم ليه بيعملوا كده....طب انتي مش بتعملي كده......طب هتصلي فين؟؟

صلينا العشاء في الجامع......و انطلقنا كل منا يشتري الهدايا التذكارية.....

.

بكرة كل منا يعود الي موطنه....هو عائد الي فرنسا......انا عائدة الي الصعيد....بعد السما....و الارض

في المساء.......فريق العمل نستعرض اخر خطوات تنفيذ المشروع....و التاكيد علي الخطة الزمنية.....

كان قائد الفريق....و كنت دينامو العمل ضمنيا.....عقلينا يصنع معا.....مغامرة ذات لون خاص

قالها ....كما هي بكل اخطاؤها اللغوية......."أريد ان أقابل عائلتك"........و بدا لوهلة..... أنه رجل صعيدي بكل ما تحمله الكلمة.....

لم تغلب عليه الحياة الفرنسية إطلاقا

قالتها في استعباط....."تفضل ستجد ما يسركم"...لم يفهم العبارة.....و اعاد الرجاء......

و صمتت

سافر

بعد شهرين

رسالة......انا في القاهرة...لمتابعة المشروع.......ساذهب للازهر......اريد ان استكمل دراستي.....هل لي ان اراكي

هي........صمتت

بعد سنة.........انا في القاهرة....اركب الان قطار يتجه الي الاقصر و اسوان التي طالما حدثتيني عنها.....هل يمكن للقطار ان يتوقف عند مدينتك؟؟؟

"نعم......يمكن جدا".......و لكن ما جدوي العبارات حين تكون في داخلنا و لا يسمعها الاخرون

صمتت

لم تسمع منه....سوي ما يتعلق باخبار المشروع........و كيف تم تنفيذه.....و بعد فترة أوكل مهامه الي احد اعضاء الفريق الاخرين

ابتلعته.....الحياة

بعد عامين........."رزقت بطفلة....مفعمة بالحياة....و اسميتها Rihana لتحمل بعضا منكي.....ستكونين يوما اما رائعة....كما كنتي لي ملهمة رائعة"......نص رسالته

صمتت.....

و بكت......

و ضحكت......

و نظرت للسماء.......يا ربي ذلك خير.....

و كتبت قصيدة لم و لن يقرأؤها أحد......."سأترك عطري علي وسادتك....."

لا اري انها تسكن الالم....او تسكن ذكراه

هي فقط.......ترحل اليه....عندما تتوه في طرقات الحياة....و حينما تختلط عليها الالوان....

لازال ملاذها الامن.....الذي تفتحت فيه فراشة تعرف ان حبا قد يقودك يوما الي إيمان اعمق بالله......إلي حب الله.....إلي يقين....ان ذلك خير

هو Alliatte......أو كما تدعوه......"علي"

هي........شخص ما تعلم بعده انا يغامر جدا.......و انا يفتح مسام جلده للحياة.....و ان يوقن ان اجمل الاشياء تحدث عندما نكون منهمكين في شيء آخر

بس خلاص

صبااااااااااااااكم كل الخير....صباحكم حب

[jasmin hamed]

يا لماضه

يا بنتى يا حبيبتى يا روحى انتى ساكته على نفسك اذاى انا مش عارفه

يا أمى روحى اكتبيلك كتاب و انا اول من هيشتريه بجد موهبه فى الكتابه فذه

و الله يا بنتى انا دارسه ادب انجليزى و عارفه بقولك ايه اسلوبك عفوى من غير زخارف جميل وسلس و مشوق جدا

ربنا يوفقك

تم تعديل 15 مارس 2010 بواسطة jasmin hamed

[jasmin hamed]

قصه بسيطه خالص

الزمان اول سنه فى الكليه

المكان كورس الايطالى

اكثر ما عجبنى فيه الاعتماد على النفس و حبه لامه و حيائه الشديد .

المقابلات 3 مرات فى الاسبوع قبل الكورس مايبتدى بعشر دقايق

ولما الموضوع تتطور بقى بيجى تحت البلكونه ذى روميو و نتكلم فى الموبيل

اول هديه فانوس رمضان

سبب الفراق : اختلاف الاهداف فى الحياه

يعجبنى ...الاجماليات دون الخضوع للتفاصيل ...كل ده لازم يكون معاه رومانسية حالمة ووقوف فى البلكونات ...

سيدى يا سيدى ...على الكلام فى النوبايلات ...انتى كارت ولاخط يا ياسمين ...اصل تفرق مين فيكو كان بيكلم التانى ..؟؟

لا بجد بحيى فيكى كياستك ...وشجاعتك ...انتى يا بنتى من القلة القليلة اللى خطت برجليها فى الحتة دى وادلقت بالحكاية ...

ها محدش يزود ؟؟

يقتلنى الفضول ...لاعرف قصص الحب الاولى ...

لياليكم ...حب اولانى ,...اخرانى ..المهم تكون حب

و الله يا بنتى طول عمرى خط و بيزنيس كمان بس هوه الى كان بيتكلم عشان انا كنت طالبه و هوه بيشتغل

بس انا مبسوطه انها فتحه خير و الناس ابتديت تحكى

و على هامش المؤتمر ده احب اقولك ان احنا بجد عندنا مشكله مع موضوع الحب ده

يعنى دايما فيه نوع من التعتيم و كاننا عملنا حاجه غلط و همز و لمز يعنى كتير من البنات ما بتقولش لاهلها انها معجبه بحد و بتهايئلى

الاهل يعنى الاب و الام مش عايزين يعرفوا اصلا رغم اننا لو اتعملنا فى الموضوع بوضوح و يكون تحت النور هنتفادى اخطاء كتير ممكن الشباب يقعوا فيها

ولو الاهل خففو من عصبيتهم و الرفض المطلق التام هيسعدوا الولد و البنت فى اتخاذ قرارات سليمه

[SoSo R]

السلام عليكم و رحمة الله و بركاته

لان النهاردة يوم مميز جدا.......و لان ساعات الفجر الاولي....بتوعدنا بخير كبير.....و لان ايماننا ان النهاردة صباااااااااح غير

أشوف فيكى يوم يا لماضة...أو خلينى أقولك ياريرى...عان مش عاجبنى أسم ريهام لأسباب شخصية بحتة

أستنى بس...ماتمشيش مأموصة زى العيال...أعرفى ظروفى الأول

الساعة داخلة على 2 صباحا

عندى إمتحان بعد 5 أيام

مش مستعدة له ومتنشنة جدا

مرهقة لدرجة الأعياء نفسيا و عضويا...والدنيا بتلف بيا

بقالى يومين ما دخلتش المنتدى للأسباب اللى فوق

وأفاجىء بقصتك دى تيجيلى على الميل بتاعى كتنبيه انه تم اضافة تعقيب...

وتخلينى أنسى كل اللى فيه و أدخل أرد عليكى...

وعايزاكى تقرى كويس...وتقرى بين السطور...قبل الكلام المكتوب

لنبدأ ما شعرت به...

حزنت ثم شعرت بضيق...ثم أستفزيت..

لأننى أنثى

أظن فهمانى.. .

واتركنى أخترق مساحتك الخاصة جدا التى اشركتينا فيها...

لماذا تجاهلتى مشاعرك؟؟؟

علامات استفهام كثيييييييييرة تظهر امامى..

هل هو الخجل...أم التقاليد الشرقية

ام خوفك من صعوبة نجاح إختلاط شخصين من خلفيات و ثقافلت مغايرة؟؟!!!

عارفة يا لماضة..

من أكتر من سنة إتفتح موضوع عن هل من حق البنت إنها تصرح بمشاعرها للشخص اللى معجبة بيه؟

كان عنبى لسه من الناشئين :lol: وداخل المنتدى جديد

ساعتها قلت رأيى بصراحة عن إقتناعى الشخصى...

تقريبا إتشتمت ساعتها

وابتديت أفضل أحتفظ بأفكارى لنفسى...بدل من تضييع الوقت و المجهود...والتعرض للمهانة كمان

ده مش موضوعنا ...بس أفتكرته دلوقتى و أنا باتكلم معاكى

يمكن ما أتكلمناش قبل كدة...بس ماقدرتش أشوف قصتك دى و أسكت...

صحيح ما فات قد فات...

وماحدش يعرف الخير و النصيب فين...

ولكن...

أنتى كان جواكى ردود و كلام كتير قوى ليه

و تجاهلتى كل ده...

يارب يكون وصلك كل كلامى اللى قلته و اللى ماقلتوش فعليا

أنا عارفة إنك ذكية و هتفهمينى

تحياتى ليكى

[لماضة مصرية جدا]

لماذا تجاهلتى مشاعرك؟؟؟

علامات استفهام كثيييييييييرة تظهر امامى..

ولكن...

أنتى كان جواكى ردود و كلام كتير قوى ليه

و تجاهلتى كل ده...

يارب يكون وصلك كل كلامى اللى قلته و اللى ماقلتوش فعليا

أنا عارفة إنك ذكية و هتفهمينى

تحياتى ليكى

صبااااااااح مافيهوش و لا ذرة زعل و لا حتة فتفوتاية

إممممم

مش رديت؟؟؟

عشان

عشان

عشان

مبعرفشي فرنساوي حضرتك خاااااااااااااااالص.......

ضحكتي...روقتي

طيب بالراحة عليا

عارفة يا سوسو براني

كنت كتير بقول لنفسي...."يا رب ما يقولها"....لا يا رب يقولها.....

بس انا عارفة نفسي ببقي راسمة في دماغي سيناريو....و لما بتحط في موقف....الكائن اللمض ده بتلاقيه

سكت و بكتيره قال

احم احم

او غير الموضوع...تماما

تقولي جبان....ماشي

تقولي عبيط...ماشي

تقولي ....اتربي علي كده......ماشي

تقولي......خايف انه يقترب اكثر.................................................فيحترق.....ممكن

تقولي.....كان حاسس انه عايش في حلم....و عايزة يقف عند اللقطة دي....بروبن برضه

تقولي.....مشاعره كانت صغيرة....و هو كائن لسه بيتلمس طريقه في الدنيا....و خايف يكون اللي حسه ده غلط....ممكن

تقولي....مكنش قادر يقاوم...اللي ممكن يحصل بعد كده من كومة الاختلافات.....مع انه مكنشي شايف اصلا ان فيه اختلافات.....كان قمة الحلم...قولي

تقولي....كان بيحب يتفرج ع المغامرة في قصص ناس تانية و مبيحاولش يعملها لنفسه.....مااااشي

قولي ما شئتي

و لكي كل الحق

بس هي بني آدم.....بس صمت

مش فيه وقت...بيبقي فيه الصمت احلي

يمكن توقيت الصمت هتشوفيه خاطيء....

و يمكن توقيت الصمت بداية ميلاد رؤية تاني للدنيا.....و لنفسي...

اللي بقت تواجه نفسها انهافعلا تخشي الاقتراب....

بس عرفت ان في الحياة فيه ناس تستحق المغامرة عشانها

بس خلاويص

صبااااااااااااااااااااحك صمت....بس لذيذ

[se_ Elsyed]

الموضوع قلب أمين رزق ليه كده ؟

صلوا عالنبي يا جدعان

أنا مش هاكي يا عم عشان أنا كمان زمان في الكلية كنت منيل كده وبحب في الخباثة وخايف أقول اللي في قلبي يزعل ويعند ويايا .. وإحتمال كان يمد إيده عليه .. فكتمت حبي في قلبي ولملمت أوراقي وأحتفظت بها لنفسي ..

سكوربيون .. دخل الحبيب اللي بعده .. بس سكون متكتف عشان الإعترافات تتم بدون اي ضغوطات

[shiko]

تقولي....كان بيحب يتفرج ع المغامرة في قصص ناس تانية و مبيحاولش يعملها لنفسه.....مااااشي

ده اندماج ...اكبر فى مشاعر الاخرين ...بيخلط علينا احنا مشاعرنا ...وبيخلينا رافضين نكون على خشبة المسرح ....دايما بيخلينا قاعدين فى وسط المتفرجين ...

فراشتى اللمضة ...صباحك مشاعر غامضة ...

[shiko]

أنا مش هاكي يا عم عشان أنا كمان زمان في الكلية كنت منيل كده وبحب في الخباثة وخايف أقول اللي في قلبي يزعل ويعند ويايا .. وإحتمال كان يمد إيده عليه .. فكتمت حبي في قلبي ولملمت أوراقي وأحتفظت بها لنفسي

س س....الحب الشرقى العفوى ....

بصراحة كدة ...ومن غير زعل ...بذمتك

انت برضه خايف من بابا ؟؟ هو فينه بابا ؟؟؟

ولا خايف من المودام ....لاحسن تقرا ....

طب سمعنا صوتك كده ..

الفضول يقتلنى ...عاوزة اعرف ...الا هو باباك مرتبط؟؟