ما تيجوا يا شباب نرشح الشباب

[se_ Elsyed]

بقى لي كام يوم باتابع في موقع كلنا خالد سعيد تلك المباردة الجريئة في التعريف ببعض الشباب المُرشحين لخوض إنتخابات البرلمان

واللي بالتأكيد هايتهرسوا في تلك المعركة اللي بتحتاج إلى تكاليف كتيرة جداً ومجهود مضاعف خصوصاً بعد توسيع الدوائر الإنتخابية ... حد سأل نفسه شاب عنده 30 سنة مثلاً هايجيب على الاقل 100 الف جنيه تكاليف دعاية وسرادقات و و و و منين ؟

فقولت في عقل بالي ... وفيها إيه لما نجرب ؟

وانا هنا لا أتحدث عن عامل السن نفسه .. لإن كبار السن لهم كل الإحترام ...

لكن اتكلم عن ثورة قام بها الشباب الصغير أثناء نومنا في العسل ... ومع ذلك ما فيش حد من الشباب قيل له تعالى تولى تطوير الحمامات العمومية في جمهورية مصر العربية

يبقى لما يبقى عندي مجلس شعب فيه ييجي 500 عضو ... مافيش مانع لما يبقى فيهم 100 عضو شاب من مواليد السبيعنات والثمانينات

يا جماعة انا شخصياً قابل إنهم يتعلموا فينا

انا عارف إنهم قليلي الخبرة ..

لكن هما اللي كانوا موجودين كانوا مقطعين السمكة وديلها .؟

وحياة البصمجية اللي كنت أعرف منهم ناس أقسم بالله ما بيعرف يكتب إسمه .. ويثطلق عليه سيادة النائب وهو معاه ختم وختامه مكتوب عليها إسمه .. والأسم عضو مجلس تشريعي لسن القوانين

ولما أتطورنا شويه بعد ما ريحتهم فاحت .. قالوا خلاص لازم يبقى معاه شهادة محو أمية .... يا حلاوه

أنا شخصياً هاعمل كده ... وهاسأل واتطقس على كل الشباب اللي في دايرتي بغض النظر عن إنتماءاتهم الحزبية .... انا هارشح منهم حد عشان أوصل له رسالة إننا معاه وإننا بنشجعهم وإننا مؤمنين بهم ...

ونفسي قبل ما أموت أشوف وزير في الثلاثينات أو الأربعينات ... كده كتير قوي بصراحة إني الاقي اغلب الموجودين فوق السبعين واجيال تيجي واجيال تروح وهما لسه في أماكنهم

إنتو إيه رأيكم في الفكرة نفسها ؟

[جويرية]

ما انا برضو نفسي اقول كدة للبرادعي ده داخل علي 70 سنة ، مش عارفة ازاي حيغير برنامجه اليومي بعد ما طلع علي المعاش اكيد كل يوم بيقضيه الصبح في قراية الجرنال و يقعد وسط احفاده ، ازاي حيغير ده كله و يبقي رئيس

و يوجع دماغه باخبار الشعب ،

انا مش عارفة الناس اللي لسة ماسكة في الدنيا دي بعد السبعين ليه ، ده انا خلاص عايزة ادور علي دار مسنين اقضي فيها اللي باقيلي من حياتي ، بس مش لاقية دار مسنين تقبل من سن 38 سنة

[ابراهيم عبد العزيز]

في مصر هناك مفهوم متغلغل في العقول وهو ان المناصب العامة أو القيادية يجب أن يتولاها شيخ عجوزا لأنه يتميز بالحكمة بعكس الشاب الذي يكون متهورا

عن نفسي أراه منطق مغلوط مئة بالمئة , ففي العصر الحالي هناك شباب حصلوا علي جرعات تعليمية كبيرة جدا ومتخصصة في كافة المجالات , وحصلوا على شهادات علمية من جامعات عريقة وكبيرة في العالم , بعكس جيل الكبار الذي يعتمد معظمه على التعليم الذي حصل عليه ( بالخبرة العملية ) ولكن غالبيتهم تجدهم غير مدعمين بنفس القدر التعليمي الذي نراه في الشباب

جيل الكبار بسيطرته التامة على كل المناصب الكبيرة وإحتكاره لها بحجة ( الحكمة ) أصاب البلد بأمراض عضال مثل الروتينية والبيروقراطية والركود والتبلد والجمود , والغالبية منهم يخشى ( بل يتصدى ) من وصول يد التطور لمؤسسته أو قسمه أو إدارته خشية ألا يستطيع مسايرة هذا التحديث والتطور فيكون نصيبه الإقصاء

وطبعا كلامي هذا يخص كل مناحي الحياه في مصر وليس البرلمان فقط

لذلك أضم صوتي لصوتك يا أخ سي السيد

يجب ضخ دماء جديدة في شرايين مصر في كافة القطاعات وذلك عن طريق تصعيد الشباب المتعلم المثقف ومنحهم الفرصة بجانب جيل الكبار

لا أطالب بإقصاء جيل الكبار فلديهم من الخبرات ما لا يمكن إغفاله , ولكن يجب عمل توليفة من الخبرة والشباب تكون غالبية مكوناتها من الشباب وليس الكبار لكي يضفوا على مصر الحيوية والتجدد المفقودين فيها منذ عشرات السنين

ولتكن بداية ذلك في البرلمان القادم إن شاء الله

تم تعديل 8 نوفمبر 2011 بواسطة ابراهيم عبد العزيز

[متعب]

مين ال قالك ان الشباب قليل الخبرة يا أستاذنا

بالعكس انا شايف ان الشباب واعى جدا وعارف كل كبيرة وصغيرة فى البلد

اما انا عن نفسى مش مقتنع بالمجلس ده من اساسه وياريت يلغوه من الاصل

ده مجال لسرقه مصر تحت قبه البرلمان

ولو تم المفروض انه يتم مش فى حكم العسكر دول لانهم هيزورا الانتخابات كده كده

يعنى اى انتخابات فى ظل وجود العسكر باطله ومفقوده الشرعيه

ده غير انهم هيستغلوا الانتخابات للاحتقان بين فئات الشعب بالشكل ال يخدم مصالحهم فى النهايه والشعب بالكامل يكره بعضه عشان الانتخابات دى ويحولوا البلد لمسخرة لم تشهدها مصر

اذن الانتخابات دى ليها اهداف تانيه خالص عير المجلس الموقر والذى منه

عارف ان عجبنى قوى اليوم تصريح للفنانه المحترمه تيسير فهمى كانت بتقول انا هخش المجال السياسى وانشأ حزب مش عارف عملته ولا لاء

المهم

بتطالب بطلب جميل قوى

ان يتشال الحصانه من عضو محلس الشعب

الحقيقه الطلب فوق الرائع . لان كل جرايم اعضاءالمجلس بتتم بدون محاسبه وبتجعله فوق القانون

يتاجر بقى فى مخدرات يتاجر بقرنيات وكله يتاجر بالعملات المشبوهه والاراضى وسمسرة العقارات

يتاجر بالشعب نفسه وال يعينه فى الشركات يدفع اد كده . كوكتيل قرف يعنى ولذالك بيدفعوا فى الصوت الواحد 200 جنيه

ويقبلوا ايادى المصوتين اسبوع الانتخابات وبقيه الخمسه سنين الشعب ال يقبل رجليهم

[se_ Elsyed]

أنا باعتب على زملاءنا وأصدقاءنا بالمنتدى اللي عايشين في مصر

زي ما كنت باعتب عليهم زمان إنهم على الاقل يكتبوا عن المشاكل اللي موجوده في كل منطقة يعيشون فيها .. ده قبل الثورة

دلوقت باعتب عليهم وباطلب منهم إنهم يكونوا اكثر إيجابية في إنهم يعرفونا على المرشحين في كل منطقة يعيشون فيها بمنتهى الحيادية والتجرد ... لإن بالتأكيد هايلاقوا مغتربين عايشين بره من نفس الدوائر دي .. لعل ذلك يكون مؤشر إسترشادي لكل ناخب عندما يذهب ليُدلي بصوته

[hOuSsAm]

أنا باعتب على زملاءنا وأصدقاءنا بالمنتدى اللي عايشين في مصر

زي ما كنت باعتب عليهم زمان إنهم على الاقل يكتبوا عن المشاكل اللي موجوده في كل منطقة يعيشون فيها .. ده قبل الثورة

دلوقت باعتب عليهم وباطلب منهم إنهم يكونوا اكثر إيجابية في إنهم يعرفونا على المرشحين في كل منطقة يعيشون فيها بمنتهى الحيادية والتجرد ... لإن بالتأكيد هايلاقوا مغتربين عايشين بره من نفس الدوائر دي .. لعل ذلك يكون مؤشر إسترشادي لكل ناخب عندما يذهب ليُدلي بصوته

مش بالسهولة دى

انا بقالى اسبوعين فى مصر نازل فى دايرتى 70 مرشح وتايه فى معظم المرشيح ومش عارف اجمع معلومات غير عن الاتنين اللى بيترشحوا كل مرة واللى ساكن قريب يبتنا

المشكلة الكبيرة ان بعد مضموا اللجان مع بعضها وبقت اللجنة اللىانا فيها تحتوى على 3 مدن (لحد دلوقتى مش فاهم ليه) بقى صعب جدا اعرف معلومات عن المرشحين من المدن التانية - مجرد انها يافطات تهنئة بالعيد ومعتش حتى حد لاقى مكان يعلق فيه

-------------------------

فكاهة تتعلق بالموضوع ده ان توفيق عكاشة نازل فى الدايرة بتاعتى

يعنى لما هروح انتخب هلاقى وشه السمح فى الورقة

ومعلق يافطة كبيرة فى الشارع عندنا كل عام وانتم بخير بمناسبة عيد الاضحى (الاعلامى الكبير توفيق عكاشة)

بس فعلا موضوع معرفة معلومات عن المرشحين فى رايي صعب جدا لان الوقت ضيق والاعداد اللى نازلة الانتخابات كتيرة جدا

وللاسف معظمهم مازال شغال بنفس منهجية الحزب الوطنى يمشى ميكرفون فى الشارع انتخبوا المخلص فلان رمز التفاحة ابن بلدكوا اللى مش عارف هيعملكوا ايه

ربنا يسترها ياعم سين سين

[Ahmed Anwer]

دي مدونة إئتلاف الثورة مستمرة

مجموعة أحزاب شبابية ما بين إسلامية و إشتراكية و ليبرالية + إئتلاف شباب الثورة

http://thawramostamera.wordpress.com/

خش علي المدونة و دوس علي محافظتك و شوف نازلين فين

طبعا هما مش قادرين يغطوا الجمهورية كلها

[جويرية]

مش هيا القوائم بنسبة 70 % و الفردي 30 % ، ما كدة بقت اسهل

كدة حندي للحزب اللي بننتمي اليه او اللي احنا مختارينه ،

و فيه كمان اعضاء حزب و نازلين مستقلين ،

[جويرية]

أنا باعتب على زملاءنا وأصدقاءنا بالمنتدى اللي عايشين في مصر

زي ما كنت باعتب عليهم زمان إنهم على الاقل يكتبوا عن المشاكل اللي موجوده في كل منطقة يعيشون فيها .. ده قبل الثورة

دلوقت باعتب عليهم وباطلب منهم إنهم يكونوا اكثر إيجابية في إنهم يعرفونا على المرشحين في كل منطقة يعيشون فيها بمنتهى الحيادية والتجرد ... لإن بالتأكيد هايلاقوا مغتربين عايشين بره من نفس الدوائر دي .. لعل ذلك يكون مؤشر إسترشادي لكل ناخب عندما يذهب ليُدلي بصوته

لو حد صوته في محافظة البحر الاحمر

ده احد شباب ائتلاف الثورة ، اسمه محمد احمد الطيب ، فردي - حزب التيار المصري - عمال

http://www.youtube.com/watch?v=qGp1VOkRi5Q

هوه اللي ماسك الميكرفون ، فضل هوه و زمايله ورا المحافظ لغاية ما مشوه ، محافظ البحر الاحمر اخر محافظ اتغير ، عملوا اكتر من مظاهرة و و مظاهرات في التحرير لغاية ما اخير المجلس العسكري عزله

حملة ترشيح محمد الطيب لعضوية مجلس الشعب

ده مرشح لحزب الحرية و العدالة بس مستقل فئات

محمد يوسف قطامش

حزب الحرية و العدالة بالبحر الاحمر

تم تعديل 9 نوفمبر 2011 بواسطة جويرية

[Ahmed Anwer]

وسائل عملية لدعم الشباب بالانتخابات

من Mostafa Alnagar‏ في 09 نوفمبر، 2011‏، الساعة 04:43 صباحاً‏‏

كيف تدعم الشباب فى الانتخابات

===========

لا شك ان مشكلة ضعف التمويل هى المشكلة الأكبر التى تواجه الشباب المرشحين فى الانتخابات القادمة أمام قوة رأس المال من المنافسين وفلول النظام لذلك تستطيع دعم مرشحى الشباب عبر الوسائل الاتية :

1- المساهمة فى اعداد مقر انتخابى مؤقت ( فترة الانتخابات فقط ) ضمن حدود الدائرة سواء كانت شقة تملكها أومحل او مخزن ، حيث ان وجود المقرات يسهل كثيرا على المرشح التواصل مع الناخبين

2- القيام بطبع بانر كبير للمرشح وتعليقه على عمارتك او بلكونة منزلك خاصة اذا كنت من سكان الشوارع الرئيسية بالدائرة ( يمكنك الحصول على التصميم من ادارة الحملة ) واذا لم تستطع تحمل تكلفة الطبع فلتكن مساهمتك بتوفير هذا المكان المميز لدعاية المرشح بالتواصل مع ادارة الحملة للحصول على البانر

3- طباعة عدد من اوراق الدعاية للمرشح – فلاير ،بروشور ، البرنامج الانتخابى - طبقا لاستطاعتك المادية (يمكنك الحصول على التصميم من ادارة الحملة )

4- المساهمة فى حملات رسائل المحمول لدعم المرشح عبر ارسال رسالة من موبايلك لكل اقاربك واصدقائك وجيرانك المقيمين بالدائرة تدعوهم فيها لانتخاب المرشح ( تستطيع ارسال 10 رسائل يوميا على الاقل حتى يوم الانتخابات )

5- التطوع فى الحملة والمشاركة مع فريق الحملة فى حملات طرق الأبواب بشارعك ومنطقتك لاقناع الناس باختيار مرشحك ( حملات طرق الأبواب مؤثرة جدا فى نجاح اى مرشح ولا تحتاج لتكلفة مادية وانما حماسك واقتناعك وجهدك فقط ولن تكون فيها وحدك بل بصحبة اخرين من المتطوعين بالحملة )

6- القيام يوميا بعمل خمسة اتصالات هاتفية عشوائية – على الأقل - لأرقام تليفونات أرضية بدائرتك الانتخابية تعرفهم فيها بنفسك وتحدثهم عن مرشحك وتدعوهم للتصويت له ( الاتصالات الهاتفية المباشرة مفيدة جدا فى الاقناع ويتقبلها الناس بصدر رحب )

7- تعليق بوستر للمرشح بسيارتك طوال الحملة الانتخابية لتكون اداة اعلامية متحركة بالدائرة وكذلك تعليق بوستر كبير بمدخل عمارتك – بعد موافقة جيرانك – وكذلك بشركتك او محل عملك بالدائرة ايا كان ( مطعم – صيدلية –مكتب محامى – شركة – بنزينة – عيادة ... الخ )

8- تستطيع ترتيب جلسة شاى فى منزلك أو منزل احد أصدقائك أو أى كافيه أو مكان مناسب وتدعو المرشح للجلوس مع هذه المجموعة من عائلتك وجيرانك – من 10 افرد ل 25 شخص - ليحدثهم عن برنامجه الانتخابى ويتناقش معهم وجها لوجه مما يسهل عملية اقناعهم وتحميسهم للتصويت له ( جلسات الشاى بهذا الشكل تصنع قوة تصويتية هائلة اذا استطاع المرشح تغطية كل ارجاء الدائرة عبرها )

9 - جمع عدد من الاصوات الانتخابية والتربيط عليهم واصطحابهم لمقار الانتخاب يوم الانتخابات للادلاء بصوتهم للمرشح ( تبدأ بدائرة عائلتك وجيرانك واصدقائك بالدائرة وعلى الأقل تستطيع جمع اكثر من عشرة اصوات ودعوة كل فرد فيهم لجمع نفس العدد من الاصوات وبهذا تكون شجرة اصوات انتخابية تساعد بها المرشح على الفوز )

10 - المشاركة المباشرة فى رفع الموارد المالية للحملة عبر جمع تبرعات من عائلتك واصدقائك والمساهمة بها فى دعم الحملة ( القانون يتيح للافراد التبرع المباشر لحملات المرشحين وفى حالة المبالغ الكبيرة يمكنك الحصول على ايصال بقيمة التبرع من الحزب الذى ينتمى اليه المرشح )

[وطني حر]

لا يختلف اثنان على ان شباب الثوره اكثر رغبه وصدقا علي تحقيق الرقي والازدهار لمصر . واكثر تضحيه على تقديم كل ما يملكون فقدمو ارواحهم وضحو بما يملكونه

كما انهم اقلهم رغبه في تحقيق النصر الذاتي لانفسهم . فلا صوت لهم الا الصوت المصري وخير مصر . ولا صوره لهم الا صورت ذلك المواطن البسيط الذي يرغب في توفير حياه كريمه له ولاسرته

ولكن يعوق هؤلاء الشباب الخبره . وايضا الدعم المادي . كما ينقصهم ثقه الناس فيهم . فلا زال الكثير من الشعب يتعامل مع مرشحي الاحزاب بنفس النمط السابق ( تقديم الخدمه الفرديه فقط )

وان كانت الرغبه لدي الكثيرين هو وجودالعديد من الوجوه الشابه تحت قبه مجلس الشعب ولكنني لست بهذا الحماس . لانني ارى ان الهدف الاسمى هو تحقيق وترسيخ مبدا الديمقراطيه والانتخاب النزيه . وتغيير الصوره القديمه لعضو مجلس الشعب انه للخدمه الخاصه فقط

فلا اريد ان يكون الشباب في وجه الطوفان في الفتره القادمه لان احتمال سقوطهم امر وارد . لتغير المفاهيم لديهم عن تلك المبادي لدور عضو مجلس الشعب . فاريدهم ان يكونو داعمين للحريه يقفون طابورا اخر خلف من يقف امام المدفع . يكونو سند وحمايه للديمقراطيه

فلا يهم من يصل للقبه في المرحله القادمه . حتي وان كان جاهلا او اميا المهم هو ترسيخ المبدا .. بان من وصل الي مجلس الشعب وصل بصوت الشعب

تم تعديل 9 نوفمبر 2011 بواسطة وطني حر

[نورالعين]

اعلنت قناة cbc

عن تقديم خدمة مجانية للتعريف بشباب الناخبين

وفعلا انا مع ترشحيهم ولكن ايضا لا نغفل ترشيح من نثق بهم من الاعمار الاكبر سنا

الرباط الخاص بي

[سكر]

انا مش مبسوط مش عارف ليه

انا بقالى هنا اكثر من شهر فى مصر وحولين الدايرة بتاعتى مش عارف من الى انتخب وهنتخب مين

العدد بقى كتير جدا ودمج الدوائر جعل الكثير من الناس مش عرفه اصلا اسماء وطبعا البرامج كلها كلام انشا وخلاص وشبه بعض

الناس ممكن تروح تنتخب تمسك الورقه تتوهو فيها ومتعرفش حد وبالتالى يكون الحل

اختار الشباب دى ثورة شباب (يعنى اختار اصغر المرشحين ولا اعمل ايه اذا كان معظم الناس معرفهمش والى اعرفه ربنا ما يوريك)

اختار الى من اهل بلدى حتى لو كنت معرفش عنه حاجة باى حجة السن & اقرب اى تبرير وخلاص

الحقيقة ان مجلس الشعب فى مصر به عوار كثير واعضائه عاملين حاليا زى الى تعلم قرايه وكتابه وقرر الدخول فى الجامعة مباشرة

ولكن هذا ليس ذنبهم وليس حجه على الغاء الانتخابات ولكن تاكيد ان برلمان مصر العافيه يحتاج الكثير من الجهد والعمل قبل الدخول الى الانتخابات

على فكرة انا فى ناس كتير طلبت منى انى ارشح نفسى بحجة الشباب السمعة الحسنه الحمد الله

عشان كدة لسه بدرى على مجلس شعب حقيقى