الألتراس الرياضي .. دولة فوق الدولة

[se_ Elsyed]

إذا كنا هانشتغل ونعالج المشكلات بنفس الأسلوب العقيم اللي كان قبل الثورة .. يبقى عليه العوض .. وما نستغربش من أي حاجه تحصل

على سبيل المثال

بقى لنا فترة ييجي سنة كده داخلين في موالي مالوش نهاية ...وهو موال عنف الالتراس الرياضي اللي بيشجع الاندية خصوصاً الاندية الشعبية

الاهلي

الزمالك

الأسماعيلي

المصري

الاتحاد السكندري

بدات هذه الظاهرة بجماهير الاهلي والزمالك مني ييج 5 سنين ... وأقتبسوا الفكرة من جماهير الاندية الاوروبية ... بص مصروا التجربة ومسخوها

والألتراس هم مجموعة من الشباب صغير السن .. بيشجعوا ناديهم بمنتهى التعصب وبيروحوا وراه مطرح ما يروح ... ولهم طقوس خاصة في التشجيع ... الاغرب بقى إن لهم عالم خاص كده يُشبة عالم الماسونية .. يعني لا تعرف لهم قائد ولا معلومات ولا أي ملعومات متوفرة عنهم ولا لهم إختلاط ولا تعامل بالإعلام ولا تعرف بيجيبوا الفلوس دي منين .. وبيصرفوا مصاريف بالهبل ....

انا حضرت مباريات كتيرة للأهلي لما بانزل مصر اجازة .. والولاد دول بياخدوا ركن كده وبيبقوا بالالاف بصراحة .. وبيعملوا حاجات عجيبة

أولاً في الماتشات الكبيرة قدام الأندية الكبيرة يعني أو الدولية .. بيعملوا حاجه إسمها الدخلة .. دخولهم يعني على المدرجات ... ودي بتبقى عبارة عن تصميم فني بلوحات ملونة صغيرة بيوزعوها على الجماهير بترتيب معين .. وبيفهمونا بقى إنهم القادة بتوعهم لما يشاوروا بطريقة معينه .. نروح رافعين كلنا في وقت واحد لون معين ... فبيبقى الشكل النهائي تحفة بصراحة ... ده دور الكومبارس اللي زينا .. ناهيك عن اللافتات اللي بيعملوها

حضرت مباراة الاهلي والزمالك ييجي من 4 سنين .. يا نهار مش فايت على اللي شوفته ... ما كنتش أعرف عنهم حاجه بصراحة ... قبل المباراة لقيت ييجي 100 شاب منهم اللهم صلي عالنبي شاسيهات جامدة وعيال عمالقة بصراحة وطبعاً مختارينهم على الفرازة .. وداخلين شايلين كراتين كتيرة قوي فيها اللوحات دي ... وناس تاني شايلين البانرز اللي بتبقى قماش أو بلاستيك وييجي 20 واحد منهم ما كانوش قادرين يشيلوا البانر الواحد ... وبيفردوه بطريقة معينه على سور المدرج .. وبيستنوا إشارات معينه من القادة بتوعهم عشان يروحوا فاردينها مره واحده وتدي منظر جميل

اما هما بقى وتجمعهم .. فبيقوده شباب الواحد فيهم بيُسمى " كابو " بتشديد الباء ... والعيال دي زي ما يكونوا شياطين بجد ... فجاة تلاقية اول الماتش تسلق مكبرات الصوت امام المدرجات .. وقلع فانلتهم وبقى شابونيز خالص صيف شتا ... ويفضل 90 دقيقة واقف على السماعة ومدي ضهرة للملعب ووشه لللألتراس ويشاور لهم إشارات معينه عشان يقولوا نشيد معين ويعملوا حركات معينه كامواج البحر ... او يديوا ضهرهم للملعب ويرفعوا إيدهم ... إلخ

وما بيهمدوش ... لانهم مخلصين جداً للنادي وبيشجعوه في السراء والضراء وبياكلوا أي حد يهاجم النادي سواء إعلام او اندية اخرى او الجن الازرق

المهم إتعلموا بدعة غريبة من جماهير الرياضة في دول شمال المغرب العربي ... وهي إشعال الشماريخ أثناء المبارة

اللي هي دي

ودي غالية على فكرة ... يعني البتاع من ده بحوالي 40 ج

ومع ذلك بيجيبوا كمية كبيرة وبيقلبوا الماتش بها والبتاع ده بيعمل دخان رهيب وبيحول الملعب إلى شبورة ما تشوفش بها صوابعك وطبعاً خطر عشان النار وكده اللي ممكن تحرق أي حاجه وتعمل كوارث

فأبتدى إتحاد الكرة يعمل غرامات مالية بسيطة العام الماضي على النادي اللي جاهيرة بتعمل كده

ولم يرتدعوا أو يتراجعوا

راح الموسم ده عامل غرامات خرافية .... وهي إن الشمروخ الواحد اللي يتولع النادي يدفع عليه 20 الف ج .. وأضرب يا معلم في عدد الشماريخ ..

برضوا العيال ما سكتوش

راح أتحاد الكرة منوع الغرامات وأشتملت على عقاب النادي بإن يخلي مبارياته تقام بدون جمهور

وهنا كانت القشة التي قصمت ظهر البعير

العيال ما سكتوش

على سبيل المثال

الاهلي كان عنده مباراة من أسبوعين مع فريق الداخلية .. بدون جمهور في أستاد القاهرة .. وفجاة سمعنا صوت تشجيع رهيب .. يا نهار مش فايت جاي منين ده ؟

اتاري العيال جابوا مكبرات صوت .. وكاسيت .. ونطوا من فوق السور ووضعوها بالقرب من الملعب وشغلوا الكاسيت باعلى صوت فكانت حاجة غريبة جداً

المهم

كان للاهلي مباراة من يومين أمام فريق أنبي .. وأنبي هو صاحب الأرض ... وجماهير الاهلي هي اللي مالية الأستاد ... العيال برضوا ولعوا الملعب .. وزودوا على ذلك شيء لم اراه في الملاعب المصرية ... لافتات كبيرة جداً كاتبين عليها شتيمة بذيئة ضد رئيس إتحاد الكرة المصري .. ونقلتها عدسات التليفزيون المصري

يقوم البيه وزير الاعلام متشملل أمبارح وواقف مخرج المباراة عن العمل .. ومحول جميع الطاقم المساعد للتحقيق لأنهم نقلوا اليايا ياي ده ....

اهبل مش كده ؟

ولم يتم أي عقوبة على النادي الاهلي حتى الان

- الاخطر بقى ... الزمالك كان عندهم ماتش أمبارح امام فريق إتحاد الشرطة في أستاد القاهرة بدون جمهور

[se_ Elsyed]

وفجأة يا سادة

والزمالك كان متقدم 1-0 .. لقينا ييجي 50 شاب أقتحموا المدرجات وهاتك يا ضرب في عساكر الامن المركزي ونقلووا عسكري غلبان منهم للعناية المركزة في مستشىفى المقاولون العرب مصاباً بأرتجاج في المخ .. وأبتدا العيال يولعوا شماريخ ويفردوا لافتات عليها شتيمة وتحدي لاتحاد الكرة

ولان الشرطة كانت كتير ومريحة لانه مافيش جمهور .. إبتدوا يطاردوهم ... لحد مما خرجوهم بره خالص .. واعتقلوا منهم 16 واحد ..ده أمبارح

طبعاً فريقهم كده المفروض كان تتلغي المباراة له ويُعتبر مهزوم 2-0 ... لكن جت من عند ربنا .. وفريق إتحاد الشرطة قطعهم وهزمهم 2-1 ...

بالمناسبة .. الزمالك هايحتفل بمئويتة يوم الخميس القادم ... وجايب فريق أتليتكو مدريد ودافع له الشيء الفلاني

ومناسبة أخرى .. الزمالك عمره ما بيكسب في الأعياد ودايماً بيبقى عيد إسود على جماهيرة .. ربنا ما يقطع له عادة

نرجع لموضوعنا

رئيس لجنة المسائبقات المسئولة عن الأنضباط وما إلى ذلك .. يئس وقدم أستقالاته على الهواء أمبارح في أحدى البرامج الرياضية

اه قبل ما أنسى ... الشرطة افرجت عن العيال كلها النهاردة .. من شويه كده

وتعيش إنت يا حج

-----------

ولان الدوري هايتوقف عشان في مباراة للمنتخب المصري أمام البرازيل هاتتلعب في قطر .. مباراة ودية يعني .. وفي مباريات تانية للمنتخب الأولمبي .. وبعدها ستقام الشهر القادم مباراة الاهلي والاسماعيلي في ستاد القاهرة بدون جمهور عقوبةً للاهلي على تجاوزات جماهيرة

والعيال بيهددوا إنهم يسقتحموا الملعب ولن يوقفهم أحد

[se_ Elsyed]

بصوا المنظر

[se_ Elsyed]

عارفين أنا بالوم مين ؟

بالوم الشرطة

لأن كل المباريات اللي حضرتها كنا وإحنا داخلين بنتفتش تفتيش ذاتي

ممنوع أي أله حاده .. أو خشبية زي الخشب أو العصيان اللي بترفع عليها العلم .. لدرجة ممنوع زجاجات المياه المعدنية البلاستيكية .... يعني كانت بهدلة

لكن للأسف بعد الثورة رفعوا إيدهم وبقى الواحد لو دخل الأستاد بدبابة ماحدش بيقول له إنت بتعمل إيه

والحجة ؟

مش عاوزين إحتكاك بحد عشان بتوع الاحزاب والتحرير ومنظمات المجتمع المدني

أيوه هي كده .. ما فيش وسط

يا تسحل اللي قدامك وتقهره ..

يا تسيب الدنيا تضرب تقلب وطظ في أي حاجه

[capitshino]

بصوا المنظر

وشوف الظابط الحيوان ضرب واحد من العيال دى على راسه ازاى لما مسكوهم

http://www.youtube.com/watch?v=7SWJmvkV0Xg

[متعب]

اعتقد دى طقوس رياضيه ملهاش علاقه بالدوله

[se_ Elsyed]

قشطططططططططططططة

في بيان لهم: الوايت نايتس يعلنون الحرب على الكثير من الجهات.. ويصرون على الحرية بالدم إذا لزم الأمر!!

أعلنت مجموعة ألتراس الوايت نايتس الحرب على الكثير من الجهات.. مؤكدين غضبهم الشديد من أحداث مباراة الزمالك والشرطة أمس الثلاثاء في ستاد القاهرة.

وقالت المجموعة في بيان لها على موقع التواصل الاجتماعي "فيس بوك" تعليقاً على هذه الأحداث:

رسالتى اليكم و لا سلام عليكم ...

عانينا كثيرا من الظلم و القمع و الاستعباد , عانينا كثيرا من التسلط و الاستبداد

و لكننا وقفنا بكبرياء و شموخ و حاربنا الطغيان بكل ما أوتينا من قوه

و الله وحده أعلم بماذا ضحينا و ماذا خسرنا كى نحافظ على مبادئنا و كرامتنا و حريتنا

و اعتقدنا ان العدل سيعم و ان الحريه ستنتشر من بعد ثورتنا المجيده

و لكن ,, كيف ؟؟؟؟

و رئيس الاتحاد و كل حاشيته القذره موجودين !!

قيادات الداخليه الفاسده و قتلة الشهداء و أساتذة التعذيب لازالوا فى أماكنهم !!

الاعلاميين المنتفعين و تابعى النظام البائد , أحياء يرزقون و هم أصوات الرأى العام !!

رؤساء أنديه و أعضاء مجالس ادارات خاضعين و مذلولين !!

أهولاء من سيحددون مصيرنا !! أهولاء من سيطبقوا العدل و ينشروا الحريه !!

نحن من نحدد مصير أنفسنا , و نحن من نجلب الحريه لأنفسنا , بالدم أو بغيره

لقد أعلناها و سنعلنها ثانية .. من سيرتقى بهذه البلاد

شبابها و رجالها و نسائها الشرفاء الذين ضحوا بكل ما لديهم ليحاربوا الفساد و يقضوا عليه , لا أنتم يا خادمى النظام و كلاب السلطه

اذا ظننتم ان حربكم معنا قد انتهت !! فأنتم مخطئون

انها بدأت و سننتصر باذن الله كما انتصرنا فى 25 يناير

لأننا صوت الحق و الحريه , و لأننا شرفاء و ندافع عن مبدأنا

مكانكم جميعا فى السجن مع الفاسدين أولياء نعمتكم يا خونة الوطن يا أحقر فئات المجتمع

[Simba]

الشماريخ دي ازاي بتدخل مصر

ازاي بتدخل الاستاد

ازاي مفيش قانون بيجرمها ولا بيعاقب حاملها

[أبو يمنى]

حقيقة الوضع في مصر لا يحتمل سخافات وتفاهات من هذه النوعيّة ...

ومثيري الشغب هؤلاء يحتاجون للقيام بثورة على أنفسهم حتى يعيدوا لها الاتزان وحتى يعيدوا حساباتهم ويعيدوا ترتيب أولويّاتهم .

الله المستعان .

[dongol]

قشطططططططططططططة

في بيان لهم: الوايت نايتس يعلنون الحرب على الكثير من الجهات.. ويصرون على الحرية بالدم إذا لزم الأمر!!

أعلنت مجموعة ألتراس الوايت نايتس الحرب على الكثير من الجهات.. مؤكدين غضبهم الشديد من أحداث مباراة الزمالك والشرطة أمس الثلاثاء في ستاد القاهرة.

وقالت المجموعة في بيان لها على موقع التواصل الاجتماعي "فيس بوك" تعليقاً على هذه الأحداث:

رسالتى اليكم و لا سلام عليكم ...

عانينا كثيرا من الظلم و القمع و الاستعباد , عانينا كثيرا من التسلط و الاستبداد

و لكننا وقفنا بكبرياء و شموخ و حاربنا الطغيان بكل ما أوتينا من قوه

و الله وحده أعلم بماذا ضحينا و ماذا خسرنا كى نحافظ على مبادئنا و كرامتنا و حريتنا

و اعتقدنا ان العدل سيعم و ان الحريه ستنتشر من بعد ثورتنا المجيده

و لكن ,, كيف ؟؟؟؟

و رئيس الاتحاد و كل حاشيته القذره موجودين !!

قيادات الداخليه الفاسده و قتلة الشهداء و أساتذة التعذيب لازالوا فى أماكنهم !!

الاعلاميين المنتفعين و تابعى النظام البائد , أحياء يرزقون و هم أصوات الرأى العام !!

رؤساء أنديه و أعضاء مجالس ادارات خاضعين و مذلولين !!

أهولاء من سيحددون مصيرنا !! أهولاء من سيطبقوا العدل و ينشروا الحريه !!

نحن من نحدد مصير أنفسنا , و نحن من نجلب الحريه لأنفسنا , بالدم أو بغيره

لقد أعلناها و سنعلنها ثانية .. من سيرتقى بهذه البلاد

شبابها و رجالها و نسائها الشرفاء الذين ضحوا بكل ما لديهم ليحاربوا الفساد و يقضوا عليه , لا أنتم يا خادمى النظام و كلاب السلطه

اذا ظننتم ان حربكم معنا قد انتهت !! فأنتم مخطئون

انها بدأت و سننتصر باذن الله كما انتصرنا فى 25 يناير

لأننا صوت الحق و الحريه , و لأننا شرفاء و ندافع عن مبدأنا

مكانكم جميعا فى السجن مع الفاسدين أولياء نعمتكم يا خونة الوطن يا أحقر فئات المجتمع

و حياتك انت.... دول كلهم بؤ بس كبير شوية

و اخرهم الشماريخ و تضييع الوقت في ماتشات الكورة

بصراحة انا بقيت متعاطف مع الشرطة في اللي بيعملوه مع الناس دي

انا لو مكانهم هعمل اكثر من كده

[التونسى]

دول على كده قنبله موقوته بجد .. لو تم استخدامهم وحشدهم لغرض شرير .. والشباب اللى زى دول سهل تسخينهم ... ما هى البلد ناقصه

[doctor ayman]

مصر اصبحت بلد الفوضي

واي حد عاوز يعمل اي حاجه بيعملها

اذا كانوا بيحرقوا اقسام الشرطه يوميا

للافراج عن اي بلطجي تتجرا الشرطه وتمسكه

مش هيقتحموا الاستاد ويولعوا فيه

ولسه القادم اسوأ

تم تعديل 10 نوفمبر 2011 بواسطة doctor ayman

[engmido]

لا يحتمل سخافات وتفاهات من هذه النوعيّة

يا سلااااام سخافات دى معبرة جدااااا

تم تعديل 10 نوفمبر 2011 بواسطة engmido

[عادل أبوزيد]

في إنجلترا و أظنها أول دولة فى بدعة الألتراس تم تحول الألتراس إلى حزب سياسي يميني متطرف لا تحضرني مزيد من التفاصيل و لكنها حقيقة

[أبو محمد]

دول على كده قنبله موقوته بجد .. لو تم استخدامهم وحشدهم لغرض شرير .. والشباب اللى زى دول سهل تسخينهم ... ما هى البلد ناقصه

حدث ويحدث يا سيدى الفاضل

تـُرى ما هو الرابط بين الإصرار على مخالفة النظم الرياضية المحلية والدولية

وبين الثورة ومحاربة النظام الذى لم يسقط بعد

حتى يصدر إعلان مثل هذا ؟

فاكر إعلانات الدورة الأفريقية بتاعة "ياترى مين وراهم"

وبالمرة ياترى مين ورا البلطجية ؟

[pink rose]

سؤال عمال يزن في دماغي من ساعة ما قريت البيان اللي اضافه هنا عمو ابو محمد

هو شباب الالتراس دا ما شاء الله عليهم جابوا البلاغة الانشائية الرائعة دي منين اللي بيكتبوا بيها البيانات؟؟؟

اللي اعرفه انهم شوية عيال مالهمش حاجه يعملوها في الدنيا الا التنطيط ورا الاندية و اغلبهم غير متعلمين

يبقى مين بيكتبلهم البيانات دي؟؟؟

[se_ Elsyed]

وأخيراً .. أنتصر الشر

إتحاد الكورة العرة يتراجع ويلغي غرامات إشعال الشماريخ ... ويقرر فقط الغرامة على |لقاء الشمارخ على أرض الملعب أو حدوث دخان كثيف يُعيق الرؤية .

لأ راجل يالا أنت وهو ....

الوضع خطير وأصبحت هناك لعبة عض الأصابع ... والشاطر اللي يقول أي الأول

اللي اعرفه انهم شوية عيال مالهمش حاجه يعملوها في الدنيا الا التنطيط ورا الاندية و اغلبهم غير متعلمين

بالعكس يا ريمو ... ده اغلبهم مثقفين ومتعلمين بل ولديهم حس فني وتعبيري عالي جداً ..

لكنهم للأسف فقدوا الهدف .. وفقدوا قدوة تجمعهم .. وبالتالي وجدوا هدفهم في التشجيع الرياضي الأعمى ..

[أبو محمد]

وأخيراً .. أنتصر الشر

إتحاد الكورة العرة يتراجع ويلغي غرامات إشعال الشماريخ ... ويقرر فقط الغرامة على |لقاء الشمارخ على أرض الملعب أو حدوث دخان كثيف يُعيق الرؤية .

لأ راجل يالا أنت وهو ....

الوضع خطير وأصبحت هناك لعبة عض الأصابع ... والشاطر اللي يقول أي الأول

اللي اعرفه انهم شوية عيال مالهمش حاجه يعملوها في الدنيا الا التنطيط ورا الاندية و اغلبهم غير متعلمين

بالعكس يا ريمو ... ده اغلبهم مثقفين ومتعلمين بل ولديهم حس فني وتعبيري عالي جداً ..

لكنهم للأسف فقدوا الهدف .. وفقدوا قدوة تجمعهم .. وبالتالي وجدوا هدفهم في التشجيع الرياضي الأعمى ..

مش رياضى بس يا ماستر .. أى "حشد" فيه شغب

إقرا البيان كويس ..

وحياة غلاوتك عندى .. نازلين يوم 18 نوفمبر الميدان

[ابو محمود]

بصوا المنظر

وشوف الظابط الحيوان ضرب واحد من العيال دى على راسه ازاى لما مسكوهم

http://www.youtube.com/watch?v=7SWJmvkV0Xg

انت عارف لو امتلك علامات حمراء كنت رزعتك واحدة عارف الضابط اللي حضرتك بتشتمة دة انا شفت عيال ولاد كلب مشردين يوم ماتش الاهلى وانبى بيحدفو ضابط زية بالطوب وبعلب البيبسي كولا المعدنية يبقى لما واحد يتمسك من العيال دى يطلع عين امة ويضرب علشان ما يعملش كدة وممكن ترجع الى باب

http://www.egyptiantalks.org/invb/index.php?showtopic=128804

وشوف بقى دة اللي اقدرت اذكرة فية بلاوى مينفعش اقولها الشرطة غلبانة امام جحافل الجهل والتخلف

[se_ Elsyed]

جالكم كلامي ؟

من يومين كان من المقرر إقامة مباراة للأهلي امام الأسماعيلي بأستاد القاهرة بدون جمهور تنفيذاً لعقوبة على جماهير الاهلي بلعب مباراة بدون جمهور وذلك لتعمدهم إشعال المشاريخ أثناء المباريات

ومع ذلك ... صرح الألتراس الاهلاوي إنه سوف يقتحم الملعب ويحضر المباراة متحدياً الجميع ...

فما كان من وزارة الداخلية إلا أن أجلت المباراة ليوم 26 ديسمبر لكي تجد حلاً لهذه المشكلة .. ومازال التهديد قائماً ولا أحد يعرف ماذا سيتم

الموضوع يخلص ؟

لأ طبعاً

أعلنت جماهير ألتراس الزمالك "وايت نايتس" عن حضورها بشكل رسمى مباراة فريقها امام المصرى البورسعيدى فى الأسبوع الثامن للدورى الممتاز والمقرر لها يوم الأحد القادم.

قالت الألتراس عبر صفتحها على موقع التواصل الاجتماعي "فيس بوك": تأكدوا أن الزمالك لن يلعب بدون جماهيره إلا في حالة واحدة وهي أن يتوفانا المولى عز وجل".

الجدير بالذكر أن عددا من الجماهير قد هدد باقتحام الاستاد عقب قرار لجنة المسابقات بإقامة المباراة بدون جمهور.

اقرأ المقال الأصلي علي بوابة الوفد الاليكترونية الوفد - الوايت نايتس: " لما نموت الزمالك يلعب بدون جمهور"

وبكده نبقى دخلنا في مرحلة خطرة من الفوضى الهايفة اللي لازم الامن يتعامل معها بمنتهى الحزم مهما كانت العواقب

لا أحد فوق القانون

ولا يجب ان يتم خرق القانون من أي جهة سواء مواطن أو شرطة