الكلام إلك يا جاره

[فــيــروز]

فى الصفحه الثالثه من جريدة اخبار اليوم "يمكن اعتبارها الاولى لو حذفنا صفحة المانشيتات المثيره و العناوين الجذابه .. نشرت الجريده خبرا يبدو طريفا للوهلة الاولى

يقول الخبر :

"المواطنون فى ايطاليا يقاطعون اللحوم لارتفاع اسعارها

اعلن المواطنون الايطاليون مقاطعة اللحوم بكل انواعها بعد الزياده الجنونيه فى اسعارها التى وصلت امس الى ما يوازى 270 جنيه مصرى -ولاحظوا وضع السعر بالمعادل المصرى- للكيلو وبالرغم من المحاولات التى قامت بها محلات بيع اللحوم و السوبر ماركت لاغراء ست البيت الايطاليه بالعوده الى اكل اللحوم عن طريق تقديم هدايا رمزيه و صغيره لكل سيده تشترى

كيلو لحم الا ان جميع هذه المحاولات باءت بالفشل. كما ارتفعت اسعار الاسماك ايضا وادرجت فى قائمة المواد الغذائيه التى قاطعتها "ست البيت" الايطاليه التى تكتفى الآن بطبق غنى من

الفواكه بعد كل وجبه. اكد الايطاليون ان هذه المقاطعه للحوم و الاسماك بانواعها سوف تؤدى حتما الى عودة اسعارها الى ما كانت عليه منذ بضعة اشهر دون ان يعرف احدا سببا لهذه الزياده الجنونيه"

الى هنا انتهى الخبر .. و اليكم التعليق بعد الفاصل

تم تعديل 30 أكتوبر 2004 بواسطة فــيــروز

[فــيــروز]

لا انكر انى حين قرات هذا الخبر قفزت الى ذهنى فكرة كم هى قويه ارادة هؤلاء الايطاليين الذين لم يسل لعابهم على اللحوم وقرروا بكل بساطه مقاطعتها !! B) على عكس المصريين الذين

اشتروا اللحوم من السوق السوداء ايام السادات لعدم قدرتهم على الامتناع عن اكلها لمدة شهر واحد .. وبدلا من ان تنخفض اسعار اللحوم كما كان الهدف ارتفعت اسعارها بسبب بيعها فى

السوق السوداء .. بينما تمتد الطوابير و تطول فى مصر لشراء اللحمه السودانيه !! mf)

لكن الحقيقه المقارنه التى قراتها بين السطور على طريقة "الكلام إلك يا جاره" شعرت انها مقارنه ظالمه جدا جدا و مجحفه للغايه !! mf( فما معنى ان يسوق لنا الخبر سعر كيلو اللحم بالمعادل المصرى كأنه يدفع القارئ دفعا لعقد مقارنه بين السعر عندنا و السعر عندهم يخرج منها ب "يا سلام والله عمار يا مصر وبردو احنا احسن من غيرنا" !! :rolleyes: بينما لم يقل لنا الخبر متوسط دخل الفرد فى ايطاليا وما اذا كان هذا السعر مقارنة بمتوسط الدخل جنونيا بالفعل ام انه مجرد زياده فى اسعار اللحوم لا تقارن بما يوجد لدينا؟ :D

[فــيــروز]

الامر الآخر ان الخبر يتحدث عن "ست البيت" و يضعها بين قوسين كما نقلته وكأن زيادة الاسعار و جشع التجار لا يسأل -بضم الياء- عن محاربته الآن سوى ست البيت !! :D

الآن اصبح المواطن هو المسئول عن محاربة التجار فى مناخ و بيئه لا تسمح للجمعيات الاهليه ومنها جمعيات حماية المستهلك بالتصرف او حرية الحركه او نشر التقارير حول المنتجات المختلفه ومدى جودتها وملاءمتها لصحة المواطن !! :rolleyes: الآن اصبحت ست البيت هى المنوط بها قيادة حملة المقاطعه فى بلد لا تسمح لطلبة الجامعه بممارسة اى نشاط سياسى وتتفنن فى اختراع الاساليب التى تلهى الطلبه و آباءهم عن التفكير فى حقوقهم mf) وما ينبغى لهم كمواطنين صالحين فى دوله محترمه !!

[فــيــروز]

واخيرا .. ست البيت الايطاليه لديها بديل متمثل فى طبق فاكهه !! :rolleyes: فهل يا ترى توفر البديل لست البيت المصريه التى لا نعرف ستقاطع ايه ولا ايه فى ظل غلاء طاحن نزل بكل السلع بدءا من كوز البطاطا وانتهاء بتكاليف العلاج و الدواء !! :D و إلى متى سيظل اعلامنا يتعامل معنا بهذه الطريقه القميئه " الكلام إلك يا جاره" فيذيع حوادث القطارات فى العالم بعد احتراق قطار الصعيد وحوادث سقوط الطائرات بعد سقوط طائرتنا فى مياه المحيط من سنوات دون ان نسمع خبرا عن نتائج التحقيقات فى سقوطها و غيرها من الامثله البلهاء !! mf)

[محمود تركى]

مقارنة ست البيت المصرية بقرينتها الإيطالية فيه بعض الإجحاف.

و مقارنة متوسط الدخل للأسرة المصرية, بنظيره الإيطالى فيه أيضا إجحاف.

و مقارنة متوسط ثقافة ست البيت الإيطالية بنظيرتها المصرية فيه أيضا أجحاف.

إن الأوضاع السياسية فى منطقتنا أجبرت المواطن على التفكير ببطنه, بينما المناخ فى الدول الإخرى يشجع على إستعمال العقل فى التفكير, و التدبير.

خلص الكلام

[kfaya]

أهنيكى يا فيروز على قوة ملاحظتك و على صحة أستنتاجك ...

طبعا توقيت نشر الخبر ده له كااااااااااااااااامل العلاقه بالأرتفاع الجنونى لأسعار اللحوم فى مصر , و أيضا لتخفيف حدة التهكم على الحكومة فى موضوع اللحوم السودانية و الذى أثبت فشل وزارات متعددة فى الوفاء بوعود قطعتها ..

معروف عن جريدة الأخبار أو بالأصح رئيس تحرير الأخبار أنه المدافع عن خطايا الحكومة و المبرر( ضمه فوق الميم ) الأول لكل أخطائها ....

منتهى الأستهانة بعقول الناس ....

هل يفترض أن أكون غبى لأكون مواطن صالح و الحكومة تحبنى ؟؟؟؟؟

:rolleyes:

[kfaya]

و بعدين أشك ان سعر اللحمة فى ايطاليا 270 جنية للكيلو ..... يعنى قرب ال 40 يورو !!!!

ياريت سكوربى يفيدنا فى الحته دى ....

و بعدين الأخبار ليه ما قالش أن فيه فرق فى مستوى المعيشه يتعدى العشرة أضعاف ..

يعنى يقف كيلو اللحمة الطليانى ب 27 جنية ..

معلش يا حكومة .... أنا غلطان .... أخر مرة ..... توبه ان كنت أفكر تانى ولا أحاول أشغل مخى و لا أستنتج ....

اللحمة عندنا لسه محصلتسش 40 جنية ......

ربنا يستر و الطليان ما يكونوش بيقروا الكلام ده يقوموا يهجموا علينا و يشتروا كل اللحمة اللى عند الجزارين ... :rolleyes:

[Scorpion]

ُُثلاث نقاط :

- أقل مرتب رسمي في ايطاليا (يعني اول السلم الوظيفي ) يبدأ من 1200 يورو شهريآ في الجنوب ليصل الي 1800 في الشمال ...( لاحظوا اني كتبت اقل )...

- متوسط سعر كيلو اللحم 8 يورو في الجنوب ليصل الي حوالي 11 يورو في الشمال...

- لم اسمع بموضوع مقاطعة شراء اللحم هذا ... و لكن المقاطعة التي تمت مرتين في الفترة الأخيرة ( خلال هذا العام ) و لم تخص فقط "ست البيت " بل الجميع كانت مقاطعة الشراء بالكامل و لمدة يوم واحد كامل.. أي شراء ..و بالذات من السوبر ماركت و ذلك احتجاجآ علي موجة ارتفاع الأسعار ... و كانت من نتيجتها ان تم التخفيض بالفعل في اسعار سلع قليلة .. او الأختيار الذكي الذي لجأت اليه بعض من سلاسل السوبر ماركت من عمل تخفيض مئوي يتراوح بين 5 الي 8% من قيمة جميع السلع في يوم معين في الأسبوع كالأربعاء مثلآ ( حينما تنخفض حركة الشراء) مما أدي الي زيادة حركة البيع و معها الربح .. و في نفس الوقت استفاد المواطن العادي ...

[kfaya]

عفارم عليك يا سكوبى ..... كنت عارف انك معانا على الخط .. نورت المحكمة ...

نحسبها و نشوف كام ضعف ؟؟؟؟؟؟؟

منك لله يا ابراهيم يا بن سعدة ..

كل كلامكم كذب و نفاق و ترقيع وراء الوزراء الخايبين و دفاع بالباطل عن قرارات خاطئة ...

حاضر هاسمع كلام الحكومة و أدعى لها ليل و نهار أن سعر اللحمة عندنا عشر تمنها فى ايطاليا ....

[se_ Elsyed]

يـــــــــــاه كيلو اللحمه بـ 270 ج ...

ده على كده أنا ممكن اعمل شغل نار مع سكوربيون ..

اولاً هاروح شركات الطيران وأخد مواعيد الرحلات اللي بتطلع لمدن إيطاليا ...

ثانياً : انزل المدبح احمل عربية نقل مليانه لحمة .. إيشي ضاني على بتلو على كندوز وخلافة ...

ثالثاً : أروح أقف بالعربية في المطار قدام صالة الركاب .. وده بعد ما اكون قسمت اللحمة في ورق جرانين كيلوهات كيلوهات .. واجيب معايا اخواتي وإصحابي في المنطقة ... ونمسك في ديل جلابية كل واحد مسافر إيطاليا ونعيط له ونقوله والنبي يا عم تاخد كيلو اللحمة ده معاك لأخونا سكوربيون الهفتان في روما ولك الأجر والثواب ... وبعون الله في سفرية واحده نكون سربنا العربية كلها ..

رابعاً : هناك بقى سكوربيون يعمل اللازم .. يستنى الناس في المطار ويلم البضاعة منهم .. ويحملها في شنطة عربيتة ( النقل برضوا ) وينزل في ميدان بيكاديللي ويالا يا سنيور يالا يا سنيوريتا .. البلدي يوكل .. كيلو اللحمة بـ 100ج ولا إستغلال المحلات .. المعلم محبوس وعايز فلوس ... بر نفسك يا هفتان ... وكده يعني ..

[فــيــروز]

متفرج:

إن الأوضاع السياسية فى منطقتنا أجبرت المواطن على التفكير ببطنه, بينما المناخ فى الدول الإخرى يشجع على إستعمال العقل فى التفكير, و التدبير.

كفايه:

هل يفترض أن أكون غبى لأكون مواطن صالح و الحكومة تحبنى ؟؟؟؟؟

كفايه تانى:

معلش يا حكومة .... أنا غلطان .... أخر مرة ..... توبه ان كنت أفكر تانى ولا أحاول أشغل مخى و لا أستنتج

هذه الجمل يربطها امر واحد .. هو القناعه الموجوده لدينا بانه غير مطلوب منا ان نفكر !! واذا فكرنا ففى بطوننا فقط وفى ماذا سناكل غدا !! تخيلوا مره كنا فى المصيف من سنوات .. وحدثت ظروف اضطرت جميع الموجودين من كبار السن للنزول الى القاهره و ترك الابناء لمدة يوم واحد للمبيت بمفردهم .. ووقتها كنت اكبر الموجودين و بالطبع انا اللى مفروض آخد بالى منهم .. لا انكر انى كنت اشعر بالقلق بسبب تلك المسئوليه وخصوصا ان عدد ابناء خالاتى الموجودين كان كبير ما شاء الله

المهم بعد ان مرت الليله العصيبه بسلام بعد طول قلق و صحينا الصبح وانا اشعر بالانتعاش لقرب انتهاء المهمه :D .. جلسنا نتناول الافطار ويادوبك لسه مخلصينه وبنشرب الشاى .. الاقى اللى بيسالنى : احنا هنتغدى ايه النهارده !! ;) فما كان منى الا ان قلت :

مش عاوزه حد يقول لى هناكل ايه mf(

الغريب انى اعرف انهم ليسوا من النوع اللى همه على بطنه بس فعلا اللى اذهلنى ان هذا هو ما فكرنا فيه ونحن لم ننه الافطار بعد !! mf)

بالامس كان فيه حلقه من برنامج "رحله مع الشيخ حمزه يوسف" الذى يذاع على قناة mbc وكانت الحلقه عن مظاهرات حدثت فى امريكا فى نهاية اغسطس الماضى تندد بالحرب على العراق

احد المتحدثين قال جمله اكدت على مفارقة اننا لا نفكر سوى فى اشياء محدوده للغايه !! اذا فكرنا اساسا !! واننا لم يعد لدينا اى احساس بالمسئوليه تجاه ما يحدث حولنا "امر ربما يكون له اسبابه المعروفه و المفهومه"

اذ قال المتحدث: اليوم ونحن نتظاهر هنا لنعترض على ما يحدث فى العراق و فلسطين .. سيكون لدينا اجابه لابنائنا و احفادنا حين يسالونا فى المستقبل عن تلك الاحداث وعن موقفنا حيالها !!

ترى من منا يفكر فى الرد الذى سيقوله لابنائه وحتى احفاده عن موقفه تجاه القضايا المختلفه التى تمر بنا ونمر بها مر الكرام؟

شكرا جزيلا للاخ سكوب على الافاده بخصوص اسعار اللحوم .. ربما خبر "اخبار اليوم" كان يقصد به المقاطعه التى ذكرتها لانى لاحظت ان اخبارهم كثيرا ما تكون بايته بل و حمضانه !! B) يعنى نكون قراناها على النت من اسابيع مثلا وتجدهم يضعونها كانهم جابوا الديب من ديله !! :rolleyes:

س.س. مبروك عليك البيزنس مع سكوب .. ياللا يقى عشان تلموا شمل العصابه من جديد ax:

تم تعديل 31 أكتوبر 2004 بواسطة فــيــروز

[Salwa]

هم من وقت للتانى يكتبوا اخبار هى عبارة عن ..

حبوب تهدئة للمواطن......الغلبان.

هو الصراحة مفيش مقارنة ......واللى كتب الخبر ده بيفتكر ان هو بس اللى عايش فى العالم ..

يعنى ايه 270 جنيه ؟؟

ايطاليا معروف انها اغلى فى مستوى المعيشة من اسبانيا .....

ما عدا برشلونة تعتبر ثالث اغلى مدن اوروبا ..

يعنى باريس وميلان ثم برشلونة .....

كيلو اللحم يتراوح من 7 يورو الى 18 ....حسب نوع القطعية .

ولو كان مثلا ناحية بها عظام فالسعر فى حدود 5.5 يورو .

اقل مرتب فى حدود 700 يورو ......وتصل ل 6000 وازيد حسب المنطقة والوضع طبعا ......

ثم شئ آخر ........

فى اوروبا توجد بدائل كثيرة لل لحوم.....

مثلا الفرخة الكاملة بسعر 2.5 يورو .......

دستة البيض تصل ل .75 سنت .....او واحد يورو .

بعكس الخضار تصل الفاصوليا الخضراء الى سعر 6 يورو ...مثلا.

اذن المقارنة ظالمة ..

مهما قل مرتب الاوروبى بيعيش كويس وبيلبس كويس ويتفسح كويس ويحوش كمان .....ثم.....يقوم بالظاهرات ويحتج.....

انما عندنا ؟؟؟؟؟

حتى المرتب لا يكفى طعام اقل من معتدل ....

هو مفروض نحتج على الأخبار دى ؟؟ بس ازاى ؟؟

ازاى ؟؟؟ فى بلد فضائياتها عاطية توكيل لبلد عربى آخر ...وطول شهر رمضان كل ثلاث دقائق .......تطلع واحدة تتدلع بطريقة سمجة ..وواحد يقول لها ..( تدلل ).........ثم........

تخرج اخرى ويبدأ اعلان آخر يقول .......مذهلة .....مذهلة .

دى اعلانات عن برفانات سعودى .......

يبقى عاوزين صحفنا تقول ايه ؟؟؟؟؟؟؟؟؟؟؟؟؟

هو احنا بنحكم على حاجة ؟؟؟؟؟؟

اللى يقبل ان الفضائية المصرية تستغل بهذا الشكل السمج الخالى من اى مبدأ عاقل .....يبقى اكيد واخد مبالغ ( من تحت الترابيزة )

بالظبط زى اللى بيقول خبر اللحوم فى ايطاليا .....

يا اعلام بجميع انواعه .........

ان لم تستح فاصنع ما شئت ..

[ragab2]

هذا الخبر

مقصود لتخدير الشعب

وامتصاص الغضب

وصدقتى حين قلتى فى العنوان .. الكلام إلك ياجارة

ويوم أن كانت المعتقلات مملوءة بالمعتقلين فى الستينات

كان اعلامنا يندد بمعتقلات جنوب افريقيا والحكم العنصرى فيها

على وزن

من شاف بلوٍة غيره .. هانت عليه بلِوته

[kfaya]

اقتباس : مدام سلوى كتبت

اللى يقبل ان الفضائية المصرية تستغل بهذا الشكل السمج الخالى من اى مبدأ عاقل .....يبقى اكيد واخد مبالغ ( من تحت الترابيزة )

بالظبط زى اللى بيقول خبر اللحوم فى ايطاليا .....

يا اعلام بجميع انواعه .........

ان لم تستح فاصنع ما شئت ..

ايوة كدا تمام ...... أخد أتنين كيلو لحمة سودانى ys):

اقباس : د. رجب كتب

على وزن

من شاف بلوٍة غيره .. هانت عليه بلِوته

اول لما تقع لنا طيارة .... تلاقى تانى يوم فى أول صفحة , سقوط طائرة رش مبيدات فى زامبيا و مصرع جميع ركابها و طاقم القيادة و طاقم المضيفين و جميع المضيفات :huh:

و المضحك أن رجال الحكومة من الأعلاميين أصبحوا غير مدركين لما هو مسئولية الحكومة و "هنا يجب الأستماته فى الدفاع عنها "... و بين ما هو قضاء و قدر ... فهم فى حالة دفاااااااع مستمرة :D

بصراحة بقى اللى معرفوش يجيبوا له شبيه و لا مثيل ولم يجدوا أى جارة فى أى حته فى الدنيا لكى يتشبهوا بها .... هى وفاة ثلاثة من شباب مصر أختناقا داخل سيارة الترحيلات بعد أن قبض عليهم فى ليبيا أثناء محاولتهم التسلل الى ايطاليا جريا وراء لقمة عيش غير متوفرة فى أم الدنيا :lol: .

[Cleo]

هذا الخبر

مقصود لتخدير الشعب

وامتصاص الغضب

المهم مايكونش تمهيد لكى يصل سعر كيلو اللحم فى مصر إلى 50 جنيه بس وأهو احمدوا ربنا وشوفوا الغلبانين بتوع أوروبا اللىيا حراااام الكيلو عندهم ب 270 جنيه...

[mnman]

قلنا قبل كدة ومحدش سمع الكلام!!!

علي المواطن مصري بن مصري ان يمتنع عن اكل اللحوم والخضروات والفواكة !! ويصبح لا حيواني ولا نباتي!!! يبقي مائي!!!!

والظاهر ان دة شعار الحكومة في المرحلة الجاية " الي مواطن مصري مائي"!!!

وبكدة الحكومة حتتخلص من هموم كتير زي هم توفير فلوس الدعم وهم توفير القمح و هم ياجمل و هم بورجر rs: rs: !!!

فيروز متأكدة انة كان سعر 1 كيلوجرام !!! يعني كيلوجرام من الي نعرفهم دول!!

" للميعرفش 1 كيلوجرام = 1000 جرام"

اصل احتمال تكون موازين الحكومة بايزة و بتوزن برة rs: :P !!

[lالمطحون]

لامائى ازاى وحكومتنا هتغلى الماء اعتقد انه يبقى هوائى ولوطول هنحبس نفسه ويبقى مماتى وكله لخير الحكومه والكبير

[إبن مصر]

ومن قال ان موضوع مقاطعه منتج ما واللحوم بالتحديد جديد على مصر!!!

فما زلت اذكر حين قررت جمعيه نسائيه بالمعادى مقاطعه اللحوم وكان ذلك فى اواخرالسبعينات وتم تحديد مده المقاطعه باستجابه الجزاريين وتخفيض ال 1.5 جنيه التى زادت فى ليله واستمرت المقاطعه الفعليه مش المنظره 25 يوم واستجاب الجزارين فى المعادى فى النهايه..

ولكن فى المقابل دعونا ننظر الى ما قام به الشعب حين قام السادات بمنع ذبح الاناث ومنع بيع اللحوم لفتره تأديبا لنفس الفئه من التجار...

اصبح من دواعى التفاخر بين الناس ان تذكر انك تغدى اليوم لحمه رغم انها ممنوعه!!!!!!

اصبح من علامات السطوه والتمكن ان تأتى باللحم بغض النظر عن السعر الذى هو سبب المشكله ..... كى تثبت انك شخص واصل..

مثال اخر على ياميش رمضان فى فتره منعه... ايضا اصبح من دواعى التفاخر ان تتشدق بحصولك على الممنوع بضعف الثمن.

اذا وان كان اسلوب المنع المؤقت هو اسلوب وصايه من الحكومه ولكن الاداء العام للاشخاص دائما هو السبب فى نجح او فشل اى حمله.

هذا راى الشخصى

ابن مصر

[kfaya]

اسلوب المقاطعة الشعبية ده سلاح فتاك وبيجيب نتائج مزهلة ...

بخلاف المثال اللى ذكره ابن مصر عن مقاطعة اللحوم و الذى أعتقد كان فى السبعينات ....

هناك مثال قريب جدا ..... من كام شهر أتفقت شركتى المحمول على زيادة سعر الدقيقة أو تخفيض زمن شحن الكارت مش متذكر بالضبط ... اللى لفت نظرى كذا أعلان فى الأهرام بيهدد شركتى المحمول فى حال تنفيذ قرارهما سيتم مقاطعة تدريجية لأستعمال المحمول .....

تصاعد الموضوع , و تصاعدت معه لغة التهديد من جمعية حماية المستهلك " نفسى أفتكر أسمها " ... فى اليوم المحدد لزيادة الأشتراك .... تراجعت الشركتين و نزلوا أعلان على صفحتين بانهم أستشعارا منهما بمعاناة المواطنين و رغبتهما فى التخفيف عن مش عارف مين .... و هوب راحوا راجعين فى كلامهم ....

هو ده الكلام المظبوط و اللى لازم يتعمل .... بس مش عارف ليه تم تعتيم على الموضوع بعد كدا على طول ....

هل الحكومة تخشى من قيام جمعيات أو مؤسسات قوية فى هذا البلد و تكون خارج سيطرتها ؟؟؟؟؟!!!!

الناس فاقدة الثقة فى الحكومة ..... و الأمل فى تفعيل المنظمات الأهلية الغير حكومية ...

دى ممكن تعمل رعب لكل التجار الغشاشين اللى بيمصوا دم الشعب الغلبان و المصانع التى بتستحمر المواطن و تبيعة سلع فاسدة بأسعار أغلا من العالمية ....

نفسى أعيش لغاية ما أشوف الغلبان فى البلد دى فى حد بيقف جنبه و بيدافع عن حقوقة .

[bentmasria]

"""""نفسى أعيش لغاية ما أشوف الغلبان فى البلد دى فى حد بيقف جنبه و بيدافع عن حقوقة """""

ما اجمل الاحلام الوردية

ربنا يديك طولة العمر وتشوف الجيل السابع عشر من عائلة كفااااااااااااايه

http://6arab.com/singers/masri/7ajjar/index.htm

اسمع يا طالع الشجرة

تم تعديل 2 نوفمبر 2004 بواسطة bentmasria