ازاى اختار زوجه وانا فى الغربة

[المصمم]

السلام عليكم

وجود الواحد فى الغربه خاصة فى مجتمع مغلق زى السعودية

ورجوعه لمصر فترات بسيطه بيصعب اختيار زوجه كان ممكن لو فى مصر يتعرف عليها فى اى مناسبه او عن طريق العمل مثلا

حد عنده حل للموضوع ده او تجربة او طريقه للبحث عن زوجه بالغربه

تحياتى

[لماضة مصرية جدا]

السلام عليكم و رحمة الله و بركاته

استاذنا اهلا بحضرتك معانا في المنتدي

واضح من مشاركة حضرتك انك لسه جديد معانا هنا هوت

بس ده مش راح يمنعني مثلا اني اخش في حضرتك مباشرة كدهوت و اسالك

هو حضرتك عايز تتجوز ليه؟؟؟

لو جاوبت السؤال ده صدقني هتلاقي مفتاح الخريطة

لو حضرتك "اخترت" انك تتجوز....و انا بقول هنا اخترت لان اوقات بيبقي فهي ناس بتختار انها متتجوزشي سواء ولاد او بنات و بيعيشوا حياتهم مبسوطين ككائنات سينجلاوية او ظروف حياتهم بتضطرهم لكده و برضه بيختارو ده و بيكونوا مبسوطين

لو حضرتك اخترت انك تتجوز...علشان الناس كلها يا بنتي بتتجوز و دي سنة الحياة و الكلام دوت...(انا مش بتريق ع فكرة) بس بنفس القياس يبقي حضرتك هتعمل زي بقي ما بيقول بقية كتاب "سنة الحياة" يعني مثلا لو بصيت علي صفحة 127 من كتاب "انا عريس جاهز....و العروسة انا عايز" هيقولك التالي:

1- حضرتك تختار"دينامو العملية" و غالبا ده عنصر نسائي يتميز بكونه كائن اجتماعي متعدد العلاقات و في نفس الوقت عندها من سرعة البديهة و اللباقاة اللي تقدر انها تفهم دماغ حضرتك الاول علشان تقدر ترتب اقرب الاختيارات مشابهة ليك و كمان بينفع لو الموضوع تأزم و لا حاجة بيتلقي عن حضرتك الصفعات و كدهوت

2- حضرتك تتعاقد مع اول محل حلواني علي تقع عليه عينك لما تنزل مصر المحروسة و تستعد لزيارات مكوكية بين البيوت المختلفة علشان تحاول انك تشوف العروسة المنتقاة

لغاية دلوقتي علي فكرة انا مش بتريق...ده بيحصل فعلننننن....و اعز اصدقائي اللي كنت فاكرة انه بقي دماغ و حركات خطب الاجازة اللي فاتت بالطريقة دي...مقدرشي اقيم التجربة كاملة...بس اللي اقدر اقوله لحضرتك هو كان سال نفسه السؤال المصيري انا عايز اتجوز ليه...و كانت الاجابة اصلي تعبت من الطبيخ و الغيسل...(لانه في غربة و كدهوت)

3- حضرتك في الزيارات ديت تحاول انك تقعد مع العروسة لوحدكم علي اد ما تقدر علشان تحاول تكون لقطة عامة عنها

طب نيجي بقي لو حضرتك قولت انا عايز اتجوز علشان الاقي النص التاني

انا عايز اتجوز علشان احس انها لا هتيجي قبلها و لا بعدها

انا عايز اتجوز علشان انا محتاج "اكتمل" في علاقة انسانية

حضرتك لو من الفصيل المنقرض اللي لسه بيفكر بالطريقة ديت

يبقي برضه الحل انك تعرف نفسك انت الاول

تعرف بتحب ايه

بتكره ايه

بتشجع مين

هتنتخب مين

و تبتدي تعيش حياتك من هاذ المنطلق و صدقني هتلاقي "وليفك" في طريقك و انت بتعمل حاجة بتحبها حاجة ليك انت و مكنشي في بالك اصلا انك بتدور علي حد تاني

وجود حضرتك طبعا في السعودية مافيهوش مساحة كبيرة للتقارب الانساني

لكن خليني اقول لحضرتك تجربة عابرة و برضه مقدرشي اعممها

الجالية المصرية في البلاد المختلفة بتعمل تجمعات ليها في مناسابت مختلفة انا شفت ده ف الامارات و قطر و سمعت عنه ف الكويت و بريطانياومن خلاله كانت بتحصل كتير من الانشطة الاسرية اللي ممكن يحصل فيها تقارب نوع ماو هناك بيتم التعارف

فقط بداية التقاط اول الخيط و بعدين بقي حضرتك عليك اكماله

طب ليه متقولشي ده في محيط عملك مثلا....يعني لو عندك صديق تثق فيه و يكون متزوج ليه متطلبشي من صديقك لو زوجته تعرف بنت كويسة و ع فكرة توجد كثير من العائلات المصرية في السعودية يعني مش لازم تتجوزها و تشحنها من مصر...قصدي يعني مش لازم تيجي من مصر و كدهوت

و بعد كل الرغي دوت

حضرتك لسه عايز تتجوز:)

ربنا يسعدك يا رب و دايما دايما ادعي من قلبك اوي

و يا رب تفرحنا قريب

و يكون ليك من اسمك نصيب

مش حضرتك المصمم...يعني ب "تصمم" فكرة...و تفضل مصمم عليها

يبقي اوقن بالفرح...صمم ليه صورة في ذهنك و افضل متبت فيهاو باذن الله ربنا هيقر عينك بزوجة تكون جنتك في الدنيا و طريقك لجنة الاخرة

صباحك يقين ان كل عطاؤه خير

ع الهامش

انا كل اللي قولته فوق دوت مجرد اقتراحات من مشاهداتي الحياتية ممكن اخطيء فيها و ممكن اصيب

فقط اردت انا اتشارك بنصيب في رحلة التعلم اللي كل واحد فينا بيخطي فيها في الحياة

الزواج هو تجربة خاصة جدا غير قابلة اصلا للتعميم

بس خلاص

[م تيمور المراغي]

من اروع مداخلاتك يا لماضه خساره انهم لغوا التقييم

احب ااكد على النقطه اللي قلتيها وهي ان الافضل المقبل على الزواج يختار احدى بنات الاسر الكريمه في نفس البلد وياريت نفس المدينه اللي هو حاسس انه حيغترب فيها كام سنه دي حتساعده جدا جدا على الاستقرار النفسي والاسري كمان

ربنا يوفقك و يبارك لك

[لماضة مصرية جدا]

من اروع مداخلاتك يا لماضه خساره انهم لغوا التقييم

احب ااكد على النقطه اللي قلتيها وهي ان الافضل المقبل على الزواج يختار احدى بنات الاسر الكريمه في نفس البلد وياريت نفس المدينه اللي هو حاسس انه حيغترب فيها كام سنه دي حتساعده جدا جدا على الاستقرار النفسي والاسري كمان

ربنا يوفقك و يبارك لك

السلام عليكم و رحمة الله و بركاته

الله يكرمك يا باشمهندس...دي اقل حاجة عندنا يعني و كدهوت...(وش حد قاعد مجصوع و هيفرقع:)

بالنسبة للنقطة اللي حضرتك عمقتها الحقيقة انا بستغرب اوي من فكرة الشباب اللي بيكون متغرب و بيصر انه يرجع الاجازة و يتجوز من مصر في حين انا بقيت احس ان اصلا كل ما امشي في بلد اتكعبل في الجالية المصرية أسر بحالها مش بس شاب لوحده

الحقيقة وجهة النظر دي بيدعمها فكرة ان البنت اللي هتبقي جاية من مصر هتعاني في البداية انها تفهم طبيعة البلد و تتكيف مع حكاية الغربة و هتاكل دماغك كل شوية عايزة ارجع لاهلي...(ع فكرة انا تقريبا مش نصيرة المراة و لا بطيخ بالبوقين دولم...بس اديني بنور حضرتك)

هتبقي بس مشكلة واحدة ان الجالية المصرية عادة بره مصر صعب اوي تكون بينها روابط حقيقية تخليك تقدر تقرب من اسرة و تختار منها

بس الحقيقة الجالية المصرية في الامارات نشهد لها السبق في الحكاية دي....هي الامارات يا جدعان طول عمرها زينة شباب الحتة و الخليج :P (الحق يتقال هي البلد الوحيدة اللي انا عشت فيها فمقدرشي افتي بقي في الحتت التانية)

و برضه دي وجهة نظر

و متعرفشي نصيبك ممكن يكون مستنيك فين...(ايكد لابدلك في الدرة :closedeyes: )

ربنا يوفق حضرتك و كل شاب نوي نية جادة انه ياخد هذا القرار الثورجي الشجاع

[أبو معتز]

بص اخى الغالى

موضوع انك تنزل مصر علشان تتجوز فى احتمالين دة فرضا انك لقيت بنت الحلال المناسبة

طبعا فية فترة خطوبة يعنى مش هتنزل تتعرف عليها وتتجوزها كدة على طول لازم يكون فية فترة خطوبة

الاحتمال الاول

بما انكوا متعرفوش بعض غير فى وقت قصير جدا وهوا وقت اجازتك التى لن تتعدى الشهرين

هيبقى علاقتكوا بعد كدة كلام على الانترنت يعنى مش هتقدر تعرفها كويس ولا هيا هتقدر تعرفك

واحتمال الانفصال وارد بدرجة كبيرة

الاحتمال الثانى

انة هيتم الزواج بدون معرفة للدرجة الكافية

ودة فى حد زاتة هيبقى عامل زى البطيخة ممكن تطلع حلوة ودة يبقى ربنا بيحبك

وممكن تبقى قرعة وساعتها هتبقى فى مشكلة

توكل على الله وشوفلك واحدة بنت حلال تكون مع اهلها فى الغربة عندك

هتبقى متعودة على الغربة وهتقدر تعرفها كويس

وهتبقى فاهمة ظروفك

لكن بتاعت مصر هتبقى انت فى الاول بالنسبة لها عريس لقطة جاى بقى من الخليج ومحمل فلوسك فى شوال زى مابيقولوا

ربنا معاك ويهديك الى الصواب

وهترجع تقول ولا يوم من ايام العزوبية

[ssamir]

السلام عليكم و رحمة الله و بركاته

طب نيجي بقي لو حضرتك قولت انا عايز اتجوز علشان الاقي النص التاني

انا عايز اتجوز علشان احس انها لا هتيجي قبلها و لا بعدها

انا عايز اتجوز علشان انا محتاج "اكتمل" في علاقة انسانية

حضرتك لو من الفصيل المنقرض اللي لسه بيفكر بالطريقة ديت

يبقي برضه الحل انك تعرف نفسك انت الاول

تعرف بتحب ايه

بتكره ايه

بتشجع مين

هتنتخب مين

و تبتدي تعيش حياتك من هاذ المنطلق و صدقني هتلاقي "وليفك" في طريقك و انت بتعمل حاجة بتحبها حاجة ليك انت و مكنشي في بالك اصلا انك بتدور علي حد تاني

.

.

.

.

.

.

.

ع الهامش

انا كل اللي قولته فوق دوت مجرد اقتراحات من مشاهداتي الحياتية ممكن اخطيء فيها و ممكن اصيب

فقط اردت انا اتشارك بنصيب في رحلة التعلم اللي كل واحد فينا بيخطي فيها في الحياة

الزواج هو تجربة خاصة جدا غير قابلة اصلا للتعميم

بس خلاص

أهو انا من النوع المنقرض دة اللي ميحبش الوجبات التيك اواي و يفضل يدرس الامور علي طبيعتها

بس النوع دة محتاج ناس صبورة قوي

لان مش لازم اللي يعجبك انتي تعجبة بالمثل

و ممكن تعجبوا بعض بس الظروف

و ممكن

وممكن

يعني احكي موقف حصلي قريب هو بعيد شويه عن الموضوع بس حبيت اقول

باخد كورس انجليزي و في بنت عجباني جدا و بنتكلم مع بعض كتير قبل الكورس ميبدأ او في الراحة او لما نكون مروحين و كل واحد رايح لعربيته

و قبل الكورس ميخلص حبيت اعرف رايها ايه و طلبت اتقدم ليها

اتقلي مش عايزة اخسرك انت الوحيد اللي اعرفة في الكورس بسأله دايما و بتكلم معاة و مش عايزة بكدة نخسر بعض

( وش واحد اداس علية بميت جزمة بس من الداخل بس من الخارج جبل ولا اتهزت شعرة )

اهي تجربه من تجارب الحياة الواحد بياخدها

اسف للخروج برة الموضوع بس الكلمتين عن النوع المنقرض - مهو انقرض من كتر زهقة و من الملل

بنسيب الباب مفتوح للنوع الجاهز الرسمي قوي من بدايته بس الله المستعان

[عادل أبو عمر]

السلام عليكم و رحمة الله و بركاته

انا كل اللي قولته فوق دوت مجرد اقتراحات من مشاهداتي الحياتية ممكن اخطيء فيها و ممكن اصيب

ربنا يجازيكي كل خير يا لماضة

تحليل الفكرة رائع

و الاقتراحات محترمة جدا

وأفضل ما فيها قابليتها للتنفيذ

تحياتي

تم تعديل 18 نوفمبر 2011 بواسطة عادل أبو عمر

[متعب]

شوف ياسيدى

لو عاوز تعيش بدون وجع قلب وبدون هات هات لغايه ما تجيبلك الهتهات

اضرب غطس على الصينيات .

دول بيعيشوا صح وعلى اى مستوى ورخاص جدا على فكرة يعنى بالف جنى مصرى تخلص واحده منهم

ولو دفعت باكو ونص هتاخد منهم اتنين وعليهم خلاط هديه حسب طبيعه الصينين

ويبقى كده ضمنت حياه هاديه بدون وجع قلب ولا محاكم اسرة ولا دياولوا

[عماد حمدي]

هدلي بدلوي في الموضوع دا ..

بما أني مُغترب أنا كمان .. و جربت أمشي في موضوع الخطوبة في الغربة ياعني إنسانه تكون مع أهلها هنا في الإمارات ..

و مريت بثلاث تجارب مختلفين و فشلوا فشل كبير .. من البداية

الأولي كانت فلسطينية و التانية كانت سورية و التالتة مصرية .. والتلاتة ترشيح من زوجة مديري في الشركة

و الأتنين الأولانيين إترفض الموضوع من الأساس علشان أني مسيري مهما تطول الأيام أرجع بلدي مصر و أستقر فيها ..

و أهلهم كانوا رافضين أنها تعيش في بلد غير بلدها ..

شوفت برده موضوع مصرية ..

و فشلت برده ، لية بقا أغلبهم ماديين جداً ..

و عايشين طول عمرهم مع أهلهم هنا في الغربة و أخدوا علي مستوي معيشي مُعين ..

و أنا لسة شاب في البداية الحمد لله رب العالمين الحال كويس و ميسور ..

لكن مش هقدر أحقق لها برده كل أمانيها و لا هقدر أعيشها في نفس المستوي اللي هيا عايشة فيه مع أهلها ..

لأنها إتعودت علي نمط حياه مُعين ، إتعودت أن كل اللي تطلبة أهلها ينفذوه .. متعبتش ياعني و لا عانت ،،

و برده حتى لو هيا موافقة أهلها مش هيوفقوا .. و كمان ممكن في أي وقت تحت أي ظروف أنزل مصر ..

و طبعاً مش هقولها خليكي بقا مع أهلك و أنا هنزل مصر !! لازم طبعاً تنزل معايا ..

هل أهلها هيوفقوا .. أهلها اللي مستقرين و عايشين طول عمرهم هنا يوافقوا ان بنتهم تبعد عنه في بلد تانية غير البلد اللي قضت طول حياتها فيها

و بعيد عن عينيهم ..

ياعني أفتكر سألوني و هتسكنها فين .. قولت إستديو صغير علي قدنا لحد ما ربنا يرزقنا بالذرية الصالحة و بعدها أشوف شقه مثلاً ..

يقولي بنتي تقعد في إستديو !! ياعم ما إيجاره في السنة أقل شيء أقل شيء 35 ألف درهم .. و معني كدة أني عملت إنجااااااااز

لحد ما وضعي يتظبط ياعمو ، لقيته أحرجني بصراحة .. و حكالي علي العيشة و المستوي اللي بنته عايشاه .. الخ

بصيت لنفسي كدة و قولت إنســـــــــــــــى و مشيت .. بس إستفدت خدت الجرأه أني ممكن أتكلم في موضوع جواز و الكلام دا ..

أما لو واحده مش عايشة مع أهلها و بتشتغل هنا ، هو كويس لأنها بتعاني نفس اللي أنته بتعانية من موضوع العزوبية دا

فتتلموا أنتوا الأتنين في بيت واحد و هيا شغالة و أنت شغال و هتبقي راضية لانها كانت عايشة نفس عيشتك بالظبط ..

بس بالنسبة ليا رافضة لأسباب شخصية ..

لذلك قررت لما أنزل مصر والدتي هيا اللي تختار واحدة من بلدي عارفه أصلها و فصلها و سألين عليها كتير ..

و ليا شروط محددة 1- .... 2- ..... 3- .... شروط عامة بقول لوالدتي يا حاجة علشان منضيعش وقت دي شروطي ..

و هيا تدور و تقولي لقيت فلانه بنت فلان و لقيت علانه بنت علان ..

و دوري أني أشوف هيا تتناسب فكرياً بقا معايا و لا لا ، الشروط اللي طلبتها موجوده فيها و لا لا

دماغها و تفكيرها و طموحتها .. و أسلوبها في الكلام ..

و هما كام سؤال هسأله ليها و إجابتها و طريقه الإجابة نفسها هتحسم الأمر مبدئياً بالنسبة ليا ..

و الموضوع يبقي واقف علي أني أصلي إستخارة و الموضوع خلص ..

طبعا التواصل بعد كدة هيكون علي النت .. في الفترة دي تركز تسألها في كذا حاجة تشوف رد فعلها هتتصرف إزاي

ياعني تكون أسئلة موضوعيه تستنتج منها البنت دي إية بالظبط ..

تشاركها في مشاكلك مثلاً في الغربة و تاخد رأيها و تشوف هتحل المشكلة دي إزاي ..

و بعد كدا كمّل حب و أغاني و كلام رومانسي ياعم براحتك ، بس خلي دايماً هدف المكالمة اللي قولتك عليه ..

و متستعجلش أوعى .. بالنسبالي الأجازة الجاية ان شاء الله الصيف دا هنزل أشوف .. لقيت لقيت ملقتيش أأجل ..

الجواز حياه تانية خالص الجواز وضع تاني خالص و مسؤليات الجواز مش مجرد واحدة تطبخلك و تغسلك و تكويلك .. بس .

الجواز ياعني إنسانة تشاركك حلمك ، إنسانة طموحة شايفة بكرة أحلي و أجمل ، الجواز ياعني جسدين و روح واحدة ..

الجواز مسؤلية .. الجواز ياعني تلاقي إنسانة تسمعك و تسمعها تحكيلك و تحكيلها ..

الجواز ياعني الصبر .. الجواز ياعني إنسانه تبص للي أقل منها و تقول الحمد لله و تعرف إنها عايشة في نعمة ..

الجواز إنسانة تفضفض معاها و تقولها اللي مضايقك و هي كذلك ..

تبقوا إيد واحدة في كل حاجة ، في أي قرار .. تخططوا أنتوا الأتنين لبكرة ..

ترسموا حياتكم بإيديكم .. لولادكم إن شاء الله ، الجواز مش مجرد أتنين مع بعض أكل و شرب و نوم و بس

الجواز أكبر من كدة بكتيييير جداً .. إياك تستعجل أنا بحذرك أهو ..

اللي حكيته ليك دا علشان أوصلك نقطتين :-

1- موضوع الجواز من الغربة مش بحبة و دا نابع من 3 تجارب مختلفة و فشلوا ..

جنسية غير جنسيتي و ذكرت ليك السبب

و من جنسيتي و ذكرت برده ليك السبب

2- الإستعجال بلاش ..

يبقي الحل من بلدك عايشة نفس عيشتك و متربية في نفس البيئة اللي أنته أتربيت فيها ..

و ربنا إن شاء الله يرزقك بالزوجة الصالحة و متنساش تدعينا علشان نيجي نفرح فيك ;)

تم تعديل 18 نوفمبر 2011 بواسطة omda2006

[عادل أبو عمر]

هدلي بدلوي في الموضوع دا ..

يا عمدة يا حبيبي .. عروستك عند الأستاذ صبحي صالح

ربنا يسعدك و يكرمك بالزوجة الصالحة التي تسعدك في الدنيا و في الآخرة

تم تعديل 18 نوفمبر 2011 بواسطة عادل أبو عمر

[عماد حمدي]

هدلي بدلوي في الموضوع دا ..

يا عمدة يا حبيبي .. عروستك عند الأستاذ صبحي صالح

ربنا يسعدك و يكرمك بالزوجة الصالحة التي تسعدك في الدنيا و في الآخرة

يااااااااااااه ياريت و الله .. أنا أطول أ. صبحي صالح بذات نفسه يختارلي عروسة ..

أهو سياسياً ضمنت إننا نكون متفقين ;)

ربنا يباركلك يا عمو عادل يارب ، و جزاك الله خيراً

[justme]

السلام عليكم يا استاذ المصمم

بص بقا يا اخي انا وللأسف بقالي خمس او ست سنين في الموضوع ده لدرجة انا ممكن اني اكتب كتاب smk:

وجربت كل الطرق والوسائل اللي ممكن تخطر على بالك وطرح عليا اني اتجوز واحدة عربية ورفضت لنفس اسباب عمدة

ودورولي في المصريين هنا وكل مرة المشكلة الازلية انت مش من سكان القاهرة لازم يكون عندك شقة في القاهرة علشان هي تكون جنب اهلها طبعا انا بقول لأ

واحيانا الناس اللي بتسعى دي بعضهم بكون في دماغه يساعد علشان واحدة تهمه قريبته او من طرفه ولو مظبتش الموضوع ممكن تخسره وقصدي مظبتش انك ترفض البنت اما لو العكس حصل مفيش مشكلة

اما مصر فبعض الاحيان ينظر اليك في مصر على انك واللفظ ده لواحد صاحبي مش ليا (ثري عربي) ودول مش كل الناس

طبعا مش دائما ما تكون هذه المشكلة لكن في الغالب اذا حصلت بتبقى زي كده

بس نصيحة كن محدد جدا من الأول وضع كل ما في رأسك من مواصفاتك امام الشخص اللي هيدورلك علشان متضيعش وقتك

ولو هتدور في مصر خلي اللي يدورلك قبل ما تنزل يكلم الناس دي ويقولهم ظروفك لأن من تجربتي فيه ناس بترفض السفر بره مثلا

والنصيحة الاهم اللي من الجالية المصرية افضل من الموجودين بمصر لأن زي ما قالت لماضة النقلة مبتكونش سهلة في بعض الاحيان

بس اللي ممكن يبوظ الموضوع ده لو حضرتك والناس دي من اماكن بعيدة في مصر الناس ساعات بترفض وخصوصا لو هما من القاهرة وانت من الاقاليم او في فارق كبير في المستوى المادي

ايضا لا تطيل الخطبة كثيرا لأن ده بيكون من اسباب الفشل والمشاكل لأنك مش في مصر

على فكرة كل كلمة بحكيهالك من واقع تجربة شخصية طويلة

اهم حاجة انوي خير وادعي ربنا انه يوفقك

بدعيلك ربنا يوفقك

[لماضة مصرية جدا]

شوف ياسيدى

لو عاوز تعيش بدون وجع قلب وبدون هات هات لغايه ما تجيبلك الهتهات

اضرب غطس على الصينيات .

دول بيعيشوا صح وعلى اى مستوى ورخاص جدا على فكرة يعنى بالف جنى مصرى تخلص واحده منهم

ولو دفعت باكو ونص هتاخد منهم اتنين وعليهم خلاط هديه حسب طبيعه الصينين

ويبقى كده ضمنت حياه هاديه بدون وجع قلب ولا محاكم اسرة ولا دياولوا

السلام عليكم و رحمة الله و بركاته

مش عارفة ليه وقفت مبحلقة مبربشة قدام جملة حضرتك اللي عملتها بالنيون الاحمر

هو حضرتك بتتكلم عن بني آدم يبقي رخيص و بيعيش يعني و كدهوتو لا علي طقم صواني اركوبال من اللي بيتحط في الفرن و نعمل فيهم مسقعة و مكرونة بيشاميل و كدهوت

إذا كان ده "اختيارك" حقيقي و مقتنع بيه ففعلا مقردشي اناقشك بوتاتا

هي الدنيا ايه غير وجهات نظر فوق بعضيها

بس افتكر اني في مرة جمعتني قعدة مع بعض الرجال الانجليز و بعدين لقتهم بيتبنوا نفس اختيارك...بس مش بنفس التبرير بوتاتا

الرجل الغربي اصبح يفضل النموذج الشرق اسيوي جدا و تقدر تشوف كابلز كتير الراجل ملامح اوربية و السيدة ملامح اسيوية و علاقات زواج رسمي مش تيكلم تيكلم و السبب اللي عرفته ان السيدة الشرق اسيوية علي حد تعبيرهم قادرة انها تشعر الرجل انه رجل و انها ضعيفة جدا كأنثي وقالولي انه بيحبوا اوي انها مطيعة جدا جدا جدا....(سبحان الله دولم الرجالة طلعوا زي بعض و ماركة مسجلة حول العالم)

يبدو ان الرجل الغربي لا ينجذب للمرأة الغربية التي اصبحت تناطحه راس براس و من حقها في اي لحظة ترفع سماعة التليفون و تبلغ عنه الشرطة بتهمة التعدي عليها و القانون دايما في صفها

حبيت اقول لحضرتك وجهة نظر بس من ارض تانية خالص

و ارجع اقول....دي اختيارات

وبرضه وجهة نظر

بس بعد اذن حضرتك بلاش تقول ان فيه بني آدم رخيص بحس انها بتوجع اوي و بحس ان احنا بنشتري جارية و كل واحد فينا واقف بصرة دنانير

تحياتي

[لماضة مصرية جدا]

أيعني احكي موقف حصلي قريب هو بعيد شويه عن الموضوع بس حبيت اقول

باخد كورس انجليزي و في بنت عجباني جدا و بنتكلم مع بعض كتير قبل الكورس ميبدأ او في الراحة او لما نكون مروحين و كل واحد رايح لعربيته

و قبل الكورس ميخلص حبيت اعرف رايها ايه و طلبت اتقدم ليها

اتقلي مش عايزة اخسرك انت الوحيد اللي اعرفة في الكورس بسأله دايما و بتكلم معاة و مش عايزة بكدة نخسر بعض

( وش واحد اداس علية بميت جزمة بس من الداخل بس من الخارج جبل ولا اتهزت شعرة )

السلام عليكم و رحمة الله و بركاته

طب تعتبرني اختك و كدهوت و ينفع تديني المكرفون...(الحقيقة طول عمري انا اللي بحكي لاخواتي الاولاد و هما بقي ينصحوني فارجوك ارجوك اعطني هذا الدواء....قصدي ارجوك يعني اديني فرصتي اني افكر لغيري شوية)

امبارح كنا بنتفرج علي فيلم حلو كتير و بعدين جه مشهد بيقولك المفروض انك بتاخد التعارف ده مستويات

يعني في الاول بنتكلم في حاجات عمومية و بعدين حسينا فيه قبول و الباب مفتوح نطلع المستوي اللي بعديه و نتكلم علي حاجة عامة اه علشان يبقي فيه حوار بس كمان حتة شخصية...الباب لسه مفتوح يبقي نرفع المستوي و نخش في حاجات شخصية بس برضه بالمتغطي...كل ده لو الباب مفتوح

بحس كتير ان احنا لما بنلاقي حد نقرب منه بنرتبك و بعدين بدل ما ناخدها واحدة واحدة نيجي نخبط ع الباب اوي و ممكن نكسره او يقفل علي صباعنا

و متنكرشي ان بنقعد فترة كبيرة اوي نصلح في معنوياتنا و صباعنا اللي دوحس من قفلت الباب اكتر من اننا نقرب تاني و نفكر ازاي نطرح "بضاعتنا" و شخصيتنا الحلوة لحد ارتحتله

بقول لحضرتك كده لاني بنت...(ايون ايه الجديد يعني:)...قصدي يعني لاني مريت باحساس انك ابقي مركزة في دراسة او مذاكرة و مش في بالي خالص و بعيدن الاقي زميلي اللي انا اصلا بشوفه زي عيلاء اللي كنا بنعلب مسدسات مية و احنا صغيرين الاقيه بيقولي انا عايز اتقدملك

ساعتها تقييم مبيكونشي للشخص خالص

بيكون اني مش عارفة اتصرف و ملبوخة في المذاكرة فببقي عاملة زي اللي لابس في وشه فردة شبشب خشب

و الحاجة التانية اني اتربيت ان اول ما البنت ولد يقرب منها و يقولها يا جمسل يا مقطقط...لا مش دي لما يقولها يا حلوة يا شايلة البلاص....يووووه مش ده

لما يقرب منها و يتقدم لها و ده طبعا بعد ما ياخد حبوب الشجاعة شريطين سفوف....اتربيت اني لازم ابص في الارض و اتكسف و بعدين اسيبه و امشي

انا اتربيت علي ده علامة من علامات يعني الخجل و الحياء و كدهوت مع اني في الموقف الحقيقي لقيت اني بعمل تصرفات مفتكسة جدا غير كده...(اخر حد لقيت عنيا احولت و بعدين جريت و سبته..مع اني كائن لمض يعني...بس ده كان هول المفاجعة و كدهوت)

خلاصة الرغي دوت

لو حضرتك لساك معجب بيها و انا حاسة انك معجب بيها

طب ليه بعد الكورس ما يخلص ليه متحاولشي تكلمها تاني

اول مرة انك بتطمن عليها

تاني مرة قولها ان فيه كورس تاني هايل يعني قال يعني دورت علي حاجة مناسبة لاهتمامتها

تالت مرة

اتصرف بقي.....يعني اكيد هتلاقي خرم يجي منه سرسوب هوا من الباب دوت

و دي اهم سمة من سمات الكائنات الديناصورية المنقرضة علي فكرة.....تتوغل و تنتشر و تقتل:)

و طبعا صلي استخارة اوي

ربنا يعسد حضرتك

و جرب وصفة ال "مستويات" ديت و ابقي تعالي احدفني بحاجة...قصدي و ابقي هاتلي معاك الحلاوة و انت جاي باذن الله بخبر حلو

مساك.....فرح يستحق نتعب ليه شوية

[م تيمور المراغي]

يقولي بنتي تقعد في إستديو !! ياعم ما إيجاره في السنة أقل شيء أقل شيء 35 ألف درهم .. و معني كدة أني عملت إنجااااااااز

لحد ما وضعي يتظبط ياعمو ، لقيته أحرجني بصراحة .. و حكالي علي العيشة و المستوي اللي بنته عايشاه .. الخ

بصيت لنفسي كدة و قولت إنســـــــــــــــى و مشيت ..

خللي بالك يا مان ساعات بيقرصوا عليك ويقفلوا الدنيا في وشك عشان يشوفوا اصرارك وتمسكك بيهم وببنتهم اخباره ايه

[لماضة مصرية جدا]

اللي حكيته ليك دا علشان أوصلك نقطتين :-

1- موضوع الجواز من الغربة مش بحبة و دا نابع من 3 تجارب مختلفة و فشلوا ..

جنسية غير جنسيتي و ذكرت ليك السبب

و من جنسيتي و ذكرت برده ليك السبب

2- الإستعجال بلاش ..

يبقي الحل من بلدك عايشة نفس عيشتك و متربية في نفس البيئة اللي أنته أتربيت فيها ..

و ربنا إن شاء الله يرزقك بالزوجة الصالحة و متنساش تدعينا علشان نيجي نفرح فيك ;)

السلام عليكم و رحمة الله و بركاته

تسمحلي اقولك حاجة صغنتتة آد النملة

انا فاكرة زمان لما شاركت معانا في المنتدي كنت بتتكلم عن الزواج عن طريق النت فاكر... و دلوقتي ضارب الرقم القياسي...(3 مشروعات جواز يا جبار و انت لسه مقفلتش سنة في الامارات....يا عم كده هتجبلنا سمعة يا عم انت...بهزر طبعا)

بس لو تسمحلي اقولك...خد وقتك....و عجبتني اوي حكاية متستعجلشي ديت

اوقات كتير بنفتكر ان احنا فاهمين و عارفين احنا عايزين ايه...بس بنعيش عمر بحاله لسه بنكتشف نفسنا

بالنسبة موضوع الست الوالدة....مختلفة مع حضرتك شكلا و موضوعا و قالبا و فشة و كلوة و كل حاجة

و لاني بنت يعني هقولك اللي مش راح تسمعه...."انا بسميه" حبيب ماما"...و ده ملف ورد كامل كاتبة فيه ذكرياتي مسمياه كتوموتوا يا حلوة يا بطة...(اوعي تحدفني بحاجة و ربنا اعيط و الم عليك المنتديات الشقيقة)

و برضه دي وجهة نظري تماما و مقدرشي افرضها عليك

يا رب تتوفق باذن الله و برضه نفرح بحضرتك

و ابقي اعزمنا بقي

امارات

مصر

و ربنا يراضي قلبك

[لماضة مصرية جدا]

السلام عليكم يا استاذ المصمم

بص بقا يا اخي انا وللأسف بقالي خمس او ست سنين في الموضوع ده لدرجة انا ممكن اني اكتب كتاب smk:

طب هو انت لازم تتجوز يعني

اديك سعيت يعني و اخدت التجربة

خلاص

يعني هو لازم تتجوز...عيش حياتك كدهوت و هتلاقيها لطيفة برضه...(بس احيانا بتبقي ضلمة كوحل...بس يستوهيالي بعد الجواز هتبقي ضلمة برضه بس مخططة سواد في بولاك:)

و دي كانت نهاية التوبيك العظيم دوت

حد بقي ينيمني يا جدعان

او ياخد بايدي و يطلعني بره التوبيك دوت....(كرهت الناس في الجواز)

اوعي حد يزقني

انا عارفة السكة لوحدي

حد بس ينورلي السلم

[justme]

السلام عليكم يا استاذ المصمم

بص بقا يا اخي انا وللأسف بقالي خمس او ست سنين في الموضوع ده لدرجة انا ممكن اني اكتب كتاب smk:

طب هو انت لازم تتجوز يعني

اديك سعيت يعني و اخدت التجربة

خلاص

يعني هو لازم تتجوز...عيش حياتك كدهوت و هتلاقيها لطيفة برضه...(بس احيانا بتبقي ضلمة كوحل...بس يستوهيالي بعد الجواز هتبقي ضلمة برضه بس مخططة سواد في بولاك:)

و دي كانت نهاية التوبيك العظيم دوت

حد بقي ينيمني يا جدعان

او ياخد بايدي و يطلعني بره التوبيك دوت....(كرهت الناس في الجواز)

اوعي حد يزقني

انا عارفة السكة لوحدي

حد بس ينورلي السلم

:protest:

هي ناقصة ضلمة طب حاسبي السلمة المخلوعة (اصل السلم تركيب مش صب :closedeyes: )

انا اختلف مع النقطة اللي ملونها دي لأن ده كلام عن غير خبرة او ليس من السهل تطبيقه لما الانسان ربنا يكرمه ويعيش ويبقى في سن الخمسين مثلا بدون عائلة او 60 او 70 تفتكري هتبقى فلة شمعة منورة وحلوة ده غير ان اللي يقدر يتجوز المفروض يتجوز ده من الدين وكلام الرسول

ومننساش ان قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره

طيب علشان منضلمهاش في وش الراجل

انا اعرف زميل ليا نزل اجازة وخطب واتجوز في اسبوع

وما شاء الله معاه تلات او اربع عيال

وبعدين انا بالنسبة لقضية القعدة دي معناها اليأس

وانا ولله الحمد لم أيأس وان شاء الله املي في ربنا كبير

على فكرة اي ولد او بنت مهما كانت الظروف بيلاقوا اختيارات بس ممكن متكونش مناسبة فما بالك بالمسافر اللي نافذة الوقت بالنسبة له في داخل مصر شهر او اتنين في السنة والموضوع محتاج بحث ومتنسوش انها محاولة واحدة بس المسموح بيها وصعب تتكرر يعني بنعتمد على خبرة غيرنا مش خبرتنا وفي الغالب المغترب يعتمد على حسن اختيار الشخص الوسيط في هذه الحالة او على وجود فرصة امامه في محيطه بالغربة بخلاف المقيم بمصر اللي بتبقا دائرة معارفه فيها في الغالب اكبر بكتير

الخلاصة ان ظروفي مش ظروف كل الناس ولكن هناك من تتشابه ظروفهم معي

وبالمناسبة انا كان ليا صديق غير مصري عنده عقدة في الجواز هو واخواته كل ما يروح لعروسه ياما مش مناسبه شروط اهله ياما مش مناسباه وبصراحة شروط اهله كانت تعقد عايزلها منتدى لوحده لأنها تعبر عن مشكلة شعب باسره

يعني مرة راحوا لواحدة وكانت عاجباه الموضوع باظ لأن ابوها ظهره محني وده عرفوه هما انه (أتب) وبناء عليه العيال ممكن تتطلع كده وفركش :blink:

ما علينا الراجل اتعقد من اهله وطفش من البيت وقعد بره البيت يمكن اكتر من سنة :sad: على امل يتنازلوا شوية

المهم عمل عمرة واتفكت والراجل اتجوز ومخلف اتنين ومبسوط جدا ;)

المهم طلعتينا من الموضوع كده الله يسامحك :sad:

سيبك من الكلام ده كله وركز بس واستخير ربنا

وحاول اما تنزل اجازة تكون طويلة قدر الامكان علشان تاخد وقتك لأن القرار ده مسئولية

خالص دعواتي لك وتحياتي وربنا يكرمك

تم تعديل 19 نوفمبر 2011 بواسطة justme

[عماد حمدي]

يقولي بنتي تقعد في إستديو !! ياعم ما إيجاره في السنة أقل شيء أقل شيء 35 ألف درهم .. و معني كدة أني عملت إنجااااااااز

لحد ما وضعي يتظبط ياعمو ، لقيته أحرجني بصراحة .. و حكالي علي العيشة و المستوي اللي بنته عايشاه .. الخ

بصيت لنفسي كدة و قولت إنســـــــــــــــى و مشيت ..

خللي بالك يا مان ساعات بيقرصوا عليك ويقفلوا الدنيا في وشك عشان يشوفوا اصرارك وتمسكك بيهم وببنتهم اخباره ايه

الكلام دا يا تيمور لما أكون أنا أعرف البنت من زمان بقا و داخلين في قصص عنتر و عبلة ، إنما دي من البداية كدة خبط لزق ، جيت طلبت إيديها من الباب أو إعتبره تعارف علي أساس أجيب بابا و ماما هنا بعد كدة ..

بيني و بينك مسكت مديري قولتله ياعمي قبل ما أروح ظبط لي الوضع ياعني إحكيلهم علي ظروفي أني عندي كذا و كذاو ظروفي 1 و 2 و بعد كدة أروح أنا ..

المرة التانية كان الكلام فيه آخذ و عطا و سألوني أنا ناوي فعلاً أستقر في البلد دي و لا لا ، أنا من جوايا طبعاً ناوي أستقر هنا ع طول ياعني مش سنة و لا إتنين و أنزل إن شاء الله ياعني مستقر ..

بس قولت لا مش ناوي علشان أشوف رد فعلهم إية ، و لقيته : متأسفين دي بنتنا و دي مش عارف إية .. طيب هوه أنا واخدها ياعني و طالعين رحلة سفاري دي هتبقي مراتي يا جدعان .

فخدت الأمر عادي جداً و كان لم يكن ، تجربة و إستفدت منها و صلى الله و بارك مالها بنت بلدي ياعم ، التفاهم برده مع المصريين ليه طعم خاص ، إنما عرب نص كلامه مش فاهمه

فريحت دماغي

[اثار]

هدلي بدلوي في الموضوع دا ..

لذلك قررت لما أنزل مصر والدتي هيا اللي تختار واحدة من بلدي عارفه أصلها و فصلها و سألين عليها كتير ..

و ليا شروط محددة 1- .... 2- ..... 3- .... شروط عامة بقول لوالدتي يا حاجة علشان منضيعش وقت دي شروطي ..

و هيا تدور و تقولي لقيت فلانه بنت فلان و لقيت علانه بنت علان ..

و دوري أني أشوف هيا تتناسب فكرياً بقا معايا و لا لا ، الشروط اللي طلبتها موجوده فيها و لا لا

دماغها و تفكيرها و طموحتها .. و أسلوبها في الكلام ..

و هما كام سؤال هسأله ليها و إجابتها و طريقه الإجابة نفسها هتحسم الأمر مبدئياً بالنسبة ليا ..

و الموضوع يبقي واقف علي أني أصلي إستخارة و الموضوع خلص ..

طبعا التواصل بعد كدة هيكون علي النت .. في الفترة دي تركز تسألها في كذا حاجة تشوف رد فعلها هتتصرف إزاي

ياعني تكون أسئلة موضوعيه تستنتج منها البنت دي إية بالظبط ..

تشاركها في مشاكلك مثلاً في الغربة و تاخد رأيها و تشوف هتحل المشكلة دي إزاي ..

الجواز حياه تانية خالص الجواز وضع تاني خالص و مسؤليات الجواز مش مجرد واحدة تطبخلك و تغسلك و تكويلك .. بس .

الجواز ياعني إنسانة تشاركك حلمك ، إنسانة طموحة شايفة بكرة أحلي و أجمل ، الجواز ياعني جسدين و روح واحدة ..

الجواز مسؤلية .. الجواز ياعني تلاقي إنسانة تسمعك و تسمعها تحكيلك و تحكيلها ..

الجواز ياعني الصبر .. الجواز ياعني إنسانه تبص للي أقل منها و تقول الحمد لله و تعرف إنها عايشة في نعمة ..

الجواز إنسانة تفضفض معاها و تقولها اللي مضايقك و هي كذلك ..

تبقوا إيد واحدة في كل حاجة ، في أي قرار .. تخططوا أنتوا الأتنين لبكرة ..

ترسموا حياتكم بإيديكم .. لولادكم إن شاء الله ، الجواز مش مجرد أتنين مع بعض أكل و شرب و نوم و بس

الجواز أكبر من كدة بكتيييير جداً .. إياك تستعجل أنا بحذرك أهو ..

اللي حكيته ليك دا علشان أوصلك نقطتين :-

1- موضوع الجواز من الغربة مش بحبة و دا نابع من 3 تجارب مختلفة و فشلوا ..

جنسية غير جنسيتي و ذكرت ليك السبب

و من جنسيتي و ذكرت برده ليك السبب

2- الإستعجال بلاش ..

يبقي الحل من بلدك عايشة نفس عيشتك و متربية في نفس البيئة اللي أنته أتربيت فيها ..

و ربنا إن شاء الله يرزقك بالزوجة الصالحة و متنساش تدعينا علشان نيجي نفرح فيك ;)

انا شفت الدماغ دي بل كده ايوه دا نفس تفكير اخويا بالظبط محدد جدا ومش بيخطي خطوه الا وهو عارف

بالظبط عاوز منها ايه

بالتوفيق للجميع