ازاى اختار زوجه وانا فى الغربة

[عماد حمدي]

اللي حكيته ليك دا علشان أوصلك نقطتين :-

1- موضوع الجواز من الغربة مش بحبة و دا نابع من 3 تجارب مختلفة و فشلوا ..

جنسية غير جنسيتي و ذكرت ليك السبب

و من جنسيتي و ذكرت برده ليك السبب

2- الإستعجال بلاش ..

يبقي الحل من بلدك عايشة نفس عيشتك و متربية في نفس البيئة اللي أنته أتربيت فيها ..

و ربنا إن شاء الله يرزقك بالزوجة الصالحة و متنساش تدعينا علشان نيجي نفرح فيك ;)

السلام عليكم و رحمة الله و بركاته

تسمحلي اقولك حاجة صغنتتة آد النملة

انا فاكرة زمان لما شاركت معانا في المنتدي كنت بتتكلم عن الزواج عن طريق النت فاكر... و دلوقتي ضارب الرقم القياسي...(3 مشروعات جواز يا جبار و انت لسه مقفلتش سنة في الامارات....يا عم كده هتجبلنا سمعة يا عم انت...بهزر طبعا)

بس لو تسمحلي اقولك...خد وقتك....و عجبتني اوي حكاية متستعجلشي ديت

اوقات كتير بنفتكر ان احنا فاهمين و عارفين احنا عايزين ايه...بس بنعيش عمر بحاله لسه بنكتشف نفسنا

بالنسبة موضوع الست الوالدة....مختلفة مع حضرتك شكلا و موضوعا و قالبا و فشة و كلوة و كل حاجة

و لاني بنت يعني هقولك اللي مش راح تسمعه...."انا بسميه" حبيب ماما"...و ده ملف ورد كامل كاتبة فيه ذكرياتي مسمياه كتوموتوا يا حلوة يا بطة...(اوعي تحدفني بحاجة و ربنا اعيط و الم عليك المنتديات الشقيقة)

و برضه دي وجهة نظري تماما و مقدرشي افرضها عليك

يا رب تتوفق باذن الله و برضه نفرح بحضرتك

و ابقي اعزمنا بقي

امارات

مصر

و ربنا يراضي قلبك

لماضة خدي دي bsh:) خدي دي كمان mf( و دي كمان bngn::

أيوه إنتي بالشكل دا بقا أعرف أتافهم معاكي

مقفلتش سنة ! قولي مقفلتش سنتين

طيب بما أني حبيب ماما .. ههههه الموضوع مش كدا أصلاً ..

أصل مش بابا اللي هيدور لي مثلاً ، ماما بإعتبارها أُُخت و كده ياعني فتعرف ناس كتيررررررر أوي

و لو قالت لواحدة بس عايزين عروسة لعماد هتلاقي كتير موجود ..

و اللي هنا إخوان مسلمين يعرف الموضوع دا .. هتلاقي الدنيا زيطه ههههه

بابا مش ينفع عارفه حُكم الإختلاط و الكلام دا مش موجود عندنا فميعرفش حد كتير ..

أو مثلاً زوجات صحابي الموضوع مش إخترت ماما علشان هيا ماما و انا حبيبها و كوتموتو وكدا

إخترتها علشان الظروف بتقول كدا و الوضع الحالي بيقول كدا

ممكن لو أي من زوجات صحابي شافوا حد مناسب مش هقول لأ أصل مامي إللي هتختار

الزواج عن طريق النت دا موضوع أفشل من الفشل نفسه ..

من يومين إتفرجت علي فيلم ( بنتين من مصر ) صُدفة لقيته فإفترجت عليه

بيتكلم عن مشكلة تأخير الزواج في مصر و أسبابها و المشاكل اللي بتقابلها البنات و كده

بصراحة الفيلم طويل ساعتين و .. ، خلصت الفيلم إتعقدت من حياتي

و لقيت الدنيا سودة سودة و منقطة أسود

قولت ياعني خفوا يا أهالي شوية واحدة واحدة أنتوا شايفين الدنيا عاملة إزاي

و الدهب بقا بكام واحدة واحدة يا بشر لكدة لبناتكم هيعدوا التلاتين و محدش هيبصلهم

بصراحة فيلم قوي بس هتخرجوا منوا كارهين حياتكم فبلاش تتفرجوا عليه ..

معلش ممكن أعرف لية مُختلفة بجد في موضوع ماما اللي تدولي .. أهو أنتي كدة يُعتبر عرفتي

الظروف المحيطة بيا ، ياعني أنتي مثلاً شايفة إيه الصح ..؟؟ منتظرك تدلي بدلوك بعد ما تخفي و تفكي الشاش :P

أنا كوتموتو po::

[ssamir]

أيعني احكي موقف حصلي قريب هو بعيد شويه عن الموضوع بس حبيت اقول

باخد كورس انجليزي و في بنت عجباني جدا و بنتكلم مع بعض كتير قبل الكورس ميبدأ او في الراحة او لما نكون مروحين و كل واحد رايح لعربيته

و قبل الكورس ميخلص حبيت اعرف رايها ايه و طلبت اتقدم ليها

اتقلي مش عايزة اخسرك انت الوحيد اللي اعرفة في الكورس بسأله دايما و بتكلم معاة و مش عايزة بكدة نخسر بعض

( وش واحد اداس علية بميت جزمة بس من الداخل بس من الخارج جبل ولا اتهزت شعرة )

السلام عليكم و رحمة الله و بركاته

طب تعتبرني اختك و كدهوت و ينفع تديني المكرفون...(الحقيقة طول عمري انا اللي بحكي لاخواتي الاولاد و هما بقي ينصحوني فارجوك ارجوك اعطني هذا الدواء....قصدي ارجوك يعني اديني فرصتي اني افكر لغيري شوية)

امبارح كنا بنتفرج علي فيلم حلو كتير و بعدين جه مشهد بيقولك المفروض انك بتاخد التعارف ده مستويات

يعني في الاول بنتكلم في حاجات عمومية و بعدين حسينا فيه قبول و الباب مفتوح نطلع المستوي اللي بعديه و نتكلم علي حاجة عامة اه علشان يبقي فيه حوار بس كمان حتة شخصية...الباب لسه مفتوح يبقي نرفع المستوي و نخش في حاجات شخصية بس برضه بالمتغطي...كل ده لو الباب مفتوح

بحس كتير ان احنا لما بنلاقي حد نقرب منه بنرتبك و بعدين بدل ما ناخدها واحدة واحدة نيجي نخبط ع الباب اوي و ممكن نكسره او يقفل علي صباعنا

و متنكرشي ان بنقعد فترة كبيرة اوي نصلح في معنوياتنا و صباعنا اللي دوحس من قفلت الباب اكتر من اننا نقرب تاني و نفكر ازاي نطرح "بضاعتنا" و شخصيتنا الحلوة لحد ارتحتله

بقول لحضرتك كده لاني بنت...(ايون ايه الجديد يعني:)...قصدي يعني لاني مريت باحساس انك ابقي مركزة في دراسة او مذاكرة و مش في بالي خالص و بعيدن الاقي زميلي اللي انا اصلا بشوفه زي عيلاء اللي كنا بنعلب مسدسات مية و احنا صغيرين الاقيه بيقولي انا عايز اتقدملك

ساعتها تقييم مبيكونشي للشخص خالص

بيكون اني مش عارفة اتصرف و ملبوخة في المذاكرة فببقي عاملة زي اللي لابس في وشه فردة شبشب خشب

و الحاجة التانية اني اتربيت ان اول ما البنت ولد يقرب منها و يقولها يا جمسل يا مقطقط...لا مش دي لما يقولها يا حلوة يا شايلة البلاص....يووووه مش ده

لما يقرب منها و يتقدم لها و ده طبعا بعد ما ياخد حبوب الشجاعة شريطين سفوف....اتربيت اني لازم ابص في الارض و اتكسف و بعدين اسيبه و امشي

انا اتربيت علي ده علامة من علامات يعني الخجل و الحياء و كدهوت مع اني في الموقف الحقيقي لقيت اني بعمل تصرفات مفتكسة جدا غير كده...(اخر حد لقيت عنيا احولت و بعدين جريت و سبته..مع اني كائن لمض يعني...بس ده كان هول المفاجعة و كدهوت)

خلاصة الرغي دوت

لو حضرتك لساك معجب بيها و انا حاسة انك معجب بيها

طب ليه بعد الكورس ما يخلص ليه متحاولشي تكلمها تاني

اول مرة انك بتطمن عليها

تاني مرة قولها ان فيه كورس تاني هايل يعني قال يعني دورت علي حاجة مناسبة لاهتمامتها

تالت مرة

اتصرف بقي.....يعني اكيد هتلاقي خرم يجي منه سرسوب هوا من الباب دوت

و دي اهم سمة من سمات الكائنات الديناصورية المنقرضة علي فكرة.....تتوغل و تنتشر و تقتل:)

و طبعا صلي استخارة اوي

ربنا يعسد حضرتك

و جرب وصفة ال "مستويات" ديت و ابقي تعالي احدفني بحاجة...قصدي و ابقي هاتلي معاك الحلاوة و انت جاي باذن الله بخبر حلو

مساك.....فرح يستحق نتعب ليه شوية

كلامك في الجون يا ريهام

فعلا اوقات بدل ما ناخد الامور علي نار هادية بنستعجل

بس احنا مبنعرفش ان احنا استعجلنا الا بعد فوات الاوان

و ممكن نخسر انسان كان ممكن يضيف جاجات كتيرة لحياتنا

بس انا مؤمن بمقولة ان ما أصابك ما كان ليخطيك و ما اخطيك ما كان ليصيبك

و بالتالي حتي لو غلطت او معملتش ذي الكتاب بيقول

الطرف التاني هيفهم و يعديها

الكلام بيننا بعد اللي حصل استمر عادي بس اقل شوية

بس بحس بيها ساعات بتبصلي في الكلاس او بتتكلم معايا في البريك من نفسها

رغم انها هادية جدا

الكلاس خلص الاربعاء وواحد تاني بدأ الخميس و هي مشتركه فيه و حضرت فعلا

بس انا اترددت جدا ان احضر و اخر فرصه النهاردة او بكرة بالكتير

تعرفي بعد مقريت كلامك انا في الكليه دلوقتي دراسات عليا هندسة

كنت هسيب الكليه و اروح ادفع فلوس الكورس لانني حاجز و اخر يوم ليه النهاردة

حتي مش عايز اصبر

دايما عندي أمل و صبر بس ساعات بخر و ببوظ الدنيا

[ssamir]

حاجه كمان انتي قلتيها- ساعتها تقييم مبيكونشي للشخص خالص - دة احساسي من رد فعلها

لانني كشخصيه كنت هفهم انها مش عايزة

بس لاء في ميل و لكن درجته ايه اللة اعلم؟

اناعارف انني خوفتها بطلبي بس اعمل ايه ؟

اختياراتي محددة ؟

رسمي و تدخل من الباب او يكون في وسيط يسهل عمليه انكوا تقعدوا ترغوا مع بعض في اي حتة

[اثار]

الزواج عن طريق النت دا موضوع أفشل من الفشل نفسه ..

po::

اعتقد ان الرأي ده فيه تعميم شوية لان كل انسان ليه ظروفه المختلفه عن الثاني

أقصد خلينا نفترض ان مفيش وسيلة غير النت مثلا يعني ايه اللي يمنع مدام توفرت الاحتياطات والامان

واهم من كده الصدق ومراقبة الله سبحانه وتعالي

استنوا من فضلكم متتسرعوش في الحكم انا صعيدية ولو حد شم خبر برأيي ده هروح في خبر كان

اسمعوني الاول وبعد اذنكم صلحولي

اذا كان علي انه اغلب القصص اللي من النوع ده محكوم عليها بالفشل ( اللي بيتسلوا طبعا ) فدا مايمنعش انه اكيد في ناس بتنجح علشان صادقين مع نفسهم

قريت القصة دي وحبيت انقلهالكم

ا نا طبيب مصرى ولى قصة زواج ناجحة جداااا فى موقع مودة للزواج الاسلامى ... ومن باب رد الجميل

وللامانة اردت ان احكى قصتى ::

والله على ما اقول شهيد .... فلقد وجدت الانسانة التى طالما حلمت بها بين طيات هذا الموقع

والحمد لله هى على خلق كريم ومن عائلة كبيرة ومثقفة وست بيت .. وحنونة ولو تكلمت عنها ليل

نهار لا استطيع ان اوفى حقها ...... والحمد لله الذى لا يرزق سواه

انا سجلت هنا بالموقع مخصوص لارد عليك واطمئنك ... ان لاتخافى ولكن فقط كونى حذرة

فى عدم ارسال صورتك لاحد ويمكنك عرض صورتك فى الموقع فقط لمن ترغبى ولا يستطيع ان

ينسخها .... وهناك الكثيرون جدااا بالالوف ومئات الالوف بالموقع من الشرفاء وكذلك الفتيات والسيدات الصالحات

وليس معنى ان شخص واحد لم يستجيب لطلبك معناه ان الجميع بالموقع بهذا السوء

فلقد صادفت ايضا الكثيرات جدااا ... الى ان وفقنى الله تعالى

والحمد لله لقد تزوجت زوجتى من هذا الموقع ولا استطيع ان اصف لك مقدار حبى لها ولا حبها لى

حتى اننى اكاد لا اخرج من المنزل الا لعملى فقط ... وحتى انها تبكى عندما اذهب لعملى

وكأنها قصة حب عاشت من سنيين ..... انت تعجبتى من عدم رغبة الشخص الذى كلمتيه

فى محادثة والدك ؟؟؟ ... فأنا قابلت اهل عروستى ورفضوا طلبى ... طالبين الانتظار

وواجهنا معا كل الصعاب ... وتزوجنا والان نعيش وكاننا ولدنا من جديد من عامين

كان عيد زواجنا الثانى 12/10 ..... هذا للامانة وعرض حقائق .... والله على ما اقول شهيد

http://www.bnat16.com/15436-a.html

ما يهمني هو رأي الدين في مثل هذه المواقع

وقد نقلته لكم من موقع اسلام ويب

http://www.islamweb.net/fatwa/index.php?page=showfatwa&Option=FatwaId&Id=165635

ممكن اكون مخطئه بس مجرد راي حبيت اضيفه

بالنسبة للاخ المصمم

حضرتك ادري الناس بظروفك وامكانياتك وطموحاتك

وجهة نظري الشخصية مينفعش اطبق او اقلد تجارب الاخرين لاننا مختلفين

انا مش بقلل من اراء الاعضاء الافاضل بالعكس اراء جميلة جدا ومفيده

بس رايي ان حضرتك تختار رأي ولا اتنين من الاراء الجميلة دي

وتعدل فيها بحيث تبقي مناسبه وعلي مقاس حضرتك وربنا يوفقك للخير

[Scorpion]

و يبقي السؤال في تلك الحالة .. هل من الأفضل ترك الإختيار للأهل او للمعارف ..

و ما الذي يدفع الطرفين للمخاطرة بشراكة حياة مماثلة ؟؟

http://www.elwatannews.com/news/details/538928