كل ما يخص جُمعة 18-11

[se_ Elsyed]

إنما ليه نروح شارع محمد محمود ونقذف العساكر من صباحية ربنا بالطوب وخلافه

ده شغل إستقواء وتلكيك ومحاولة فرض سيطرة ومحاربة طواحين الهواء بصراحة

يعني الشباب لما يلاقوا الأمن سايبهم يروحوا هما يهاجموه !!

حاجة تفور الدم

ما سابهمش يا بيه

من امبارح وهما متكومين في أحمد محمود وبيضربوا عليهم قنابل غاز جديدة لم تشهدها مصر لدرجة إنها بتولع تخيل ؟ وتخيل قنبلة تنضرب من احمد محمود توصل الدور الخامس في مجمع التحرير وتولع في جزء منه ؟

[se_ Elsyed]

وبما إننا بنقول اللي لنا واللي علينا وإن الشرطة تلتزم أصى درجات ضبط النفس

حد يكذب بقى وكيل وزارة الصحة والمتحدث الرسمي بإسمها وهو بيتحدث عن نوعية إصابة المصابين اللي دخلوا مستشفى القصر العيني والمنيرة

من العينة اللي أتلقطت لها صورة وياريت تفسروها لي لو سمحتم

[م تيمور المراغي]

انا موعدي مش دلوقتي

بس حنزل

كله يحشد ع التحرير

شكلها موقعة الجمل 2

[se_ Elsyed]

هل هناك تفسير للهجمة البربرية اللي حصلت دي والتكسير والحرق ثم الأنسحاب بمنتهى السرعة ؟

[se_ Elsyed]

طبعاً النيل الاخبارية والتليفزيون المصري حاجه تانية خالص وبصراحة شيء مُخزي وشيء لا يدعو إلى الدهشة لما يبقى على جهاز واحد فقط في الدولة 20 مليار جنية ديون وخسائر ... والكل شايف والحكومة عارفه والمجلس العسكري يدري ... لكن على كيفهم ومتمزجين منه وحاجه تشرف وترفع راسهم

[se_ Elsyed]

الأن دراسة بصدد فرض حظر تجول في منطقة التحرير من 10 مساءً إلى 7 صباحاً

كل شيء مدروس وكله بالقلم والمسطرة

[spain]

انا باعتبر ان الثورة ما زالت والمشاركة في المرحلة دي هي اهم مرحلة

الملحمة

يانا يا انت!!!!

ونص البلد مع النظام السابق

ازاي حسيبك كده بسهولة

احنا اللي مستعجلين وعايزين نخلص بدري بدري

ده لسه الملحمة دي قدامها ولا سنة تاني كمان

علي الاقل

لغاية ما التمويل اللي بييجي من سجن طرة يخلص ويشطب

[se_ Elsyed]

ومين اللي ما فيش في قلبه رحمه ولا إيمان ولا يعرف عن الانسانية شيء اللي يجيله جراة ويمسك شعلة نار ويحرق الادوية والمستشفى الميداني بالكامل اللي بيعالج الناس بدل ما يتقبض على المصابين زي ما حصل أمبارح .... هل ده يرضي كافر في الدنيا يا ناس ؟

[Ahmed Anwer]

آيه الطريق الآمن للميدان ؟؟؟

اروح بالعربية ؟؟ لو ما روحتش بالعربية أروح إزاي ؟؟

[se_ Elsyed]

لغاية ما التمويل اللي بييجي من سجن طرة يخلص ويشطب

مافيش تمويل ولا غيره بييجي من طره يا ماما

لكن كل اللي بيحصل ده هو خوف ورعب من 30 شخص كلاب هم أعضاء المجلس العسكري اللي مرعوبين من الديمقراطية ...

بالله عليكي بينك وبين نفسك ... لو الشعب إختار كامل إرادتة وبمنتهى الشفافية .. إختار الشيخ حازم أبو إسماعيل رئيساً ... هل تتخيلي إن عقلية زبالة زي اللي موجودة دي يرضوا يخلوه قائد أعلى للقوت المسلحة ويؤدوا له التحية ؟

هل يقبلوا إن الاخوان المسلمين يكونون مجلس الشعب باغلبية لهم ؟

هل يقبلوا مناقشة ميزانية الجيش اللي مورطانا في أكثر من 35 مليار دولار ما نعرفش بتروح فين لان لا عندنا طائرات شبح ولا انظمة صواريخ متقدمة ولا غواصات نووية ؟

المجلس مرعوب من الديقراطية والشفافية ويريدها عتمه وديكتاتورية وطرمخه على نهبهم للبلد ؟

هاننضحك على بعض ونضع رؤسنا في الرمال وننكر إن كل هؤلاء من تعيين مبارك اللي ترك لهم الملف وكانت مجرد تبديل أدوار فقط يا سادة ؟

[spain]

نفسي بس اعرف الجيش ده ايه بالظبط

وايه علة ايده اللي بتوجعه ومين اللي عاوجهاله

ماسكين عليه ايه؟

[ام سلمي]

المصابين اتصابوا برصاص خرطوش وواحد خلع في الكتف لان الامن ضربوه باقدامهم ، و4 كل دقيقة بيقعوا من الغاز

علي الجزيرة مباشر

[se_ Elsyed]

أول حالة وفاة في ميدان التحرير بأيدي الكلاب ولا حول ولا قوة إلا بالله

[se_ Elsyed]

نفسي بس اعرف الجيش ده ايه بالظبط

وايه علة ايده اللي بتوجعه ومين اللي عاوجهاله

ماسكين عليه ايه؟

إقري المداخلة اللي فوق لو سمحتي يا سبين وإنتي تعرفي

[spain]

لا معلش كله بالفلوس

الناس دي حتشتغل ازاي .وشغل البلطججة ده لوجه الله

هو الجيش غني اوي كده

وبعدين انا مازلت اقول ان الجيش فعل افعال تحسب له ....وعليه

ومش عايزة ادخل في ديلمة الخيانة واخونه للنهاية ...وبعدين؟ مين اللي حنثق فيه لما ندمره احنا بنفسنا

لا امن ولا شرطة ولا جيش .....هو ده اللي احنا عايزينه

انا مضطره اقبله باعماله لغاية ما يسلم السلطة زي ما بيقول....

تم تعديل 20 نوفمبر 2011 بواسطة spain

[se_ Elsyed]

أنا مش عاوز أحلف يمين مغلظ

إن المجلس العسكري كان هايتلكك بأي حجة غير وجود 200 واحد في ميدان التحرير عشان يلغي الإنتخابات ويفضل موجود يشرع ويعدل في الدستور ويحكم بالحديد والنار

ده اللي الناس لازم تفهمه ... وما حرب القرى بينها وبين بعض إلا خير شاهد .. بدون ما يعملوا رجالة وينزلوا يشوفوا البلطجية اللي ماشيين بالسلاح وبيقطعوا الطرقات في عز الضهر

ومين اللي ما عمل أرنب قدام الرهائن اللي إتخطفوا منه في دمياط ورجع يعيط عشان يفك أسر جنوده ؟

ومين الـ 12 الف اللي مقبوض عليهم واتحاكموا عسكرياً

[نورالعين]

تعقد الأمانة العامة للمجلس الوطنى المصرى وبمشاركة بعض الشخصيات العامة اجتماعاً موسعاً اليوم، لبحث سبل المصالحة الوطنية بين التيارات المختلفة فى مصر.

وأكد ممدوح حمزة، الأمين العام للمجلس الوطنى، أن الاجتماع يأتى فى إطار تهدئة الأجواء الساخنة فى الميدان من خلال إجراء مصالحة وطنية لكافة القوة الثورية مع كافة أطراف الخلاف ومنهم الأمن العام والأمن المركزى، بمشاركة مندوب من كافة القوى.

وأوضح حمزة أن اجتماع اليوم سيتم خلال وضع الخطة التى سيتم من خلالها تحقيق المصالحة، بالإضافة إلى تحديد موقع هذا اللقاء.

اليوم السابع

اتمنى فعلا ذلك

ممدوح حمزه دا أكبر خروف علي رآي تيمور ..

عايز يحسن صورته قدام الثوار من جديد بعدما أخزلهم برفضة المشاركة في مليونية المطلب الواحد ..

و موافقته علي وثيقة السلمي ..

و دا أكبر واحد عامل فتنه في مصر بسبب تصريحاته الشاذه ..

شوفي قال إية ( المشاركة في مليونية الجمعة المقبلة قلة أدب ) ..

و دا الرابط

دا كفاية التعليقات اللي علي الخبر ..

هو حر في رأيه يا عمدة

على الاقل مدعاش لاعتصام ورجع في كلامه

ويعنى انت شايف الاعتصام جاب نتايج حلوة !!!!!

ماهو كله من التهييج اللى عملته القوى الدينية

لا الوثيقة اتسحبت ولا البلد شكلها حتعمل انتخابات

بلاش تلميح للشيخ حازم . لو سمحت

مفيش أي حركة او تيار أو حزب أو بنأدم دعي للإعتصام نهائياً

و راجعي الفيديو الخاص بالشيخ حازم و إسمعيه كويس أرجوكي

بلاش نردد كلام مش متأكدين منه

الراجل قال أنه يحترم رأي أي حد هيعتصم و أن دا من حقهم ، و قال بذكركم ان معادنا هنا كل يوم جمعه

و نزل إمبارح بالليل مع المُعتصمين

الخروف دا بقا عمل إية

و هوه أصلاً السبب في كل اللي بيحصل

و تصريحاته الشاذه اللي متطلعش إلا من شاذ زيه

ممدوح حمزة البلد كها قرفانه منه و من اللي خلفوه

و برده هتعملي زي التليفزيون المصري و تقولي القوي الدينيه بس اللي كانت بتتظاهر

إمال بقيت الأحزاب و حركة 6 إبريل و الناس دي كانت فين

منزلوش الميدان ياعني ..

مليونية الجمعة شارك فيها كل القوي السياسية و الأاحزاب و التيارات ماعدا قله قليلة .. و معروفين

لما نُحكم و نتكلم منقولش تيار إسلامي بس نقول الكل مش البعض

و نتأكد من المصادر و نقرا و نسمع كويس

انا مش بلمح يا عمدة

انا بأكد على انه السبب الرئيسي فيما نحن فيه

ومش بس دلوقت من امبارح كمان

ياريت انت اللى تقرأ صح

شوف مين دعا للاعتصام وليه

مين مش عايز اي نقاش حول الوثيقة

كان فاكر نفسه حيقدر يخلى الحكم اسلامي ويتولى الخلافة

ببساطة كده الجيش حيقوله اتفضل !!!!

غباء سياسي

اللى انت بتقوله ده حصل بس في اخر يومين

هو بقاله اكثر من اسبوعين بيحشد للمليونية

ونازل يقول نعتصم ونخلع العسكر

6 ابريل والثوار انخدعوا بكلامه

وطمعوا كمان في الحشود بتاعت المحافظات

وكانت النتيجة انه خلى بيهم

ويقول احترم اللى يعتصموا واللى مش عايز هو حر !!!

طيب نزل تانى ليه

الا لو فعلا عارف غلطته

وحتى لما نزل عمل ايه

قلهم اعتصموا ومشي هو!!

طيب حتى يحشد الحشود اياهم ويمشي

[se_ Elsyed]

انا مضطره اقبله باعماله لغاية ما يسلم السلطة زي ما بيقول....

يا عزيزتي يا ماما أفهميني الله يخليكي

هايسلمها إمتى ؟

بعد 6 شهور في شهر سبتمبر 2011 اللي عدى ده ؟

ولا زي ما بيقول الفنجري مش هانسلم السلطة إلا لما الامور تستقر ؟

يا عزيزتي أقسم بالله ما يحدث هو تكرار لما حدث في 52 بحذافيرة لأن كان هناك قرارات صريحة من مجلس قيادة الثورة بتسليم السلطة لحكومة مدنية

ثم جثموا على صدورنا أكثر من 60 عاماً يتوارثون البلد إلى الأن

سألتي نفسك لماذا يصرون بكل كِبر تسليم البلد لمجلس إنتقالي مدني ويعودوا ليمارسوا مهامه في الدفاع عن البلد اللي بقت حدودها مستباحة ؟

[نورالعين]

الحل الوحيد اليوم هو المجلس الرئاسي

ويارب المجلس العسكري يطلع ذكي مرة واحدة

[se_ Elsyed]

يناير بحذافيرة

اللواء محمود زاهر : المُتواجدين الآن في التحرير هم حفنة من بلطجية شباب 6 إبريل والطائفيين الذين كانوا أمام مبنى ماسبيرو #