خيط رفيع

[مغتربة]

تلاقى انسان بيتكلم باسلوب مش لطيف ابدا كله تعدى على الى ادامه و تجريح و اهانه و بعدين لما تكلمه يقولك اصل انا صريح وواضح مش بتاع لف و لا دوران و بقول للاعور انت اعور فى عينه !!!!!

تلاقى انسان سمج و قاعدته تقيله على القلب لكن عمال يقول فى نكت بايخه و افيهات فاشله و كلام كله سخريه رزله و لما تيجى تكلمه و تقوله يا عم خف علينا مش كدا يطلعك ان انت الى نكدى و ملكش لا فى الحظ و لا فى الفرفشه و جد و مقفل !!!!!!!

تلاقى انسان عمال يتكلم و بيقول 500 انا ف ىالدقيقه الواحده و فاكر نفسه ربنا لا خلق قبله و لا بعده و بعدين يختم كلامه بكلمه و اعوذ بالله من كلمه انا قال يعنى كدا خلاص هو براءه من تهمه الغرور و لما تقوله من تواضع لله رفعه تلاقيه يرد عليك و يقولك انا انسان عارف قدراتى كويس و لله الحمد وواثق فيها !!!!!!!

تلاقى و تلاقى و تلاقى

اكيد دىنماذج كلنا بنقابلها فى حياتنا اليوميه لكن لغايه دلوقتى مش عارفه ايه هى الطريقه المثلى للتعامل مع البشر الى بالشكل دا

ازاى نفهمهم انه

بين الصراحه و الوقاحه خيط رفيع

و انه بين الظرف و الاستظراف خيط رفيع

و انه بين الثقه بالنفس و الغرور خيط رفيع

و انه بين التحرر و الاباحيه خيط رفيع

و انه بين الموهبه و فرض النفس بالعافيه على الناس خيط رفيع

و انه بين الحب و غريزيه التملك خيط رفيع

و انه بين السيطره و الديكتاتوريه خيط رفيع

و انه بين ...............

حطوا بقى كل الى نفسكم فيه

المهم انه دايما فى خيط رفيع فى ناس كتير مش بتاخد بالها منه

[عبير يونس]

موضوع لذيذ و عميق في نفس الوقت

كعادة موضوعاتك يا قمر

بالنسبة لي

أنا بحب اتعرف على الناس و الاحظهم و اتعلم منهم

و كل بني آدم في نظري يستحق الملاحظة

حتى لو كان رخم و سخيف و جلياط و حتى لو قليل الأدب كمان

كل واحد في دول له فايدة في الدنيا و في حكمة من وجوده

طبعا أن لا أدخل أحد في العمق عندي

كله من ع السطح

يعني ما باتنرفزش من حد

لو مضطرة أشوف النوعيات دي في حياتي

مهما كانت مساحة وجودهم

فبيبقوا من برة بالنسبة لي

مش باتضايق اوي يعني

مفيش طريقة واحدة

كل بني آدم بشوف له السلوك اللي يناسبه

اللي بيستظرف له ردود

و المغرور له ردود

و قليل الأدب له ردود

كل حد هو ونصيبه معايا

و حسب المود اللي انا فيه

بياخد اللي في النصيب

بدون تعدي لحدود الأدب طبعا

حتة بقى نفهمهم دي

فبكل اريحية احب أقول لك ما تتعبيش نفسك

ده اللي بيسموه الاحساس

و اللي معندوش احساس حنعمل له ايه؟؟؟

يا قلة الحيلة

بأحرص دايما اني اقضي وقت ظريف و ما اسمحش للنوعيات دي تنكد عليا

أو تعكر مزاجي

و بس خلاص

صباحك فل و ياسمين

[pink rose]

احسن حل و دا اللي توصلتله اخيرا

هو تكبير الدماغ

انا مش هاقعد اربي الناس

و مش هاقعد لكل واحد اقوله انت كذا و انت كذا

اللي الاقيه تصرفاته غير مقبولة بالنسبة ليا اصدرله الوش الخشب و انتهينا

و لا بقى احرق دمي و لا اعصب روحي

و لا ابوظ الحجة بتاعتي هههههههههههههههههههه

كبري دماغك يا مغتربة لان اللي فيه طبع ما بيغيروش خلاص

و مش هانقعد احنا بقى نعلم كل واحد يتكلم ازاي

لو حد من النوعيات دي صدر منه حاجه ليكي تصديه بكل حزم و انتهى الامر على كده

و تطلعيه برا تفكيرك خالص

حياتنا الشخصية فيها اللي مكفيها لو زودنا هموم و مضايقة عليها يبقى احنا كده بنعمل اوفر لود على اعصابنا بسبب ناس لا يمثلوا لينا اي شئ

فا على ايه وجع القلب اللي بزيادة

صباح رايق و هادي يا جميل

[طارق مصرى]

نعم امثلة كتير موجودة

بالذات اللى بيقل ادبه و يقولك اصل انا بقول للاعور انت اعور فى عينك مفكر دى حاجة كويسة

مش عارف ان اسمها جليطة و قله ذوق

لكن دى طبيعة الانسان عموما مغرور بعقله و لازم يدور على غطاء لعيوبة و افعاله المشينه و يضعها فى

ثياب جميلة بدلا من ان يغير من نفسه طبعا الا من رحم ربى ..