ارجو من الاعضاء والادارة مساعدتى

[freshengbadr]

ارجو منكم الرد والاجابة على حيرتى فى موضوع سفرى انا اسمى م/محمد مهندس ميكانيكا جايلى عقد فى الكويت فى شركة مطاحن الدقيق والمخابز الكويتية فى منطقة الشويخ عن طريق مكتب توظيف امتحنتنى لجنة من الشركة هنا فى مصر وقبلونى قالولى ان العقد على 261 دينار والاقامة علينا كما ان التنقلات علينا اتوبيس المطحن هياخدنى ويودينى مع العلم انه قالى ان هى شركة حكومية يعنى اشراف حكومى وقالى ان العقد هيتجدد بعد السنتين دول اتوماتيك مع تعديل الراتب حسب خبرتك وتقييمك ولو حبيت اسيبهم فى اى وقت الشرط الجزائى الوحيد انى اردله قيمة تذكرة السفر اللى هيبعتهالى فى اول ما اسافر.انا دلوقتى طالب مساعدة اعضاء المنتدى والناس المقيمة هناك فى الاجابة على بعض الاستفسارات اللى محيرانى ومخليانى مش عارف اخد قرار بالسفر او لأ مع على العلم ان اختى هناك هى وجوزها فى منطقة الفروانية:

1)هل الراتب قليل ام متوسط بس بصراحة ومن غير مجاملات مع الاخذ فى الاعتبار انى لسه حديث التخرج 2011 وممكن اكل واشرب واعيش باد ايه هناك وهوفر منه ولا لأ؟

2)هل الشركة دى مستقرة ماديا وفعلا ليها اتوبيسات وشغلها كويس؟

3)مكتب التوظيف هياخد منى 10500 جنيه شاملين تذكرة السفر هلى المبلغ دة كتير ولا قليل؟

4)ما هى الخطوات المتبعة للتاكد من صحة جواب عدم الممانعة والعقد مع العلم ان العقد هييجى مختوم وموثق من الخارجية هناك والغرفة التجارية هناك والقوى العاملة هناك ومختوم من الشركة وعلى ورق الشركة؟

ارجو منكم التكرم بمساعدتى فى حيرتى وانى اخد قرار بشان هذا الموضوع ضرورى وعلى وجه السرعة وشاكر لافضالكم.

[Nileman]

توكل على الله استخير و سافر

[mtawfeek]

السلام عليكم و رحمة الله و بركاتة

يا اخى الراتب قليل نوعا ما انا مهندس معمارى سافرت الى الكويت سنة 2007 بعد ستة اشهر من تخرجى كنت اعمل فى مكتب استشارى فى منطقة الشعب البحرى و كان راتبى وقتها 300 دينار كانت المصاريف الشهريه لا تقل عن 120 الى 150 دينار لهذا الراتب يعتبر قليل نوعا ما

و لكن لو نظرت من زاوية اخرى و نظرا للوضع الان فى مصر فاعتقد ان بعض الشركات الخليجية تستغل سوء الاوضاع فى مصر و ندرة فرص العمل

لهذا اذا لم يكن امامك بديل مستقر فتوكل على الله

الكويت بلد جميله

الحياه فيها جميلة جدا و سهلة و مفتوحة

استخير و توكل على الله

ربنا ييسر لك الخير ان شاء الله

[freshengbadr]

الله يرضى عنك يا اخى توفيق انا محتاج مساعدتك لان حضرتك شايف البلد هنا عاملة ازاى دلوقتى انا ممكن اعطيك ارقام الشركة لانهم مش بيردوا عليا عايز اعرف هى شركة مستقرة ولا لأ؟ وهل فعلا ليها اتوبيسات هتنقلنى ولا لأ لان انت طبعا عارف ان التنقلات هناك صعبة جدا؟وهقدر اعيش بكم واوفر كم من ال300 دينار؟

[freshengbadr]

هو ليه محدش رد عليا باستفاضة؟

[mtawfeek]

هو ليه محدش رد عليا باستفاضة؟

والله يا اخى انا دلوقتى فى السعودية مش فى الكويت

بس زى ما قلتلك لو مافيش بديل انت لسه فى بداية حياتك توكل على الله و اقبل العرض بعد الاستخارة

و بالنسبة للمواصلات ياسيدى اسهل حاجة فى الكويت انك تشترى سيارة مستعملة

بس استعمال الكويت غير اى استعمال يعنى تقدر تقول انه0

زيرو بالنسبه لينا

بس علشان متحسش ان الدنيا هتبقى وردى

اكيد هتتعب فى الاول و ده هيحصلك حتى لو كنت مسافر على اكبر شركه فى الخليج

هى الغربه كده على الاقل اول 3 شهور دول شيلهم من حساباتك خالص

مش هتبدأ تحس بالعائد الا بعد فترة

المهم يعنى بالنسبه للتوفير ده بيختلف من شخص للتانى و بالذات ان الكويت مفتوحة يعنى المغريات كتيرة قدامك

بس يعنى على الاقل ممكن توفر من 120 لى 180 دينار شهريا على حسب مصاريفك بس بردة شيل اول 3: 6 شهور من الحسبة ديه

اما بقى بالنسبه للشركة فوالله ماعندى فكرة

ياريت اكون قدرت افيدك

وربنا ييسرلك الخير

[freshengbadr]

شاكر ليك كتير افضالك اخى الكريم

[ViralMind]

السلام عليكم..

انا شايف ان الرقم اللى طالبه المكتب كبير قوى.. يعنى هما كده واخدين حتى اكبر من مرتب الشهر الاولانى, و يا ريت تسألهم سعر التذكرة كام بالظبط.

السفر للسعودية بيكون تمن شهر واحد.. معرفش الكويت بيختلف ولا لا..

[freshengbadr]

التذكرة من مصر للكويت ذهاب بتعمل حوالى 2000 جنيه مصرى يعنى هو واخد حوالى 8500 جنيه احسب بقى تكاليف عدم الممانعة والورق والعقد والامضاءات متهيالى هو واخد فى الموضوع دة كدة 7000 جنيه انا والله مش مهم الرقم كبير او صغير انا بشترى خبرتى بفلوسى وبعد ما اقضى اول سنتين فى العقد واجى اجدد ساعتها يبقى فى كلام تانى

[freshengbadr]

انا بس حابب استفسر عن حاجة هل هيبقى سهل لو حبيت اتنقل من شركة مطاحن الكويت دى وهى اشراف حكومى لاى شركة قطاع خاص ولا صعب زى ما سمعت؟وهل لو حبيت انى اشتغل شغلانة تانية بعد الدوام من غير ورق او اى حاجة كصيانة التكييفات مثلا انزل كاجوال كدة فى مكان ما فيها مشكلة او ضرر عليا؟

[eng hady]

الاخ الفاضل نصيحه من مسافر .... استخير الله وسافر وخلي عندك طموح .... مفيش حاجه هتتحقق وانت في مكانك لابد من التحرك

اما عن الشغل في اي مجال ربما يكون من نصيبك ان تعمل دوام تاني فعلي حسب علمي ان البلد مفتوحه ويمكن ان تشتغل كمدرس خصوصي او في مجال اخر هذا ان كان هناك وقت

لأنه في اعتقادي ان المطاحن تعمل 24 ساعه اي من الممكن ان تعمل وقت اضافي ... وانت خريج حديث وفي حاجه للخبره والمال ولا مانع من التجربه .... يعني بالمختصر المفيد سنتين مش هيخسروك حاجه وانشاء الله تعمل شوية فلوس .... وتكون بعض الخبره وبعد كده يا مهندسنا الصغير تحط رجل علي رجل وتتطلب الراتب الا تتمناه

اتمني لك التوفيق بإذن الله .... توكل علي الله وسافر .. وربنا يعينك علي الغربه

اخوك مهندس الهادي

[Hesham Zaki]

علي فكرة دي شركة كبيرة وانتاجها مميز بيصدر لدول عديدة ..

[freshengbadr]

ريحتونى كتير يا جماعة الله يريح قلبكم