كيف أختار مرشحي مجلس الشعب..و رئيس الجمهورية؟

[Alattar]

أنا عارف ان الموضوع ده مش وقته في الأحداث الحالية..لكن بجد الموضوع ده شاغل بالي أوي اليومين دول

و ده لأن الانتخابات الجاية ان شاء الله هتكون أول مرة ليا أدخل لجنة و أدي صوتي لحد

ازاي هاختارمرشح مجلس الشعب..و مرشح الرئاسة؟

طبعا مش بالضرورة عشان المرشح ده بينتهج نفس منهجي مثلا..كأن يكون ليبراليا..أو اسلاميا..أو اشتراكيا..اني أرشحه علطول من غير ما أقرأ البرنامج بتاعه..لأن دي شهادة هنتسأل عنها أمام الله عز و جل..كما أوضح الشيخ محمد عبد المقصود..وبصراحة الراجل كلامه مقنع جدا..

طيب دلوقتي أنا قررت اني أقرأ البرنامج بتاع كل مرشح لمجلس الشعب في دائرتي..و أقرأ برنامج الأحزاب ..وبعد كده ان شاء الله قريبا هنبدأ نطلع علي برامج مرشحي الرئاسة..

كل ما آجي أقرأ لواحد فيهم..أو أشوف اعلان ليه في التليفزيون..ألاقي تقريبا نفس الكلام..

هننهض بالتعليم..من خلال تخصيص ميزانية عالية للتعليم..وتوفير مدارس و جامعات فيها مش عارف ايه..

هننهض بالاقتصاد اننا هنشجع الانتاج المحلي..و هنعمل علي سن قوانين تقلل من الاستيراد و الاقتراض ..

هنواجه البطالة اننا هنشجع علي سن قوانين لمحاربة البطالة و انشاء مصانع و شركات محلية و تشغيل الشباب..

هنواجه غلاء الأسعار بسن قوانين لمحاربة جشع التجار..و مراقبة الأسعار ..

طب ما الكلام هو هو بالظبط..نفس الكلام بتلاقيه تقريبا في أغلب الأحزاب..وعند أغلب المرشحين..

طيب عشان الواحد يرضي ضميره..و يحس انه مش بيدي صوته لأي حد و خلاص..الواحد يعمل ايه؟..