هل يتم تعيين كمال الجنزروي رئيساً للوزراء ؟؟؟

[Abu Reem]

قائمة للجنزوري بمرشحي الحكومة الجديدة من 11 ائتلافا .. أبرزهم زهران ومحلب والجلاد

يوالي الدكتور كمال الجنزوري رئيس الوزراء استقبال ترشيحات الإئتلافات والحركات الثورية والأحزاب بشأن وزراء الحكومة الجديدة واستقبل الجنزوري قبل قليل ممثلي 11 إئتلافا من بينهم اتحاد شباب الميدان وحركة الثوار المصرية وائتلاف شباب مصر و حركة الإخوان المصريين و تحالف ثوار مصر و اللجنة التنسيقة للثورة و اتحاد شباب الثورةو واستعرض معهم أسماء مرشحيهم لتولي حقائب وزارية وجاءت كالتالي:

الخارجية -نبيل فهمي

الإسكان - إبراهيم محلب

التربية والتعليم العالي - جمال زهران

الصحة - محمد البتانوني أو الدكتور عصام النظامي

الزراعة - الدكتور محمود عمارة

المالية - حازم الببلاوي

البترول - عبدالله غراب

الاعلام - سيد النجار أو مجدي الجلاد أو عادل حمودة

الكهرباء - محمود سلطان

الاتصالات -محمد عبدالرحيم

التعاون الدولي - أميرة الشنواني

التربية والتعليم- جمال الدين موسي أو صلاح زكي

التنمية المحلية - عبدالقوي خليفة

النقل - هشام السرساوي أو محمد زكي عابدين أو صفوت النحاس

الثقافة - عماد أبو غازى - وتوفيق عبد الحميد - أحمد نوار

ينهار اسود

عادل حموده من ضمن الاسماء المرشحة لوزراة الاعلام

ده مين ده اللي يرشح شخصية...قذ......ة زي ده بصراحة مش عاوز اكتبها..

ده لو مسك الاعلام انا عن نفسي هروح اولع في مبنى الاذاعة والتفلزيون

ده من كبار منافقي النظام...وشخصية...مليئة بالغل والحقد على اي ما هو ....ا س ل ا مي

وبعدين مجدي الجلاد ايه...يعني مفيش فايدة ..ربنا مش هيتوب علينا من الوجوه دي...

اتوقع ان القوائم دي مجرد بالونات اختبار

انا لا اقصد الزميل كاتب هذه المداخله ولكن لفت انتباهى جملة لو مسك عادل حموده هروح اولع فى التليفزيون

هذا هو الفكر السائد

لما كل واحد مش هيعجبه حد هيولع فى الوزاره فمتى سيكون عندنا دوله

ايه فكر سائد.....هو التعبير المجازي اللي انا قلته هتسميه فكر سائد

وبعدين ما انت كنت تؤيد التخريب اللي بيحصل في ش محمد محمود ، لماذا لم تعترض عليه...وهو لم يكن تعبير مجازي فقط بل كان فعل..وهجوم وتخريب...

والان لمجرد الكلام اللي واضح انه كلام فتقول عليه فكر سائد

واخيرا يعني عادل حموده انا باعتبره من كبار اعلامي النظام الفاسد الذي ثورنا عليه

فهل لو قلت نفسي عبارتي هذه لو مثلا تم ترشيح جمال مبارك للحكم هل عندها لو قلت هذه العبارة هتقول لي فكر سائد .....فيه فرق ياعزيزي..!!!

تم تعديل 26 نوفمبر 2011 بواسطة Abu Reem

[se_ Elsyed]

معليش بقى شوية هدوء

موضوع مجلس إستشاري أضرارة هاتكون اكتر من فوائدة .. لإنه هيبىق مجلس بلا صلاحيات ... يعني لو قالوا للجنزوري يمين مثلاً .. وصمم هو على الشمال ... يبقى إيه الوضع ؟

يعني أنا أفهم إن وزارة ما تعين إستشاريين بمرتبات .. لكن تطوع وكمان من ناس عندها طموح سياسي كبي ... فكده العك بعينه

وبالتالي أياً كان اسماء الوزراء المقترحين .. إذا لم يكن هناك رؤية واضحة ومهام محددة وكل ده بتوقيت محدد برضوا ... يبقى ساعتها سينا زي سونيا وجنزوري زي شرف .

[eslam elmasre]

مش عارف مين قالي ان الجنزوري بيفكر يلغي معاهدة 36 وبيطالب بخروج الاحتلال الانجليزي من مصر

الكلام ده صحيح بجد ولا هزار

[abdulmuttaleb]

قارن خادم الشعب الجنزوري ومخادعه البرادعي صديق مبارك

http://www.youtube.com/watch?v=LSuRzJAZORI

د.البرادعي: مش عارف أن واحد وخمسين في المائة من شعوب العالم اتبعت نفس الطريقة المصرية في انتخابات برلمان ثم دستور (اقرأ مقال د. معتز بالله عبد الفتاح في الشروق 19نوفمبر الاختبار الميداني لمقولات الأسواني).

د.الجنزوري: عارف أعباء المواطن البسيط فكان مأمورو جمارك الموانئ تأتيهم تعليمات شفهية من وزارة المالية في عهده ألا يجمركوا المواطنين القادمين من الأراضي الحجازية على التلفزيونات والأجهزة الكهربائية للتيسير على المواطنين الذين يستخدمون هذه المشتريات بشكل شخصي لا تجاري خصوصا وأن نسبة كبيرة منهم قد يكونوا من البسطاء الذين يبتهجون وأقاربهم بهذه المقتنيات.

لدرجة أحيانا بعض الحجاج يفصحون عما بحوزتهم من مقتنيات لدفع الجمارك المستحقة لكن مأموري الجمارك كانوا يكتفون بجملة (حمدا لله على السلامة يا حاج) والسماح له بالمرور طبقا لتعليمات حكومة الجنزوري ووزير ماليته الشريف د.محيي الدين غريب.

المقارنة الثانية:

د.البرادعي كان أحد ٣ مرشحين للخارجية في عهد مبارك. و الدكتور البرادعي كان سنويا يلتقي بمبارك حين يكون في مصر حتى طرح اسمه في 2009م كمرشح منافس..

مبارك الذي كان لا يطيق مقابلة المعارضة ولا يعطيهم اهتماما بل لا يرد على رسائلهم، هل كان مبارك ليقابل د.البرادعي سنويا لو كان ينصحه بما فيه مصلحة مصر و بما هو ضد أنانية مبارك و ضد التوريث مثلا؟ معنى كده أكيد الراجل مكنش بيقول كلام ضد مبارك وإلا لما قابله فضلا عن تكرار المقابلات في حضور أسرة مبارك!

د.الجنزوري: من نجاحات حكومته الثانية إلغاء ضريبة الأيلولة (ضريبة على تركة الأموات (تخيلوا!)) وإعادة ضريبة للعاملين في الخارج صدر حكم محكمة بعدم دستوريتها (وكانت سابقة أن تعيد الحكومة مالا للمواطنين) والأهم: سياسة خفض النفقات العامة و المبالغ الضخمة المخصصة للنثريات والمكاتب والمواكب وغيرها وهي الجزئية التي تحتاجها مصر الآن بشدة (وعشان كده لم يبق في الحكم كثيرا).

عموما أنا كمواطن مصري لا أحب أن يكون رئيس الوزراء واحد عمره ٧٧ سنة زي الجنزوري لأن الأفضل اختيار شخص من الثوار زي البرادعي و أهو عنده ٧٠ سنة بس.

إيه الكلام الغريب ده ؟

يعني عشان مبارك إستقبل البرادعي كذا مرة وأخد قلادة النيل .. يبقى فل من الفلول ؟

طب ما هو إستقبل زويل ييجي 100 مرة ... برضوا كده بقى فل ؟

الاغرب بقى ... يا سيدي الفاضل الإنسان المحترف والمخلص في عمله لا يجب أن يخلط بين عمله وعاطفتة .. بمعنى لو البرادعي لما كان مدير لوكالة الطاقة الذرية جه مصر في زيارة رسمية زي ما كان بيعمل .. وأستقبلة مبارك .. تفتكر هاتبقى من الحنكة إنه يكلمه عن الحقوق والواجبات والشعب والحريات ؟ ده كده يبقى كفتجي على فكرة

وبالتالي معظم تلك الأستقبالات كانت رسمية

بالمناسبة .. زويل بيعمل كده كموظف رسمي في امريكا ومستشار تعليمي لأوباما

وخلاص عشان كمال الجنزوري لغى جمارك الحجاج وحمد الله عالسلامة يا حج يبقى حد فذ ؟

بالمناسبة .. تعرف إن النهاردة النائب العام رفع إسمه من على قوائم الممنوعين من السفر ؟ ما هو كان ملطوط ... إن لم يكن بشكل مباشر .. يبقى عشان مصيبة توشكى اللي وحلنا فيها وقال اليومين دول إن هما اللي قالوا لي وأنا في حاجات ما كانش لي دعوة بها زي تخصيص أراضي مهولة لتوشكى من مبارك ويوسف والي مباشرةً متخطين الافندي الجنزوري وكأنه خيل مآتة ...

استقبال زويل كان في مناسبات بروتوكولية

مش زي د.محمد البرادعي الاستقبال كان مش بروتوكولي أو رسمي،

ده كانت العائلتان تتزاوران (البرادعي وأسرته لمبارك وعائلته)

وإلا فما صفة سوزان مبارك لتحضر هكذا اجتماعات لم تكن أصلا وسائل الإعلام تبرزها

[pink rose]

مش عارف مين قالي ان الجنزوري بيفكر يلغي معاهدة 36 وبيطالب بخروج الاحتلال الانجليزي من مصر

الكلام ده صحيح بجد ولا هزار

المداخلة دي جااااااااااااااااامدة جدي

[الباشمهندس ياسر]

http://www.egyptiantalks.org/invb/index.php?app=core&module=search&do=search&andor_type=and&sid=480e1750cfe30d190e765e454f3d6046&search_term=%C7%E1%CC%E4%D2%E6%D1%EC&search_app=forums&st=0

انا عملت بخث عن الجنزوري ف منتدانا و ملفتش حاجة تفرخ خالص

[ام سلمي]

مداخلة الجنزوري مع وائل الابراشي

http://www.youtube.com/watch?v=kT4ZfBxXlck&feature=related

[ام سلمي]

نتايج اجتماع المشير مع القوي السياسية ، مش فاهمة المجلس ده اختصاصه ايه ؟ وليه يدخل فيه اعضاء من المجلس العسكري اذا كان لسة السلطة الفعلية في ايدهم ؟

موسى: مجلس استشاري للمرحلة الانتقالية

كشف عمرو موسى المرشح المحتمل لرئاسة الجمهورية عن أن اجتماع المشير طنطاوي اليوم الأحد مع رؤساء الأحزاب والقوى السياسية ومرشحي الرئاسة قد انتهى إلى الإتفاق على تشكيل مجلس استشاري يضم في عضويته أقل من 50 عضوًا من ممثلي الأحزاب والقوى السياسية والشخصيات العامة والحركات السياسية والائتلافات الثورية.

وقال موسى إنه سوف يتم بحث تحديد اجتماع آخر للاتفاق على تفاصيل واختصاصات هذا المجلس والذي سوف يضم عضويته عددًا من أعضاء المجلس الأعلى للقوات المسلحة.

وأضاف أن المجلس الاستشاري سوف يتابع كل ما يخص المرحلة الانتقالية حتى تسليم السلطة وتحقيق كافة اهداف الثورة كاملة واحترام شرعية الدولة.

وقالت مصادر مطلعة أنه تم الاتفاق على نقل الحكم إلى سلطة مدنية في موعد أقصاه 30 يونيو المقبل وفقًا لما جاء في بيان المشير حسين طنطاوي الثلاثاء الماضي.

اقرأ المقال الأصلي علي بوابة الوفد الاليكترونية الوفد - موسى: مجلس استشاري للمرحلة الانتقالية

[ViralMind]

المجلس ده هو العضمة اللى رماها المجلس العسكرى لكلاب السياسة فى مصر... والله اعلم.

[se_ Elsyed]

منتهى التخريف والعك

يعني لو أي وزير عاوز ياخد قرار .. يبقى يبعت 50 دعوة لـ 50 شخصية وسيتنى على ما يجمعهم عشان يستشيرهم .. ويعمل زي المجلس السمكري كده ما بيعمل مع الناس من 10 شهور .. بعد ما يجمهم كمان سنة ويسمعهم .. يقوم رامي كلامهم في التواليت وشادد عليه السيفون .

[se_ Elsyed]

في أقل من ساعة سمعت ممدوح حمزه على ييجي اكتر من 4 برامج وهو فرحان إن دي أول دعوة توجه له لحضور الإجتماع مع كبارات البلد

ومن ضمن ما قاله إن المشير والمجلس اكد إن لا تراجع عن تعيين كمال الجنزوري رئيساً للوزراء وإن القوات المسلحة لن تقبل ضغطاً من أي أحد

وإن إختلافة مع البرادعي ينبع من مهاجمة البرادعي لثورة 52 ...

[ssmaly]

المجلس العسكرى لما بيحب يعين حد بيروح على قهوة المعاشات وينقى وزير ولا رئيس وزراء كبارة عنده خبرة فى القعدة على القهاوى ولعب الطاولة

(منصور باشا العيسوى وكمال باشا الجنزورى )

ولقب باشا تم بعد ان

انعم جلالة الملك فاروق الاول عليهم بهذا اللقب بمرسوم ملكى بتاريخ 1949

الله ..الملك ....المجلس العسكرى

[Abu Reem]

اليوم الجنزوري لا يفوتكم على قناة دريم 2 مع منى الشاذلي

- بصراحة الراجل جه انا كتبت اكثر من مرة اثناء فشل حكومة شرف انه افضل واحد عنده خبرة كافية الان في هذه المرحلة ليخلصنا مما فيه

وكان نفسي هذا الرجل ياخذ فرصة رئاسة الوزراء في ظروف افضل من كده

طبعا اثناء حكم مبارك واستطاع ان يغير الوضع في مصر لدرجة ان اصدقاء كثير من المغتربين في الخارج كانوا بيأكدوا لي انهم هينزلوا يشتغلوا في مصر لتحسن الاوضاع والمرتبات..

لكن طبعا مبارك فطسه...وتخلص منه كما تخلص من احمد رشدي

اتمنى انه يجد الدعم من الجميع هذه الفترة واتمنى لو نجح انه يستمر بعد الثورة

واتمنى ان اي حد يتصدر لموقع المسئولية في مصر سواء كان رئيس او رئيس وزراء او نائب برلماني ان احنا نحاول نساعده وان نحاول ان ننشر افكارنا ومطالبنا وفي نفس الوقت ننشر ما لا يرضينا..حتى يصلح من نفسه ويتعرف على مشاكلنا بدل مسألة التخوين وتثبيط الهمم....

واحنا لا يهمنا سوى ان نرى الافعال..سواء له صلاحيات ليس له صلاحيات ...فلنا ان نرى تصرفه وافعاله...ثم نحكم بعد ذلك...

تم تعديل 27 نوفمبر 2011 بواسطة Abu Reem

[hanzalah]

وقد تفضل جلالته ووافق على المطلبين

مش عارف ليه نطت ف بالي الجملة الشهيرة دي

يعني المجلس السمكري يقول على لسان ممدوح شاهين بجريدة الاهرام

http://gate.ahram.org.eg/News/142020.aspx

العسكري تولى السلطة بزواج رسمي والفائز بأغلبية البرلمان لن يشكل الحكومة

وأضاف حل الحكومة القائمة بمجيء مجلس شعب جديد غير صحيح

وتشكيل الحكومة من سلطات رئيس الجمهورية بحسب الاعلان الدستوري

يا اخي إذا لم تستحي فافعل ماشئت والله

والاغرب

ان يخرج علينا بافتكاسه مجلس استشاري من خمسين طربوش

طب قول مائة ولا حتى خمسماية ماهي الطرابيش كتير وكلهم بيسبحوا بحمد السمكري وطالبين الرضى

من اجمل تعليقات القراء على الخبر الكارثي في الاهرام

اللهم اكفني شر اصدقائي

فعلا المجلس السمكري زي الدبة التي قتلت صاحبها

المفروض انه نحط على بقهم بلاستر حتى نهاية يونيو القادم لان ضغط الشعب المصري بيرتفع كل ماحد ينطق منهم

ربنا يرحمنا من حكم العسكر

على فكره

معتز قال ملاحظة جميلة في حلقة مساء أمس

انتوا واخدين بالكوا ان فرنسا عملت ثورة واحدة وان امريكا عملت ثورة واحدة وان الارجنتين عملت ثورة واسبانيا وغيرها

امال احنا عندنا سبعه وعشرين ثورة ليه في تاريخ مصر

لانه باختصار ولا ثورة منهم اكتملت وحققت أهدافها

وربنا يستر على ثورة يناير من ÷ل المصالح والاحزاب العبيطه

أهل السياسة عاوزين ياكلوها ف كروشهم ويطلع الشعب المصري نقبه على شونه

ربنا يستر

وكمان شيء يدل على حمق من يناصرون العسكر ويوضح غباءهم السياسي الذي لايحتاج إلى بيان

أن أدمن صفحة المجلس السمكري عمل إضافة لصفحة كلها عيال خايبه تشتم في الثوار

اسمها في تي في

فلما انتبه الشباب وهاجموه قام بالغاء الاضافة

فعلا والله لا تصاحب أحمقاً فإنه يضرك من حيث يظن أنه يفيدك

[good person]

اغلب مؤيدى المجلس العسكرى هم عائلات الظباط و اسرهم و الضباط المتقاعدين هم مش قليلين

[moamana]

انا بئه نفسى الجنزورى يفشل لانى اتخانقت مع جوزى حته خناقة بسببه هو عايزة و انا بقوله ده اكبر من جدى و جدك :protest:

و بقالنا3 ايام متخاصمين فنفسى اشمت فيه قريب اوى لما يببوز الدنيا و الله ساعتها بس هفرح فى جوزى لانه برده كان مع نعم فى الاستفتاء الدستورى

:waving: :blush2: :waving: :blush2:

:cheer:

و محدش يفهمنى غلط \ه برده كله عشان مصر :) :) :)

[good person]

المجلس ده هو العضمة اللى رماها المجلس العسكرى لكلاب السياسة فى مصر... والله اعلم.

انا معك تماما

المجلس بيلعب على فرقة واختلاف القوى السياسية و غبائها و على قسم الشارع المصرى

[pink rose]

انا بئه نفسى الجنزورى يفشل لانى اتخانقت مع جوزى حته خناقة بسببه هو عايزة و انا بقوله ده اكبر من جدى و جدك :protest:

و بقالنا3 ايام متخاصمين فنفسى اشمت فيه قريب اوى لما يببوز الدنيا و الله ساعتها بس هفرح فى جوزى لانه برده كان مع نعم فى الاستفتاء الدستورى

:waving: :blush2: :waving:

:cheer:

و محدش يفهمنى غلط \ه برده كله عشان مصر :) :) :)

روحي يا بنتي صالحي جوزك الله يهديكي

هو اللي باقيلك

و بلاش الحجج دي قال تخاصم جوزها عشان مصر قال

ايه الحريم اللي مش عارفه مصلحتها دي :blush2:

تم تعديل 28 نوفمبر 2011 بواسطة pink rose

[se_ Elsyed]

انا بئه نفسى الجنزورى يفشل لانى اتخانقت مع جوزى حته خناقة بسببه هو عايزة و انا بقوله ده اكبر من جدى و جدك :protest:

و بقالنا3 ايام متخاصمين فنفسى اشمت فيه قريب اوى لما يببوز الدنيا و الله ساعتها بس هفرح فى جوزى لانه برده كان مع نعم فى الاستفتاء الدستورى

:waving: :blush2: :waving:

:cheer:

و محدش يفهمنى غلط \ه برده كله عشان مصر :) :) :)

روحي يا بنتي صالحي جوزك الله يهديكي

هو اللي باقيلك

و بلاش الحجج دي قال تخاصم جوزها عشان مصر قال

ايه الحريم اللي مش عارفه مصلحتها دي :blush2:

يا نهار مش فايت ؟؟؟؟

يعني تتخنقي مع الأفندي بتاعك ... ومصر تضيع في النص

مصر بتضيع يا وديع ....