مباراة الاهلي والزمالك

[Tamsite]

على غرار اعلانات رمضان :

--------------------------------------------------

: الزمالك شباكه مترقّعة

: اشمعنى

: الأهلي قطعها بالأربعة

كركركركر هاهاهاهاهاهاهاه

---------------------------------------------------

: دي مترقعة من كل حتة

: اشمعنى

: دول أربعة و قبليهم ستة

كررررررررررررركركركركركر هاهاهااهكركركركرهاها

---------------------------------------------------

كل سنة و انتو طيبين :blink:

[se_ Elsyed]

تحية خاصة جدا ليك يا س س  :blink:

مسا التماسي يا عم Tamsite .. ربنا يملا أيامنا كلها فرح

- بس عايز أقول حاجة مهمة .. وهي إني وإقسم بالله لم أحاول إهانة او السخرية من أي زميل حتى لو كان زملكاوي .. كلنا في النهاية إخوات وده موضوع خفيف وبسيط ومافيهوش زعل لأن التعصب والإفراط في أي حاجة مش كويس وبيبقى تطرف والعياذ بالله .. اللهم اجعل كلامنا خفيف على بوش بدل ما يحرك قواته وتحاصر النادي الاهلي وتدك حصونه ..

Hard Luck لكل الزملكاوية .. وهي الدنيا كده .. يوم مغلوب .. وبرضوا يوم مغلوب :P

خد الحتة اللي جاية دي يا كابتن tamsite ( إسمك معناه إيه صحيح بالمناسبة ؟ )

جريدة المساء .. في تعليقها على المذبحة البشعة التي أرتكبها مجرمو الحرب الأهلاويه ..بالتعاون مع الحكم التركي أوغلو أغا ... آمان يا ربي آمان ..

ممنوع الاقتراب

.. أما الجماهير الغاضبة فلم تستطع مجرد الاقتراب من النادي بعد أن تم فرض كردون أمني حول بوابات النادي وأسوار لم يمكن احد سوي الأعضاء من المرور ودخول النادي.. والجماهير التي تجمعت بالقرب من النادي لم توجه اللوم والتقصير لأي لاعب بل أنها قامت بتحية بعضهم.. وصبت غضبها علي دراجوسلاف.

[mohamed]

امبارح بعد الماتش وحتى الفجر احتفلت جماهير النادى الاهلى فى شارع عباس العقاد_ كما اعتادوا على ذلك بعد كل نصر لفريقهم العريق_ بهذا النصر الماحق وقفلت الجماهير الغفيرة الشارع وظلوا يحتفلو حتى الفجر والزملكاوية واقفين فى البلكونات منظرهم وحششششششششششششششش

الناس كلها تحت بتهيص قام واحد زملكاوى لا ينطبق عليه لفظ غير انه بجح

قام جايب علم كبييييير للزمالك وعمال بيلوح بيه كما المنتصر :blink: :D

قوم جماهير الاهلى الفرحانة وقفت له تحت العمارة وزفوووووه وشوية كانو هيطلعو له العمارة يموتوه اه والله :D me0: s-:

وقامت الجماهير الاهلاوية بحرق اعلام الزمالك :P وترديد الشعارات والهتافات الجامدة جدا :lol:

محمد

مراسل الكتيبة الحمراء من م نصر

[Tamsite]

- بس عايز أقول حاجة مهمة .. وهي إني وإقسم بالله لم أحاول إهانة او السخرية من أي زميل حتى لو كان زملكاوي .. كلنا في النهاية إخوات وده موضوع خفيف وبسيط ومافيهوش زعل لأن التعصب والإفراط في أي حاجة مش كويس وبيبقى تطرف والعياذ بالله ..

Hard Luck  لكل الزملكاوية .. وهي الدنيا كده .. يوم مغلوب .. وبرضوا يوم مغلوب  :blink:

ما فيش خلاف أبدا على كلامك ده ،

و أهي تبقى فعلا فرصة الواحد يضحّك شوية مع باقي الناس أهلاوية أو زملكاوية أو حتى مالهومش دعوة بالكورة من أصله ،المهم التهريج ما يقلبش جد و عصبية و خناق

و تبقى فترة راحة شوية من المواضيع الدسمة و الأحداث المؤسفة المحيطة بنا من كل جانب ،

ما علينا ، احنا هنقلبها غم ليه ؟ ، نكمل باقي طقوس الأفراح و الليالي الملاح

طب خد عندك انت دي بقى :

-------------------------------------------------------------

اعلانات رمضانية :

-------------------

: يا زمالك ده يوم مهبب

: اشمعنى

: ده اللي ربعنها عماد متعب

كركركركرك هرهرهره هاهاهاهاهاكركركركر

-------------------------------------------------------------

[kotoz9]

هو اتحاد الكرة بتاعنا مايعرفش يعمل حاجة ابدا نقوله يجيب حكم اجنبى يروح جايب حكم بيسبول :P

المهم ان انا طول الماتش مش مطمن وخصوصا بعد ضربة الجزاء التانية للزمالك شعرت انه فى اى لحظة حيروح قالع البروكة ويشير للكاميرا ويقول :"ضحكت عليكم ..احنا برنامج ادينى عقلك..حتقولوا نذيع حنذيع" :blink:

لأ وفى الاخر الاهلى راشى الحكم والله لولا الحكم لكان الزمالك خرج بفضيحة5ـ0على الاقل يالا معلش خيرها فى غيرها ويعنى الزمالك حيروح مننا فين ان شاء الله نعوضها فى الدور التانى :D

[sad_swing2000]

بالمناسبة ... مازال التليفزيون المصري يضرباً مثالاً رائعاً للبيروقراطية وقلة الذوق وإنعدام الدم ... فهاهو يُسند مبارة هامة مثل هذه للمخرج الفذ " يسري مرزوق " ويُكيل له المعلقون المديح وحمد لله عالسلامه ياريس وبركة اللي رجعت لنا بالف سلامه وإن شالله العدوين .. ليمتعنا بكل فنون الإخراج النشاز لما جاب لنا شلل رعاش من تركيزة على لقطات خايبة وتصويره لأي واحد مالوش لازمه معدي على الكوبري اللي قدام إستاد الكلية الحربية .. ويكفي ضربة الجزاء الاولى للنادي الاهلي التي تركها وكان بيعمل حاجات تانية إحنا مش فاهمنها ...

وبجد بجد لازم وقفه مع هؤلاء المعاتيه .. ما بين محمد نصر الدين اللي بقى مخرج في كل قناة وكل برنامج رياضي وهو معروف ومشهور بتحيذة السافر للنادي الاهلي .. وما بين يسري مرزوق الذي بلغ من العمر أرذله وبقى محتاج يتخرج ...

بجد حاجة تقرف .. ونفسي واحد فيهم يغلط مرة ويتفرج على إخراج ماتش خليجي بلاش أوروبي عشان ما نهيجش الناس عليهم ويقتلوهم رمياً بالأحذية .

أي و الله يا س س ، أنا طول مابتفرج ع الماتش إمبارح عمال أدعي ع المخرج العبقري ده. و دي كانت الحاجة الوحيدة اللي عكننت عليا ماتش امبارح. المخرجين و المصورين بتوعنا محتاجين إعادة تأهيل .

بس يا جماعة أنا بردو - رغم الفرحة العارمة اللي ما ضيعهاش غير الجون التاني للزمالك - قلقان من الدفاع بتاعنا. ده حتى النحاس اللي كنت بقول عليه أحسنهم ، عمل حركات غريبة امبارح.

[homer]

متهيأ لى عبد الحليم هرش الموضوع قل لى ازاى أقول لك ازاى

لاحظ أن هناك تعارض مصالح بين الحكم "التركى" و ابو "تريكة" شوف التحيز :angry:

معلش الظاهر انى اتعديت من الزمالكاوية اللى جنبى

[se_ Elsyed]

حالياً بالمكتبات ومع الباعة الجائلين ومكتبة مدبولي الصغير وسمير وسمير بالمغربلين ..

صدر عن دار النشر بالنادي الأهلي الكتب والموسوعات الآتية :

1- كتاب الطرق والمسالك في دفاع الزمالك

2- كتاب الظلام الحالك لمستقبل النادي الزمالك

3- مرثية : ما كنش يومك يا سبعي .. تأليف الهربان بشير التابعي

4- موسوعة : المدربين الأجلاف ... تأليف ستيبي دراجوسلاف .

5- ملخص : الموقف المؤسف ... لمحمد عبد المنصف

كما يعرض الآن وبنجاح ساحق المسلسل الرمضاني : الدم والنار والسبيرتو " بطولة أبو تريكه وبركات وجلبيرتو .

كما أزف بشرى سارة لعشاق النادي الاهلي بإن دار الأوبرا المصرية سوف تعرض قريباً أوبريت " العَشرة الطيبة " بقيادة المايسترو مانويل جوزية بالإشتراك مع كورال الأطفال بالناي الأهلي .

[Ahmed Mohsen]

مبروك للأهلي وللأهلوية

تهنئاتي الحارة لكم بهذا الفوز العزيز الذي طال إنتظاركم له.

بس أحب أفكركم ....... في يوم من الأيام من حوالي 900 يوم كده ... الأهلي كسب الزمالك 6/1 وكانت نتيجة قياسية وصمتم بعديها 900 يوم لغاية ما قدرتوا تفوزوا تاني

يا تري المرة دي هاتستنوا قد إيه .... 900 يوم تانيين واللا أقل شوية؟؟؟؟

بس يعني كلمة حق لازم تتقال .......

الزمالك إتاخد غسيل ومكوي ونفد بالعافية من فضيحة مدوية ......

الحمد لله إن النتيجة وقفت عند أربعة ببركة خناقة عبد الحليم اللي أنا شايف إنه ضحي بنفسه (باعتبار إنه المفروض يتوقف مدة محترمة) عشان خاطر يموت الماتش ويوقف الفضيحة.

وعلي رأي زعيمنا الملهم محبط المحبطاوي ....

ربنا يعين الزملكاوية علي ستيبي المنكوش وعبقرية الفنكوش

تم تعديل 6 نوفمبر 2004 بواسطة Ahmed Mohsen

[Scorpion]

هو كان فيه ماتش بين الأهلي و الزمالك ...

و كمان خسرنا بالأربعة ...

إخص ... إخص... الله يخرب بيت الكنترول اللي فوتللي النتيجة الفالصو ...

و لكن هيهات .. كله كذب في كذب ... و قوات العروج الأهلوية لم تمس دوبارة من شبكة مرمانا ...و الزمالك سيظل دائمآ حرآ أبيآ ... و ميت عقبة ستظل دائمآ مقبرة الغزاة ... و مازالت تماثيل حلمي زامورا تملأ ميادين العاصمة ( مش هو برضه رئيس نادي الزمالك ) .. و اعلامنا البيضاء ترفرف فوق جميع أقسام الشرطة.. و عاش نادينا المبجل .. نحن نعيش احلي ايام الديموقراطية الكروية ..

سكوربيون الصحاف ياور أول مصحة باليرمو حيث هبطت عدالة السماء

عالعموم و بقلب ابيض عليه خطين حمر .. أهني الأخوة المحاوراتية فقط بفوز الأهلي ..

و ارجع اقول ( يا سي السيد ) هوه هوه الأهلي .. او حتي مأمأته .. الزمالك حيفضل دايمآ زمالك ...

لو حد لقي جونيور قولوله يرجع البيت .. خلاص الحالة راحت و مش حعضه ..

[se_ Elsyed]

حمد الله عالسلامه يا سكوب ... والله وعلاج الكهربا جاب معاك نتيجة ..منننننننننننور .

الغريب بقى يا جماعة إن واحد صديق - أهلاوي طبعاً - لسه متصل بي من شوية وبيقولي تصور من بعد الماتش مش لاقي ولا واحد زملكاوي في البلد.. فقولت له والله نفس اللي حصل معايا .. هما طفشوا وسابوا البلد ولا في إيه ؟.. دول بقوا شحين في السوق قوي .. فقال لي بس انا عندي لك هدية ... قلت له قول يا وش الخير ولك الحلاوه - او الجبنة - قالي لي لقيت إتنين زملكاوية في الرياض هنا ومسكتهم قطعتهم .. فقلت له طب ما تباصي واحد لأخوك س س الغلبان .. قفال لي ما هي دي الهدية .. وسيبتوا جايلي في الطريق دلوقت ومع الكائن الزملكاوي الغريب عشان ناوي اعمل فيه عمايل fsh:: fsh:: fsh:: .. اول حاجة هاتصور معاه وانا رافع إيدي فوق راسه بعلامة النصر .. لأنه ممكن الزملكاوية نصبح الصبح نلاقيهم إنقرضوا فبالتالي يبقى عندي ذكرى مع واحد كان زملكاوي .. ثاني حاجة هاقعد اتكلم معاه كلام اخ لأخوه .. كلام صديق لصديقه .. كلام ناس بتفهم في الكورة وأشوف إنطباعاته عن الماتش بدون أي تهديد أو ضغط .. يعني مش هامد إيدي عليه .

[disappointed]

أولا : مبروك لفريق النادى الأهلى الفوز و الأداء... فقد فاز الفريق الأفضل فنيا و الأجهز بدنيا و الأكثر إكتمالا بشريا و الأكثر دوافع معنويا و الأكثر إستقرارا إداريا

بالمختصر المفيد : فاز الفريق الأفضل الذى كان يستحق الفوز

ثانيا : هارد لك لفريق الزمالك (لاعبين و جمهور فقط..... إدارة و جهاز فنى لأ)....فقد كان اللاعبين عند حسن الظن بهم و أدّوا مباراة قتاليّة لم يبخلوا فيها بجهدهم و إن لم يكن ذلك كافيا للتغلّب على عثرات عديدة من أهمّها:

- هبوط اللياقة البدنيّة نتيجة القصور الشديد و التخبّط و عدم الإستقرار فى فترة الإعداد قبل بداية الموسم (بدليل أن الزمالك كان هو الأخطر فرصا فى الشوط الأول خاصة فرصتى حمزه و حليم الهائلتين ناهيك عن فرصة عبد الهادى الثمينة فى بداية المباراة)

- تقصير الإدارة فى إستقدام لاعبين من الوزن الثقيل فى المراكز التى يعرف الجميع أن الزمالك يعانى منها ( وذلك نتيجة قصور الإمكانيّات المادّية التى لم تستطع مجاراة الأهلى فى سياسة الــ"كاش آند كارّى" و لعبة الإغراء المادّى للاعبين آتين من قاع المجتمع بالأساس ولا يحرّكهم شيئ سوى المادة فقط)

- التفانين و الإختراعات و التجارب المعمليّة الفذّة من جانب المدير الفنى السيّد دراجوسلاف , والإمكانيّات المتواضعة للجهاز الفنى المعاون له

- سوء التوفيق و معاندة الحظ بصورة غير طبيعية للفريق منذ بداية الموسم , حيث لم يكتمل تشكيل الفريق فى مباراة واحدة توحّد الله.... وعلى سبيل المثال فإن الزمالك كان ينقصه فى مباراة الأهلى أمير عزمى الذى أصبح المسّاك الأساسى و لكنه غاب نتيجة إرتفاع مفاجئ فى درجة الحرارة , وتامر عبد الحميد صاحب الدور المعلوم فى وسط الملعب و الذى غاب للحصول على 3 إنذارات , و حسام زينهم الذى كانت النيّة تتجه لإنزاله للعب على جيلبرتو بإعتباره قادرا على إيقاف خطورته بواسطة بنيانه القوى و إلتحاماته القويّة و إنقضاضه السريع خاصة و أن قصوره المهارى لم يكن مهما نظرا لعدم إتجاه النية لمطالبته بعمل واجبات هجومية , ولكنه أصيب بإرتجاج فى المخ فإنقلبت الحسابات رأسا على عقب , و كذلك غياب المهاجم المشاكس الحيله "مارك إمبواه" الذى كانت النية تتجه لإشراكه ليقوم بالهد فى دفاع الأهلى و إتعابه لفتح الطريق لعبد الحليم و حمزه..بالإضافة بالطبع لغياب حازم إمام و عبد الواحد السيّد للإصابة و عدم إكتمال شفاء طارق السعيد و مدحت عبد الهادى اللذين لازالا يلعبان بمشاكل فى الركبة ( وكلّهم من قوام الفريق الأساسى ويمثّلون عدديا أكثر من ثلث و مايقارب من نصف الفريق)...فى الوقت الذى دخل الأهلى فيه المباراة مكتمل الصفوف ماعدا إستبعاد أحمد بلال و إسلام الشاطر و خالد بيبو (إختياريّا) ولأسباب فنّية نتيجة وجود من هم فى مستوى أعلى منهم حاليا و ليس لظروف قهريّة

- سير المبارة الذى دلّل السيناريو الخاص بأحداثها أن التوفيق و إبتسام الحظ أبعد مايكونا عن الزمالك , خاصة فى سير الأحداث خلال الــ30 ثانية التى تلت عودة الزمالك للمباراة بعد أن أصبحت النتيجة 2/1 ليكتشف الزمالك أنه قد خرج منها ثانية بعد نصف دقيقة بضربة جزاء الأهلى ( وهو ما يهدّ معنويّات أعتى فريق ويصيبه بإحباط شديد)

و الآن لى بعض المداخلات (ياريت يتم التمعّن فيها وفى معناها جيّدا) :

- أثبت جمهور الزمالك فى هذه المباراة ما كنّا نقوله دائما نحن الزملكاويّة من أنه هو جمهور الصفوة و النخبة المثقفة المتعلّمة الواعية المحترمة و كريمة الكريمة فى مصر..... جمهور الزمالك ظل يؤازر فريقه حتى بعد أن أصبحت النتيجة 4/1 و إزداد تشجيعا للاعبيه فأسفرت المساندة عن تعديل شكل النتيجة إلى 4/2 فى ظل ضغط مكثف للزمالك فى آخر 10 دقائق ... ورغم أن النتيجة قد تبدو ثقيلة نوعا ما , و رغم أن الهزيمة محبطة و مخيبة للآمال و تعنى تضاؤل فرص الحفاظ على درع الدورى , إلاّ أن جمهور الزمالك كان عظيما و راقياً بحق عندما نادى على لاعبيه بعد المباراة و صفّق و هتف لهم كثيرا فى مشهد حضارى جعل لاعبى الزمالك فى قمة التأثر و الإمتنان لجماهيرهم ( أدعو الجميع لمقارنة هذا الموقف بموقف جمهور الأهلى من فريقه فى مباراة الزمالك و الأهلى التى إنتهت بفوز الزمالك 2/1 بهدفى حازم إمام عندما قامت جماهير الأهلى بسب لاعبيها بأقذع الألفاظ و رميهم بالزجاجات و الطوب للدرجة التى إستدعت تدخل الأمن المركزى فى المدرّجات - رغم أن الأهلى كان قبل تلك المباراة بأيام معدودة قد أزاح الترجى التونسى من طريقه فى بطولة أفريقيا فى موقعة مشهودة بملعب المنزه بتونس العاصمة-........ ولعل فى المقارنة ما يفسّر لماذا سيظل جمهور الزمالك يشعر بأنه من حقه أن يرى نفسه متميّزا و معبّرا عن شريحة الصفوة فى هذه البلد)

- الإستفتاءات فى مجال توقع نتائج مباريات الكرة على مستوى الجماهير إنما تعبر عن تمنيات المشارك فى الإستفتاء لفريقه بالفوز أكثر من كونها معبّرة فى المجمل عن توقعات منطقية أو فنية...... و أدعو الجميع لتأمّل هذه الظاهرة التى رصدتها فى ليلة ماقبل المباراة :

إستفتاء القناة الثالثة مع الجماهير فى الشارع : 65% الأهلى يفوز و 35% الزمالك يفوز

إستفتاء إذاعة الشباب و الرياضة عبر الهاتف : 68% الأهلى يفوز و 32% الزمالك يفوز

إستفتاء برنامج القاهرة اليوم على قناة "اليوم" لشبكة قنوات أوربت الفضائيّة عبر الإنترنت و بالفاكس أو عبر مكالمات دوليّة إلى رقم هاتف التصويت بقبرص : 71% الزمالك يفوز و 29% الأهلى يفوز

و الظاهرة ترصد بالطبع نسبة مشجّعى الأهلى الأعلى فى الأوساط الإجتماعية التى تترجّل فى الشارع و تستقى ترفيهها من الراديو , بينما ترصد نسبة مشجّعى الزمالك الأعلى فى الأوساط الإجتماعية و الثقافية التى تشترك فى قنوات الأوربت و تقوم بالتصويت عبر الإيميل و الفاكس و المكالمات الدوليّة........ من الآخر يعنى..... الظاهرة ترصد بجلاء واضح أن جماهير الزمالك هى جماهير الصفوة على المستوى الإجتماعى و الثقافى و تبرهن على ذلك بالأرقام و بصورة إحصائيّة بحتة

- فى نفس هذا التوقيت من العام الماضى و فى الأسبوع الثامن من المسابقة كانت الظروف معكوسة.... كان الأهلى يعانى مع مديره الفنى "تونى أوليفيرا" و كانت نتائجه متدنية كما هو الحال مع الزمالك هذا الموسم.... ولكننى أدعو الجميع لتأمّل الفارق بين تأثير هذه الظروف المحيطة على كلا الفريقين..... فالأهلى فى تلك الظروف بالأسابيع الثمانية الأولى من المسابقة تراجع للمركز السادس و خسر 4 مباريات و أصبح ملطشة و مهلهلا بمعنى الكلمة (حيث خسر فى بطولة أبطال العرب 4/0 من الإسماعيلى و فشل فى تحقيق أى فوز على ملعبه) ولم يستطع إفراز أى وجه جديد.... بينما الزمالك لازال متماسكا و واقف على رجليه , حيث لم يخسر سوى مباراة واحدة فقط (هى مباراة الأهلى) و لم يتدنّى موقعه فى الجدول لأقل من المركز الثانى , و حقق فوزا ذو مغزى على الإسماعيلى فى عقر داره , و أفرز وجوها ناشئة جديدة فى تشكيلته حيث أعطى الفرصة لأمير عزمى و أحمد بكرى و إعتمد على شيكابالا..... كل ذلك رغم أن الزمالك هذا الموسم قد باع لاعبين أكثر ممّا إشترى و عانى من إصابات و إيقافات بالجملة لعدد كبير من لاعبيه المؤثرين و الأساسيين و الذى إقترن بعدم إكتمال شفاء عدد آخر من الأساسيين , بينما كان الأهلى فى فترة معاناته فى العام الماضى لا يعانى من أى غيابات و لم يقم بيع أى لاعب سوى حسام غالى بينما إستقدم 6 لاعبين جدد

- من واقع الملحوظه السابقة فإن الزمالك سيحتاج للتعاقد مع 3 لاعبين على الأكثر (ظهير أيمن و لاعب إرتكاز على الدائرة و سترايكر صريح) و الذين سينخرطون مع باقى اللاعبين العائدين من الإصابة فى ظل متوسط أعمار الفريق التى لا تزيد الآن عن 23 عام و تضم توليفة من الناشئين و جيل الوسط و لاعبى الخبرة , وهو ما يدل على أن الزمالك فعلا فى مرحلة تغيير جلد و إعادة هيكلة الفريق بإحلال و تبديل يحافظ على متوسط أعمار الفريق..... بينما الأهلى ظل يردد مقولة أنه يبنى فريق لعدة سنوات و كانت مقولة كاذبة..بدليل أنه فى النهاية قد إشترى فريقا جاهزا من لاعبين مستويين و ذوى إسم و ناضجين و دوليين و خبرة بالفعل و لم يبنيه... و انا أسمع عن عملية نقل كلية أو قلب من بنى آدم لبنى آدم...لكن أول مرة أسمع عن عملية نقل بنى آدم لبنى آدم...... ولذلك أقول أن طفرة الأهلى كبيرها العام القادم و تبدأ جذوتها المشتعلة فى الإنطفاء

- فوز الأهلى على الزمالك هو تأكيد و ترسيخ لدور المادّة و التمويل فى الرياضة و ترويج لمقولة "بفلوسى يا كلاب"......فالفريق الذى يبيع لاعبيه من أجل تدعيم موارده ليس من المنطقى مطالبته بقهر الفريق الذى دفع 15 مليون جنيه خلال عام واحد فقط فى شراء لاعبين لتدعيم نفسه... و علينا أن نرفع القبّعات لنادى الزمالك الذى حصد فى الخمس سنوات الماضية 9 بطولات مابين محلية و عربية و أفريقية منهم 3 دورى فى آخر 4 بطولات رغم أن النادى كان محجوز عليه و مديون و مرفوع عليه قضايا إشهار إفلاس و بيدعو جماهيره للإكتتاب لدعم النادى حتى يستطيع تجديد عقود لاعبيه .... و سبب رفع القبّعة بالطبع هو أن الزمالك حصد كل هذه البطولات بينما الأهلى بيتفرّج عليه و يتحسّر رغم أن ميزانيّة الأهلى التى أعلنها الخطيب منذ أسبوع تبلغ 155 مليون جنيه مصرى

- حالة الفرحة الهستيريّة المبالغ فيها ( والتى تصل إلى درجة التشفّى و الإنفعال الزائد وشدة الرغبة فى الإنتقام و إثبات الذات و رد الكرامة و الإعتبار) الواضحة من جانب جماهير الأهلى , و حالة النشوة البالغة التى يشعر بها جمهور الأهلى و التى جعلت سى السيّد مثلا يتفرّغ لهذا التوبيك فى اليوم التالى للمباراة.... هذه كلّها ظواهر مفهومة فى ظل الكبت والإحساس بالرغبة العارمة فى رد الإعتبار أمام فريق ظل يفوز على الأهلى دون أن يستطيع الأهلى الرد عليه بأى إنتصار لأكثر من 1000 يوم , بالإضافة إلى فوز الزمالك على الأهلى فى آخر 3 لقاءات متتالية فى الدورى (رايح جاى الموسم الماضى و مباراة الدور الثانى فى الموسم الذى قبله)... وهو رقم قياسى جديد يضاف لأرقام الزمالك القياسيّة التى أصبحت هواية لديه... و الغريب أن جماهير الزمالك لم تكن بمثل هذه الهستيرية و هى ترى فريقها يدهس الأهلى رايح جاى , أو وهى ترى أن العادى أصبح هو فوز الزمالك على الأهلى....... و الأكثر غرابة أن جماهير الزمالك هى التى كان من المفترض أن تكون ردود أفعالها عن الإنتصار على الأهلى عنيفة نظرا لرغبتها فى رد إعتبارها بعد مباراة الــ6/1 الشهيرة..... ولكنها مع ذلك كانت متزنة فى تعاملها مع الفوز على الأهلى....... و لاأجد ما أقوله لجماهير الأهلى سوى أن الجماهير التى لايشفى غليلها تجاه فريق آخر الفوز عليه بنتيجة تاريخية كالــ6/1 هى جماهير لا أمل فى أن نراها يوما تتواضع عند النصر و تبتسم عند الهزيمة ( هذه تحتاج لأن تكون جماهير من الصفوة brth) )

- رؤوس الزملكاوية أصيبت بالصداع من كثرة ترديد كلمة الـ6/1 و كأن جمهور الأهلى قد أصبح كالمريض بداء الــ"إيكو-لاليا".. وهى حالة مرضية تصيب مركز الكلام فى المخ فتجعل المريض غير قادر على السيطرة على نفسه و منع لسانه من ترديد أى كلمة يقولها لعدة مرات لاشعوريّا........ و لعل ما يثير الضحك هو أن الأهلى قبل مباراته الأخيرة مع الزمالك لم يكن قد فاز على الزمالك فى الــ10 لقاءات الأخيرة سوى مرة واحدة فقط (اللى هية بتاعة الــ6/1) و تعادل الفريقان 3 مرّات و فاز الزمالك 6 مرّات.... يعنى بالعربى الفصيح إذا كان الأهلى فاز على الزمالك 6/1 فى مباراة من الـــعشر الأواخر فالــ6/1 الحقيقيّة هى فوز الزمالك على الأهلى بــ6 مباربات مقابل واحدة فقط... و إن جيتم للحق فالــ6/1 الأكبر هى فوز الزمالك على الأهلى فى الأربع سنوات الماضية على صعيد البطولات بنسبة 6 بطولات لواحدة فقط ( وهى نسبة ترتفع لأكثر من ذلك فى حالة إحتساب السوبر المصرى السعودى الذى فاز بكأسه الزمالك)

- يتحدّث الأهلاوية عن نتيجة 4-2 و كأنها نتيجة مخجلة أو مذلّة أو ثقيلة رغم أنها فى النهاية فوز بفارق هدفين..يعنى زيها زى 2-0 أو 3-1 , و من المعروف بالطبع إن الزمالك فاز على الأهلى 3-1 مرتين فى الثلاث سنوات الأخيرة ( ولم يراها جمهور الزمالك ثقيلة..... فهو جمهور متزن - وهذا شيئ طبيعى فى سلوكيّات الشريحة الإجتماعية و الثقافية التى تمثل غالبية أنصار الزمالك- )

- قصّة لطيفة جدّا يرويها لنا الزميل الفاضل محمد ( وهى قصة لها مغزى خصوصا عند ربطها بقصة أخرى سأحكيها انا لاحقا)... القصة بتقول إيه بقى:

الناس كلها تحت بتهيص قام واحد زملكاوى لا ينطبق عليه لفظ غير انه بجح

يا ساتر يارب lo::

ربّا يكفينا شر البجاحة و التبجّح

خير كفى الله الشر

عمل إيه الزملكاوى البجح ده؟؟؟

قام جايب علم كبييييير للزمالك وعمال بيلوح بيه كما المنتصر

لا....

ماعندوش حق

إيه البجاحة دى؟؟؟

إزاى الزملكاوى المتحضّر الراقى (البجح) ده يعلن عن مساندته لفرقته و التمسّك بتشجيعها و الإفتخار بالإنتماء ليها و الإعلان عن هويّته فى عز الإندحار و الإعلان عن وقوفه مع فريقه و مرارة الهزيمة طازه فى حلقه؟؟؟!!! (واضح من الوصف إنه عمل هذه البجاحات و التجاوزات فى بلكونة بيته)

لا..لاااااا..... دى بجااااااحه.... ولازم كان يقام عليه حد الحرابة و يقتل تعزيرا بإعتباره من المفسدين فى الأرض.... بس عموما جمهور الأهلى عمل الواجب برضه :

قوم جماهير الاهلى الفرحانة وقفت له تحت العمارة وزفوووووه وشوية كانو هيطلعو له العمارة يموتوه اه والله

بس يظل التساؤل قائما حول العلاقة بين الفرحة و الرغبة فى التعبير عنها و بين هذه التصرّفات الأخلاقيّة الراقية (اللى مش بجحه و مش سوقيّة ولا غوغائيّة)

ثم إنه مافيش داعى كنت تحلف...... مصدّقك و الله..... وهيّه التصرّفات دى أساسا محتاجه حلفان علشان نصدّق إن جمهور الأهلى المعتاد على الإتيان بها بيعملها؟؟؟؟ rs:

إييييه..... أيّام.... فكّرتنى بواحد إسمه محبط كان لسّه زغلول كده فى أولى إعدادى و راح الإستاد فى ماتش الزمالك و الأهلى فى آخر الدورى و كان لازم الزمالك يكسب علشان يكسب الدروى , وبعد أن سجل حسن شحاته هدفا لم يعترض لاعبو الأهلى عليه من الأساس تم إلغاء الهدف بواسطة محمد حسام براية متأخرة 10 ملايين سنه ضوئيّة من مساعده عبد الرؤوف عبد العزيز و تم إهداء الدورى للأهلى و تسليكه من أحضان الزمالك عينى عينك بطريقة فاجرة... فمحبط الصغيّر حس بإنه فخور بفريقه , وحس إنه محتج و رافض و غضبان من الظلم , و حس إن فريقه هو البطل الحقيقى مهما يقولوا العزّال... فقرر يمشى على رجله من الإستاد لغاية بيته فى مصر الجديدة و هو رافع علم الزمالك.. بس للأسف ماكمّلشى 300 متر و كان مضروب علقة سخنه لازالت توجعه (نفسيّا) من مجموعة من السوقة و الدهماء قامت بخطف العلم منه و حرقه أمام عينيه و هم يقومون بتكتيفه أمام جمع من السوقة و الدهماء الآخرين الذين كانوا منسجمين وهم يتابعون المشهد

فمافيش داعى تحلف لى على تصرّفات سوقيّة من جماهير معروفة بتصرّفاتها.....فهى تضرب و تعتدى و تسب أنصار الفريق المنافس لو فازوا عليه و لو إنهزموا منه ( حاجه غريبه الحقيقة)... و أتذكّر أننى و انا فى الثانوى حضرت مباراة كرة سلة بين الزمالك و الأهلى فى صالة أكاديمية الشرطة و فاز الزمالك و إكتسح الأهلى بفارق 23 نقطة , وغادر جمهور الأهلى الصالة فى آخر دقيقتين.... ولكم أن تتخيّلوا منظر جمهور الزمالك وهو سعيد و خارج فى زفّة من صالة أكاديمية الشرطة إلاّ أن قادة الزفة حذّروا الناس و طالبوهم بالهدوء لحين التأكّد من عدم وجود كمين من الأهلاوية لهم.... و بعد عدة طلعات إستكشافية خارج البوابة فرح جمهور الزمالك لأنه سيكون قادرا على الإحتفال بفوزه... ولكن......بعد عدة عشرات من الأمتار...إتضح أن جماهير الأهلى مختبئة تحت كوبرى العباسية (أمام برج مصر للسياحة) و كان كمينا مرعبا أسفر عن تسييح دم عدد محترم من الزملكاوية بطوب و زجاجات الأهلاوية الساعين لإرهابهم علشان يحرّموا يفرحوا تانى ...... منتهى الإحساس بالقهر بصراحة lo::

و يزيدنا محمد من الشعر بيت :

وقامت الجماهير الاهلاوية بحرق اعلام الزمالك

و لا كأنها أعلام إسرائيل

وترديد الشعارات والهتافات الجامدة جدا

و صف مهذب لشيئ غير مهذب بالطبع

عموما..... هو إستمرار لمسلسل سوقى أصبح مملاّ

وربما يتسائل الكثيرين : لماذا يصمم الزملكاوية على أنهم شريحة مثقفة و راقية تمثل صفوة مجتمع كلّما زادت سوقيّته و غوغائيّته كلّما تقلّصت نسبتهم فيه....... و الإجابة تظهر بجلاء عندما نقارن بين ما حدث للزملكاوى "البجح" الذى لوّح بشعارناديه فى بلكونة بيته و بين ماحدث فى نادى الزمالك بعد المباراة..... حيث جاب عدد من الأعضاء الأهلاويّة بنادى الزمالك حديقة نادى الزمالك و النادى الإجتماعى و حمّام السباحة بأعلام النادى الأهلى الحمراء مرددين هتافات "آآآهلى آآآآآهلى" فى حراسة موظفى الأمن الذين صدرت لهم تعليمات بملازمتهم لمنع المشاجرات التى قد تنشب نتيجة ذلك....علما بأن مجلس إدارة الزمالك نظر إلى هذه الأفعال على أنها حق لايجوز إنتزاعه منهم كونهم أعضاء...رغم أن الموضوع فى واقع الأمر ليس سوى بجاحة و قلّة ذوق (ولا أعتقد أنه بالإمكان السماح بحدوث العكس فى النادى الأهلى... وإلاّ.......)

كلمتين أخيرتين :

1- الزمالك ليس فريق كرة.... و ليس نادى رياضى.... الزمالك قيمة فى حياة الزملكاوى..... فهو رمز للصمود أمام التحيّز و التبجّح و الظلم و الإضطهاد.... وهو رمز لكيف يؤمن الإنسان بأنه لن يفوز إلا بمجهوده و لن ينجح إلا وهو عكس التيّار.... وهو رمز للديموقراطية و ممارستها , وهو ما يراه من إعتادوا على نظم الحكم القمعيّة شرشحة و قلّة قيمة... ولذلك فهم يحبّون النادى الذى يحكمه صالح سليم مدى الحياة و يتم ربط إسم النادى به و كأنه الأب الروحى له , و يعتبرون من بعده من ينتقد خليفته سيّدنا رئيس العالم حسن حمدى عميلا و يجب بتره

2- لحبايب قلبى الأهلاويّة أقول :

موعدنا فى الدور الثانى........ و ..... الدورى سيظل فى الملعب.... و الأيّام بيننا

و يظل الزمالك فارس أحلام الصفوة فى زمن لا يقدّر قيمة الخيول الأصيلة و تثير أخلاق الفرسان السخرية فيه

و يظل الزمالك عنوانا لسباحة الصفوة ضد التيّار

ولهذا.... نحبه و نفخر به.... و سنظل نحبه و نفخر به

تم تعديل 6 نوفمبر 2004 بواسطة disappointed

[mohamed]

يا دكتور محبط انا مرضتش اورد الحكاية كاملة عشان الاشراف بس :P

واخدلى بالك

الزملكاوي البجح ده كان بيلوح بالعلم وب....... كمان ( احنا شباب زى بعض اظن اتفهمت ) :D

شوف بقى لما يعمل كده للشباب اللى واقفة فرحانة يبقى مش ده الاستفزاز بعينه

لا وايه دول كانو بعيد عنه يجى ب 100 متر وهو عمال يلفت نظرهم ويغيظ فيهم وبيعمل اشارات لا تصدر الا عن واحد بلاش اتكلم عشان احنا فى مكان محترم بس المهم انه واحد لا مثقف ولا من طبقة راقية ولا دياولو

وبعدين ايه حكاية صفوة المجتمع ومثقفين والكلام الاليط ده

هو احنا بنلعب كورة ولا هنتجوز ولا رايحين ندوة ثقافية !!! lo::

انا بس عشان مستعجل فحبيت ارد ع النقطة دى

اما باقى ما ذكرته فهسيبه لقائد الكتيبة الحمراء فى المحاورات

صاحبى وحبيبى سي السيد

وانت اللى جبته لنفسك يا دكتور محبط

الراجل ده تقيل عليك ومش هتستحمله brth)

هتبقو عاملين زى جلبرتو واحمد صالح lo::

وهيفضل ياخدك فى الكلام رايح جاى ومش هتعرف ترد عليه

زى جلبرتو كده اما كان واخد احمد صالح رايح جاى rs:

يكفى فقط ان الزملكاوية فضلو مختفيين من المحاورات من يوم الخميس وفى الاخر جايين بهذه الردود الواهية rs:

[homer]

إستفتاء القناة الثالثة مع الجماهير فى الشارع : 65% الأهلى يفوز و 35% الزمالك يفوز

إستفتاء إذاعة الشباب و الرياضة عبر الهاتف : 68% الأهلى يفوز و 32% الزمالك يفوز

إستفتاء برنامج القاهرة اليوم على قناة "اليوم" لشبكة قنوات أوربت الفضائيّة عبر الإنترنت و بالفاكس أو عبر مكالمات دوليّة إلى رقم هاتف التصويت بقبرص : 71% الزمالك يفوز و 29% الأهلى يفوز

و الظاهرة ترصد بالطبع نسبة مشجّعى الأهلى الأعلى فى الأوساط الإجتماعية التى تترجّل فى الشارع و تستقى ترفيهها من الراديو , بينما ترصد نسبة مشجّعى الزمالك الأعلى فى الأوساط الإجتماعية و الثقافية التى تشترك فى قنوات الأوربت و تقوم بالتصويت عبر الإيميل و الفاكس و المكالمات الدوليّة........ من الآخر يعنى..... الظاهرة ترصد بجلاء واضح أن جماهير الزمالك هى جماهير الصفوة على المستوى الإجتماعى و الثقافى و تبرهن على ذلك بالأرقام و بصورة إحصائيّة بحتة

معلش يا محيط أنا لا اتفق معك على هذه النتيجة

- انت افترضت ان كل من التقت بهم القناة الثالثة من الرعاع

- افترضت أيضا أن مستمعى الراديو كذلك

- أفترضت أن الصفوة هى التى تنفق أموالها فى مكالمات دولية لقبرص

- أفترضت أن الاهلوية توقعوا فوز الاهلى والزمالكاوية توقعوا فوز الزمالك مع ان ممكن يكون غير كده

هذه فقط ملاحظة سريعة

there are three types of lies: lies , damn lies and statistics

ورمضان كريم

[msameh]

لا فض فوك يا اخي محبط

ردك درس لكل من اراد مناقشه موضوع المنافسه

فعلا اتفق معك في ان الفرحه الطاغيه للاهلاويه فاقت كل تصور و هذا يدل على حصولهم علي شئ كان فعلا بعيدا عن احلامهم لمدة اكثر من 900 يوم :P

[kotoz9]

سيد محبط افتح الأن موقعfilgoal.comتجد خبر عن مهاجمة جماهير الزمالك للاعبين والجهاز الفنى وقد وصل الامر الى حد الاشتباك بالايادى بين وليد صلاح عبد اللطيف وبعض الجماهير"كريمة المجتمع" وقد حدث ذلك فى اول مران بعد الاربعة.

[se_ Elsyed]

بغض النظر عن المباراة سواء الاهلي كسبها او الزمالك كسبها أو مين اللي إنهزم .. إلا إنني حزين جداً وزعلان من محبط وعلى محبط .. ده بجد ..

- فعندما ترى أنت وحدك السراب على إنه حقيقة في حين يؤكد لك جميع المحيطين بك بإنك واهم ولابد أن تنظر للأمور بواقعية ولكنك بكل أسف تُصر على لوي الحقائق وتُنسب كل المميزات والكمال لك وتُلصق العيوب والنواقص لغيرك مع إن الوضع هو العكس .... فهذا شيء يدعو إلى الأسف والشفقة..

- أنا مش هاكتب مداخلة 10 صفحات يا محبط او أعمل كوبي وبيست وأرد على كل كلمة قولتها ولكن هافكرك بإن الاهلاوية كانوا أول المنتقدين لفريقهم ومجلس إدارته عندما كان حالنا ما يسرش حد في السنتين تلاتة إللي فاتوا ومع ذلك المباريات التاريخية التي سردتها وكنا إتهزمنا فيها أمام الزمالك لم يكن الاهلي بالفريق السيء بل بالعكس هناك مباريات تفوقنا فيها على الخصم ولكن التوفيق لم يحالفنا وبالتالي فاز الفريق الأفضل - وقتها - .

- لم تستفزني أي عبارة ذكرتها سوى عبارة الصفوة والنخبة ... صفوت مين ؟ يكونش قصدك صفوت عبد الحليم ؟ ولا صفوت إينو ؟ وعلى فكرة ده كان عجلاتي عندنا في حي سراي القبة حيث إنني مولود هناك وقضيت فترة من طفولتي في تلك المنطقة ...

مش هما الدول الصفوة اللي عبد الحليم على شاور لهم بإنهم بيقبضوا عشان يشتموا . مش هما دول الصفوة اللي قوات الامن المركزي والقوات الخاصة وقوات الأمن الغذائي نزلت طوقت النادي عشان ما يحرقهوش باللي فيه بعد المباراة .. ومازالت تحاصر النادي حتى الآن ولا كأنهم محاصرين الفلوجة ؟ مش هما دول اللي بيبقى فيه ماتش للزمالك أمام منتخب شباب كهرباء نجع حمادي ويقوموا أثناء الماتش بدل ما يشجعوا فريقهم يقوموا شاتمين النادي الاهلي وجمهورة بألفاظ يندي لها الجبين ؟ مش هما دول الصفوة اللي جابوا منظر واحدة صفوت فيهم وهو رايح يضرب كمال درويش في المقصورة الرئيسية في الماتش الاخير وخلت الراجل طفش من الصفوة بعد الهدف الرابع وألقت قوات الأمن على صفوت .... وزمانه في معتقل المغول ؟ مش هما دول الصفوة اللي ماخلوش مجلس إدارة النادي يحضر الماتش إلا بعدد رمزي عشان مايبقاش شكلهم وحش ويتشتموا ويطلع عينهم سواء كسبوا أو خسروا؟ مش هما دول الصفوة اللي دايماً يكسروا الصالات المغطاة في أي ماتش للسلة أو الطايرة أو اليد ويتوقع عليهم عقوبات ويجيبوا منظر مرتضى منصور في الجرايد والتلفاز والميكرويف وهو لا مؤخذه قالع جزمته وبيشاور لهم إنه هايديهم بها ؟

بالله عليك خلال تاريخك الحافل من أيام الماتش بتاع العباسية لحد ماتش الأربعة .. سمعت عن غوغائي واحد من الاهلاوية شتم حد في مجلس إدارة النادي او اعتدى عليه ..

او بلاش كده شفت واحد من رعاع مجلس إدارة الاهلي المتعاقبة من أيام سعد باشا زغلول مروراً بصفية وإنت داخل على ام المصريين ويبقى روض الفرج على يمينك .. لحد دلوقتنا هذا .. شفت واحد فيهم شتم جمهور النادي اللي هو عصب اللعبة أو هددهم إنه هايديهم لا مؤخذه باللي في رجله ؟

دي صفوة إيه دي ياخويا اللي كلها جزم وضرب وسنج ومطاوي وجنازير وقوات أمن مركزي ؟

- تصدقوا بالله إني كنت بأحسب محبط بيتكلم عن جمهور تشيلسي او برشلونه اللي كسب إمبارح ديبورتيفو لاكورونيا .. اتاريه هو الوحيد في العالم كله اللي شايف وجهة النظر دي اللي هاتودي ناديهم في داهية إن ماكنش راح فعلاً لأنه متخصص في التعاقد مع لاعبين سوابق ومعروفين بسوء أدبهم ، ولعل محبط بذاكرته الفولاذية الصوفواوية يسرد لنا قصة الأوامر التي أصدرها فاروق جعفر للاعبية بالإنسحاب من المباراة الشهيرة بعد ان وضح تفوق الاهلي بحجة إن الحكم الاجنبي ظلمهم وطرد واحد منهم - ما هو قابض هو كمان .. صح ؟ - ونزول الشاب الغندور خالد الغندور للملعب وإستخدامه لإشارات محرمه دولياً للجماهير هو ومدحت عبد الهادي وباقي جوقة الفساد ومثال أخر مباراة الصفاقصي التونسي في البطولة العربية العام الماضي والمهازل اللي عملوها .. وليس عبد الحليم علي أول أمس ببعيد اللي كان بيشاور للجمهور متهماً إياهم بالعمالة والبيمبريالية .. وقبله وليد عبد اللطيف وهو يضرب زميلة جمال حمزه في الماتش وقدام الناس عشان ضيع فرصة في الماتش قبل الماضي.. ومازلنا في إنتظار البلطجي الاعظم إبراهيم سعيد الذي لفظه النادي الاهلي العريق ولهث وراءه الزمالك وهو يعلم بإنه حالة مرضية ميئوس منها - إتفرجت عليه يا محبط مع منى الحسيني وهو بيقول انا طلقت مراتي الحامل ولسه الجنين داخلها لأنها خيرتني ما بين معجبيني وبينها ؟ !!!!!!!! -

هو ده نادي الصفوة ؟

واللي عطاك يعيطنا يا عم ونشترك في اوربت عشان نتفرج على الإحصائيات اللي ماحدش بيشوفها غيرك ونبقى برجوازيين ونسيب بقى شغل الشوارع والقهاوي والراديو والتلفاز العادي أبو إريال عبارة عن عصاية من قفص فراخ ونقب بقى على وش الدنيا ونطلع طبق الأوربت في البلكونة عشان نوريه للجيران ونغيظهم وبالمرة نرمي ريش الفراخ قدام الشقة عشان نعرفهم إننا عدينا وحبينا وقبينا ؟

بص حتة الصفوة الطازة اللي جايه دي يا محبط باشا ..

جماهير الزمالك تهاجم الفريق

وقد حاول وليد صلاح عبد اللطيف مهاجم فريق الزمالك الاشتباك مع عدد من الجماهير الغاضبة التي شهدت التدريب الا ان عدد من افراد الجهاز الفني والاداري منعوا اللاعب مع التمادي في التطاول علي الجماهير وطالبوه بضرورة منح الفرصة للجماهير لتفريغ حنة الغضب .

الوصلة

معليش أنا جايبها من على النت البطيء لإني لسه مش من الصفوة وما ركبتش ADSL

يا خسارة يا محبط .. ما كنش العشم .... لهفي عليك يا محبط ... وااااااااااااا محبطاه ...

ما هما العشرة الطيبة كثير برضوا والراجل معذور يا رجالة ..

تصدق بالله إني كنت ناوي اكتب موضوع عن روشتة علاج للنادي الزمالك اللي شال 10 أهداف في اول سبع مباريات في الدوري وده رقم فظيع ومريع وإنت عارف .. زي ما كنت باعمل مع الاهلي ... لكن لأنني لست من الصفوة فسأكتفي بالجلوس في مقاعد الدرجة الثالثة وأتفرج مثل باقي الشعب ....

وإذا كانت دي هي الصفوة .. فبلاها صفوة يا عم .. الغوغائية أحلى .

[se_ Elsyed]

اما باقى ما ذكرته فهسيبه لقائد الكتيبة الحمراء فى المحاورات

صاحبى وحبيبى سي السيد

وانت اللى جبته لنفسك يا دكتور محبط

الراجل ده تقيل عليك ومش هتستحمله  :P

هتبقو عاملين زى جلبرتو واحمد صالح 

وهيفضل ياخدك فى الكلام رايح جاى ومش هتعرف ترد عليه

زى جلبرتو كده اما كان واخد احمد صالح رايح جاى  :D

لأ يا محمد يابني .. مش عايزين فرحتنا بالفوز الساحق الماحق الذي لا يُصد ولا يُرد ينسينا أصحابنا وحبايبنا أو تتحول تلك الفرحة لطاقة تدميرية .. إحنا عايزين يا ولاد نستغل الفوز ده عشان مصر ومنتخب مصر ..

محبط عارف إننا اخوات ونفسي أقابله فعلاً وجهاً لوجه .. فهو شخص اعتز بمعرفته وصداقته .. عشان كده هانتفق على مقابلة في مكان محايد ولتكن مكه المكرمة في نهاية هذا الأسبوع بإذن الله وذلك لإزالة أثار العدوان الاهلاوي على الزملكاوية ولوضع الخطوط العريضة لاُطر العلاقة بين الفريقين في المرحلة القادمة ولتفادي أي هزائم ثقيلة مستقبلاً ..

بأقولك يا محبط : إيه رأيك نخلي ماتشات الأهلي والزمالك بعد كده بنظام الفوره ؟ ونعمل الفوره من تلاتة ... بحيث يا عم بعد كده ما يبقاش في ستات ولا أربعات ولا حاجات من الثقيلة دي mc(:

فكر كده وإذا إتفقنا We can Esclate this solution to Murtada Mansour

شوفت أنا بأعرف اتكلم عنجليزي إزاي ؟ .. مش هاتقبلني بقى من ضمن الصفوة بليييييييييييييييز نفسي أبقى صفوت يا ناس حرام عليكوا

[Ahmed Mohsen]

نداء هام إلي السيد س س الزعيم الروحي للكتيبة الحمراء والسيد محبط الأب المحب للكتيبة البيضاء:

تفخر جموع الشعب المكونة للكتيبتين الحمراء والبيضاء بوجود زعيمين عظيمين مثلكما علي رأس كل من الكتيبتين.

وإذ أنهما يبايعونكما علي دوام الولاء والعطاء، فإنهم أيضا يطالبونكما بألا تفسدا أواصر الود والمحبة بينكما بسبب مباراة واحدة.

يا سيد محبط يا أبو الزمالكاوية ...... تصرفاتك مثال للأب المحب الذي يري إبنه أفضل إبن في العالم ومن كتر محبته مش شايف عيوبه

ويا سيد س س يا زعيم الأهلوية ..... كلامك مثال للزعيم المعتز بقومه والراغب في جعله أفضل القوم في العالم.

وعلي رأي الشاعر اللي أنا مش عارف إسمه .......

"إلعبوا مع بعض ما تتخانقوش" :D :P

[se_ Elsyed]

وإذ أنهما يبايعونكما علي دوام الولاء والعطاء، فإنهم أيضا يطالبونكما بألا تفسدا أواصر الود والمحبة بينكما بسبب مباراة واحدة.

شكراً على مشاعرك يا احمد يا محسن يا ذوق .. واديكوا شايفين انا ماكلتموش أنا بأفهمه غلطه بس ..

أصل بيني وبينكم اللي بيغيظني في محبط إنه بيجيب حاجات من عصور ما قبل التاريخ ويقولي فاكر لما كان في واحد زملكاوي من المماليك البحرية ( بتوع أقطاي ) ماشي في شارع السلطان قلاوون - 26 يوليو بعد الثورة المباركة - وده سنة 1423 ق . م قام واحد أهلاوي ( من المماليك البراوية .. بتوع عز الدين أيبك الذي قام بدوره النجم عماد حمدي ) حتى بالامارة كان لابس سروال أحمر مع عباءه فوشية ويضع عمامة مملوكية مميزة واول ما شاف الزملكاوي ماشي في حاله وراكب بغلته ورايح يشرب الفايف أكلوك تي في محل الامريكين راح ضاربه بالكرباج وقال له إبقى خلي مرتض منصور ينفعكم ... فاكر ولا مش فاكر ؟

طب اجاوب أنا أقول له إيه إذا كنت وقتها فاضل لي سنتين وأجي الدنيا .