الإعتزال من القمة

[maksoof]

فى ال "مسابقة لغوية" حصلت اليوم على 8 من 10 و أعتقد أنى وصلت الى القمة.

و بس عشان أخزى العين و ما حدش يقول إنى هربت نتيجة لفشلى فقررت إنى أعتزل وأنا فى قمة مجدى (مين هو مجدى ده؟) و أن تكون دى آخر مداخلة لى فى المحاورات لمدة طويلة.

طبعا حاطل عليكم من الحين للآخر عشان أشوف آخر وصفات الطبيخ (لسه عندى أمل إن مراتى توافق إنى أقعد فى البيت و هى تشتغل) بس عموما قبل ما أعتزل فحاوزع تركتى كالآتى:

الأخ الفاضل و الأديب الكبير الأستاذ حشيش - ربنا يرجعه بالسلامة و ما يكونش زعلان- أترك له توقيعى اللى أبدى إعجابه به.

أختنا الفاضلة فيروز: أترك لها الصورة الرمزية

بس حاخد بزنس المشابك معايا عشان أنشر الغسيل.

و لأختنا الفاضلة لايت أترك عربية الترمس الليموزين و بادعيلك كل مرة باعمل فيها ترمس.

و أخيرا أشكركم جميعا لإستضافتى المدة الماضية و خاصة هيئة الإشراف لأنى فعلا أقدر المجهود اللى بيقوموا به للمحافظة على مستوى المحاورات

مع خالص تمنياتى للجميع.

[Cleo]

فيه يا مكسوف؟؟؟

حد زعلك فى حاجة؟؟؟

طيب ليه القرار المفاجئ ده؟؟

:blink:

[kfaya]

أنا حذرتك فى مداخلة ( هى على القهوة .. و هو بينشر الغسيل ) انك تخفى الأكياس البلاستك و السكاكين اللى فى البيت و تحترس من ردة الفعل على أقتراحك المستفز ده ....

:D

هو انت اتمنعت من الكمبيوتر ؟؟؟؟ و لا رايح فين ؟؟؟ :blink:

أجازة طبيعى يعنى ؟؟؟؟ :P

طمنا الله يخليك ....

911 ممكن يجيلك فى ثوانى ... ولا يهمك :D

[عصام]

وهو انت فاهم انك لما تقول كلمتين فى حق الإشراف .. هانقبل استقالتك؟

طلبك مرفوض ..

إعمل معروف .. استر عليا الله يستر عليك .. مش عيزهم يقولوا "إسو طفش الزباين"

ثم ما تنساش إنك لم تورد أسباب .. وفى الحالة دى السبب مش هيخرج عن اتنين ..

إما المدام أجبرتك .. وإما المدام أجبرتك ..

أخى العزيز .. والحترم مكسوف ..

أنت أحد العشرات الذين أكن لهم قدرا خاصا من الاحترام .. إحترام لأحد أفراد أسرة صغيرة تحب وتحترم بعضها بعضا .. فأرجوك لا تحرمنا أحد أفراد أسرتنا دون وجه حق ..

ويا سيدى لو كنت عايز تعرف إحنا بنحبك أد إيه .. ريح يومين وبعدين طل طلة على الموضوع ده ..

أرجوك راجع نفسك ..

[Farida]

فيه يا أستاذ مكسوف مين اللى زعلك ....بجد باحب اقرأ مداخلاتك يا ريت ما تحرمناش منها

[Mohammad Abouzied]

أكيد انت مكسوف تقول السبب الحقيقي لاعتزالك مش كده

انا انشاء الله ها عرفه

[Lighthouse]

:D :D

ايه ده ؟؟

فيه ايه ؟؟

ليه يااخونا العزيز قررت تمشي

مع انك جايب امتياز

يكونش علشان كفاية رفض يديك المرتبة :blink:

لا بجد بقى

عايزين نعرف السبب وفي كل الاحوال طلبك مرفوض

لاتحرمنا من وجودك معنا :P

[فــيــروز]

ليه كده بس

من فضلك والنبى يا استاذ مكسوف

رجاء بجد لا تترك المحاورات .. رغم انى باحب جدا هذه الصوره الرمزيه التى تركتها لى لكنى احببتها لانها تتفق مع شخصيتك الجميله .. لذا انا لا اريد الصوره لى ولكن اريد ان تظل لك وان اراها من خلال مداخلاتك .. عشان خاطرنا بلييز :blink:

[bentmasria]

يا عموووووووووووووووو

يا عمووووووووووووووووو

انت لايح فين بس

:blink: :P :D

اومال مين حيكتب لى حمد لله ع السلامة بعد العمليه

وحيجيب لى شوكولاته

ويبعت لى العيديه

موش انا ابنكم كلكم

عاوز تمشى وتسيب ولادك

مامى بتقولك من فضلك ما تمشيش كلنا بنحترمك ونحبك :D

[amir]

ده اللى انا كنت خايف منه

الواحد يجيب 8 / 10 فى الامتحان يقوم يتكبر على باقى الناس الغلابه و يسيبهم و يمشى !!

بس انا عرفت انت رايح فين !!

اكيد اشتريت القريه اياها اللى كنت عارضها للبيع و رايح تتعلم الطيران بالفلوس اللى جمعتها نتيجة تفوقك فى امتحان اللغه العربيه

احنا فى انتظارك يا بطل

الاستقاله مرفوضه

:blink:

[maksoof]

إخوانى و أخواتى

أنا عاجز!

مش عارف أشكركم إزاى و أؤكد لكم إنى مش زعلان من حد و لكنى قررت أن أتوقف عن الكتابة لأسباب شخصية.

الأخت العزيزة كليو:

بصراحة القرار ما كانش مفاجئ لي stnd:: - يعنى أنا كنت متوقعه - بس قلت أعمل زى الحكومة و أحيط كل حاجة بالسرية التامة عشان يبان إنى شخص مهم و عليم ببواطن الأمور. smk:

أخونا الحكيم كفاية:

أنا لسة ما إتمنعتش من الكمبيوتر - و أعتقد إنها بتفكر فى الموضوع بجدية لأنها من يومها مش بتبتسم.(و بينى و بينك وقت الجد لا 911 و لا حتى 999 حيقدروا يلحقونى dct::

إسو باشا الكبارة:

شوف بقى: الحب الشفوى ده ما يوكلش عيش. لو بتحبونى بصحيح إبعتولى أجرة السكة عشان أحضر لقاءكم اللى جاى على شط النيل و ساعتها ممكن تقولوا لى بتحبونى أد إيه arg:: bsh:)

الأخت الفاضلة فريدة:

و الله أنا مش زعلان و ربنا ما يجيب زعل - و ربنا يسهل بإذن الله و أقدر أرجع تانى للكتابة السنة الجاية لو لنا عمر.

الأخ الفاضل محمد أبو زيد:

ما هو إذا عرف السبب بطل العجب.

و أنا مش عايزه يبطل :o

ستنا لايت:

أهه إنتى اللى عندك بعد نظر و فهمتى الموضوع: السر هو المرتبة. يعنى يرضيكى إنى أنام على الأرض ؟ يعنى لا مرتبة و لا لحاف و لا حتى مخدة :angry: ؟

فيروزتنا:

طيب لكى علية لو رجعتى أخونا الطفشان حارجع أنا كمان عشان نحكى أنا و هو عن السمك wst::

محمد باشا الصغير:

أنا بادعى لك و والله إنت كنت فى بالى و أنا باكتب المداخلة الأخيرة .

ربنا يكتب لك الشفا و يخليك لماما و يخليها لك. إبعت لى عنوان عشان أبعت لك عليه الشوكولاته (أنا باتكلم بجد).

أمير الأمراء:

يعنى الواحد ما صدق إنه طلع الأول مرة فى حياته عشان يتكبر و يتمنظر على خلق الله و إنت عايز تحرمنى من المتعة دى؟

أنا عارف إنك غيران بس بكرة لما إنت كمان تجيب 8 على 10 حتقدر موقفى و حتعرف لذة الوصول للقمة و النظر لبقية الخلق من فوق flrt:

و أخيرا أتمنى لكم جميعا صياما مقبولا و عيد سعيد بإذن الله