هوايات كان نفسنا نتعلمها ..

[فــيــروز]

هناك هوايات كنا ونحن صغار نحلم بممارستها و تعلمها !! stnd:: ربما لانها بدت لنا متناسبه مع اذواقنا و ميولنا .. يا ترى هل هناك بعض من هذه الهوايات التى لم يشأ لنا الله ان نمارسها لسبب او لآخر؟ خاصة ان بعضها ربما حين ننظر اليه الآن قد يبدو مضحكا .. dct:: بل ربما نتعجب الآن من رغبتنا فى تعلمه فى وقتها .. :angry:

[فــيــروز]

زمان كان نفسى يبقى عندى كلب وولف .. رغم انى حاليا باخاف من الكلاب جدا .. :angry:

وحاولت اقنع ماما بشتى الطرق ان ليه مايبقاش عندنا كلب ده حتى هيحرس البيت ويكون صديقى واخرج اتفسح بيه -مش هاركب عليه يعنى smk: - قصدى افسحه و اتفسح معاه

وطبعا هى رفضت رفضا باتا وقاطعا !! dct:: ازاى يبقى فيه كلب فى البيت واحنا نصلى ازاى ونتعامل معاه ازاى stnd::

وبعدين ده محتاج عنايه خاصه واكل خاص وتدريب و اشياء كثيره لم اكن استطيع ان امنحها له !! وطبعا اكتأبت جدا من عدم تحقيق هذا الحلم النبيل .. wst::

الظريف ان فى هذا الوقت حصلت حاجه مضحكه جدا زى اللى بتحصل فى الافلام

جدى الله يرحمه سمع ان احد اقاربه كان له وقف وان هذا الوقف سيرد الي الاسره وانه عباره عن قطعه كبيره جدا من الارض

انا قلت بس كده مفيش حجه ممكن نجيب الكلب و نربيه فى الارض دى ونعيش بقى flrt:

انتهى الامر الى ان كل فرد طلع ان نصيبه بعد تقسيم الوقف بضعة مئات من الجنيهات و انتهى الحلم bsh:)

[فــيــروز]

الهوايه التانيه بس يا ريت ماتستغربوش dct::

هى رياضه كانت -ولا زالت- بتعجبنى اوى رغم انى مش بافهم قواعدها :angry:

لعبة الشيش bsh:) .. اصل كنت ارى انها لعبه تتصف بالرشاقه و الاناقه الى حد كبير .. وفيها اخلاق كده wst::

لعبه شيك يعنى flrt: .. يا ترى حد عنده فكره عن قواعد هذه اللعبه اهو ناخد فكره ونشترى بكره؟ stnd::

[emmyyy]

طول عمري كان نفسي ابقي فنانه (مش زي سوسو بنت رمضان السكري) stnd:: لابجد كان نفسي اعرف ارسم:angry: او اكتب شعر بس الظروف بقي انا عرفها انها موهبه اكتر منها هوايه

بس كان ممكن اخد درس زي ناس كتير لكن مش بعد ماشاب

[Farida]

فيروز ايه الموضوع الجميل ده ....ما علينا :

انا كان نفسى ادخل مدرسه بتعلم الرسم بالزيت انا باعرف ارسم بس بالقلم الرصاص بس بجد كنت عايزه ارسم لوحات بقه على كبير و اعيش حياتى ....عارفه فيه استاذه فى جامعه فى الخارج من اصل يابانى كنت باقرأ كتابها اثناء تحضير الدكتوراة و بعدين كنت عايزه بحث معين فبعت لها اسأل عليه دورت على النت لقيت اسمها بس قبليه كلمه جاليرى مش جامعه او كليه فى اكتر من باحث على النت تطلع لى نفس النتيجه فى الأخر دخلت على الموقع لقيتها هى سابت التدريس و الهندسه و العلم و بترسم و تبيع لوحاتها و بس

- هوايه تانيه والدى الله يرحمه كان نفسه اتعلمها حاولت بس مش للأخر و هى التصوير الفوتوغرافى نفسى اتعلمها و احقق رغبة والدى بس فين الوقت

- هواية تاته برضه كان والدى بيحبها و هى العزف على الكمان بس دى حققتها فى المدرسه و دخلت مسابقات كمان بس دلوقتى نسيت بتتمسك ازاى ......يااااااه الموضوع عاجبنى الصراحه

[hamo90]

أولا أهنيء فيروزة المحاورات علي الموضوع الجميل

زمان وأنا صغير خالص كان عندي عجلة باربعة عجلات وطبعا دغدغتها وخلتها كنافة

و طبعا تم اصدار فرمان بحرماني من شراء العجل عشان أعرف قيمة الخراب الي أنا عملته

ومن ساعتها وأنا كنت أتمني أعرف ازاي أركب عجل بس للاسف فشلت فشل ذريع ولغاية دلوقتي ما بعرفش أسوق عجل

حمو

[فــيــروز]

على فكره يا ايمى

انا كمان كان نفسى اكون بارسم كويس بس للاسف فاشله موت فى الرسم stnd:: .. و كان سبب فى ضياع التقدير لمدة سنتين فى الكليه لانى كنت باسقط فيه :angry: .. حتى دلوقت اى حد بيعرف يرسم اى حاجه ان شالله ورده اقول يا سلام ايه العبقريه دى dct::

فريده انا كمان لحد دلوقت نفسى جدا اتعلم التصوير .. انا حتى اشتركت فى جروب على النت مخصوص لهذا الهدف بس للاسف لم اواظب .. رغم انى احيان باخد صور كويسه بس محتاجه اعرف القواعد عشان اتحسن .. بس خساره انك نسيتى موضوع الكمان ده .. دى حاجه رقيقه جدا .. wst::

hamo

انت عامل زى اختى .. هى كمان زعلانه جدا انها لم تتعلم ركوب العجل وهى صغيره .. واما رحنا مرسى مطروح الصيف اللى فات كانت زعلانه جدا انها مش بتعرف تركب عجل بس

دلوقت فيه عجل للكبار اللى مش بيعرفوا يسوقوا bsh:) .. والدى الله يرحمه زمان اشترى لاخى عجله وهو ماكانش بيرضى يخلينى اتعلم عليها .. فانا طلبت عجله اما نجحت فى رابعه ابتدائى .. ax: واشتراها لى فعلا بس طلعت عينى على ما عرفت اسوقها .. مش قادره اقول لك كنت بافضل مشرّده طول النهار فى الشارع مش عارفه خالص احتفظ باتزانى عليها لغاية ما واحد جارنا

-كان امام المسجد- صعبت عليه فساعدنى لغاية ما عرفت اسوق .. يااااه ده انا ايدى شققت من كتر ما مسكت الجدون بتاعها وكان فيه حاجات بارزه كده لونها ازرق هريت لى ايدى .. والله

كانت ايام جميله .. flrt:

شاكره لكم جدا يا جماعه مشاركاتكم الجميله اللى رجعت للواحد الذكريات اللطيفه دى smk:

[فــيــروز]

انا كان عندى هوايه اخرى غريبه جدا .. لحد دلوقت باستغرب جدا منها .. كان نفسى من زمان يبقى عندى my own business .. wst:: آه والله يعنى مره اخدت اختى و بنات خالاتى و اشترينا بالمصروف حلويات وقلنا نعدى بيها على البيوت نبيعها !! طبعا محدش اشترى مننا اى حاجه خصوصا ان وقتها كان مندوب المبيعات لم ينتشر كمهنه .. كان عندى وقتها يمكن عشر سنين .. ومره تانيه كان عندنا هدايا من المصيف .. غوايش و اعقاد وحاجات كده فاقترحت عليهم نبيعها ونشترى بيها حاجات نختارها احنا وفشل المشروع كذلك .. كان فيه بردو مقترحات لمشروع دره مشوى بس لم ير النور .. stnd::

دلوقت صعب جدا ان لم يكن من المستحيل ان افكر ان اقوم بمغامرات مماثله .. قصدى يعنى يكون عندى بيزنس رغم انها حاجه ظريفه جدا وبتدفع الانسان دفعا الى الابتكار و الاجتهاد .. dct::

ومش متخيله ان يكون عندى ابن او ابنه و اسمح له بالافكار اللوذعيه دى .. اد كده السن بيخلى الواحد يفقد الشجاعه النفسيه اللى كانت موجوده زمان !! :angry:

[kfaya]

يااااااه .... ده أنا كان نفسى فى حاجات أأأأأأأأأ د كدا .....

الأول هقول على الهوايات اللى فلحت فيها .... أول واحدة صيد السمك , وصلت لدرجة الأحتراف و استطدت سمكة القرش أكثر من مرة فى البحر الأحمر ... تانى حاجة , جمع الطوابع ...... عندى تقريبا جميع أصدارات مصر من الطوابع , و مجموعة لا بأس بها من البلاد الأخرى ...

أما بقى اللى كان نفسى أعمله و مفلحتش ...

فى الأدب ..... كان نفسى موت أكتب شعر , و عملت شوية محاولات لكن لم أنجح فيها فأكتفيت بأن أكون مستمع للشعر الجيد ...

فى الفن ...... كان نفسى موت أكون رسام ... مكنش عندى الموهبة لكن كان عندى الرغبة فى ان أكون رسام .... طبعا هذا لا يكفى ... الى أن أكتشفت قدراتى كنت ضيعت مصروفى كل أسبوع على شراء الألوان و شد القماش على البراويز الخشب و تلطيخ أرضية غرفتى بالقازورات ...

فى الموسيقى .... تمنيت أن أكون عازف كمان .... عملت المستحيل , دخلت فريق الموسيقى فى المدرسة و كنت أقضى الساعات فى تعلم العزف على الكمان حتى عرفت أسماء الأوتار و كيفية حركة القوس و نوعية الأصوات ... و لكن كان ينقصنى الأبداع ... الأحساس ... تركيب تلك النغمات فى سلاسة حتى تخرج اللحن الصوت البديع .... سبحان الله .... هى الموهبة بلا شك ما كان ينقصنى , و تلك لا تكتسب أبدا .... استسلمت

فى الرياضة .... مارست و أحببت جدا رياضة التجديف , كنت بلعب فى نادى الشرطة .... رياضة ممتعة جدا جدا ..... بسبب الثانوية الزفت العامة حرمونى منها ..

[kfaya]

بمناسبة هامو و العجل .... عايز أقول معلومة و نصيحة ..

معلش يا فيروز هى بره الموضوع لكن مهمة ..

حاجتين من المهم جدا لكل أب يعلمهم لأولاده فى الصغر عشان مستحيل يتعلموهم فى الكبر ... السباحة و ركوب العجل

مش مهم الواحد يكون سباح أو بطل ركوب عجل , لكن المهم أن يتعلم كيف يسبح فى الماء العميق ( ليس له طول ) و كيف يقود الدراجة بمهارة ..

المهارتين دول بيعطوا للأنسان فى الكبر ثقة فى النفس بلا حدود .... و يستحيل تعلمهم فى الكبر ...

تلك نصيحة لكل أب هنا ...

موضوعك ده جميل قوى يا فيروز :angry:

[Lighthouse]

كتبت رد طويل جدا تكلمت فيه عن هواياتي ومكنونات نفسي

وارسلته

وللاسف لم يتم الارسال :angry:

اشوف لو ح اعرف اكتبه تاني stnd::

[Handicraft]

kfaya:

حاجتين من المهم جدا لكل أب يعلمهم لأولاده فى الصغر عشان مستحيل يتعلموهم فى الكبر ... السباحة و ركوب العجل

شكرا فيروز على الموضوع الجميل

بمناسبة جملة الزميل كفاية عن صعوبة تعلم ركوب العجل انا اعتقد ان الإرادة هى التى تتيح تعلم أى شيئ فى أى عمر فمثلا انا لم اركب العجلة طوال عمرى ولم اعرف السباحة وكنت اتمنى ان أتعلمها وسبحان الله بعد تخرجى من الكلية وقبل دخولى للجيش قررنا أنا وبعض أصدقائى القيام برحلة إلى سيناء بالعجل.

وبالطبع كان القرار بتعلم القيادة واخذت عجله من احد اصدقائى لأنى لم اكن املك عجله لأنى لا اركبها وبدأ مشوار التعلم الخامسه كل يوم ةفى أثناء محاولتى الأولى واحد اصدقائى يساعدنى علقت احد السيدات على منظرى قائلة " يا ضنايا يا ابنى كل العمر ده ومبتعرفش تسوق العجله" stnd:: وكان تأثير الجمله صعب جدا على لذلك قررت نقل التمرين للساعة اثنين فجرا وفى خلال مدة ثلاث ايام تعلمت قيادة الدراجة واكبر مسافة قطعتها من شبرا للزمالك وبعدها قمنا بالرحلة إلى سيناء وكانت رحلة عجيبة الغريب انى عندما رجعت ذهبت لإرجاع العجله لصاحبها وهنا كنت استعرض مهارتى امامه وهو غير مصدق انى ذهبت معهم وحاولت الدوران بالعجلة ولكنى سقطت ... كانت مصادفة انى سقت العجلة لأمام فقط طوال الطريق ولم تأتى الفرصة لأتعلم كيف ادور بها :angry: .

أيضا السباحة شاء الله اثناء عملى بالشركة قبل السابقة ان قمنا برحلة إلى ابو سلطان وهناك كان يوجد حمام سباحة فاخذت ركنا وظللت طوال اليوم لم اخرج من الحمام فقط لأتعلم كيف اطفو ولا تتخيل كم التريقة اللى اخذتها يوما من اصحابى وبعدها بفتره قصيرة سافرت فى رحلة لشرم مع صديق وهناك كان يساعدنى كى اتعلم وكدت ان اغرق اكثر من مرة ولكن فى النهاية اقول انى استطيع ان اطفو واتحرك ... باعوم عوم كلابى يعنى ..... مرحى يا رجب.

الإنسان ممكن يتعلم لو عنده اراده ... انا اعتقد اننا مخزون من المواهب والقدرات للأسف ممكن نكتشفها بالصدفة وممكن نعيش طول عمرنا من غير ما نكتشفها .. المحاولة والتعليم المستمر بيساعدنا اننا نقابل الصدف دى ونكتشف اللى جوانا.

[kfaya]

عزيزى هاندى ...

مغامراتك دى بتؤكد أهمية تعليم السباحة ور كوب العجل لأطفالنا قبل المعاناة التى مررت بها لكى تتقنهما فى سن كبيرة ... و بعدين مش كل واحد عنده عزيمة زيك و يقدر يستحمل تهكم الأخرين ..

بس بزمتك ايه شعورك لما سوقت العجلة لوحدك من غير حد ما يمسكك ؟؟؟ و لا لما دخلت فى الغريق ؟؟؟؟ قمة السعادة و الثقة بالنفس .. صح ؟؟

أسف مرة أخرى يا فيروز على الخروج عن موضوعك الممتع ..

[homer]

كان نفسى أكون محترم يا نعيمة - ابراهيم الطاير

لأ بجد انا كان نفسى ومنا عينى انى اتعلم باتيناج بس فاتنى القطر ولما روحت امريكا بقى نفسى اتعلم سكيت بوردنج أو سكيينج بصراحة نفسى اتزحلق على سبيل الترفيه بعد ما شبعت زحلقة بحق وحقيق فى بر مصر المحروسة

لسة متمسك بالامل خاصة ان ابنى اول مرة يسوق العجلة ام اتنين كان امبارح ومن غير سنادات ومن غير ما امسكه ما شاء الله حاجة تفرح مش خايب زى أبوه.

أشوف نفسى فيه أن شاء الله ويعمل اللى ما قدرتش أعمله

عقبال أولادكم جميعا

[emmyyy]

فيروز مامتك كان عندها حق بالنسبه للكلب my roommateعندها كلب وانا بحبه وهو كمان بس لاتتخيلي العذاب الي انافيه كل صلاة لازم اغير كل هدومي و الاوضه لازم تبقي مقفوله علي طول ولو كنت متوضيه وهصلي ونزلت اجيب حاجه بس كده dct::

المهم الهوايه الي نفسي اعملها بجد اني ابقي عندي مطعم ابقي انا الشيف :angry: وانا صغيرة كنت اعمل سندويتشات لاخويا

واحطها في طبق وازوقها و اخليه يقعد علي السفره اكنه طلب

الاكل واقدمه له يا سلام والله هوايه لذيذة و مغذيه stnd::

تم تعديل 6 نوفمبر 2004 بواسطة emmyyy

[mohamed]

انا كان نفسى وانا صغير امارس رياضة معينة واستمر فيها

لكن انا الحمد لله مارست انواع كتير من الرياضة لكن مستمرتش فى اى وحدة بنية الاحتراف dct::

الحمد لله بعرف اركب دراجات كويس جدا وكنت رخم جدا لدرجة انى كنت بزنق ع العربيات fsh:: اه والله شوفتوا الرخامة :angry: flrt:

ركوب الخيل دى بقى ابتدت من 2 اعدادى ورياضة لذيذة جدا

السباحة بمووووت فيها وببقى مجنون لو شفت الميه وافضل ادخل فى الغرييييييق وانسى نفسى

الهواية اللى كان نفسى اعملها من صغرى هى تعلم الموسيقى لكن مكنش فى تشجيع من الاهل خالص وحتى الان مفيش

بس انا بقى اخدت القرار لوحدى وبدات اتعلم العزف على العود وبقالى سنة بس مش منتظم اوى لضيق ذات اليد حيث انى انا بصرف ع الهواية دى من مالي الخاص wst::

فى ايه تانى يا ربى ... اللهم صلى ع النبى

اه الباتيناج ... كان نفسى اعرف اركبه بس معرفتش

اخوية اللى اكبر منى على طول كان عفريت بالباتيناج انما انا مكنش ليه فيه خاااالص

كان نفسى بردو انى اكون بعرف ارسم لكنى كنت ومازلت فاشل جداااااا stnd::

اما دلوقتى فنفسى امارس رياضة التجديف وكنت هبدأ فيها الصيف اللى فات بس مكنش عندى وقت للاسف bsh:)

فى رياضة بقى دلوقتى بقول يا رتنى لعبتها من صغرى الا وهى الجمباز

اللعبة دى جميلة جدا بس مشكلتها انها مينفعش تتلعب الا من الصغر يعنى عشان تبتديها لازم يكون عندك 4 سنوات مثلا

ان شاء الله لما اجوز وربنا يرزقنى بولد هخليه يلعب اللعبة دى ويجيب ميدالية ذهب لمصر فى الجمباز smk:

[emmyyy]

هو ايه حكايه الرسم يا جماعه بجد??

واضح ان كلنا عندنا ميول فنيه طاب يا ريت لوحد له في الرسم يدينا دروس في الاساسيات بتعته وينوبه ثواب :angry:

[se_ Elsyed]

وهنا كنت استعرض مهارتى امامه وهو غير مصدق انى ذهبت معهم وحاولت الدوران بالعجلة ولكنى سقطت ...

... باعوم عوم كلابى يعنى ..... مرحى يا رجب.

في دول بقى أشهد لك بالعشرة ..

أولاً من ناحية العوم الكلابي ( لو شيان .. يعني باللغة الفرنسية ) أنا شفت بنفسي وبصراحة عجبتني طريقة العوام دي .. يبقى كده عندنا انواع العوم إيه يا ولاد ( كرول وظهر وفراشة وكلابي )

ثانياً : العجل دي بقى انا شاكك فيها وحاسس إنك بتسرح بيه مش عارف ليه بعد ما جرتك في البيتش باجي lo:: lo:: fsh::

[se_ Elsyed]

عزيزى هاندى ...

بس بزمتك ايه شعورك  لما دخلت فى الغريق ؟؟؟؟ قمة السعادة و الثقة بالنفس .. صح ؟؟

..

الأخ الزميل الفاضل كفاية

انا ما رضتش أبعت لك رسالة خاصة وقولت أكلمك قدام الناس في إن سعادتك لازم تحافظ على شعور زمايلك brth)

الراجل بيقولك عوم كلابي .. يعني بيعوم على الرمله بتاعت الشط .. يبقى ليه تحرجه وتقول له في الغريق وورا البراميل والحاجات اللي تستفز المشاعر دي ..

س س أبو هيف lo:: lo::

[Cleo]

أنا طول عمرى كان نفسى يبقى عندى هواية تشكيلية... رسم، نحت، زخرفة.. أى حاجة والسلام.. خصوصا إن بابا و أختى رسامين بريمو...

فشلت فى الرسم...

قمت جبت طين أسوانلى و عكيت البيت "كلله" و الأخر يا دوب قدرت أعمل تعبان كوبرا لافف ديله و مطلع دماغه فوق...!!

قلت خلاص... أنا ماليش عيش فى الشغلانة دى...

جبت جيتار و قررت أتعلم موسيقى... وقعد أحوش من مصروفى و عديتى عشان أجيب جيتار شيك و محترم.... أخدت حصتين و زهقت و بعت القضية... lo::

كل مرة أفشل، كنت أنكب على الكتب و أقعد أقرا... خلصت كتبى دخلت على كتب أبويا...

و أعتقد أن كثرة القراءة قد ولدت لدى حب الكتابة، فذات مرة شاهدت موقفا أثر فى تأثيرا شديدا وقررت أن أعبر عنها، فكانت رائعتى "الخماسين" lo:: ...

بس بجد.....

هامووووووووت و أتعلم الرسم cbyb: