الأعلام المصرى ... قمة الريالة

[kfaya]

لفت نظرى فى أهرام اليوم خبرواحد تكرر فى موضعين , و هو أستفتاء لجريدة الواشنطون بوست عن أكثر محطة أخبارية يشاهدها العرب و يثق بها ...

لقد جائت الجزيرة فى المرتبة الأولى , تليها العربية , أبو ظبى , cnn الأمريكية ... و لم يأتى ذكر للفضائيات المصرية ..

جاء ذكر ذلك الأستفتاء فى مقالة الأستاذ عزت السعدنى ( أخر نسخة من قابيل ) ... و أيضا فى بريد الأهرام ...

بـريــد الأهــرام

43069 ‏السنة 127-العدد 2004 نوفمبر 6 ‏23 من رمضان 1425 هـ السبت

الريادة لنا‏!‏

نشرت صحيفة واشنطن بوست نتائج استطلاع للرأي شمل أكثر من‏120‏ محطة تليفزيونية عالمية يستقبل ارسالها في منطقة الشرق الأوسط اظهرت نتائجها ان قناة الجزيرة تحتل مرتبة الصدارة وهي الأكثر مشاهدة عربيا تليها العربية فتليفزيون أبو ظبي ثم‏CNN‏ و‏MBC‏ واخيرا‏LBC‏ اللبنانية وتوارت الفضائية المصرية خارج سباق المشاهدة‏,‏ وأصابني هذا الاستطلاع بالدهشة لأننا كنا نسمع دائما من المسئولين عن قطاع الإعلام كلمة الريادة تميز الإعلام المصري عن غيره من الإعلام في المنطقة العربية ولما لا؟ فنحن نملك مدينة للإعلام التي تم تشييدها علي أعلي مستوي من التقنيات الحديثة وقمنا ايضا بإطلاق قمرين فضائيين ونتجه لاطلاق قمر ثالث وكلما نادت بعض الأصوات بأن ذلك يتم علي حساب أولويات أخري كان الرد عليها جاهزا دائما وهو ان هناك ضرورة للمحافظة علي الريادة الإعلامية التي ننفرد بها في المنطقة العربية‏!‏

ولكن يبدو من واقع هذا الاستفتاء ان الريادة لاتكون باطلاق الأقمار وتشييد المدن الإعلامية ولكنها تتطلب تقنيات أخري وهي حرفية ومهنية وإستقلالية البث الفضائي‏..‏ هذا الثالوث الذي يسمح بالرأي والرأي الآخر دون حسيب أو رقيب ويستبعد الشخصانية من النشرات الاخبارية فالتركيز يكون دائما علي الحدث وليس علي تحركات واتصالات ومقابلات وبرقيات كبار المسئولين‏,‏ كما يساعد هذا الثالوث علي سرعة وحرية الحركة في تغطية الأخبار المحلية والعالمية فعلي سبيل المثال نجد ان المصريين علموا بأحداث طابا من الفضائيات العربية والعالمية قبل مايقرب من ساعتين من بثه علي القنوات المصرية‏.‏

والمشكلة ان العالم بات يتحرك من حولنا بخطوات واسعة وعملاقة في مجال تقنيات البث الإعلامي ونحن مازلنا نتحرك بخطي السلاحف ولكي نشعر بأننا نواكب من حولنا قمنا بكتابة لافتة صغيرة تم تعليقها علي ظهر السلحفاء كتبنا عليها عبارة الريادة لنا‏!‏

د‏.‏ عماد اسماعيل

‏eMADEA@HOTMAIL.COM‏

يعنى احنا فى النازل من ما جميعه ..... حتى الأعلام اللى كنا فاكرين نفسنا متقدمين فية شوية ... طلعنا شوربة و الحمد لله ...

نفسى أعرف احنا فالحين فى ايه ..... يعنى عندنا أيه ممكن نتباهى بيه ؟؟؟؟

[فــيــروز]

الطف شئ فى كلمة الرياله .. انك لو استلفت نقطه من حرف الياء لصالح حرف الراء .. تظل محتفظه بمعنى مستحق !! stnd::

ما علينا :angry:

المشكله اننا ننظر الى المساله الاعلاميه بوصفها تقنيات حديثه و مدن انتاج اعلامى .. ننظر اليها بوصفها مساله مرتبطه بالآلات و الاجهزه !! رغم ان هذا الزعم يكذبه تماما مستوى الاعلام المصرى فى بدايته !! وقدرة الراديو مثلا على اجتذاب الجماهير و انتزاعها انتزاعا من التليفزيون لان من كانوا مسئولين عنه كانوا على مستوى عال من حب المهنه ناهينا عن الموهبه و الاجاده ..

المشكله ليست اطلاقا فى الامكانات الماديه .. الآن بمبلغ يعد زهيد يمكن افتتاح محطة راديو او تليفزيون !! الاهم هو العقول التى ترسم السياسات و تخطط لوضع هذه المحطه فى ذهن وقلب المتلقى !! الامكانات الماديه ليست مشكله المشكله فى اطلاق الامكانات البشريه الى اقصى مدى و السماح لها بالتعبير عن نفسها بحريه بعيدا عن السياسات التى شابت وترهلت -ولا اريد ان اقول تعفنت- من طول بقائها فى مكانها ..

[sad_swing2000]

يا سيدي الفاضل الإعلام بتاعنا من زمان ف الضياع ، و الاستفتاء اللي حضرتك ذكرته يمكن يكون أول توثيق رسمي لانحطاط مستوانا الإعلامي ، إنت شخصيا لما تحب تسمع خبر صحيح مية ف المية عمرك ماهتفكر تفتح قناة مصرية لو عندك دش ، أو هتدور ع النت إن كنت زي حالاتي من الفقرا اللي ماعندهمش.

المصيبة إن الناس اللي مسؤولة عن الإعلام زي مايكونوا فاكرينا معزولين عن العالم و يقولولك ريادة إعلامية.. :angry:

بأمارة إيه !!!!

كل الكفاءات الإعلامية هربانه - مش عشان الفلوس بس - للفضائيات الأخرى.

الجهاز الإعلامي كله - مش التلفزيون بس - عبارة عن عزبة لموظفين من قديم الأزل ، مات الإبداع عندهم ، و يحاولوا إنهم يورثوا هذا الجهاز الضخم لأولادهم و أقربائهم. لو تتبعت اسم أي مذيع جديد هتلاقيه ابن فلان أو قريب علان....

الحقيقة.......مفيش فايدة ، بس أنا لازلت متفائل stnd::

[kfaya]

أقتباس : فيروز كتبت

الطف شئ فى كلمة الرياله .. انك لو استلفت نقطه من حرف الياء لصالح حرف الراء .. تظل محتفظه بمعنى مستحق !! 

stnd::

بصراحة الأعلام بتاعنا المعجزة ممكن ينطبق عليه الكلمتين ..... :angry:

[ragab2]

استحالة

أن نصف عزبة تعيين الأقارب والمحاسيب ريادة

ومن أين تأتى الريادة لمذيعة أو مذيع يعتمد فى بقائه مذيعا على بابا وماما وعمو دون الإعتماد على مواهبه وثقافته وإبداعه الشخصى

كيف تجعل من الفسيخ شربات

[سقراط المصري]

كيف تجعل من الفسيخ شربات

حط له كولونيا :angry:

سقراط

[Sherief AbdelWahab]

الحكاية مش حكاية وزير جلس على الكرسي عشرين عاماً ، عومل رغم كل الفساد والشرور معاملة فتحي سرور، ولملم في العقدين من المحاسيب ما يجعل الوزير القادم يصرخ ويقول : خلااااااص ح أسيب ، ولا هي حكاية فردة الصدر والذراع في عالم يعترف بالأفضل ..

ربما تكون أيضاً حكاية ثقافة تذوي ، وقيم جمالية منهارة ، ومقاييس "غلط" لدى الجميع في حلقة الإعلام..خاصة لدى من يفترض بهم رؤية تلك المسائل بحيادية..

لسنوات طويلة تحول كل نفس يخرج من أنف الوزير إلى إنجاز ، وكل شخص يعينه الوزير في منصب إلى عبقري ، وكل مذيع يعينه أو يعينه محاسيبه إلى لاري كينج وأوبرا وينفري..

انظروا إلى الديكورات ، وإلى مذيعي الواسطة ، وإلى فواصل البرامج التي تم عملها على وحدة أفراح تعبانة ، وإلى البرامج القصيرة من عينة "المسحراتي ي ي ي ي ي "...فرق ضخم ليس بين الأشقاء العرب وبيننا ، بل بين المصريين الذين يعملون في القطاع الخاص والفضائيات العربية وبين الإعلام الرسمي..

على كل حال: صفوت الشريف ، سناء منصور ، حسن حامد ، سميحة دحروج ، سلمى الشماع ، جمال الشاعر ، وآخرون يتحملون المسئولية كاملة..مسئولية انهيار الإعلام في مصر ، وتحوله إلى دولة للبيروقراطية والتخلف!

بعيداً عن الموضوع:

عمرو خفاجي في حلقة عادل إمام من البيت بيتك:

"أنا فخور أني أنا من روزا اليوسف....اشتغلت في قناة دريم..قناة دريم جزء لا يتجزأ من الإعلام المصري"...

هل يريد أن يمن علينا بالبرنامج الذي يعده زملاؤه في روزا؟..صحفي دة ولا حاجة تانية!

دة ما بقاش البيت بيتك..دة بقى "العزبة عزبتنا"!

اللهم إني صائم..

خلص الكلام

[se_ Elsyed]

الإعلام المصري هو جزء من منظومة الفساد ... وما ينفعش بأي حال من الاحوال إن جزء من المنظومة يبقى سليم والباقي كله فاسد من حواليه..

فهو يعتبر ركيزة أساسية من الركائز التي يعتمد عليها النظام الديكتاتوري في مصر للتهليل له والتطبيل كلما زار نجع من النجوع او ذهب ليقضي حاجته أو ما إلى ذلك ...

ومهم حاولوا ان يقنعونا بإن لدينا أقمار صناعية وقنوات فضائية فلن يستطيعوا أن يقنعونا بجودة او كفاءة تلك القنوات التي أصبحت كما يقولون " العدد في اليمون " يعني كثرة بهبل وعبط .. ممكن يكون عندي قناة واحدة محترمة وصادقة فقط تساوي 100 قناة آخرى مالهومش لازمه ..

ولا أستطيع أن أنسى تعليق الرئيس القائد محمد حسني مبارك وهو يفتتح إحدى الإستديوهات ومن حوله جوقة الاعلام والزفة الكدابة وكان في شاشات تليفزيون على الحيطة وعمال الريس يمر عليهم وجه لحد الجزيرة وقال إخيييييه دي قناة مابحبهاش ... وكل سنة وإنت طيب يا ريس ..

ولاحظوا كده أي حديث لمسئول او حدث عالمي او غيره وتلاقي ميكرفونات المحطات تتسابق للتسجيل معه وترى الجزيرة وابو ظبي والعربية بتوع اول إمبارح ومستحيل تلاقي الفضائية المصرية إلا في حالة إذا كان الرئيس واخد فرسه ورايح يقتحم أسوار برلين او يستولي على قصر الإليزية بفرنسا .. ساعتها بس تشوف الطبل والزمر والهليلة ..

أما المصداقية والحياد والشفافية فهي أشياء لا يسمعون عنها وليست موجودة في مقرراتهم .

حته صغيرة أخيرة تدل على الحالة الهلامية للإعلام المصري ...

تعرفوا طبعاً إن الشعب المصري معظمه بيحب كورة القدم أو اليد او قولوا السلة ولا حتى الملاكمة ... يبقى لما يكون في النشرة ارئيسية في الساعة التاسعة وفي اخبار ماتشات مهمة على سبيل المثال سواء عالمية أو محلية او عربية المفروض إنهم يقولوها لو عايزين يجيبوا أخبار رياضية يعني ... يبقى ليه النشرة الرياضية تسيب ده كله وتلاقيهم بيذيعوا أخبار دوري الأيس هوكي في كندا ؟ والله العظيم ده بيحصل وكتير كمان ... تصوروا ..

أي حشو وأي كلام المهم تستف النشرة بالأخبار بغض النظر عن نوعيتها او مضمونها .. إديله برامج يديك هيافة .

خليهم يعملوا إستفتاء كده ويشوفوا كام واحد بيتفرج على قناة النيل للاخبار اللي أنا عن نفسي بأقعد شهور ما بقربش ناحيتها لحد ما التراب بيغطيها .

[sad_swing2000]

تعرفوا طبعاً إن الشعب المصري معظمه بيحب كورة القدم أو اليد او قولوا السلة ولا حتى الملاكمة ... يبقى لما يكون في النشرة ارئيسية في الساعة التاسعة وفي اخبار ماتشات مهمة على سبيل المثال سواء عالمية أو محلية او عربية المفروض إنهم يقولوها لو عايزين يجيبوا أخبار رياضية يعني ... يبقى ليه النشرة الرياضية تسيب ده كله وتلاقيهم بيذيعوا أخبار دوري الأيس هوكي في كندا ؟ والله العظيم ده بيحصل وكتير كمان ... تصوروا ..

أي حشو وأي كلام المهم تستف النشرة بالأخبار بغض النظر عن نوعيتها او مضمونها .. إديله برامج يديك هيافة .

واضح إن في توارد خواطر بيني و بينك يا فندم...

أصل أنا طول عمري أسأل السؤال ده بردو ، هو في حد فيكي يا مصر يعرف - مش يلعب - يعني إيه هوكي الجليد ده !! lo::

تم تعديل 6 نوفمبر 2004 بواسطة sad_swing2000

[Tafshan]

الطف شئ فى كلمة الرياله .. انك لو استلفت نقطه من حرف الياء لصالح حرف الراء .. تظل محتفظه بمعنى مستحق !!  :P

ما علينا  rs:

lo:: lo:: brth)

انتِ دماغ !!

انا مش لاقي حاجة اضفها على موضوع الطرد الاعلامي للقنوت الفضائية المصريه غير حاجه واحدة بس :

المزيعات ام فيونكات rs:

و الله و انا بقلب القنوات، القناة المصري بتبان !!!

تلاقي مزيعة عمرها 50 سنه و فرشة كده و فرشه كده !!

اما المزيع فطبعاً لابس الكرافته المزيته و حاطت فازلين على شعره و اديلو !!!

اما عن مواضيع النشرة فتلاقي لوجو الجزيرة او ابوظبي او اي قناة يعني كوبي و بيست بالظبط .. اكيد في الاخر ح اقلب على الجزيرة ..

قناة شيك .. مزيعين محترمين و بشم ريحة البرفيوم بتاعهم من التليفزيون !!! و طبعا ً مراسلين و اخبار طازه و ايه!!

بغض النظر عن برامجها اللي احياناً بتحرق الدم لكن ما ننكرش انهم سبقونا ب 20 سنة على الاقل و رغم ظهور العربية من مؤسسة ال MBC ما عرفتش تعمل مع الجزيرة حاجة ..

احنا ح نفضل نلف في دائرة البيضة و لا الفرخة دي لأمتى ؟؟

ماشي نلف تاني ..

القنوات الفضائية ..الاعلام ..وزارة الاعلام ... مجلس الوزراء .. الحكومة .. الاصلاح .. الديموقراطية .........

افففففف ...... نقول كمان ؟؟

[bluebird]

لا أعتقد أننا نحتاج لأي إستفتآت حتي نتأكد من تخلفنا الإعلامي مقارنة بفضائيات الخليج وفي مقدمتهم بالطبع الجزيرة

[أسد]

أي شئ وكل شئ في عهد السيد الرئيس محمد حسني مبارك يتجه إلى النهيار ..

ويستحق الصفر بلا منازع ...

وهو الإتجاه الطبيعي للإنهيار الذي أسسه السيد الرئيس ..

فهو من وضع مصر على زحليقة السقوط ..

ونحن الآن نسقط بمنهى السرعة من على الزحليقة ...

[Tamsite]

الموضوع كبير جدا حقيقي ،

و أثناء قراءتي لمداخلات السادة الأعضاء ، اختمرت في ذهني افكار عديدة و خواطر لكي اسطرها هنا في الموضوع ، لدرجة أنني لم اعد أعرف من أين أبدأ الكلام و النقد أو التقييم للحالة الاعلامية المتدنية التي وصنا اليها

ساحاول أن أبدأ ببداية ما ،لتكون محور حديثي هذا و الله الموفق ،

التعريف المبسط لكلمة اعلام ( من وجهة نظري المتواضعة )

هو أن تصل معلومة ما بوسيلة منتشرة و فعالة الي مواطن الدولة أو رجل الشارع، سواء اخبارية أو ثقافية أو ترفيهية ... الخ

و نجد أن وسائل الاعلام تنحصر في الآتي : ( من القديم الى الحديث )

1- الصحف ( سواء يومية أو اسبوعية .... الخ ) و هو ما يعرف بالاعلام المقروء

2- الراديو و هو ما يعرف بالاعلام المسموع

3- التليفزيون : بما فيه من نشرات أخبار و برامج على اختلاف مضمونها و خلافه ( ويلاحظ أن تعريف كلمة الاعلام الدارجة على لسان رجل الشارع تنصب على هذه الوسيلة فقط دون غيرها )

4- الانترنت : أحدث الوسائل الاعلامية و التي لم تنتشر بعد بالمقدار الكافي وسط الطبقات المثقفة أو العادية في الوطن العربي، مقارنة بالوسائل الأخرى ، بالرغم من فاعليتها ، و سرعة تحديث المعلومة بها و التي تصل لدرجة مساهمة متلقي المعلومة بإبداء الرأي ( مثل منتدانا هذا )

5- وسائل أخرى لم تلق الانتشار الكافي و مازالت في طور البداية ، مثل رسائل المحمول و خدمات تلقي المعلومة فور ادراجها في قاعدة بيانات شبكة الخدمة

و الله أعلم بما وصل اليه التطور في المجال الاعلامي و الذي قد يسفر عن وسائل أخرى لم يصل إليها علمي بعد

هذا البيان ما هو إلا وسيلة للتقييم الموضوعي للاعلام المصري في ضوء التعريف الذي ورد في بداية المداخلة

و من هنا نبدأ التحليل و النقد

وللحديث بقية ان شاء الله .............

[فــيــروز]

و الله و انا بقلب القنوات، القناة المصري بتبان !!!

صح جدا ..

رغم ان القنوات المصريه عندنا موجوده وسط عدد من القنوات العربيه !! ولا يوجد لديها فى بعض الاحيان لوجو مميز لها .. الا ان اول ما القناه المصريه تيجى اعرف انها مصريه "دريم - المحور - الفضائيه المصريه" !! ربما بسبب الديكورات الكئيبه المكرره او طريقة الاضاءه .. الله اعلم بس هى فعلا بتبان !!

[Lighthouse]

مش بس القنوات اللى بتبان من ديكوراتها البايخة والوانها الكئيبة

كمان المراسلين المصريين لو عملوا في قنوات عربية بيظهروا :P

طريقة نطقهم للغة العربية الفصحى رهيبة صراحة :D

انتهى عصر المذيعين المحترمين اصحاب المواهب والموجود حاليا ومتوفر بكثر عديمي الموهبة والعلم واولاد الاعلاميين اياهم

فعلا ريالة

[se_ Elsyed]

إمبارح كنت أشاهد نشرة التاسعة .. وعندي مزاج احب أسمع الخبر من كذا قناة .. كوكتيل أخبار يعني .. فبالصدفة البحتة والله غلطت ودوست على قناة النيله الإخبارية .. أصلي راصص كل القنوات الإخبارية ورا بعض .. فلقيتهم عاملين لقاء مع رئيس مجلس إدارة شركتنا في مصر وده من خلال النشرة الإقتصادية ... وقولت إيه الإشاعات المُغرضة اللي بيروجها قلة مندسة في محاورات المصريين دي ؟ ما هي القناة حلوة أهي وبتجيب ناس زي الفُل ... بطلوا بقى .. إعلامنا بخير وقنواتنا فيها خير وأونكل سفوت بخير وتصبحوا على خير ..

آه بمناسبة صفوت هو ليه لسة بيظهر جنب الريس في أحاديثه ؟ هو مش مشي وساب الأعلام ولا لسه مُعار من مجلس الشورى عشان يستفيدوا بخبراته ؟

كلمة أخيرة : قبل الماتش الأخير اللي ما يتسماش عشان مُحبط ما يزعلش مننا .. لقيتهم في الفضائية المصرية عاملين إستدوديو تحليل بنفس الديكورات اللي مُكونة من لوحين خشب حبايبي على فرشتين بوهية من غير معجون والجو العام يصيبك بالغثيان .. المهم كانوا مستضفين زكريا ناصف وجمال عبد الحميد ومذيع شنكوتي كده ما عرفش جايبينه منين .. يقوم التليفزيون المصري بجلالة قدرة مش هاين عليه يصرف خمسة جنية ويبعت واحد مراسل الإستاد يشوف مين هايلعب ومين مش هايلعب ومين اللي عاش ومين اللي مات .. فكانت النتيجة إن المذيع والضيوف اللي معاه بقوا عاملين زي الأطرش في الزفة وعمالين يتكلموا عن ماتش تاني خالص لأنهم مش عارفين التشكيل ولا عارفين حتى أساميهم وعلى سبيل المثال ما عرفوش إن أمير عزمي مجاهد عمل زي حسين فهمي في فيلم العار وإتشنج وحرارته عليت ومارضيش ينزل الملاحه قام محمد أبو العلا ( اللي هو روقه في الفيلم ) نزل بداله وكان ما بيعرفش يعوم فغرق ياعيني ولما أنطرد دراجوسلاف قال أنا ماعرفوش .. ما خلفتوش .. .

فتلاقي جمال عبد الحميد عمال يقولك .. وأمير عزمي بقى المفروض يعمل كذا وكذا ... اما بقى أبو حباجة فالمفروض ينزل عشان يحد من خطورة حسين حجازي وبالتالي نقضي على فُرص ألدو في التألق وبكده نقول مبروك للكابتن شحتة وهارد لك لحنفي بسطان ....

[Sherief AbdelWahab]

أنا أزرأ-مبني للمجهول-بمشاهدة الفقرة الاخبارية التي تقدمها قناة النيلة للأخبار قبل مسلسل بنت أفندينا..

من الأشياء المستفزة إصرار بعض المذيعات على تقليد اللكنة الفصحى الشامية التي يتحدث بها المذيعون الشوام ، وهي لكنة لنا عليها تحفظات في ضوء المعلومة البسيطة وهي أننا-بلا شوفينية- مصر الأزهر الذي أعادت تصدير اللغة العربية صوتاً ونطقاً..ومن العار أن نسمع مذيعة محترمة ترقق الراء بشكل مستفز في أوقات من المحتم تفخيمها على سبيل المثال..

العالم دي ما بتسمعش أحمد عامر في إذاعة القرآن الكريم؟..ما عندهاش استعداد تتعلم الفصحى صح؟

خلص الكلام

[VAMPIRE]

مساء الفل

أحب أن اوضح للسادة الأعضاء شيء

و هو أن الاعلام المصري أعلام موجه .

بمعنى انه موجه من الحكومة للسيطرة على عقول البسطاء من المصريين

فلا جدوى من مشاهدة القنوات الأولى و الثانية و .... الثامنة .

[VAMPIRE]

أنا أزرأ-مبني للمجهول-بمشاهدة الفقرة الاخبارية التي تقدمها قناة النيلة للأخبار قبل مسلسل بنت أفندينا..

من الأشياء المستفزة إصرار بعض المذيعات على تقليد اللكنة الفصحى الشامية التي يتحدث بها المذيعون الشوام ، وهي لكنة لنا عليها تحفظات في ضوء المعلومة البسيطة وهي أننا-بلا شوفينية- مصر الأزهر الذي أعادت تصدير اللغة العربية صوتاً ونطقاً..ومن العار أن نسمع مذيعة محترمة ترقق الراء بشكل مستفز في أوقات من المحتم تفخيمها على سبيل المثال..

العالم دي ما بتسمعش أحمد عامر في إذاعة القرآن الكريم؟..ما عندهاش استعداد تتعلم الفصحى صح؟

خلص الكلام

معلش يا شرشور برضه بناتنا لما يشوفوا الدلع ***** من بتوع لبنان و سوريا

بيبقى نفسهم يعملوا زيهم .

واللا هما مالهومش نفس واللا أيه ؟

دي بناتنا أجدع بنات .

أدلعوا براحتكم

الأخ Vampire

هذه ألفاظ لا يصح أن تستخدمها في مكان محترم مثل المحاورات ..

نرجو عدم تكرار ذلك .

سي السيد

الإدارة

[VAMPIRE]

إمبارح كنت أشاهد نشرة التاسعة .. وعندي مزاج احب أسمع الخبر من كذا قناة .. كوكتيل أخبار يعني .. فبالصدفة البحتة والله غلطت ودوست على قناة النيله الإخبارية .. أصلي راصص كل القنوات الإخبارية ورا بعض .. فلقيتهم عاملين لقاء  مع رئيس مجلس إدارة شركتنا في مصر وده من خلال النشرة الإقتصادية ... وقولت إيه الإشاعات المُغرضة اللي بيروجها قلة مندسة في محاورات المصريين دي ؟ ما هي القناة حلوة أهي وبتجيب ناس زي الفُل ... بطلوا بقى .. إعلامنا بخير وقنواتنا فيها خير وأونكل سفوت بخير وتصبحوا على خير ..

آه بمناسبة صفوت هو ليه لسة بيظهر جنب الريس في أحاديثه ؟ هو مش مشي وساب الأعلام ولا لسه مُعار من مجلس الشورى عشان يستفيدوا بخبراته ؟

كلمة أخيرة : قبل الماتش الأخير اللي ما يتسماش عشان مُحبط ما يزعلش مننا .. لقيتهم في الفضائية المصرية عاملين إستدوديو تحليل بنفس الديكورات اللي مُكونة من لوحين خشب حبايبي على فرشتين بوهية من غير معجون والجو العام يصيبك بالغثيان .. المهم كانوا مستضفين زكريا ناصف وجمال عبد الحميد ومذيع شنكوتي كده ما عرفش جايبينه منين .. يقوم التليفزيون المصري بجلالة قدرة مش هاين عليه يصرف خمسة جنية ويبعت واحد مراسل الإستاد يشوف مين هايلعب ومين مش هايلعب ومين اللي عاش ومين اللي مات  .. فكانت النتيجة إن المذيع والضيوف اللي معاه بقوا عاملين زي الأطرش في الزفة وعمالين يتكلموا عن ماتش تاني خالص لأنهم مش عارفين التشكيل ولا عارفين حتى أساميهم وعلى سبيل المثال ما عرفوش إن أمير عزمي مجاهد عمل زي حسين فهمي في فيلم العار وإتشنج وحرارته عليت ومارضيش ينزل الملاحه قام محمد أبو العلا ( اللي هو روقه في الفيلم ) نزل بداله وكان ما بيعرفش يعوم فغرق ياعيني ولما أنطرد دراجوسلاف قال أنا ماعرفوش .. ما خلفتوش ..  .

فتلاقي جمال عبد الحميد عمال يقولك .. وأمير عزمي بقى المفروض يعمل كذا وكذا ... اما بقى أبو حباجة فالمفروض ينزل عشان يحد من خطورة حسين حجازي وبالتالي نقضي على فُرص ألدو في التألق وبكده نقول مبروك للكابتن شحتة وهارد لك لحنفي بسطان ....

لسة بدري علينا يا سي السيد .

أتقل تتكيف vmp: