ملاحظات على إنتخابات الجولة الاولى

[se_ Elsyed]

ياريت أي حد عنده ملاحظات يفيدنا بها

أنا هابدأ :

1- اولاً إنتم شعب عظيم وحضاري وممكن تتغيروا في يوم والله وتبقوا أعظم شعب في الدنيا مش زي ما بيتقال عليكم من الحاقدين

2- مش عارف هو انا عيني زايغة ولا إيه بالظبط ... لاني حاسس إن الجنس الناعم هو كان جوكر الجولة الاولى ... الستات كتير وملوا البلد يا جماعة وكانوا حاجه تفرح في الجولة دي بصراحة

3- الحصان الأسود في المرحلة دي كان الأسكندرانية ... مش عارف حاسس بحماسة غير عادية عندهم وزي ما يكونوا كانو نازلين حرب ويا ناخب يا منخوب هههههههههههههه ... احسن رجالة بحري أبو أحمدات اللي ستاتهم ما يفرقوش عن رجالتهم في الجدعنة والمواقف المُشرفة .

4- موضوع بقى الحجة إن الإقبال غير متوقع ومعليش ومش عارف إيه ... دي حجة الفاشلين ... توفير أوراق مش مشكلة ... توفير صناديق مش معضلة ... فلما تكون لجان كتير في عين شمس ما أنتخبوش أمبارح والناس متعطشة وجت بعدد هائل النهاردة وسيادتك تجيب صندوق واحد يتملي أول تلت ساعة وتستنى مدد تاني .. يبقى أنت فاشل

5- موضوع 4 ساعات أو 5 ساعات القاضي يتأخر عشان مش عارف لجنته فين ... ده لا مؤخذه شغل كفتجية

6- من الواضح ولحد ليلة الانتخابات زي ما سمعت من قضاة بلسانهم إنهم مش عارفين حاجه في أي حاجه ... ولم يتلقوا أي تدريب .. يبقى عيب

7- لما أسمع دلوقت قاضي وهو رئيس لجنة بيصرخ من لجنة مدرسة الحلمية الثانوية بنات - يااااااااااه ... والله زمان .. ياما كنت بأروح هناك في مهمات خاصة وأنا صغير - واللجنة متحاصرة من 1500 شخص جعانين ديمقراطية وحريه ههههههه ...لأنهم كانوا واقفين في طوابير الانتخاب واللجنة قفلت الساعة 7 وبخ على كده بالرغم من تأكسدات اللجنة العليا إنه لن يتم غلق لجنة فيها طوابير وناس لسه ما صوتوش طالما موجودين داخل اللجنة ... الراجل اخد باقي القضاة والموظفين وطلعوا فوق سطح المدرسة وبيستغيث الدنيا كلها عشان يخرج هو الصناديق .

8- التركيز الإعلام المختصر لازم يبقى أكثر وأفيد من كده .... يعني لحد دلوقت أتحدى ناس كتير يكونوا عارفين إختار إتنين فئات ولا إتنين عمال

ولا ربع مشكل .... عيب في حق الإعلام

9- الفردي مصيبة كبيرة بصراحة ... أنا شخصياً لأخر لحظة ما كنتش عارف أروح فين وأجي منين ... 147 بني أدم يا جماعة ... هو في إيه ؟

10 - لازم الاحزاب والكتل الإنتخابية تبعد عن مهاجمة الأخر ... وتركز على برنامجها وتشرحه للناس بهدوء منعاً للتشتت ومنعاً للوصول إلى درجة الضجر والقرف من الجميع اجمعين

هابقى اكمل بس نفسي أسمع منكم

[se_ Elsyed]

شيء غريب ... ولم اسمع عنه على مستوى العالم كله

لما أسمع دلوقت قاضي وهو رئيس لجنة بيصرخ من لجنة مدرسة الحلمية الثانوية بنات - يااااااااااه ... والله زمان .. ياما كنت بأروح هناك في مهمات خاصة وأنا صغير - واللجنة متحاصرة من 1500 شخص جعانين ديمقراطية وحريه ههههههه ...لأنهم كانوا واقفين في طوابير الانتخاب واللجنة قفلت الساعة 7 وبخ على كده بالرغم من تأكسدات اللجنة العليا إنه لن يتم غلق لجنة فيها طوابير وناس لسه ما صوتوش طالما موجودين داخل اللجنة ... الراجل اخد باقي القضاة والموظفين وطلعوا فوق سطح المدرسة وبيستغيث الدنيا كلها عشان يخرج هو الصناديق .

تخيلوا طلعوا كلهم ستات وهما اللي محاصرين المدرسة ومش راضيين يمشوا إلا أما ينتخبوا لانها لجنة مخصصة للسيدات فقط وهما من أمبارح مش عارفين ينتخبوا من الزحام

إيه العظمة دي ؟

ههههههههههه ده لو واقفين على مكان بيفرق لحمه مش هايحصل كده

[se_ Elsyed]

11- أكثر ميزة من موضوع الثلاث جولات .. إن الموضوع هايبقى عامل زي الإمتحان .. يعني زمان لما كنا في ثانوي كانت الثانوية العامة في السودان بتخلص قبلنا ... فكنا نجيب نماذج الإمتحانات ونشوف الدنيا عاملة إيه ... كذلك سيفعل المُرشحون في الجولة الثانية والثالثة ... وكذلك سيفعل الناخبون ... وكذلك ستفعل اللجنة العليا للإنتخابات ..الكل سيتلافى الإخطاء .. الكل بالتأكيد سيُغير تكتيكة وخططه .. خصوصاً إن الفترة الزمنية طويلة نوعاً ما ويستطيع الجميع ان يتحرك فيها بحرية ويعدل ويغير الخطط والأستراتيجيات .... وما سيثعطي زخم للعملية هي المؤشرات الأولية ويا سلام لو كانت محسومة لجهة ما او حزب او حتى فردي ....

اعتقد إن الجولتان القادمتان سيتكونان أشد سخونة لان الأوراق بقت مكشوفة ... وخصوصاً الجولة الثالثة هاتبقى مدبحة لان كلها فردي مافيش قوائم ...

شغل الفردي بيفكرني بحروب زمان بتاعت السيف ... يعني عضلاتك ومخك بس يا معلم والساحة فاضية وفارس لفارس

[se_ Elsyed]

12- طبعاً الجميع كان متوقع إكتساح التيار الإسلامي للإنتخابات .. لأنه ببساطة مِزاج عام في البلاد العربية التي تشهد ربيع عربي وسبقتنا فيه تونس والمغرب ... لان الناس زهقت من الديكتاتورية العسكرية ومن على شاكلتها .. وبالتالي الكل قال خلينا نجرب مش هانخسر اكتر مما خسرناه ... والاهم هو وجود القوى الإسلامية على الارض وألتحامها مع الناس ... وده موضوع طويل ممكن نتحدث فيه بعدين .

13 - أنا حتى الان لا اكف عن الدعاء على المخرف مبارك وعصابة الحرامية ... تخيلوا في عز التزوير الفج كان اللي بيكسب في دايرة بياخد 4 الاف صوت .... تخيلوا ؟ من كام .. من دايرة فيها 200 او 300 الف صوت ... اليوم أسمع عن مرشحين في بورسعيد وهي دايرة صغيرة جداً يمكن كل الأصوات فيها لا يتعدى 200 الف ... ناس من المرشحين واخدين 124 الف صوت ... لأ وهايدخل الإعادة مع التاني اللي أخد 56 الف ... لان اللي بيكسب بدون إعادة لازم يكسب بـ 50% +1 ؟؟؟؟؟؟؟؟؟!!!!!!!!!!!!!!! ده شيء خيالي

14- في دايرة قصر النيل أمبارح .... طبعاً ما لا يقل عن 100 مرشح ... وتخيلوا إن كل المرشحين واخدين أصوات ... يعني الاول 33 الف .. والتاني 31 الف والثالث 29 الف .. والباقي ما بين 8 الاف و 6 الاف و3 الاف .... إلخ ؟

ده شيء يُحسبب للشعب المصري بصراحة واللي حصل ده إعجاز وزي ما يكون كنا محبوسين في قمقم وانطلقنا

نكمل

[se_ Elsyed]

15 - في مخالفة صارخة حدثت وتحدث ... وهي إعلان نتيجة القوائم ... وذلك إن كان من المقرر أن يتم الإعلان في النهاية ... لان ببساطة جداً الحرية والعدالة والنور والكتلة هايكتسحوا في الجولتين الباقيتين ... وتحديداً في الجولة القادمة اللي هاتبقى قوائم وفردي .. أما الجولة الثالثة فهي فردي فقط .. لان ببساطة الناس بتحب القوي الكسبان ... والاغلبية وهما مغمضين هايدخلوا الجولة القادمة ويصوتوا للحرية والعدالة والنور .. خصوصاً إن اغلب المحافظات القادمة هي أرياف وهم شعوب طيبة والوازع الديني عندهم قوي لأنهم عايشين الدنيا ببساطة .

16- الظاهرة التي يجب أن تُدرس جيداً هي حصول حزب النورعلى المكرز الثاني في معظم الدوائر بالرغم من إنهم لم يشتغلوا سياسة مطلقاً قبل 7 شهور مثلاً .. ولم يكن لهم وجود في الشارع لأن كلهم كانوا في السجون .... على عكس الأخوان اللي شاربين سياسة ومعجونين فيها من أكثر من 70 عاماً بين كر وفر .... ومش هاتكلم عن الوفد والتجمع والناصري ومش عارف مين لأنها احزاب تيبست وتكلست وماتت وفاحت ريحتها ومكانها لازم يبقى في الأنتيكخانة