نتائج المرحلة الأولي - إنتخابات مجلس الشعب ( فردي )

[se_ Elsyed]

عملها البدري فرغلي وكسب مقعد عمال بورسعيد .. بعد ما الاخوان إدوا بومبة للسلفيين ووعدوهم يردوا جميل وقوفهم بجانب اكرم الشاعر .. وبعدين بيبصوا حواليهم النهاردة مالقوش أخ واحد جاي اللجنة .. في حين كل الليبراليين والناس العاديين راحوا أيدوا البدري فرغلي اليساري العمالي اللي بيموت نفسه عشان العمال .

- وطارق مصطفى بيزحف نحو الكرسي .... مش فاهمها دي إزاي ؟

- وبجد لو كسب مصطفى النجار هانخسر شخص عالم جليل زي محمد يسري

ولو كسب محمد يسري يبقى هانخسر شاب ثائر ودم جديد وشاب دمث الخلق تحبه قبل ما تشوفه زي النجار ده ..

ما ينفعش يقسموا الكرسي ؟

يعني الدكتور يسري يحضر جلسة ... والجلسة اللي بعدها يحضر الدكتور مصطفى ؟

[se_ Elsyed]

واضح إن عبد المنعم الشحات لسانه وداه في داهية

النائب الممثل للشعب اللي يسيب قضايا الدنيا كلها ويمسك في تغطية وجوه التماثيل اللي في المعابد الفرعونية بالشمع ... ويقول إن ادب نجيب محفوظ عبارة عن دعارة ..

يبقى يستاهل اللي يجرى له

أظن ده في مجتمع الكفر البواح ... شوفنا الرسول الكريم قعد قد إيه مشغول برسالتة وبيجاهد عشان يوصلها ...كل ده وكان شايف الأصنام امامه ومظاهر الشرك ... ومع ذلك فهو من لا ينطق عن الهوى واللي علمنا فقه الأولويات

[se_ Elsyed]

محمد عبد العليم داوود - النائب القديم في حزب الوفد .... يفوز بالدائرة الثالثة في كفر الشيخ اللي كانت متقفلة للسلفيين

الجدع ده جامد قوي وكان طايح في بتوع الوطني في عز جبروتهم

- وخبر سيء .. فوز الفل هشام سليمان في مصر الجديدة

يبقى عندنا عمرو حمزاوي .... وهشام سليمان فلولو ..... الشباب السيس في مصر الجديدة قالوا كلمتهم ههههههههههه

[se_ Elsyed]

سين سين لما ينشن .... لازم النشان يصيب

رصد | برلمان الثورة | النتائج الاولية فى دائرة السلام ومطرية وعين شمس والمرج ومدينة السلام تفيد بتقدم كبير لمرشحى الحرية والعدالة سيد جاد الله وأشرف سعد على مرشحى النور المهندس نضال والاستاذ خالد الزقلة

لسه بقى الطعن بتاع فرز القوائم يتقبل لأن حصل فيه مهازل .... والدكتور محمد محسوب من حزب الوسط يكسب .. وبكده ابقى جبت 100 %

شوفتوا بقى ؟

الزتونة - نضال - وخضرة المحشي - خالد الزقلة - خسروا .... يا خسارة تعبك يا حماتي ...

يالله تتعوض في طبخة تانية إن شاء الله

[se_ Elsyed]

مرشح مستقل وعلى قد حاله .. وفي جولة إعادة ... ياخد 118 الف صوت وشويه .... دي كانت مدبحة بصراحة

أتحدث هنا عن البدري فرغلي في بورسعيد

---------

وهناك دائرة إخري في الأسكندرية موووووووووووووووووولعه

شبكة رصد

رصد | برلمان الثورة | الإسكندرية | نتائج الفرز حتي الآن فى دائرة مينا البصل بالاسكندرية

#EgyElections2011 #RNN

د/ حمدى حسن ( حرية وعدالة - فئات ) 64000

أ/ عصام حسنين (فئات - نور ) 57000

أ/ محمود محمد (عمال - حرية عداله) 66000

أ/ عصام محمود (عمال- نور ) 50000

تقارب كبير حتى أخر صفارة

ولو إني عارف الدكتور حمدي حسن من برلمان 2005 ... وكان المتحدث الرسمي تقريباً بإسم الاخون .. وشوفناه في تظاهرات رفض تمديد قانون الطواريء وأيضاً في رفض التعديلات الدستورية خصوصاً للمادة 76 بتاعت جمال إبن أمه اللي مالحقش يتهنى ويلبس بدلة الرئاسة .. ويارب يلبس بدلة الإعدام

[متعب]

نجاة مرشح "العدالة والتنمية" من الاغتيال بالشرقية

نجاة مرشح "العدالة والتنمية" من الاغتيال بالشرقية

كتب - أمير سالم :منذ 3 ساعة 15 دقيقة

نجا عمرو سماحة رئيس حزب العدالة والتنمية المصرى ومرشح الحزب فى الدائرة الأولى بالشرقية قبل قليل من الموت فى عملية اغتيال بالرصاص أثناء قيامه بجولة انتخابية بالدائرة .فوجئ المرشح أثناء خروجه من قرية الزوامل التابعة لمركز بلبيس قاصداً منيا القمح بسيارة نصف نقل تعترض موكبه ونزول عدد من راكبيها المدججين بالأسلحة النارية وقيامهم بإطلاق وابل من الرصاص على سيارته والموكب المرافق له .

تسببت كثافة الرصاص في انقلاب سيارة المرشح عدة مرات وإصابته وسائقه بسحجات متنوعة ونجيا من الموت بأعجوبة.

تم تقديم الإسعافات الأولية للمرشح الذي تقدم ببلاغ رقم 10360 بقسم شرطة مشتول السوق ولم يتهم أحداً بارتكاب الحادث، وتم إخطار النيابة التي تولت التحقيق.

اقرأ المقال الأصلي علي بوابة الوفد الاليكترونية الوفد - نجاة مرشح "العدالة والتنمية" من الاغتيال بالشرقية

[se_ Elsyed]

هو في حزب إسمه كده في مصر ؟

ولا دي بقى دعاية إنتخابية قبل المعمعة ؟

على العموم لازم يتم تحقيق في الموضوع ده ونشوف النتايج

[se_ Elsyed]

إكتساح للدكتور مصطفى النجار .... وحظ أوفر بجد للدكتور محمد يُسري

رصد | برلمان الثورة | من داخل لجنة الفرز بالدائرة الثالثة مدينة نصر بالقاهرة :

اكتساح الدكتور مصطفي النجار مرشح العدل "فئات" بفارق 13 ألف صوت بينه وبين دكتور محمد يسري المرشح المستقل والمدعوم من الحرية والعدالة ..

وتقدم لمرشح المستقل "عمال " عمرو عودة على مرشح الحرية والعدالة "عصام مختار " بحوالي 2000 صوت ..

وفرز الصناديق في طريقه الي النهاية

مدينة نصر ومصر الجديدة عملوا إنقلاب ثوري على سيطرة الحرية والعدالة والنور .... تقريباً هاتبقى من الدوائر النادرة على مستوى الجمهورية اللي مافيهاش لا حرية ولا نور هههههههههههههههه

[Ahmed Anwer]

تصويت عكسي

الناس بتصوت ضد الحرية و العدالة ،،، زي ما كانت بتصوت ضد الحزب الوطني

عشان الديمقراطية حرام ،،،،،،، ربنا ما رضاش للشحات يمشي في الحرام

بيقولك التماثيل في اسكندرية مولعة شماريخ ! ليه ؟؟ اصلهم بيقولوا باي باي لعم الشيييييييخ !

[se_ Elsyed]

تصويت عكسي

الناس بتصوت ضد الحرية و العدالة ،،، زي ما كانت بتصوت ضد الحزب الوطني

عشان الديمقراطية حرام ،،،،،،، ربنا ما رضاش للشحات يمشي في الحرام

بيقولك التماثيل في اسكندرية مولعة شماريخ ! ليه ؟؟ اصلهم بيقولوا باي باي لعم الشيييييييخ !

لأ يا ريس

الشحات سلفي مش حرية وعدالة

الخضيري مُرشح من فترة من الحرية والعدالة عشان يكون رئيساً لمجلس الشعب لو فاز

والسلفيين كانوا بيهددوا الاخوان إنهم هايدعموا طارق طلعت مصطفى إذا لم يدخلوا معهم في صفقات ويدعموا مرشحيهم اللي نازلين في دواير أمام فلول او امام اي حد مش اخوان بشكل عام ..... يعني سيب وانا أسيب

لكن شكلها كده ما تمتش صح . بدليل إكتساح البدري فرغلي لمرشح السلفيين ... يعني الاخوان وقفوا على الحياد يتفرجوا عليه وهو بيفترسه ...

وشكلها كده إتردت لهم في مصر الجديدة .. لان مصطفى النجار إفترس محمد يسري المدعوم من الحرية والعدالة مع إنه نازل مستقل ... وبالتالي شكل السلفيين وقفوا يتفرجوا

وده بيُنبا بفشل أي تربيط او تحالف محتمل بين الحرية والعدالة والنور في البرلمان ....

لكن لو تم الضغط الشعبي على المجلس العسكري وقام البرلمان فيما بعد بتشكيل الحكومة ... يبقى غصب عنهم لازم يتحالفوا عشان يضمنوا أغلبية في تشكيل الحكومة

عادي بتحصل تربيطات واتفاقيات .. وده موجود في كل الدنيا ... بس اهم حاجه التصرفات دي تبعد عن تضليل العامة والبسطاء

[ريمون]

حيدر بغدادي ده كان في الحزب الوطني

حسبنا الله ونعم الوكيل

الحمد لله هيبقى فيه فلين تلاته بس كسبوا من المرحله الاولى

هيقعدوا فى المجلس زى قلتهم ع الجنب و يخسروا الدوره الجايه.

عقبال المراحل الجايه يا رب

طب تصدق بالله يا ريمون ؟

( قول لا إله إلا الله بسرعه ...هههههه )

نفسي ينجح بتاع 10 او 20 فِل .. عارف ليش ؟

عشان الأشكال القذرة دي بتبقى زي الصراصير ... ما ينفعش تعيش في بيئة نظيفة ... وبالتالي عاوزهم يتعذبوا وهما بيشوفوا مجلس شعب حقيقي مش شوية بلاليص بيسقفوا ... وعاوزهم يشوفوا وجه جديد غير فتحي لا مؤخذه سرور بتاع سيد قراره ... وعاوزهم يبقوا عبرة لمن يعتبر .. ويقعدوا كده في زاوية منبوذين زي لا مءخذة البوبي الجربان

لا الله إلا الله

انا بصراحه متكيف موت من النتايج لغيه دلوقتى

اكتر اتنين انبسطت لهم هما البدرى فرغلى و عبدالمنعم داوود دول رجاله من ظهر رجاله من زمان

و بصراحه مش مصدق نفسى ان عبدالمنعم الشحات قرب يخسر فى معقله رغم انه كان معاه خمسين الف صوت اكتر من حسنى دويدار. ده بيدل ان حس المصريين عالى اوى

[se_ Elsyed]

و بصراحه مش مصدق نفسى ان عبدالمنعم الشحات قرب يخسر فى معقله رغم انه كان معاه خمسين الف صوت اكتر من حسنى دويدار. ده بيدل ان حس المصريين عالى اوى

لأ صدق

بكره يطلع الشحات ويقول : الحمد لله الذي نجانا من الكفر ... انا كنت هارتكب ذنب عظيم لو كنت فزت ودخلت في لعبة الديمقراطية الكافرة دي "

لو كان مسلك لسانة شويه .. كان زمانه مترستق تحت البرلمان وحاطط برافن تحت بطاته ...

[Ahmed Anwer]

مأنا عارف إن الشحات نور سلفي

بس النكت كانت سريعة فقلت ألحق أنقلها

بيقولك ماذا قالت الصناديق ،، قالت مايحكمشي

الشحات كان اختبار من ربنا .. عمر طاهر

عبدالمنعم الشحات الوحيد اللى جمع المصريين كلهم فى دعواتهم انة يسقط ومرشح الاخوان يفوز -- ولا مبارك ياجدع”

بخصوص مدينة نصر الموضوع مختلف

الأخوان دعموا محمد يسري بكل قوة قلبا و قالبا

مش عشانه

عشان مرشح العمال عصام مختار

لأن النجار دعم مرشح شاب اسمه عمرو عودة

المفاجأة إن عمرو عودة يتجه للفوز في الإعادة بقوة بعد أن كان الفارق كبير بينه و بين عصام مختار في الأنتخابات الأولي

يعني مدينة نصر و مصر الجديدة طردوا الأخوان كلهم

[se_ Elsyed]

هل تكون لأصوات المغتربين دوراً في حسم النتيجة النهائية لجولة الإعادة ؟

خصوصاً إن العملية كانت ملمومة وكل دايرة فيها أربعة مرشحين كل إتنين بيتنافسوا على مقعد

على العموم ربنا يهدي عبد المعز ويعلن النتيجة كاملةً غداً خلينا نعرف راسنا من رجلينا ونقعد نتابع بهدوء المرحلة الثانية

[se_ Elsyed]

ما شاء الله

الحرية والعدالة قطار إكسبريس لا يقف في المحظات

رصد | برلمان الثورة | بالأرقام النتائج النهائية فى الدائرة الاولى - دمياط .. فوز مرشحى الحرية والعدالة #EgyElections2011 #RNN

د. على الداى (فئات - حرية وعدالة ) : 135.000

الاستاذ . ناجى شتا ( فئات - نور ) :59.000

م.محمد أبو موسى ( عمال - حرية وعدالة ) : 99.400

محمد الطويل ( عمال- نور ) : 90.000

[ريمون]

و بصراحه مش مصدق نفسى ان عبدالمنعم الشحات قرب يخسر فى معقله رغم انه كان معاه خمسين الف صوت اكتر من حسنى دويدار. ده بيدل ان حس المصريين عالى اوى

لأ صدق

بكره يطلع الشحات ويقول : الحمد لله الذي نجانا من الكفر ... انا كنت هارتكب ذنب عظيم لو كنت فزت ودخلت في لعبة الديمقراطية الكافرة دي "

لو كان مسلك لسانة شويه .. كان زمانه مترستق تحت البرلمان وحاطط برافن تحت بطاته ...

انا كنت متأكد ان الاخوان هيكسبوا السلفيين فى اغلب المواجهات

لكن عبد المنعم الشحات فى المنتزه؟؟ و من مرشح مدعوم من الاخوان مش اخوانى. ده كانت المفاجأه

[se_ Elsyed]

رصد | برلمان الثورة | فوز محمد الفلاحجى ( فئات - حرية وعدالة ) وعمران مجاهد (عمال - مستقل ) فى الدائرة الثانية بدمياط

اخصصصصصصصصصصص

الجدع مجاهد ده كان متورط للرُكب في فضيحة العلاج على نفقة الدولة ..

وكان شغل توريد لأسماء ناس ببتعالج على حساب البلد وهما مالهمش وجود

مش عارف جت إزاي دي وإزاي انتخبوه تاني ؟

[se_ Elsyed]

رصد | برلمان الثورة | فوز فوز مرشحى الحرية والعدالة فى الدائرة السابعة ( الجمالية ومنشأة ناصر والدرب الأحمر وباب الشعرية والضاهر) خالد محمد وناصر عثمان

هو مش حيدر بغدادي في الدايرة دي ؟

[se_ Elsyed]

يا ولاد العفريتة

قطر ما بيهمدش

رصد | برلمان الثورة | عاجل: فوز صابر أبو الفتوح (عمال - حرية وعدالة) ومحمود عطية (فئات - حرية وعدالة) عن الدائرة الثالثة محرم بك الاسكندرية

[Ahmed Anwer]

فرحة عارمة تجتاح تماثيل المتحف المصري و تبادل التهاني و عوده بعض المومياوات الهاربه