مواقف وطرائف صينية

[se_ Elsyed]

أقوم هذه الأيام بتجهيز اختي الصغير اللي ستتزوج بعد بضعة شهور .... حد يسمعنا زغروطة .. وعقبال عندكم يا حبايب .. المهم بقى عشان هي الصغيرة وأخر العنقود وبتدلع علينا فالواحد مش قادر يرفض لها طلب .. أي نعم هي أديتني ليسته طويلة عريضة تقطم الضهر وأنا راجع السعودية وكلها طلبات من النوع الفاخر .. لكن مش إشكال كله يهون بس نخلص منها .. قصدي نخلص الموضوع ..

- المهم من كام يوم كده لقيت محل أدوات منزلية جنب بيتي عامل تخفيضات هايلة فقولت أخد أم العيال معايا وأروح أستقضى للبنت طقم صيني على شوية فناجين وكبايات شاي لزوم الجهاز يعني .

- المهم روحنا المحل فأول حاجة زوجتي سألتني عن معنى إسم المحل .. فإسمه هو " Vellory & Boch " فقولت لها يا ستي ما تقفيش عند الحاجات الصغيرة دي .. وبعدين ما انتي تخصص ألماني وشكل الإسم كده ألماني .. وبعدين كمان ما احنا قعدنا في مصر 100 سنة فحد فكر في معنى إسم شملا ولا شيكوريل ؟ ولا هي حلال لينا وحرام على غيرنا ؟ ..

- سيبك من الموضوع ده وتعالي نروح قسم الصيني ونستلقط طقم حلو كده على ذوقك .. فبالفعل لقينا طقم تحفه .. أطباق رز وطبيخ على سلاطين شوربة على سلاطين زبادي من اللي بتعمله طنط أم فيروز .. حاجات بصراحة تخبل .. كام يا عم الحاج ده .. قال سعر الطقم بعد التخفيض 46000 ريال ( بالصلاتو عالنبي 78 باكو مصري ) ... أنا طبعاً كأن حد خبطني بطاسة على نفوخي وعملت زي جيري بعد ما توم يعمل فيه مغرز وتماسكت ولم أقع من طولي .. فبيني وبينكم فكرت للحظات إني أضحي بتحويشة 10 سنين غربه وما أكسرش بخاطر البنت اللي على وش جواز وأهو المبلغ اللي معايا يا دوب يجيب لها طبقين رز وسلطانية زبادي واهي حاجة تفرحها .. فقولت طب فرضاً كانت طبخه شوربة ؟ يبقى إيه مصيرها دي ... يعني يشربوها من الأذان على طول .. فقولت إغزي الشيطان يا س س ودور على حاجة حنينه على قد الـ Budget بتاعتك .

- فقولت لزوجتي .. سيبك من الكلام الفارغ ده صيني إيه وبتاع إيه ... ده حتى مش عملي وممكن ربنا يرزقهم بعيل شقي يدشدش لهم الصيني والياباني كمان ... إيه رأيك في طقم فناجين شاي وقهوة وتكون حاجة محترمة ؟ فقالت Ok ماشي أهو الواحد يحس بالفخر والإعتزاز وهو داخل على نسايبنا وهو شايل كرتونة الفناجين وحاجة تشرف بصراحة ...

- ما طولش عليكوا روحنا لركن الفناجين وعجبنا طقم بقى ما أقولكمش .. الواحد يخاف يشرب فيه الشاي أحسن بؤه يجرح الفنجان .. وكمان الأطباق إيه مخلية منظر الفنجان هايرقص على الطبق ... كام ده يابا الحاج ؟ .. فالراجل كان صبوراً معنا وقال بعد الخصم ومن الاخر ومن غير لماضه .. 17000 ريال ( بالصلاة عالحبيب 29000 لحلوح فيومي ) فنظرت إلى زوجتي وعندها إنحدرت دمعة ندم من عيني ولاحظت زوجتي ذلك فسألتني بكل حنان : مالك يا سي السيد .. إنت بتعيط ؟ فقلت لها لأ أبداً دي دموع الفرح .. أنا بس صعبان عليه إن أختي هاتتجوز وتسيبنا ... وبصنعة لطافة قولت لها بلاها طقم شاي .. ده حتى أنا مش كييف وإذا اتزنقت في كوباية شاي وأنا بأزورهم أبقى أنزل القهوة وكلها ربع جنيه ومزاجي يبقى عال العال ..

- وسألتها : سيبك من الصيني عشان شكله كده مش هاياكل معانا .. إيه رأيك نجيب لها صينية فضة محترمة .. أهي تبقى مالتي فانكشن ممكن تقدم عليها فناجين الشاي - اللي ماشترينهاش - أو سلاطين الزبادي - اللي لسه ماتعملش - وبرضوا تبقى حاجة حلوه ومنظرها كويس لما تتحط في النيش أهي تعمل منظر ... فقالت : والله فكرة .. يالا بينا على قسم الصواني ..

- ماطولش عليكوا : تركنا قسم الصيني بما فيه وروحنا جري على قسم الصواني .. وعجبتنا صينية تحفة وحجمها حلو يعني ممكن تشيل طقم شاي كامل من 12 قطعة بالمستريح قوي .. كام دي يابا ؟ طبعاً الراجل كان خلاص فقسني وعرف اللي فيها .. فانا كنت حاسس إن لسان حاله بيقول : والله إنت فنجري بؤ وإنت لا بتاع شرا ولا ببيع .. فقال لي دي بعد الخصم ومن الآخر واللهم طولك يا روح عشان اليوم ده مش هايعدي بـ 1600 ريال ( 2700 ج م ) ففكرت قليلاً وقولت بقى صينية واحدة تعمل في كده .. ده أنا لما جيت اتجوز لميت الموضوع كله ب 1500 جنية ... وبالفعل إتخذت قرار سريع وقولت له طب سيبها وأنا هارجع لها تاني ..

- وتشاورت مع زوجتي وقولت لها الناس دي بتتكلم جد ولا بيعملوا فينا مقلب من مقالب الكاميرا المخفية .. ولكن في نفس الوقت وبقرار حاسم قولت لها لأ بقى كده كبرت في دماغي و لازم أشتري حاجة من المحل ده وانفعهم وفي نفس الوقت أفرح قلب البنت المسكينة دي اللي أول مرة تتجوز ... فقولت لأم عمر : خلاص انا قررت إني أشتري لها ملاحه .. نحط فيها الملح أبو فلفل .. انا بأحب قوي وأنا قاعد على السفرة وبأكل من طبق الفول أفضل أرش ملح وأخليه مِش .. وفعلاً روحت لقسم أدوات السفرة وعجبتني ملاحه صغنطوطة يادوب تاخد لها رشة ملح وهي مكونة الكريستال على شوية فضه .. فقولت لها بس هي دي مبتغايه ولازم أشتريها مهما بلغت التضحيات .. تخيلي أختي هاتفرح قد إيه بها .. ولا تصوري المنظر اللي جاي ده معايا : بعد ما نجيب العفش أخطف رجلي لحد الميدان وأأجر عربية نص نقل تنقل العفش لمنزل الزوجية .. وبعد ما نرص كل حاجة على العربية النص نقل أروح حاطط الملاحة فوق عشان الناس تشوفها وبالذات الوليه أم صبحي اللي عينها تندب فيها رصاصة وهي بتبص من بلكونة تالت دور ... أنا متوقع منظرها دلوقت وهي هاتتجنن على الملاحه وحلاوتها ... وعماله تقول لأم فكري اللي قدامها : شوفتي ياختي إخواتها جايبين لها شيء وشويات من بلاد بره .. دي حتى الملاحه جايبنها من النوع المستورد .. مش إحنا إللي كل حاجتنا من سوق الكانتو .. وأم فكري ترد عليها - ما هي أصلها شريكتها في المصايب - : أيوه يا ختشي على رأيك .. ده انا سمعت من أبو فكري إن اخوها سين سين اللهم صلي عالنبي وعقبال ولادك ماسك منصب مهم قوي في السعودية وبيقبض بالدورار كمان .. يبقى مش عايزاه يجيب لها ملاحه ودماسة كمان .... يالا مالناش دعوة بالناس وعقبال الحبيايب .

- المهم فوقت من الفيلم التسجيلي ده وسألت الراجل وقولت له : بكام دي يا عم وده اخر سؤال معليش انا تعبتك معايا وكل سنة وإنت طيب ورمضان كريم .. وما تخافش هاشوفك في الأخر وأنا بأحاسب وهابسطك إنت والكرو اللي شغالين في المحل وإنتوا بتلفوا لي المشتريات بتاعتي : فالراجل إنفرجت أساريره وفرح وقال لي بكل ثقة : 180 ريال يا باشا وإحنا تحت امرك والمحل محلك ( 300 ج ح ن - 300 جنية حار ونار - ) هنا إنفجر بركان الغضب عندي وبالفعل وصلت لدرجة لا يمكن أن أتحكم فيها في أعصابي وحلفت على مراتي إننا لو ماخرجناش حالاً من المحل ده هاسيب عليهم الواد عمر يطربق الصيني ده فوق دماغهم .. يالا بلاش كلام فاضي وقلة أدب ... ناس ماعندهاش دم ..

[emmyyy]

يلا معلش كله يهون علشان عروستنا وعقبال البكاري lo::

لكن يا سي السيد انت ليه متوجهتش مباشرة للبطحه والله هناك لو عايز لبن العصفور هتلاقي واحد هندي وقف بيه brth)

عموما انت يظهر متجوز من فترة طويله لان اسعار الصيني حته في مصر بقت هلاميه lo:: ربنا يكون في عون كل الي بيتجوزوا

[Cleo]

ألف مبروك يا س س .... lo::

تعيش وتجوزها وتجوز ولادها....

بارك الله لهما وبارك عليهما و جمع بينهما فى خير

[Lighthouse]

مبروك يا س س

وعقبال ماتجيب لاولادك يارب

طيب ماتجرب تشتري لها من مصر

اصل صحيح عندك حاجات اجمل

بس غالية مولعة نار

غير العالم الغلسة بتوع الجمارك وحركاتهم

احسبها ح تلاقي في مصر ارخص

[se_ Elsyed]

متشكرين يا ولاد عقبال ما نجيب لكم الشوار بتاعكم .. وأجيب برضوا نفس العربية النص نقل بتاعت العفش ( وهاتهاود معاكو في السعر ... )

لكن يا سي السيد انت ليه متوجهتش مباشرة للبطحه والله هناك لو عايز لبن العصفور هتلاقي واحد هندي وقف بيه 

إيمي : إنتي مين ؟ عدو ولا حبيب ؟ أصل البطحاء دي ما بيعرفهاش إلا المدقدين في الرياض وبقى لهم فترة ..

بس بطحت مين ؟ دي لو الحاجة ما عجبتهاش هاتبطحني انا ويبقى أنتي السبب . أصل عقبال عندك عامله فيها الليدي ديانا بنت الأمير تشارلز الرابع ملك لينخشتاين وجُزر الآزور...

[mnman]

اخويا س س: اولا الف مبروك للعرسان!!

بس مقلتلناش الملاحة ام 300 جنية دي بلملح ولا فاضية!!! تفرق خد بالك متخليش حد يضحك عليك!!! هيا سعرها 10 جنية فاضية!!! و 300 مليانة ملح!! ممكن تخلية يحطلك رشة ملح واديلة 15 جنية!!! معلش تعالي علي نفسك المرة دي!!!

بقي ياراجل رايح تتفرج علي طقم صيني 46000 ريال!!!! لية !! حتاكل فية وانت سايب ايديك :P !!!

فاليحيا الملامين!!! وصنع في مصر!!!

[فــيــروز]

ألف مبروك يا س س .... mf(

تعيش وتجوزها وتجوز ولادها....

بارك الله لهما وبارك عليهما و جمع بينهما فى خير

بالطريقه دى اقصى طموحاتنا انه يجوزها الاول mc(:

وولادها بقى ربنا يتولاهم :P :D

[ابو يوسف]

طبعا الف مبروك والغالى يرخص للعروسة ..

بس كدة ممكن ادوات المطبخ لوحدها توصل لتلاتة اربعة مليون ج ح ن !!!

أما عمر ح يتجوز بكام ؟؟؟؟

:P

[se_ Elsyed]

طبعا الف مبروك والغالى يرخص للعروسة ..

بس كدة ممكن ادوات المطبخ لوحدها توصل لتلاتة اربعة مليون  ج ح ن !!!

أما عمر ح يتجوز بكام ؟؟؟؟

  :P

إنت عارف يابو يوسف انا ما يهمنيش 4 مليون 5 مليون .. ماحنا ياما صرفنا ملايين ..

طب ده انا يوم الماتش الاخراني اللي مايتسماش نزلت مشاريب للناس المهنئين بحوالي 10 مليون .. وجاتلي فاتورة فردانية لواحد طلب سحلب وطاولة بحوالي 2 مليون .. ودفعت لا همني أهم حاجة نتبسط وناكل .. ما حدش واخد منها حاجة ...

[Scorpion]

انت حتذلني يا سي السيد علي كوباية سحلب و طاولة ناقصها قشاط ابيض.. مش انت اللي اتفشخرتلي فيها لما جيت انقط عروستنا الصغيرة... وقلت للينوكس ان سكوب Full Credit.... دلوقتي جاي تشبحللي فوق صفحات منتدانا الموقر ... ايه نسينا ... علي العموم احنا اهل الصفوة ( واخدلي بالك ) ما بنبصش للرفايع دي ... و بكره حساب السحلب حيوصللك باليورو .....و ما تبقاش تعزم بقلب جامد كده المرة الجاية fsh::

[فــيــروز]

علي العموم احنا اهل الصفوة ( واخدلي بالك ) ما بنبصش للرفايع دي ... و بكره حساب السحلب حيوصللك  باليورو .....و ما تبقاش تعزم بقلب جامد كده المرة الجاية  fsh::

يا جماعه الست صفوه بتقول لكم تبطلوا تجيبوا فى سيرتها بالتى هى احسن وتشحططوها معاكم على صفحات وموضوعات المنتدى .. احسن هترفع عليكم قضية سب علمى وتقفل ل س.س. القهوه بالدوباره وتخلى نظر سكوب شيش بيش .. :P

[Farida]

الف مبروك يا سى السيد لعروستنا على فكرة انا اختى بتجهز برضه ......انا رأيى تديها حقها ناشف و عمار يا مصر و عليك و على التوحيد و النور عنده اطقم كده ....او سوق

التلات عنده حاجات برضه مش بطاله ...و و الله انا بعد سنه من الجواز نزلت جبت طقم ميلامين محترم و مش رخيص على فكره و هو اللى بناكل فيه انا و العيال و بياخد كل هدر و هدر .....

تم تعديل 7 نوفمبر 2004 بواسطة Farida

[emmyyy]

إيمي : إنتي مين ؟ عدو ولا حبيب ؟ أصل البطحاء دي ما بيعرفهاش إلا المدقدين في الرياض وبقى لهم فترة ..

من الرياض حي النخيل مستشفي دله سابقا فلوريدا قبلي القطار حاليا بس ووووالله الرياض برقبتها :unsure:

عموما انت اصلك يا سي السيد نقيت محل من الي هما بس في حتت تانيه كتير ارخص وبعدين اذا مكنتش ان تجبلها مين يعني الي هيجبلها

الأمير تشارلز الرابع ملك لينخشتاين وجُزر الآزور

وهو يجي جنبك حاجه برده :angry: