حقـــــــــــي بـــــــدراعي

[se_ Elsyed]

فاكرين كلام البنت الصغيرة أسماء محفوظ اللي حذرت من عدة شهور إن الناس هاتاخد حقها بإيدها لو الامن فضل في التراخي وقلة الأدب دي ... والكل أتهمها بالتحريض والبميبرمالية والعمالة المتحزلقة .. وشوية شوية ترسخت فكرتها لأن الناس خلاص حطت صوابعها الخمستاشر في الشق من تصرفات العصابات اللي بيسموها الشرطة اللي بتأدبنا عشان ثورة 25 يناير .. وشوفنا كذا حالة وأخرها اول أمس لما أحدى قرى مدينة بنها الطيبين .. الناس صوتها أنبح من البلطجية اللي معروفين بالأسم والشرطة مطنشة وولا على بالها ... لدرجة قام هؤلاء الأربعة الكلاب باغتصاب سيدة حامل كانت في زيارة لطبيبتها ..... لحد ما عملوا لهم كمين أول أمس وقطعوهم حتت وعلقوهم على اعمدة الأنارة

ومره اخرة .. انا ضد ده تماماً لأن منظر الدم الكتير بيموت القلب وبيخلي الواحد متعطش له ... يعني النهاردة لو قطعت بلطجي فاسد ... وشوفت منظر الدم قدامي .. فخلاص قلبي هايموت وبكره لو مسكت واحد بيسرق غسيل هامسكه أقطعه برضوا ... وتبقى دي الشريعة والقانون المتبع

والأن إليكم المقال التالي

البلطجة واختفاء الشرطة الأهالى يرفعون شعار "حقى بدراعى".. أهالى قرية بالوادى الجديد يحرقون منزلا وسيارة لتشكيل عصابى.. وفى الحضرة بالإسكندرية يعتدون على 7 بلطجية حاولوا فرض السيطرة عليهم

الأحد، 4 ديسمبر 2011 - 20:46

بعدا انتشار ظاهرة الاختطاف والإجرام وفرض السيطرة على أهالى القرى والمستضعفين من قبل البلطجية بعد غياب الأمن فى المحافظات خاصة القرى والأحياء النائية، لم يعد أمام الأهالى بعد ما يزيد عن أحد عشر شهرا من عدم الاستقرار ونقص الأمان بعد تعنت رجال الداخلية فى القيام بدورهم المنوط بهم، فقد قرروا رفع شعار "حقى بدراعى".

حيث قام أهالى شارع سينما الحضرة التابع لدائرة باب شرقى بالإسكندرية بالاعتداء على كل من طرف أول "محمد أحمد محمد" (26 سنة) عامل، و"عبد الحميد محمد سالم" (34 سنة) قهوجى، و"محمود جابر حافظ" (23 سنة) بائع، و"هانى أحمد محمود" (23 سنة) بائع، و"عمرو محمد سالم" (32 سنة) عامل، و"محمد يسرى إبراهيم" (23 سنة) عامل ومقيم بالحضرة دائرة القسم، و"عفيفى إبراهيم محمد عفيفى" (31 سنة) عاطل مسجل خطر مصاب بجرح قطعى باليد اليسرى مع اشتباه قطع بالأوتار وجروح متعددة بالوجه وكدمات بالرقبة، تم حجزه بالمستشفى الجامعى بسبب قيام السابع بمحاولة فرض سيطرة، تعدى أهل المنطقة عليه محدثين إصابته المنوه عنها.

وتم ضبط السابع، وبحوزته طبنجة ماركة توكاجيت عيار 9 مللى، وعدد 6 طلقات من ذات العيار، وسلاحا أبيض عبارة عن سيف ودرع، وتبين أن الطبنجة تم الاستيلاء عليها من قسم باب شرقى أثناء الأحداث، وجار العرض على النيابة.

للمرة الثانية فى أقل من أسبوع يقوم أهالى قرية بمحافظة الوادى الجديد بحرق مسكن عشوائى وسياره متهالكة لثلاثة أشقاء مسجلين سرقات بقرى غرب الموهوب بمركز الداخلة، وذلك بعد أن قام أحدهم بسرقة أبقار تخص أحد سكان القرية ويدعى "عماد.ص.م" (42 سنة) والذى تعرف على السارق فقام بتجميع أهالى القرية الذين توجهوا فى ساعة متأخرة من مساء الأول لمنزل الأشقاء، وقاموا بإضرام النيران فى سقفه المكون من الجريد والخوص وحاولوا إحراق سياره ربع نقل تخص أحد الأشقاء، والذين لاذوا بالفرار من المنزل بعد قيام الأهالى بالتعدى عليهم.

وكانت وردت معلومات للواء عثمان ناجى مدير أمن المحافظة بقيام مواطنين بقرية غرب الموهوب بمركز الداخلة بالاعتداء على أحد المساكن، ومحاولة إحراقه وتدميره فأصدر توجيهاته على الفور للعقيد همام عيد مأمور قسم الداخلة والمقدم مصطفى جمال نائب المأمور بالتحرك الفورى لاحتواء الموقف.

وبالبحث والتحرى تبين أن المنزل ملك لثلاثة أشقاء مسجلين سرقات، وأنه تم اتهامهم فى قضية سرقه مواشى لمواطنين والذين حاولوا ضبهطم فلاذوا بالفرار من القرية، وهم: "محمود.ج.ع.ا" عاطل، وإخوته عادل وعيد، وهم ليسوا من أبناء القرية، وجار ضبطهم وتحرر المحضر رقم 1613إدارى الداخلة لسنة 2011م، وتمت إحالته للنيابة التى تباشر التحقيق.

وشهدت قرية "بقيرة" والتى تقع على بعد 7 كيلو مترات من مدينة بنها القليويبة، فجر أول أمس، قيام 3 آلاف مواطن من سكان القرية، بقتل 4 مسجلين خطر، حيث كشفت التحريات الأولية عليهم، وهم: "السيد.م" (شهرته سنكافولا) (سن 25) عاطل ومقيم بطا – دائرة المركز، و"هشام.ص" (23 سنة) عاطل ومقيم ميت العطار – دائرة المركز.. السابق اتهامه فى القضية رقم 12315 جنح مركز بنها لسنة 2008 م (ضرب أفضى إلى موت) والمطلوب ضبطه فى القضية رقم 15362 جنح مركز بنها لسنة 2011م (سرقة سيارة بالإكراه)، و"صابر.ن" (20 سنة) عاطل ومقيم الشدية – دائرة قسم بنها، و"محمود.ر" (19 سنة) عاطل ومقيم منشية الزراعة – دائرة قسم بنها.

[آل مصريم]

بداية و نهاية " الله خيرا حافظا و هو أرحم الراحمين" سواء من البلطجية ولا من لصوص السيارات ولا من بتوع المخدرات ولا غيرهم

و سواء كان غياب الأمن بسبب نتف ريش الداخلية أكثر من مره حتى عجزت... على حسب قناعتى الشخصية... ولا بسبب نظرية التواطوء... فهى غائبة

و القانون كله غائب... فلا تبقى إلا شريعة الغاب... و العدالة العرفية... حكم الناس فى الشارع

عسى أن يعيد لنا الله الأمن و الأمان عاجلا... و يرفع عننا البلاء و المحنة

[elzahraa]

للأسف الشديد المواطن كل مرة يتظلم و مايلقيش اللي يرفع عنه و المجرم يتمادى و البوليس مطنش و لو حصل و اتقبض على المجرم يلاقي محامي و طبعا من حق الكل محاكمة عادلة بس فوق المحامي يجي منظمات حقوق الانسان و غيره و يدافعو عن المجرم دا ويوم ما يتحكم عليه بيبقى حكم بسيط للغاية

يعني المظلوم محدش بيسأل فيه و كلو بيدافع عن الظالم لحد ما للأسف

المظلوم قال اخد حقي بيدي بقى وشوية شوية يبقى ظالم لانو لقى الظالم ما بيتعاقبش يعني جعلوني مجرما من الاخر و تستمر هذة الدائرة الشيطانية و تزهق الارواح خلالها بدم بارد

و سبحان الله الواحد دلوقتي اعد يفتكر قوله تعالى

وَلَكُمْ فِي الْقِصَاصِ حَيَاةٌ يَاْ أُولِيْ الأَلْبَابِ لَعَلَّكُمْ تَتَّقُونَ(179) صدق الله العظيم

(سورة البقرة)

و شكرا

[التونسى]

معرفش ازاى عدا عليك الخبر ده وانت اهلاوى صميم يا سى السيد :closedeyes: ... الدنيا فى بورسعيد والعه ومقلوبه بسبب عدد من حالات الاختطاف اللى حصلت خلال ال3 ايام اللى فاتوا .. واشهرها اخو اللاعب محمد شوقى ابن بورسعيد ولاعب الاهلى المشهور .. وكمان ابن عمته او خالته .. الاتنين اتخطفوا من تحت بيتهم بحى الضواحى .. والمختطفين كانوا طالبين فديه 4 مليون .. وخفضوها لمليون واحد بس .. طيبين اووووى .. المهم الناس اتجمهرت فى بورسعيد قدام مديرية الإمن . احتجاحا على كذا واقعة اختطاف .. والناس بيفكروا يشكلوا من تانى لجان شعبيه لمواجهة الوضع الامنى المتدهور.. مع ان بورسعيد محكومه من كل ناحيه بجمارك .. وهى يدوب مساحتها شبر فى شبرين

[م تيمور المراغي]

غمرني احساس بالاعجاب و الفخر الشديد ان بلدنا دي من شرقها لغربها ما عدمتش رجاله تطلع على زنكافولا ومن هم على شاكلته تولع فيهم و تحرقهم بجاز وسخ

ومحدش يقول لي ان اللي حيزنق بعربيته ع التاني حيتعلق ع المشنقه مانتم لسه قيلين بيوت الشعر في حكمة الشعب ونصاحته وصواب حكم وجدانه الجمعي

الى الجحيم يا زنكافولا!

تم تعديل 5 ديسمبر 2011 بواسطة م تيمور المراغي

[عبد الله غريب]

سؤال ..

هو ليه الجيش ما ينزلش يحفظ الأمن بعساكره .. و مش لازم انتظار الداخلية لأن الناس ممكن عندهم حساسية جهة الداخلية؟

جواب ..

علشان ممكن بعض المغرضين يتهم الجيش بانه يستعمل القوة ضد الثوار ..

سؤال ..

ليه ما يتمش تعيين وزير داخلة من الثوار .. و ساعتها محدش يقدر يفتح بؤه و يقول عليه إنه ضد الثوار و الكلام اللي كلكو عارفينه؟

جواب ..

علشان مطلوب بقاء الحال على ما هو عليه ..

سؤال ..

طب خلاص عمالين نهاتي ف أيه لما الحل معروف و محدش عاوز يعمله؟

جواب ..

أومال نسكت .. و نجيب ضُلف المحاورات يعني .. ماهو لازم نتكلم ..

[سكر]

معلش الشرطة مش متعودة على انها تكون فى خدمة الشعب

الشرطة فى خدمة النظام والدليل بلطجة الانتخابات صفر

[Om Zayd]

و قطع الطريق (قطار و بري و مواني) كل يوم و التاني عشان الغاز او احتجاجا على انعدام الامن او برج محمول او محافظ او مصنع

ساعات من كثر ما محدش بيسمعهم و لا يعبرهم

ساعات فتونة و استسهال

ساعات تحريض و استغلال

الخلاصة .. المهم ان توجد الإرادة السياسية لعودة الامن

[se_ Elsyed]

مش قادر أقول ده غلط وخطر على المجتمع ككل ... والقانون لازم ياخد مجراه

لان كل دي بتبقى ردود أفعال لحظية من ناس مكويه بنار الأنفلات الأمني ... ونار التواطء والتخاذل من كلاب الشرطة

الأهالى يفتكون ببلطجية حاولوا خطف سيدة تسير مع زوجها فى الفيوم

الثلاثاء، 6 ديسمبر 2011 17:34

تمكن أهالى قرية كفور النيل بمحافظة الفيوم من القبض على 2 من البلطجية وربطوهم فى أعمدة الإنارة بالقرية وقاموا بضربهما وإصابتهما بإصابات متفرقة لقيامهما بمحاولة خطف سيدة كانت تسير مع زوجها فى القرية أمام اللجنة الانتخابية بالفيوم، وتمكنت أجهزة الأمن وقوات الجيش من فك أسرهما ونقلوهما للمستشفى فى حالة خطيرة، وأحيلت الواقعة إلى النيابة التى تولت التحقيق.

كان أهالى قرية كفور النيل بمركز الفيوم قد فوجئوا عصر الثلاثاء، بقيام كل من "رجب.ا.س" (30 سنة) و"على.ج.ا" (18 سنة) بمحاولة خطف ربة منزل كانت تسير مع زوجها أمام اللجنة الانتخابية فى القرية، وتمكن الأهالى من القبض عليهما ثم قاموا بربطهما فى أعمدة الإنارة بالقرية. وتم إبلاغ أجهزة الأمن وقوات الجيش وأخطرت نيابة مركز الفيوم التى تولت التحقيق.

[dawn walker]

والله العظيم رجالة ...

[ابو محمود]

معلش الشرطة مش متعودة على انها تكون فى خدمة الشعب

الشرطة فى خدمة النظام والدليل بلطجة الانتخابات صفر

استنى بقى احنا نجيب حاجة ساقعة ومن الغالية وعليها وردة