اللجنة الُعليا هاتستهبل ولا إيه ؟

[se_ Elsyed]

صرح اليوم المستشار عبد المعز إبراهيم بانه قد تم أصدر تعليماته إلى رؤساء اللجان الفرعية بإعداد كشوف بأسماء الناخبين الذين تخلفوا عن التصويت خلال المرحلة الأولى من الانتخابات، والإعادة لها، وإرسالها إلى النيابة العامة لاتخاذ الإجراءات القانونية تمهيداً لتطبيق الغرامة عليهم.

----------------

هانرجع بقى لشغل حلق حوش وتقليب الناس بتاع مبارك رئيس العصابة ؟

يعني لو 5 مليون بني ادم إتخلفوا مثلاُ يقوم لامم منهم إتنين مليار ونص جنية ؟

ليه إن شاء الله الشعب كل إيه يشرب عليه ؟

والناس الغلابة والمرضى او اللي كانوا في أشغالهم ومايقدروش يروحوا ينتخبوا يجيبوا منين 500 ج ؟

وليه نشغل النيابة بالهبل الشكلي ده ؟

[justme]

هو الاهم من كده كمية القضايا دي هتشكل ضغط على النظام القضائي ازاي وازاي كل الكم ده هتتعامل معاه النيابة والقضاء مع العلم ان النظام القضائي مهترئ أصلا وفيه بطء شديد في التقاضي تخيلوا بقى مع اضافة ده عليه هيبقى شكله ايه؟؟

دول عايزين وزارة ومننساش ان ده مرحلة اولى من مجلس الشعب امال على انتخابات الرئاسة ان شاء الله هيبقى ايه الوضع

[محمد عبدالعزيز]

اعتقد إنها مجرد تهديد مش أكتر

ده الناس تطلع لهم ملط فى الشوارع لو عملوا كده, وتبقى ثورة لا تبقى ولا تذر.

الموضوع صعب جداً كما سمعت من بعض المتخصصين, لأنه يجب أن يكون هناك تحقيق وقضية عشان يعرفوا إذا كان فى عذر مقبول ولا لا, كما ينص القانون.

وغير كده لو حد من المتضررين رفع قضية بعدم الدستورية ممكن يكسبها فوراً لأن الغرامة دى غير دستورية, كل واحد من حقه يصوت أو لا.

[se_ Elsyed]

لأ إنت عارف ... لو الإستهبال زاد وحبوا يهبلوا .. ممكن يخصموا المبلغ ده من موظف الحكومة ... أهو تحت إيدهم وممكن يعملوا فيه اللي هما عاوزينه ويخصموا المبلغ من المنبع

لكن ده سيؤدي إلى ثورة أخرى

في ناس مطحونة وبتحلم بالخمسمية جنية أساساً .... فإزاي تقول لها إنت ومراتك عليكم 1000 ج يا تدفع يا تتحبس يا نحجز على طشت الغسيل اللي عندك

ده يروح فيها هو ومراته والعيال تتيتم

[ozoozo]

علي فكره دي هايبقي فيها ضبط واحضار ومباحث تنفيذ احكام يعني تبقي قاعد في بيتكم زي اي مواطن شريف بالفالنه واللامؤاخذه بتتفرج علي مسلسل الساعه سابعه تلاقي مباحث تنفيذ الاحكام بيخبطوا عليك ولازم تروح القسم تستفسر عشان تدفع ولو ذوق قوي هايجيلك استدعاء

[رضوي]

هو مش من حق اي مواطن عادي انه يمتنع عن الادلاء بصوته كاعتراض مثلاً ؟؟؟

أعتقد ان الغرامة دي مخالفة تماماً للحقوق الدستورية

علشان كدة اعتقد انها بس مجرد تهديد علشان الناس تبقى ايجابية وتصوت ........ وعلى الرغم من ان الناس اللي بتروح علشان خايفة من الغرامة بتصوت لأي حد من غير ماتعرف هو مين ..... أو بيروحوا يبطلوا صوتهم ....... الا انهم برده مصرين ان الناس تنزل خوفاً من الغرامة

وادينا شوفنا لما موضوع الغرامة دة انتشر لقينا مصر كلها نازلة تصوت ....... ( دة انا وقفت من الساعة 10 لحد الساعة 3 علشان اخد دوري واعرف اصوت ..... ودة على الرغم اني من سكان التجمعات الحديثة يعني الدنيا هادية )

أما في الاعادة ......... هوا ...... فراغ ........ مافيش ولا بنى آدم

أنا دخلت اللجنة النهاردة وكل الموظفين والظباط والعساكر كانوا بيساعدوني انا لوحدي لأن اصلا مافيش غيري

وماشاء الله الصندوق لسة فاضي مافيهوش غير كام ورقة ؟؟ الكلام دة الساعة 3

علشان كدة اكيد بس بيحاولوا يخلوا الناس تنزل وتصوت ........ مجرد تهديد اجده صعب التنفيذ

[se_ Elsyed]

وماشاء الله الصندوق لسة فاضي مافيهوش غير كام ورقة ؟؟ الكلام دة الساعة 3

من ضمن الحاجات اللي عاوزه تتكنس بمقشة وتترمي كلها على بعضها في الزبالة .... " التليفزيون المصري " بمراسلينه بسلطاته ببابا غنوجه

مراسل التليفزيون المصري كان بيحلل ويفلسف إن ما فيش إقبال ليه والصناديق فاضية

فقال بالنص : لأ في إقبال .. بس نخلي بالنا إن ورقة الترشيح في المرحلة الأولى كانت كبيرة فكانت الصناديق بتتملي بسرعة .. أما في الاعادة فالورقة صغيرة وبالتالي مش هاتبان في الصناديق

والجنس الناعم ناعم .. والجنس الخشن خشن .. وعلمني العوم والنبي يا أحمد

كل ده واللجنة وراه بتصفر ... وهو واقف جنب صندوق فيه بالكتير قوي 10 ورقات

[م تيمور المراغي]

وليه الناس ما تروحش تنتخب !

بالله عليكم لو واحد جاله مشوار ب500 جنيه او ليه 500 جنيه عند واحد صاحبه مش كان طلعلو جناحين ونزل يقفشهم !

منظر اللجان فعلا في الاعادة يكسف

بقى كل دول عندهم عذر شرعي !

[se_ Elsyed]

وليه الناس ما تروحش تنتخب !

بالله عليكم لو واحد جاله مشوار ب500 جنيه او ليه 500 جنيه عند واحد صاحبه مش كان طلعلو جناحين ونزل يقفشهم !

منظر اللجان فعلا في الاعادة يكسف

بقى كل دول عندهم عذر شرعي !

مش هانضحك على بعض يا تيمون ؟؟؟؟

إنت عندك 40 % أُمية وناس مش بتعرف تفك الخط

وعندك دوائر زي دايرتي نازل فيها 147 إسم على قائمة الفردي وكتاب كده من 5 صفحات مليان أسماء ... المتعلم منننا ضرب اخماس في أسداس عشان يعرف يختار حد

وعندك ناس كتيرة جداً بتشتغل في أماكن بعيدة جداً غير اماكن إقامتها ... يعني اللي شغال في شرم الشيخ أو الغردقة او محافظة اخرى وبيسافر بلدهم كل كام شهر وما يقدرش ياخد اجازة عشان ينتخب ومستحيل يغير محل إقامتة في البطاقة

واللي مريض

واللي عاجز ..

واللي عُمره ما سمع عن حاجه إسمها إنتخابات

واللي واللي واللي

دول كلهم يعملوا إيه ؟

يروح يشد محامي يدفع له 1000 ج عشان يطلعه من القضية دي ؟

ولا التوعية تبقى هي الحل ... ومخاطبة الناس بلغه يفهومنها وأيضاً تفهم ظروفهم بدون تعالي أو تقليل من شأن حد

[se_ Elsyed]

كنت باحسب الدولة هاتتشملل وتشمر عن ساعديها وتقترح أفكار جديدة ومبتكرة للقضاء على الأُمية وجعلها قضية أمن قومي وتشغل شباب من اللي متطلع على القهاوي عشان ينهض بالبلد

يعني من ضمن تلك المقترحات اللي ممكن تكون خطأ لكنها تدور في بالي :

1- العساكر اللي بالملايين اللي بيدخلوا الجيش في الأمن المركزي ويتهبدوا 3 سنين عشان أُميين ... ليه ما نقولش للعسكري من دول إنك لو إتعلمت تقرا وتكتب في الجيش هانخفض لك 6 شهور من فترة تجنيدك ... وكمان العسكري اللي بيعلمه نخفض له فترة معينة .... يبقى كده ضربنا كذا عصفور بحجر واحد

2- بما إن القوى الإسلامية لها تأثير على أرض الشارع المصري ... ليه ما يكونش لها دور في محو امية الناس في الأحياء الشعيبة بالذات في القرى والريف في المساجد اللي بالملايين واللي الناس بيصلوا فيها 5 مرات يومياً ؟

3- ليه الكنيسة كمان ما يكونش لها دور .. ولو تخصيص حصتين أسبوعياً للناس الغلابة دي ؟

4- ليه ما نستغلش الشباب العاطلين سواء بنين وبنات ونرصد لهم مكافات مقابل هذا العمل ؟

5- ليه ما نشركش معانا مؤسسات المجتمع المدني .. ورجال الاعمال الشرفاء وأصحاء المصانع والشركات في التبرع للمشروع ده للقضاء على الأمية في خلال سنة ؟

6- ليه الشركات والمؤسسات الحكومية ما ترصدش مكافأة وزيادة في المميزات والمرتبات لكل موظف يجتهد في محو أميته ؟

7- ليه مش بنعمل برامج تليفزيونية بشكل شيق وجذاب في القنوات الحكومية وفي أوقات مناسبة عشان نساعد في محو الامية التعليمية والثقافية للناس وممكن يقوم بها فنانون معروفوا ومحبوبون ؟

هناك أفكار كثير وبإذن الله لو تم تبينها ممكن نمحو العار ده خلال عام واحد لأنه بيأثر تأثير كبير على المجتمع لان من أقل نتائج الجهل هو عدم الوعي الطبي والامراض اللي بتحل على الناس نتيجة إنهم ما بيعرفوش يقراوا ويكتبوا

[م تيمور المراغي]

كل دول لو حد فيهم لقى ورقة بخمسية جنيه واقعه في الشارع حينزل و ياخدها

بس فلقونا احنا الاغلبية الصامته وابصر ايه

وحتت مشوار للمدرسه اللي جنبه يبيع القضيه !

[se_ Elsyed]

كل دول لو حد فيهم لقى ورقة بخمسية جنيه واقعه في الشارع حينزل و ياخدها

بس فلقونا احنا الاغلبية الصامته وابصر ايه

وحتت مشوار للمدرسه اللي جنبه يبيع القضيه !

يا عم إنت بتقارن إيه بإيه ؟

وهو يعني موضوع المكافأة بتاعت الخمسميت جنيه كان حقيقة عشان نفترضها ؟

يا أخي 62 % مشاركة نسبه أكتر من ممتازة في ظروف بلدنا

ما تتكلمش من برج عاجي يا تيمون وتحسسني إنك ماسك سيجار كوبي

في ناس ضايعه والربع جنيهعندها اهم من إنتخابات وكلام من ده

وفي ناس ظروفها ما يعلم بها إلا ربنا ويمكن ساقطين قيد وما معهمش بطايق كمان

وخلي بالك .... ما تنساش الناس لعشرات السنين وتتجاهل وجودهم .. وتخليهم يناموا ويعوموا في الجهل والمرض وتيجي تكلمهم عن السياسة والإنتخابات

يا اخي الكريم سيبك من القاهرة .. وخد بعضك وإنزل الريف كده .. هاتلاقي إن سوري الحمار او الجاموسة أو قيراطين الأرض عند الفلاح اهم حاجه في الدنيا عنده ....

وبالتالي مؤقتاً ما حدث هو شيء جيد ..

وخلينا نمد إيدنا للناس دي وبعدين نحاسبهم

[ابو محمود]

وليه الناس ما تروحش تنتخب !

بالله عليكم لو واحد جاله مشوار ب500 جنيه او ليه 500 جنيه عند واحد صاحبه مش كان طلعلو جناحين ونزل يقفشهم !

منظر اللجان فعلا في الاعادة يكسف

بقى كل دول عندهم عذر شرعي !

العذر الشرعى للنساء والعجائز مش للرجالة عندك كل الحق هناك نوع من البلادة ظهرت

العجيب بقى ان الناس بتطالب بحقوق طب مش تعمل الحق بتاعك وبعدين تطلب حقوقك

الغرامة ستحصل عندما يتم تجديد البطاقة وهكذا لن نشعر بتجمهر او شيء من هذا القبيل لانها ستكون على مراحل متفاوتة شغل ابليسي متظبط بس انا شايف من وجهة نظرى ان كل من تراخى فى ان يكون ايجابى لا بد ان يدفع الثمن وهناك طرق قانونية كعمل محضر قبل او يوم الانتخابات بفقدان البطاقة او جواب احالة الى مستشفى عام للعلاج او ما شابة وكلة بثمنة يعنى كدة هيدفع وكدة هيدفع طب مش كنا بقينا رجالة وشفنا مصلحة البلد

[متعب]

فوكك من قانونيه ومش قانونيه ياسى السيد

هو من امته الناس دى اصلا بتحكم بقانون ودستور

دول بيحكموا بدوله رجال الاعمال بزنس يعنى . ازاى يسرقوا المواطن مش يعطوه

والف طريقه وطريقه عملوها على الشعب وربحوا منها لما شبعوا والشعب بيؤيد وبيدفع

زى قانون الحزام . واحد عنده شويه احزمه بتاع سيارات كام مليون حزام مثلا يروح مطلع قرار بانه امر

وال يخالف ده يدفع حمسين جنيه .

شوف بقه باعوا كام مليون حزام فى كام وغرامات كام وكل ده انضرب فى الشمال للعصابه

وبعد ما خلصوا ال عندهم ولا حس ولا خبر ولا حتى عسكرى مرور بيقولك انته مش لابس الحزام ليه اصلا

او مش مركبه ليه اصلا .

خلاص لموا الغله

هى دى دوله السمسرة والامثله بالعبيط يعنى

وكون انهم مش هيمشوا الغرامه يبقى هبل فى الجبل لان دى سبوبه بتروح لناس بعينها كنوع من المكافأت والولاء

وواحد يرفع عليهم قضيه يقول ان ده مش قانونى ولا دستورى ومخالف للاعراف الدوليه

مين بيحكم بقه فى القضايا ال من النوع ده

هما قضاه مبارك ونظامه ال على الطلاق محد منهم هيورد على جنه

وابقى سلملى على النزاهه

أل قضاء نزيهه أل

هو من أمته نزيه ولا حتى نزيهه

وبعدين مش جموع الشعب راحوا العباسيه لتأييد المجلس

خلاص بقى ادفعوا وعلى قلبكم زى العسل

[Om Zayd]

اعتقد انه بيخلي مسئوليته ... يعني بيحول الموضوع للنيابة و تتصرف هيا بقى

اسباب كثير قللت اقبال الناس على التصويت بالاضافة لعدم الخوف من الغرامة

الاعلام اللي عمال يقولهم انتوا جهلة و الانتخابات اتزورت و هتتعاد

احساس البعض ان المنافسة محسومة

عدم القدرة على الاختيار

[ابو محمود]

اعتقد انه بيخلي مسئوليته ... يعني بيحول الموضوع للنيابة و تتصرف هيا بقى

اسباب كثير قللت اقبال الناس على التصويت بالاضافة لعدم الخوف من الغرامة

الاعلام اللي عمال يقولهم انتوا جهلة و الانتخابات اتزورت و هتتعاد

احساس البعض ان المنافسة محسومة

عدم القدرة على الاختيار

والله وجهة نظر تحترم