فيزا حره .. وممنوع نقل كفاله

[kingsabry]

السلام عليكم ورحمه الله وبركاته

ازيكم ياجماعه . أنا باتابع المنتدى بقالي فتره وبصراحه عجبني جدا روح التعاون والمساعده اللي موجوده هنا بين الاعضاء .

المهم .. انا جيت السعوديه من حوالي 3 سنين واشتغلت في مكان هنا والحمدلله . المهم كان اتفاقنا ان انقل كفاله في اي وقت لحد لما طلع لينا موضوع نطاقات ده واللي لخبط الدنيا .

احنا شركتنا في النطاق الاخضر . ازاي معرفش رغم ان 99% منها اجانب ويوميا بينقلوا كفاله علينا ناس كتير جدا بقول يوميا . ده اولا .

تاني حاجه الاتش ار عندنا والمدير التنفيذي طلعوا قرار جديد بعد موضوع نطاقات ده ان اي حد يقدم استقالته عندنا او يمشي لازم ياخد نهائي يعني معدش فيه نقل كفاله .

المشكله ان الواحد مش بيفكر يمشي من هنا بس الموقف ذات نفسه مش كويس يعني ازاي اكون ناقل كفاله عليهم واخدت وعد ان انقل في اي وقت لما اقدم استقالتي .

الموضوع ده حصل لواحد زميلي في الشركه وقدم استقالته وقالوله نهائي ياريس مفيش نقل كفاله .وعمل اللي مايتعملش وخرجولوه نهائي فعلا ودلوقتي بيدور على فيزا حره علشان يجي الشغل التاني .

السؤال دلوقتي ........

ازاي احنا في النطاق الاخضر رغم والله نسبه 99% اجانب ؟

ايه العمل دلوقتي ؟ لوالواحد لقى فرصه كويسه هعمل ايه ؟ هل ادور على فيزا تانيه بقى وخلاص ؟ ولا اروح مكتب العمل واعمل الشويتين اللي لا بيودوا ولا يجيبوا ؟

انا سمعت ان الكفيل الاولاني لو طلب الواحد اللي نقل كفاله (اللي هو جايبني من مصر ) التاني بقى مش يعرف يعملي نهائي ؟ هل ده صح ؟