عرفتوا مين السبب في الأنفلات الأمني ؟

[se_ Elsyed]

معظمنا متابعين النشاط الأمني اللي بيحصل في مصر اليومين اللي فاتوا .. على أساس إن وزير الداخلية الجديد لازم يعمل شو ومنظر عشان يثبت إنه كفء وانه جاي بعد فترة منيلة

قمت بالأتصال بأخي الكبير اليوم فأكد لي إن القاهرة تقريباً إختلفت تماماً في يومين تلاتة .. والتواجد الأمني المكثف ظبط حاجات كتيرة جداً جداً ... وده اللي باكتبه بقى لي 10 شهور وقولت إن الأمن والامان ممكن يرجع بجرة قلم وفي يومين تلاتة

عمركم شوفتوا توك توك في قلب شارع عباس العقاد بيبرطع عادي كده ؟

وبالتالي تكشف لنا أيها السادة من كان السبب فيي الأنفلات الأمني .. مش اللي هدد حياة الناس بس .. لأ .. لكنه خرب البلد إقتصادياً . لأن ما فيش مستمثر عبيط هايشتغل في بلد وهو مش مأمن على نفسه ومشروعة .. وبالتالي كانت النتيجة إن حوالي 1600 مصنع قفلوا في أكبر منطقتين صناعيتين في مصر وهما العاشر من رمضان .. والسادس من أكتوبر

أنا شخصياً لي قرايبي إتخرب بيتهم بسبب هذا الأنفلات ... واحد إتسرق منه تنكين حليب مجهزي .. وكان بيقوم بيتوريد الألبان اليومية لمصانع فرج الله في الإسكندرية ... وبما ان الطرق السريعة كان مسيطر عليها البلطجية .. فالتنكين إتسرقوا والسواقين إتقطعوا حتت في عز النهار

وواحد تاني قريبي عقيد جيش .. ولحد دلوقت .. البدو أستولوا على مزرعتة التي يمتكلها في منطقة التل الكبير وتبلغ حوالي 30 فدان ... وكل التجهيزات اللي فيها إتفككت وأتسرقت وأحتلوها واقاموا فيها حتى الان

ده مثالين صغيرين ... لما فعله بنا المجلس العسكري بصفتة من يحكم البلاد .... ثم وزير ضعيف لا يملك حتى السيطرة على نفسه وهو منصور العيسوي

لكن

انا لا أريد حملة تنزل على الطرقات وفي الشوارع وفي الميادين يومين وخلاص وتعود ريما لعادتها القديمة

لكن نريد منظومة أمنية متكاملة .. مش شرط يتواجد فيها ضابط الأمن في الشارع .. لكن لابد أن يتواجد الشعور بالامان وبإن لو حاجه حصلت يبقى سيتواجد في ثواني الأمن لإعادة الأنضباط

نريد إحترام للمواطن العادي .. البسيط .. الفقير اللي مالوش ضهر ولا عنده واسطه

نريد تطهير الأمن بمن يظن نفسه باشا أو متعجرف أو متكبر وفاكر نفسه فوق الناس

نريد إبعاد الأمن عن السياسة والأحتكاك بالمتظاهرين السلميين والتدخل في كل صغيرة وكبيرة في البلد

[EgyptianFalcon]

السبب في إنفلات البلد واضح من أول يوم في الإنتخابات : الناس اللي في إيدها الأمور ضبطت العملية الإنتخابية لكن سابت البلطجية على المعتصمين في التحرير يوم الإنتخابات .

[se_ Elsyed]

يا سبحان الله

في أقل من أسبوع .. تم القبض على 5500 بلطجي في انحاء الجمهورية .. تخيلوا ؟

غير الاف المخالفات وملايين من الحبوب المخدرة والمخدرات بشكل عام

ولاول مرة منذ عهد الراجل المحترم احمد رشدي اللي كنت بأشوفه واقف في ميدان روكسي بنفسه بيكهرب الظباط وبينظم المرور وهو وزوير ... نرى اليوم وزير الداخلية بنفسه ينزل ميدان رمسيس لإعادة الامن للشارع المصري ..

اتمنى ألا تكون فورة وغليان مؤقت ....

وأتمنى مراعاة الناس الغلابة اللي بيبقى فارش في الشارع بحاجات بسيطة هي كل رأسماله .. ونصحه في الأول بإنه لازم يلتزم بالنظام وبلاش المنظر البشع من البلدية وهي بتلم حاجاتهم في سيارات وتعبيها كلها على بعض وبكده يبقى مستقبلة ضاع وراسماله راح .

أتمنى أيضاً تعميم التواجد الأمني على الطرق السريعة ....

وأيضاً ظاهرة مرور الشرطة في الشوارع بأي وسيلة

أنا مش كبير قوي .. 40 سنة يعني وكدهوت ... لكن لسه متذكرر في أوائل الثمانينات مرتين تلاتة شوفت رجال شرطة بيمروا في الشوارع بالخيول ... لكن لما التكنولوجيا إتقدمت وجابوا لهم عربيات اتاري .. شكلهم بقوا يلعبوا بها سباق أو يتسغلوها بإنهم يجيبوا خضار للمدام أو يودي حماده إبن الباشا المدرسة ...