# منشقون عن 6 ابريل يتهمون قادتها بالدكتاتورية #

[Abu Reem]

كتب الفاضل

engmido

مداخلة منذ عدة ايام يتسائل فيها عن بعض غرائب حركة 6 ابريل...

وكان هذا نص كلامه

يا س س باشا

اولا خلينا لا نضع البيض كله فى سلة واحدة

كل الناس نختلف معاها ونتفق لكن موضوع 6 ابريل ده.... معلشى فى قناعتى ما قيل فيه كثيراا

والهجوم اكثرر بكثير من الدفاع ... و كما حدث يقوم احدهم بفعلة ما .. يقول لك لأ ده انفصل عن الحركة

كل شوية يطلعلهم مصيبة .. وبعد كده يقول لك لأ اصل ده انفصل عن الحركة

انا عايز اعرف بقى .. مين اللى لسه فى الحركة عشان نبقى نحاسبهم على تصرفاته

وانت ترى بعينيك هنا منذ 25 يناير الى الان ...معلشى يعنى

بعد الممثلين هنا للحركة ...مش عارف ليه عايزين يحسسونا انهم هم الفصيل السياسى الذى لا يقهر....واللى عمل كل حاجة فى مصر منذ قيام الثورة الى الان

واللى بيخوفوا المجلس العسكرى.....فالعملبة مش ناقصة

وامس نشر هذا الخبر على موقع مصراوي

أعلن منشقون عن حركة 6 أبريل تأسيس حركة جديدة تحمل اسم ''6 أبريل المستقلة'' في مؤتمر صحفي عقدوه بمدينة الإسماعيلية مساء الثلاثاء.

وأكد المنشقون أن تلك الخطوة تأتي احتجاجًا على تغيير مسار ''6 أبريل'' عن أهدافها وفقدان مصداقيتها، معلنين بدء الحركة الجديدة بخمس محافظات هى الشرقية والاسماعيلية وشمال سيناء والقليوبية وبورسعيد على أن يتم إنشاء فروع جديدة لها بجميع أنحاء الجمهورية خلال الأيام القادمة.

وشددوا، في بيان أصدروه، على انفصالهم التام عن الحركة المركزية وإخلاء مسئوليتهم عن أى قرار يصدر من ''6 أبريل'' التي يقودها أحمد ماهر، مرجعين أسباب الانفصال إلى انحراف الحركة عن مسارها الحيادى وإدارتها بأسلوب الأمر المباشر والديكتاتورية.

وأشاروا إلى أن ''6 أبريل'' لم تعد تمثل الشعب المصرى وأصبحت بعيدة عن نبض الشارع المصرى ورؤيتها تصب فى مصلحة أشخاص بعينهم، بجانب فقدانها المصداقية وصدور تصريحات مغلوطة وغير حقيقية عنها، على حد قول البيان.

أسس الحركة الجديدة نرمين أحمد كمسئول الاتصال ورامى عواد كمنسق عام بجانب محمد جابر الذيت تولى منصب المنسق الإعلامي ومحمد سعيد مسئول المحافظات ومحمد أبو طالب منسق بورسعيد بجانب هبة موسى.

وهذا الخبر حتما ..سيضع العديد من علامات الاستفهام حول اهداف بعض كبار هذه الحركة..والتي ذكرت مرارا وتكرارا انه ليس كل من حرك المياه الراكده وتصدر المشهد ليس بالضرورة ان يكون صاحب أهداف وطنية نبيلة...ولكن لاشك ايضا ان الغالبية شرفاء وكانوا يعملوا لمصلحة مصر...

[se_ Elsyed]

أبو ريم

ربنا خالق لنا عينان عشان نرى بهما الإثنان ونحكم على الأشياء بشكل صحيح

على سبيل المثال ... ما فيش حد كتب أي تعليق على إنشقاق كثير من شباب الاخوان عن الجماعة من بعد 25 يناير لما الجماعة أصدرت اوامر بعدم النزول للميدان ... بل بالعكس في منهم شباب نزلوا الإنتخابات مستقلين ..

لا حد قال وطنية ولا ديكتاتورية ولا دول وحشين ودول حلوين

عارف ليه ؟

لان الكيانات السياسية التي لا تتسم بالديناميكية .. تتيبس وتذبل ثم تموت ...

زي ما بنشوف الكيانات الناصرية واليسارية كده بالظبط

ليس كل من حرك المياه الراكده وتصدر المشهد ليس بالضرورة ان يكون صاحب أهداف وطنية نبيلة

أه طبعاً طبعاً ..

يعني ممكن نقول كده على الاخوان بكره بعد فوزهم بالاغلبية ؟

إنهم مش وطنيين وليس لهم أهداف نبيلة ؟؟

دعنا من التخوين ونظرية المؤامرات وخلينا نتحد على أهداف محددة للوطن ...

وكل واحد يريح دماغه طالما لا توجد أدلة او قرائن تدين جهة ما كانت بيننا ذات يوم

[engmido]

يا سلام يابو ريم .... والله كنت داخل وما اعرف انك جايب سيرتى....ههههه

بس ذمتك ده خبر تجيبه عالصبح ..ههههههههه

شوفلنا حاجة حلوة نستفتح بها اليوم....بلا 6 ابريل بلا 10 اغسطس....

اه بالمناسبة

لى انفصالهم التام عن الحركة المركزية وإخلاء مسئوليتهم عن أى قرار يصدر من ''6 أبريل'' التي يقودها أحمد ماهر

اهو احمد ماهر ده سمعت قبل كده انهم فصلوه من الحركة

اه والله ....شفت استخفاف اكتر من كده ( دول المفروض يسموهم حزب لا )

[engmido]

أبو ريم

ربنا خالق لنا عينين عشان ننرى بعم الإثنين ونحكم على الأشياء بشكل صحيح

على سبيل المثال ... ما فيش حد كتب أي تعليق على إنشقاق كثير من شباب الاخوان عن الجماعة من بعد 25 يناير لما الجماعة أصدرت اوامر بعدم النزول للميدان ... بل بالعكس في منهم شباب نزلوا الإنتخابات مستقلين ..

لا حد قال وطنية ولا ديكتاتورية ولا دول وحشين ودول حلوين

عارف ليه ؟

لان الكيانات السياسية التي لا تتسم بالديناميكية .. تتيبس وتذبل ثم تموت ...

زي ما بنشوف الكيانات الناصرية واليسارية كده بالظبط

ليس كل من حرك المياه الراكده وتصدر المشهد ليس بالضرورة ان يكون صاحب أهداف وطنية نبيلة

أه طبعاً طبعاً ..

يعني ممكن نقول كده على الاخوان بكره بعد فوزهم بالاغلبية ؟

إنهم مش وطنيين وليس لهم أهداف نبيلة ؟؟

دعنا من التخوين ونظرية المؤامرات وخلينا نتحد على أهداف محددة للوطن ...

وكل واحد يريح دماغه طالما لا توجد أدلة او قرائن تدين جهة ما كانت بيننا ذات يوم

س س

هاقولك كلمة واحدة

لو كان نيتهم خير كان ربنا وفقهم وظهرلهم شغل او اى منظر

واوعى تقولى انك ما تعرفش النوايا والكلام ده

لانى فعلا لا اعلمها... بس معلشى ده مجرد احساس اعتقد انه لا يخيب

[م تيمور المراغي]

انا بكره حفتح موقع اسميه محاورات المصريين ( الجبهة الديمقراطية ) :happy:

واخللي اختيار المشرفين والاداريين بالانتخاب

وبعد بكره ابو ريم يفتح موقع محاورات المصريين ( الجبهة المستقلة )

وهكذا ,,,

ياعم نفض ياعم

[se_ Elsyed]

لو كان نيتهم خير كان ربنا وفقهم وظهرلهم شغل او اى منظر

خير اللي هو إيه ؟

يروحوا يزرعووا خيار وخس مثلاً ونشوف الإنتاج والخير ولا إيه بالظبط ؟

بس معلشى ده مجرد احساس اعتقد انه لا يخيب

لو الامور السياسية بتمشي بالإحساس كانت الدنيا خربت يا ميدو

وإلا كان إحساس الكثيرين إن الإسلاميين هايودوا البلد في داهية كان يبقى صحيح والدنيا كانت ولعت من غير ما الناس دي تاخد فرصة في الحكم ..

صح ولا خيار برضوا ؟

وبعدين خلي بالك

على مستوى العالم كده ... هناك دائماً حركات سياسية مجتمعية لا تسعى إلى أي حكم او أحزاب أو أو أو

لكنها تُسمى حركات ضغط

زي 6 إبريل وكفايه ومواطنون ضد الغلاء و و و و و

وبالتالي خير إيه اللي إنت عاوز تشوفه منهم غير إنهم غيروا تاريخ مصر منذ أن ظهروا من سنوات قليلة جداً وقت أن كان الشعب المصري كله ماشي جنب الحيط وبيربي العيال وعايش اليوم بيومه ؟

الشيء الأخير

عاوز تشوف الخير ؟

شوف موقف مبارك وعصابتة من الناس دي قبل الثورة .. ومعاهم الأخوان بالمناسبة

واللي تلاقي مبارك بيكره اللي جابوه ومش طايق سيرته ... يبقى هو ده الخير كله بعد الثورة

[engmido]

لو كان نيتهم خير كان ربنا وفقهم وظهرلهم شغل او اى منظر

خير اللي هو إيه ؟

يروحوا يزرعووا خيار وخس مثلاً ونشوف الإنتاج والخير ولا إيه بالظبط ؟

اهى دى مشكلتك وده عيبه بقى

التريقةاللى عندك دى ... الله يرحمك يا ضحى... هههههه :P

يا عم التوفيق اللى انا اقصده من ربنا لاى احد ان ييسر له فعلا

او على الاقل يخلى له قبول عند الناس فى الشارع...شعبية اى حاجة من الحاجات دى.... فاهمنى ؟؟؟

مش لازم يكون غرضهم الحكم...زى ما بتقول

وانا هنا لست بصدد الدفاع عن الاخوان او غيرهم ولكن عرض وجهة نظر فقط

اما عن الحركات التى ترى انها كانت سببا فى اقصاء النظام السابق

فمعلشى اسمحلى اى حد يعرف جيدااا ان ما حدث ماهو الا توفيقا وتوفيقا فقط من الله

كل الحركات التى قامت من بداية 2000 وانت طالع لغاية اللى نزلوا يوم 25 يناير

كانوا نازلين وعارفين انهم هاياخدوا عصايتين وقنبلتين غاز وهايروحوا عادى زى قبل كده

ومحدش يعنى كان نازل وناوى انه يعمل ثورة والسيناريو اللى حصل ده مكانش يخطر على بال اشدهم تفاؤلا

بس كده يا عم

تم تعديل 14 ديسمبر 2011 بواسطة engmido

[se_ Elsyed]

او على الاقل يخلى له قبول عند الناس فى الشارع...شعبية اى حاجة من الحاجات دى.... فاهمنى ؟؟؟

لأ يا ريس .. السياسة مش كده

لأن انا لو في السُلطة واملك أشياء كتيرة في إيدي .. وبأكره ميدو ... ممكن بين يوم وليلة أقعد أطلع عليه إشاعات وإنه عميل وإنه بميبريالي وبياخد معونات و و و ..... وأخلي الناس البسطاء يكرهوه ويرددوا تلك النغمات ..

وعشان تعرف إن دي صفة المنافقين ...

شوفت البرادعي لما أخد جايزة نوبل ؟

كانت العراق أحتُلت والدنيا خربت و و و و

ومع ذلك كان إعلامنا بيتحزم وبيرقص لقرة العين وللراجل اللي رافع راسنا في كل مكان واخد أعلى الاوسمة من الدولة وهي وسام النيل ..

أول بقى ما حب يخبط في الحلل ... هو هو نفس الإعلام اللي خلاه كان سايق دبابة وكان بيضرب في العراق .. تخيل ؟

فمعلشى اسمحلى اى حد يعرف جيدااا ان ما حدث ماهو الا توفيقا وتوفيقا فقط من الله

كل الحركات التى قامت من بداية 2000 وانت طالع لغاية اللى نزلوا يوم 25 يناير

كانوا نازلين وعارفين انهم هاياخدوا عصايتين وقنبلتين غاز وهايروحوا عادى زى قبل كده

ومن أنكر توفيق الله ؟

يبقى بنفس القياس ده ... نقول السابقون الأولون في التاريخ الإسلامي مثلاً لما خاضوا معركة بدر مع الكفار .. كان الكل هايقول إنها معركة غير متكافئة وأخرها هايعملوا منظر ويرجعوا بقتلى وجرحى ؟

مش صح كده ؟

لأ يا عزيزي ...

لن يستوي أبداً الذين خرجوا وظلوا يخرجوا لمدة 5 سنوات وأكثر للنطح في سلطة جبارة ديكتاتورية لديها كل أنواع وأساليب البطش في العالم .... وبين من خرجوا بعد ذلك وبعد ان شاهد العالم بسالة هؤلاء وثباتهم على الحق

ده حتى القرآن اللي هو كلام ربنا لم يساوي بين الذين أمنوا قبل فتح مكه وبعده ...

ده حتى انت قولتها بمنتهى البسطاة كده وكانه كان نازل ياخد ورده أو حد يقول له عيب كده يا ولد إمشي روح عند أمك

كانوا نازلين وعارفين انهم هاياخدوا عصايتين وقنبلتين غاز وهايروحوا عادى زى قبل كده

وما تعرفش إن ده جهاد بالنفس بعينه .... وأتحدى حد يقول غير كده .. وإلا يعرف لنا ما هو جهاد النفس وجهاد الكلمة وقول كلمة حق أمام مبارك الجائر ؟

بس إنت يا ميدو نسيت موضوع بيات ليلة واحدة في لاظوغلي حيث مقر امن الدولة الأُم ... وكل دول شرفوا هناك بل منهم من شرف لعدة شهور بعد أن تم إعتقالة في مظاهرة من المظاهرات ....

وبمناسبة المعونات والحركات ...

كنت إنت أو أنا يرضى بكام باكو ويبقى له ملف في امن الدولة ... او يتنفخ على 45 هناك مره واحده بس ... او والعياذ الله بنت بسيطة حُرة صعيدية تخرج عشان تقول لأ للظلم تتمسك ويتكشف على عذريتها ... او بتوع 19 مارس . فاكرهم ؟ بتوع رصيدنا لديكم يكفي ... يتلموا بربطة المعلم ويخلوعهم ملابسهم في معتقل الهايكستب اللي كان محطة تجنيد كلنا روحناها زمان وفجاة حولوها سجن حربي ... كل الشباب دول إتمسكوا وقلعوهم هدومهم كما ولدتهم امهاتهم ويترشوا بالمياه واحضروا مراوح هوائية ضخمة لتسليطها عليهم لزيادة التعذيب والترويش يعني ....

يرضيك كام من أمريكا وتستحمل حاجه زي دي ؟

[engmido]

متأسف يابو عمر

القياس والمقارنة لا تستقيم هنا ليه

لان المسلمون فى بدر كانوا نازلين الحرب و ناويين واعدوا ما فى استطاعتهم ومتكلين على الله وغايتهم محددة

انما الحركات اللى انت بتدافع عنها مع احترامنا لهم كان يقوم بعمل مناوشات وكر وفر وهو عارف انه مش هايعمل حاجة الا كسب سوكسيه اعلامى

وهل من الاستقواء بالغرب فى اية صورة ( تمويل- تدريب او طلب العون والدعم) هل ده صحيح هل دى غاية ؟؟؟

انما اتحدث عن انتهاء الظلم فأراد الله ان يقصيه فوفق الغلابة ومنهم بعض الحركات اللى بنتكلم عنها وقفوا يوم وبعدين يوم لحد 18 يوم

ويوم بعد يوم كانوا بيحسوا انهم بيعملوا حاجة

-- عشان ما تتوهش منى

فرق كبير بين واحد عارف هو عايز ايه وبيعمل ايه وبياخد بالاسباب وبيتوكل على الله وتوفيقه

وواحد جت معاه كده بتوفيق الله فقط ..بس كده

-----

اما عن امن الدولة والضرب والسحل اللى بتتكلم عليه .. فانا كنت طول عمرى بامشى جنب الحيط

انا لا اقول ان امن الدول ومن بعدهم المجلس العسكرى كانوا ملائكة

ولكن اكره ان ييجى حد يقوللى احنا تعبنا واتسحلنا واحنا اللى عملنا وسوينا فى المجلس العسكرى

واحنا اللى عملنا الثورة

زى ما باقولك كده اللى يقول انه قام بالثورة يبقى كداب و60 كداب

[se_ Elsyed]

فرق كبير بين واحد عارف هو عايز ايه وبيعمل ايه وبياخد بالاسباب وبيتوكل على الله وتوفيقه

وواحد جت معاه كده بتوفيق الله فقط ..بس كده

أه

يعني عاوز تقول لي إن سحل لمدة 5 سنوات وأكثر تُسمى .. جت كده وما كانوش عارفين هما بيعملوا إيه ؟ يبقى على البركة

يبقى هي بنا نلعب ونقول إن الإخوان طوال معاركهم السياسية هما كمان ما كانوش عارفين هما بيعملوا إيه وعاوزين ياخدوا سوكسيه إعلامي وبرضوا جت معاهم كده.

[engmido]

يبقى هي بنا نلعب ونقول إن الإخوان طوال معاركهم السياسية هما كمان ما كانوش عارفين هما بيعملوا إيه وعاوزين ياخدوا سوكسيه إعلامي وبرضوا جت معاهم كده.

هههههههههههههه

ياعم انت حاطط الاخوان فى دماغك ليه ... انا انتخبتهم اه بس مش تبعهم

ثم لو مصر على المقارنة يبقى

ماينفعش تقارن 70 سنة تنظيم وتخطيط

ب5 سنين طيش شباب....هههههههه

تم تعديل 14 ديسمبر 2011 بواسطة engmido

[محمد عبدالعزيز]

أما انت عليك صبر وطولة بال يا سى السيد!!!

ربنا ما يحرمك منهم يارب وماتعملش زيى.

[aimen]

يبقى هي بنا نلعب ونقول إن الإخوان طوال معاركهم السياسية هما كمان ما كانوش عارفين هما بيعملوا إيه وعاوزين ياخدوا سوكسيه إعلامي وبرضوا جت معاهم كده.

هههههههههههههه

ياعم انت حاطط الاخوان فى دماغك ليه ... انا انتخبتهم اه بس مش تبعهم

ثم لو مصر على المقارنة يبقى

ماينفعش تقارن 70 سنة تنظيم وتخطيط

ب5 سنين طيش شباب....هههههههه

صح

الدهن فى العتاقى

وطيش الشيوخ ولا طيش الشباب

و هذا ما لدى

[se_ Elsyed]

يبقى هي بنا نلعب ونقول إن الإخوان طوال معاركهم السياسية هما كمان ما كانوش عارفين هما بيعملوا إيه وعاوزين ياخدوا سوكسيه إعلامي وبرضوا جت معاهم كده.

هههههههههههههه

ياعم انت حاطط الاخوان فى دماغك ليه ... انا انتخبتهم اه بس مش تبعهم

ثم لو مصر على المقارنة يبقى

ماينفعش تقارن 70 سنة تنظيم وتخطيط

ب5 سنين طيش شباب....هههههههه

وإيه المشكلة

طب ما أنا مش إخوان وإنتخبتهم

وانا أول واحد هاراقب أداءهم في البرلمان وهانتقدهم بشراسة لو تخاذلوا أو ركبوا موجة التسقيف

لكن حتى لو أنا إخواني .. فلن أستطيع أن أبخس مجهود أحد حتى لو كان منافسي وأقول عليه طيش شباب

ولو هو طيش شباب بالفعل وبيزلزل عرش أعتى ديكتاتور جاء في مصر ... ويستمر الطيش ليجعل مجلس من أبناء مبارك زي المجلس العسكري يلف حوالين نفسه وما يحاولش يلعب بديلة ومؤخراً طيش الشباب هو من أسقط أضعف رئيس وزراء جاء في مصر وهو عصام شرف

يبقى مرحباً بطيش الشباب .. وبحب الشباب أيضاً

بالمناسبة .. هي مش بالكيلو أو بالسنين ..

بدليل عراقة حزب الوفد .. والتجمع والناصري و و و

ومع ذلك .. فيي نظري ولا يساووا يوم من طيش شباب 6 إبريل وكفاية ....

ولو هي بالسنين .. كنا عملنا حزب الفراعنة أبو 7 الاف سنة

[aimen]

أما انت عليك صبر وطولة بال يا سى السيد!!!

ربنا ما يحرمك منهم يارب وماتعملش زيى.

بشمهندس محمد

عاوز اقولك وجودك وكلماتك بتسعدنى جدا

هو ممكن خروج عن الموضوع

بس كلامك بيعمل لى مزاج

ربنا يرزقك ويحفظك

[محمد عبدالعزيز]

أما انت عليك صبر وطولة بال يا سى السيد!!!

ربنا ما يحرمك منهم يارب وماتعملش زيى.

بشمهندس محمد

عاوز اقولك وجودك وكلماتك بتسعدنى جدا

هو ممكن خروج عن الموضوع

بس كلامك بيعمل لى مزاج

ربنا يرزقك ويحفظك

ربنا يكرمك ويكرم أصلك, والله كلامك هو اللى أسعدنى بجد.

أصل أنا يوم الجمعة اللى فاتت والدتى بتسألنى هما اللى فى التحرير دول لسه قاعدين ليه؟ والسؤال ده طبعاً بيوجه لى كتير عشان دايماً بكون مؤيد للجماعة بتوع التحرير.

قلت لها أصلهم عيال صيع ومش لاقيين شغل فقاعدين يقرفوا فى خلق الله, وأهو بالمرة أمريكا وإيران يبعتلوهم قرشين يروشوا بيهم.

[engmido]

يبقى هي بنا نلعب ونقول إن الإخوان طوال معاركهم السياسية هما كمان ما كانوش عارفين هما بيعملوا إيه وعاوزين ياخدوا سوكسيه إعلامي وبرضوا جت معاهم كده.

هههههههههههههه

ياعم انت حاطط الاخوان فى دماغك ليه ... انا انتخبتهم اه بس مش تبعهم

ثم لو مصر على المقارنة يبقى

ماينفعش تقارن 70 سنة تنظيم وتخطيط

ب5 سنين طيش شباب....هههههههه

صح

الدهن فى العتاقى

وطيش الشيوخ ولا طيش الشباب

و هذا ما لدى

اهو ده بقى الكلام اللى يزعل

ليه يا ايمن ؟؟

عشان مش كل من قعد مع حد من امريكا اتشبه .. مش منطق

اقعد مع اى حد من امريكا زى ما انت عايز بس المهم بتقولوا ايه؟؟؟؟

ثم واضح ان الصورة فى مصر يعنى هما اللى طلبوا يقعدوا مع ممثلى الاخوان...لانهم ناس بتشوف مصلحتها اولا فبتقعد مع الفصيل اللى هايظهر فى الساحة

السياسية فى الفترة الجاية ..اردم على مبارك وشلته خلاص اتحرقوا شوف اللى جاى

ثم مقلتلناش بقى نتيجة الجلسات دى ايه

هل باعوا البلد مثلا ... هل خدوا تعليمات لعدم زراعة القمح لامؤاخذة يعنى

السياسة بتخليك تشوف مصلحتك فقط... اقعد مع اى حد من غير ما تخسر او تورط بلد او شعب

[eeelnagm]

لو كان نيتهم خير كان ربنا وفقهم وظهرلهم شغل او اى منظر

خير اللي هو إيه ؟

يروحوا يزرعووا خيار وخس مثلاً ونشوف الإنتاج والخير ولا إيه بالظبط ؟

بس معلشى ده مجرد احساس اعتقد انه لا يخيب

لو الامور السياسية بتمشي بالإحساس كانت الدنيا خربت يا ميدو

وإلا كان إحساس الكثيرين إن الإسلاميين هايودوا البلد في داهية كان يبقى صحيح والدنيا كانت ولعت من غير ما الناس دي تاخد فرصة في الحكم ..

صح ولا خيار برضوا ؟

وبعدين خلي بالك

على مستوى العالم كده ... هناك دائماً حركات سياسية مجتمعية لا تسعى إلى أي حكم او أحزاب أو أو أو

لكنها تُسمى حركات ضغط

زي 6 إبريل وكفايه ومواطنون ضد الغلاء و و و و و

وبالتالي خير إيه اللي إنت عاوز تشوفه منهم غير إنهم غيروا تاريخ مصر منذ أن ظهروا من سنوات قليلة جداً وقت أن كان الشعب المصري كله ماشي جنب الحيط وبيربي العيال وعايش اليوم بيومه ؟

الشيء الأخير

عاوز تشوف الخير ؟

شوف موقف مبارك وعصابتة من الناس دي قبل الثورة .. ومعاهم الأخوان بالمناسبة

واللي تلاقي مبارك بيكره اللي جابوه ومش طايق سيرته ... يبقى هو ده الخير كله بعد الثورة

صــــــــــــــــــــــــــــــدقت انا بستعجب اذاي في شباب بتهاجم كفايه وسته ابريل وهما السبب الرئيسي في قيام الثوره ياناس افلا تعقلون وكانكم تقولوا ان الثوره خطا وان مبارك كان ملاك الان اصبح الثوار عار وخونه وكفره ومنشقين لا حول ولا قوة الا باله واي نصر تبحث عنه بعد ان اطاحوا بنظام 30 عام تخضعون له ولا حتي تستطيعون ان تلفظوا بكلمه نرفض لا حول ولا قوة الا باله

[نورالعين]

حتى ان ظن البعض منا ان ليس بهم خيرا

هناك كثيرين من خارج مصر يقفون لهم احتراما ويجدونهم قدموا كل الخير لنا

نالت أسماء محفوظ اليوم جائزة "سخاروف" العالمية لحرية الفكر والتعبير وحقوق الإنسان والديمقراطية لعام 2011

[elzahraa]

معلش انا مقدرتش اقرا كل الردود لاني مشغولة شوية النهاردة

بس الموضوع لفت انتباهي

اولا كلنا عارفين ان حركة 6 ابريل ظهرت سنة 2008 يعني ايام مبارك و ايام ما كان الكل خايف يكلم

ثانيا معظم الشعب المصري تفاعل مع اضراب 6 ابريل ان لم يكن كله كلنا يوميها لا روحنا شغلنا و لا جامعتنا و كانت رسالة قوية جدا للنظام بانه كفاية عليه لحد كدة و باسلوب الاضراب دا خلت حتى الناس اللي ملهاش في المظاهرات تعبر عن نفسها و يستشعرو سعادة التعبير عن الرأي

اما بالنسبة للانشقاق عن احمد ماهر فدا عادي انا عارفة ان في جبهة تانية اللي هى الجبهة الديمقراطية بتاعت محمد عادل و دا مش مشكلة ليه بقى ؟

لان الناس بتتجمع على الاهداف و اسلوب تنفيذها فهم تجمعو على اسقاط النظام و اسلوب الاسقاط لكن في اسلوب البناء لكل وجة نظر مختلفة و دا عادي و مرة كنت كتبت وجة نظر في الانشقاقات بالنسبة للاخوان حبقى احاول احطها هنا ان شاء الله و الموضوع هو هو بالنسبة ل6 ابريل و بالنسبة ان كفاية بردو معملتش حزب

اما بالنسبة لتخوين الكل يا جماعة دا غلط الناس دي شكلت جبهة معارضة حقيقية ايام النظام و لو في عنصر او اتنين دخلاء فهم دخلاء عليهم قبل ما يكونو دخلاء على الشعب المصري

و في كل جماعة او مجموعة افراد في مندسين بغرض التجسس او الدعاية السلبية

و شكرا لك