عزبة التليفزيون

[ragab2]

.

التليفزيون

جهاز الريادة الاعلامية الأول تحول الى عزبة للثراء الفاحش والرشوة والمحسوبية من أول أيام المخرج فهمى عبد الحميد وفوازيره الى يومنا هذا أمواله مستباحة ويعمل بنظام الرشوة بعشرات الألافات لتلميع الراشى وظهوره على الشاشة الفضية البراقة

مخرجون ورؤساء قطاعات وآخرهم نجوى ابراهيم ومحمد الوكيل رئيس قطاع الأخبار الذى اكتشفوا مليون جنيها سائلة فى مكتبه وكذا أظرف تحوى مبالغ نقدية ومكتوب عليها من الخارج الى السيد محمد الوكيل مع تحياتى غير العملات المختلفة بالدولار والريال والدرهم وأكياس مليئة بالساعات الفاخرة والهدايا القيمة

ومن الفجر أنه يحتفظ بها فى مكتبه دون خشا أو خوف وفى استرخاء يحسد عليه

كما عين أولاد المخرجين والمذيعين مذيعين ومخرجين والشعب الغلبان يتفرج على العزبة وأصحاب العزبة المفترين الذين أعتقدوا أن التيلفزيون مزرعة وعزبة خاصة بهم  ولم تتحرك الاجهزة الرقابية الا فى حالات خاصة مع العلم بأن وجود أولاد المذيعين والمخرجين موظفين بالتليفزيون  يعتبر جسما لجريمة الواسطة والمحسوبية ودليلا واضحا على اساءة استعمال السلطة وتوريث الوظائف

وهل سيحاسب المرتشون حسب قانون من أين لك هذا وتصادر أموالهم وممتلكاتهم الحرام  والغير مشروعة أم سيتم الاكتفاء بسجنهم وعفا الله عما سلف وترك عائلاتهم تنعم بأموال الشعب المطحون

ياريت

يتم فحص كل أعمال التليفزيون وتشديد الرقابة على الفساد فيه

حتى نقضى على قلعة الفساد

Edited By ragab2 on July 10 2002 10:59am

[achnaton]

عزيزى الأخ رجب

العزبة .. معروف صاحبها .. ياريت يعلن الريس تأميم هذه العزبه وتوابعها وإعادتها الى  الشعب .. والعزب الثانية الألعن .. قلاع النفاق لأصحابها ابراهيم وابراهيم والسفيه وعندئد تسطيع مصر سداد ديونها ..

وأقرأ مرة ثانيا .. مات الضمير .. فى باب الشعر والأدب ..وياريت تنقله فى بداية باب مكافحة الفساد "  وتحياتى ،،

اخناتون  :inlove:

[good_future]

الاخ اخناتون

الريس...شايف كل حاجه

و للاسف هم مفهمينه...اننا البقر بتوع العزبه

......

و سلملي علي كل البقر ...الضاحك...و غير الضاحك

.....

و المعني في معني الشاعر

[achnaton]

صباح الخيرات جميعا ..

النهاردة الجمعة .. ولأول مرة بعد أسبوعين من مقاطعة القناة الفضائية المصرية بدأت اليوم بمتابعتها .. وسأحكى لكم عن إنطباعى فيما بعد حيث تلح علىّ حقيقة واضحة وضوح الشمس أن ابدأ بها .. وهى إجماعنا على فساد الإعلام المصرى بكل أنواعه وعلى رأسهم قلعة النفاق ومساوئ الأخلاق وموطن الشيطان الأكبر مزرعة الفساد المتعدد المظاهر فى مبنى ماسبيرو الشهير بمبنى التلفزيون .. وفساد هذه المؤسسة ليس وليد اليوم .. ولكنه منذ أن دخله الحاج سفوت .. واللى شاف التلفزيون منذ إنشائه حتى تسلل سفوت من الهية العامة للأستعلامات الى كرسى وزارة الإعلام يلاحظ الفرق الرهيب بين نوعية البرامج ومقدميها وخسارة كبيرة أن ايامها لم يكن عندى " فيديو " لأسجل عظمة سلوى حجازى ونزاهة وعمق علم حسن الرزاز رحمة الله عليه  { جملة إعتراضية هذا الرجل الفاضل ومعد الرامج الممتاز حببنى فى تاريخ مصر القديمة فالتهمت موسوعة الدكتور سليم حسن .. ولم يتركنا الرزار ببرامجه الجميله الهادفة هواة لتاريخ الفرعنة فقط بل شدنا الى موسوعات الدكتور جمال حمدان والدكتور محمد بيومى مهران والكتاب القيم عن الديانة المصرية القديمة للدكتور احمد قدرى الذى قتله وزير السخافة الحالى خازوق حزنى .. وغيرهم .. وغيرهم مما أدين لبرامج المرحوم حسن الرزار بالتعرف بها  رحمة الله ألف رحمه وفيك قيد برامجه من أرشيف التلفزيون المصرى }ومعذرة لللإطالة

لقد جلب صفوت الشريف جرثومة النفاق معه من مصلحة الإستعلامات ونمت وترعرعت فى عهده السعيد فى" عزبة ســفوت " حتى أصبح محصولها الرئيسى الفساد والرشوة وسار على نهجه الإبراهيمين واستولوا بغير حق وفى غفلة من الزمن على أعمدة الإعلام المقروء وحولوهما الى ملك خاص .. واصرح الثالث الذى أنشأه الزعيم السابق أنور السادات وشرفت بالتعرف به عن قرب ولفترة أيام كنت عضوا ناشطا فى منظمات الشباب تحت قيادة الصاغ وحيد رمضان اللى سحلوه مثل محمد نجيب وبرضه بالمؤمرات وسأحكى لكم قصتنا مع الثورة كصبية وشباب عند قيامها حتى هربنا منها ..

ونرجع للقناة الفضائية بعد خصامى معها .. والى الأعلام المرئى أفسده السادة المرتشون .. تذكرون قطعا فى نهاية السبعينات أصدر الرئيس السادات تعليمات بطرد سمير صبرى من التلفزيون المصرى وأجرى الوزير يومها عملية تطهير واسعة وسمعنا أن سمير خرج ولا عودة للشاشة الصغيرة بأى حال من الأحوال ولو بعد مائة عام .. ورغم كل هذا والتريخ المعروف عاد سمير ببرنامجة الملاكى .. وكان أول من أستورد الراقصات .. وأول من إستضاف غلى الشاشة الشواذ .. وأول من أرسى قواعد التلميع واستضافة أقطاب التهليب ولم يتحرك السيد الوزير ساكنا .. فقد كان مشغول بتلميع الفئات العليا .. ووضع قواعد النفاق وتحول التلفزيون الى جراج واسع للشلل .. والأقارب والأسر .. وفتح السيد الوزير خزائن الدولة للنهابين .. وكثرت تعينات الأقارب والأصدقاء .. واللى مالوش خد فى العيلة أو فى دائرة الأصدقاء لجأ الى الصديق الأبدى للشيطان وهو اللحلوح ..

شفت النهارده برنامج عجيب ضمن برنامج صباح الخير يامصر .. طبيب  بيتكلم بطريقة تضحك وسطحية جدا .. عارفين بيتكلم فى إيه فى بلد الأزهر وعلماء الإسلام المتخصصين .. الدكنور بيتكلم عن الأعجاز العلمى فى القرآن .. وأقسم لكم أن واعظ مسجد قريتنا أكثر أقناعا وتعمق من حضرته .. طيب عاوزين نعرف الطبيب ده وصل ازاى لتقديم برنامج دينى علمى وهو متخصص فى الطب .. ؟؟ وعندنا أعظم وأعرق جامعة دينية علمية بلد الأزهر يا عالم بما تملكه من كوادر بارزة فى الدعوة والدراسات الإسلامية .. كل دول لا يصلحوا وتجيبوا طبليب باطنى يفسر لنا آيات القران .. حقيقى اللى أختشوا ماتوا ..

] يتبع ]

[achnaton]

ونكمل المشوار ..

لم ينسى معد برنامج صباح الخير يامصر قواعد النفاق اللى وضعها السيد الوزير .. رغم أنهم كانو بتهموا محمد الوكيل المشرف على هذا البرنامج باتباع أسلوب نفاق رئيس الدولة والمسؤلين .. نفاجأ للمرة العشرة إجترار إحتفالات توزيع الجوائز فى احتفالات التلفزيون والإذاعة .. وبدء الإجترار بمعالى الوزير وإعادة كلمته التى بدها بالشكر والثناء والسلام والتحية من الريس وختمها بنفس الدعاء .. ثم تتابع الفقرات .. كل ماالواحد ينسى يبدأ الاجترار وأود أن اوجه سؤال محدد للسيد الوزير والقائمين بإعداد هذه البرامج ""

ماهى الفائدة الإعلامية والعلمية العائدة على المشاهد من التكرار .. الم يكن يكفى إذاعة الحفل .. وخلاص ؟؟

ثم إذاع البرنامج فقرة .. أول ما سمعت المذيع يعلن عن تقديمها سارعت الى تشغيل التسجيل قال المذيع أنه سيقدم فقرة من محافظة الوادى الجيد والمشروعات التنموية بها .. والعنوان مثير لأنى عاوز أعرف حاجات كثير عن الواحات .. وبعدها مسحت ما سجلت .. كالعادة برنامج من النفاق الرسمى والتلميع للحكومة الخايبة .. وقعد المحافظ يشرح فى خطط الحكومة اللى بينفذها وحينفذها لما يجى المستثمرين إن شاء الله .. إن هذه التغطية النمطية المغلفة بكل أنواع النفاق والرياء تشير وتؤكد فساد الإعداد والسطحية البالغة .. وقد يقول قائل .. أمال عاوز إيه يا فالح .. بنسمع منكم كلام وبس ..؟؟ وعشان كده حأقول لكم عن تصورى عن البرنامج اللى كنت أتمنى تسجيله .. لو عندنا فعلا تليفزيون إعلامى كنت أتصور أن المحافظ أو مقدم البرنامج حيمشى بالكاميرا ليوضح لنا وللمستثمر  نتائج استثماره فى الزراعة مثلا .. فتستعرض الكاميرا إمكانيات الأرض بالمحافظة .. وفرة الرى ومصادرة توافر الطرق الصالحة لنقل المحاصيل الى أقرب ميناء أو أقرب سوق إستهلاكى الإمكانيات العامة والخاصة الموجودة بالمحافظة التى يمكن للمستثمر الزراعى الإعتماد عليها إذا فكر فى الزراعة .. حجم العمالة ونوعياتها ..هل هناك معاهد لإعداد العمال الزراعين أو يجب على المستثمر إعدادها .. المعدات الموجودة ومراكز الصيانة ووسائل النقل وتوافرها ونوعياتها وإذا فكر المستثمر فى التصنيع .. ماهى الأمكانيات الموجوده .. وما هى الصناعت الممكن أن تنجح أو تحط بهذه البقعة من مصر .. وبرضه نبذة عن العمالة وامكانياتها ..الخ ..الخ .. وإذا كان المحافظ يرى أن يكون لديه إستثمارات فى السياحة .. فما هى المزارات السياحة .. وماهى المقومات لمساعدة المستثمر للعمل بهذه الصناعة .. زيارة مثلا للمطار .. واخرى للفنادق .. وثالثة للمزارات حتى ولو معتقل الواحات حيلاقى سياح عاوزين يشفوه ولا  لأ

كنت أنتظر أن ينتقل المحافظ أو معد البرنامج الى الصناعات الموجود .. وياخذ التفصيل أخد الصناعت .. زى صناعة السجاد مثلا التى مر بها فى كادر واحد .. يناقش وبستعرض هذه الصناعة وأصولها وكيفية إجادتها لعلها تجذب عمالا من الوادى طواعية .. بدل من هجرتهم الى الخارج ..

أنا غلطان  فى تصورى هذا ..؟؟ ولا باحلم .. الحلم ده ممكن يصبح جقيقة لو جه وزير متعلم فن الإعلام ..مش فن النفاق والتلميع .. وعشان كده بننادى بعزل الوزير وكفاية عليه كده .. آهو وصل الى قمة التل .. وخربت والحمد لله .. بسبها بقى يمكن اللى بعده يصلح ما أفسده الدهر والوزير وحاشيته

{ يتبع }  ..

[achnaton]

ونواصل المشوار

أحد القواعد المهمة فى الحياة .. هى إذا دخل الفساد والمحسوبية من الباب .. خرج النجاح فورا من الشباك .. وقد دخل الفساد بكل أسف الى مبنى التلفزيون مع دخول رئيس مصلحة الإستعلامات السابق الوزير الحالى .. ولكن بركاته طبعا تشمل هذه المصلحة حاليا كرئيس أعلا بصفته الوزير المسئول .. ويرأس هذه المصلحة حاليا واحد برضه من أرباب المعاشات وياريت  نروح نتفرج سويا على الخريطة فى الرابطة التالية حتى نقتصد فى السرد :

http://www.sis.gov.eg/

ونجيب الهيئة العامة للأستعلامات .. ونشوف مندوبيها وموظفيها فى الخارج .. يعنى كده زى مكاتب التشهيلات العسكرية فى محطات السكك الحديدية والمطارات .. والمهمة الرسمية لهم العلاقات الإعلامية وتلميع السمعة المصرية ومتابعة التطورات الإعلامية واللى بتقوله عن مصر وسائل الإعلام المختلفة .. أما حقيقة العمل أو ما يمارسوه بالضبط .. إستقبال الزائرين من الناس المهمين .. وحضور الحفلات الرسمية وإقامة الحفلات فى الأعياد القومية وصرف مرتب شهر أو أثنين مش مهم على شراء الهديا للرؤساء الأفاضل  حتى يبقوا فى أماكنهم أو يمدوا لهم المدة .. وهدايا بمرتب شهر واحد يمد سنه فى الأقامة .. ومرتب الشهر ده .. أقولكم كام ؟؟ فى المانيا مثلا  حوالى 18 الف مارك  ولا مدرب كورة أجنبى  ..وقد قلت فى مداحلة أخرى أنى أراهن لو وجتم عند نبيل عثمان رئيس هذه الهيئة على قميص له أو لأسرته صناعة مصرية !! كله مستورد وحياتكم .. والخيبة التقيلة أن مصر الولاده العطاءه مفيش واحد واحد بعلمه ومقدرته عشان كدة الوزير متمسك به رغم بلوغه سن الأحالة على المعاش من مده ..

والسؤال المحدد الثانى للسيد الوزير :

   .. إيه أسباب الأبقاء على رئيس الهيئة وهل إقرار الذمة المالية اللى بيقدمة موظفى الدولة  موجود .. ولا عندنا محمد الوكيل ثانى .. !! ماهى حاجة تلخبط .. لما النهاردة فى صباح الخير فقرة قراءة فى مجلة المانية من السيد المستشار الصحفى المحال للمعاش من سنتين ومازال فى منصبه بفضل الزيت إياه .. بيتكلم عن من .. واحد أسمه مولىمان سياسى من حزب زى حزب الأمة عندنا وليس له أى وزن سياسى .. والثانى وزيرعمل سابق خرج مع كول من الحكم .. وحاليا احد افراد برنامج تلفزيونى ترفيهى .. داتنا نيلة فى حظنا الهباب ..!! أنا أعرف طلعت مهندس ليه .. كان زمانى الوقت احد أقطاب النفاق والرشوة الكبار منه لله اللى كان السبب ..!!

ياريت حد يشرح لنا .. أسباب مد خدمة مندوب وزير السياحة لأكثر من خمس عشر عام ؟؟ وميزانبته كام .. طبعا هو والمكتب .. لو دفعناها لفنادقنا لأستغنيا عن السياح الألمان !!

ونرجع لعش الفساد .. فى ماسبيرو .. اللى مش حينضف الا بعد ما ينقل عم صفوت مكتبه  الى قصره فى مصر الجديدة .. أهو كدة أو كدة فيه ريحة الوزارة .. بالذمة بتحاسبوا محمد الوكيل على عشر ساعات وشوية برفانات .. لأ بلاش نتكلم فى الممنوع ..

خليهم يحققوا مع محمد الوكيل .. زى ما حققوا مع يحبى العلمى الله يرحمه .. والأخ اللى ربنا يديله طولة العمر  ممدوح الليثى اللى قال عليه المستر سفوت هذا الرجل لن يدخل هذا المبنى المحترم اطلاقا طالما انا على قيد الحياة .. طب آهو دخل .. ومش هو بس وكل العائلة .. وفى مقدمتهم النابغة اللى مفيش زيه سى عمرو .. وخد الجايزة كمان .. ونقول تانى اللى أختشوا ماتوا  .. حصلوا الضمير .. ويا ألف خسارة ..

ما تيجوا نقرأ سوا  التوبك بتاع مات الضمير ..لا تسألون كيف مات .. وبعدين نكمل ..

بكرة بقى

اخناتون      :inlove:  :inlove:  :inlove:

[ragab2]

ألم يحن

الوقت لمحاسبة الفاسدين بالتليفزيون الذين عينوا أبنائهم وأقربائهم ووضعهم على الأقل فى البلاك ليست ان لم يجازوا

[good_future]

يا عم إخناتون الرحمه

توهتنا...من الثورى...اخازوق حزنك....مرورا

بعزبه...سفوت ...الشريف...في النفاق

لإقطاعيه...ألمانيا السياحية

ياة

دي مصر فيهل كل دة خير

وكل ده ...نهب

و الله عمار ...يامصر

وإنشاء الله...عمار...حتي يأتي لك ..."علاء".....الدين!!!....و يكون ..."مبارك" عليك

مثل ...غيرة

[achnaton]

الأخوة الأفاضل .. دكنور رجب والأستاذ فويتشر .. أعضاء المنتدى ..

الرحمة اللى بيطلبها الأخ فويتشر .. طلبتها ليلة أمبارح للمرحومة أمى .. جاءتنى فى المنام وسألتها إيه اللى جابك يا أمه .. قالت لى .. جاية أغطيك وأصوت عليك .. !! إيه اللى أنت كاتبه ده .. قولتها طب أستنى لما أكمل الحكاية .. وبعدها غطينى وصوتى زى ما انت عاوزه ..

ونرجع للمركز الرئيسى .. للنفاق والفساد فى ماسبيرو اللى كنا بنتكلم عليه  .. وعلى فكرة جانى كام تليفون  أمبارح وأول أمبارح .. وكلها بتشد فى حيلى لما كان حينقطع لولا أنى مصمم على إكمال المشوار .. وطبعا سمعتوا وشوفتوا معى ما كتبه أحمد الجار الله الكويتى .. وأطمأن كل منا أن الريس بيتابع كل شئ من الصباح الباكر حتى الليل .. وعلى الله يكون بيقرأ محاوراتنا أو بتتنقل اليه بصورة أو أخرى .. الغريب أن الريس بيفكرنا فى ردوده  ب " تيزه  " المثل الأعلى لغراب الخراب الأقتصادى الحالى ومستشاره الإقتصادى إستغاث به بعد ما خربها وقعد على تلها ..  

ونبدأ بعون الله بسؤال صريح جدا للسيد وزير الإعلام .. وهو :

ماهى الأسباب الحقيقية للأبقاء على رئيس هيئة الإستعلامات رغم إنتهاء مدة الصلاحية من زمن ؟ وطبعا طقم المستشارين أمثاله عنده فى الهيئة وعند سيادتك فى الوزارة ؟؟

ونكرر نفس السؤال بخصوص مندوب الهيئة فى برلين " رئيس المكتب الإعلامى اللى حاول السفير محمود مبارك التخلص منه عدة مرات .. وفى كل مره كانوا يقولوا له .. ده طالع معاش .. وانتهت ايضا الصلاحية منذ سنوات .. وأتغير السفير وده قاعد .. بيعمل إيه عاوين نعرف ؟؟ خلاص مصر مفيهاش واحد أو واحدة تصلح لهذا المنصب ؟؟

أما السؤال التانى .. وهو سؤال ثانوى .. كبف نفسر إصرار الوزارة على عدم عودة ملك اسماعيل لعملها تنفيذا لحكم القضاء أو حتى الإستفادة من خبرتها ونشاطها حتى أحيلت للمعاش.. فى الوقت الذى فتحت فيه أجهزة ماسبيروا كل أبوابها لمنيرة كفافى ..مع برنامج ملاكى لها .. وكذلك لإبنتها سرسوعة البرنامج الإقتصادى ولباقى أفراد أسرة كفافى ..ودى مثل واحد من المئات من تعينات الكوسة الأسرية فى كل قطاعات مقر الفساد ..

وندخل على البرامج التفصيل الهايفة .. وسهرات القنوات المختلفة .. لما السادة المحترمين معدى الخريطة يتحالفوا مع الزمن الأغبر اللى أحنا فيه .. والشعب – عمال وفلاحين – يسهروا جنب الجهاز لمشاهدة مسلسلات  التغييب .. وأفلام التخلف بلا آى جديد  حتى الفجر وبعده .. الناس دى تشتغل أمتى .. ولما معد أو كاتب المسلسل يستعرض للمشاهد أنتن العادات دون نقدها أو إستنكارها بطريقة أو أخرى .. ليتحول التليفزيون الى مدرسة لمساوئ الأخلاق وفساد الذمم والتواكل وااكسل والإهمال .. والغريب فى الأمر أن معدى هذه البرامج التافهة كلهم من خارج التلفزيون .. وكأن القنوات تعانى من فقر العمالة .. أمال الجيش الجرار ده  اللى إنزلق بزيت اللحلوح .. وسلالم الكوسة العائلية وغير العائلية إلى وظائف التليفزيون  بيعملوا إيه فى الجهاز ده .. والبرامج  اللى فيها شئ من الجدية والنفع .. يكلفوا  معدين ومقدمين من خارج الجهاز ..مقابل مكافآت يعلم الله وحده قدرها ..  وطبعا مش حانتكلم عن سى سمير .. إحنا أتكلمنا عنه قبل كده .. لكن فيه حد يقدر يقوللى إزاى دى تيجى وسمير ده مش موظف فى الدولة ولا فى جهاز الفساد الإعلامى قدر يوصل إنه يسرب للشاشة راقصاته  وشواذه ؟؟ وازاى قبلوا منه أكابر الجهاز تمجيد نجوى فؤاد وفيفى عبده كنماذج للنجاح ..؟؟ وفى آى دين أو ملة .. نلاقى نص بيقول أن هز الوسط وإستعراض اللحم الآدمى أحد وسائل أكل العيش ؟؟  وجان دارك مصر الله يحرسها اللى خصص لها سمسم حلقة كاملة بمناسبة عودتها للحقل الفنى !! ؟؟  وكأنها احدى بطلات أكتوبر !!

المهم كفاية كده ونكمل لما الفرقعة الكبرى تحصل وييجى وزير.. ومعاه عدة تطهير .. وانا كنت وعدت نتكلم عن الثورة وشباب الثورة كعضو ناشط فى منظمات الشباب الأولى .. وحنفسر حكاية الأولى دى فى سياق الحديث .. رغم أنى لست من إنصار إجترار الماضى بعيدا عن كتب التاريخ وبمعرفة المؤرخين .. ولذلك ما اقوله ليس سوى القاء ضوء على تجارب شخصية ..

كنا نعانى كطلبة فى المراحل الأولى بالثانوية من صراع الأحزاب .. وفساد الملكية وانتشار الغش وكنت بالوراثة وفديا لا أشترك فى مظاهرات يقودها الأخوان أو غيرهم الا إذا رأت لجنة الوفد بالمدرسة الأشتراك .. كان المجتمع المصرى يغلى بكل طوائفه .. ولذلك كان الترحيب بقيام الثورة كنا أيامها صبية يسهل تشكيلهم .. وجاءنا فى البلدة أعضاء مجلس قيادة الثورة وبينهم ناصر وكان فى البداية متواريا فى صفوف زملائه .. وأعلنوا فى البداية عن تشكيل هيئة التحرير والتى أنبثق عنها منظمات الشباب التى قادها آنذاك صاغ طليق اللسان قوى جدا فى الخطابة ..مقنع الى حد كبير لكل من يتكلم معه .. واستطاع وحيد رمضان خلال شهور بسيطة من جمع شباب وصبية البلد تحت مظلة المنظمات .. وكانت مرتبة ومنظمة بشكل عظيم .. كلنا زاد ايماننا ببلد افضل وزرع فى صدورنا حب مصر .. وسهل التنظيم ما كان موجود بالمدارس آنذاك من تربية عسكرية .. وفى أول عيد للثورة جمع وحيد رمضان فى ميدان عابدين  أمام مقر هيئة التحرير ( حاليا محافظة القاهرة ) آلاف من شباب مصر بزى عسكرى كاكى .. آمن الجميع بوحيد رمضان قائدا نزيها ووطنيا شريفا .. وأنتهت الأعياد وعدنا الى بلادنا بشحنة ضخمة جدا من الثقة بالنفس والإصرار على المثالية فى الإصلاح .. وبعد فترة قصيرة .. إنفجرت بيننا أول مؤامرة للصراع بين اللى فوق .. أوحوا  لقيادة الثورة أن وحيد رمضان تمكن من تكوين جيش المستقبل من الشباب .. وأنه أصبح بالنسبة للصبية والشباب المثل الأعلى والقائد الأوحد .. وفى يوم وليلة أصدر عبد المجيد شديد وكان أحد أقطاب هيئة التحرير وأعلى رتبه من وحيد رمضان .. بفض المولد وايقاف النشاط وأمتد الأبعاد الى مساعدى وحيد رمضان ورؤساء المناطق .. وغرقت منظمات الشباب .. ومعها آمال كثيرين من الشباب .. ثم حدثت التطورات التى نعرفها جميعا .. وراح محمد نجيب .. واتهدت هيئة التحرير التى كانت تنادى بالتحاد والنظام والعمل .. وتشكلت حاجة إسمها  الشباب الإشتراكى بعد العدوان الثلاثى .. وفى الجيل الثانى من هذا التنظيم كان الطلبة  كمال الشاذلى .. حسين كمال بهاء الدين .. محمد توفيق عويضة .. صفوت الشريف .. عاطف عبيد .. يوسف والى .. ومفيد شهاب الدين  .. وغيرهم وغيرهم .. عرفتم بقى أنا كنت باتكلم عن الثورة وشباب الثورة ليه .. لأن من ثبت على المبدأ آن ذاك رفض الإستمرار مع المتآمرين على زعيمهم وقائدهم الذى كان يلقنهم حب مصر ويجمعهم تحت مظلة هيئة التحرير بمبادئها التى أعلنت عنها الثورة حين قيامها لرفعة البلاد .. حطم هؤلاء الظلمة شباب مصر الصغار آنذاك وخلقوا منهم جيلا من المتسلقين والمنتفعين والمنافقين .. وضاع شباب مصر .. وضاعت أجيال على الأقل ثلاثة .. وها نحن نجنى ثمار أول مؤامرة لرجال نسبوا أنفسهم للثورة .. وبعدها توالت المؤمرات .. ويا عينى عليكى يا مصر ..

ولعلنا الآن عرفنا ليه الفساد إنتشر بمصر .. وحذوره فين .. ولابد من قلع الجذور المريضة حتى تنمو شجرة العطاء والخير ..

تمنوا معى ذلك .. وأسألوا القوى الجبار وحسبنا الله ونعم الوكيل ..

اخناتون  :inlove:  :inlove:  :inlove: