مطلوب البحث عن "أبو الرجال" أو الطرف الثالث فى مأساة مصر

[se_ Elsyed]

صباح الهرتلة ..

زي ما قولت لكم .. كل واحد له فلوس عند التاني فبيبقى سهل قوي يحشر إسمه في أي مصيبة بدون دليل وبدون تحقيق وكأنها سلطة مش دولة قانون

مسؤول : «نور ولكح ووهدان وأسماء» متورطون فى الأحداث

كتب داليا عثمان وسارة نورالدين وسوزان عاطف ٢٠/ ١٢/ ٢٠١١

تصوير- محمد رمضان

أحد المصابين فى الأحداث يجر فوانيس منزوعة من أعمدة الإنارة

كشف مصدر مسؤول عن تورط شخصيات حزبية وبرلمانية سابقة، ورجال أعمال، ونشطاء سياسيين فى الأحداث التى تعرضت لها مصر فى الآونة الأخيرة، بما فيها أحداث مجلس الوزراء.

تلقت «المصرى اليوم» قائمة بالأسماء الرئيسية التى اتهمها المصدر المسؤول وهم: الدكتور أيمن نور رئيس حزب غد الثورة، ورامى لكح رئيس حزب الإصلاح والتنمية، وأسماء محفوظ الناشطة السياسية، وصبحى وهدان، عضو مجلس الشعب السابق عن الحزب الوطنى «المنحل». حذر المصدر من «خطورة تحويل البلاد إلى سوريا من خلال نقل الصراع السياسى على السلطة إلى صدام بين الشعب والجيش، بعد أن نجحوا فى إذكاء هذا الصدام بين الشرطة والشعب» - حسب تعبيره .

وأكد المصدر أن سيناريو «المؤامرة» قد اتضحت خيوطه ومعالمه من خلال من يحاولون الانقضاض على شرعية الدولة، مشيرا إلى أن جميع الوثائق والاعترافات والعناصر المتهمة فى هذه الأحداث وما سبقها من سيناريوهات مشابهة سواء فى شارع محمد محمود ومن ثم مجلس الوزراء أمام النيابة العامة، وإعلان نتائجها أمام الرأى العام، مؤكدا أنه تم توثيق اعترافات المتهمين بالصوت والصورة على مدى ٥٤ دقيقة فيديو، وكشفوا فيها قيام «معاونين» للشخصيات بدور الوسيط وتزويدهم بالمال والمخدرات .

ورداً على الاتهامات، قال أيمن نور إنها «تهريج» ولا أساس لها من الصحة، «وفى حال الإعلان رسميا عن اتهامى سأتخذ خطوات قانونية وتصعيدية ضد المجلس العسكرى».

واعتبرها رامى لكح شائعات مغرضة ومضللة، وتوعد باتخاذ أشد الإجراءات القانونية وتقديم بلاغ للنائب العام ضد مصدرها، وقال: «عرّضت نفسى للخطر ونزلت ميدان التحرير منذ الأيام الأولى للثورة، واللى بيحرق البلد هما الفلول وأتباع نظام مبارك، و٨٠ % من اللى خربوا البلد مسجلون خطر وباعة جائلون، وكانوا يتقاضون رواتب من المتهمين فى القضايا الكبرى، حتى يتم صرف انتباه الرأى العام عنهم».

وقالت أسماء محفوظ إن المجلس الأعلى للقوات المسلحة يتبع نفس أساليب النظام السابق من إثارة الاتهامات دون دلائل، وذكرت أن القصاص من قتلة الثوار سواء كانوا من الجيش أو الشرطة لابد أن يتم سريعا، وإطلاق الشائعات وتخوين الثوار وغيرها من الأساليب لن تثنيهم عن مواقفهم.

وقال صبحى وهدان إنه ليس مليونيرا لكى يقف وراء هذه الأحداث، مؤكدا أنه ضد المظاهرات فى الفترة الحالية تماما، كما أنه لم ينزل إلى ميدان التحرير حتى خلال ثورة يناير.

[نورالعين]

يعني دلوقت البعض مقتنع بأن مفيش أصابع بتحرك الحرايس

وان طنطاوي ومعاه المجلس العسكري متواطئون وهم من يدبرون لكل تلك الأعمال

وأن المجلس هو من يستأجر البلطجية لاثارة العنف وان المجلس يدفع قوات الجيش والشرطة لإحداث الفوضي حتى يستمر المشير في قيادة المجلس وبعد كده يجيبوا لكوا مبارك وجمال وسرور والشريف يحكموا البلد تاني.

خلاص أنا مصدقوا

ممكن بقى لما حضراتكم متأكدين قوي أن هو ده الموقف وان الجيش والشرطة ايد وسخة وهم من يتركون البلطجية يولعوا البلد،

ممكن بقى حضراتكوا تقولوا لي انتوا ياثوار يامحترمين بتروحوا تتصدروا المشهد ليه؟ ليه ماتسيبوش الجيش يطحن فيهم مادام هو من دفع لهم وحماهم زي مابتقولوا.

ليه الثوار متواجدون مع من يشعلون البلد؟ ليه الثوار ماسابوش الميدان للبلطجية وراحوا بيتهم حتى يبعدوا الشبهات عن نفسهم؟ مش لاقي جواب غير ان الثوار لازالوا في طور المراهقة السياسية ولا يعرفون متى وأين يثورون ومتى وأين يبتعدون ، وكيف أن صرخات وتهييج البلطجية والصيع قد استطاعوا جرجرتهم كالقطيع ليورطوهم في الأحداث.

مشكلة الثوار دلوقت انهم أصبحوا " تحت الطلب " ولكن كثيران هائجة ، يصرخ صايع في ميدان التحرير فيأتي إليه الثوار من كل حدب وصوب ، هكذا بدون تفكير وبدون تيقن وبدون تخطيط ، هم فقط جاهزون لأي صرخة قادمة من أي مكان.

طبعا انا حطيت اكثر من فيديو يبين بلطجية وصيع وهم يكسرون ويشعلون النار ويحاربون قوات الجيش ، لكن بما انكم مش عايزين تقتنعوا إلا باللى انتوا اقتنعتوا بيه ، مش حاقدر اقول إلا " ربنا لاتجعل مصيبتنا في عقولنا وإنا لله وإنا إليه راجعون ".

يا استاذ محمد مش احنا اللى بنقول ان فيه مندسين هما اللى احرقوا وبايدي مجهولة

التحقيقات هي اللى بتقول

يبقى المفروض ان يتقبض على هؤلاء المخربين مش نطلب انسحاب الثوار

طيب ما هو ده المطلوب انهم ينسحبوا من الميدان عشان كده استخدموا البلطجية والعنف

لو انفض الميدان من الثوارمش حيبقى ليهم لزمة البلطجية ويمشوا هما كمان

لكن مش حيقدر الثوار يرجعوا تاني الميدان ليعبروا عن رأيهم لان الجيش مش حيسمحلهم

المفروض زي ما حصل كده نقبض على اللى بيثيروا الشغب ونحقق معاهم

واظن ده مش صعب على قوي عسكرية المفروض بتحارب اعداء

والله أعتي القوات العسكرية والمخابراتية ما تقدرش تفرق بين مندس ومتظاهر

أساسا كلهم شكل بعض

وللا هو المندس علي راسه شرطة مثلا والمتظاهر من غير شرطة

كل اللي الجيش يقدر يعمله إنه يقبض علي الكل وبعدين يحقق وساعتها يبدأ يبان مين مندس

وقابض فلوس ومن مين ، ومين متظاهر ومين مغرر بيه

وليه بعد اللي حصل ده كله مصرين علي بقاء المتظاهرين ومعاهم البلطجية في التحرير وعند مجلس الوزراْء؟؟؟

وليييييييييييييه دلوقتي أثناء إجراء الإنتخابات ؟؟؟؟؟؟؟؟؟

عشان انتو مش عايزين الإنتخابات اللي إكتسح فيها الإسلاميين

عايزين تثيروا الفوضي ( والشباب فيهم مغرر بيهم ) عشان المجلس العسكري يفرض الأحكام العرفية ويفضل متبت فيها ويلغي الإنتخابات

إبحث عن المستفيد من كل اللي بيحصل

أما جزئية إن الثوار مش هيقدروا يرجعوا الميدان تاني - عشان يعبروا عن رأيهم - لو مشيوا دلوقتي ، فعذرا

الكلام ده غير منطقي بالمرة ، إيه اللي هيمنعهم لو كان فيه دافع - حقيقي - لنزولهم ؟إنهم يرجعوا الميدان تاني في أي وقت ؟؟؟؟

ولو عندهم حق المرة دي الشعب كله هينزل معاهم ويساندهم

آسفة ، كل ما يحدث ، والإصرار علي عدم فض الإعتصام ، والتوقيت

بيأكدو إن هدفكو الأوحد هو إفساد العملية الإنتخابية

برغم ان اسلوبك مرفوض

بس حرد حتى لا تتصورى اني بتهرب

الثوار لو على اسلوبك ....فعلا من غير شرطة

لانهم ببساطة لا يحملوا اسلحة والعملية مش مستحيلة زي ما انت متصورة

لانها فعلا تمت

وقبض على كثيرين منهم من افرج عنهم ومنهم من اعترف بفعلته وبمحرضه كمان زي ما الموضوع بيشير

يعنى مكنش لازم نستخدم عنف ضد الجميع ظالم ومظلوم ومكنش لازم نهين ونضرب بنات بسفاقة وحقارة وقف لها الاسلاميين متفرجين بل وفرحين ومستهزئين واكيد شفتي قناة الناس التى تتابعيها والمذيع الشيخ اللى بيتريق علىهم والمتحدثين عن حزب النور معه يتضاحكون !!!

ولو كنت كلفت نفسك وعرفت طلباتهم الحالية كنتي عرفتي انهم بيطلبوا تسليم سلطة مصر كلها لرئيس مجلس الشعب المنتخب واللى اكيد حيكون من الغالبية المتأسلمة طبعا لانهم فيها الغالبية

او تسليمها لرئيس منتخب حسب الاغلبية اللى شفناها وقدرة التيار الديني على الحشد كانت كمان حتكون لصالحكم

بس لانهم اطهر ابناء مصر لم يفكروا في ركوب الثورة وحصد مكاسب منها

كان تفكيرهم الاوحد ابعاد الجيش عن الهيمنة على الدستور ابعاده لانه كل يوم يفقد نقاط من رصيده لدينا عندما لا يقدم القتلة للمحاكمة ولا يحاكم الا الثوار ويترك القتلة يرتعون

وبرغم ذلك كانوا اول من اهانوا ممن ركب الثورة وحصد المكاسب لنفسه

شفت فيديو خالد عبد الله وما عجبنيش أسلوبه

وشفت فيديوهات تانية لشباب بيلفوا سجاير بانجو أو حشيش

شباب المعتصمين

ولو هتقولي مندسين ، فمشفناش الثوار أطهر شباب مصر بيبتعدوا عنهم وبيتبروا منهم زي ما قال أحد الزملاء

وشفت فيديوهات العنف فيها كان من جانب الثوار أو اللي محسوبين علي الثوار

وشايفاكوا برغم كل الدم اللي سال والناس اللي ماتت ، لسة بتباركوا الإعتصام وبتأيدوا المتظاهرين في الإستمرار

وشايفة الحال كان بدأ ينصلح والإنتخابات شغالة والمتأسلمين ، زي ما بتوصفيهم ، فازوا بأغلبية البرلمان عشان

الشعب هو اللي إختارهم بإرادته ولأول مرة الشعب بينتخب وبيختار بحرية

وشايفة طلبات الثوار وإعتصاماتهم كان ممكن تتأجل لحد ما الإنتخابات تخلص ، أو حتي لمانلاقي العسكر بيفرضوا سيطرتهم علي وضع الدستور

أو لو لقيناهم بيماطلوا في إجراء إنتخابات الرئاسة في موعدها وبيماطلوا في تسليم السلطة، ساعتها كنا هنفهم هما بيعتصموا وبيصعدوا ليه

وليه ناس بتموت وبتنصاب

وشايفة الناس فقدوا ثقتهم في الثوار والغالبية ضدهم ومستنكرة أفعالهم اللي بقت نتايجها خساير ومفيش فوائد

وشايفة توقيت يخللي الكل يشك في هدفهم من كل ده ، وتفسير واحد ، ألا وهو إلغاء الإنتخابات

وبعتذر لك إن كان ضايقك أسلوبي ، بس إلتمسي لي بعض العذر بعد اللي كتبته ده كله

يمكن تستغربي لو قلتلك انى كمان مش موافقة على اعتصامهم امام مجلس الشعب وافضل التسلسل المتفق عليه عن اي اقتراحات اخرى

انا شايفة ازاي رصيدهم بيقل في الشارع برغم كل تضحياتهم

لكن انا او انت او اي شخص لم يعيش تجربتهم

لم يشاهد من يتساقط مقتولا جانبه من لم يشاهد من ضرب بعينه ففقد بصره من سيق للزبالة مقتولا

لا نستطيع ابدا ان نحكم على موقفهم

اللى شاف الموت بعينيه مش ممكن ترده كلمة ممن هو مشاهد على التلفزيون

انا مع حقهم في التعبير والتظاهر والاعتصام مادام هذا هو رغبتهم ومادام هذا يحدث بشكل سلمي

ورافضة نهائيا لاستخدام عنف معهم وافتعال مهاترات وهمية كان من الممكن التحكم بها قانونيا من اجل فقط تصفيتهم

نعم هم اطهر ناس في مصر

لانه ليست لهم اي مصالح الا تحقيق الحرية التى قتلوا من اجلها

انا اتابعهم على تويتر وهم نفس الشخصيات التى بدأت الثورة

والتى تريد القوى السياسية اخراصهم للاستمتاع بالتهام ثورتهم او مكتسباتهم حد قولهم ويريد المجلس تصفيتهم ليرتاح من شوكة لا يستطيع ابتلاعها بالاتفاق معها

ولهذا سأظل ادافع عنهم مهما اختلفت معهم

وهذا الخبر سيؤكد لك كيف يستطيع البعض استغلال المواقف حتى التى لا يوافق عليها لمصلحته فارجو ان يطمأنك الخبر بالنسبة للانتخابات

http://waelelebrashy.com/forum/t95272.html

لكن هل يكون اكبر همكم الخوف على نتائج الانتخابات !!!

لو هذه الفتاة وقعت بفلسطين لشاهادنا مظاهرات لا حصر لها

لو كانت كاميليا او عبير لوقعة فتنة طائفية بسببها

كلمة الحق لا تعلو فوقها كلمة اخرى

[نوران]

يمكن تستغربي لو قلتلك انى كمان مش موافقة على اعتصامهم امام مجلس الشعب وافضل التسلسل المتفق عليه عن اي اقتراحات اخرى

لكن هل يكون اكبر همكم الخوف على نتائج الانتخابات !!!

أستاذة نور العين

أولا كده إحنا إتفقنا يمكن لأول مرة علي كلامك المظلل بالأحمر

وأما بالنسبة لسؤالك إذا كان أكبر همنا هو الخوف علي نتائج الإنتخابات ؟؟

فأحب أجاوبك وأصحح بس معلومة حضرتك

خوفي وخوف أكتر المصريين وأكبر همنا مش علي نتائج الإنتخابات

ولكن علي إتمام إجراء الإنتخابات ، لإن إتمام العملية الإنتخابية هو أول خطوة علي سلم نقل السلطة من العسكر لحكومة منتخبة

سواء انتظرنا لحين إجراء إنتخابات رئاسية أو تسليم السلطة مؤقتا لرئيس مجلس الشعب المنتخب

لإن هدفنا كلنا هو إنهاء حكم العسكر

عشان كدة ، إعتراضي كان علي الإعتصامات وما ترتب عليها من أحداث قد تؤجل أو تلغي الإنتخابات بالكلية

وبالتالي بقاء العسكر لفترة أطول في الحكم ، وهو بالتأكيد مالا نريده جميعا

يا ريت أكون قدرت أوضح وجهة نظري

بالمناسبة أنا كما قلت سابقا، فقط مصرية مسلمة وليست لي أي إنتماءات أخري