تسقط حقوق الإنسان

[احمد رضوان]

تسقط حقوق الإنسان

لميس جابر

ما حدث في الأسبوع الماضي في منطقة مجلس الوزراء ومجلس الشعب والذي أسفر عن مكسب حضاري رائع وهو حرق (المجمع العلمي) الذي هو أحد الكنوز المعرفية النادرة ليس علي مستوي العالم العربي ولكن علي مستوي العالم كله.. بعد هذا الانجاز الثوري حاولت الفتاة ذات العباءة المفتوحة (أم كباسين)

عمل نوع من الاستعراض و(الإستربتيز) حتي تنهمر الكاميرات فوق ملابسها الداخلية ليصبح جندي الجيش المسكين هو السفاح الذي يهتك الأعراض ويسحل النساء في الشوارع.. وحاول الاخوة الثوريون المحرضون أن يتم هذا الاستعراض ويتم تداوله وتوزيع آلاف الصور منه حتي نتلهي في أعراض حريم الشعب بدل حريق تراث الشعب وحتي تخرج علينا الست كلينتون وتهددنا بحقوق الإنسان.

ما حدث يا أعزائي في الأسبوع الماضي وتفاصيله الصغيرة جعلني أغير آرائي تماما وأعيد ترتيب توقعاتي من الأول.. كنت من قبل كئيبة ومتشائمة وأنا أحذر من السقوط والتداعي والانهيار ولكن الآن أنا لا أحذر بل أدعوكم معي لمشاهدة ومتابعة السقوط الهائل في مراحله النهائية المشوقة وعندما أعرف القناة الفضائية التي سوف تأخذ حق البث المباشر للسقوط حصريا سوف ألفت نظركم لنلحق بهذا الحدث الذي لم يتكرر مثله منذ دخول الجيوش العثمانية إلي مصر وهذا بفضل حقوق الإنسان.

وأتساءل ويارب يقرأ أحد أفراد المجلس العسكري الموقر الذي رغم كل شيء مازلت أبجله واحترمه وأدعو الجميع للوقوف معه ومؤازرته ضد هجمات التتار والمغول ولكن لابد لكي تستقيم الأمور أن يقف المجلس العسكري أولا بجوار نفسه وبجوار الوطن بقوة وحسم وردع ولكنه يخشي منظمات حقوق الإنسان إلي يومنا هذا.

يا مجلسنا العسكري في أي بلاد العالم النايم والقايم والمتحضر والمتخلف يسمح لبعض الصبية مدمنين (الكوللة) وأطفال الشوارع ومحرضيهم من جماعات ابريل ومايو ويونيو بالاعتصام ونصب الخيام والرقاد أمام مدخل مجلس الوزراء ومجلس الشعب؟

في أي بلد في العالم يتبادل الحكام وأطفال الالتراس التهم وإلقاء الحجارة ويقيمون السدود الأسمنتية والأسلاك الشائكة ونسمع عبارات مثل التفاوض والهدنة وخطف الأسري والحوائط البشرية وخارطة الطريق ولن يتبقي سوي أن نعرف مواعيد فض الاشتباك الأول والثاني؟

في أي بلد في العالم تتم مهاجمة وزارة الداخلية بالطوب والحجارة والمولوتوف والمنجانيق والسباب؟ وفي أي بلد في العالم يتبول الصبية علي وزارة الأمن لديهم ويعبر الحدث دون حسم وردع وعين حمراء حتي يلحق به حادث السفارة الإسرائيلية ويلحق بنا إعلامنا الواعي الوطني ليجعل من متسلق المواسير بطلا قوميا أسقط العلم ويصرح بعض المضللين بأن إسرائيل مابتنامش الليل من الرعب والخوف من القوة الشعبية المصرية الجبارة والتي سوف تزحف إلي الحدود وتبتلع «إسرائيل» علي حد قول أحد المثقفين؟

ومع هذا التدليل المتواصل من المجلس وصلنا إلي الأحداث الأخيرة وكان أن لعب بعض المعتصمين الكرة فسقطت داخل مجلس الشعب وكان أن تسلق اللاعب الأسوار لإحضار الكرة من داخل المجلس وانظر يا عالم يا إنساني وانظروا يا حقوق الإنسان لقد تم صعق هذا اللاعب البريء بالفولت العالي وتم سحله علي الأرض وضربه وإلقاء القبض عليه وغالبا سابوه يروح بعد شوية وتوالت الأحداث من اقتحام غرفة كاميرات المجلس الثابتة لأنها قامت بتصوير المعتصمين وهم يلفون سجائر الحشيش وتصاعدت الأمور وأشعلت الحرائق وألقي بالمولوتوف وتم اطلاق الرصاص وسط المتجمهرين فأصبح المجلس هو السفاح والقاتل ومشعل الحرائق وهاتك أعراض النساء وساحل الشباب علي الأرض.. و... وكل هذا ومازال المجلس يخشي منظمات حقوق الإنسان وإذا كان لا يعلم فهذه المنظمات هي السلاح الذري الجديد المصمم خصيصاً للناس اللي زينا يا سادة التاريخ لن يسامح الضعفاء.. ولتذهب حقوق الإنسان إلي الجحيم.

اقرأ المقال الأصلي علي بوابة الوفد الاليكترونية الوفد - تسقط حقوق الإنسان

http://www.alwafd.org/%D9%85%D9%82%D8%A7%D9%84%D8%A7%D8%AA-%D8%A7%D9%84%D8%B1%D8%A3%D9%89/128-%D9%84%D9%85%D9%8A%D8%B3-%D8%AC%D8%A7%D8%A8%D8%B1/139400-%D8%AA%D8%B3%D9%82%D8%B7-%D8%AD%D9%82%D9%88%D9%82-%D8%A7%D9%84%D8%A5%D9%86%D8%B3%D8%A7%D9%86

-----------

سأعود للتعليق لاحقا لإن المقال كل كلمه فيه تحتاج مداخلو مستقلة

[Alshiekh]

كل ماقالته صحيح

ولكنه يمثل وجه واحد من الحقيقة

الوجه الآخر للحقيقة هو أن هناك أخطاء إرتكبها الأمن ( شرطة أو جيش ) في حق المتظاهرين ولم يتم الإعلان عن محاسبة من إرتكبوا تلك الأخطاء والتي كان من الواجب أعلانه.

وبالتوازي مع ذلك يجب الإعلان عن الإجراءات التي تمت حيال المدنيين الذين تتم محاكمتهم.

وفي جميع الأحوال فالمحاكمات لكل هؤلاء يجب أن تتم بصورة علنية حتى تتحقق الشفافية.

والخلاصة في رأيي هي أن المجلس الأعلى للقوات المسلحة قد فشل في إدارة المرحلة الإنتقالية.

[Abu Reem]

مش معنى ان المجلس العسكري يخطيء في ادارة المرحلة الانتقالية ان نقوم بحرق البلد وعمل انقلاب على الجيش منرقبل قلة منرحثالة المجتمع الذين يريدون تشويه صورة

الثوار الشرفاء " ثوار 25 يناير" الذين كانوا يحمون متحف الاثار وينظفون الشوارع ويعيدوا رصفها

الثوار الذين لم يتركوا النساء لمواجه رجال الامن... هؤلاء هم الثوار الحق وليس الاندال الذين يتركون السيدات في مقدمة الصفوف ثم يهتموا بتصوريهم ولم نرى منهم واحد سوى عابر سبيل ليدافع عنها

- احنا مش هنناسب الجيش علشان نقعد نتكلم عن انه فشل او اخطأ او لم يعيد الحقوق لاصحابها

- هذه الاشياء نستطيع تحقيقها بعد ان يصبح لدينا سلطة منتخبة

وكل ما نريده استكمال الخطوة الثانية والثالثة من الجدول الزمني بعد ان حققنا الخطوة الاولى ... فاذا فعل فمع السلامه مش عاوزين منهم حاجةواذا فشل فعلى مصر السلام

[التونسى]

اولا لميس جابر . كاتبه ذات مسحه ليبراليه ... ومن المتعاطفين مع مبارك.. وفى نفس الوقت لها اراء غايه فى المنطقيه والعقلانيه والموضوعيه .. بس معجبنيش المقال ... فى بعض مواضعه

انا رأيى مفروض نقول(( تسقط حقوق الانسان الفوضوى المخرب )) .. ونعم للعين الحمرا مع المشاغبين.. مهما كان تصنيفهم ((ثوار ..التراس ..مدمنين ..عواطليه ..كدابين زفه .. او اى بلا ازرق)) .. اى حد يهين او يتطاول على اى مؤسسه حكوميه خدميه سياسيه ... بالتخريب ..او الاقتحام ..او الحرق او خلافه .. ((او حتى يبقى متواجد بينهم.. ومعملش حاجه )) .. يبقى يستاهل اللى يجرى له .. يتسحل .. ينضرب ..يتصاب... يموت .. ميلومش الا نفسه .. ((خاصة فى الوقت والظروف الحرجه الحاليه)).. ومفيش اصلا ثوار ((وطنيين)) بيحبوا بلدهم بجد ويفدوها بروحهم .. حيعتدوا على مؤسسات وممتلكات وطنهم .. دول يبقوا متناقضين بقى وغير اسوياء.. ومتبرمجين فعلا .. .. واكيد اللى بيعمل الشغب والتخريب عناصر مدسوسه مأجوره .. ومن يبيع وطنه بثمن بخس .. هو خائن ولا يستاهل الحياه .. وملوش عندى شخصيا حقوق انسان او حيوان او بتنجان .. ملوش عندى غير الردع ليكون عبرة لغيره

تم تعديل 24 ديسمبر 2011 بواسطة محمود البصيلى

[عصام أبوالفتح]

انا شايف ان العين الحمراء = شهداء

لذلك المجلس العسكرى يأخذ اخف الضررين .. حتى لو كانت المقارنة بين المجمع العلمى وارواح الشباب

المقال عجبنى ومعظمه كلام منطقى

الجيش محتاج مراسلين عسكريين يجيدون التصوير ونقل الاحداث مباشرة لبث الحقيقة من وجهة نظره

الحقيقة كانت تأتينا دائما من طرف واحد

بالنسبة لى لا زالت 2011 سنة المفاجآت الكبرى والجوائز القيمة لمصر .. سنة فارقة بكل المقاييس .. وفى حدود خبراته فقد عبر بها المجلس العسكرى لبر الامان .. أو كاد أن يفعل

[لماضة مصرية جدا]

تسقط حقوق الإنسان

لميس جابر

.. بعد هذا الانجاز الثوري حاولت الفتاة ذات العباءة المفتوحة (أم كباسين)

عمل نوع من الاستعراض و(الإستربتيز) حتي تنهمر الكاميرات فوق ملابسها الداخلية ليصبح جندي الجيش المسكين هو السفاح الذي يهتك الأعراض ويسحل النساء في الشوارع.. وحاول الاخوة الثوريون المحرضون أن يتم هذا الاستعراض ويتم تداوله وتوزيع آلاف الصور منه حتي نتلهي في أعراض حريم الشعب بدل حريق تراث الشعب وحتي تخرج علينا الست كلينتون وتهددنا بحقوق الإنسان.

السلام عليكم و رحمة الله و بركاته

استاذي الفاضل

انا تجنبت اني ادخل التوبيك اللي بيتناول موضوع الفتاة...لان مجرد الحورا فيما اراه بديهيا شيء يدعو للغثيان عندي

لكن العبارة اللي اتكتبت في المقالة شيء قميء لابعد مدي

و بعيد عن الحوار اللي هيتناول الكاتبة نفسها

انا محتاجة حد بس يقولي...ايه انجازات المجلس العسكري اللي عملها في الفترةالانتقالية و لسه مدياله مساحة من اللي بيطبطبوا عليه و الانكي لسه شايفينه بيحمي مصر و هو اللي متجني عليه

و مش قادرين يشوفوا المشهد باي عين تانية غير....فلنقف احتراما لهذا المجلس العظيم......استغفر الله العظيم

بقي شيء يخنق

الثورة قربت علي سنة...محدش واخد باله

محكمة جدا اسمها خطة صناعة الرعب

مرة بتفجيرات و مرة بحرايق و مرة بالابداع في الانقسامات بين الشعب نفسه

و اذا كانت الدكتور لميس بتتكلم عن السقوط

فيا سيدتي الفاضلة

السقوط الحقيقي

هو

سقوط المجلس العسكري في الف باء ادراة مرحلة انتقالية.....بيطبق فيها نفس السيناريو اللي قاله مبارك...ياانا يالفوضي

لكن ما لا يعلمه

سقط القتلي

و فقدت عيون

لكن الروح مش بتنكسر

و التخويف مش راح يجيب همه

السقوط الحقيقي

انك بعد سنة تسال نفسك.....هو احنا رايحين علي فين

و لو قولنا الانتخابات..بدون اي رؤية حقيقية للمرحلة اللي بعدها...و بدون دستور ينظم التحول الديمقراطي في بلد المفروض قامت فيها ثورة

مالهاش اي لازمة

الاهم هو كيف تؤسس لنظام انتخابي ديمقراطي....مش بس تفرح انك وقفت في الطابور و اديت صوتك

اذا كانت بتتكلم عن السقوط و النجاح

من وجهة نظري الشخصية

سقط المجلس العسكري في الادارة

سقط في عيون البعض...و ربنا يعين اللي بيهتفوله الصراحة ربنا يديكو الصحة

سقط في صناعة الرعب....و اري ان الثورة مستمرة

تحياتي

[elzahraa]

اي منطق يسمح لرجال الجيش بضرب امرأة بهذة الرعونة الفظيعة

و بعدين مواصفات اللباس الشرعي معروفة والفتاة لم تقصر

و مش حق حد يفرض على حد نوع ملابسة الداخلية ايه التهريج دا

بالنسبة للجزء التاني اه طبعا الشباب تجاوز الطرفين تجاوزو

بس ليه بقى

عشان ممشينها مجالس عرفية

مش لو كان اللي هدم صول اتسجن مكنش التهريج دا كلو حصل

و بعدين ما ملفات البلطجية و المسجلين عند الشرطة ما تلمهم امال مادين قانون الطوارئ ليه

اللي خارب البلد ان مفيش قانون بيتعمل بيه

كان الواد عبود دا اتسجن 15 سنة بس ما اضربش مكنش حيحصل كل دا

بس عشان الدنيا ماشية بالكوسة

ومتفتكروش اني مبسوطة من اللي الشباب بيعملوه دا

انا عايزة المظاهرات تتلم

بس تعبت من الكلام في عرض البنت

و تبرأة الجيش كل مرة ان لم يكون فاعل فهو مقصر

و ربنا يعدي الفترة الانتقالية على خير

و شكرا لناقل المقال

لاننا فعلا محتاجين نعرف كل الاراء

[Ahmed Anwer]

لا تكن مع الثورة، بس متتعودش على منظر الدم في شوراع وسط البلد، الدم في الشارع مش عادي، خصوصاً لو كان بيجري في الشوارع بسبب أوامر جهات سيادية...

إغلي لما تشوف جثة شاب مات برصاصة على أرض وطنه، ابكي لما تسمع أمه بتتشحتف عليه، اكسر أي حاجة قدامك لم تشوف أبوه فاقد النطق و المنطق...

ماتقولش عليه شهيد، بس ما تتعاملش معاه على إنه كلب! صدق إنه بلطجي، بس متحرموش من حقوق البلطجي... صدق إنه حشاش، إنه كذاب، إن قابض، إنه خاين، بس متفرحش لموته و متدافعش عن إللي قتله ...

كل واحد مات وراه عيلة و أب و أم و زوجة و أولاد، و أحلام و حكايات و ذكريات... أنا مقتنع إنه مات عشان مصر، وانت مش لازم تقتنع بكدة..

لا تكن مع الثورة، بس خليك بني آدم

منقووووول

تم تعديل 24 ديسمبر 2011 بواسطة Ahmed Anwer

[م تيمور المراغي]

طيب نتصافى وكل واحد يرد للتاني القلم

يعني الامن يضربنا بالحجاره واحنا نضربهم بالنار ,,

استبينا !

[الباشمهندس ياسر]

انا وصلت للسطر الخامس من مقال امنا الغولة الشهيرة بلميس جابر وابتديت احسبن.. ادعي عليها بايه وهي فيها كل العبر

ويحيى الفخراني ده حاجة من الاتنين.. يا اما درجة ايمانه زي الاوليا وربنا بيرفع درجاته يا اما مجرم حرب وربنا بيعذبه

ما انا لو دعيت عليها يتعمل فيها اللي اتعمل في البنت اللي اتعرت ابقى باعاقب الشعب والجيش والامم المتحدة مش باعقبها هي

تصدقوا بايه؟ قولوا لا اله الا الله.. مش بقيت غلاوية وماشية ادعي على الناس.. لقد عجز لساني عن الدعاء على لميس جابر.. مش لاقية لها حاجة تنفع

انت لا تستطيع ان تدعو على لميس جابر.. انت تدعي على اللي مضايقك انه يبقى لميس جابر وكفى

كل ما سلف كان من تعليقات اخت قاضلة تعقيبا غ المقال

[التونسى]

[quote name=Ahmed Anwer' timestamp='1324765699'

post='816047]

لا تكن مع الثورة، بس خليك بني آدم

يا صديقى العزيز .. ماهو متفضلش تستفزنى كل شويه .. بالاهانات والشتيمه تارة .. وب أعمال الشغب والتخريب تارة أخرى .. وعايزنى احتفظ بأدميتى .. اكيد طبعا مع تكرار الاستفزاز حفقد اعصابى وحتحول من طور انسان الى ما هو أسوء من الوحوش الضاريه .. وممكن بسهوله ارتكب ساعتها جريمه .. جريمه استحاله اقوم بيها فى طورى الطبيعى .. ياريت مننساش اننا بشر ومش ملايكه ولا شياطين ..

يعنى عشان انا مثلا عشان معروف عنى انى طيب ومسالم ومليش فى الخناق و((إنسان)) بمعنى الكلمه .. يقوم صحابى وزمايلى يستغلوا ده .. وكل يوم يصبحونى بالاهانات والضرب .. ومردلهمش الاهانه عشان انا انسان طيب ومحترم.. واصبر عليهم واستحمل عشان مبقاش زيهم ...لالالالا طبعا.. دا سكوتى اساسا ممكن يخلينى اشيل غل فى قلبى ممكن يوصلنى لجريمه .. وشفنا وقرينا عن ناس كتير ارتكبت جرائم .. بعيده تماما عن اخلاقهم وشخصياتهم السويه .. ويمكن ده اللى حصل اخيرا .. كل مره رد الجيش بيكون اعنف واقوى وواكثر شراسه ودمويه

بتلومنى انى مش بنى أدم .. لكن مش بتلوم اللى وصلنى انى افقد ادميتى ...وهى دى الاشكاليه .. ونصف الحقيقة التائهة فى زحمة الفوضى

على فكره ساعات كتير الجانى بيكون فى الاصل ضحيه .. زى ست قتلت جوزها من كتر تعذيبه واهاناته المستمره لها .. مع تكرار التعذيب والاهانه .. بتفقد أدميتها . اللى جوزها اساسا ساعد فى فقدها .. وبيدفع التمن فى الاخر حياته ..

انا على فكره مع الثورة جدا جدا .. لكنى ضد الفوضى والتخريب .. والاندفاع والهمجيه ...فى التعبير عن ثورتى

تم تعديل 25 ديسمبر 2011 بواسطة محمود البصيلى

[Ahmed Anwer]

أ / محمود البصيلي

طيب و محترم آيه يا باشا ده يوم ما بيتحرك بيموتله 20 واحد في سكته !!!

ده آحنا عمالين نجري وراء أي مبادرة

فقط عشان نخرج الثور من محل الخزف

[التونسى]

أ / محمود البصيلي

طيب و محترم آيه يا باشا ده يوم ما بيتحرك بيموتله 20 واحد في سكته !!!

ده آحنا عمالين نجري وراء أي مبادرة

فقط عشان نخرج الثور من محل الخزف

والثور ده صبر أد إيه .. وضبط النفس أد ايه .. ومين أصلا إدالو الفرصه يدخل محل الخزف ؟ وليه الرأى العام لم ينقلب عليه رغم التعاطف مع الضحايا ؟ .. ورغم الفظائع والوحشيه اللى شفناها فى التعامل مع المتجمهرين ((سواء ثوار او خلافه)).. الوحشيه اللى بعترف انى مشفتش لها مثال فى عهد اللى ميتسماش ..

أعذرنى اخى الفاضل .. اعذرونى جميعا .. عندما تخفت انسانيتى رويدا رويدا .. ويتراجع مؤشر تعاطفى ..مع من يصرون باستماته وبعند وبتعمد و ب((تواصل)) على اثارة الفوضى والفتنة ((سواء باندفاع عاطفى .. أو بأجر)).. اعذرونى .. فأنا بشر ولى طاقة

[احمد رضوان]

مع كامل احترامي لآراء الزملاء الذين يرون في مقال لميس جبر اى منطق ولمن أعجبهم ارد على هذا المقال مضطراً فقط لإفند كل ما جاء فيه ماعدا أول سطرين فقط لأنهم هم فقط الحقيقة ، وما عداهم هو كذب وتلفيق وتدليس

----------------------

تسقط حقوق الإنسان

لميس جابر

نبدأ بالعنوان والغريب ان الكاتبة تتحدث عن حقوق الإنسان ... واستهلت المقالة بتسقط حقوق الإنسان أي حقوق واى إنسان هل للمصري أي حقوق قبل الثورة وهل اعتبر المصري إنسان أصلاً حتى يتمتع بحقوق الإنسان التى تنص عليها كل الأديان وينص عليها ميثاق الأمم المتحدة لحقوق الإنسان والذي ينص على التالي

كل البشر يولدون أحرارا ومتساوين بالكرامة والحقوق

لكل فرد الحق في ممارسة الحياة والحرية والأمان الشخصي

يمنع ممارسة التعذيب ولا يجوز تعريض الفرد لعقوبات أو معاملة قاسية أو وحشية من قبل أي جهة كانت ولأي سبب كان

كل فرد يتمتع بحق الاحترام أمام القانون في أي مكان

الكل متساوون أمام القانون ويتمتعون بحماية متساوية من قبل القانون بدون أي تمييز

يمنع الحجز التعسفي والاعتقال الاعتباطي وكذلك النفي

.

.

.

راجع ميثاق حقوق الإنسان

لو كان هناك حقوق للإنسان ما قامت ثورة ، لو حقق نظام مبارك الحد الإدنى من حقوق الإنسان لما نزل الناس إلى الشارع يضحون بأنفسهم من أجل كرامتهم وأزيدكم ... لو مُورست حقوق الإنسان في الأشهر الماضية - منذ يناير - واحترم ميثاق الأمم المتحدة واحترمت تعاليم الأديان ما بقى المعتصمون في التحرير يتساقطون كل يوم في سبيل بعض من حقوقهم الإنسانية التى سلبت منهم من قبل على يد مبارك واليوم على يد المجلس العسكري وبمباركة الكثير ممن اراحوا ضمائرهم باتهام الطرف الأضعف والذي لا يملك غير نفسه ودمه فقط ليطالب بهما كرامته

نعود لحقوق الإنسان واتذكر مسرحية محمد صبحي - ماما امريكا - عندما تسائل عن حقوق الحمار مستغرباً هل هي حقوق الحمار الحمار أم حقوق الإنسان اللى زي الحمار ... لأننا ليس لنا حقوقاً لا إنسانية ولا حتى وصلت لدرجة حقوق الحيوان عند الآخرين

كل البشر يولدون أحراراً هل ما نراه من محاكمات عسكرية لأكثر من 16000 مواطن بصورة ظالمة لا يمثل أهداراً لأول حق من حقوق الإنسان ، متساوون في الكرامة ، أي كرامة هى التى نراها في ضرب العجائز والنساء وتعرية النساء والتحرش الجنسي بهم وإجبار الشباب على اكل الحشائش وتقبيل البيادة والإذلال وانتهاك الجسد والتعذيب والإختطاف بل ووصل الأمر لضرب ممثلي الشعب أنفسهم والتبول على رمز الشعب من فوق قبته وإستعداء المواطنين الشرفاء على الثوار

لكل فرد الحق في الحياة والحرية والآمان ، هل ما نراه هو الحق في الحياه وهل هو ممارسة الحق في الحرية وهل إطلاق يد البلطجية على المواطنين والثوار وقتلهم وإتهام الطرف الخفي في دراما عبثية هو ممارسة لحقوق الإنسان

حق منع ممارسة التعذيب ولا يجوز تعريض الفرد لعقوبات أو معاملة قاسية أو وحشية ، طبعاً صور المعذبين والمنتهك اجسادهم لا تحتاج لأي كلام والفديوهات تملأ فضاء الإنترنت ... المجلس العسكري يمارس التعذيب ضد الشعب بكل قسوة في مخالفة صارخة لأحد حقوق الإنسان والحيوان في سبيل قتل روح الثورة ... من يرى ان ذلك لا يحدث وانه تلفيق او فوتوشوب زى اراء البعض هنا يبقى بالنسبه له كمان اشلاء الجثث اللى في المشارح دي طبعاً مابيتز ، والغازات اللى موتت الناس في محمد محمود كان بخور ... حسبي الله ونعم الوكيل

كل فرد يتمتع بحق الاحترام أمام القانون في أي مكان ، نرى بأم اعيننا كيف يتم احترام هذا الحق عندما يكون المتهم هو مبارك وعائلته وافراد نظامه او فرد من افراد الشرطة ... ولكن المواطنين الثائرين لهم فقط المحاكمات العسكرية الظالمة والإختطاف والإعتقال القسري بل وصل الأمر لتلفيق التهم عن طريق التهديد والشراء وما متهمين الوايلى القصر واعترافهم على محمد هاشم ببعيد والذين اخلت سبيلهم النيابة في رد صريح على التلفيق والتدليس

ولن اكمل لأكثر من ذلك ، لأن العنوان وحده يحتاج لكتاب كامل للتحدث فقط عن الإنتهاكات للكرامة والحرية والعدالة الأهداف الأساسية التى قامت عليها الثورة .. التى يدعون انهم حماتها فإذا بهم مغتصبيها حتى إذا حملت سفاحاً حرائقاً وتخريباً ودماراً ودماءً تسفك كل يوم ...اُتهم الثوار أنفسهم انهم أباء لهم والتحف المجلس العسكري رداء القديسين والأنبياء

نعم يا من تدعي لميس جبر فلتسقط حقوق الإنسان التى فطمت عليها والتى تشربناها صغاراً وأنهكتنا كباراً ... ولتحيا حقوق الإنسان التى يبذل الثائرون الآن دمائهم من أجلها ... كرامتهم وحريتهم وعدالتهم

فقط هذا كان العنوان ولى عودة لإسقط كل تلك الأكاذيب واكشف ذلك التدليس

للتذكرة صورة عبودي ... بداية الأحداث ... لنرى الكرامة والحرية والعدالة في أسمى مظهرها

تم تعديل 25 ديسمبر 2011 بواسطة احمد رضوان

[احمد رضوان]

أنا حانقل الرد ده من مدونة مناكيش لإني بصراحة لو رديت معرفش حجم الرد حيكون إزاي وانا شايف انسانة ترى انسانه مثلها في غيبوبة في الشارع بسبب الضرب ويتم تعريتها وترقد بين الحياة والموت ... واجي بكل تخلف اقول ده عرض ستربتيز وكمان للشهرة ... ده قمة السفالة

عمل نوع من الاستعراض و(الإستربتيز) حتي تنهمر الكاميرات فوق ملابسها الداخلية ليصبح جندي الجيش المسكين هو السفاح الذي يهتك الأعراض ويسحل النساء في الشوارع.. وحاول الاخوة الثوريون المحرضون أن يتم هذا الاستعراض ويتم تداوله وتوزيع آلاف الصور منه حتي نتلهي في أعراض حريم الشعب بدل حريق تراث الشعب وحتي تخرج علينا الست كلينتون وتهددنا بحقوق الإنسان.

يا أستاذة لميسوف .. الاستربتيز حصل فعلا والشو بتاع البورنو والله وقع حقا بس عارفة حصل امتى ؟ أما جندي الجيش المصري وعلى رؤوس الأشهاد

جميعا شرق وغرب شمال وجنوب فتح لمؤاخذه في دي الكلمة ” السوستة ” ولوح بعضوه الذكري من فوق مبنى مجلس الوزراء هو ده الاستربتيز اللي يمكن كنت تقصده واتلخبطي ‘؟؟ . لو حد قال لك انه كان بيتبول علينا من عل اوعي تصدقي المحروس كان مخرج عضوه الذكري علشان يطفي حريق المجمع العلمي اوعي تصدقي أبدا انه كان بيبول علينا من فوق اخصي

تم تعديل 25 ديسمبر 2011 بواسطة احمد رضوان

[ssmaly]

انا احيى لميس جابر وارشحها لتكون مساعدة رئيس ((حزب النازيون الجدد)) واحب اقول لها انت تاخرتى عدة ايام لأن منصب رئيس الحزب استولى عليه سيادة اللواء كاطو

هناك اتجاه من اعداءالثورة لشيطنه الثورة والثوار مع بعض التحفظ بقول دول مش المتظاهرين الشرفاء بتوع يوم 25 يناير (طبعا لان المجلس (وحتى مبارك) اعترف بحقوق المتظاهرين بتوع يوم 25 يناير وانه شباب جميل ولكن دخل عليهم فى الايام الاخرى مندسين )

هناك احتمالين

الاول ان يكون مايقال من قبل كل الأعلام الرسمى والاعترافات المنقولة كاذبة وملفقة(يعنى يكونوا هما الى ارسلوا المندسين والبلطجية وصوروهم )

الثانى هو ان الثوار معظمهم غير وطنين ومنحلين وعملاء منذ البداية وحتى الان طيب ليه الاعلام احتفى بالشباب الورد الى فتح فى جناين مصر ؟

انا فكرت وافتكرت مدى الحيرة التى انتابتنى منذ يوم 25 يناير والأخبار المتناقضة عن الثورة والثوار والبيانات الرسمية والاعلام الرسمى ومعظم الخاص كان بيقول

ان معظم ما فى التحرير عملاء ومنحلين

وبرضه هو بنات محترمة تبات فى الشارع؟

وعلاقات غير محترمة ومخدرات ويورو وكنتاكى(الان اصبحت نكتة ولكن ايامها لما طلع حسن يوسف قالها صدقته)

ومين الى بيمول اكلهم وشربهم ؟

وعندما شوفت يوم الجمل وسمعت ان الشعب المصرى بيضرب فى بعضه والنداء برجوع الناس من التحرير علشان انتوا اخوات ماتضربوش بعض انشطر قلبى متاثرا بوجود حرب بين الشعب المصرى بهذه البشاعة

و طلعت ناس طالبت بحرق البلطجية الى فى التحرير مش مشكلة كام الف يموتوا علشان مصر (مبارك) ماتتحرقش او تسقط الدولة الى فى التحرير

دى لايمثلوا 1 فى المائة من الشعب المصرى كلهم عملاء

وعنما اتضحت الحقيقة وظهروا الثوار على بعض القوات بالصوت وبعضهم بالصورة نقل وجه نظر اخرى غير الى كنت بشوفها

وبعد اعلان المجلس العسكرى التحية للشهداء والاحتفاء بالثوار واعلانه التحقيق والمحاسبة فى كل الجرائم التى جرت تجاه الثوار

اتضحت الحقيقة بدون اى شك او تشكيك

طيب عايزنى ارجع تانى احتار فى ان اصدق مين ولا اكذب مين ؟

اعتقد ان المؤمن لا يلدغ من جحر مرتين (كلمة جحر دقيقة جدا ولم يقل ثعبان) لان جحر مبارك به الكثير من الثعابين عندما نقضى على واحد يظهر من نفس الجحر واحد تانى ممكن بلون جلد جديد

فانا مع الثوار الى اخر مدى ومع الثورة الى ان تقف فى محطتها الاخيرة من حرية وعدالة اجتماعية

تم تعديل 25 ديسمبر 2011 بواسطة ssmaly

[hanzalah]

أجمل شيء في ثورتنا العظيمة أنها كشفت أقنعة نجوم كتير مكانهم الزبالة

منهم لميس بكل تأكيد

الست لميس الليبرالية كفرت بحقوق الانسان لمجرد أنها لمست الاله الجديد الذي يطبل له كل من لايحترم كرامة المصري

المجلس لايحترم كرامة المصري على طول الخط لان المجلس هو مبارك ومبارك هو المجلس

وكم من دراويش مغيبين العقول ستفرزهم الاحداث

اليوم تسقط حقوق الانسان

ولماذا لن نسمع منك يا (ست) لميس عندما تعرت صاحبة العشرين ربيعا على مسمع من العالم

آه فهمت

يمكن دي حقوق الانسان التي تريدين لها أن لا تسقط

ياجماعه قبل ان تختلفوا مع كتابات كل سكير من هنا وهناك

اتفقوا فقط مع ضمائركم

الموضوع ليس فتاة تم سحلها واخرى تم كشف عذريتها وثالثة ثم تعريتها على الاسفلت

الموضوع امتهان منهجي متكرر لكرامة المصري الذي ثار فأيقظ الآلهة النائمة ودك عروشها

هؤلاء الاباطرة يعاقبونا على ثورتنا باختصار

والامثلة أكثر من أن يستوعبها المقال

حكموا ضمائركم يا شعب مصر أولا

[moamana]

معلش انا شايفة الست لميس ديه من غير قراءة المقال عندها حاجة فى مخها بايزة مش هى برده مؤلفة الملك فاروق اللى طلع فيها فاروق كويس و ابن حلال بس لعبة فى ايد الكل لصغر سنة

و طلعت بعدها تقول حسنى مبارك وطنى كفاية انه احترم الامر و اتنحى و قال هموت فى مصر و انا فخورة بكونى فلة من الفلول

دلوقتى البنت هى اللى بتعمل استربتيز عشان العسكرى لما يضربها تتصور

ديه ست عندها قلب الحفائق مطلوب عشان تعرف تشتغل و تالف براحتها ربنا يشفيها

[hanzalah]

حسناً

في هذه المدونة ملف كامل بالصور والفيديو

http://khanelkhalili.blogspot.com/2011_12_01_archive.html#1100151041506804974

أرجو أن تتمعن فيه السيدة لميس جبر

وتاخد وقتها وهي تنفث لفائف تبغها في الهواء

مش هما بتوع الثقافة بيقولوا كده برضه

وبعدين تجاوبني انا الغلبان الصدمان العدمان

هي بتدافع عن إيه بالتحديد

عن حقوق الانسان

أم عن حقوق الاباطرة والبشوات الجدد

[احمد رضوان]

بدون تعليق

http://www.youtube.com/watch?v=6IMS1J3XPd4