صندوق النقد يشترط على مصر رفع الدعم عن منتجات البترول وعن الكهرباء لإقراض مصر مبلغ 2.5 مليار دولار

[se_ Elsyed]

أقسم بالله ناكلها بملح ولا حد يتحكم فينا ... وحسبنا الله ونعم الوكيل للي وصلنا للحالة دي

ومش عارف حالة الخنوع والترييح دي هاتفضل لحد إمتى وإحنا شايفيين اللي سرقونا عايشين عادي ..

شركات أحمد عز للحديد كسبت السنة دي 700 مليون جنيه ... يا حلاوة الحلاوة

والاراضي اللي إتنهبت والعمولات اللي إتاخدت .. كل ده باتكلم عن الثروات اللي جوه .. ما بالنا في اللي بره وما فيش مليم رجع

على الجانب الاخر والفلول زي مصطفى بكري واللي هاجم أول أمس في برنامجه منتهى الوقاحة قصدي منتهى الصراحة هاجم امير قطر اللي بيتدخل في شئون مصر

وهذا إقرار للحقائق أيها السادة .. فقطر منحت مصر 500 مليون دولار نقداً منذ بداية الثورة .. وأمدتنا بكميات كبيرة مجانية من غاز البوتاجاز بدون ضجة ولا دعاية .... ووعدت اليوم بضخ 3 مليار دولار في مجال البترول والطاقة

مش زي اللي إتكلموا ووعملوا مؤتمرات للشهرة وبس

[dongol]

مبروك علي الاخوة المعتصمين ولسة ياما هنشوف أيام سودا

[engmido]

طب وهما مالهم

[se_ Elsyed]

مبروك علي الاخوة المعتصمين ولسة ياما هنشوف أيام سودا

معتصمين ؟؟؟؟؟

صباح الخير يا عم ؟

مال المعتصمين بالقروض بصندوق النقد الدولي ؟

هاتقول لي هما السبب ... لأ أسف جداً وبالأرقام

إدخل على موقع وزارة المالية المصرية .... وكمان البنك المركزي ... وشوف بالأرقام إيرادات الدولة زادت إزاي من يناير الحالي حتى الان سواء دخل قناة السويس او تحويلات المصريين بالخارج اللي زادت 3 مليار دولار مقارنة بالعام الماضي أيام المخلوع .. وكل اللي إتأثر هو إنخفاض 2 مليار دولار من دخل السياحة ... وما أعرفش العجز ده كله والسحب من الإحتياطي إيه سببه

والاهم ومش هاندخل في أرقام ... يغمة الصرف على القصور الرئاسية وعلى أُبهة الرئيس وحاشيته والصرف على الحزب الوطني ... والاهم الصرف على كتائب الحرس الجمهوري اللي بالالاف عشان يامنوا الريس ومراته وعياله ... مش المفروض كله ده بح خلاص ما بقاش يتصرف عليه ... طب الفلوس بتروح فين يا ناس ؟

وبالتالي لا الثورة لها ذنب ولا المعتصمين لهم ذنب .. وإلا امريكا كانت زمانها فلست من معتصمي ومتظاهري وول ستريت

"احتلوا وول ستريت" تدق ناقوس الخطر فى أمريكا

نيويورك - (شينخوا) منذ 20 ساعة 46 دقيقة

بدأوا مسيرتهم بالهتافات والأناشيد وإلقاء الخطب، بدأوها من حديقة خاصة في وول ستريت في شهر سبتمبر من العام الحالى ووعدوا بالاستمرار فيها على مدار السنوات المقبلة.

جذبوا الانتباه إليهم من جميع أنحاء العالم وانضم إليهم زملاؤهم المحتجون في واشنطن العاصمة وبورت لاند وفي عدة مدن أخرى بجميع أنحاء البلاد.

اقرأ المقال الأصلي علي بوابة الوفد الاليكترونية الوفد - "احتلوا وول ستريت" تدق ناقوس الخطر فى أمريكا

يا عزيزي هي سوء إدارة لا أكثر ولا أقل ...

يا عزيزي هو تواطأ من عصابة المجلس العسكري مع المحبوسين داخل طره ...

مثال بسيط : رشيد أحمد رشيد إتهبد كذا حكم بسبب إستغلال منصبة وبسبب مكاسب حققها من المنصب ... ومع إن عنده شركات متلتلة ... فكلها لسه شغالة والأرباح بتتحول له بالخارج ..

هل تعلم إن حرامي البترول والغاز حسين سالم مازال يدير شركاته من اسبانيا وبما إنه مستولي على شرم الشيخ من بابها ... فمن بوء ناس شغالة عنده في الإدارة المالية في شرم الشيخ بيقولوا مازلنا بنحول له في أسبانيا اللي هو عاوزه عادي جداً

هاتقول لي القانون بياخد مجراه .... بس أنا خايف تعدي سنين وتيجي سنينه ومجراه لا يزال يجري

[Abu Reem]

انا اتحرق دمي لماعرفت هذا الخبر،،، واتمنى من حكومتنا ان ترفض هذه الشروط ومش عاوزين قروض ولا زفت

نفسي في مبادرة تتبناها الدولة بأن تدعوا المصريين في الخارج لعمل حملة للتبرع لمصر... ومش عيب احنا ولادها وفي النهاية بلدنا

يعني 8 مليون مغترب.... ممكن تكون تبرعاتهم مبلغ اكبر بكثير من المبلغ الذي يذلنا به صندوق النكد

لو مليون واحد بس اتبرعوا ب 200 دولار بحد ادنئ ممكن نحصل هذا المبلغ

وايضا ميسوري الحال من الداخل.،. حملة زي دي توحد المصريين

بس الخوف ان المبالغ دي .،..، ولابلاش

تم تعديل 24 ديسمبر 2011 بواسطة Abu Reem

[se_ Elsyed]

طب وهما مالهم

إذا كنا بالبلدي بنقول : اللي بيعرف يستلف .. بيعرف يسد

فهو لما يديك قرض زي ده .. بالإضافة للبلاوي اللي عندنا قبل كده .. مش لازم يتأكد هاتسد إزاي ؟

كمان يا عزيزي من لا يأكل من فاسه .. قرارة لن يكون من راسه ... وما تحرجنيش وتسألني أومال يبقى منين ؟

فاكر هوجة بيع القطاع العام ؟

ما هي بدأت من كده ... كل يوم الديون عمالة تزيد ... وبالتالي بعتوا لنا واحد إسمه عبد الشكور شعلان . وإبتدى يتشرط علينا ويوجهنا .. وبيع ده وإتخلص من ده عشان تقدر تسدد

فبعنا طبعاً لكن بدل ما نسدد ... كل الفلوس راحت في كرش مبارك ... يكفي إن 20 مليار جنيه من بيع القطاع الان مفقودة حتى الان ولا يوجد لها أوراق .. يعني إنسى يا حج

[se_ Elsyed]

انا اتحرق دمي لماعرفت هذا الخبر،،، واتمنى من حكومتنا ان ترفض هذه الشروط ومش عاوزين قروض ولا زفت

نفسي في مبادرة تتبناها الدولة بأن تدعوا المصريين في الخارج لعمل حملة للتبرع لمصر... ومش عيب احنا ولادها وفي النهاية بلدنا

يعني 8 مليون مغترب.... ممكن تكون تبرعاتهم مبلغ اكبر بكثير من المبلغ الذي يذلنا به صندوق النكد

لو مليون واحد بس اتبرعوا ب 200 دولار بحد ادنئ ممكن نحصل هذا المبلغ

وايضا ميسوري الحال من الداخل.،. حملة زي دي توخد المصريين

بس الخوف انها .،..، ولابلاش

المشكلة في إنعدام الثقة يا أبو ريم بين الناس وبين من يحكم الأن

على سبيل المثال ... اعتقد إن كلنا إتبرعنا لحملة اعادة بناء العشوائيات .... طب اهو داخلين على سنة وما شوفناش عشة إتبنت ... فسر لي إنت بقى ؟

طب بالله عليك ... في لا مؤخذه نطع طلع قال حملة التبرعات لصالح الإقتصاد المصري بعد الثورة بلغت كام ووصلت فين ؟

يمكن الحاجه الوحيدة اللي طمنت قلبي وظهرت ثمارها على السطح هي جامعة زويل ... مع إنها كانت مبنية قبل كده تحت إسم جامعة النيل ... لكن على الأقل أهو فيها شغل والراجل زويل نفسه مش مقصر ...

لكن زي ما قولت لكم ... على الأقل نشوف الثروات اللي عندنا في الداخل والبلاوي المنهوبة

[ابو محمد بن مصطفي]

فاكرين في اول الثورة لما الصندوق الامريكي (النقد) لما كان هيبوس ايدنا علشان نستلف منه ورفض سعتها سمير رضوان

ايه اللي غيرهم

الصندوق ما هو الا دومية في ايد الامريكان

[ابو محمد بن مصطفي]

مصريون بالخارج يقترحون دعم الاقتصاد بـ16 مليار دولار.. والجنزورى يعد بسرعة الرد

التقى الدكتور كمال الجنزورى، رئيس مجلس الوزراء، عددًا من المغتربين المصريين، بحضور فايزة أبو النجا وزيرة التعاون الدولى، والمستشارة تهانى الجبالى، نائب رئيس المحكمة الدستورية، حيث تقدم عدد من المصريين فى الخارج، بعدد من المقترحات لمساندة الاقتصاد المصرى، من بينها التبرع بنحو 100 دولار من كل مغترب مصرى، الذين يصل عددهم إلى 10 ملايين، وبذلك يتم جمع مليار دولار، إضافة إلى طرح سندات أو شهادة قدرها ألف دولار، تكون فى السنة الأولى بدون فوائد، ثم يتم تحصليها بعد ذلك بفوائد بقيمة 1 أو 2 %، وبذلك سيصل لمصر مابين 5 و 10 مليارات دولار، وقالوا إن هذه المقترحات تأتى بعد الشروط المجحفة التى عرضها صندوق النقد الدولى لإقراض مصر.

كما طلب المصريون الذين التقوا الجنزورى، طرح أراضٍ بالمدن الجديدة للمغتربين المصريين فى كل دولة على أن يتم إيفاد مندوب من وزارة الإسكان من كل قنصلية لتوثيق العقود الخاصة بقطع الأراضى التى تطرح، والتى يمكن عن طريقها تحقيق دخل مصرى يصل إلى 50 مليار جنيه، كما اقترحوا عمل منتجع خاص بكل جالية فى مصر.

حضر اللقاء معين مختار، رئيس تحالف المصريين الأمريكيين، وصبرى الباجة عضو التحالف ود. حسن موسى، رئيس المنظمة العربية لحقوق الإنسان بالنمسا ورئيس اتحاد المصريين هناك، ومحمد الأسيوطى، رئيس مجلس إدارة الشركة النمساوية للاستثمار السياحى.

واقترح المجتمعون استغلال السياحة الرياضية فى مصر، مثل تركيا، حيث إن بـ 7 % من دخلها القومى من السياحة الرياضية، التى قد تعود بالنفع على مصر خلال 3 أشهر فى فصل الشتاء بنحو 2 مليار جنيه، ووعدهم الجنزورى بتحقيق مطالبهم بعد دراستها بصورة سريعة.

بوابة الاهرام

هو ده الشغل الصح والافكار الحرة البعيدة عن فكر العبودية