شكراً للثوار الاطهار .. المجلس العسكري يوافق على تقديم إنتخابات مجلس الشورى لمدة شهر

[se_ Elsyed]

وافق المجلس العسكري على إقتراح المجلس الإستشاري ( كده وكده يعني قال جت من عندهم هههههه ) على تقديم إنتخابات مجلس الشورى لتنتهي في 22 فبراير بدلاً من 12 مارس ...

والحمد لله صوتنا لا يضيع هباءً .. فقد تم إستبعاد عمرو موسى ومحمد سليم العوا من مناقشة أي شيء يخص التجهيز لإنتخابات الرئاسة ....

واظن يا جماعة الشكر كل الشكر لمن على صوته وقال لأ لإستمرار المجلس العسكري ... والف رحمة ونور على كل شهيد خرج وفي نيته قول كلمة الحق .. فلولا هؤلاء ما كانت اي مكاسب تحققت على الأرض ...

وكل دقيقة نكسبها من غير مجلس السوء هي مكسب لمصر لكي نبدأ رحلة النهضة والبناء

[hanzalah]

تخيل يا استاذ احمد

مات 18 مصري عشان نكسب من المجلس 20 يوم

ومش أي 18 مصري

دول ورد الجناين

شوفهم تاني كده الله يخليك

[aimen]

هو مجلس الشورى كان الهدف ؟ اول مرة اعرف كده

الكل كان بيطالب بالغاء المجلس لأنه استشارى ولا دور فعلا له

وكمان فلوس على الفاضى

الكلام كله على الإنتخابات الرئاسية ...وان المفروض تتقدم علشان نخلص من المجلس السمكرى

وبنفس الأسلوب لما المخلوع كان الناس بتطالب برأسه هو شخصيا

يقولك حنشيل الوزارة ...ياعم ...افهم ...احنا عاوزينك انت ؟؟

[محمد عبدالعزيز]

مين اللى صحاهم من النوم بس؟

يا بلاش والله, 18 شهيد عشان نقدم الانتخابات 3 أسابيع؟!

هى الناس دى مش بتحس ولا مش بنى آدمين؟

حيعمل إيه يعنى مجلس الشورى لمصر عشان نفقد 18 شهيد وبرضه مكملين فيه؟

يعنى هو الإعلان الدستورى بيبقى مقدس بس لما يكون فى مطالب للثوار, إنما المجلس العسكرى يعك زى ماهو عايز مفيش مشكلة؟

حسبى الله ونعم الوكيل فى اللى خلاهم ياخدوا راحتهم كده وبيدعمهم بسكوته.

[se_ Elsyed]

عاوز اوضح نقطة ...

ونركز مع بعض

- إنتخابات مجلس الشورى كانت هاتنهي 12 مارس .. واول إجتماع لمجلسي الشعب والشورى كان هايبقى تقريباً في أخر مارس ..

- وبعدين هايبتدوا مع بعض يناقشوا ألية تشكيل مجلس كتابة الدستور والتايم ليميت بتاعهم 6 شهور .. وبعديها 6 شهور تاني كحد أقصى لكتابة الدستور .. وده كلام فارغ لأن لو الإتنين مع بعض اخدوا سنة يبقى نلم هدومنا ونروح أي بلد تاني

إذن الهدف الاساسي من كسب المدة دي هي تقصير مدة كتابة الدستور ... .. واضح كده ؟

وبما إننا عندنا دلوقت تايم ليميت كمان لإنتخابات الرئاسة .. فمش معقول يبقى عندنا رئيس بيعمل في الفراغ من غير دستور موجود ... وبالتالي وجود رئيس مع وجود دستور هو شيء جيد لبناء دولة قوية

وخلوا بالكم إني اتوقع إن لجنة الدستور تبقى أكثر تعقلاً وتتجاوز القضايا الأساسية في كتابة الدستور وهي قليلة بالمناسبة

يعني عندنا دستور 71 كان حاجه ما حصلتش ... وكل اللي عاوز يتغير فيه هو صلاحيات الرئيس ومدة الترشح وبعض المواد الاخرى اللي بإذن الله يتم الإتفاق عليها بين القوى السياسية المختلفة عشان تلقى قبولاً من الشعب عند الإستفتاء وما ندخلش في دوامة إعادة كتابة الدستور بعد رفضه

وسمعت كده النهاردة بعض الاخبار والتسريبات المبشرة عن تقديم موعد الإنتخابات الرئاسية

إذن أيها الاعزاء مش الهدف من الموضوع ده هو مجلس الشورى نفسه .. لأني أتوقع مهازل في الإنتخابات دي من حيث ندرة الناخبين لان الناس بالفعل وأنا منهم مش لاقي لازمه للمجلس ده في الوقت الحالي

[ابو محمود]

اذا كان ثمن ال20 يوم 18 انسان وروح ومبانى وخسائر اقتصادية لماذا اذآ تنازلت حركات الثوار الاحرار عن مواقفها ولا هو خوف او نوع من استراحة المحارب

احنا قولنا المكاسب الشرعية خيرآ من الهوائية وما حدث من تأخير او تقريب للمدة ماهو الا هواء فاضى

الاهم منة هو الاسراع فى انشاء كيان معترف بة مجلس امة ودستور ورئيس

وسيبنا بقى من كسبنا بالصلى على النبى مكسبكم خسارة يا استاذ العقل فى التفاوض مش فى التقاتل وزرع الفتن والاقصاء ما حدث سببة الاول خسارة الانتخابات لشريحة من الغشاشين كشفهم الشعب من خلال تلاسنهم فى الاعلام المرئي والجرائد فلم يصدقو انهم خارج البرواز فضحكو على شباب ثائر ولبسوهم فى الحائط فمات من مات واصيب من اصيب رحم الله الجميع المهم التعلم من الدرس وان الثعلب لا يؤتمن على الدجاج

[الغريب]

على حسب الأخبار اللي قرأئتها ، الموضوع ليس له أي علاقة بالمجلس الإستشاري وليس له علاقة بالثوار الأطهار و"الناس اللي ماتوا"

الموضوع جاء عن توصية للجنة العليا للإنتخايات بناء على ما حدث في إنتخابات مجلس الشعب من تمطيط ليس له داعي في فترة الإنتخاب

وعليه رفع عدد من القضاة توصيات لرئيس اللجنة والذي رفع بدوره توصية إلى المجلس العسكري تقتضي أن تجرى إنتخابات الشورى على مرحلتين فقط وليس ثلاث مراحل وأن تكون جولة الإعادة في يوم واحد بدل يومين

ننتظر همة المجلس الإستشاري أن تعجل الإنتخابات الرئاسية بناء على هذا التعجيل في انتخابات الشورى

تحياتي

[moamana]

طيب ممكن اعرف اصرار المجلس ليه على الشورى اساسا ما يلغيه و نبدا من اول يناير على راى شعبولا

و نبطل مجلس الشورى