يا وزارة الخارجية يا مدرسة .. لعب وفن وهندسة ...

[se_ Elsyed]

في خضم الهرس اللي بيحصل في مصر .. بتمر أحداث كده المفروض تبشر بالخير ..

لكن هاييجي منين الخير وفي ناس قاعدة على قلبنا ومش عاوزه لنا

المهم

- الإسبوع اللي فات أصدرت وزارة الخارجية تعميم على كل القنصليات الأجنبية في دول الإتحاد الأوربي بتلزمهم فيها بإن حاملي جوازات السفر الدبلوماسية لازم يحصلوا على تاشيرة مسبقة من القنصليات المصرية في أوروبا ... ولكن يكتفوا حتى بإن الدبلوماسي من دول يبعت جواز سفره مع عيل صغير وخلاص عشان ياخد التأشيرة ... لأ .. ده لازم يروح بنفسه للقنصلية أو السفارة عشان يتصور ويتم وضع هذه الصورة على جواز سفره .

النهاردة بقى الزغلول الكبير

رصد | متابعات | الجزيرة : مصر تقرر تطبيق مبدأ المعاملة بالمثل مع امريكا وبريطانيا فيما يخص منح التأشيرات #

ناس هاتقول لنا : يا عم إنت بتتكلم في إيه ده احنا اللي محتاجين لهم ؟ وإن كان لك عند البوبي حاجه قول له يا مستر

هاقول لك لأ يا حبيبي .. طب ما هما محتاجين لنا في عدد السياح اللي بيروحوا بلادهم وخصوصاً الخليجيين .. ومع ذلك الواحد مننا بيطلع تلاته عينه عشان ياخد تأشيرة شنجن ولا تأشيرة الجنة الامريكية

وده مش هايأثر على السياحة بإذن الله لأني مش بأقول له تعالى انا هاعذبك أو أبهدلك عشان أديك التأشيرة لمصر ... بالعكس الموضوع تنظيمي وموضوع معاملة بالمثل يا شقيق

على الجانب الاخر .. أتمنى من كل قلبي ان يكون هناك على الجانب الأخر تسهيلات في هذا المجال بين الدول العربية عشان ما نشمتش الناس فينا

[raouf]

طبعاالخبر نزل دلوقتى واقدر اقول انه ممكن ياثر بالسلب على المدى القريب لكن على المدى البعيد هانجنى ثماره ان شاء الله

اول الخطوات لاستعادة كرامة المصرى

شكرا وزير الخارجية

قررت وزارة الخارجية المصرية يوم الأحد ضم كل الولايات المتحدة وبريطانيا للدول التي سيتم معها تطبيق مبدأ المعاملة

بالمثل فيما يخص منح التأشيرات ''البيومترية'' أسوة بما تقرر مع دول شنجن (دول الاتحاد الأوربي).

وقال السفير أشرف الخولي، مساعد وزير الخارجية لشئون المراسم، في تصريحات له يوم الأحد، إنه سيبدأ سريان النظام الجديد للتأشيرات مع الولايات المتحدة اعتبارا من 15 يناير المقبل.

وأشار إلى أنه سيتم تطبيق نفس المعايير التي تطبقها هاتان الدولتان مع مصر في نظام وإجراءات منح التأشيرات.

وكان محمد عمرو وزير الخارجية قد أصدر قرارا في الأسبوع الماضي بتطبيق التأشيرة ''البيومترية'' على دول ''شنجن'' في إطار مبدأ المعاملة بالمثل ويشمل ذلك أيضا مسئوليها وحملة جوازات السفر الرسمية.

وسيتعين على كافة حملة جوازات السفر الرسمية من الفئات الدبلوماسية والخاصة والمهام، وكذلك حملة جوازات السفر العادية من العاملين بسفارات تلك الدول في مصر، الحصول على التأشيرات ''البيومترية'' من السفارات والقنصليات المصرية.

[se_ Elsyed]

جلبي عايفط مني يا ولدي

كده كتير وشويه شويه يا خارجية

الله أكبر

للعلم ... هذا القرار تم إتخاذه لوجود مشكلة لدى صيدلي مصري واحد فقط لدى هذه الشركة

وللعلم .. هذا ليس لوي دراع ...

المصريين يكاودوا يكونوا مسيطرين على سوق الصصيدلة هنا .. سواء أطباء صيادلة ... أو مندوبي مبيعات الادوية

إذن هي علاقة إحترام وحفظ كرامة لكل مصري شغال في هذا المجال

وعقبال باقي المجالات

واحد ممكن يقول لي زي ما بنسمع .. يا سلام .. طب ما هم ممكن يمشوهم ويجيبوا غيرهم ؟ يبقى حياهم الله

[se_ Elsyed]

وده الخبر من موقع القنصلية المصرية على الفيس بوك

http://www.facebook.com/#!/Egyptian.Consulate.In.Riyadh?sk=wall

[se_ Elsyed]

أتمنى أيضاً ان يكون هناك دور فعال للمستشارين العماليين في دول الخليج بالذات لتقديم الإستشارات القانونية لأي شخص لديه مشكلة مع شركته أو ما إلى ذلك ...

كما نرجو أن تبدأ حماية العمالة من مصر ... حتى لو نحميهم من أنفسهم وذلك بتحديد حد ادنى للمرتبات لكل مهنة ولابد أن يكون هناك تصديقات قانونية ملزمة لعقد العمل .

[engmido]

وخد عندك ابو الهول نطق

الخارجية المصرية تطالب فرنسا بالتحقيق فى واقعة التعدى على مواطن مصرى من قبل الشرطة الفرنسية فى المترو

مش ممكن .. احنا .. احنا بنفتح بقنا ونقول فرنسا سلام عليكم حتى ... سبحان الله ايام مبارك مكنش فيه الكلام ده

افرح ..زقطط ... سورق .... طب ساكت حتى يا س س

انا عارف ان الاخبار دى بالنسبة لك تعتبر زى لحمة العيد للغلابة

ههههههههههههههههه

[se_ Elsyed]

ده كان رأيي قبل الثورة وبعد الثورة وهايبقى في كل وقت

وهو

إن إحترام الأخرين لشخص ما ينبع من إحترامه لنفسه ...

ما بالك بالدول ؟

[المطحون]

اعتقد كده اختيارات الجنزورى وحكومته بدات تعمل شغل صح وده رد صغير للاخوه المعتصمين اننا عاوزيين هدوءشويه وندى الراجل ده فرصه حيقيه لانه فعلا بيبذل مجهود وربنا يوفق الجميع

[ViralMind]

السلام عليكم..

انا مش مصدق ان الكلام ده حقيقى.. مش مصدق ان جه اليوم ده و انا عايش.

يا رب بس الكلام يكون عن الناس فعلا و مش عن اللى شغالين فى السفارات بس, لانى ماشفتش اى حاجة فى الخبر بتتكلم عن الناس العادية.

[raouf]

عارفين مين اكثر من سيتاثر بهذا القرار ؟

المصريين اللى معاهم جنسية تانية !!!!! تصدقوا

واح يسال طيب ازاى اقولك انا

المصريين اللى معاهم جواز تانى كان يقولك دايما ده حمايتى ولو حصل مشكلة السفارة بتتدخل صح ؟ الكلام ده صح بس لما تكون داخل مصر بجوازك الاجنبى

لان القانون الدولى بيقول كد الجواز اللى دخلت بيه هو الجواز اللى يحميك بمعنى

واحد معاه جواز مصرى وواحد امريكى وواحد المانى

دخل مصر بالجواز المصرى يبقى مفيش حد يقدر يحميك ولا الالمانى ولا الامريكى ولا ليهم حق انهم يطالبوا باستلامك ولا محاكمتك اما قضاءهم وكده

اما لو دخلت بالجواز الامريكى يبقى من حقك امريكا تطالب بمحاكمتك هناك ولو حتى عليك عقوبة تطبقها هناك

كان مزدوجى الجنسية ييجى المطار يطلع الجواز التانى وطبعا دخل بيه رسمى ومش محتاج تاشيرة

اما بعد القرار الصلاة على النبى هاتدخل بالجوازالمصرى يبقى اهلا بيك

فكرت تدخل بالجواز التانى وتقول ليهم انا مصرى يقولولك اسفين هات لينا تاشيرة من سفارة مصر فى بلد الجواز

يعنى القانون ده ضربة مباشرة وقوية لحماية الجواز الاجنبى واللى كانت هدف من اهداف الهجرة لكثيير مننا

سؤال خبيث بقى : يا ترى هل فيه بعد امنى للموضوع ده ؟ لضرب الناس اللى بتتكلم ومحتمية فى جوازها الجنبى ؟ ده اللى هاتكشفه الايام

[se_ Elsyed]

اعتقد كده اختيارات الجنزورى وحكومته بدات تعمل شغل صح وده رد صغير للاخوه المعتصمين اننا عاوزيين هدوءشويه وندى الراجل ده فرصه حيقيه لانه فعلا بيبذل مجهود وربنا يوفق الجميع

مطحونوف

إحم إحم

محمد كامل عمرو وزير قديم وليس من إختيار الجنزوري ههههههههههه

[se_ Elsyed]

يا عم بُعد امني .. بُعد ثالث .. مالناش دعوة ..

إحنا لنا ما يخصنا كمواطنين مصريين

وأصلاً إزدواج الجنسية هو تحايل في قوانين كتير جداً وبلاد كثيرة لا تُقره .. لكن الناس بتلف من الباب اللي ورا