الفرق بين الطفل الأول والثاني والثالث بالنسبة للأم :)

[Dreamwithme]

الفرق بين الطفل الأول والثاني والثالث

كلام لذيذ ويا ريت بعد ما تقراه تقول لنا ترتيبك كام في اخواتك

.

.

.

.

.

.

الملابس

الطفل الاول: تلبس هدوم الحمل من اول لما تعرف انها حامل.

الطفل الثاني: تحاول تلبس هدومها العادية لاطول فترة ممكنة.

الطفل الثالث: هدوم الحمل هي هدومها العادية اليومية.

الاعداد للطفل

الطفل الاول: كل دقيقة تغيير للطفل.. وتحاول تخلي ريحته حلوة.

الطفل الثاني: كل ثلاث ساعات.

الطفل الثالث: لما ريحته تطلع.

القلق

الطفل الاول: من اول خبطة تجري عليه و تشيله.

الطفل الثاني: تشيله لو حست ان خلاص فيه عربية حتخبطه.

الطفل الثالث: احسن..علشان تتربى... خلي العربية تدوسك.

الاكل

الطفل الاول: ترمي أى حاجة تقع على الارض.

الطفل الثاني: تغسلها بشوية مية.

الطفل الثالث: تمسحها فى هدومها وتسمى وتديهالو.

الفسح

الطفل الاول: الملاهي..المراجيح..النادي.

الطفل الثاني: زيارات.

الطفل الثالث: السوق.

الخروج

الطفل الاول: تسيبه مع أختها و تتصل تطمن عليه كل خمس دقايق.

الطفل الثاني: تسيبه مع أختها... و هي على الباب تفتكر تسيب رقم التليفون بتاع المكان اللي هي رايحاه.

الطفل الثالث: تسيبه مع أى حد.. مع تحذير بان محدش يتصل بيها إلا فى حالة يكون فى الموضوع دم.

فى البيت

الطفل الاول: كل دقيقة تتفرج على ابنها وهو نايم.

الطفل الثاني: من وقت للتاني تتاكد ان الكلب ماكلش دراع الولد.

الطفل الثالث: تستخبي منه على قد ما تقدر.

لو بلع فلوس

الطفل الاول: تطلب عمل أشعة للولد.

الطفل الثاني: تقلق شوية عليه ، وتستنى وتشوف هيبلع الفلوس ويهضمها ولاَّ لأ؟

الطفل الثالث: تخصمه من مصروفه

النوم

الطفل الأول بينام ف غرفة نوم الأهل .

الطفل الثاني بينام مع أخوه في غرفته.

الطفل الثالث بينام ف اى مكان ف البيت .

يا تري يا هل تري الكلام ده صحيح يا أمهات؟

ويا تري ترتيبك بين أخواتك الكام ؟

[ابو محمد بن مصطفي]

بحسب الكلام اللي مكتوب يبقي انا ترتيبي

ابن البطة السودة

[عماد حمدي]

ههههههههههه عجبني أوي تخصمة من مصروفه بتاع الفلوس دا هههههههه

أنا ترتيبي الأول و كنت مدلّع آخر دلع و مازلت

كذلك أخويا آخر العنقود ( قريني )

الوسطاني نص نص

و ماما كانت دايماً و مازالت بتقولي ( أنا ربنا هيحاسبني علشان بفرق في معاملتكم ) !

طيب يا ماما متفرقيش و عاملينا كلنا واحد يا حبيبتي بدل تأنيب الضمير دا

تقولي معرفش ! بحبك :wub:

طيب ياعني مش بتحبي الوسطاني المهضوم حقه ليه ..؟ تقولي بحبه برده أنتوا ولادي و و و و

بصي هيا عاطفة الأم بالذات متقدرش تتحكم فيها و لازم تلاقيها بتميل لواحد أكتر من التاني

ليا أصدقاء كدة بردة

دائماً الكبير و آخر العنقود هما المدلعين

اللي في الوسط مهضوم حقهم بصراحة و هنا بيتدخل الأب بقا و بيكون دوره دبلوماسي الصراحة

لان خدي بالك دا بيعمل غيرة و ممكن الغيرة دي تفضل موجودة معاهم لحد ما يكبروا و تأثر في نفسيتهم

البيت الناجح لازم يكون فيه توازن ما بين الاب و الام في معاملتهم للأولاد ..

أب المستقبل

عماد بيه أفندي كعب الغزال :D

تم تعديل 27 ديسمبر 2011 بواسطة omda2006

[Om Zayd]

ماما مكانتش كده

و انا لسة في مرحلة الطفل الاول

بعمل اللي مكتوب بنسبة 75% تقريبا

اذا ربنا اكرمنا باولاد تاني هبقى اجي اقولكم (المهم افتكر

على جنب

فين عبير؟؟؟؟

[عادل أبو عمر]

بين اخواتي ربنا يحفظهم أنا الوسطاني

و كنت و مازلت المدلع اللي فيهم ( الحمد لله احنا خمسة أكبر مني بنت وولد و بعد مني بنت وولد ) .. صاحبكم مرزق شوية و الحمد لله

في أولادي ربنا يبارك فيهم الأولاني .. أكتر من كل اللي اتكتب ... و ليه لأ ده " عمر "

التاني و التالت مفيش فرق نوهائي .. أبسلوتلي ... لأنهم ماشاء الله عليهم توأم .. و لأني مرزق و الحمد لله حمدا كثيرا

ربنا يحفظنا جميعا و يبارك لنا في أولادنا و يعينا على تربيتهم كما يحب و يرضى و الأهم من كل ذلك يرزقنا بر والدينا ..

تم تعديل 27 ديسمبر 2011 بواسطة عادل أبو عمر

[عبير يونس]

ماما مكانتش كده

و انا لسة في مرحلة الطفل الاول

بعمل اللي مكتوب بنسبة 75% تقريبا

اذا ربنا اكرمنا باولاد تاني هبقى اجي اقولكم (المهم افتكر

على جنب

فين عبير؟؟؟؟

انا هو يا حبيبتي

و عاملة كدهوت :blink:

على كده البيبي اللي لسه ما جاش غالبا حياخدها من قصيرها

و يدور له على ماما تانية

هههههههههههههه

طيب يا ترى الطفل رقم 4 و 5 و6

أخبارهم ايه؟؟؟

بجد حرام الظلم

:protest:

كلهم عندي بيتعاملوا نفس المعاملة

من رقم 1 إلى رقم 6

فيه عدل طبعا

من كبيرهم لصغيرهم

انا معنديش خيار و فاقوس

كلهم بيتعاملوا زي الطفل رقم .....

3

ههههههههههههههههههه

:P

[pocy]

ههههههههههههههههههه لذيذ جدا الموضوع ده

انا ترتيبي الرابع وكنت الاخيره المدلعه لمده 10 سنين لحد ما شرف اخويا الصغير وبدأ يسحب من تحت رجلى السجاده بس لا انا لا زلت دلوعه بابا الاولى والوحيده فى اخواتى اللى ليها جنب حلو كده .............اما علاقتى بامى فكانت علاقه عاديه نص ونص يعنى وطبعا تطورت كل ما كبرت اكتر ........

اما عنى فانا عمورى واخد كل الدلع لانه لوحده (بس برضه بغلس عليه وبس بعد كام شهر كده هجرب شعور التانى ده وابقي اجى ارفع الموضوع واقولكم .............عن شعورى بالتانى ان شاء الله )

صباحكم معطر بذكر الله

[لونا]

كدة يا دريمي

أديني طلعت بنت البطة السودا أنا كمان

أبدً .. أنا مامتي ربنا يبارك فيها دايمًا تقول عليه إني ماتعبتهاش أبدًا

و بالعكس بأة إخواتي كانوا بيقولوا إني ليه وضع خاص عند والدي الله يرحمه

أصلي كنت مؤدبة و شاطرة و باسمع الكلام و كدهوت

أما عن ولادي

هو الفروقات المكتوبة دي في السنتين تلاتة الأوائل من عمر الطفل

لكن بعد كدة كله بيتعامل عادي .... زي ولاد البطة السودا يعني

يعني أول طفل له فرحة ..غير الباقي بصراحة

أنا مثلًا فاكرة تفاصيل كتيرة جدًا عن طفولة بنتي الكبيرة .. مش فاكرة منها حاجة عن طفولة إخواتها

الأولاني ده بنركز معاه جامد ..

يعني الكبيرة و أنا حامل فيها كنت على طول باشغل القرآن .. و فعلًا ما شاء الله عندها قدرة كويسة على الحفظ

كنت باكلمها من أول ما إتولدت ..

إبني اللي بعدها أنا فاكرة إني كنت بالعب معاه و ألاغيه زي البيبيهات الصغيرين و خلاص .. لغاية سن 9 شهور

و بعدين مرة فوجئت إنه بيفهم وأنا ما كنتش واخدة بالي ..

حسيت بالذنب جدًا يومها إني ما كنتش باتكلم معاه

بس ده مالوش علاقة بالمحبة خالص على فكرة