الرجالة و الرومانسية بعد الزواج

[moamana]

بسوا الموضوع ده نفسى اناقشه بعد الزواج اوى من باب من شاف مصيبة غيره ممكن تهون عليه مصيبته

خاصة مع زوجى اللى علاقته بالرومانسية زى علاقة شماعة الملابس برباط الجذمة كده بالزبط

رغم انه و الله العظيم كان رومانسى موووووووووت فترة الخطوبة

:blink: و طبعا دلوقتى لما بساله ايه الللى حصل يقولى ما انا اتجوزتك خلاص

يعنى كان بيضحك على عقلى لحد ما اتجوزنى

اللى غايظنى بئه انك تسالى اى رجل يقولك انا مراتى مش مهتمية بي رغم انه ممكن يكون هو اللى توبها تعمل كده

و هحكيلكم عن مواقفى معاه و انتم احكموا

بعد ما فات شهر و نصف كده قلت بس اعمل يوم حب و رومانسية جامد اوى

اتصلت بحماتى الله يرحمها و عرفت ايه اكثر 3 اصناف اكل بيحبها و نزلت جبت كل حاجة طازة bv:-

و شلت كل حاجة على قلبى و روحت لصديقة امى اللى طبخها ميختلفش عليه اتنان bv:-

و بتعمل اكل و تبيعه لان نفسها تحفة و مكنتش عايزة غلطة فى اليوم ده

و زينت الشقة ببالوانات و وورود حمرا

و زينت نفسى و جبت شمعتان حمر ووولعتهم و رتبت السفره باطباق و اكواب عليها قلوب كريستال و ملئت الاكواب بعصير فراولة

من الاخر عملت كل اللى على و زيادة و الله bv:-

المهم استنيت جوزى و اول ما دخل و بص على الشقة و السفرة قالى باستغراب :هو النهاردة عيد ميلادى ..ولا ..عيد ميلادك ....فيه ايه انا نسيت عيد ايه

و كان فعلا متحير

انا(ضاحكة) مفيش اى اعياد يا حبيبى ......ديه بس رومانسية

بسلى بريبه و دخل الى الغرفة و غير ملابسه و جاء لياكل

اطفئت الانوار و ولعت الشمع و جلست بجانبه على السفرة

بص الى الشمع الاحمر كده و قالى : هو النور قطع

قلتله : لا قالى :طيب ممكن تولعى النور عشان اشوف انا باكل ايه ........ولعت النور و انا مستسلمة و بقول معلش يمكن لسه متفاجا

بدا ياكل و يقولى : ايه ده انت عاملة الكوسة بالبشاميل من غير صلصة و الملوخية ناقصة ملح و الارز يعنى مش بطال

بصراحة اتغظت اوى و قلتله مش انا اللى عاملة الاكل تنت ......هى اللى ساعدتنى فيه :sad:

قال: اه بس ابقى اسالى ماما بتعمله ازاى و اتعلمى منها واضح ان تنت ...نفسها مش جامد اوى

بدا الغيظ داخلى يزيد و لكنى لايمتها و قلت حاضر

بدا ينظر الى الكاس الكريستالى المزين بالقلوب بريبة و ضيق :ايه العصير الاحمر اللى فى الكاس ده

جاوبت باستغراب :عصير فراولة

جاوب بارتياح .... :اه اصلى افتكرته شربات و انا مبحبش الشربات

بدا ت اتخنق و روحى تطلع و انا بفكر هو يعنى لو كان شربات كنت شربتهوله بالعافية يعنى bsh:)

اخيرا بعد ما اكل قلتله حبيبى انا عملتلك كيكة و كانت الكيكة رائعة و هى على شكل قلب و مزدانة بالورود

قالى بمنتهى القرف و هو بيبصلها كده : انا مبحبش الكيك و بحب التورتة بس

هنا بقى فاض بيه و قلتله معلش المرة الجاية هبقى اسال مامتك بتطبخ ازاى (حماتى نفسها حلو بس عادى مش متميز زى )و ابقى اعملك تورتة اى اوامر تانية و قمت اعيط فى اودتى

:sad:

اللى يغيظك بئه ان الاكل اتمسح يومها من الصوانى و حتى الكيكة اكل نصها بالهنا و الشفا

و من يوم هذا الموقف بحضر ايام جميلة و رومانسية لكن ما بستناش منه كلمة حلوة الحقيقة لانه تقريبا نسى الكلام الحلو و هو بيمضى على عقد الزواج

و كثير بحطله رسائل حب لطيفة فى جيب القميص و البدلة و يجى و لا حس و لا خبر

حتى يا مومنين لما بعد كم سنة قلتله نفسى فى شهر عسل بدل اللى باز و قررنا نروح رحلة لاوروبا اصر ناخد طفلنا الصغير معنا مما جعل الاستمتاع بالرحلة يضيع تماما خاصة بعد ما رجعت من الرحلة على دكتور العظام لاصابتى بالتهاب حاد فى الاعصاب من مجهود شيل الولد طوال الوقت

انا بصراحة مش زعلانة لا الحمد لله انا مبسوطة

لانه ورغم ان كان من كثر ما بيقولى يا ماما اصبحت متاكدة انه نسى اسمى الا انه حنون جدا و طيب و بيحبنى بس فى صمت و شموخ ابو الهول كده

و بحاول على اد ما اقدر اكون رومانسية و استنى منه بعد كده يدخل على بطلبات البيت من السوبرماركت و هو مبسوط جدا لانه عمل الل عليه و زيادة او يتنازل و يتواضع و يقرر ميشوفش التعليق على الماتش بعد ما شاف الماتش نفسه عشان يشوف معايا فيلم

او حتى يقرر انا بيحبنى اوى اوى اوى و يرضى يقعد ما الولد ربع ساعة بس لغاية ما اعمل اى حاجة تانية

الحمد لله انا بحبه جدا و متاكده ان ابو الهول قصدى زوجى بيحبنى برده و سعدا بس تقولى ايه الانسان مبيعجبوش حاله

[Dreamwithme]

يا ماما .... تصدقي بالله إني داخلة التوبيك عشان أشوف الأفكار الرومانسية والجو ده

قووووووووووم إيه أنتي خضتيني بقصصك دي واترعبت بصراحة أصل أنا يا مؤمنة يا أختي لسه مخطوبة بقالي أسبوع

فلسه إحنا في جو الرومانسية والحركات ..... لسه جو العصافير شغال

لكن تصدقي بعد ما قريت كلامك بأفكر أكلمه أتخانق معاه وأطين عليه عيشته بسبب اللي هيعمله فيا مستقبلا :blink:

لأ بجد خوفتيني من الجواز أكثر ما أنا مرعوبة :sad:

طب حد من الأخوة الرجال يجي يقول حاجة ولا حاجة

لأ بجد بأه يا مؤمنة أعتقد إن كل مرحلة لها جوها ورومانسيتها ... يعني إستحالة يفضل الانسان زي ما هو بعد الجواز

حتي علماء النفس بيقسموا العلاقات العاطفية مراحل وكل مرحلة ليها سلوكها وليها مشاعرها

وأعتقد إن الأهم إن إنتي عارفة ومتأكدة إن زوجك بيحبك .... بطريقة مختلفة لكن هي دي طريقته في التعبير فأتعودي عليها واتعلمي تسعدي نفسك بيها

أعتقد إن معظم الرجالة المهم عندهم الأفعال وليس الكلام والحركات الرومانسية

وبيشوفوا إن ده طبيعي جدا وإن الستات هايفين ومجانين عشان عايزين كلام فارغ

أعتقد إن المهم إن الاثنين يفهموا طريقة كل واحد في الحب حتي لو كانت مختلفة هي دي قمة الرومانسية

[عادل أبو عمر]

لأ بجد خوفتيني من الجواز أكثر ما أنا مرعوبة :sad:

طب حد من الأخوة الرجال يجي يقول حاجة ولا حاجة

إنتي لسة شوفتي حاجة .. صبرك بس ..

بصي يا دريم ... الرجالة الرومانسيين نوعين

نوع بيتشقلب و نوع عادي ..

[Dreamwithme]

لأ بجد خوفتيني من الجواز أكثر ما أنا مرعوبة :sad:

طب حد من الأخوة الرجال يجي يقول حاجة ولا حاجة

إنتي لسة شوفتي حاجة .. صبرك بس ..

بصي يا دريم ... الرجالة الرومانسيين نوعين

نوع بيتشقلب و نوع عادي ..

ليه كده بس يا أستاذ عادل يعني إنت بتخوفني زيادة :closedeyes:

[عادل أبو عمر]

عنوان الموضوع مكتوب بالفنط العريض وبعدين اللي يخش يلاقي مكتوب جنب العنوان بخط صغير ممنوع دخول الرجال .. يعني نخش و لا نطلع <br class="Apple-interchange-newline">

و كثير بحطله رسائل حب لطيفة فى جيب القميص و البدلة و يجى و لا حس و لا خبر

أنا سمعت الكلام ده فين ...فيين

أيون صاحب الشورة دي .. لماضة .. ممكن تشديلها تلغراف تيجي تشوف عمايلها .. وتيجي تشرحلك سيكلوجية الرجال و ملوخية الرجال بعد الزواج .. وصدقيني هتستفادي من كلامها .. عن نفسي منتظر تعليقها على الموضوع ده .. لأني بستفاد كتير من كلامها عن الحياة عموما ..

وأكيد مدام عبير .. لها رأي يحترم جدا و خبرة في الحياة و نفوس البشر بتنوع شخصايتهم

رأيي

التوقيت والمزاج السيء ووجود مشاكل معلقة

ممكن يبوظوا أي مفاجأة مهما كانت جميلة

[raouf]

موضوعك رائع يا مدام مؤمنه

بس ممكن ادافع شوية عن الرجالة

الراجل فى فترة الخطوبة واللى قبلها مش وراه مسئوليات

يعنى بياخد مرتبه يصرف اللى عايزه ويحوش جزء للاعداد للزواج

الراجل بيتزوج فى بداية حياته العملية وبتبقى الضغوط عليه ضعيفة

مش فارقة معاه ساب شغله ولا انطرد منه لان ماعندوش التزامات ولا مسئوليات

اما بعد الجواز وخصوصا بعد الانجاب الراجل بيشيل هم الدنيا وللاسف الصفة دى زايدة فينا كعرب وهو هم الاسرة ومسئولية رب الاسرة عن كل اسرته مسئولية تامة

عكس دول اوربا الرومانسيين

الراجل بيكبر وبتكبر همومه ومسئولياته وخوفه من المستقبل معاه

انا هاشبه ليكى الزوجة العربية او المصرية بالوردة البلدى

بتبقى جميلة وريحتها جذابة اول ماتقطفيها وتبدأ الراحة وشكلها فى الذوبان حتى تجف وتنتهى ريحتها تماما

اما المراة الغربية فهى وردة عادية رائحتها عادية ولكنها تظل مشرقة والرائحة الزكية بها فترة طويلة ممكن حتى تموت تماما

مشكلة الست العربية مش بتحافظ على نفسها ولا بتجدد نفسها

الراجل بيجب التجديد

يعنى شوفى كم من صديقاتك زاد وزنهم ولم يهتموا بمظهرهم داخل المنزل بعد الزواج ؟

كم من صديقاتك مازلن يحتفظن بنفس طريقة تعاملهم مع زوجهم كما كانت قبل الزواج ؟

قبل الزواج تكون المراء العربية رشيقة هادئة صوتها منخفض تهتم لنفسها

بعد الزواج خاجة تانية وانا مش بالوم لان ممكن يكون حمل الاولاد وغيره تقيل عليهم

لكن بصراحة دى مش حجة لان الغربيين عندهم ضغوط اكثر من المراة العربية

شوفى الست الغربية بقى ما شاء الله تكون عندها 50 سنة ولسه محافظة على جسمها ولباقتها وصتها المنخفض والهدوء والاعتناء بالمظهر

ومش عايز اقول الجمال كمان

احتياجات الرجل للمراه قبل الزواج تختلف تماما عن احتياجاته بعد الزواج والمراة بالطبع ايضا

قبل الزواج الراجل محتاج بنت تقوله حاضر وبس ليظهر عليها رجولته

بنت حلوة وشيك علشان يحس انه مميز

بعد الزواج عايز ست تحافظ على عرضه وماله وولده

اما الست قبل الزواج عايزه راجل رومانسى يحسسها بانوثتها ويغرقها هدايا حتى تحس بتفردها وتميزها

وبعد الزواج عايزه راجل يكفى مصاريف البيت ومصاريفها

صدقينى يا مدام مؤمنة لا تلومى على زوجك فضغوط الحياة والعصر الحالى تقتل اى صفة جميلة فينا

وربنا يسعدك انت وزوجك

ملحوظة زوجك بتصفه هذا مش غريب بل اجزم ان 99% من الرجال مثله

وال1% الرومانسيين هتلاقيهم ملاينيين عيوب تقل الرومانسية فى يوم من الايام

[عادل أبو عمر]

ليه كده بس يا أستاذ عادل يعني إنت بتخوفني زيادة :closedeyes:

خوف إيه بس يا دريم ... بعد الشر عليكي من الخوف ده .. ربنا يسعدك يارب

مش هقولك كفاية دعوات كل اللي بيقدروكي هنا ...

كفاية دعوة والدتك ... ربنا يفرحها بيكي و تكوني بإذن الله أسعد زوجة و يارب يتمم لكم بخير

وعن قريب بإذن الله نقولكم بارك الله لكما و عليكما و جمع بينكما في خير

السعادة الزوجية في الاحسان لشريك العمر ابتغاء مرضات الله باستكشاف مساحات الرحمة و المودة و السكينة ..

ولأن كلا الطرفين فعلا محتاج لحنان النظرة و الكلمة قبل حنان اللمسة ..

وحنان الصمت عن التأنيب .. أفضل من حنان الرومانسية بعد العتاب ..

أخرج بقى .. قبل ما حد يحدفني بحاجة

[لماضة مصرية جدا]

السلام عليكم و رحمة الله و بركاته

طب بالصلاتو ع النبي كده و قبل ما نضرب كورسي في الكلوب...(وش اي حد من عصابة القناع الاسود)

ممكن اسال

هو يعني ايه رومانسية اصلا؟؟؟

هحكيلك موقف حصلي من قيمة عشرين سنة قبل الهجرة

كنت مخطوبة لواد حليوة كدهوت...(هو و لاكان حليوة و لا يحزنون....انا اللي نفسي حلوة)

و طبعا اختك لماضة عاشت دهر لا باس بيه ين قصائد نزار قباني و اضربيهم في الخلاط علي فاروق جويدة...مع شوية اغاني كدهوت من شريط اليسا الفقري بتاع اواخر الشتا...(بقيت اكرهه الالبون دوت اخر سبع حاجات)

المهم في يوم من ذوات الاربع....قولت بس كديا بنت يا لماضة انتي تبعتيله مسج كدهوت من مقطع من اغنية...ده علي غيار الريق

و بعدين العصر تبعتيله حتتين محشي.....قصدي بيتين شعر من قصيدة لنزار

و نختم بقي الليلة بالكلمة اللولبية...اللي هي اولها باء و اخرها كاف....(ايون اعتبروا بفتيك...و عدوا الليلة)

و ابتدت الخوطة

آن آن آآآآآآآآآآآآآآآن تش

موسيقي تصويرية

ماراشات عسكرية

اعمل الخطوة الاولانية

مافيش رد

الخطوة التانية

مافيش رد

التالتة بقي بتاعت طبق البوفتيك بالسلطات و التحابيش

مافيش رد خالص

و بعيدن قوووووووووووم ايه

في نهاية الليلة لقيته بيبعتلي مسج لطيفة جدا بيقولي

انتي كويسة...قلقت عليكي طول اليوم

و دي كانت نهاية فرقة عوكاشة المرسحية

طب نخلص بايه من اللت العجن دهوت

نخلص ان اوقات كتير البنت بتبقي بسبب اسهال الافلام بتاعت اذكريني حين تغيب الشمس و تعمل طش....و بسبب يا عيني كل اغانينيا اللي هي عيون حبيبي ضاربة مقص شمال....ووحشتني يا بعيد....و امتي هشوفك عشان اقفل الباب علي صوباعك

البنت نفسها ابتدت تتخيل ان هي دي الرومانسية

و اسخف حاجة هي عيد الحب دوت....تلاقي الشوارع كلها لونها احمر....و بتمثل انها بتحب....طب مين قال

الحب لا ليه شكل و لا مواعيد و لا قالب يتصب فيه

الحب مش كتاب جاهز زي سلاح التلميذ هسلمهولي لما تيجي تتخطبي

الحب ممكن يكون شموع...و ممكن يكون وردة ع المخدة الصبح....و ممكن يكون نوكتة تقوليهاله....او حركة شقية تفاجئية بيها....او تسحبي مثلا عربيته حبيبته من تحت ايده و تسيبه يركب مع باقي الشعب...(وش حد شرير)

لو جاوبتي يعني ايه رومانسية

صدقيني هتكتشفي مساحة جديدة معاه

و هتقللي من مساحة الاحباط اللي ممكن بتجيلنا كتير

الرومانسية مش انا بنبسط بايه

الرومانسية اني اقدر انبسط و ابسطه من غير ما يجاملني

و من غير ما اجامله

و من غير ما نعيش قصص ناس تانية

عارفة ممكن تلاقي اللي بيبسطه انه ياكل كوارع....ايون....(معرفشي ايه اللي بيعجبهم في رجلين البقر...بس ما علينا)

و يمكن لما يحس انك بتعملي حاجة علشانه....مع انك بعديها ممكن ترجعي لمدة اسبوع.....اكيد راح تفرق...(بس الله يكرمك متبقيش تاكلي من الاسلحة ديت)

و انا بكتبلك افتكرت حاجة من السيرة النبوية

فاكرة الرسول صلي الله عليه و سلم لما كان بيحب يشرب من نفس الموضوع اللي كانت بتشرب منه السدة عائشة عليه افضل الصلاة و السلام

اهي دي بالنسبة ليا قمة الرومانسية

تفصيلة بسيطة.....بعيد عن عيون الناس....انتي و هو بس اللي نفهميها....و مهياش محتاجة هدة حيل....لكنها محتاجة روح بتحب بجد...و عايزة تكتشف اللي قدامها

مش جوزك بيقولك مش خلاص اتجوزنا.....عارفة ده ممعناه ايه....معناه يعني انتي بقي فاضياله...يعني ابتدي جربي كل حيلة و كل فكرة و كل افتكاسة لغاية ما تعرفي زراير الريموت.....عشان ساعتها تلاقي القناة اللي تقدر تبسطكم انتو الاتنين

و يا رب يملي ما بينكم....تفاصيل.....صغنتتة اوي....بس بتعمل بينكم ابجدية خاصة جدا

مساكي...و صباحك....و كل أيامك....رومانسية....بس بتاعتك انت و هو مش حد تاني

علي هامش المداخلة و كدهون

متنسيش تطبقي ايدك بحتة بخمسة.....دي الفوزيتا بتاعت الكشف

كان معكم

لماضة

تومارجي....العائلات:)

[لماضة مصرية جدا]

عنوان الموضوع مكتوب بالفنط العريض وبعدين اللي يخش يلاقي مكتوب جنب العنوان بخط صغير ممنوع دخول الرجال .. يعني نخش و لا نطلع <br class="Apple-interchange-newline">

و كثير بحطله رسائل حب لطيفة فى جيب القميص و البدلة و يجى و لا حس و لا خبر

أنا سمعت الكلام ده فين ...فيين

أيون صاحب الشورة دي .. لماضة .. ممكن تشديلها تلغراف تيجي تشوف عمايلها .. وتيجي تشرحلك سيكلوجية الرجال و ملوخية الرجال بعد الزواج .. وصدقيني هتستفادي من كلامها .. عن نفسي منتظر تعليقها على الموضوع ده .. لأني بستفاد كتير من كلامها عن الحياة عموما ..

انت جيت....شهقة يا رمضان

مش عارفة ليه لما حضرتك قولت صاحبة الشورة ديت...(حسيتك بتبرطم في سرك....شورة هباب و مقندلة بالقونديل...اللي هو ايه مش عارفة :blink: )

هو الحقيقة...و مما لا شك فيه...(وش اي حد خانق نفسه بكرافته و منجعص ع الكورسي)

انا بكتب افكاري...و اللي ممكن تكون صح و ممكن طبعا تكون من فئة القونديل اللي فوق دوت :blink:

بس هي مش افكار و لا قوالب جاهزة نتصب جواها و نرسم خط و نمشي عليها

انا بشوفها انها مساحة للتفكير بشكل مختلف

متعودناش في حياتنا نفكر بزوايا مختلفة و نقف علي كل زاية و نشوف يا تري المشهد بعين تانية هيكون ايه

احنا بنقلب الفيلم مع بعض

و كل واحد ممكن يلقط بعينه زاوية مكنتشي باينة ليه قبل كده

و ده مش بس في الجواز....المعركة المصيرية لتحرير الروح :P

ده في الحياة كلها

و شكرا لحضرتك اد السما و البحر ...و يسعدلي قلبك

بس برضه افكاري بتجيب نتيجة و الحمد لله....بس في القالب بتاعي

معرفشي بقي قوالب الناس التانية مقاس الصينية فيها اد ايه و لا حرارة الفرن عندهم ازاي....(وش الشيف شربيني في برنامج اكلة هنية:)

مساكم....صينية مشاعر بتستوي علي نار هادية

تم تعديل 28 ديسمبر 2011 بواسطة لماضة مصرية جدا

[لماضة مصرية جدا]

حتي علماء النفس بيقسموا العلاقات العاطفية مراحل وكل مرحلة ليها سلوكها وليها مشاعرها

دريمي يا بنتي

بنتي يا دريمي

اسمعي كلامك خالتك فكيهة

اللي هتقولك

سيبك من كلام علماء النفس و بتوع الهس هس

انتي....و هو علماء نفس بعضيكو...في حالة اسسمهاستثنائية جدا الجنون العاقل

سيبي نفسك

افدري جناحاتك

حبي

عبري

اكتشفي

اغلطي

اعتذري

اغضبي

وريه العين الحمرا....قصدي وريه انتي من غير ذواق

اتجنني

اديله مساحة يتجنن

غيري

انكشيه

اقلقي عليه

خافي

قربي

ابعدي

اسالي

اتعلمي

علميه

صحي الحتة اللي جواكي....اللي كانت متشالة عشان حلالك

اعشقي بكل تفاصيلك

و بكل حياتك

و ارمي كتاب علماء النفس وراكي

و صدقيني هتعملي كتاب بتاعكم انتو الاتنين

هذا و بالله التوفيق

و السلام عليكم و رحمة الله و بركاته

السلام الوطني

تششششششششششششششششششششششششششششششششششش

[ozoozo]

علي فكره بعد الرومانسيه ضروري الواحد يشرب شويه لبن رايب عشان مايجلهوش امساك

وطبعا تفضل ان الرومانسيه تكون نص سوي عشان كرشه النفس :blink:

تم تعديل 28 ديسمبر 2011 بواسطة ozoozo

[لماضة مصرية جدا]

استاذ اوز اوز

و الله لسه بقول اهو التوبيك دوت محتاج حضرتك...(وش حد كداب اوي)

من موقعي هذا امام جردل الغسيل اللي راكناه اديله ساعة و بضحي بمستقبلي و قاعدة اكتب في مداخلات بتنقط رابسو...قصدي رومانسية

انا بهيب بالادارة الموقرة انها تكتب في عنوان التوبيك

ممنوع دخول

أستاذنااوز اوز

:P

[عصام أبوالفتح]

لحد ماتعرفوا يعنى ايه رومانسية .. انقعوا رز احتياطى :happy:

[عادل أبو عمر]

السلام عليكم و رحمة الله و بركاته

طب بالصلاتو ع النبي كده و قبل ما نضرب كورسي في الكلوب...(وش اي حد من عصابة القناع الاسود)

ممكن اسال

هو يعني ايه رومانسية اصلا؟؟؟

وعليكم السلام و رحمة الله و بركاته

هي دي الميزة في أفكار لماضة ... التفكير من برة الدايرة .. و ما زلت أتعلم الكثير من أفكارك

احترامي و تقديري لأفكارك و لشخصك الكريم يا لماضة .. ربنا يسعد قلبك تستاهلي حتة بخمشتاشر

الصينية اللي في المداخلة التانية .. جوعتنا ..و تخلينا نفكر في سر الطبخة في حياة كل واحد فينا ..

وربنا يخليلنا جهينة و المراعي ... عسل يا أوزوزو

[عنبو]

مهو الواحد طول اليوم عمال يقول كلام حلو للمدير وكلام حلو للعملاء فبيروح البيت بيكون خلاص بقى زهقان قرفان عاوز واحد يقوله كلام حلو هو يكون فى موضع قوه يعنى واليى يتعمل فيه فى الشغل لازم يطلعه فى البيت امال يعنى هنعيش طول حياتنا نقول كلام حلو بس مش لازم برده نسمع كلام

الحياه صعبه بشكل غريب واليى عاوز يعيش فى مستوى كويس لابد ان يضحى بحاجات كتير قوى

الستات بقى عاوزين الراجل غنى ووسيم ومركز اجتماعى مرموق وكمان بيقول كلام حلو طيب ازاى

يعنى انا امبارح قاعد فى المكتب فى امان الله بعمل شغلانه معينه لقيت فى خمس دقايق مدير الشركه بيكلمنى بيقول فيه كارثه وسيب اليى فى ايدك وروح الموقع حالا شوف فيه ايه قولت طيب وانا ماشى كلمنى مدير المشاريع قالى نفس الكلام ولسه منزلتش لقيت مدير الموقع بيقولى ات فين فلان الفلان عاوزك (( اسمه يخوف )) عديت على الاتش ار قولت ليهم يجهزوا الباسبور بتاعى علشان انا مروح لانى عارف ايه اليى ممكن يحصل وطول ما انا ماشى اى واحد معاه رقمى بيكلمنى يقول فلان عاوزك .

انا قولت اكيد انا عملت كارثه وفيه واحد مات وخصوصا ان الموقع ده فى مكان حساس فى الدوله يعنى روحت قولت لو اتكلم كلمه هكبس عليه واليى يحصل يحصل اصلها مش ناقصه بقى لان بجد كنت جبت اخر يعنى روحت لقيت الراجل بيقولى كيفك محمد قولت له تمام

قالى فين التقرير بتاع كذا طبعا اخدت نفس قولت فى سرى تييييييييييييييييييييييييييييييييييييييييييييييييييييييييييييييييييت

روح يا شيخ دانا حسيت انى هستجن طبعا دى حاجه بسيطه وبعد كده عاوزين الواحد يقول كلام رومانسى والله حاجه غريبه

[pocy]

ههههههههههههههههههه

أضحكتنى مداخلاتكم الجميله وخصوصا مع وصفات وصوانى خالتى فكيهه مرات ابنى ...............

وارسل رساله الى زوجى ....وكل الازواج ..........

واتمنى ان تتذكروا هذا الموضوع الجميل ويكون عبره او حديث مع النفس ..............

زوجى الحبيب .............

تم تعديل 29 ديسمبر 2011 بواسطة pocy

[ابو محمد بن مصطفي]

بصوا بئه قبل ما نتكلم او نرغي في ايه كلام يخرج من الموضوع ده اللي مش متجوز وسيبوا المتجوزيين يطحنوا بعض

وكل واحد هياخد حقه وئتي (وش باسم السمرة وهو بيأفل الحارة)

بس علي شرط وجود مخرج امن للرجالة :P

والرومنسي الحق عامل زي الثائر الحق art:)

[عنبو]

عندما كنت رومانسيا كنت اصحى الصبح واذهب الى الحديقه (( الغيط )) لكى اقطف بعض من الورد الاحمر الممتزج بقطرات الندى واعود مسرعا الى البيت قبل ان تستقيظ حبيبتى لكى ازين لها الوساده التى تنام عليها ببعض الورد وعندما دخلت الى بيت وانا امشى على طراطيف اصابعى حتى لا احدث اى ضوضاء فتستيقظ حبيبتى وانا فى الطرقه متجها الى غرفة النوم سمعت صوت غريب لدرجة اننى ظننت ان احد الفلاحين المجاورين لى يقوم بتسخين المحراث ولكن كلما اقتربت من غرفة النوم كلما زاد الصوت فاصابتنى ريبة وظننت ان حبيتى اصابها مكروه فهممت بالدخول

تبع

[Mr MAGED]

بمناسبة الصواني والحاجات الحلوة بتاعتكم دي

بجد انا جعان .. مافيش حد يعزمني ع الغدا النهاردة

ينوبكوا فيا ثواب .. واهي هتكون رومانسية برضه

[pocy]

هههههههههههههه ايه طلع اكيد صوت المحراث اللى فى مناخيرها هههههههههههههههههههههههه

كمل يا عنبو