هي كانت بلدنا فعلاً ولا متأجرة مفروش ؟

[se_ Elsyed]

أقسم بالله ضربت كف على كف لما عرفت النهاردة إن أعضاء مجلس الشعب حتى السابقين .. وزوجاتهم .. يحملون جوازات سفر دبلوماسية

يا حلاوه ؟ ليه إن شاء الله ؟ وإيه الفساد ده كله وإيه التهريب والتسليك ده لأن امتعة الدبلوماسيين ما بتتفتش في المطار

إيه اللي كنا فيه ده ؟

قامت إدارة الجوازات بمطار القاهرة الدولى مساء اليوم بسحب الجواز "الخاص" من هويدا أنور مرسى، زوجة رجل الأعمال هشام طلعت مصطفى، المسجون فى قضية مقتل المطربة سوزان تميم، بعد تقدمها للسفر على طائرة مصر للطيران المتجهة إلى جده.. حيث تم سحب الجواز الخاص منها والسماح لها بالسفر باستخدام الجواز العادى.

من ناحيته قال مصدر أمنى بالمطار إن جميع أعضاء مجلس الشعب السابقين وزوجاتهم يحملون جوازات سفر خاصة تستخرج من وزارة الخارجية، وأن وزارة الخارجية نفسها طلبت من إدارة الجوازات بالمطارات منذ 7 شهور تقريباً بسحب جميع الجوازات الخاصة.

وأضاف أنه تم سحب عدد قليل من الجوازات الخاصة التى تقدم أصحابها للسفر لأن أغلب أعضاء المجلس السابق قاموا بتسليمها وأن الإدارة ستقوم بسحب أى جواز يتقدم به أى أحد للسفر.

[أسد]

من المعروف يا أخي الحبيب أنها بالفعل كانت متأجرة مفروش

وكان الفساد قد عم البر والبحر ... وعم كل مكان في مصر

ولكل تلك الأسباب والظواهر ....

قامت في مصر ثورة شعبية ..

ونحن الآن في مرحلة التغيير ...

وبالتالي .. يجب إيقاف كل محاولات الاستمرار في استخدام مرافق الفساد التي بناها العهد السالف ..

والخبر ... يكشف عن مشكلة كانت موجودة ..

ولكنه أيضاً يكشف على أن هناك إجراءات جديدة .. ومستحدثة ... تمنع هؤلاء من الاستمرار باستخدام تلك الإمكانات الفاسدة التي كان قد منحها النظام البائد لعض المحظيين ..

وهذا في حد ذاته جيد ... بل ممتاز

نتمنى الاستمرار في مثل تلك الإجراءات ... ويجب علينا أن نلتفت أكثر للبناء في المستقبل .. والكشف عن أي فساد سابق أو موجود ... للعمل على تدميره وإيقافه

[raouf]

لا حضرتك غلطان يا حج احمد

وايضا الفاضل اسد

البلد متباعة من زمان

وليست مستاجرة

المستاجر له فقط بعض السماحيات انه يقدر يعملها اما فى مصر بلدهم فهى ملك لهم بيعملوا فيها كل اللى كانو عايزنوا بدون رادع

[Alshiekh]

كانت متأجرة مفروش ( بالجدك )

يعني إحنا كمان كنا من ضمن العفش

علشان كده كان هناك موظف مرتبه 100 جنيه وموظف تاني مرتبه 100000 جنيه

مواطن مش لاقي اوضه يسكن فيها ومواطن تاني متخصص له الف فدان تقسيم أراضي يشتريها بضمان الأرض اللي اتخصصت والبنك يبقى يغني ظلموه

وده كله لان صاحب العزبة يمنح من يشاء ويمنع من يشاء.

عموما بشرة خير ان التنضيف شغال.

[se_ Elsyed]

لأ انا مستغرب إن في حاجات بسيطة ماحدش في الشعب كان عارفها

يعني بعد سنوات طويلة .. اكتشف إن مصانع الحديد والاسمنت الخاصة وهي صناعات كثيفة الإستهلاك للكهرباء والطاقة وفي نفس الوقت تكسب مليارات سنوياً أُفاجأ إنها تحصل على دعم كبير جداً للطاقة .. في حين تقصم فواتير الكهربا والغاز ظهر المواطن العادي !!!!!

وأنا كمواطن عادي اكتشف بعد سنوات عمري إن زوجة عضو مجلس الشعب تحصل على جواز سفر دبلوماسي !!!!!!!!

ويا ترى في إيه تاني ما نعرفوش ؟

[سكر]

ماسورة المميزات الممنوحة لاعضاء مجلس الشعب يجب اعادة النظر فيها من اول وجديد

ويجب عرضها على الراى العام والشعب كله يعرفها

وكمان يجب وضع ضوابط اكثر صرامة للحصانه البرلمانيه

نفسى يتم عمل موقع على النت واو صفحة على الفيس بوك لكل مرشح فى مجلس الشعب

يظهر فيها كل شى قدمة طول خدمته يوم بيوم

ويظهر فيها اقرار الذمة الماليه وكمان كشف الحضور والانصراف اليومى