توقعاتك لعام ............2012

[سقراط المصري]

الأخوة الافاضل

طبعاً العنوان واضح.. ماذا تتوقع من احداث يمكن ان تحدث من خلال تحليلك لمجريات الامور داخلياً وخارجياً

اعتقد انه لاتوجد اجابة صحيحة واخرى خاطئة..........فهي توقع

الذي اتوقعة من رؤيتي المحدودة هي:

1- هيكتر الكلام في السياسة من كل من هد ودب............... بعني المثقف والراقصة والسياسي......... حتى العبطاء.... هيتكلموا في السياسة ويفتوا.

2- ممكن نقابل 52 جمعة في التحرير تحت مسميات مختلفة...... جمعة شد الحزام.... جمعة الواد بيعيط.... جمعة سيب وانا أسيب..... جمعة هبل مخلوط بعبط.

3-هتظهر مصطلحات زي بتاع بوش القديمة ، ..... يتكون معايا يتكون ضدي...... مثل انت اخواني أم استغفر الله العظيم..... انت سلفي أم أعوذ بالله.... انت علماني أم ربنا يهديك........ ولن يسأل أحد الاخر سؤال بسيط جد........................... انت مصري؟

4- كما اتوقع حدوث خبر سار لمصر...... يعني احيانا لم الامور تقفل قوي.... تلاقي حاجة صح حدثت ...... ويكون السؤال إزاي الحاجة الحلوة دي حصلت من النستنقع دة.............................. التوازن الإلهي أؤمن به يشدة.

5- للمرة المليون................ الشر لازم يخسر........ يعني البلطجة مش هتختفي تماماً..... بس اللي بيمولها هيتعب (سواء كان الطرف الثالث المجهول من الداخل ام الخارج).

6- بلطجي اليوم.... هو طفل الشارع السابق.......... مشاكل لازم تنتبه لها مصر المستقبل.

7- في يناير - كما تقول الصحف- هيكون الحد الاقصى للاجور................................... اتوقع منظومة الاجور والحد الادني يحدث على نهاية العام............ وبغض النظر عن حدالسقف الاعلى والدني للاجور.................... اتوقع زيادة مرتبات التعاقد مع المصريين بدول الخليج............ من له كرامة تصان كرامته.

8- بقرب نهاية العام اتوقع المطالبة ومظاهرات بإسقاط البرلمان المصري.

9- سيوصف رئيس مصر القادم ب "القزم".............. لان الاسماء المطروحة من وجهة نظري كلهم اقزام ..... اكرر كلهم.

الرئيس هيكون مهزوز ومربوك...... وكبيرة يزور دولتين او ثلاثه عربي................ بالإضافة لدولة زينزبار.............. ثم مظاهرات مطالبة بإسقاطة................ وسيسقط عام 2013

10-اتوقع زيادة نسبة الزواج عام 2012 اكثر من عام 2011.............................ز بمساعدة الاخوان والسلفيين.

11- في ناس هتركب الهوجة وتركب ذقن.................... سيزداد تدين الرجال ظاهرياً.

12- انا متوقع من زماااااااااان عودة الجيب وملابس السبعينات بالنسبة للنساء........... بس مع مرور الوقت.

13- الشخصية المصرية عام 2012 هتتسم بالتناقض الصارخ قولاً وفعلاً.

14- المشروعات الصغيرة (في حدود الف جنية) هتنجح وتكتر............... وهتقل المشروعات ذات رأس المال الكبير.

15- المصري مش هيشتري اكلة كله من سوبرماركت واحد.................. خوفا من الحسد.

16- رمضان القادم هيكون جميل جداً............. وهتظهر فيه حاجات كنا مفتقدنها من زمااااااااااان....................... ممكن يرجع الفانوس ابو شمعة...................... فاكرينه

مع خالص تحياتي

سقراط (بحبك يا مصر)

تم تعديل 31 ديسمبر 2011 بواسطة سقراط المصري

[م تيمور المراغي]

اتوقع صدام الجبابره ,,

بين الثوار والنشطاء من جانب

وبين المجلس العسكري مدعوما بمكتب الارشاد من جانب آخر !

[shawshank]

اتوقع صدام الجبابره ,,

بين الثوار والنشطاء من جانب

وبين المجلس العسكري مدعوما بمكتب الارشاد من جانب آخر !

وأنا كمان ....

احنا ماشيين في طريق ومُصرّين عليه عشان عايزين الحرية، فهو طريق اتجاه واحد بدأناه وخلاص مينفعش نرجع لأن الرجوع عواقبه أسوأ من الاستمرار، والمجلس العسكري ماشي في طريق ومُصرّ عليه عشان مايسبش النعيم اللي هو فيه ومايتحاسبش على اللي فات، فهو طريق اتجاه واحد بدأه المجلس العسكري وخلاص مينفعش يرجع لأن الرجوع عواقبه أسوأ من الاستمرار. الطريقين دول بيودوا للانفجار حتمًا، إلا لو حصل انقلاب في الجيش (أو نتائج الانتخابات التشريعية والرئاسية كانت مرضية للمجلس بحيث يحكم هو من وراء الكواليس، وفي نفس الوقت مرضية بشكل ما للشعب. وهو احتمال أستبعده في ظل اللي بيحصل).

فأتوقع حدوث هذا الانفجار والصدام الحقيقي مع الجيش. الشهداء بالآلاف. الجيش هيستخدم الطيران والمدرعات. وهيكون أسوأ مما يحدث في سوريا. ويحاول المجلس العسكري بكل القوة والعنف جعل عواقب الاستمرار في الثورة أسوأ من عواقب بقاء نظام مبارك. وساعتها هنتكلم عن أيهما أفضل: بقاء نظام مبارك أم سقوط آلاف الشهداء؟ وفي كل الأحوال هيكون الخيار الأول شبه مستحيل لأن الرجوع معناه الاعتقال وسقوط آلاف الشهداء برضه.

أتمنى مايحصلش، لكن المؤشرات في رأيي بتقول كده.

[mfarag]

مجرد توقع

حتى لو سلم المجلس العسكرى السلطة غدا او بعد 6 شهور

و حتى لو جاء رئيس منتخب و مجلس شعب منتخب

سيظل دعاة الفوضى يحاولون اشعال الفوضى باى حجة من الحجج

و ستظل شماعة اهداف الثورة المطاطة موجودة

و الغرض هو اما الفوضى او قفزهم على السلطة

و ستظل عندهم الانتخابات لا شرعية لهم ( شعب جاهل و غبى ) وستظل عندهم الشرعية الوحيدة للميدان حتى لو كان الموحود بة 300 و احد و حتى لو كان نصفهم مسجلين خطر و اطفال شوارع

[ابراهيم عبد العزيز]

أتوقع للعام القادم :

• تناغم وإنسجام تام بين المجلس العسكري والبرلمان وأحيانا سيكون على حساب الثورة وأهدافها ( من باب الحنكة والحكمة ) بإستثناء أصوات معدودة من بعض النواب أمثال مصطفى النجار والمستشار الخضيري و عمرو حمزاوي .
  
• صدام قوي بين البرلمان ( أو بمعنى أدق الأغلبية فيه ) والثوار , والإرهاصات الحالية تؤكد أنه قادم بلا ريب .
  
• إستمرار الزخم في ميدان التحرير وفعالياته الثورية .
  

إجمالا أتوقع في العام القادم زخما في الأحداث يفوق عام 2011 حتى تسليم السلطة بشكل كامل للشعب .

أما بالنسبة للجوانب الإقتصادية والإجتماعية فلا أستطيع توقع شيئا فيهما لعدم وجود خطط وبرامج علمية في مصر في هذين المجالين نستطيع بناء توقعات عليها كما نرى في باقي دول العالم .

تم تعديل 1 يناير 2012 بواسطة ابراهيم عبد العزيز

[ذهبية]

اتوقع الاتى و لا يعلم الغيب الا الله

1- الصدام لا محالة بين السلفين و الاخوان

2- زيادة الاسعار بصورة رهيبة

3- هروب المستثمرين العرب والاجانب الى ليبيا و تونس لان حالهم احسن من حالنا

4- مازال مسلسل الفوضى و البلطجية مستمر الى السنة الجديدة

5- الاخوان المسلمين سوف تلين سياستهم لتحسين صورتهم وزى المثل ما بيقول اللى ايدة فى المية

6- استمرار الجيش فى السلطة

7- هيبدا الاخوان بمجرد دخولهم البرلمان بدعوة الجيش الى الاستمرار فى السلطة و احتمال كمان تشجع حد منهم يترشح

8-سوف يستمر الاعلام يلعب بالنار و يتحكم فى الشارع المصرى كثيرااا لكن بعد مجلس الشعب اعتقد ان الامور هتاخد مجرى اخر

[لونا]

تفاءلوا بالخير .. تجدوه

طيب ينفع أحلم .. و بلاش التوقعات ؟

باحلم ..إن كل واحد معاه قرشين بدل ما يبني بيت و لا يشتري شقة تمليك

يبدأ مشروع إنتاجي على قده أو بالاشتراك مع آخرين

تربية مواشي .. مزرعة نموذجية .. مصنع

على شرط .. إنه يكون وافي الشروط الصحية و قادر على منافسة الأسواق الخارجية

باحلم .. إن الطلبة يرجعوا يعتمدوا على المدارس

بعد زيادة رواتب المدرسين

و المدارس تكون نظيفة و فقط..مش عايزه المدارس شيك و متكلفة

فقط دكة و ديسك نظيف .. ما فيش فيه مسامير

و أرض الفصل من بلاط ينفع يتنظف كل كام يوم

مش مهما تنظف فيها ما يبانش فيها النظافة

و بدل ما نصرف على شكل المبنى و حجرة الناظر ..

نصرف على المعمل عشان الطلبة يعملوا تجارب بإيديهم

و يتصرف على حجرة الموسيقى و الرسم و التدبير و الكومبيوتر

عشان الهوايات دي مش رفاهية أبدًا

باحلم إن تجربة مستشفى سرطان الأطفال يتم تطبيقها على مستشفيات مصر كلها من مستشفيات الريف و الصعيد لأكبر مستشفى جامعي

طبعًا بعد زيادة رواتب الأطباء و التمريض

حيكون كل دكتور و ممرضة و فني كل همهم يشتغلوا بذمة في مستشفاهم

لأنه مش مهموم بعمل في مكان تاني بعد الظهر

باحلم إن يتم تدشين مشروع كبير برأس مال ضخم على غرار بنك مصر

يتاح الاكتتاب لزيادة رأس ماله لكل مصري

حتلاقي كل المصريين المغتربين و من داخل مصرحطوا فيه أموالهم

و لو مبالغ قليلة

ده اللي في بالي دلوقت

و يا ريت تكملوا على حلمي

اللي نفسي يتحقق

إزاي ما عرفش .. مش مشكلتي .. أنا دلوقت باحلم لبلدي

[hanzalah]

أربعة ألغام لابد من المرور عليها

انتهاء المرحلة الثالثة من انتخابات مجلس الشعب

تبدأ انتخابات الشورى

معركة الدستور

انتخابات الرئاسة

كل محطة أو لغم من هؤلاء سيحدد شكل وقوة اللغم الذي يليه

وعلى حسب تصرفات المجلس العسكري الغير أمين على ثورتنا منذ البداية

سيكون رد فعل الناس والاسلاميين والحركات الثورية

ثلاث جهات تنتظر افعال العسكري وتبني عليها ردود أفعال فقط لاغير

لايوجد طرف أو جهة قادرة حاليا على أخذ المباردة والقيام بالفعل لتجبر العسكري على مجرد رد الفعل

وبالتالي

سيتم قتل مزيد من المصريين واتهام اللهو الخفي

سيتم تشويه الثورة والثوار في كل مناسبة وينمو دور إعلام يحسن تقبيل حذاء صاحب الكرسي

وستقبل اغلب - الناس - ذلك لانهم باختصار يبحثون عن الامن والمصلحة المعيشية المباشرة

سيتأزم الوضع الاقتصادي وهذا يصب في صالح العسكري وليس أي من الفصائل اللاعبة الاخرى

كل ماسبق هو فرض متفائل

الفرض المتشائم

لا أرغب في الحديث عنه الآن

[الباشمهندس ياسر]

مصر هتشيل زلط

[التونسى]

متوقع سيناريوهات ربانيه ..لا تخطر .. لا على البال ..ولا على الخاطر .. فـ هُم يريدون .. وأنت تريد .. وأنا أريد .. ويفعل الله ما يريد:)

لا أنا بقرأ الطالع :blush2: .. ولا أنا درويش:blink: .. انا فقط أكثر تفاؤلاً.. وأكثر إيماناً..من ذى قبل

تم تعديل 2 يناير 2012 بواسطة محمود البصيلى

[عصام أبوالفتح]

أولا حكومة ائتلافية ممثلة من الجميع

ثانيا البرادعى رئيسا

ثالثا زويل رئيسا للوزراء

رابعا تقاعد أعضاء المجلس العسكرى بعد تقليدهم نوط الواجب من الدرجة الأولى فى 23 يوليو القادم

خامسا براءة مبارك من تهمة قتل المتظاهرين وتورطه فى محاكمات اخرى بتهمة التربح واستغلال النفوذ

سادسا تفتت القوى الثورية التى لم تنشئ حزبا وانفضاض الناس من حولها بشكل كامل

سابعا تحسن كبير فى الخدمات العامة كالنقل والطرق والنظافة والوقود والغاز والانابيب والعيش وفتح باب التبرع لها

ثامنا بدء الهجرة العكسية وعودة كثير من العاملين بالخارج اواخر العام

تاسعا الاعلان عن البدء فى مشاريع قومية كبرى اهمها ممر التنمية

عاشرا اختفاء تدريجى لما يسمى بالتوك شو لازدياد مستوى الشفافية وسيكون الاتجاه العام ترفيهى أكثر وستتصدر جلسة مجلس الشعب نسب المشاهدة

[عصام أبوالفتح]

أولا حكومة ائتلافية ممثلة من الجميع

ثانيا البرادعى رئيسا

ثالثا زويل رئيسا للوزراء

رابعا تقاعد أعضاء المجلس العسكرى بعد تقليدهم نوط الواجب من الدرجة الأولى فى 23 يوليو القادم

خامسا براءة مبارك من تهمة قتل المتظاهرين وتورطه فى محاكمات اخرى بتهمة التربح واستغلال النفوذ

سادسا تفتت القوى الثورية التى لم تنشئ حزبا وانفضاض الناس من حولها بشكل كامل

سابعا تحسن كبير فى الخدمات العامة كالنقل والطرق والنظافة والوقود والغاز والانابيب والعيش وفتح باب التبرع لها

ثامنا بدء الهجرة العكسية وعودة كثير من العاملين بالخارج اواخر العام

تاسعا الاعلان عن البدء فى مشاريع قومية كبرى اهمها ممر التنمية

عاشرا اختفاء تدريجى لما يسمى بالتوك شو لازدياد مستوى الشفافية وسيكون الاتجاه العام ترفيهى أكثر وستتصدر جلسة مجلس الشعب نسب المشاهدة

إحدى التوقعات تحقق والباقى جاى ان شاء الله

[hanzalah]

موضوع جميل يا استاذ سقراط

توقعاتي ان المجلس العسكري يلعب سينجل وكل الشعب المصري واقف نكست

[mamdowh]

أتوقع :

- زعيق وأصوات عاليه فى مجلس الشعب بدون أى تأثير

- حالات نهب وسلب وقتل والفاعل مجهول وضياع لحقوق الناس

- ستزداد حالات الانفلات على فترات

- كل شويه ها يلهوا الشعب فى أزمه والبرلمان مش هايحل أى أزمه منهم

- الناس هاتدى ضهرها لكل اللى بيحصل وهتتعايش مع أى ظروف طالما الضرب بعيد عنهم ( طبعا ده نتيجة سياسة التخويف والارهاب الجاريه)

- مجلس الشعب عمره قصير وكذلك الرئيس وهايكون مالوش تأثير يذكر ويمكن يتقتل لو حب يعمل ريس

- يمكن تحصل حالات تصفيه جسديه محدوده فى السلطات العليا بسبب التنازع على بعض السلطات أو اللى مش موافقين على القسمة

- اللى بيحصل فى السر دلوقتى محاوله لتقسيم التورته واللى مش هايسمع الكلام ها يغسل الاطباق مطرح الأكل ويمكن ما يلحقش يغسلها

- ها يسيبوا الناس تعمل أى حاجه وكل حاجه ما عدا الاقتراب من الخطوط الحمراء كما كان يحدث فى الماضى القريب

- بعض الناس الشرفاء ها تسيب البلد وتهج

أتمنى الا يحدث أى شيئ مما ذكر واطلع غلطان