سؤال للفاضل الاستاذ أحمد أنور عن رينو فلوانس..

[Doctor style]

سؤال للأستاذ الفاضل احمد انور ،،ايه رأي حضرتك في رينو فلوانس بما انك عندك واحدة ؟؟المميزات بالمقارنة بمثيلاتها مثل الفولكس فاجن جيتا أو الاوكتافيا ،،تويوتا كورولا مثلا .. وايه عيوبها ،،وايه رأيك في خدمة ما بعد البيع والضمان والوكيل لو هشتريها من مصر ....وأشكرك جدا على النصيحة

[Ahmed Anwer]

سؤال للأستاذ الفاضل احمد انور ،،ايه رأي حضرتك في رينو فلوانس بما انك عندك واحدة ؟؟

مبسوط بيها جدا ،، كقيمة مقابل السعر ، وسع و فخامة و تقفيل ممتاز ، و أوبشنز كثيرة ، مساحة شنطة كبيرة جدا ، ناعمة ، سحبها بالنسبة ليا كويس ، خامات داخلية ممتازة

المميزات بالمقارنة بمثيلاتها مثل الفولكس فاجن جيتا أو الاوكتافيا

،،تويوتا كورولا مثلا ..

ممكن أحكم علي الأوكتافيا بس عشان ، اللي بسوقها كثير

الأوكتافيا أحسن كثبات بس الفلوينس ثباتها معقول جدا بس مش مبهر زي الأوكتافيا

الأوكتافيا أحسن كصيانة و إقتناء عشان أكثر إنتشارا ، الأوكتافيا فتيسها 6 سرعات ، الفلوينس فتيسها 4 فقط و ده غريب جدا لأن حتي الألنترا و السيراتو بقوا 6 سرعات ( أتكلم عن الأوتو ) و ده بيحسسك بالنقلة بين الأول و التاني أحيانا

أنا مجبتش أوكتافيا عشان أولا منتشرة جدا جدا جدا من سنين و تلت أربع عيلتي و أصحابي معاهم أوكتافيا و بنفس الشكل تقريبا فمش هأحس إني جيبت عربية زيرو

و ثانيا عشان فرق السعر بينهم 40 ألف جنية و ده فرق مش قليل خااالص

أخيرا أبعد عن الجيتا و الباسات عشان الفتيس الجديد الدي أس جي ، مشاكله كثيرة و مش ناجح خالص في مصر غير الموتور التيربو محتاج بنزين 95

وايه عيوبها ،،

عيوبها نقسمها نوعين ،

نوع يتعرف بتيست درايف لأنه بيختلف من واحد للتاني :_

1- سحب ضعيف (( بالنسبة ليا راضي عن سحبها تماما ))

2- نتشة في نقل الأوتو بين الأول و التاني تحس بيها أحيانا

نوع عيوب فنية ظهرت في العربية بعد سنتين في السوق :_

1- عوامة بنزين بتعلق بمعني عداد البنزين بيقري غلط و بيضبطوه في التوكيل

و يقال أختفي في موديلات 2012 و مظهرشي عندي شخصيا

2- كاوتشة المساحة بتتقطع بسرعة ، حصلت مع كذا واحد

3- صفارة بسيطة جدا مع الفرامل بتظهر في أحيان نادرة ، ظهرت عندي

وايه رأيك في خدمة ما بعد البيع والضمان والوكيل لو هشتريها من مصر

وكيل رينو ، محمد نصير أفضل توكيل سيارات في مصر (( بس أحسن الوحشين يعني ))

الضمان محترم ، و الخدمة محترمة جدا بس بفلوسك :)

الصيانة كل عشرتلاف كيلو بفلوس و كل خمستلاف كيلو مجانية ، تشييك و ضبط

و يقال إن عيبه إن كثير متلاقيش عنده توفر قطع غيار

....وأشكرك جدا على النصيحة

الرد في الإقتباس

بس الخلاصة

إنها قيمة مقابل سعر أكبر ميزاتها ( وسع الصالون و الحجم و الأوبشنز و الأداء )

ثانيا ، إن مظهرشي ليها مشاكل مؤثرة زي ما باين في ردي و ده مدة سنتين تواجدها في السوق

[Doctor style]

شكرا يا أستاذ أحمد :)