آدي اخره اللي يقاوح في نفسه

[pink rose]

ما بحبش يفضل البيت علي نفس نظامه فترة كبيرة

و بالتالي كل شوية اغير النظام

دا جنان رسمي من زماااااان مش جديد يعني

قووووووم جيت في يوم طقت في دماغي كالعادة اغير في اوضه مريم

و فعلا حركت السرير( هو زي الداهية بجد) و التسريحة (شرحه)و الكومود دا خفيف ما فيهوش مشاكل

و لولا ان الدولاب انا عارفه انه لازمله 4 رجالة يحركوه كنت قومت بالواجب معاه هو كمان لكن حقيقي ما باقدرش اجي جنبه بصراحه

و بس خلصت و ارتحت نفسيا

لكن تاني يوم بقى و الوجع اشتغل بشكل مريب في ضهري

لدرجة كنت باعيط و انا باصلي خصوصا في الركوع و السجود

قولت اريح في السرير و هابقى كويسة

فضلت موجوعة 3 ايام كده

الوجع قل شوية لكن ما راحش

و ما رحتش لدكتور وقتها لان جوزي كان في مصر و انا بعدها كمان نزلت و اتلهيت هناك مع اني كنت تعبانة و ما رحتش لدكتور

رجعت الرياض يادوب يوم و طلعنا قطر بالعربية

و المشوار دا بقى كان هو القشة اللي قطمت ضهري انا

تعبت جدا سفر 7 ساعات متواصل رايح و زيهم جي

المهم رحت النهاردة المستشفى

و بعد عمل اشعة مبدئيا كده

فقرة اتحركت من مكانها

و فقرتين تانين الغضروف اللي بينهم حجمه اقل من الطبيعي

الدكتور قالي لازم اشعة رنين مغنطيسي عشان يتأكد من الفقرة اللي اتحركت دي ضاغطة على العصب و لا لأ

و اداني ادوية مؤقتة عشان الالم لحد ما يشوف الاشعة

مع طبعا عدة ممنوعات محترمة

ممنوع اشيل حاجه تقيلة

ممنوع اوطي

ممنوع اقعد كتير

ممنوع اقف كتير

و طبعا لازم و حتما مرتبة طبية

و ادي جزاة اللي يقاوح في نفسه و يحرك العفش من مكانه

ااااااه يا ضهري

تم تعديل 9 يناير 2012 بواسطة pink rose

[Abu Reem]

سلامات يا ام مريم

كده تعملي كده في نفسك

معنى كده انك مش هتشتركي في اولومبياد لندن هذا الصيف

كان امالنا فيك في تحقيق ميدالية في رمي الرمح

المهم الف سلامة وربنا باذن الله يعجل لك بالشفاء

واتمنى تكون عجبتكم الدوحة.... وجوها الجميل

[عبير يونس]

سلامات يا ريمو

بإذن الله تعب ويروح

ربنا يزيح عنك يارب

آمين

[التونسى]

سلامتك الف سلامه أم مريم

بصراحه انا اول ما قريت كلامك ضهرى وجعنى اصلا بالايحاء :closedeyes: ....من قبل ما اوصل للجزء اللى انتى بتشرحى فيه تداعيات تغييرك للنظام فى البيت

انا بحب التغيير برده زيك .. بس مقدرش اشيل و انقل حاجه ((تقيله)).. الا لما يبقى معايا حد يساعدنى .. انا اخدت قبل كده درس قاسى فى موضوع تعب الضهر ده .. ومن ساعتها وانا حريص جدا ... الدكتور قالهالى حكمه .. ((هو ضهر واحد اللى عندك .. حافظ عليه ))

وعلى فكره مش الضهر بس اللى ممكن يتأثر .. دا كمان ممكن المفاصل زى الرسخ والركب والرقبه .. لو الشيل او النقل تم بحركة خاطئة .. ربنا يعافيكى ويعافينا

خير ان شاء الله .. والموضوع يكون بسيط .. اهم شئ الوقايه.. واتباع تعليمات الطبيب بحذافيرها .. وتقومى بالسلامه ان شاء الله

تم تعديل 9 يناير 2012 بواسطة محمود البصيلى

[م تيمور المراغي]

الف سلامه عليكي والله زعلت

اسال الله سبحانه انه يشفيكي

[ام سلمي]

الف سلامة يا ريم

ان شاء الله حتبقي حاجة بسيطة

أنا كنت قريت مرة ان مشاكل الضهر تعتبر تاني سبب يخلي الناس تروح للدكتور بعد البرد

فغالبا حتلاقي معظم الناس عدت عليهم مشكلة او وجع في الضهر في فترة من حياتهم

فان شاء الله يبقي وجع مؤقت ويخف علي طول

[capitshino]

الف سلامة على حضرتك

اسأل الله ان يُشفيكى .

[لونا]

ألف سلامة عليكي يا بينك يا حبيبتي

أهم حاجة في موضوع الغضروف ..هي الالتزام بتعليمات الدكتور بحذافيرها

يعني ما ينفعش تشيلي حاجة تقيلة نهائي

على قد ما تقدري تفردي ضهرك

لو تقدري تجيبي حد يعملك شغل البيت و ياخد باله من مريم يكون أفضل

من حالات شفتها الراحة التامة التامة .. بتفرق كتير في نتيجة العلاج .. مادام مافيش احتياج للتدخل الجراحي

[raouf]

الف سلامة عليكى

اهم حاجة دلوقتى قللى من المجهود وشيل اى حاجة

وربنا يقومك بالسلامة

[ابو محمود]

الف سلامة لحضرتك واحب اطمنك ان ان شاء الله خير علشان كل اللي عندهم مريم بيحصل معاهم كدة ولادى برضو حدث معهم ذلك وربنا سترها علشان خاطر مريم برضو ههههههههههههههههههه ربنا يخليها ليكى وتفرحى بيها

دعائى لكي بالشفاء العاجل تحياتى

[نوران]

ألف سلامة عليكي يا ريم

بسيطة إن شاء الله وهتعدي

وزي ما الزملا قالوا لك ، أهم حاجة تلتزمي بتعليمات الدكتور

سلامتك يا جميل

تم تعديل 9 يناير 2012 بواسطة نوران

[pink rose]

الله يسلمكم كلكم يا رب

و فعلا لازم كل واحد يخلي باله من نفسه

و خلاص هاقعد اغني انا من اول يناير هابطل اشيل سراير

بس اكتر حاجه مزعلاني موضوع اوليمبياد لندن دا

يا ترى هاتعملي من غيري ايه يا مصر؟؟؟؟؟

انا ما شاء الله شكلي باهييس من البرشام اللي عماله ابلبعه دا

بس خير خير ان شاء الله

[عصام أبوالفتح]

أسأل الله العظيم رب العرش العظيم ان يشفي اختنا بينك شفاءاً لا يغادر سقماً

اللهم رب الناس أذهب البأس .. اشف انت الشافى لا شفاء الله شفائك .. اشف اختنا بينك شفاءاً لا يغادر سقماً

ومعلش خليها الاوليمبياد اللى بعده مش مشكلة

[عادل أبو عمر]

ألف سلامة على حضرتك و ربنا يجعله في ميزان حسناتك

و يارب يديم عليكي نعمة الرضا ..

معرفشي فيه علاج طبيعي في المرحلة دي و لا لأ .. بس أنا من سنتين و ربنا يعافي الجميع جالي انزلاق غضروفي .. و بفضل الله العلاج الطبيعي كان بفضل الله سبب أساسي لتخفيف الألم إلى جانب تغيير نمط الحركة اليومية ..

على جنب كدة

هو تحريك العفش برده شغال في السعودية ... و إيه هي غية الستات في تحريك العفش

المشكلة فعلا الحكاية مش سهلة و متعبة جدا .. بس أهي حاجة بيداينونا بيها كمان .. يعني بيعملوا كل حاجة و برده الراجل ييجي من برة يدور ع الحاجة التايهة و يسيب كل التغيير اللي في البيت ..

بس ده أكيد طبعا راجع لبعد نظر الرجالة

والسلام عليكم و رحمة الله وبركاته

[الباشمهندس ياسر]

أسأل الله العظيم رب العرش العظيم ان يشفي اختنا بينك شفاءاً لا يغادر سقماً اللهم رب الناس أذهب البأس .. اشف انت الشافى لا شفاء الله شفائك الف سلامة عليكي يا ام مريم

[المطحون]

الاخت العزيزه اولا الف سلامه ثانيا نتكلم طب مش منطقى المشوار والشيل والحط لازم يتعب ضهرك لكن انزلاق فقارى لازم يكون من الاول وده بيادى لضعف الفقرات واحتمالية انزلاق غغوفى وده اخطر لانه بعد الشر بيحتاج تثبيت للفقرات مش مجرد شيل للغضروف

االمهم هو الراحه فتره بسيطه مع العلاجات مثل الفولتارين ومرخى العضلات مثل الريلاكسون مع فيتامين ب مركب

اما بالنسبه للرنين فلاينصح بيه لانك مش بتشتكى من مده اجليه اما نشوف نتائج العلاجات

ومتقلقيش لتك انشاءالله بخيرومتناميش على الارض لكن كفايه مرتبه ناشفه شويه

[engmido]

الف سلامة يا ام مريم

[م تيمور المراغي]

من اول يناير هابطل اشيل سراير

:happy:

[rewsha]

الف سلامه يا ام مريم

وربنا يتم شفاكي على خير

[زهرة الجبل]

ألف سلامه عليكي يا أم مريم

ربنا يجعله في ميزان حسناتك يا رب

كانت عندي نفس المشكله زمان .. لما كانت الشقه بلاط و مفروشه موكيت .. زي أغلب شقق الإيجار هنا

من كم سنه قلبتها سيراميك و سجاجيد صغيره

فالموضوع بقى أسهل كتير .. العفش يا دوب بيتزق و يتزحلق عالسيراميك

ربنا يعينك و يعوض على مصر خير في أولمبياد السنه دي :closedeyes:

أهم حاجه إنك تلزمي الراحه و ربنا يرزقك بالشفاء يا رب

تحياتي