كيف تتصرف بحكمة

[ابو محمود]

هذا الموضوع وهذة الصفحة ربما تكون ذكرى لاحداث مرت بنا نتذكرها ونسردها على صفحات تتحرك ونتشارك بها ومن اهمها موضوعات حدثت لنا وخرجنا منها بدون اصابات رغم انها كانت من الممكن ان تغير مسارنا او تؤدى الى احداث تغير فى نفسياتنا او جسدنا او معنوياتنا نحب ان نسرد قصص حدثت بالفعل ونحمد الله على الهامة لنا بالتصرف السليم ... مين هيبدآ

[ابو محمود]

بما انى صاحب الفكرة هبدأ ....

سنة 1994 كنت احمل بسترتى الجلد امانة عبارة عن خاتم من الماس وحلق ومبلغ 3الاف جنية 30 ورقة من فئة ال100 وكنت اركب سيارة زميل لى وكنت متأخر فى الوقت وتشير الساعة الى 12 مساء منتصف الليل

وكنت ذاهب لاسلم الامانة التى صنعتها لاصحابها بمنطقة الظاهر بيبرس .اقتربنا من الميدان وأذ بعربة طائشة تخرج من فوق جزيرة الشارع وتصدم بالمقابل بعربتنا وعندما حاول صديقى تفاديها كانت قد حطمت الباب الخلفى وراء السائق وحدث ان اصيب صديقى بكسر فى ذراعة وانا ببعض الرضوض لكنها بسيطة بحمد الله وكنت لا اشعر بها رغم انها كانت فى اجنابى من شدة هول المنظر وخوفى على صديقى ونقلت صديقى لاقرب مشفى وكانت اسمها سيد جلال وتم شراء المواد اللازمة للتجبيس وحضر اخو صديقى وانتهى هذا المشهد الساعة ال3صباحآ وقطرنا العربة يومها امام ورشة تقترب من مطلع كبري غمرة وكنت اسكن وقتها بمنطقة الزيتون وفى تمام ال3 والنصف شاورت لتاكسي من على مطلع كبري غمرة فوقف فطلبت منة ان يوصلنى الى الزيتون وقلت لة انى ساعطية ما يطلبة بس المهم ماحدش يركب تانى لأن التاكسيات كانت عندهم موضة ايامهم يركبو زبون على زبون

عندها كانت فى سترتى الجلد بواقى مأئة جنية كنت صرفت منها اكراميات ومشاريب على المقهى امام المشفى لزوم الانتظار مع صديقى بعد الجبشس والاشاعة وانتظار لاخية والمعارف اللي كانت تعرفنا وما وصلتش الامانة طبعآ لصاحبها وهروح بيها

اذآ معى خاتم وحلق لا يقل ثمنهم عن ال25 الف جنية وقتها ومبلغ 3 الاف جنية خاصتى لانى كنت صباحآ سأحولهم الى شراء ذهب مباع

ماكان من السائق الا ان همهم وقال لى اركب يابية خليها على الله الطريق فاضي وربنا مسهلها والدنيا برد

طلعنا على كبري غمرة وطلبت منة ان يسير من خلال الحدائق مصر والسودان ونختصر الطريق لكنة قال شارع بور سعيد فاضى وهيخدها طيارة مرورآ بشارع الكبلات ونبقى فى الزيتون وكنت وقتها ساكن على الشارع فلم ارفض لانى كنت بجوار نادى 6 اكتوبر

يوجد منطقة بعد كبري غمرة بها تقاطع لسكة مزلقان قطار تسمى عزبة ابو حشيش وبعدها بأمتار قليلة نصل الى منطقة الشادر للسمك وكانت زمان مشهورة

كان يقف بعد المزلقان 3شباب منهم شاب بجلباب شاورو لصاحبنا وكان مبطأ السرعة لانة بيعدى المزلقان ونادو علية القصيرين ودى منطقة على طريق شارع بور سعيد فهدى العربة وقلت لة يا أسطى امشى انا مش عايز حد يركب طلع غبى جدآ قالي يابية دة الدنيا برد وهما دقيقتين ونعمل ثواب وف طريقنا معرفش انا وقتها هو بيرجع ريسينج مرش دير للخلف وانا ربنا الهمنى ان اضع ما بداخل سترتى داخل الشراب وفى لمح البصر تحركت ونزلت الى رجلى ودفست الفلوس والخاتم والحلق وباقى الفكة تركتها بجيب القميص وكانو لا يكملو 30 او 35 جنية وبعض جنيهات وانصاص وركبو الثلاثة فى صالون العربة البيجو التاكسي وبعد الانطلاق وصلنا الى محطة لم انساها بعد الشادر السمك لا يوجد الا عربات نقل والطريق لا يوجد بة عامود نور منير وظلام حالك وعندها سمعت صوت فتح لمطاوي وكانت من نصيب السائق مطواة على رقابتة وانا والحمد للة مثلة

وصوت اجش يطلب من السائق كل ما معة من نقود وساعتة وخاتم كان يزين بة اصبعة هههههههه

اما انا فكان الالهام الثانى من رب العباد .. انطقنى لكنى كنت اشعر بيد من يضع المطواة على رقبتى يدة ترتعش بصورة اهتزاز موبايل فأدركت انهم مبلبعين برشام او ضاربين ماكس

[ابو محمود]

كان السائق من هول المفاجئة تحول الى تمثال لا ينطق اما العبد الغلبان اللي هو انا فبطنى تحركت سريعآ بمغص وارتجفت لكنى فى نفسى قلت يا واد جرب الحيل ههههههههههههههههههههههههههههه قلت للسائق اية يا سكى ما تسمع الكلام اعطي الناس الفلوس ورحت عامل حركة رجولة جامدة ههههههههههههه ومطلع من القميص الكام ملطوش اللي هما 35 او 30 جنية بالفكة والدنيا ضلمة وربنا مشاها معايا ورحت بايس الفلوس وقلتهم حلال عليكو احنا شباب زي بعض الراجل السواق كان بيبص قدامة كانة تمثال ههههههههههههههههه راح قالب الشمسية ومطلع منها السبوبة بتاعة طول الليل وكانو كتير وقلع الساعة والخاتم وقالولو اركن يانهار ابوهم طين انا بصراحة كنت بفكر اول ما يقف انزل واجرى هههههههههههههههههههههههههههههههههههههههههه

بس لما لقيت المطاوي اتقفلت والعيال دول بيكلمو بعض على انهم هينزلو عند مصنع الحديد الظهر ومش عارف هو فين قولت في نفسى انت كدة يا حودة نفدت واثبت يا واد هتعدى ان شاء اللة بسلام

وحدث المطلوب وعدت ونزلو ولاد الحرمية والسواق لم يتحدث الا امام العمارة وكانت المفاجئة

نكمل بقى بعد الصلاة

[raouf]

يا مغامراتك يا ابو محمود

[الباشمهندس ياسر]

ام جو التشويق و الاثارة

ابو محمود مش هتقدر تغمض عنيك

[pink rose]

هو كل دا الصلاة ما خلصتش

انا قاعدة من 6 و نص الصبح مستنية المفاجأة

:protest: :protest: :protest:

[سقراط المصري]

القصة حلوة

انت بتختم القرآن بعد الصلاة

[hanzalah]

القصة حلوة

انت بتختم القرآن بعد الصلاة

قوموا ناموا جوه يا ولاد

وش صبحي ف وجهة نظر

:P

[ابو محمود]

تحياتى للجميع وهنا ارسل تحية خاصة للأخت الفاضلة فولانة

نكمل الحكاية

لم يتكلم السائق او يلتفت الي اطلاقآ بل كان يشبة انسان أخرس او كأنة خارج من دفنة

المهم وصلنا الى مكان النزول وعندها لم أجد فى الشراب اي فكة كل الاوراق النقدية من فئة ال100 جنية وهنا لابد من مكان للفكة ربنا يفكها على الجميع الراجل خارج من صدمة ولو شاف الفلوس كلها ممكن يقل عقلة ويعمل بنط مش كويس والدنيا ليل والشتاء قارص وشاهدت من بعد محل لعصير القصب لكنى استغربت الراجل دة فاتح لحد دلوقتى فى عز الشتاء شيء يدعو للدهشة قلت للسائق ممكن تستنى شوية لحد ما اطلع واجيب لك فلوس من البيت بصراحة الراجل كأنة مصاب بالصداع ولو حرك دماغة يتألم نظر الى فقط وعندها نزلت وقلتلة ثوانى يا اسطى هطلع وهنزل لك حالآ وذهبت الى محل العصير وكان الرجل يضع مايسمى بالبنك او المكتب بتاعة لتحصيل الفلوس على باب المحل أذآ يمكن للسائق ان يلمحنى عندما انحنى لأخراج الفلوس المهم قلت انا بقى حصل معايا كل دة وخايف السواق يطمع فى ما معى يواد يا أبو حنفى جمد قلبك ورحت نازل على ركبتى ومطلع الفلوس والخاتم والحلق ودفست الحلق والخاتم فى جيب السويتر والفلوس اخذت منها ورقة واحدة وحطيطهم جنب اخواتهم فى نفس الجيب وقلت للأخ الجالس على الكيس او صاحب المحل وكان شابآ لو سمحت عايز عصير برتقال على جزر وزجاجتين مياة معدنية ومثلهم غازية وأعطيتة ال100 جنية اام الراجل بغبوتة يرفعها فى النور علشان ال يعنى بيفهم فى المضروب هههههههههههههههههههه وثوانى والا صاحبنا بتاع التاكسى فى جوارى يا استاذ انت معاك فلوس أهو امال قولت للحرامية ازاي ان الفلوس بتاعتك كلها اديتهالهم

فضحكت وقلت لة بدون وعى علشان انت راجل نص كم ومسمعتش كلامى اهو اضحك عليك واتاخد منك السبوبة بتاعة طول الليل بصراحة انت صعبان عليا وممكن اديلك فلوس تعوضك ودة فعلآ ما كنت انوى ان افعلة لكن حدث ما لم اتوقعة ؟؟؟

تدخل صاحب محل العصير وقال ماهو الموضوع لان الراجل السواق كان باين علية فعلآ انة تعبان من الخضة ههههههههههههه وانا كمان كنت مذهول بس من ماحدث معى وان رقابتى كانت مرهونة بتصرفى لكنى حمدت الله على الالهام الذى لو حدث مرة اخرى فلا أدري كيف اتصرف ..

سمع الراجل صاحب محل العصير الحكاية فما كان منة الا ان نهر السائق وقالة انا لو من الاستاذ دة اضربك وما ديكش أجرة لان ممكن كان الراجل دة مدبوح بسبب غبائك وحدثت مشادة وكنت انا من يهديء الأثنين

وهنا طلبت من البائع اعطائى عشرون جنيهآ لأعطيها للسائق كى يمشى وطلبت لة كوب من البرتقال بالجزر لزوم الضيافة وأحساسي بانة يحتاج الى تهدئة اعصابة لكنة طمع وقالى عايز تعويض ربنا اكرمك وعديت بفلوسك فعوضنى بقى فضحكت وقلتة ماشى يا عم هديك نصف المبلغ اللي أخذوة منك فكذب وقال انهم اخذو منة 150 جنية فحكيت الحكاية من الاول بقى بكل تفاصيلها لصاحب المحل واصبح حكم فحكم بالطلاق هههههههه ان لو انا عوضتة بمليم واحد غير المتفق علية ابقى رجل طيب وعلى نياتى وعندها ادركت ان الطيابة ملهاش مكان مع الطمع ولازم السائق دة ينقرص علشان يحرم يعمل كدة تانى واصر الراجل ان يعطية ال10 جنية وحجز عندة الباقى وقالى بكرة تعالى خد الباقى يا بية وسيبك من الراجل المخرف دة بصراحة انا صعب عليا الراجل السواق لكنى ايقنت انة محتال ويريد ان ينتهز فرصة تعاطفى معة ويخرج بأي مكسب فتركت الباقى للراجل صاحب المحل وعرفتة انى ساكن بالعمارة اللي تبعد عنة 50 متر وشكرتة وطلعت وعندها سمعت الاذان يوذن لصلاة الفجر وانتهى درس كبير فى حياتى ان الله هو الستار وهو الملهم ولابد ان يعاقب كل من اهمل ومن هنا لا تأخذنى شفقة بمن يهمل قاصدآ ولا اتعاطف معه ابدآ وحي على الفلاح

انتهت حكايتى واريد ان ارى من يقص لنا احداث مرت بحياته كانت من الممكن ان تغير مجرى حياتة او تؤثر فى مشوارة مع الحياة وكيف يتصرف بحكمة فى التعامل معها

تحياتى للجميع .. محمود

تم تعديل 19 يناير 2012 بواسطة ابو محمود