إزاى تعكنن على مراتك ؟؟

[الدكتور ياسر]

نصايح غالية أيها الزوج العزيز

إزاى تعكنن على زوجتك الحبيبة ..

..........................................

الصبح وانت رايح على شغلك وهى نايمة تعمد اسقاط اى شيئ او خبط الباب بصوت عالى علشان تصحيها هى كمان .. اشمعنى انت ؟ ولو حاولت

ترجع تنام تانى قول لها مادام صحيتى حضري الفطار بقى

اذا كنت بتتفرج على التلفزيون وهى عايزة تغير القناة قولها معلش الحلقة دى مهمة جدا واحد صحبى شافها على القناة الفضائية وقالى ان الحلقة دى هى المسلسل كلة , ولو كنت بتتفرج على ماتش كورة هيبقى الموضوع اسهل و كل ما حد من اللاعبين من اى فريق يمسك الكورة قولها معلش ثوانى بقى انا حاسس ان الكورة دى جون حتى لو كان حارس المرمى ماسك الكورة والماتش واقف لان فى واحد مصاب

( ملاحظة : اغلب النساء ذو ثقافة كروية ضعيفة )

اصح يوم الجمعة بهمة ونشاط وجهز الافطار لزوجتك بس متنساش انك تستخدم 15 طبق واكبر كمية من الملاعق والشوك و 5 حلل من اللى عندكم فى المطبخ و 10 كوبيات لاعداد طبق بيض وسندوتش جبنة

طبعا يراعى ترك اثار سمنة على الارض مع ترك التلاجة مفتوحة وقشر

البيض فى الحوض

فى عيد ميلادها زينلها تورتة عيد ميلادها بخمسين شمعة ولو سألتك لية

خمسين رغم ان عندها 15 سنة بس ؟ اتحجج بضعف الاضاءة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء خفيفة

لو عملة ريجيم اجرى على السوبر ماركت ومحلات الحلويات واملى التلاجة شكولاتة وحلويات وجاتوهات و يراعى التجول وانت مستمتع بأكل الجاتوة امامها

متنساش رأيك فى طبيخها لو عاملة لحمة قول لها حلو اوووى الفراخ دى ولو طبخة بامية قولها جميلة اوى الملوخية دى حطة عليها اية يا حبيبتى ؟؟ ولو عملة كيكة قولها انا بحب اشرب شاى مع البسكويت الحلو دة

لو طلبت منك تنشر الهدوم قولها حاضر مع ابتسامة حانية وبعد ما تخلص نشر الهدوم ادخل عليها وقولها انا نازل اجيب الهدوم اللى وقعت منى فى الشارع ولو سألتك هو اية اللى وقع ؟ اذكر لها كل هدومها اللى كانت مغسولة مع فردة شراب من بتوعك علشان متبقاش مقصودة منك

لو الزوجة قررت مسح الارضيات فى البيت حاول انك تروح وتيجى على المناطق المبلولة متحجج بأنك محتاج تتصل ضرورى بواحد صحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية

لو كانت مشغولة فى نظافة البيت او مع الاولاد وطلبت منك تغسل كوبيتين الشاى بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوباية من الاتنين وهى مكسورة واسألها فى براءة ارمى دى فين ؟؟

وانت قاعد تتفرج على التلفزيون وهى طالع عينها فى تنظيف البيت وبعد ما تخلص وتيجى يدوبكك تقعد تستريح جنبك بصلها وقولها حبيبتى معلش ممكن كوبية مية علشان ضهرى بيوجعنى

:copied:

تم تعديل 12 يناير 2012 بواسطة الدكتور ياسر

[capitshino]

ده انتحار يا دكتـــــور bsh:)

[Dreamwithme]

ههههههههههههههههه طب حاجة ظريفة جدا يا دكتور

كلها حاجات بسيطة .....منتظرين إبداعاتكم الشخصية في حاجات أقوي من كده

أنا قاعدة ومستنية ....عايز شغل أكشن من تحت لتحت .....عايزة حرب باردة bsh:)

[elzahraa]

اول ما قريت الموضوع كان احساسي كدة md2: md2:

لكم بعد ما افتكرت قانون الخلع اتغير لكدة :Icecream: :Icecream:

خاصة ان المرأة ايضا عندها اساليبها السحرية للحرب الباردة

لكن للاسف ادم لا يقبل الهزار ابدا :protest:

و بيبقى رد فعلة مرعب :hang: gjy::

:protest: :protest: :protest:

تم تعديل 12 يناير 2012 بواسطة elzahraa

[عادل أبو عمر]

وديتنا في داهية يا أستاذ خليييييييييفة

[rewsha]

كلاكيت تاني مره

استعانا على الشقى بالله

نبداْ الشغل بقى bxg:: .............حتى في دي كمان هاتنافسونا (اقصد العكننه طبعا)

خدي عندك انتى وهيه

اذا كان جوزك في عز نومه وانتى مانميتش أو مش جايلك نوم

ادخلي الغرفه وولعي النوووور واطلعي بمنتهي البرود كأنك ماعملتيش حاجه angl::

ثانيا :وهوه بيتفرج على ماتش الكوره ومندمج قوي شغلي المايكرويف والمكنسه والسخان والسشوار وغلايه الميه بتاعت الشاي وعدد 2 تكييف علشان النور يعمل قفله ويقطع وهوه مايشوفش الماتش

ثالثا:لو هوه نايم العصر yaw: تعالي جنب باب غرفته وزعقي بصوت عالي وقولي للاولاد (يوووه بس بقى بابا نايم )

رابعا:اجعلي من يوم عطلته يوم التنظيف العالمي اقلبي البيت راسا على عقب وكأن بعض اعمال الحفريات تدور هنا او هناك.

خامسا: اكتبي قائمة طلبات محبوكة كل طلب فيها في مكان مختلف عن الاخر والافضل ان يكون متباعدا ولا تنسي ان تضيفي بعض الضروريات التي لا يخلو منها اي بيت واتركيه وحده يواجه مهمته المستحيلة.

سادسا: عاد من العمل متاخرا في المساء تعباااااااااان خالص ما ان يضع راسه على الوسادة وبمجرد ان يغمض عينيه وبمنتهى الرقة والحنان ايقظيه واطلبي منه ان يتاكد من اغلاق باب الشقة ومفتاح الغاز.

سابعا: ما ان يعتاد على اماكن وطريقة ترتيب خزانته واماكن ملابسه بدليها فورا فهذا التغيير المستمر بدعوى التجديد سوف يفقده اعصابه.

ثامنا: وانت ترتبين جواربه ضعي كل فردتين مختلفتين معا ومن الافضل ان تكون الوانهما متقاربة حتى لا يكتشف ذلك الا في الخارج بعد فوات الاوان.

تاسعا: لا مانع ابدا من استخدام فرشاة الشعر الخاصة به ولا تزعجي نفسك بازالة ما علق بها من شعرك

عاشرا:بمجرد ان تدخلي داخل السيارة الى جواره لا تترددي في تغيير وضع المراة لتعديل مكياجك والا فما فائدتها أذن

واخيرا :لااحد يعلم حتى الان سر تعلق الرجال بالريموت كونترول لذا على سبيل العكننة فقط ليس الا..يمكنك اخفاء الريموت كونترول او استبدال بطاريته باخرى قديمة المهم لا تتركيه يهنأ بها.

ها نقول كمان وله كفايه كده دلوقتي :tease:

تم تعديل 12 يناير 2012 بواسطة rewsha

[عادل أبو عمر]

هت نقول كمان وله كفايه كده دلوقتي

استهدي بالله يا روشة .. إحنا عاوزين نهدي الأمور

وعشان تتأكدوا إننا بنعمل الخير و بس نهديكم نصائح ذهبية لكل زوجة

ازاي تخلي زوجك يطير بيكي من الأرض ..

** عند التلفزيون **

من المعروف دايما أن البرنامج المفضل لدى الرجل هو مباريات كرة القدم , لذلك فإنه فرصه مناسبه لتحقيق أكبر قدر من رفع الضغط دون عناء كبير .... ممكن تقعدي وتعملي نفسك متابعه بعدين تصوتي فجأه وتقولي : يالهويييييييييييي نسيت الكيكة في الفرن وهيلا هوب من مكانك وبعدين اجري ناحية المطبخ وحاولي انك اثناء الجري تفصلي سلك التلفزيون برجلك

** عند النوم **

إذا كان نايم ومش حاسس بالي حواليه.. تعالي وبدون مقدمات خضيه خضة تخليه يقطع الخلف فيها ... وقولي له بكل برووود : انت نمت يا حبيبي

- لابأس من إضافه بعض من قطرات الماء في الأذن .

***وقت الخناقة ***

لو جالك يوم وفي راسك شر وعايزة تتخانقي معاه

جهزي الحاجات دي واعملي الي هقولك عليه

لمي شعرك كويس واربطيه او حطي عليه جل المهم

جهزي نفسك للجريييييييييي

جهزي مفتاح اوضتك وياريت يكون في جيبك على طول

طول ما انتي بتسمعي كلام واحد زيييي

لو بدأت المعركه حطي راسك براسه وماتبينيش انك خايفه وحمري عنيكي وقوليله اية انت فاكر اني مش ممكن ادافع عن نفسي يا روحي وبالرسية و اديلوا طخخخخخخخخخخخخ ........

ماتستسلميش اديلو بوكككككككس على عينة الاتنين علشان مايشوفش قدامو وخدي ديلك في سنانك وهاتك يا جريييييييي

وعلى طووووووووول لاوضتك اللي مجهزة مفتاحها من قبل كدا واقفلي على نفسك .. ويادار مادخلك شر...

بس نصيحه اقعدي يومين لايشوفك ولا تشوفينه لانه عايز ينتقم لكرامته ويوريكي النجوم مش في عز الظهر بس لا دة هيورهملك طول اليوم ...

طبعا يا عزيزتي

عرفتي دلوقتي ازاي تخلي الراجل يطيرك من الأرض .. أقصد .. يطير بيكي من الأرض

اسيبكو بقى تذاكرو الموضوع كويس

وتنفذو الي فيه بالحرف الواحد

وعلى فكرة أنا اعرف دكتور تجميل حلو اوي..

[Dreamwithme]

معجبة جدا بالمسار اللي أخده التوبيك ده

أبلتي روشة .... أستاذي عادل ...أحب أهنيكم وأشد علي أيديكم

هو ده الشغل ولا بلاش .... إديله ماترحموش

[سقراط المصري]

لا احنا عايزين افكار من واقع الحياة

خدو دي

وانت في الحمام بعد الدش المتين.. ماتتنشفش كويس... نص نص يعني

وبعدين اطلع من الحمام وانت لافف الفوطة حوليك وعمال تسقط مية على السراميك.... مروراً بالصالة وحتى حجرة النوم

هتلاقي مراتك بتصوت وتصرخ من المية اللي على الارض

ويمكن ربنا يكرمك... والمدام تتزحلق.... ودي تكون الجريمة الكاملة .... قضاء وقدر mf_p: mc: mc: bnd5::

[أبو يمنى]

ولو حاولت ترجع تنام تانى قول لها مادام صحيتى حضري الفطار بقى

الله يطمئن قلبك يا دكتور .

إذن ظاهرة عدم تحضير الزوجة للافطار ظاهرة عامة ، ولا داعي للشعور بالضيق بعد الان .

:)

تم تعديل 13 يناير 2012 بواسطة تامر حسن محمد

[se_ Elsyed]

ممكن اعكنن معاكوا ؟

بسم الله الرحمن الرحيم

- لو زوجتك حبت تعيش في دور فاتن حمامة في فيلم جلعوني مجرماً ورجعت انت ذات يوم البيت لقيتها متمكيجة وحاطه كولونيا أفتر شيف .. فلتكن أنت أيضاً على نفس الدرجة من الرومانسية وتقمص دور شكري سرحام في فيلم اللص والكلاب ( إنت اللص طبعاً ) وبصوت حاني رومانسي رقيق قول لها : إمشي إمسحي القرف اللي على وشك ده .. ده روج ده ولا شفايفك متعاصة طبيخ ؟

- وإذا فاجئتك الدرة المصونة و الجوهرة المجنونة .. قصدي المكنونة ونزلت فرتكت المصروف على شرا فستان سهرة أرجواني اللون وبترتر .... لا تتردد في إبداء اعجابك بتصميم الفستان وإنه هاياكل منها حته - بغض النظر عن ثمنه اللي هايقطم وسطك ويخليكوا تاكلوا بقية الشهر تونة وسلمون - وقل لها بمنتهى الأعجاب : الله ... فستان جميل جداً ... ده كستور يا حياتي ؟

- إذا كان هذا يوم التنظيف .. وأستغرقت الزوجة يومها في ترتيب الشقة وتسييء الأرض وطبخ ما لذ وطاب وكوي ملابس الاولاد وملابسك إنت كمان وحل الليل والظلام الدامس وأصبحت جثة هامدة ورجعت إلى البيت من المقهى وش الفجر حيث كنت تسهر مع اصدقاءك وعند دخولك الشقة وجدتها تغط في النوم وشخيرها جايب اخر الشارع ... قم بإحضار البيلادوس - اللمبة القوية اللي بيستخدمها الميكانيكية عشان يشوفوا وهما بيشتغلوا - ووصل الفيشة وأمسك البلادوس ووجهة نحو وجهها ... وأزغدها في جنبها وقل لها بحدة : أنا نفسي هافاني على الملوخية ... قومي شوحي لنا حتتين لحمة وأعملي حلة ملوخية كبيرة .... وتكون محضر لها مفاجأة وهو إنك جايب معاك 4 حزم ملوخية خضرا لازم يتقطفوا ويتطبخوا وما يباتوش لحد الصبح .

- لا تنسى ان تعامل اهلها بلطف .. فإذا أتصلت والدتها لتقول لكم أنها ستأتي لتزوركم غداً .. فهلل مرحباً وقل لزوجتك الحنونة : هي الولية دي مش لسه كانت عندنا في عيد العمال اللي فات ؟

[se_ Elsyed]

إذا أصرت الزوجة على تخصيص يوم الثلاثاء الأخير من كل شهر في الخروج للتنزه .. حاول تخليها تكره حياتها وتكره لحظة الخروج من المنزل وضع خطة محكمة ما تخرش الميه ولا خطط المجلس السمكري وذلك عن طريق رشوة كل من :

- الشحات اللي بيقف دام البيت وبيلزق في عربيتك كل ما تيجي تركب .... منادي السيارات اللي شايل الفوطة طول النهار بيوسخ العربية ... الكاشير اللي بيقطع تذاكر السنيما ... الجرسون اللي بيقدم الطلبات في الكازينو اللي على النيل ... بتاع الحلبسة لو نفسها هفتها على حاجه حراقه وإنتو ماشيين على النيل ..

وخلي كل دول أول ما يشوفوك معاها يقولوا لك " ربنا يخلي لك والدتك يا بيه ويديها الصحة "

والله الموفق

[se_ Elsyed]

والان مع فقرتك المفضلة ومذيعكم الحبوب " سين سين " ومزيد من الأفكار المهببة للعكننة المسبكة على الزوجة المتسهوكه

- من وقلت لاخر لابد ان تُدخل السرور على زوجتك عن طريق الدعابة الخفيفة ...

مثلاً .. إدي الواد حماده إبنك رشوى قد 50 جنيه يجيب له بهم قزازتين بيره على عرنوسين بانجو مقابل .. ان يأتي من المدرسة ذات يوم وأثناء جلوسكم على الطبلية لتناول وجبة الغداء دعه فجاة يصيح ويقول " على فكرة يا بابا ... مس إنشراح بتاعت الإنجليزي قالت لي النهاردة : قول لي يا حماده .. هو الشاب الحليوة الامور اللي كان معاك في إجتماع اولياء الامور بتاع أول امبارح ده .. اخوك ؟ فقولت أستهبل عليها يا بابا وقولت لها : ايوه يا مس ده اخويا الكبير هيثم .. فقالت لي : طب هو متجوز ؟

وحاول تخلي حماده يجري بسرعة يستخبى في اوضته وأحمي إنت ضهره وأياك تخليها تتعرض له او تفتك به

[se_ Elsyed]

حاول ان تكون دائماً حمامة سلام للإصلاح بين زوجتك وصديقاتها من الجيران ..

مثلاً مثلاً : وإنت راجع من الشغل إفتح الباب وروح قافله بحركة دابل كيك برجلك وإنت بتنفخ وتبرطم وتشتم ... فعندها ستسألك زوجتك الحبيبة : مالك يا أبو مجدي خير كفالنا الشر ؟ فقل لها بمنتهى الغضب : عالم ما عندهاش دم ولا خشا ومش سايبين حد في حاله ... لسه داخل يا ختي من باب البيت إلا والاقي الوليه صاحبتك اللي عامله حبيبتك " جمالات مرات الأسطى سيد كراويه " واقفة في البلكونة وعماله تكلم صاحبتك التانية " فتحيه مرات المعلم حسونه العضل " وبتقول لها : ما لحظتيش يا فتحيه إن الوليه ام مجدي تخنت قوي اليومين دول وبقت عامله زي شوال البطاطس ؟ راحت فتحيه ردت عليها وقايل لها : أي والنبي ياختش وأنا أققول البطاطس شاحه من السوق ليه اليومين دول .

واترك الباقي على الله ونم قرير العين .

[se_ Elsyed]

كفايه كده دلوقت لحد ما الاقي أفكار شريرة اخرى تستحق النشر

[Abu Reem]

كده بردة يادكترة

وانت ياسي السيد

خيبت املي فيك

هي دي الرجالة بعد ثورة 25 يناير

عاوز تعكنن على مراتك

..............

@@@@@@@

!!!!!!!!!!!!!!!!!!!!!!!!!!!!!!!

تتجوز عليها. على طول

ايه الرومانسية اللي انتوا فيها دي

ده انتوا عار على البشرية !!!!!

تم تعديل 13 يناير 2012 بواسطة Abu Reem

[pink rose]

كده بردة يادكترة

وانت ياسي السيد

خيبت املي فيك

هي دي الرجالة بعد ثورة 25 يناير

عاوز تعكنن على مراتك

..............

@@@@@@@

!!!!!!!!!!!!!!!!!!!!!!!!!!!!!!!

تتجوز عليها. على طول

ايه الرومانسية اللي انتوا فيها دي

ده انتوا عار على البشرية !!!!!

يبقى انت كده عاوز السواطير و الاكياس السودا ترجع تاني يا ابو ريم

مش عارفه انا ايه الناس اللي عاملة زي الدبور بيزن على خراب عشه

استمروا استمروا

smk: smk:

[rewsha]

كده بردة يادكترة

وانت ياسي السيد

خيبت املي فيك

هي دي الرجالة بعد ثورة 25 يناير

عاوز تعكنن على مراتك

..............

@@@@@@@

!!!!!!!!!!!!!!!!!!!!!!!!!!!!!!!

تتجوز عليها. على طول

ايه الرومانسية اللي انتوا فيها دي

ده انتوا عار على البشرية !!!!!

ههههههههههههه

معلومه خطاْ يا ابو ريم

هوه انت لما تتجوز عليها تبقى بتعكنن عليها؟

انت كده بتجننها

وما ادراك الست لما بتتجنن بتعمل ايه

(ليس على المجنون حرج)

.

تم تعديل 13 يناير 2012 بواسطة rewsha

[Abu Reem]

يبقى انت كده عاوز السواطير و الاكياس السودا ترجع تاني يا ابو ريم

مش عارفه انا ايه الناس اللي عاملة زي الدبور بيزن على خراب عشه

انت كده بتجننها

وما ادراك الست لما بتتجنن بتعمل ايه

(ليس على المجنون حرج)

شايفيين يا افندية.... العكننة اللي بتخلي السواطير تطلع...واالجنان يشتغل

مش تقولي ملوخية بالضفادع

وانا من هذا المزنأ قصدي من هذا المنبر

اطالب بان تكون الجمعة القادمة هي مليونية

" الزوج يريد يتجوز عالمدام"

[رضوي]

قال كيف تعكنن على زوجتك قال

هههههههههههههههههههههه

هى الرجالة ماتعرفش إن النساء واخدة كورسات في النكد ؟؟؟؟؟؟؟ وبعض السيدات معاهم دكتوراه

نصيحة أخوية بلاااااااااااااااااش احسن تبقى جنيت على نفسك وماحدش يقدر يطلعك من اللي هتبقى فيه

بس عندي ملاحظة بسيطة ............ بنلاقي ان الرجالة اللي زوجاتهم طيبات هما اللي بيفكروا ينكدوا علي زوجاتهم

لكن الراجل اللي متجوز ست مفترية ولا بيقدر يعيني يفتح بوءه ولا ينطق ولا حتى يتجرأ ويهزر

:protest:

ومن هنا بوجه دعوة لجميع الزوجات وكل المقبلات على الزواج لحضور ندوة أبلة شكرية وعنوانها كيف تكوني زوجة نكدية مفترية

بس بجد موضوع رائع ودمه خفيف