إمتثال ... فى ذمة التاريخ

[عصام]

تعرضت إمتثال .. سيارة "ابن مصر" الشهيرة .. إلى حادث أليم أودى بحياتها ..

آه والله الحمد لله .. حياتها هى بس حيث أصبح من الممكن - وبكل بساطة - حملها فى "شنطة بلاستيك" ..

يبلغ طولها النهائى بعد الحادث حوال 0.75 متر !!..

وقع الحادث أثناء غياب "ابن مصر" خارج حدود المحروسة لآداء العمرة بواسطة السائق الخاص للسيارة .. حيث "نــــــام" أثناء القيادة مما نتج عنه ارتطامه على سرعة قدرها المهندس الخبير المنتدب من النيابة للفحص بـــ 170 كلم / ساعة بدون استخدام الفرامل .. <_<

وسأترك لخيالكم تصور حال السيارة والسائق .. stnd::

الخسائر:

1. سيارة كاملة ماركة هوندا سيفيك موديل 87 معروض عليه شرائها على وضعها الحالى بـــ 6000 جنيه مراعاة لظروفه وعطفا عليه ..

2. شرخ فقط (وهذا من رحمة الله) بالساق اليسرى للسائق مع جروح متفرقة بالوجه

3. أحد أعمدة الإنارة + القاعدة الخرسانية المثبت بها

هذا وقد لطف الله بالجميع حيث كان السائق متوجها إلى بيت "ابن مصر" لتوصيل بناته للمدرسة ..

نتوجه بالعزاء فى الفقيدة إلى "ابن مصر" متمنين من الله أن يعوضه خيرا منها وراجينه أن يلطف بنا فيما جرت به المقادير ..

تم تصوير السيارة (أو ما بقى منها) فيديو وسنوافيكم بالصور فى أقرب وقت ..

[فــيــروز]

وقع الحادث أثناء غياب "ابن مصر" خارج حدود المحروسة لآداء العمرة بواسطة السائق الخاص للسيارة ..  ..

الحقيقه انا استغربت ان ابن مصر جايب سواق لامتثال stnd::

على اعتبار انها خلاص قربت تطلع معاش وشكل السواق فيها يبقى غريب شويتين <_<

بس اما كملت قرايه قلت آه كده معقول stnd::

معلش يا ابن مصر العربيه دى الصراحه عملت حوادث كتيره .. و بركه انك خلصت منها .. ربنا يكرمك باخلاص :lol:

[Ahmed Mohsen]

مش لاقي كلام أقوله ........

بس بجد الحمد لله إن السواق بخير ....

قدر ولطف الحمدلله ........

مش مهم إمتثال ...... تتعوض ....... المهم البني آدم

بس يا تري يا ابن مصر حاتعمل إيه في السواق لما ترجع؟؟؟؟؟؟؟؟؟

بما إنك حاتبقي لسة راجع من العمرة وتغمرك النفحات الإيمانية من هناك أحب أفكرك بــ ......

"العفو عند المقدرة"

[عصام]

"العفو عند المقدرة"

أول ما فعله ابن مصر وقبل أن يستريح من السفر قام بالاتصال بالسائق واطمئن عليه وعرض عليه المساعدة بنية خالصة وقلب صافى .. هذه شهادة لله وللتاريخ <_<

[Ahmed Mohsen]

"العفو عند المقدرة"

أول ما فعله ابن مصر وقبل أن يستريح من السفر قام بالاتصال بالسائق واطمئن عليه وعرض عليه المساعدة بنية خالصة وقلب صافى .. هذه شهادة لله وللتاريخ <_<

stnd:: stnd:: :lol: lo:: lo::

[Cleo]

قدر الله وما شاء فعل....

عسى الله أن يبدله خير منها...

وألف حمدلله على سلامة الجميع <_<

[se_ Elsyed]

إنا لله وإنا إليه راجعون ..

والله إمتثال كانت أعجوبة من اعاجيب السيارات وكنت حاسس إن في علاقة حُب بينها وبين إبن مصر وكان بيعاملها زي بنت من بناته ومروشها وبيسمعها أغاني اجنبي على شوية شبابي ...

بس انا صعبان عليه التكييف بتاعها .. كان ما شاء الله زي الثلاجة ...

اما عن ياسر السواق فالحمد لله إنه سليم ... حد يمشي 170 يا مفتري وفي مصر .... انا من ساعة ما ركبت معاه وانا شاكك فيه.

ربنا يعوضك خير يابو إنجي وفعلاً الحمد لله إنك إتخلصت منها ... روح هات لك واحده شيري أو حاجة كورولا بالتقسيط ...

[إبن مصر]

فقدت دنيا السيارات وفقدت ماركه الهوندا بل وفقدت الانسانيه كلها هوندا من اقوى الهوندانات...

ومن ارق الهوندانات...

ومن اشجع الهوندانات..

وهذه المرثيه لها قبل ان تذهب الى مثواها الاخير والذى بالمناسبه لا اعلم ما هو..........

يا صغنونه يا صغنونه..يالى بتمشى نونه نونه

ياما ركبتك واتريقت.. وانت اصيله ومش مجنونه

يا صغنونه

لما لبستى فى المقطوره.. قالوا عليك بقيتى بسيسه

ما استحملتش انى ابيعك.. اصلك هاديه قوى وحسيسه

يا صغنونه

لما التاكسى خدك بالحضن..وانت واقفه ساكته مكانك

قلت حسدوك يا غاليه..و النحس معمول علشانك

يا صغنونه

بس اللبسه فى عمود النور.. وكمان الواد المذهول

وانك تبقى كماالحصاله ..وهو تايه كده علطول

ويقول كل اما اشوفه.. وعينيه الاتنين مذاهيل

النداهه ندهتنى.. وخلت الشارع يميل

ويجيبوه من اخر الشارع ..وهو بيصوت ويقول

زر البطاطا يا وله خدوه ..وادونى بداله الفول

يبقى العيب فيك انت والا ..فى عنين عزالى؟

والا فى سواقى المهمل.. ولا فى الشارع الطوالى؟؟؟؟؟؟؟؟

يا صغنونه يا صغنونه...يالى بتمشى نونه نونه

اهىء

اهىء

بجد cld:

[فــيــروز]

شد حيلك أمال cld: العوض على الله fty::

[Lighthouse]

ربنا يعوض عليك

والحمد لله اللى جت في العربية واسرتك وانت بخير والحمد لله

المال يتعوض

:) :) rs:

[yasovinas]

ابن مصر الغالي

كل اخواتك من ابناء مصر بيعزوك ويوسوك في الفقيده الغاليه

وطبعا السيارات القديمة دي مش هتتعوض ولا بكرولا ولا سيفك جديده بس ايه رايك عندي ليك حتة نيسان صني موديل 97 اوتوماتيك بس حكايه

[ابو يوسف]

البقاء لله يا ابن مصر !!!

دووووووونيااااااااااااااا

[أنـفـــال]

معلش يا ابن مصر..

معلش..

لا دايم الا الله..

و على فكرة انا مش هاسكت..

انا هاتفق مع 3 او 4 شعراء يعمولوا لها حفل تابين..

و بس ياريت تبعت لي صورة للفقيدة..

عشان نعمل حفل تأبين تستحقه..

و ماتزعلش يا ابن مصر..

كلنا امتثال..

أنفال

[c'est la vie]

كم هو صعب حقاً ان تفقد "شيء عزيز" ..

امر فعلاً بحاله من الحزن عند فقدان اشياء طالما استخدمتها وفقدتها او اتلفها الزمن ..واجد صعوبه شديد في التعود علي غيرها..

ولكن عسي الله ان يخلف لك خيراً منها--انا لله وانا اليه راجعون :blink:

[ragab2]

البقاء لله

جت سليمة

والحمد لله أن الحادث أصاب الحديد فقط

[se_ Elsyed]

كام إستفسار بسيط قبل ما أجيب المقرئين وألم الناس من على القهوة وأجي اعزي ...

1- المفروض نلبس إيه وإحنا جايين .. يعني نلبس اليونيفورم بتاع السواقين .. ولا هدوم السايس اللي بيمسح العربيات ونجيب جرادل معانا ؟

2- العزاء هايبقى رسمي ولا على الضيق ( عائلي يعني ) يعني هاتعملوه في سوق مدينة نصر بتاع العربيات وتبقى حاجة الناس كلها تحكي عنها وتتحاكى .. ولا عندكوا في الجراج تحت العمارة ؟

3- بالنسبة للمشاريب اللي هاتتقدم ... هاتبقى قهوة سادة ولا هاتشربونا زيت موبيل ؟

4- النعي بقى ده عليه انا .. كل مجلات السيارات والتوكيلات وحتى الإنترنت سايت بتاعت السيارات هاتعرف بالموضوع ..

إمتثال كانت غالية علينا ولازم يتعمل لها حاجة تليق بمقامها ... ومعليش ربنا يعوض عليك .. واللي خلف مامتش وأظن إن في عندك لسه فردة كاوتش ممكن كل ما تبصلها تفتكر والدتها إمتثال ...

بس كل اللي طالبه منك يابو إنجي إنك تبقى قوي ومتماسك كما عودتنا في البلاوي والحوادث اللي كنت بتعملها قبل كده وكانت إمتثال مستحملاك ...

[disappointed]

إنا لله و إنا إليه راجعون

تنعى عائلة "هوندا"الحاجّة / إمتثال سيفيك التى إنتقلت إلى رحاب الله إثر حادث أليم عن سعة لتريّة تناهز الــ1600 سى سى

و الفقيدة هى إبنة الحاج " هونداوى" و المرحومة "سى.آر.إكس" وشقيقة السيّد / بديع "ليجانت" والسيّدة / إعتدال "أكورد" و والدة الآنسة / إفتخار "سيتى" و بنت عم السيّدة / جمالات "إتش . آر. فى" و بنت خال الآنسة / جليلة "سى.آر.فى" و نسيبة السيّدة / عظيمة "إم.آر.فى"

و تتقدّم عائلة الفقيدة بالشكر الواجب للسفارة اليابانيّة و الوكيل المعتمد و شركات الشحن الذين قاموا بالعزاء بالبرق و الهاتف, كما تشكر جميع الميكانيكيّة و السمكريّة و الكهربائيّة الذين تفانوا فى علاجها من رحلة مرضها الطويلة

و سيتم مواراة جثمان الفقيدة فى مقبرة السيّارات بعد تسليم لوحاتها المعدنيّة لأسرتها

للعزاء :

سينما السيّارات

سوق مدينة نصر

معرض المصرية للسيّارات

إخوان غبّور-المكتب الرئيسى

للفقيدة الرحمة و لمالكها الصبر و السلوان

[yasovinas]

محبط نعي شيك ولا احلى من كده اهنيك md2: :angry:

[disappointed]

مبارك يعلن الحداد الرسمى لمدّة 3 أيّام فى جميع الوزارات و المصالح و الدوائر الحكوميّة على روح الفقيدة / إمتثال سيفيك

سوزان مبارك تفتتح أعمال مؤتمر "كلّنا إمتثال" لتأبين الفقيدة

طلبات إحاطة من نوّاب المعارضة فى مجلس الشعب لفتح تحقيق حول ملابسات مصرع الفقيدة

جموع الشعب الحاشدة و كافة القوى "المروريّة" تبايع الآنسة / إفتخار "أكورد" لخلافة والدتها مدى الحياة

أحد محبّى الراحلة وهو منهار فى موقع الحادث الأليم

[disappointed]

كوفى عنان يدعو "إبن مصر" لضبط النفس فى ختام الجلسة الطارئة لمجلس الأمن

إلى جنّة الخلد يا إمتثال

بقلم / جلال دويدار

عندما يصل عمرالسيّارة التى يمتلكها أحد أفراد طبقة المستنيرين أرذله و تتعدّى الــ17 عاما دون أن تسمح له إلتزامات الحياة الصعبة بأن يقوم بتحديثها بسهولة و يسر و دون عناء, فإن فى هذا أكبر إدانة لهذه الحكومة

أحمد رجب

تم تعديل 29 نوفمبر 2004 بواسطة disappointed