مميزات عصر مبارك

[sad_swing2000]

إخواني و أخواتي ، السلام عليكم

أنا فاتح الموضوع ده مخصوص لزوم التفاؤل و تغيير الصورة السودة اللي إحنا فيه ، اللي يشوف المواضيع المفتوحة يتهيأله إن مصر عبارة عن خرابة مش أكتر ، شوف آخر موضوعين

هل تقبل ان تكون وزيرا فى عهد حسنى??

أو

نعم يا مبارك ...وألف نعم ونعم من القلب

هنلاقي هجوم قوي على العصر الذي نعيشه ، و شرح وافي و قرف من الوضع.

كفاية تشاؤم بأه ، و خلونا ندّي للتفاؤل أي مساحة.

إنت في رأيك إيه مميزات عصر مبارك؟ (أنا مش تبع أي حزب - خصوصا الوطني)

[فــيــروز]

ازززززززززهى عصور الديمقراطيه <_<

لا من غير هزار

زمان كان فيه طوابير .. على كل شئ طوابير .. وكانت الميه عندنا بتقطع كتير .. وكذلك النور .. حتى وقت قريب كانت هذه الظواهر قد اختفت .. يعنى كان بقالنا زمن ماشفناش حد واقف فى طابور عيش ولا شكاوى من انقطاع المياه ..

[Ahmed Mohsen]

كلمة حق يجب أن تقال ..... تم حل الكثير من مشاكل المرور والإزدحام المروري خصوصا في الأربع سنوات الأخيرة مع التسليم بالطبع أنه مازال هناك عيوب .......

العديد من المناطق والشوارع لم يكن أحد يجرؤ مجرد التفكير في الذهاب إليها بالسيارة ...... هذا لا يحدث الآن

أقطع يوميا الطريق من الهرم (محل سكني) إلي مساكن شيراتون (مكان عملي) في مدة تتراوح بين 30 دقيقة و45 دقيقة

أعتقد مشوار مثل هذا في الماضي كان لا يستغرق أقل من ساعة ونصف.

[sad_swing2000]

.. يعنى كان بقالنا زمن ماشفناش حد واقف فى طابور عيش

بجد ؟؟؟!!!!!!!

ليه ؟؟؟؟ فين الكلام ده !!!!!!!!

إحنا بنقول مميزات حقيقية مش تريأه <_<

[فــيــروز]

مانا باتكلم جد <_<

لغاية سنتين تلاته فاتوا كان موضوع طوابير العيش ده اتنسى خالص .. ومابقاش فيه طوابير على الجمعيات !! يمكن لان الجمعيات نفسها اختفت stnd::

[homer]

لم يقصف قلم

ما هو طفشان قال الماتش متباع

[mb14]

حقيقة الموضوع كويس

انا مش حزب وطنى ولا غيرة بس حاقول حاجة :

1-مصر هى ثقل الشرق الاوسط وكل القوى الكبرى بتنظرالى مصر وهى تعتبرفى المجال الحيوى لأى قوة كبرى .لو مصر قوى كبرى اقتصادية او عسكرية تعتبر خطر علي مصالح القوى الكبرى وتم ادراك ذلك منذ ايام نابليون وبعد ذلك محمد على .

لذلك اصبحت سياسة اى حاكم لمصر محكومة بهذه الحدود حتى عبد الناصر عندما خرج عن هذه الخطوط تم ضرب مصر بموافقة جميع القوى الكبرى بما فيها الاتحاد السوفيتى فى1967

لذلك بصرف النظر عن السياسة الخارجية لمصر يعتبر عهد مبارك معقول جدا وله انجازات كبيرة جدا ولكن مع التركيز على السلبيات لاتظهر .

بعض الناس يقارن مبارك ب مهاتير محمد

طبعا المقارنة ظالمة لان مبارك يقع تحت تاثير المجال الحيوى الامريكى "هذا يتوجب علية حروب اقتصادية غير معلنه" .لكن مهاتير محمد فى مجال ا لحيوى لليابان والصين ودول كانوا عايزين يساعدوه لان اغلب الرأس المال الماليزى مع الاقلية الصينية واليابان لانها كانت له علاقات جيدة جدا جدا مع رجال الاعمال اليابانيين لذلك الدولتين ساعدوة اقتصاديا وعلميا .

عهد مبارك مقارنة بعهد السادات وعبد الناصر انه فية مساحة حرية معقولة جدا لدرجة ان بعض الناس بتقول دلوقتى لأ للتجديد دى بصرف النظر عن لا للتوريث ولغاية دلوقتى ما تسجنوش او راحوا مستشفى المجانين زى العصور السابقة .

لا شك فية سلبيات بس خلوا بالكو ما حدش حايعرف التفاصيل الا اللى فى مطبخ الاحداث .

[sad_swing2000]

طيب و إيه رأيكم في شبكة التليفونات دلوقت ، أعتقد إنها هايلة بالرغم من ارتفاع أسعار الفواتير

[Lighthouse]

الحقيقة صحيح التليفونات انتشرت بشكل كبير

لكن عيبها الوحيد الفواتير الهلامية الجهنمية اللى بندفعها من اللحم الحي

لكن وللحق

النور مابقاش بيقطع زي زمان

المية لسه فيها مشاكل لكن تغلبنا عليها بالمواتير

ياللا

خلينا ندفع كهربا كتير :rolleyes:

[se_ Elsyed]

أهم ميزة هي مترو الأنفاق اللي عملناه بالمعونة الفرنسية ... بيتهيألي لولا المترو كان زمان في مصر كل يوم في ضحايا بالألوفات بسبب الناس اللي بتقتل في بعضها من الزحمة..

[Seafood]

ما تتحدثون عنه من كهرباء وتليفونات وإختفاء طوابير, هي على الأكثر إنجازات دائرة في وزارة , ولن أقول وزارة , وهي بالتأكيد لا ترقى بحال من الأحوال لأن نعتبرها مميزات حاكم ..

فالحكام تقدر مميزاتهم بما يقدموه لأمتهم من مشاريع تعتمد على فكر الحاكم ورؤيته المستقبلية , مشاريع تأثر بالإيجاب ولأجيال عديدة قادمة .. كما حرر إبراهام لينكن العبيد في أمريكا مثلاً ..

وفي هذا الصدد فجميع حكام مصر منذ عهد الثورة نصيبهم من ذلك هو سالب , فأقصى ما فعلوه أنه قدموا مشاريع تعتمد على فِكر أعوج أثر بالسلب على الأجيال المتتابعة وعلى مصر كدولة ..

إبتداءاً من مشروع الملهم للقومية العربية والجعجعة الصوتية , والذي كان من نتيجته أن تفكك العرب بدلاً من أن يتوحدوا وهزمنا في كل حرب ( غير صوتية )خضناها .. ومروراً بمشروع الإستسلام للهيمنة الأمريكية الذي قدمه السادات عليه من الله ما يستحق , والذي من نتيجته أننا أصبحنا دولة بلا وزن في المنطقة , وإنتهاءاً بمبارك الذي قدم مشروعه القائم على سياسة " لا تهش ولا تنش عشان ما تتنشِش " .. والذي جعلنا دولة لا طعم لها ولا لون ..

[homer]

الحقيقة الحقبة الاخيرة كانت حافلة بالمشروعات القومية من العيار الثقيل

1- حد فاكر مشروع الألف يوم؟

2- توشكى

3- حديد اسوان

4- شرق التفريعة.

أما مشروع المشاريع أرتف بالفلورين فكان مشروع تعمير الصحراء والذى يدل على سياسة عمل الدولة من ايام سعد زغلول : كلام فى كلام وادى اللى بناخده

عايزينها تبقى خضراء

الأرض اللى فى الصحرا

تبقى ايه خضرا

هيه ايه

الصحرا

نقول كمان؟

تقوم الحكومة باطلاق المشروع من دول لأهداف سياسية ومن دون أى جدوى اقتصادية ولا استشارات ولا دياولو تماما مثل مشروع توشكى الذى خرج علينا من غير احم ولا دستور ولما سالنا عن الجدوى قالوا موجودة وتمام طب نشوفها لأ عيب انتوا مش مصدقين.

ويتلقف المطبلاتية الخيط وهاتك يا تهليل وتأييد هستيرى يغيب معه العقل ويتهم فيه الرأى المخالف بأنه من أعداء النجاح ويطلع سمير رجب يحط اية قرانية فى عموده "ويمكرون ويمكر الله والله خير الماكرين" - والنتيجة حالة غسيل مخ جماعى والتغنى بانجازات وهمية تمت كلها فى ماسبيرو على غرار انجازات الثورة التى حققها عبد الحليم وصلاح جاهين

وأنا بدورى أقول لهم "ان هذا لمكر مكرتموه فى المديتة لتخرجوا منها أهلها"

نقول ايه بس حسبنا الله ونعم الوكيل

وادينا مشينا وسيبناها لكم خضرا

هى ايه الصحرا

[Mohammad Abouzied]

مشكلة حسني مبارك كل مشاريعه لها وجه عسكري استراتيجي وكل الي يهمه الاستخدام المزدوج

يعني مترو الانفاق صمم ان يكون ملجأ لسكان القاهرة في حالة اي هجوم نووي عليها

مفيض توشكي صمم لسحب مياه نهر النيل في حالى ضرب السد العالي لتجنب غرق مصر

حتى الاهتمام بشبكة الاتصالات والاقمار الصناعية وتعدد القنوات اصلا صممت لتقوية شبكة الاتصالات اثناء اي حرب قد تنجر لها مصر

التوسع في المدن الجديدة لمنع التكدس في المدن الرئيسية لتوزيع السكان على اكبر مساحة ممكنه في مصر حتى يصعب ابادتهم بأي سلاح للدمار الشامل

المشكلة عمل كل هذا ولم تحدث حرب فعلا حتى يظهر فوائد هذه الافعال بل اكثر من ذلك دائما يكون حريص على عدم الانجرار الى اي حرب ، فهل هذا خوفا على ابناء مصر ولا الخوف من انقلاب الشعب عليه اذا انجر لحرب وخسرها

[Lighthouse]

مشكلة حسني مبارك كل مشاريعه لها وجه عسكري استراتيجي وكل الي يهمه الاستخدام المزدوج

يعني مترو الانفاق صمم ان يكون ملجأ لسكان القاهرة في حالة اي هجوم نووي عليها

الحقيقة اول مرة اعرف الوجه الاستراتيجي للمشروعات دي :o

بس مش غريبة يعني ان مترو الانفاق نفقه يتصمم ليكون ملجأ نستخدمه وقت الحرب وافتكر اخر مطر نزل على مصر الشتا اللى فات كانت مهزلة ملجأية بحتة ونفق المترو اتملا مية :rolleyes:

يمكن بقى ح يعملوه ملجأ ويغرقونا فيه mf(

[راضي]

مشكلة حسني مبارك كل مشاريعه لها وجه عسكري استراتيجي وكل الي يهمه الاستخدام المزدوج

يعني مترو الانفاق صمم ان يكون ملجأ لسكان القاهرة في حالة اي هجوم نووي عليها

مفيض توشكي صمم لسحب مياه نهر النيل في حالى ضرب السد العالي لتجنب غرق مصر

حتى الاهتمام بشبكة الاتصالات والاقمار الصناعية وتعدد القنوات اصلا صممت لتقوية شبكة الاتصالات اثناء اي حرب قد تنجر لها مصر

التوسع في المدن الجديدة لمنع التكدس في المدن الرئيسية لتوزيع السكان على اكبر مساحة ممكنه في مصر حتى يصعب ابادتهم بأي سلاح للدمار الشامل

أفلح إن صَدق

:rolleyes:

[Mohammad Abouzied]

جميع الدول الصناعية الكبرى لديها مترو انفاق ومجهز ليكون ملجأ في حالة الضربات بالفنابل النووية ودا شي معروف

وعند دراسة بناء هذا المشروع من عشرين سنة تقريبا ، اعترض كثيرين من الوزراء عليه من حيث التكلفة العالية والتي ممكن تجهيز وسائل اخرى وبناء مدن جديدة مجاورة للقاهرة بقيمته لحل مشكلة الاسكان ولكن حسني مبارك اصر على عمل المشروع وقتها والذي نفذ تقريبا كا مثيلة الموجود في اوكرانيا حيث كان يدرس حسني مبارك هناك وانا سبق اني استخدمته عدة مرات وقام صديق لي اوكراني بشرح كامل لمشروع المترو كما وضح لي كيف يتم قفل مخارج المترو بأبواب مغلفه بالرصاص وقت حدوث اي هجوم نووي

وفعلا لاحظت التشابه الكبير بينه وبين المشروع المنفذ حاليا في مصر

[Tafshan]

لم يقصف قلم

ما هو طفشان قال الماتش متباع

ما حدش ليه دعوه بحسني حبيييييبي :rolleyes:

الراجل ما خلاش : اشي فقر و اشي جهل و اشي طوارئ... و ما تنسوش انجازاته :

توشكى مثلاً .. حد ينكر ؟؟ خلت الجنيه خمسين ساغ :o

و اخيراً : وش الخير .. جابلنا في العيد السنه دي سوربريز تجنن ...

جراد يا حسني ؟؟ احنا ناقصين ؟؟؟

يعني الاخضر و اليابس ؟؟

يا جماعه سيبكم منه و تعالوا ندور لنا على بلد و نسيبهالوا ...

وما تنسوش .. لو السنه دي عيد مبارك ... ممكن السنه الجايه نغني و نقول يا جمال العيد

[achnaton]

مشكلة حسني مبارك كل مشاريعه لها وجه عسكري استراتيجي وكل الي يهمه الاستخدام المزدوج

يعني مترو الانفاق صمم ان يكون ملجأ لسكان القاهرة في حالة اي هجوم نووي عليها

مفيض توشكي صمم لسحب مياه نهر النيل في حالى ضرب السد العالي لتجنب غرق مصر

حتى الاهتمام بشبكة الاتصالات والاقمار الصناعية وتعدد القنوات اصلا صممت لتقوية شبكة الاتصالات اثناء اي حرب قد تنجر لها مصر

التوسع في المدن الجديدة لمنع التكدس في المدن الرئيسية لتوزيع السكان على اكبر مساحة ممكنه في مصر حتى يصعب ابادتهم بأي سلاح للدمار الشامل

المشكلة عمل كل هذا ولم تحدث حرب فعلا حتى يظهر فوائد هذه الافعال بل اكثر من ذلك دائما يكون حريص على عدم الانجرار الى اي حرب ، فهل هذا خوفا على ابناء مصر ولا الخوف من انقلاب الشعب عليه اذا انجر لحرب وخسرها

واللة يا ولد العم .. أنا بأحسد جدى الشيخ حسن " رحمة الله عليه .. انه سابنا بدرى ولم بستمتع معنا بتلك الاستراتيجية العسكرية الفذه .. دا حتى كان بيحكى لى عن انبهار احمد حسنين باشا لما زار مع الولد فاروق برلين واتفرج على مترو الأنفاق هناك .. ولما مصطفى كامل وطلعت حرب والشلة الفاسده اياها التى دمرت الآقتصاد القومى ومرمغت بالسياسة المصرية فى الارض .. ورجع المنفلوطى ليكتب عن باريز .. والذهب الأبريز .. واللى شافوه هناك فى مترو الأنفاق .. وحب " البارون امبان " يعمل خط يربط العاصمة بضاحية مصر الجديدة ولو رحت أرشيف وزارة النقل حتلاقى هناك الرسومات .. ووقفت النكاليف .. وطبيعة التربة الصحراوية عائق للتنفيذ .. ولما جه الزعيم الملهم .. قائد الممماليك الكاكى .. فكر ينفذه .. وخرجت الرسومات والدراسات .. وأعترض البعض على التنفيذ داخل القاهرة العامرة نتيجة لارتفاع منسوب المياه الجوفية .. وكانت معظم أحياء القاهرة تعتمد على " الطرنشات " فى الصرف الصحى .. ولما كان النيل بيفيض .. كانت بعض الشوارع الداخلية بتغرق من المياه الجوفية .. ولم تكن التكنولوجيا الحديثة قد أكتشفت .. ولم يكن السد العالى قد بنى .. واللى فكر فى تنفيذ مشروع مترو الأنفاق بعد كده كان المعلم عثمان الله يرحمه أقنه السادات بذلك .. وكون ادارة فى شركة المقاولين العرب حط فيها أفضل المهندسين وكان ذلك كما أتذكر عام 1975 او 76 .. وهذه الادارة عملت الدرسات .. وطرحت المشروع عالميا ورسى الأمر على الفرنسيس .. ولم يمهل القدر السادات ليرى النفق كما رآه المعلم عثمان .. دى واحده

نخش على الثانية يا ولد العم ..

يا حاج محمد .. دا احنا كتبنا فى موضوع توشكى دا اكثر من اللازم .. وقد أفادنا بعض الأخوة الأفاضل زملاء المنتدى بكثير من المعلومات .. ولن اكرر ما قالوه .. والمشروع بعيد تماما عن هذه النظرية .. فلا توشكى ولا غير توشكى حيحمى اراضى مصر من الغرق اذا لا قدر الله وانسابت مياه البحيرة دون حائل ..

وندخل فى الثالثة ..

يعنى يا حاج محمد .. الدول الكثيرة اللى سبقتنا فى موضوع الأقمار الصناعية دى .. والراجل الأهبل الخواجة اللى اخترع شبكات الأتصالات اللاسلكية .. واقبال الدول على انشاء وحيازة شبكات التلفون المحمول المتصلة بالأقمار الصناعية مباشرة .. قلدونا فى الخوف من تنشب حرب مثلا .. ؟؟ أنا مش حا أكمل عشان احنا بلديات ..

وندخل احسن فى الرابعة

أنا أستأذن فى عدم التعليق .. ويكفى لو رجعت حضرتك لأرشيف جريدة الأهرام على النت – وده فى متناول الجميع - وشوف الموضوعات المكتوبة فى أعداد 1974 وحتى 1979 عن تلك المدن .. تاريخها معروف .. واصلها معروف والله يرحمك يا حاج عثمان .. ويرحم قبل منك الرئيس السادات .. وفى مكتبة وزارة التعمير الاسكان .. بل وفى دار الكتب المصرية .. كتب كثيرة صدرت أيام السادات عن تلك المشاريع .. وحتى لا أطيل ندخل فى الخامسة ..

هو مين اللى وقف على منبر العالم .. وقال .. احنا مش عاوزين حروب ؟؟؟ ونادى بالسلام .. ويلعنه البعض حتى هذه الساعة ظلما وافتراءا .. أنا أربأ بنفسى ان أصدق هذا البند أو حتى التفكير فيه ..

مع عميق تقديرى وحبى يا ولد العم ..

تم تعديل 21 نوفمبر 2004 بواسطة achnaton

[Tafshan]

مشكلة حسني مبارك كل مشاريعه لها وجه عسكري استراتيجي وكل الي يهمه الاستخدام المزدوج

يعني مترو الانفاق صمم ان يكون ملجأ لسكان القاهرة في حالة اي هجوم نووي عليها

مفيض توشكي صمم لسحب مياه نهر النيل في حالى ضرب السد العالي لتجنب غرق مصر

حتى الاهتمام بشبكة الاتصالات والاقمار الصناعية وتعدد القنوات اصلا صممت لتقوية شبكة الاتصالات اثناء اي حرب قد تنجر لها مصر

التوسع في المدن الجديدة لمنع التكدس في المدن الرئيسية لتوزيع السكان على اكبر مساحة ممكنه في مصر حتى يصعب ابادتهم بأي سلاح للدمار الشامل

عزيزي ، انت معانا و لا معاهم ؟؟

1- لو مصر اتضربت نووي ، مترو ايه اللي ح يحمي المصرين ؟؟ النووي دلوقت بيتضرب بصواريخ تحدث حفر على اعماق شديده للتغلب على اي تحصينات و حصر الخطر النووي على المكان المضروب فقط

2- مفيض توشكي كان موجود اساساً من ايام بناء السد و الفكره الجهنميه بتاعت توشكى جت لما المفيض ابتدى يتملى فعلاً بالمياه ففكر انه يعمل له هرم هو كمان و يتقال عليه : عمل توشكى

3- موضوع الاتصالات ده بيزنيس و الاستشاري اللي عمل القمر الاول كان حاطت في خطته انه لو فشل القمر لازم يكون فيه قمر بديل و بالتالي تم صنع قمرين صناعين ..

و عندما نجحت التجربه .. بفهلوة المصرين ، بعثوا القمر الثاني و اهو احسن من الركنه !!!

و طبعاً احنا ما حطيناش مسمار في اي قمر منهم ... و الله انا خايف ليكونوا بيتجسسوا على مصر بيهم !!!

ما تنساش انجازات السيد الرئيس دي تمت في كام سنه ؟؟ 24 سنه !!!

شوف ماليزيا عملت ايه في 24 سنه ؟؟

كوريا ؟؟

دبي ؟؟

تونس ؟؟

[Seafood]

يعني مترو الانفاق صمم ان يكون ملجأ لسكان القاهرة في حالة اي هجوم نووي عليها

إن شاء الله ..

دا كفاية حي زي شبرا يدخل فيه عشان يمتلأ لآخره .. والناس تبقى متشعلقة على الأبواب إللي بتغلق إلكتروني ..

أنا شخصياً أفضل أن أموت نووي عن أن أموت محبوس في خندق وحسني هو الذي معه المفتاح ..

يا استاذ محمد أرجوك ذكر مصادر هذه المعومات ..