مميزات عصر مبارك

[sad_swing2000]

مع شديد احترامي للأستاذ محمد أبوزيد ، إلا إني أختلف معاه في حكاية تصميم المترو ، حيث أن طول المترو تحت الأرض بالنسبة لإجمالي طوله أعتقد إنه لا يتناسب مع هذا الفرض. و بعدين أعتقد إن تصميم المترو بالطريقة دي محتاج تكلفة خرافية من الممكن أن تكون متاحة لدولة غيرنا.

رجاء لكل الأعضاء ، أرجو في هذا الموضوع التركيز على الانجازات فقط ، كلنا عندنا نفس حالة الإحباط من النظام و الفساد ، بس عشان يكون الحكم منطقي علي هذه الفترة لازم يكون في عدل و نذكر المزايا ، و هناك موضوعات أخرى كثيرة لذكر العيوب و أنا ممن يكتبون فيها - عشان محدش يفتكر إني بدافع عن حد.

[على ويكا]

طيب ايه رأى الساده الاعضاء عن عمل مقارنه بسيطه بين الذى تسمونه (انجــــــــــــــــــــــــــازات)فى مصر المحروسه وبين الذى يعتبره الاخرون فى البلاد المتحضره حد الكفاف؟وياريت عدم التماس الاعذار ونقول ليس بالامكان ابدع مما كان

[Gharib fi el zolomat]

اتفق مع الاستاذ على:

كل هذا مجرد حد الكفاف و اقل اذا نظرنا الى الامكنيات البشريه الموجوده فى مصر

[Mohammad Abouzied]

بصراحة انا مش ملاحق ارد على مين ولا على مين

يا ويل حسني مبارك لو كل الشعب بيفكر مثلكم كدا

عموما يا زملائي الاعزاء ما قلته ليس مبني على وثائق ولا اعرف كمان اذا كان حسني مبارك كان بيفكر كدا ولكن نتيجة بعض انجازاته المميزة فعلا سواء كان هو من خطط لها سابقا او غيره

الا انها فعلا انجزت لتكون لها منفه استراتيجية مثلها مثل غيرها

بغض النظر ان غيرنا سبقا فيها ولا ولاء

وحتى لو كانت بيزنس

فيه دول عربية حتى الان لا تعرف التليفون المحمول حتى تاريخه

والعراق الي كانت في حالة حرب دائم لم يكن لها الا محطة فضائية واحدة على النيل السات وكان وسائل الاتصالات فيها متخلفة للغاية

عموما هو عمل انجازات وان كانت قليلة فعلا بالنسبة ل 24 سنة بل اقل القليل فعلا مقارنة بدول كثيرة ولكنها انجازات وليس تدمير مثل ما فعل عبد الناصر وصدام حسين

[فــيــروز]

مشروع القراءه للجميع كويس بردو :lol:

[egyptforever]

علشان خاطر الاخ ساد هاجي على نفسي و اعصر عليها لمونه و اتكلم عن مميزات حسني

يمكن في ناس كتير ماعشوش الفتره و انا اولهم طبعا دي بس كل الكتاب المحايدين اتلكموا عنها

في نهايه العهد الساداتي السعيد كانت مصر وصلت لمرحله الخراب يعني كان ناقص ييجي واحد محضر و يقفلها بالشمع الاحمر و يحجز عليها

كانت مصر اتحولت لخرابه عظيمه كان التليفون ممكن يقعد بالشهور مافيهوش حراره و لا حياه لمن تنادي

كانت السياحه في مصر عباره عن الاقصر و اسوان و المتحف المصري و كفايه عليكم كده

كانت المدن الجديده عباره عن مدن اشباح لا يسكنها الا الحراميه

كانت مصر عباره عن حاويه تملا من مخلفات الدول الكبرى و الصغرى

و لكن في عهد مبارك

اصبحت مصر تملك اجمل القرى السياحيه و اجمل الشؤاطئ على اجمل بحر في العالم

تنوعت السياحه في مصر لم تعد قاصره على الاوربيين بل و امتدت الى الامريكان و الروس و العرب و دول شرق اسيا و كل هذا راجع الى كميه الاموال التي ضخت في قطاع السياحه

في قطاع الاتصالات من غير ما نجيب احصائيات كل حته في مصر دلوقتي فيها تليفون ثابت ناهيك عن الموبايلات اي عطل في اي شبكه بيعتبر من اندر النوادر و اصلاحه بيتم بسرعه البرق

مترو الانفاق بلا شك من اهم انجازات مبارك ولا يعيب عهده ان الفكره كانت سابقه له بل هي من مميزاته فالاولى بالتقدير الذي نفذ مع كامل الاحترام و التقدير لمن خطط

و بالمثل في المدن الجديده كان دايما فكرتنا عن المدن الجديده في عهد السادات انها مدن الاشباح دلوقتي المدن الجديده بقت مدن ولا احلى العاشر من رمضان او العبور او مدينه السادات او حتى القاهره الجديده او الشروق او التجمع الخامس كل دول اللي احياهم حسني مبارك مش السادات بالرغم من ان هو صاحب الفكره و لكن السادات الله يرحمه كان يحب الحركات السينمائيه و لكن حسني بينفذ و هذا احقاقا للحق

مفيض توشكى اجده بالرغم من بلاويه اللي اقلها سحب السيوله من البلد بس ده اهم مشروع اتعمل في مصر هو و المشاريه المائيه اللي بتروح سيناء يا جماعه الدول المتحضره بتفكر في 100 سنه لقدام المشروع ده على 2025 هيحول المنطقه دي لجنه هو و مشاريع سيناء بس ندعي ان ربنا يعمي الامريكان عنا

تحرير سعر الدولار اعتبره من اهم منجزات عصر مبارك مصر تعبت في ال 40 سنه اللي فاتت من موضوع تثبيت سعر الصرف السوق السوداء و كل واحد دارس اقتصاد عارف كويس معنى سوق سوداء في بلد و اثره على الاقتصاد و يكفي حسني مبارك و نظامه و هذا للحق ان سعر الدولار ثابت في مصر منذ ما يزيد عن 6 شهور تقريبا و جه علينا صيف و جه علينا رمضان و هيجي علينا حج و السعر ثابت و ده حاجه ماكنتش مصر تحلم بيها بمستواها الاقتصادي الحالي .

اخيرا ( على قد ما افتكرت ) مصانع تجميع السيارات و تصنيع الالكترونيات في مصر و صناعه الدواء و التامين الصحي للاطفال كل ده من منجزات عصر مبارك اللي لازم نحييه عليها

خلاص يا عم ساد اقدر اقول مصايبه بقى

[Katamando]

لماذا الحرص الدائم على الخروج عن الموضوع الأصلي للنقاش

يا اخواننا

فلنعد إلى الموضوع الأصلي مع ملاحظة ان للمزاح والسخرية أبواب أخرى

[عصام]

تم حذف المداخلات التى خرجت عن سياق الموضوع والتى احتوت مزاح وسخرية ...

أرجوا من الجميع الالتزام بمحور الموضوع ..

وأشكر الزميل العزيز كاتماندو على مداخلته

الإدارة

إسو

[kfaya]

معركة استرداد طابا تعتبر من أبرز نجاحات حسنى مبارك فى بدايات عهده ...

البنية الأساسية .... وان تمت بأموال المعونةالأمريكية التى أتفق عليها فى معاهدة كامب ديفيد , و ان شابها الكثير من الفساد المالى و التربح .. الا أنها تحسب لعهد حسنى مبارك ..

النهضة السياحية .... و أهم معالمها المدن الساحلية

شارم الشيخ - الغردقة - دهب - نويبع - طابا - مرسى علم .

عدم الزج بمصر فى مغامرات عسكرية خارج الحدود رغم الأستفزازات الكثيرة من البعدا اللى على الحدود .

علاقاتنا الخارجية مع معظم دول العالم متوازنة ..... دائما يحتفظ بشعرة معاوية و يحرص على عدم قطعها .

اعطى القليل من جرعات الحرية الأعلامية و حريات التعبير .... وان كانت بالطبع لا تصل لطموحات الشعب .. و لكنها تتناسب مع شخصيته المحافظة الهادئة لدرجة البطئ الشديد .

تصدى بحزم و قوة للهجمة الأرهابية التى كانت ستحرق الأخضر و اليابس ... استطاع بحكمة أن يضع الشعب كله فى الخندق المواجه للأرهاب .... و كان أول من أطلق على الجماعات الأسلامية التى تحمل السلاح لفظ أرهاب .

بس .... كفاية كدا ...

نقول بقى اللى عليه ؟؟؟؟؟

[عم الطيب]

انا اقبل ان اكون وزير فى عصر مبارك وهذا يشرفنى لانه رجل عظيم ولايشرفنى ان انال عضوية الحزب الوطنى او غيره من احزاب مصر التى هى سيارة بدون بنزين ,الله يكون فى عون الرئيس مبارك ...يحسب ان لديه احزاب ان تعاونه فى الحكم لكن للاسف فهم ليستطيعون نفع انفسهم لكى ينفعوا شعب مصر , الله يكون فى عون الرئيس مبارك الذى لايجد على مدى سنوات حكمه الرجال المناسبين ليكونوا له مستشاريين مخلصين (عدا الشريف منهم ) .تعالوا نشجع رئيسنا على اتخاذ قرارسليم ,وليعطى شعب مصر الجبار هدية عيد الاضحى القادم انشالله وانا شخصيا احلم يقطع التلفزيون المصرى ارساله ويظهر لنا سيادة الرئيس بمفاجاة على هيئة قرار جمهورى يتضمن الاتى : 1ـقرار جمهورى لايسمح لرئيس مصر برئاسة اى حزب , حتى تتحقق عدالة ممارسة الحياة السياسة بين الاحزاب المختلفة .

2ـ نقل العاصمة السياسية لمصر الى مدينة السويس الباسلة حتى عام 2010

3ـالغاء منصب رئيس الوزراء واعطاء مهامه لريس الجمهورية حتى عام 2010

[Seafood]

3ـالغاء منصب رئيس الوزراء واعطاء مهامه لريس الجمهورية حتى عام 2010

إيه رأي سيادتك , نلغي المناصب كلها في البلد ونعطيها لسيادة الريس , يعني يبقى هو المهندس والمحامي والطبيب ووكيل النيابة والمحضر والعسكري والزبال الكومسري والبوسطجي والأزهري , ونلغي الشعب خالص .. وما على الشعب إلا أن يتفرغ لمدة عشرين سنة قادمة لبناء هرم رابع أكبر من الأهرام الثلاثة , ونسمية هرم " منبرك " على وزن منقرع ..

يا عم الطيب , إعمل معروف إبعدنا عن هذه الأفكار الفرعونية , فهي التي جعلته يستخف بنا , وأنت تريده أن يستخف بنا أكثر وأكثر , وتجعل كل المشاكل السبب فيها من يحيط بالرئيس وليس الرئيس نفسه ..

[على ويكا]

عدم الزج بمصر فى مغامرات عسكرية خارج الحدود رغم الأستفزازات الكثيرة من البعدا اللى على الحدود .

ومشاركه الجيش المصرى فى حرب تحرير الكويت تحت اى مسمى يمكننا وضعها؟

[ragab2]

لم يقصف قلم

لم يفصف قلم

وقصف صاحب القلم