الأسئله الصحيحة - فى زواج الصالونات ......

[amostafa]

مشكله بيقع فبها كل يوم شباب كتيير اوى ... و انا واحد منهم ...

انا والحمد لله ربنا اكرمنى و سبت مصر بعد التخرج من كليه الهندسه . سافرت السعوديه علشان اشتغل ... وبالتحديد الرياض (انا مسميها مقبره العزاب) اكيد فهمتو قصدى ...

المهم ,مرت الايام و السنين و فجأه اكتشفت ان 5 سنين مرت من عمرى و انا تقريبا ما بعملش الا حاجه واحده و هى الشغل .... دا مش معناه انى بكره شغلى بالعكس انا بحب شغلى جدا (فى مجال الكمبيوتر و التجاره الالكترونيه) و يمكن دا اللى خالانى ما حسش بالوقت اللى بيتسرق منى .... طبعا ماكنش فى اى علاقات بالجنس الناعم , الا عن طريق الشات ... و ماقدرش اسميها (علاقه) لانى كنت بازهق و باطنش ... يعنى تقدرو تقولو مافيش جنس ناعم بالمره .. و فى الاجازه بتعتى مابلحقش اصاحب ولا اخرج ولا اى حاجا ....

المهم ... بدأت افكر الكام شهر اللى فاتو فى الزوا ج ,و كلمت اهلى علشان يضورولى على عروسه (على فكره انا ايام الجامعه كنت اتر واحد بيكره جواز الصالونات و مؤمن ان الجواز ماينفعش الا انو يكون عن حب و عن حب جذوره عميق ويابته و كان ليه قصتين حب بس ماكنوش حب حقيقى .... المهم دارت الايام و ادينى بجرى ورا جواز الصالونات :o ) .. و مفروض فى الاجازه القادمه اللى هى بعد شهرين انى هانزل و اقابل (فى مقابلات شرعيه) اكتر من 7 او 8 بنات ....

زميلى و اصحابى بيقولولى اوعا تتسرع و حاول تكتشف البنات لما تقعد معاهم ,,,,,

فكرت كتيير فى نصايحهم بس مش عارف هاطبق ازاى !!!! ازاى هاسأل الاسله الصحيحه للبنت علشان اعرف هيا كويسه ولا لأ ؟؟؟ واحد صحبى قاللى : اسألها عن صحبها ,واجباتها عن صحبها هاتدللك عن شخصيتها!!!و التانى قاللى: لازم تبص على ظهر اديها لو عظم اديها باين دا معناه انها رفيعه اوى ... و لو مش باين معناها انها مليانه و مش هاتتعبك ,و حجات كتيره مش عارف صح ولا غالط.....

انا متدين و الحمد لله و بادعو ربنا دايما انو يرزقنى الزوجه الصالحه الجميله , اهلى هايعمو اللى عليهم و هايسألو عن البنات اللى هايرشحهملى و هايجى دورى فى المقابه معهم , ايه هى الاسأله الصحيحيه ؟ و الشارات فى الشكل و اليدين (لانهم محجبات طبعا) اللى ممكن اعرف منها طبيه البنت اللى اودمى :rolleyes: ....؟؟؟

[Cleo]

اسألأ عن هواياتها و نشاطاتها...

ممكن تعرف هى بتقرا ولا لأ طيب بتقرا فى ايه؟؟؟ يعنى مثقفة ولا لأ..

من نشاطاتها ممكن تعرف لو مثلا بتروح دروس فى جامع أو كدة....

لما بتخرج مع أصحابها بتروح فين؟؟ و بيتأخروا فى الخروج لحد كام؟؟ ولاد وبنات ولا بنات بس؟؟

كان فيه ارتباطات (رسمية) قبل كدة ولا لأ؟؟

(كانوا بيسألأونى ايه تاااااااااااااااااانى؟؟؟؟ :rolleyes: )

:o mf(

[se_ Elsyed]

و التانى قاللى: لازم تبص على ظهر اديها  لو عظم اديها باين دا معناه انها رفيعه اوى ... و لو مش باين معناها انها مليانه و مش هاتتعبك ,و حجات كتيره مش عارف صح ولا غالط.....

أكيد اللي قال لك كده جزار وكان نازل يشتري دبيحة من سوق التلات ...

يا عم ضهر أيدها إيه وعضم قفاها إيه ..

دي علاقة ما بين إتنين بني آدمين أساسها المشاعر ...

وأعتقد مافيش شاب ما يعرفش إزاي يتعرف على بنت ويعرف إذا كانت كويسه ولا لأ ... فالأساس أولاً لابد أن يبدا بالاهل .. تشوف أهلها عاملين إزاي في البيت ... يعني لو كان الوضع الطبيعي هو إنالدفة في إيد الأب .. يبقى كل شيء تمام عندهم .. أما لو الام هي اللي بتسوق يبقى إبعد أحسن .

كذلك لاحظ مسألة الصلاة وأيضاً طريقى المعاملة بينهم .. وثقافة البنت وخلفيتها العلمية ....

وعيش بقى يا مصطفى .. المسائل سهلة ولو حصل قبول هاتلاقي ربنا مسهل كل حاجة ...

بس إوعى تنزل إسبوع اجازة وتقول إنك عايز تعمل فيه كل حاجة ... دي غلطة بيرتكبها كثير من المغتربين .. وغالباً ما تنتهي العلاقة بالفشل لان الوقت بيبقى قصير وممكن يحصل فيه خداع وتزويق للحقائق.

وربنا يوفقك .. واعلم جيداً إن إنت لو نويت خير فبالتأكيد ربنا مش هايخيب ظنك .

[homer]

طب وايه هى الاجابات الصحيحة.

يعنى العريس بيدور على ايه وعايز يسمع ايه

وكمان ماهى الأسئلة التى يمكن أن تشالها العروسة؟

الواحد لازم يذاكر كويس

[بنت شعنونة]

الغريبة اني مش فاكرة اني اتسألت!!!! mf(

دايما انا اللي كنت اسال :o

كنت اسأله مجموعة اسأله ما بتتغيرش..

حضرتك عاوز تتجوز ليه؟

ايه مواصفات الزوجة اللي انت عاوزها؟

ايه اهم حاجا لالالالازم تكون موجودة في زوجتك وايه اكتر حاجا تكرهها فيها..لو موجودة فيها ترفضها بدون تفكير؟

ايه راي حضرتك في الأطفال

يعني ايه زواج؟

لو زوجتك طولت لسانها عليك رد فعلك بيكون ايه؟

معظم الناس كانت اجابتها عجببببببببببببببببببببببب الصراحا ومن الأجابات دي كنت بعرف الشخصية دي مناسبة ليا او لا وكانت بتخلص في نفس القعدة

وكرد فعل طبيعي كانوا هما يردوا عليا بالعكس

انتي عاوزة ايه مواصفات زوجك؟

ايه اكتر حاجا تكرهيها او تتمنيها في زوجك؟

انتي وافقتي تقابليني ليه؟

انتي حياتك عاملة ازاي؟

ناوية تشتغلي بعد الجواز والا لا؟

حاجات كدا! :rolleyes:

[se_ Elsyed]

خلي بالك يا مصطفى .. لازم البنت يكون عندها على الأقل مباديء الطبخ .. وسيبك بقى من موضوع إنها تتعلم فيك ومعليش واحده واحده وعيش العصفورة يكفينا ولقمة صغيورة تقضينا وأكلنا جبنة وزيتون وعشيني بطاطا والكلام ده ... لأن تخيل نفسك راجع يوم من شغللك اللي في العاشر من رمضان وتعبان من ضغط العمل وزنقة الاتوبيس اللي وقف على كوبري 6 اكتوبر 4 ساعات عشان الريس رايح يفتتح محطة الجبل الاحمر للصرف الصحي اللي في محافظة الدقهلية .. وبعد ده كله المدام تقولك إطلب لنا هوم ديليفري أو قوم إفتح لك علبة سلمون وإنت أساساً ما بتطقش السلمون... طبعاً انا متخيل موقفك ورد فعلك دلوقت خصوصاً لو كنت ساكن في الأدوار العليا ...

[METALLICA]

:lol: والله ضحكتوني . . . . . . . . .

بلا هم . . . . . .

[METALLICA]

اعتقد انه من الأفضل إنك تفكر في الأسئلة اللي انت هتتسئلها . . مثل :

- عندك شقة . . . تمليك والا إيجار . . . فين . . . بإسمك . . .

- عندك عربية . . . نوعها ايه . . . موديل كام . . .

- هتجيب شبكة بكام . . . هتدفع مهر كام . . . . مؤخر كام . . . . هنكتب كذا في القايمة . . .

- هتجهز ايه . . .

:lol: عجبكوا كده . . . . اديني رجعت كشرت تاني . . . .

[حشيش]

عقلى الباطن: الحمد لله إنى وصلت فى الوقت المناسب  :lol:

عزيزى مصطفى

بعد لف ودوران وصرمحة طويلة لقيت إن جواز الصالونات يكسب...شوف ياسيدى طبعاً تبقى ساذج جداً لو افتكرت إنك حتعرف شخصية البنت أو أخلاقها من قعدة أو اتنين أو تلاتة...إنسى ياعمرو....سيب الموضوع ده لأهلك....لازم أهلك يكونوا يعرفوا البنت وأهلها من فترة طويلة....واخد بالك...فترة طويلة...كل المطلوب منك أثتاء لقاء الفتاة إنك تشوفها وتتكلم معاها باللى يجى فى دماغك وقتها مش تروح محضر مجموعة أسئلة...حتخرج من المقابلة بانطباع عام يعنى شكلها عجبك ولا لأ...جسمها كويس ولا لأ وده مش عيب طبعاً إنك تبص على وشها وجسمها...مش قصدى يعنى إنك تلف حواليها أوتنام تحت الكنبة... فكرة عامة بس يعنى :blink: .... من حديثها حتعرف إذا كانت متزنة ولا مرووشة.....يبقى نقطة فى غاية الأهمية زى ما سى السيد قال لك وهى أنها تكون ست بيت....ملعون أبو أكل المطاعم والشورمه ياشيخ....جواز يعنى ست متدينة ومتربية... جميلة... فيها أنوثة... وست بيت....أى حاجة تانية مش مهم mfb:

لو عايز تعرف إن كانت لبط ولا لأ إسألها إيه أخر نكتة سمعتها ؟ لو قالت لك النكتة بتاعة المسابقة اللى عملوها لإختيار أذكى رئيس فى العالم وفاز فيها بالطبع مبارك يبقى تصرف نظر عنها على طول :) ....ربنا يتمم لك بخير....تحياتى rs:

[G.G]

مش قصدى يعنى إنك تلف حواليها أوتنام تحت الكنبة

:blink: mfb: ..

هو أنا ما عنديش فكرة عن الأسئلة أوي لأنها بتختلف من شخص لأخر حسب حالته و أولوياته بس ممكن أديك فكرة عن نوع الحديث عامة..

و ده أخر اصداراتي: guideline: "المختصرات في لقاء الصالونات"

- لقاء واحد لا يكفي ,عادة ما يجب عمل لقائين أو أكثر حتى تقول "يمشي"..طبعا لو لأ يبقى لأ من الباب (بتبقى الحكاية باينة)

- ينقسم الكلام في تلك القعدات ل3 أنواع,,

1- كلام عام ,, يستشف منه أسلوب التفكير و المخ ,,تحاول تحود به دائما إلى المواضيع العامة التي تهمك و التى ترى إنك لن تستطيع العيش مع إنسان ليس عنده وعي كافي بها أو لا تستطيع العيش مع إنسان يستهزأ بها ..

Ex: يعني لو حضرتك بتحب الأكل أوي تفتح موضوع عن الأكلات الغريبة اللي أكلتها و تلك التي تحبها و تستمع لتعليقاتها-لا ينفع أن يكون ردها " نحن لا نعيش عشان نأكل و لكن نأكل عشان نعيش" معني كده أنها شخصية Career oriented أوي عليك ..

و مش هتفنن في حاجة..

- لو حضرتك مهتم بالفنون ,, الأوبرا مثلا أو فن تجريدي- نتكلم عن حدث فني معين قمت به, لو ضحكت و قالت ده صويت و دي شخابيط يبقى لأ..

- لو حضرتك بتحب القراة و تقضي ساعات بها,, نتكلم عن معرض الكتاب الي هيفتح قريب, لو بصت لك ببلاهة ,,يبقى air headedما تنفعش .,,

2- الكلام الخاص عنها ,, و هنا تيجي الأسئلة المباشرة اللي قالوها الزملاء

حياتها,, شغلها,, دينها,,أصدقائها...و الترتيب حسب أولوياتك..

3- الكلام الخاص عنك,, كلامك عن نفسك,,تقول اللي فيك و اللي عليك..بدون تضخيم للميزات و لا العيوب..و تشوف رد فعلها..

طبعا هذه الأنواع الثلاث من الأحاديث تكون متداخلة و ليست على التوالي..بس طبعا يبدأ بالكلام العام..و الذي يستخدم أيضا لملئ فراغ الحديث,,و ...

و أمانة البحث تقتضي أن كلامي ده كله ما جبش نتيجة حتى الأن :lol: بس إن شاء الله يجيب فيك

(يا ريت تبقى تزودنا بخبراتك بعد زيارتك لمصر ,, ax: )

[فــيــروز]

لو عايز تعرف إن كانت لبط ولا لأ إسألها إيه أخر نكتة سمعتها ؟ لو قالت لك النكتة بتاعة المسابقة اللى عملوها لإختيار أذكى رئيس فى العالم وفاز فيها بالطبع مبارك يبقى تصرف نظر عنها على طول  :lol: ....ربنا يتمم لك بخير....تحياتى

لبط !! mfb: فيه عروسه لبط :blink:

[amostafa]

شكرا يا جماعه rs: .... والله ما قصرتم (زى ما بيقولو اهل السعوديه)

والله يا سى السيد انا ناوى خير ,بس الكلام اللى الواحد بيسمعو و بيشوفو عن مستوى الفساد و قله الاخلاق اللى الناس (شباب و بنات) و صلوله فى مصر يخلى الواحد يخاف و يترعب و يشك فى اى حاجا فما بالك بنت مفروض تتجوزها و تقضى معاها بقيه عمرك :lol: ...!! مش معنى كلامى ده ان بنات مصر كلهم كده , لا والله مصر فيها بنات وولاد فى منتهى الاحترام و الدين :blink: ,.... و ده الغريب فى مصر rs: ان تيار الدين و التدين و تيار الفساد و الانحلال ,تيارين ماشيين مع بعض فى زياده عاليه و متوازيه . :) ....

و دا اللى خلانى ابعت و اطلب مشركتكم فى الموضوع ....

'طبعا يا حشيش انا مش هاخالص كل حاجا فى اسبوع لأ.. انا اجاذتى اسبوعين مافروض اخطب فيهم و بعد كدا لو ربنا اراد الجواز يكون فى الصيف اللى جى ....

هو صحيح ايه هى النكته بتاعت أذكى رئيس فى العالم دى؟

Cleo و بنت شعنونه , عجبتنى اسألتكم اوى لانها واضحه و مباشره ما فيهاش لف و دوران , بس تفتكرو الاسأله المباشره احسن و لا الاسأله المستخبيه ؟ بمعنى كلام و اسأله عاديه و ضمنيه و بعدين تستشف جوانب الشخصيه ذى ما قالت G.G ??? mfb:

[Katamando]

ليس من المفترض أنك تقلق كل هذا القلق

فالطيبون للطيبات

والطيور على أشكالها

وتفائل

استعين بالله

ربنا معاك

[Cleo]

Cleo و بنت شعنونه , عجبتنى اسألتكم اوى لانها واضحه و مباشره ما فيهاش لف و دوران , بس تفتكرو الاسأله المباشره احسن و لا الاسأله المستخبيه ؟ بمعنى كلام و اسأله عاديه و ضمنيه و بعدين تستشف جوانب الشخصيه  ذى ما قالت G.G ??? ngh:

بص ... أنا من أنصار المباشر...

يعنى لو حد قاعد قدامى لأى غرض... جواز... شغل .... صداقة أى حاجة.... و حسيت ولو للحظة إنه بيلف ويدور عليا أو يتذاكى عليا... بروح على طول مطفية النور وكرسى فى الكلوب :lol:

الصراحة مفيش أحلى منها ..

وبعدين الموضوع مش هايقف عند أسئلتك دى... أكيد فيه مواضيع تانية هاتتفتح فى القعدة وهاتكون تلقائية و هاتيجى بمناسبتها... و منها تقدر تستشف اللى جىجى بتقول عليه..

ولا خاب من استخار الله و استشار الناس..

ربنا يوفقك و يرزقك الزوجة الصالحة خيرة متاع الدنيا إن شاء الله

[بنت شعنونة]

اولا ربنا يتمملك بخيرha)

ويتتملنا معاك احنا كمان بخير

قولوووووووووووووووووو اميييييييييييين كلكمممممم :lol:

فيه كلمة مهمة اوووووي لازم تكون واثق فيها جداااااااااااا

الطيبون للطيبات والخبيثون للخبيثات

ف انت وضميرك في الحياة بقى :o

ونيجي للجد بقى

الحوار في حالاتي كان بيجي تلقائي "مش اوي يعني"

بمعنى

كان الراجل بيبتدي يتكلم ويقول اي حاجا في اي حاجا وتلقائيا بتلاقي الموضوع قلب ماتش بينج بونج الكورة مرة عنده مرة عندي والكلام بيجيب بعضه وبتلاقي نفسك طلعت بقرارات نهائية مالهاش تالت

-مرفووووووووووض نهائي وماعندكش استعداد تشوف الطرف التاني دا اصلا

- مش عارف!!

ودي غالبا بتبقى اشارة معقولة انك تقعد معاه تاني لحد ماتوصل لقرار اخير.. ngh:

المهم بقى

قبل كلللللللللللللل داااااااا

انت لازم تكون عاااااااااااااارف كويس اوووووووي انت عاوز ايه

اقرا اسئلتي كدا

لو عندك لها اجابات محددة وواضحة

يبقى ان شاء الله ها تتهون وتلاقي بنت الحلال :D

همسة...

الصراحا والحقيقة = الخط المستقيم اقصر الطرق للوصول

[Mohammad Abouzied]

بصراحة يا جماعة مش كل واحدة تقبل زواج الصالونات

بنتي قالت بالفم المليان بلاها جواز اذا كانت هذه الطريقة هي الوحيدة للزواج

حتى لما حضر الينا احد رجال الاعمال بالاسكندرية يطلب بنتي لابنه خريج كلية التكنولوجيا قبل سفره امريكا لتكملة دراسته العليا هناك

قالت بالحرف الواحد انا مش للبيع

انا لما اتجوز لازم اتجوز واحد اكون عرفاه كويس على ثقه كبيره اني هاقدر اعيش معاه بقية عمري

لكن جواز بالشكل دا لا يفرق ابدا عن البيع والشراء والحياه بينهم تصبح بدون طعم او رائحه وتشبه الموت فعلا

هذا رأي بنتي وانا اوويدها فيه وياريتك يا مصطفى تغير رأيك وتدور على طريقة اخرى افضل علشان متندمشي

[G.G]

يا باشمهندس مصطفى ax:

عفوا لا أريد أن يصل كلامي أليك أبدا ,,أنه "لف و دوران" أو" تذاكي" أو "عدم صراحة" أو "عدم قول الحقيقة" ,,ما قصدته أن الأسئلة المباشرة لا تنفع أوي في أول لقاء تعارف أنما بيكون الكلام عام للتعرف على نوعية الشخصية , و خاصة في وجود أقارب أخرين,,لذا يمكن استخدام الكلام العام بنجاح في صالح بناء الفكرة عن الشخصية أيضا ..

و خاصة أني أرى أن أسئلة من نوعية "من هم أصدقائك" ما هي هوياتك",,"ما هو الجواز بالنسبة أليك" أشبه ب Interview ngh: .. و أن كانت هذه الأسئلة تطرح أيضا, و لكن بأسلوب مختلف بعضها يستشف و بعضها يجي في وسط الكلام العام زي ما قلت لك و خاصة لو كان """اللقاء هو الأول """"..

بس حذاري كما وضحت لك cleo من اللف و الدوران ,,لأن هذا فعلا هو أكفأ طريق لإحداث Turnoff من الطرف الأخر. sdm:

أستاذ محمد أبو زيد,,

أنا كنت أؤيد رأي ابنتك في ان الموضوع بيع و شراء..

و لكن بعد تفكير و جدت أن هذا غير حقيقي..

لسبب بسيط ,, ,, يحدث كثيرا ,,أن نرى شخص لمدة دقائق معدودة في مكان ما ,, و يحدث كثيرا أن يبقى في مخيلتنا هذه الشخصية ,,استرجاع لطريقة الكلام,, أسلوب التفكير,,"الطلة",, الذي ظهر منه لنا أثناء هذه الدقائق المعدودة.. وقد نقول في قرارة أنفسنا "هذه شخصية مميزة" ..

أظن أن هذا يحدث في الحياة العامة على غير ميعاد..و قد تطور هذه المعرفة فيما بعد إلى أعجاب و من ثم زواج..و كله قد بدأ بلقاء عابر لدقائق بسسبب الصدفة ..

ما المانع أن يكون هذا اللقاء العابر منظم بدل صدفة؟ أظن أنه لن يغير أي شئ في تتابع الأحداث.

.و ده طبعا لو كان فيه نصيب..

[Cleo]

عقلى الباطن بيقوللى شكلى كدة عكيت و جىجى هاتاخد منى موقف... أما ألحق أخش أصلح ما أفسده الدهر  ngh:

يا جىجى أنا مش قصدى لإن كلامك لف ودوران و تذاكى... أنا بتكلم عموما... وزى مانتى قلتى المواضيع بتتفتح بتلقائية و بمناسبتها .... إنما قصدى أقول... إنه مايحاولش أو مايفتعلش اللف والدوران... عشان أنا بيجيلى دوار البحر :lol:

تحياتى

[METALLICA]

لكن جواز بالشكل دا لا يفرق ابدا عن البيع والشراء

جووووووووووووووووووووووووووووون ngh:

[moslema salafeya]

الأخ الباشمهندس مصطفى

من خلال خبرتى الطويلة فى موضوع الرؤية الشرعية والعرسان والموضوع ده كله القاعدة الوحيدة فى هذا الموضوع إنه مفيش قاعدة معينة يعنى إنت ممكن تلاقى حصل قبول والكلام اتفتح لوحده أو ممكن تحس أن الجو بقى خنقة وعايز تنهى المقابلة بسرعة وبتتلكك إن أى حاجة تحصل تخلصك من القعدة الخنقة دى

وعليك طبعا بالإستخارة وإستشارة الأهل ومش شرط تكون أهلك يعرفوها من زمان لأنك كده هتحصر نفسك فى دائرة ضيقة جدا وممكن تضيع شخصية ممتازة لأنها مجهولة بالنسبة لأهلك وعليك بوصية الرسول صلى الله عليه وسلم فى إختيار الزوجة الصالحة و بالمناسبة فى درس للشيخ محمد حسين يعقوب مفيد فى الموضوع ده إسمه" كيف تختار وكيف تختارين شريك الحياة" هو إسمه كده لكن الواقع إنه كله كيف تختار ومفيش كيف تختارين خالص لكن ما علينا إن شاء الله يكون فيه الإفادة :angry:

وأنا مع الجمهور فعلا إن الطيبون للطيبات واستبشر خير

وربنا يوفقك إن شاء الله

وبالنسبة للدرس ممكن تجيبه من موقع طريق الإسلام