الأسئله الصحيحة - فى زواج الصالونات ......

[عنبو]

بنت الشاطئ1 مشاركة بتاريخ اليوم, 02:50 PM

كان فى واحدة بتخطب لابنها بس ابنها مصر انه يشوف البنت الاول قبل ما يدخل بيتهم

وفعلا .. البنت راحت لمكان كام متفق عليه وذهبت مع صديقتها وذهب هو ايضا لنفس المكان وعجبته البنت

ولما جه وقت الجد قال لوالدته انا حاسس انى مش هقدر اكمل فى الموضوع ده وحاسس انها نزلت من نظرى لأنها وافقت على هذا اللقاء..مع انهم لم يتكلموا ولا كلمة مجرد انها ذهبت وجلست مع صديقتها وهو جالس على كرسى مقابل لهم طب ده كلام والله ده معناه ايه يا اوتاكا ويا محمد يا عنبى

معناه ان ده عيل اهبل ومتردد ومن بختها ان الموضوع متمش

[بنت الشاطئ1]

القصه التالبه هى تجربه شخصيه و لا اجبر احدا على الاقتناع بها او اتخاذها منهاجا لحياته فقط اردت عرض الوجه الاخر من القصه

مره من المرات و امام ضغط الاسره المالكه قمت بعمل مناوره بالقوات و ذهبت لاقابل فتاه تم ترشيحها من قبل قياده الاركان

و لانى تربيه انجليز كما يصفنى اهلى فقد صارحت الفتاه قائلا ان هذا النوع من الزاواج ما هو الا شخص يرغب فى شراء حيوان اليف يربيه فى المنزل و غالبا ما يختار الحيوان الاغزر شعرا و الاكثر ملائمه لاحتياجاته

البنت جالها صدمه عصبيه ثم ردت على اننى على حق و ان لو كل الشباب لديهم ما لدى من شجاعه بتسميه الاشياء باسمائها لانصلح حال الدنيا

و بهذا نجى اوتاكا كبير اللصوص من فخ زواج الصالونات

اكيد انت عملت كدا لان مفيش قبول من النظرة الاولى

صح واللا لا

ومحمد العنبى انت سبت موضوع الخيانة وجيت على الصالونات ..الحق ارجع بقى عشان تهدى النفوس

[mama nona]

انا الحمد لله مجربتش جواز الصالونات ده

لانى كنت اعرف زوجى قبل الزواج

ولكن هحكى لكم عن قصة زواج الصالونات........قصدى القطارات

كان العريس بيعمل بالقاهرة

والعروسة طالبةبكلية التربية وهى صديقة لى

وكنا مغتربات وساكنين فالمدينة الجامعية

وكل ما يحددو للعريس موعد يروح البيت

البنت ترفض وتقول لأ مش هقابله

انا مش عاجبنى الجواز بالطريقة دى

المهم على المنوال ده لغاية ما عدى التيرم كله وهى مش موافقة على الطريقة

اتصلت بيا والدتها وقالت لازم تحاولى تحددى موعد لان العريس زهق من الموضوع ده وطولنا

قلت لها خلاص

هفكر فى فوكيرررررررررة وهرد عليكى :wub:

وفضلت افكر كام يوم

احنا كنا دايما بنسافر يوم الجمعة بعد العصربالقطار

وهو كمان كان بيروح القاهرة فى نفس التوقيت تقريبا

فاتفقت مع والدتها انه يقابلنا فى محطة القطار وانا هاخد تذكرةله معانا بس ياخدها ويركب معانا على انه واحد منعرفوش

واتفقنا كمان هيكون لابس ايه علشان اعطى له التذكرة

وهو بعد ما يركب يحاول يتعرف علينا ويتكلم معانا

المهم فاليوم المحدد قطعت له تذكرة

وجه فالموعد تمام

واعطته التذكرة ال رقمها جنبا

ولما سألتنى تعرفيه

اه ده قريب من بعيد وكنت بسلم عليه

المهم ركبنا كلنا

وابص له انه يبدأ يتكلم

ولا هو هنا

اظاهر انه نسى انه كان راكب القطار معانا ليه

مرت نص ساعة وانا هموت من الضحك

الراجل ده ماله B)

المهم الحمد لله اتكلم قبل ما نوصل ب حوالى ربع ساعة

مع ان الطريق ساعتين

ولما اتكلم دردش فمواضيع عادية

عن الجامعة والكليات والتدريس والمناهج

اهى دردشة عامة

المهم لما نزل من القطار

سلم علينا ومشى

والاسبوع ال بعدها

راح البيت وقرو الفاتحة

ومن اول يوم دبحت له القطة

راح حكى لها عن المقابلة المدبرة

والحمد لله اتجوزو

وخلفو صبيان وبنات

وعرفت منهم انهم لما بيتخانقو

بيقولو منه لله ال دبر المقابلة

عرفتو بقى اخرة ال يمشى فجوازة :lol: :lol: :lol:

[SoSo R]

تذكر شى اخر قد تنساه فى هذه الزحمة وهى صحه الاولاد

الحياة والمرض بيد الله ولكن الله امرنا بالاخد بالاسباب

عشان انت وزوجتك واولادك لا يعانون فى المستقبل

مثل على ذلك

متكونش اصلا قصير القامة وتتزوج ايضا قصيرة القامة

متكونش تخين وبكرش وتتجوز وحدة سمينه

متكونش نظرك ضعيف شيش بيش وتتجوز وحدة شيش يك

متكنش رفيع تستخبى وراء العصيا وتتجوز عود قصب

وهلما جر على الاقل فيما يمكن ملاحظته بالعين المجردة

ملحوظه : انا لا اقصد السخريه من اى انسان مصاب بمرض او له شكل معين ولكن معلةم ان العامل الوراثى شى اساسى

فى تحديد شكل وصحه الاطفال وردى هذا من اجل صحة افضل للاسرة جميعا

أستاذ موعود..اللى حضرتك بتقوله منطقى لحد كبير بس ما ينفعش يكون بعد...دة المفروض يكون قبل كل النواحى اللى حضرتك بتحكى عليها ..زى ماحضرتك قلت دى حاجات ترى بالعين المجردة يبقى دى من الحاجات الأوليه مش حاجات ثانوية

اللى مش متفقة معاك فيه...كل دة غير قابل للتنفيذ ماعدا موضوع النظر ولو فى أمراض وراثية زى السكر مثلا أو أمراض دم

لو مثلا واحد قصير مش هينفع يتجوز واحدة أطول منه...لو واحد طويل قوى لازم يكون طولها متناسق معاه مش يعملوا رقم 10 جنب بعض

لو واحد سمين ما ينفعش يتجوز واحدة نحيفة جدا وبالعكس لأن مش هيكون فيه تناسق فى المنظر.

اتفق معك تماما و لا ادافع عن نفسى فى هذا الفعل و لكن تلك كانت تجربه شخصيه و على ما اعتقد ان البنت التى قابلت تغير فكرها عن الزواج بعد لقائى و هذا فى حد ذاته نجاح لفكره التغيير المجتمعى المتبناه من قبلى

قد اكون قاسيا الى حد ما فى تعبيرى عن وجه نظرى و اعلم ان الفتاه لا ذنب لها و انها سليمه النيه و لكن فى بعد الاوقات التغيير يتطلب اخضاع المجتمع لصدمات شديده تجعله يعيد حسباته

اعتقد ان اوتاكا الباحث الاكاديمى قتل اوتاكا الانسان فى ذاك اليوم

المجتمع مش هيغير رأيه لما حضرتك تجرح واحدة...دة ممكن يكون كلام بتريح بيه ضميرك..

وحضرتك بتقول تعتقد إنها غيرت رأيها ...يعنى مش أكيد..

وحتى لو ده حصل...تفتكر هى تمثل المجتمع...

هى مجرد فرد واحد ولذا ما تستحقش الصدمة اللى حضرتك بتقول عليها

تحياتى

سوسورانى

[الباشمهندس ياسر]

كان فى واحدة بتخطب لابنها بس ابنها مصر انه يشوف البنت الاول قبل ما يدخل بيتهم

وفعلا .. البنت راحت لمكان كام متفق عليه وذهبت مع صديقتها وذهب هو ايضا لنفس المكان وعجبته البنت

ولما جه وقت الجد قال لوالدته انا حاسس انى مش هقدر اكمل فى الموضوع ده وحاسس انها نزلت من نظرى لأنها وافقت على هذا اللقاء..مع انهم لم يتكلموا ولا كلمة مجرد انها ذهبت وجلست مع صديقتها وهو جالس على كرسى مقابل لهم طب ده كلام والله ده معناه ايه يا اوتاكا ويا محمد يا عنبى

حسبنا الله و نعم الوكيل

ده منتهى الهمجية ف التفكير

هو فيه حد كده........!!!

الناس غالبا بتعمل مقابلة ف مكان عام قبل زيارة البيت .... حسب العادة الجديدة

لاسباب ممكن تبدو منطقية و منها انه ميتحسبش على البنت انه عريس دخل البيت و مرجعش

و انا شخصيا مؤمن ان الافضل ان الشاب يروح لغاية بيت العروسة و السبب انه من باب انه يعزها

كرامة البنت قبل كرامة الولد و كلنا لينا اخوات بنات و لازم نعامل بنات الناس زى ما نحب الناس تعامل بناتنا

[otaka]

إقتباس(otaka @ Nov 9 2009, 06:30 PM)

القصه التالبه هى تجربه شخصيه و لا اجبر احدا على الاقتناع بها او اتخاذها منهاجا لحياته فقط اردت عرض الوجه الاخر من القصه

مره من المرات و امام ضغط الاسره المالكه قمت بعمل مناوره بالقوات و ذهبت لاقابل فتاه تم ترشيحها من قبل قياده الاركان

و لانى تربيه انجليز كما يصفنى اهلى فقد صارحت الفتاه قائلا ان هذا النوع من الزاواج ما هو الا شخص يرغب فى شراء حيوان اليف يربيه فى المنزل و غالبا ما يختار الحيوان الاغزر شعرا و الاكثر ملائمه لاحتياجاته

البنت جالها صدمه عصبيه ثم ردت على اننى على حق و ان لو كل الشباب لديهم ما لدى من شجاعه بتسميه الاشياء باسمائها لانصلح حال الدنيا

و بهذا نجى اوتاكا كبير اللصوص من فخ زواج الصالونات

طيب ياستاذ اتوكا ممكن تقولنا ازاى الواحد يتزوج او يخطب بالطريقه الاوتاكيه ؟؟ يعنى وجهة نظرك فى التعارف تكون ازاى ؟؟ هل الحب من اول نظره او ايه بالظبط ؟

الطريقه الاوتاكيه دى بتفكرنى باستيفان روستى لما كان عاوز يموت اسماعيل ياسين بالطريقه الشركسيه

المهم انا لا اعرف كيف يحدث الجواز فى المجتمعات المغلقه لكن ما رايت حولى هو انه من تزوج من اصدقائى نوعان نوع تعرف على زوجته فى الجامعه و النوع الاخر فى العمل

اما موضوع الحب من اول نظره فانا لا اؤمن به لانه الاخوه و الاخوات فى العالم العربى لديهم حسابات اخرى متدين ميسور شكله كويس يعنى الحب غالبا ما ياتى بالعشره كما يقولون فى الافلام

[otaka]

اتفق معك تماما و لا ادافع عن نفسى فى هذا الفعل و لكن تلك كانت تجربه شخصيه و على ما اعتقد ان البنت التى قابلت تغير فكرها عن الزواج بعد لقائى و هذا فى حد ذاته نجاح لفكره التغيير المجتمعى المتبناه من قبلى

قد اكون قاسيا الى حد ما فى تعبيرى عن وجه نظرى و اعلم ان الفتاه لا ذنب لها و انها سليمه النيه و لكن فى بعد الاوقات التغيير يتطلب اخضاع المجتمع لصدمات شديده تجعله يعيد حسباته

اعتقد ان اوتاكا الباحث الاكاديمى قتل اوتاكا الانسان فى ذاك اليوم

المجتمع مش هيغير رأيه لما حضرتك تجرح واحدة...دة ممكن يكون كلام بتريح بيه ضميرك..

وحضرتك بتقول تعتقد إنها غيرت رأيها ...يعنى مش أكيد..

وحتى لو ده حصل...تفتكر هى تمثل المجتمع...

هى مجرد فرد واحد ولذا ما تستحقش الصدمة اللى حضرتك بتقول عليها

تحياتى

سوسورانى

من الجائز اننى اريح ضميرى و لكن من المؤكد اننى اخطات ليس فيما قلت للفتاه لان هذا راى شخصى و لكن فى قبولى او دعينى اقول رضوخى لطلبات عائلتى

هذا الخطا تسبب فى وضع تلك الفتاه فى مرمى نيران افكارى المتطرفه مما ادى الى احراجها

اما التغير و حدوثه فهذا امر نسبى فمثلا لو قام كل الشباب بنفس ما فعلت لرفضت كل البنات الجلوس اليهم و هكذا نكون قد حققنا التغيير المرجو (مره اخرى من وجهه نظرى)

[otaka]

القصه التالبه هى تجربه شخصيه و لا اجبر احدا على الاقتناع بها او اتخاذها منهاجا لحياته فقط اردت عرض الوجه الاخر من القصه

مره من المرات و امام ضغط الاسره المالكه قمت بعمل مناوره بالقوات و ذهبت لاقابل فتاه تم ترشيحها من قبل قياده الاركان

و لانى تربيه انجليز كما يصفنى اهلى فقد صارحت الفتاه قائلا ان هذا النوع من الزاواج ما هو الا شخص يرغب فى شراء حيوان اليف يربيه فى المنزل و غالبا ما يختار الحيوان الاغزر شعرا و الاكثر ملائمه لاحتياجاته

البنت جالها صدمه عصبيه ثم ردت على اننى على حق و ان لو كل الشباب لديهم ما لدى من شجاعه بتسميه الاشياء باسمائها لانصلح حال الدنيا

و بهذا نجى اوتاكا كبير اللصوص من فخ زواج الصالونات

اكيد انت عملت كدا لان مفيش قبول من النظرة الاولى

صح واللا لا

على فكره البنت كانت على قدر كبير من الجمال و من العلم و بعد ما قلت جلسنا قرابه الساعتين نتكلم فى الشان العام لانها كانت تكتب و تنشر فى جرائد عده

الاهل ظنوا اننا توافقنا و ذهلوا حينما وجدونا لم نتفق

لكن ربحت صديق كعادتى برغم اراى المتطرفه فى بعض الاحيان

[hosambob]

تحياتى لكل الأصدقاء و الزملاء الذين تفضلوا بالأجابة علي استفساراتك

و احب ان اوضح ليك .... عن تجربة شخصية ... انت من الأول هتلاقي حاجة رباني بتقلك هي دية اللي هتجوزها .. قلبك يستريح ليها و ساعتها هتلاقي الكلام بيجيب بعضه من غير ترتيب .... دة اللي حصل معايا ... و الحمد لله ... علي فكرة كانت مبتعرفش تتطبخ و اتعلمت فيه عادي .. و دلوقتي و الله ما بكلش من الشارع خلاص و اكلها بقي زي الفل ... بس انا دلوقتي مستني انها تيجي ان شاء الله بعد الحج ... لأن الأكل بتاعها وحشنى و كمان الواد آدم

علي العموم .. ربنا يوفقك ... و يرزقك ببنت الحلال اللي تسعد ايامك و تصونك في غيابك

مع تحياتي

[أحمد عيد]

السلام عليكم و رحمة الله و بركاته

أنا سعيد جداً و أنا باسمع تجارب ناس و باعيش حاجات كتير مختلفة باطلع منها بحاجات مفيدة قوي

معرفش إذا كان الناس مبقوش يتكلموا في الموضوع ده في المنتدى و للا لسه الناس متابعه الكلام بس على كل حال أنا حابب أحكي لكم عن تجربتي الوحيدة في جواز الصالونات ده.

أنا كنت بحاول أتعرف على بنت كويسة أتجوزها بأي طريقة لأني كنت بعاني من فراغ و وحدة جامدة قوي لدرجة إني اتعرفت على بنت من المغرب كنت باكلمها بالصوت و كانت بتبعت لي صور لها علشان أروح لأهلها في المغرب و أخطبها.

خدت رأي المنتور بتاعي و هو دكتور في الاقتصاد و راجل شخصية فذة فقال لي لأ و أقنعني إني لازم أتجوز بنت مصرية فقلت له فين بس المصرية؟ أنا لقيت مصرية و سبتها

فاداني رقم تليفون والدته اللي قالت لي إنها بنت مؤدبة جداً و حافظة القرءان الكريم و منتقبة بس مش حلوة قوي مش جميلة جداً فسألتها عن اسمها فمردتش تقول لي

المهم ادتني رقم تليفون أخوها كلمته و اتفقت معاه على ميعاد أروح أقابلهم

رحت في الميعاد و لقيت أخوها و خالها في انتظاري و أول ما قعدنا لقيتهم ساكتين فحكيت له من أول ما والدة الدكتور كلمتني ( طبعاً مجبتش سيرة البنت المغربية خالص)

و قلت له إني حتى ما أعرفش اسم البنت إيه فضحك و قال لي اسمها (ن....)

المهم جت البنت شكلها مش بطال و طيبة بس مش مثقفة ولا متعلمة تعليم عالي و كل تركيزها في الحياة القرءان الكريم

مشيت من عندهم بعد ما قال لي خالها فكر كويس و اعمل استخارة و بعدين بلغنا رأيك إذا كنت هتكمل و للا لأ

قعدت أفكر في الموضوع و أوزن في الأمور و قبل ما أصلي صلاة الاستخارة اتصل بي خالها و قال لي إنها مش موافقة

طويت الصفحة من غير ما أحلل فيها كتير و قلت مافيش جواز صالونات لازم أكون عارف رأي البنت في قبل ما أروح أقابلها و ما أعجبهاش

الإجابة اللي أنا اقترحتها لنفسي كسبب للرفض هي إني مش ملتحي و مش لابس جلبية بيضا و بنطلون قصير و بأتفلسف شوية في الكلام و هما ناس بسطاء

[الباشمهندس ياسر]

الإجابة اللي أنا اقترحتها لنفسي كسبب للرفض هي إني مش ملتحي و مش لابس جلبية بيضا و بنطلون قصير و بأتفلسف شوية في الكلام و هما ناس بسطاء

بسيطة يا سيدي

لو رحت لاخت منتقبة المرة الجاية ابقي اعمل التالي

متحلقش دقنك

البس توب ابيض

سروال ابيض

متتفلسفش ف الكلام

و دي وصفة سهلة

بس انت بقالك كتير كاتب الكلام ده ... طما عليك و امشي تاني

[ريمون]

اولا ربنا يتمملك بخير:blink:

ويتتملنا معاك احنا كمان بخير

قولوووووووووووووووووو اميييييييييييين كلكمممممم :happy:

فيه كلمة مهمة اوووووي لازم تكون واثق فيها جداااااااااااا

الطيبون للطيبات والخبيثون للخبيثات

ف انت وضميرك في الحياة بقى :blink:

ونيجي للجد بقى

الحوار في حالاتي كان بيجي تلقائي "مش اوي يعني"

بمعنى

كان الراجل بيبتدي يتكلم ويقول اي حاجا في اي حاجا وتلقائيا بتلاقي الموضوع قلب ماتش بينج بونج الكورة مرة عنده مرة عندي والكلام بيجيب بعضه وبتلاقي نفسك طلعت بقرارات نهائية مالهاش تالت

-مرفووووووووووض نهائي وماعندكش استعداد تشوف الطرف التاني دا اصلا

- مش عارف!!

ودي غالبا بتبقى اشارة معقولة انك تقعد معاه تاني لحد ماتوصل لقرار اخير.. :blush2:

المهم بقى

قبل كلللللللللللللل داااااااا

انت لازم تكون عاااااااااااااارف كويس اوووووووي انت عاوز ايه

اقرا اسئلتي كدا

لو عندك لها اجابات محددة وواضحة

يبقى ان شاء الله ها تتهون وتلاقي بنت الحلال :blink:

همسة...

الصراحا والحقيقة = الخط المستقيم اقصر الطرق للوصول

الله ينور عليكى اهو ده الكلام!

ربنا يوفقك للخير يا مصطفى.

رأى انك تكون على طبيعتك و ابدأ بالكلام العام مع البشاشه

ابدأ احكلها عن نفسك بصراحه و خصوصا عن حياتك الشخصيه

احكلها عن اهلك و اخواتك و ازاى و انتوا عيال كنتوا بتتعاملوا مع بعض مثلا و احكيلها حكايات الشقاوه فى الصغر

سيبلها فرصه تتكلم و تحكيلك هى كمان.

الاسئله المعتاده المباشره اجابتها محفوظه. هتسألها بتصلى هتقولك "الحمدلله". هتسألها بتطبخى هتقولك "يعنى" و ممكن تفتكر انك جى تشترى طباخه.

بدل كده احكلها عن حياتك و اخواتك و اصحابك هم بيعملوا ايه و ليه بتستريحلهم. لو هيه مكسوفه شجعها انها تحكى باظهار الاهتمام (مثلا افتكر اسم او حدث قالته و كرره بعدها بشويه. كده هتعرف انك مهتم و مركز معاها )

اوعاك تعلق على جسمها بحلو او وحش. البنات حساسين اوى للموضوع ده خصوصا من حد اول مره يشوفوه. لو اتكلمت بوحش انسى يا عمر, كارت احمر. و لو اتكلمت حلو يبقى عينك زايغه و مبصبصاتى و بتاع بنات.

لو هتعلق, علق على حاجه فوق الرقبه. يعنى مثلا علق على لون حجابها و انها مش بس متدينه لأ و كمان ذوقها حلو. كامله الاوصاف يعنى. بس متكدبش متقولش على حاجه حلوه و هى مش عجباك. فكر شويه اكيد هتلاقى حاجه حلوه :ninja: لو مش مستريح بلاش تعلق خالص. او علق على حاجه حلوه فى البيت و امدح فى ذوق العيله. البنات بيحبوا الرومانسيه و لو حسسوا ان عندك ذوق و بتميز الحاجات الحلوه هيفرحوا. متنساش زى ما انت رايح  تتعرف هيا برضو بتتعرف و ليها رأى

تم تعديل 13 مارس 2010 بواسطة ريمو

[لماضة مصرية جدا]

السلام عليكم و رحمة الله و بركاته

و الله مكزوفة......مكزوفة جدا و انا داخلة المنطشقة دي....

بس اعمل ايه....اخوكم....قصدي اختكم منضطرة

هو الحقيقة انتوا عمالين تتتكلموا انت تسال...و الكمبيوتر يجيب.....قصدي.....الولد يقول ايه.....و يسال في ايه.... ده انتوا ما شاء الله كمان بتقولوا للولاد يبص علي ايه و ميبصش علي ايه...مبسوطة بيكم اوي انا الصراحة....

طب لو سمحت

البنت الغلبانة اللي بتتحط في الموقف اللي مش عاطشفي ده......ممكن تساعدوها شوية

يعني لو انا كائن رغاي مثلا.....او صعب انه يتسال سؤال من غير ما اعلق عليهاو بمعني اصح اعديه.(و عادة بتريق).......او اني بحب ابتدي حوار

هل تعتقدوا دي حاجات مش تنفع......الحقيقة انا كنت بعمل كده.....يعني كنت طبيعية جدا و تلقائية اوي....بس كنت بحس كده الشاب بيبقي مخضوض شوية.....او...اتفاجيء برد فعلي....او اني مدتلوش السيناريو اللي هو متوقعه.....

طب اخيله هو يسال و انا اجاوب كلمة و رد غطاها......و لا اسيبله الغطا.....و لا اخده في ايدي

الحقيقة بقي.......انا عندي مشكلة......لما بقعد القعدة دي ببقي مش طايقة نفسي...لاني بحس اني عبيطة اوي.....و بعدين بحس دايما انه حد من اخواتي الاولاد....المشكلة ان ده بيبان في ردود افعالي

ممكن لو سمحت تنزلزالنا بالاجابت النموذجية مثلا

===========================

سؤال علي هامش المؤتمر.....

البس فستان بناويتي كده.....و لا خليني اسبور...و كاجوال.....

بس خلاص

فوتكم بعافية

كان معكم

انا مش هنا

[لماضة مصرية جدا]

السلام عليكم و رحمة الله و بركاته

معلشي انا تاني

بس اعمل ايه بس.......واحدة صاحبتي....كتر خيرها ردت عليا....الاقيها ايه

بعتالي الموقع ده

http://www.prameg.com/vb/t54729.html

و انا طبعا بكل غباوة العيال اللي بتلعب في الطين افتحه الاقي ايه يا مواطنين

ازاي تطفشي عريس انت مش عايزاه.. واهلك عايزينه ؟!!!

هو الحقيقة انا طول عمري مبحبش ليلة افتحوا الصالون.....و قعدوا ابو الشوباب هناك.....و يا اما اتريقت عليها بس هي شكلها كده الدنيا دووووووااااااارة

هعصر علي نفسي لمونة واقولكم حبة م الخطة يمكن حد يستفيد

"ولو في شباب اسمعوا للاخر عشان في حاجات بتهمكم:

بسم الله نبدأ الخطة سوا:

1- لا تظهري لاهلك عدم الرضا ... (عشان تعرفي تكملي الخطة)

4-اهل العريس (ابو الشباب)جم... سلمي على عم الامور.... بكل برود ... واعملي نفسك قرفانة و شايفة نفسك.

نعرف خطوات احلى ميك اب

الكحل : الكحل جميل جدا على العيون ... اتكحلي ... بس خلي الكحل

بعين اكتر من التانية..

وكدا بتضمني تكوني (حولة رسمي)

كريم الاساس: اكيد عايزين كريم اساس بس على الشفايف .. كدا يبان

معاكي فقر دم..ياعيني

الشادو : طبعا الشادو هو اللي بيخبي البلاوي (وهو اللي بيبين البلاوي )

الشادو الاسود على العيون

و ثقلييييييييه مع شادو اصفر

على وشك بدل (البلاشر)

ووكداااااااااا يبان معك كوليرا .... ههههههههاي

و لازم تلبسي احلى موديل :جيبة( تنورة) خضرا (لون الخيار ) و بلوزة حمرا (لون

الحب)

و البسي ترحة

من سنة الف و تسعمية و ستة وخمسين خشبة و السابو من العصر الحجري...

تححححححفة

طبعا سيبي الرجالة يتكلمو في المهم .... (اماااااااااااااااااااال)

ارجعي لام العريس اللي عايزة تشوف جمال شعرك

المرةدي مش هنعمل مقلب ... خليه حلو مافيش مشكلة ... سشوريه و غطيه)

بسسسسسسسس

اقعدي اهرشي و اهرشي و اهرشي قدامها ... تخيلي انه في حديقة حيوانات

في راسك ...

هههههههههههههههههههههههههاي مسكينة طنط(ام العريس)

اذا نفذتي هالخطوات مية بالمية باكدلك .. هتسمعي كلمة : " يا الله "

وتسمعي صوت ابوكي

بيقول للجماعة " شرفتونا" ... لانه الضيوف عايزين (يفلسعو ) قبل ما يتدبسو

ببلوة منيلة ....

اه رأيكم ايه رايكم .... تنفع ؟؟؟ اكييييييييييييد

اما انت ايها الشاب

فعشان ما يتعملش فيك المقلب ده مقلب ...

قبل ما تفكر تتجوز او تخطب ... تاكد جيدا انه فيك هذه الصفات

(حسب مؤسسة المقاييس و المعايير الدولية للبنات في زمن الفضائيات)

1- هيبة و جلال وتقى : سامي يوسف

2- رومانسية و جا**ية : تامر حسني

3- طولك طول احمد عز واذا اطول خير و بركة.

4-ثقافة : جورج قرداحي

5- اناقة : نيشان ديرهورتنيان.......مين ده؟؟؟؟

6-عندك مواهب (طوني ابو جودة)

7- ضحكة وسنان : محمد حماقي ...(اموت واعرف ايه المعجون اللي بيستعمله)

8-خفة دم : احمد حلمي ...

وما تنساش تتاكد انه جيبك ( جيب الوليد بن طلال)

وتكون اعمى عن غيرها .. واطرش عن عمايلها... واخرس متسالهاش ثلث

التلاته كام"

يا رب عفوك و رضاك

يعني هو الواحد الحمد لله جاب علامة حلوة و كان م المتفوقين ايه بقي اللي رماه الرمية السودة دي

ربنا يستر

فوتكم بعافية

[engmido]

طبعا يا اخواننا فى رأيى ان جواز الصالونات من انجح الجوازات بغض النظر عن اى تفاصيل لانه لا يوجد فيه تجمل ولانه يكون عن طريق وسيط خير غالبا

ويكون مشروح ظروف الطرفين بوضوح فطالما البداية على نور والنية الخالصة لله فى النكاح وطلب توفيق الله فلن يخذل الله شابا ولا فتاة ارادا العفة بعيدا عن المشى والخروج

فى الجناين والسينمات...حتى لو مفيش نصيب كل واحد فى مصلحته وخلاص انتهينا

وربنا يوفق كل واحد الى رفيق الحياة المناسب

[الباشمهندس ياسر]

اوعاك تعلق على جسمها بحلو او وحش. البنات حساسين اوى للموضوع ده خصوصا من حد اول مره يشوفوه. لو اتكلمت بوحش انسى يا عمر, كارت احمر. و لو اتكلمت حلو يبقى عينك زايغه و مبصبصاتى و بتاع بنات.

:roseop: :lol:

طب الحل اييييييييييييه

الشاب لو معلقش خالص .. هيتقال معدوش نظر ... هو مش واخد بالي اي م الصبح عند الكوافير

[عادل أبوزيد]

للرفع للباحثين عن العروسة