طعـــــم طــازا

[أشرف محمد شلقامي]

((( طعم طازا )))

ــــــــــــــــ

كأن أوِّل مرَّه الشمس تطلع من شروقها

كأن أوَّل مرَّ ه الشمس تهرب من شقوقها !!!

كأن أوِّل مرَّه الشمس تعرف فين حقوقها

شمس تانيا

لدنيا تانيا

بنت بِكِر .....

كأن أوِّل مرَّه الشمس تخش دنيا

تحس بيها وتدفها فيها ...

تبِّل شوقها !!!

طعم طازا لفرحة حلوة ...

جاها يوم الشمس عرفت فيه تدوقها

شمس ورده

شايفه شاهده

ع الأرض صحيت بعد نومها

نفضت هدومها من همومها

ودمَّها بيجري ف عروقها

***

حد غيرنا من سنه

ف الزمان ده كان هنا

ف المكان ده كان هنا

حد غيرنا أكيد مش احنا

عمرنا ما كنَّا جينا .....

عمرنا ما كنَّا روحنا

كنا منّا رايحه روحنا

كنَّا صفر وعن شماله كان طارحنا !!!

ولا يوم ف أرض الخوف طرحنا

غيرسنابل للسكوت !!!

ولا يوم حيينا غير ف موت

من زمان من عهد توت !!!

والحكايه ع الحجاره كان داققها

***

كنت فين بايت يا صُبح؟؟؟!!!

طال غيابك..... ده يصح ؟؟؟!!!

ليك ياحبيب الروح حدايا ألف وَحشه

وف غيابك دنيتي دي ألف وِحشه

كنت عايش نص ميت نص حي

كنت عارف أنت راجع ....أنت جاي

كنت عارف إن أنا هاصعب عليك

بالأماره كنت بمسح دمعتي دي من عنيك

بالأماره كنت بسمع همستك ... : إدَّن ياديك !!!

وجيت أديك

فارد إيديك

وبروحي روحت وطرت بيك

وبروحي دوبت ودقت فيك

ألف طعم لألف شهد

والنهارده ما زيي حد

ربنا حقق لي وعد

شوكي شاله .. اداني ورد

من حقي أناأفرح بجد

من حقي أنا أحسب واعد

النهارده الشمس كان أوّل شروقها

مش هاتهرب تاني يوم تدخل شقوقها

ساعة الخلاص ... دقت خلاص

يا خلق هو... يا بشر ياناس

الشمس أهي شافت شروقها

(( من ديوان ـــ بـــُق عصيــر حُــرية ــ للشاعر / أشرف محمد شلقامي ))

[لماضة مصرية جدا]

لسلام عليكم و رحمة الله و بركاته

طعم طازا

و احساس طازا

و مشهد تعيشه بكل تفاصيله

من يومين كنت بقرا حاجة لارنست هيمنجواي....كان بيتفنن انه يوصف حبة الكمثري و من كتر ما وصفها...لزجة و طرية و دايبة...تحس القاريء داقها

اهو ده احساسي مع كلمات حضرتك

شكرا حد الفرحة الحلوة

اللي هي بطعم طازا

((( طعم طازا )))

والنهارده ما زيي حد

ربنا حقق لي وعد

شوكي شاله .. اداني ورد

من حقي أناأفرح بجد

من حقي أنا أحسب واعد

(( من ديوان ـــ بـــُق عصيــر حُــرية ــ للشاعر / أشرف محمد شلقامي ))

حلوة اوي

بس سؤال

عنوان الديوان....بق عصير

و القصيدة...طهم طازا

طب ايه بقي؟؟؟

انت بتكتب و انت جعان......(بهزر طبعا:)

مستنين بقية الوليمة السهلة الممتنعة...

[أشرف محمد شلقامي]

لماضة مصرية جداً / السلام عليكم ورحمة الله

أنا بحاجة إلي حالة إلهام كالتي كنت عليها ساعة كتابة القصيدة !!!

أنا أمام تعليقك الرائع الرائق الراقي المبهج الجميل.....

في أمّس الحاجة إلي حالة لا شعورية لأجد من الكلام ما يليق للتعليق .

ألتمس منك بعض العذر لكل التقصير الذي أنا عليه .

وكعادة بخلي لا أجد غير شكر المُقل.

فلك كل التحية

وكل الشكر

والشكر كله .

[أشرف محمد شلقامي]

لماضة مصرية جداً /

وعن سؤالك ( هل أكتب وأنا جائع ) ؟!

الإجابة نعم .

أكتب وأنا جائع للحرية

والشمس

والنهار

والأرتواء من حلم خرافي مازال يلازمني !!!

ولا أريده يتحقق !!!!!!!!!

حتي أنعم ببقاء لذة دهشة الإكتشاف (( حين الحلم يتحقق .. تموت الدهشة ))

لك كل التحيات

وشكر دائم متصل موصول

[shahd]

سلمت اناملك ..

[أشرف محمد شلقامي]

شهــد

السلام عليكم ورحمة الله

لحضرتك كل الشكر والتحية والتقدير والإحترام