صورة زيتية ....... لسيرة ذاتية

[أشرف محمد شلقامي]

(صورة زيتية ... لسيرة ذاتية )

ــــــــــــــــــــــــــــ

***

كأني لسه ف السكة

واخدها قياسة كعَّابي

بسهري أحن أحبابي

هُمَّا كـــل أصحــابـي

شجر الكافور الكبير الليِّ متعافي

يوماتي يطبطب علي أكتافي

ويفرش حصيرة للضلة قدامي....

لو شافني يوم حافي

حال ( الكاوتش ) تحت أقدامي

مكنش عليه ف يوم خافي !!!

شجر الكافور القديم

مكنش لئيم

وقلبه رحيم

وكان عارف إني يتيم

وأني إبن ( هجالة ) !!!

وبؤسي كان حالة

***

النخل اللي واقف وحده ع السكة من سنة أولي

ومش بيخاف من أمنا الغولة

ولا م السقعة والعتمة

وزيي بيكره الزحمة

وزيي فاهم الفولة !!!

وشايف جوعي ( بيحرجم ) ف عراجينه !!!

وشايف ريقي بيدندن ... إني من محبينه

وبيقوله يا سيدي يا مسَّكر

حليّ حنكي إللي متمَّرر

ولاّ المُر مكتوبي ومقدَّر

وكل أيامي سنة أولي؟؟؟ !!!

***

الكلب الأسمر الطيب

إللي راقد حدا ( المكنة )

ساعة ما يشوفني...

تبقي الدنيا م الفرحة مش سايعاه

كأن عضم كل الدنيا حداه !!!

وبعد ( الهوهوة ) و الطبطبة والقول

احط له ف حنكه نُص سندوتش الفول

وأخد رأيه ف ( حياقه ) وف الخلطة !!!

زيي ما بيحبّش الشطة

ونفسه يشوف لي ف يوم شنطة !!!

فيها قلمي وكتابي

كلبي ف قلبي أغلي أصحابي

***

صوت الوابور الأصفر أبو كباس

بيصحي معايا ف الفجر ولوحديه

صوت الراديو ( المخنفس ) والحجر بجنيه !!!

وغصبن عن عنين وداني أسمع ...

صوت الوابور مضفور مع الراديو !!!

أهي حاجة وخلاص كل يوم

تطيَّر م العنين النوم

***

قعادي لوحدي ف الشمس ف الفسحة

ضل ( المظلة ) محجوز للعيال إللي بتدخل ( الكانتين )

وياكلوا سندوتشات المربي

أو بسكويت محشي من ابو قرشين

أو يشربوا سجاير فرط سرقه من الناظر

والناظر مشارك سرقة بالنُص ف ( الكانتين ) !!!

ناظر معندوش قلب ... يمكن معندوش دين

***

الجلدة عزيزة إللي معلمه ف جلدي

وجلدها بيكره ريحة الأيتام

وكله حداها بكام

وقلبها بس بيعرف يعد ف فلوس الدروس !!!

وعلي بكره الجميل بيدوس

وبيزرع وراه ألغام !!!

***

لبس التربية الرياضية

ف الفاترينة بيفصل ما بيني وبينه قزاز ....

سُمكه بطول المسافة من بيتنا لإعدادية مدرسة ( شم )

رايح جاي ف ( القيالة ) ف شهر يوليو

وأحلام بطول المسافة من بيتنا لــ ( باتا ) ف مغاغة !!!

وأستاذ مش عايز يصدق غيرالظنون الكذب

وإني زي العيال إللي حداهم أب

عندي قلب زيهم بيحب ....

لعب الكورة ف الفسحة قدام البنات !!!!!!!!!!!!!!

إن شا الله حتي أقف لهم ف الجوُّن

بس لو أستاذي كان يرضي

إن شا الله حتي أجيب الكورة م الغيطان إللي ورا العارضه

ويتقطع قلبي وفردة ( البلاستك الملحوم ) !!!

وأشبع شتيمة ولوم

من الراجل إللي ف آخر شبر ف الدنيا

هربان ف الغيطان م الموت

وحالف ما حد يفوت

ومغطي حزنه بورقة توت !!!

وبينه وبين الفرح والكلام الطيب تار

***

مرواحي المدرسة من غير فطار

وبعد المسافة والمشي والمشوار

وحاجات فوق العدد والحد

خلت ما بيني وبين الفرح ألفين حد

خليتني أشوف الدنيا ألفين جد

مع إني ودي الحقيقة بجد

حزني مكنش أختيار

حزني مكنش قرار

مع إني ودي الحقيقة بجد

كنت أتمني أعيشها ولو شوية هزار !!!

مع إني ودي الحقيقة بجد

كنت أتمني أشوفها ولو شوية هزار !!!

[باهى الطائر الحزين]

صوره بلاغيه ..

ولا اجمل ولا اروع

للحياة اليوميه ' وسنابل ذهبيه

تعبق المكان برائحة قريتى المنسيه

شكرا ومن كل زوايا الرؤيا ...

[باهى الطائر الحزين]

انطفأت الأضواء

إلا من ضياءك علينا

ارقب فى شغف اطلالتك على اللوحه هنا

لأعتقادى وان بها مايدعو ويستحق

اشراقك عليها / مدام سلوى

تم تعديل 23 يناير 2012 بواسطة طائر الليل الحزين

[أشرف محمد شلقامي]

طائر الليل الحزين

السلام عليكم ورحمة الله

الأروح هو تحليقك المبهج ، بجناحين من الأنس والونس ، فوق حروف بسيطة

لك كل الشكر والتقدير والإحترام والمودة

[لماضة مصرية جدا]

مرواحي المدرسة من غير فطار

وبعد المسافة والمشي والمشوار

وحاجات فوق العدد والحد

خلت ما بيني وبين الفرح ألفين حد

خليتني أشوف الدنيا ألفين جد

مع إني ودي الحقيقة بجد

حزني مكنش أختيار

حزني مكنش قرار

مع إني ودي الحقيقة بجد

كنت أتمني أعيشها ولو شوية هزار !!!

مع إني ودي الحقيقة بجد

كنت أتمني أشوفها ولو شوية هزار !!!

السلام عليكم و رحمة الله و بركاته

كنت اتمني اشوفها و لو شوية هزار

طب يمن قالك ان الحياة...مورجيحة بين الجد و الهزار

و مين قال ان حد ممكن ياخد فيها قرار

اوقات بنطلع صندوق ذكريات

و نلون الحكايات

بس اللون لازم يكون طالع من القلب

علشان اكيد لسه فيها شيء يتحب

الحياة

صورة زيتية

بنحاول نرسمها بملامحنا الحقيقية

ملامح تطلع من قلب عرف الحزن

بس لسه مصدق ان فيها فرحة متدارية

يمكن تكون عن العين منشالة

بس هي اكيد...لو صدق القلب...مش راح يلاقيها استحالة

=====================================

و النبي ما تضحك علي البوقين

كتبتهم و هقراهم بعدين

عجبتني الصورة الزيتية

بس بحب الالوان الشقية

و بحب اللون اللي يفتح دراعاته لكل فرحة مستخبية

بجد متضحكشي عليا

انا بس اللي اضحك

:) :) :)

[أشرف محمد شلقامي]

لماضة مصرية جداً

السلام عليكم ورحمة الله

علي أطراف رصيف الغربة البعيد

حيث لا شيء غير صهد الإنتظار .....

لرشفة ماء من سراب الأمنيات !!!

يأت طائر أبيض يمطرني من جناحيه...

شهد كلمات عذاب

ينسين الروح عذاب

ـــــــــــــــــ

لك كل الشكر والشكر كله .