كنت فين 25 يناير السنة اللي فاتت

[Ahmed Anwer]

الموضوع مش محتاج تفسير

الموضوع هوا العنوان ،،

أنا كنت في أمستردام :)

و قضيت يوم ظريف مع صديق مصري عزيز في أماكن ساحرة في الريف الهولندي

آخر اليوم خالص عزمني في مطعم صيني

و كلمنا واحد صاحبنا ثوري جدا و عرفنا منه إن الثورة الحمد لله قامت في مصر

أنا كنت متابع كلنا خالد سعيد و ماضي بيان التغيير

و قبل ما أسافر من مصر يوم 17 يناير كنت موصي الناس و بفكرهم :)

و أتعلقت في أوروبا عشان مكنشي فيه طيران

و مرجعتش غير يوم موقعة الجمل رأسا من المطار إلي ميدان التحرير

و معرفتش أدخل كنت واقف ناحية البلطجية :)

عدت أيام و مقدرتش اشارك في أي يوم في الثورة

و سبحان الله ما شاركتش غير يوم التنحي من صلاة الجمعة ،،

روحت مع اللي كانوا محاصرين القصر الجمهوري

حسيت أن نزلتي دي هيا اللي خلصت الموضوع ههههههه

أما عن المشاعر فمحتاجة تعليقات أطول بكثيييير

[التونسى]

سبحان الله يا استاذ احمد انا موعود بالثورات هههههههههههه .. السنه اللى فاتت حضرت الثوره بمصر... وكنت فى اخر اسبوع من اجازتى .. اللى اتمدت لخمس شهور بعد كده ... لما قامت الثورة الاولى ونجحت .. ... والمره دى برده فى اجازه .. واجازتى حتخلص كمان اربع ايام .. فهل يا ترى حتتمد تانى :unsure: ؟ الله اعلم

انا يمكن الكلام اللى جاى ده اول مره اقوله فى المحاورات

انا بقى مش عارف اقول انى سيئ او سعيد الحظ .. لانى كنت فى القاهره يومين بالضبط قبل الثوره ..بتعالج عند دكتور .. ونمت فيهم كمان فى فندق فى التحرير ,, وسافرت ليلة الثورة بورسعيد ..ومخرجتش خالص من البيت نظرا لتعبى.. وكان عندى متابعه مع الدكتور بالقاهره ليلة يوم الغضب .. ومردتش ابات .. ويوميها دار بينى وبين سواق التاكس فى القاهره حوار حول توقعاته ليوم الغضب .. قاللى خلال الحوار وأكد لى انها بالنص ((ح تتلم)) .. وقد كان ما كان .. وما هو مخالف لكل التوقعات

تانى يوم بعد يوم الغضب اللى انسحبت فيه الشرطه .. نزلت الشارع .. وشهدت بنفسى حرق احد اقسام الشرطه وصورت الحدث ده للتاريخ .. وأحد عربات الشرطه كادت ان تنفجر بجانبى .. لولا ستر ربنا انى بعدت عنها فى الوقت المناسب .. فى اليوم ده مصدقتش ومتصورتش انى فى يوم من الايام حتحط فى موقف زى ده .. وحكون بالجراءه دى .. يااااااه .. اليوم ده كأنه قدام عنيا دلوقتى .. وعمال اتفرج على الفيديو .. وانا فيه بصرخ فى الناس متحرقش القسم .. وعمال اقولهم بشكل يثير ضحكى الى الان ((خلاص يا جماعه البلد امبارح مكنتش بلدنا .. والنهارده بقت بلدنا .. الاحتلال مشى خلاص .. متخربوش البلد )) معرفش انا ايه اللى خلانى اقول الكلام الغريب ده ساعتها .. وايه اللى خلانى اتشجع فى مواجهة الناس اللى كانت بتحرق وتخرب .. رغم انهم كانوا معاهم سنج ومطاوى وخلافه .. لانى انا بطبيعتى بخاف وبتجنب الاحتكاك بالناس اللى زى دى .. لكن اهو كان اختبار وخبره جيده ليا

انا عشت الثوره بكل احداثها واجوائها .. بقلبى وروحى وعقلى ووجدانى .. ويمكن المره دى مستعد لاى حاجه تحصل اكثر من السنه اللى فاتت .. وان شاء الله مش حيحصل شئ

تم تعديل 25 يناير 2012 بواسطة محمود البصيلى

[ابو محمود]

كنت بالميدان وانا بالامانة لسة توآ جاي من هناك وكان معي المهندس ياسر علام وهو زميل بالمنتدى وكنا بنتكلم المرة دى عن احوال المنتدى وما وصل الية من اختلافات ومحاولة للتضيق على من يخالف البعض الرأي ومن ثم افترقنا كلآ الى بيتة منذ ساعة ونصف تقريبآ وكان معي ابنى الصغير محمود وكانت الامطار تتدفق علينا من السماء وكان مشهد الميدان غير سار

[Alshiekh]

25 يناير 2011

أمام الكمبيوتر

متابع لقناة الجزيرة لمعرفة آخر الأخبار

على التليفون مع الأسرة لمعرفة آخر الأخبار

قناة دريم2 تذيع أخبار عن مظاهرات في لبنان ( أخبار مظاهرات مصر لم تكن وصلت لقناة دريم بعد!!! )

عودة مرة أخري لقناة الجزيرة

[capitshino]

كنت فى شارع شبرا

وكنت منتظر اليوم ده من زمان

بس للاسف مظاهرات شارع شبرا الناس اللى فيها اتسحلت

مناظر صعبة كتير شفتها اليوم لسه فاكرها كأنها حصلت امس

رجعت لبيتى الساعة 5 عصرا بسبب ظرف طارئ .

تم تعديل 25 يناير 2012 بواسطة capitshino

[عماد حمدي]

كنت في الإمارات و مازلت

منذ بداية الدعوه لثورة 25 يناير كنت بتابع الصفحات علي الفيس بوك

و براقب الأوضاع و توقعات البعض هل ستنجح مثل تونس أم لا

يوم 25 يناير بدأت بمتابعة أحداث الثورة أنا و مجموعه من الأصدقاء

4 لاب توب و 2 تليفزيون و سندوتشات جبنه رومي

و قاعدين فاتحين كل القنوات و علي الفيس بوك

فتحت شات جماعي لكل أصدقائي المُغتربين في دول تانية و أماكن تانية

كلنا في غرفة دردشة واحدة

بنتابع أحداث الثورة من الإعلام

و نبلغ بعض

لدرجة ان لو واحد فينا كان عايز يروح يتغدى يرجع يلاقي في غرفة الدردشة كل اللي فاته

كأننا فعلاً كنا مع بعض

في الشركة هنا كان الكل بلا استثناء متوقّع الفشل للثورة دي

و انها هتتلم في ساعة و كله يروّح بيته ، مفيش حد كان متوقّع سقوط حسني مبارك

اتراهنت معاهم علي انها هتنجح

و كان فيه واحده الله يمسيها بالخير بقا ( دي حاله استثنائية )

يوم ما الجيش نزل بالدبابات في الشوارع

لقيت دي جاية بعدها بتقولي بإستغراب شديد

إيه دا مصر فيها دبابات في الشوارع هوه فيه إية !!؟؟

دا انا كنت ماشية في المول مع جوزي و لقيت شاشة عرض و فيه دبابات في مصر

هوه فية اية !؟!؟!؟!؟!؟!؟!!

أنا طبعاً كنت هتشل و يجيلي الضغط لان البلد كانت مولّعه و دي متعرفش أي شيء عن الثورة من الأساس

يوم الخميس قبل التنحي كان الكل متوقع انه هيتنحي

كلنا جالنا إحباط في اليوم دا

يوم التنحي كان أجمل يوم في حياتي نزلت انا و صحابي نحتفل باليوم دا علي طريقتنا الخاصة :)

الكل من أصدقاء غير مصريين قدموا لي التهنئة بنجاح ثورتنا

و مازلت حتى اليوم خارج مصر أتابع الأحداث عن طريق الإنترنت و الإعلام

بس يا سيدي و خلصت الحكاية :)

[ابو محمود]

كنت في الإمارات و مازلت

منذ بداية الدعوه لثورة 25 يناير كنت بتابع الصفحات علي الفيس بوك

و براقب الأوضاع و توقعات البعض هل ستنجح مثل تونس أم لا

يوم 25 يناير بدأت بمتابعة أحداث الثورة أنا و مجموعه من الأصدقاء

4 لاب توب و 2 تليفزيون و سندوتشات جبنه رومي

و قاعدين فاتحين كل القنوات و علي الفيس بوك

فتحت شات جماعي لكل أصدقائي المُغتربين في دول تانية و أماكن تانية

كلنا في غرفة دردشة واحدة

بنتابع أحداث الثورة من الإعلام

و نبلغ بعض

لدرجة ان لو واحد فينا كان عايز يروح يتغدى يرجع يلاقي في غرفة الدردشة كل اللي فاته

كأننا فعلاً كنا مع بعض

في الشركة هنا كان الكل بلا استثناء متوقّع الفشل للثورة دي

و انها هتتلم في ساعة و كله يروّح بيته ، مفيش حد كان متوقّع سقوط حسني مبارك

اتراهنت معاهم علي انها هتنجح

و كان فيه واحده الله يمسيها بالخير بقا ( دي حاله استثنائية )

يوم ما الجيش نزل بالدبابات في الشوارع

لقيت دي جاية بعدها بتقولي بإستغراب شديد

إيه دا مصر فيها دبابات في الشوارع هوه فيه إية !!؟؟

دا انا كنت ماشية في المول مع جوزي و لقيت شاشة عرض و فيه دبابات في مصر

هوه فية اية !؟!؟!؟!؟!؟!؟!!

أنا طبعاً كنت هتشل و يجيلي الضغط لان البلد كانت مولّعه و دي متعرفش أي شيء عن الثورة من الأساس

يوم الخميس قبل التنحي كان الكل متوقع انه هيتنحي

كلنا جالنا إحباط في اليوم دا

يوم التنحي كان أجمل يوم في حياتي نزلت انا و صحابي نحتفل باليوم دا علي طريقتنا الخاصة :)

الكل من أصدقاء غير مصريين قدموا لي التهنئة بنجاح ثورتنا

و مازلت حتى اليوم خارج مصر أتابع الأحداث عن طريق الإنترنت و الإعلام

بس يا سيدي و خلصت الحكاية :)

ترجع بالسلامة يا عمدة رسالتك وصلت وانا على الهواء مباشرآ هههههههههههههههههالان

[عبير يونس]

ع المحاورات وقناة الجزيرة و صفحات رصد وخالد سعيد

18 يوم من البكاء و الخوف والرجاء و الدعاء

يوم التنحي

طلع لسلافة بنتي الاربعة قواطع الأمامية مرة واحدة و كانوا متأخرين :closedeyes:

ما فرحتش يوم التنحي

وبدأ الخوف يعتريني

ومن يومها حتى الآن اقاوم هذا الخوف

بالأمل في رحمة ربنا وحده

[خالد شحاته]

كنت في مطار القاهره استقبل

الاهل كانو راجعين علشان كان فيه ندوه للدكتور ابراهيم الفقي بس كنت في اجازه في مصر جالست 4 شهور

اما الان في الرياض كنت اتمني اكون بالقاهره

[اثار]

كنت نايمه لاني كنت تعبانه بقالي يومين وطبعا الدهشة والفرحة ضيعوا كل التعب

كنت سمعت قبلها ان هيكون في مظاهرات بس كنت بقول لنفسي معقول هنبقي ذي تونس

قبلها وبعد انتصار ثورة تونس اتصلت بأختي بقولها شوفتي اللي حصل في تونس

قالتلي عقبال اللي بالي بالك قولتلها يا رب بس ده مستحيل

فعلا والله كنا كلنا بندعي ربنا بالدموع ان الثورة تنجح وكنت متخيلة

ان مبارك والعادلي عندهم استعداد يفجروا التحرير باللي فيه ولا انهم يسيبوا

مناصبهم ................

يوم موقعة الجمل انفجرت بالبكاء في مكان عملي من سماعي لتعليقات الزملاء

انها خلاص خلصت وقولت البلد دي مش ممكن تقوم لها قومه تاني اذا فشلت الثورة

لا قدر الله ..............

قبل التنحي بكام يوم كنت متفائلة جدا وتذكرت حديث الرسول صلي الله عليه وسلم

"ان الله يملي للظالم حتي اذا اخذه لم يفلته" صدق رسول الله

وربنا يتمها علي خير وتحقق كل اهدفها وكفاية كده ذل لمصر وللمصريين

انا والله اخويا كان بيقول كنت بخجل اقول اني مصري لحد ما قامت الثورة

وعن نفسي عمري ما حسيت بالوطنية اللي كنت بسمع عنها في الاغاني الا بعد الثورة

خلونا نحس اننا اغراب في بلدنا ..........

[abdulmuttaleb]

موضوع هايل، شوفوا بقى أنا مش ح أقعد أسرد تفاصيل كتير، أنا نقلت لحضراتكم الستيتوس بتاعت الفيسبوك الخاصة بي، وهي تمثل تأريخا للثورة المصرية وتوثيقا لأحداثها طبقا لما عايشته شخصيا.

http://notegpresident.blogspot.com/2012/01/revolution-mubarak-jan25-egypt-protests.html

عموما أنا يوم 25 يناير تجولت في مدينة نصر والقاهرة الجديدة وسيتي ستارز وشارعي النصر وعباس العقاد حتى المساء، وكانت الحياة طبيعية جيدا واعتقدت أن الإعلام والفيسبوك يهولان من الأمر وأنه لا يوجد شيء خطير وأن الموضوع هو مبالغات إعلامية من الجزيرة وغيرها من شبكات الفيسبوك الإخبارية خصوصا شبكة رصد التي كانت سباقة في نشر إشاعات وأخبار غير صحيحة (باعتراف مؤسسها أنس حسن قبيل أيام على تويتر مع ذكرى الثورة).

يوم الخميس اللي هو 27 يناير حوالي 9مساء في طريقي من مدينة نصر حيث أعمل لرمسيس ثم الإسكندرية حيث أعود من عملي بالقاهرة لمنزل الأسرة، لم ألاحظ شيئا غريبا كان الطريق عاديا ولا مظاهرات ولا زحام، وهو ما زاد اعتقادي بأنه لا يوجد شيء مقلق وأن الدنيا عادية جدا ولا توجد أية مشكلات، وأن "المشكلة" ربما في بضع آلاف متمركزين في ميدان التحرير ليس أكثر.

طبعا حصل قطع الانترنت وأنا في طريقي للإسكندرية (اليو إس بي توقفت عن العمل)، ثم انقطع المحمول وأنا نازل لصلاة الجمعة، وطبعا تابعت أمام التلفاز ما كان يجري وفي صلاة المغرب نزلت إلى محطة مصر وجدت زحام ودخان متصاعد من جهة مديرية الأمن القديمة ثم مع حلول العشاء قابلت عند محرم بك حيث كنت أسكن شباب صغير السن بيقولوا هو فين قسم باب شرقي (وكان بدأ يحترق) وبدا لي كأنهم شباب قدموا من مناطق وأماكن أخرى للمشاهدة العبثية.

أخذت السيارة بعد العشاء وقررت أن أتجول في المدينة لأرى ما الذي يحصل بالضبط، وشاهدت شارع أبو قير كأنه يوم القيامة السيارات قليلة، وإطارات محترقة وعربيات ماشية عكس الاتجاه وجهة إشارة الإبراهيمية وجدت زحام المتظاهرين فأخدت اليوتيرن كأني راجع لمحطة مصر وشفت مكتب المخابرات العامة مغلقا بالضبة والمفتاح وطبعا تجمهرات عن قسم باب شرق ودخان متصاعد

أيقنت حينذاك ومع المشهد المروع للشارع بأن هنالك شيئا خطأ بيحصل في البلد

عدت للتمركز أمام التلفزيون لمتابعة الأخبار وبدأنا النزول في لجان شعبية منذ يوم السبت

صباح السبت قتل شاب كان ضمن محاولي اقتحام قسم محرم بك وكانت هناك معركة حقيقية صباح باكر السبت عند القسم سمعنا الطلقات من البيوت

نزول الجيش أول ضابط شفناه كان مساء السبت متأخرا وشفنا بقى مدرعة ماشية

والناس كان شوية وتشيل الضابط ده شيل وتبوسه وأحضان ودموع ونفس الكلام في التصفيق والتكبير لمدرعة الجيش

أسيبكم بقى مع الفيسبوك الخاص بي أثناء ثورة 25 يناير الجزء الأول بالتفصيل الممل

http://notegpresident.blogspot.com/2012/01/revolution-mubarak-jan25-egypt-protests.html

تم تعديل 27 يناير 2012 بواسطة abdulmuttaleb

[engmido]

كنت فى الشغل وبعدين روحت زرت بابا وبعدين طلعنا صورنا ملك بنتى

اه والله

...هههههههه

[الأمومة]

الحمدلله كنت فى بيتى

[أبو معتز]

25 يناير 2011

كنت فى الامارات .... ابو ظبى .... والى الان

قاعد فى البيت وفاتح التلفزيون وعمال اقلب على جميع القنوات الى ممكن تجيب اى اخبار عن مصر

وفاتح لينك مع اصحابى جوة مصر وبرة علشان نطمن على الاوضاع

وكل 5 دقايق اعمل اتصال تليفونى للاهل فى مصر اطمن عليهم

طبعا احساس صعب اوى انك تبقى بعيد عن اهلك فى الاوقات دى

شعور غريب ... خوف على اهلك فى مصر ..... فرحة بمنظر الناس الى رافضة الاوضاع السيئة .... حزن على الضحايا ..... ترقب وقلق

تم تعديل 27 يناير 2012 بواسطة أبو معتز